حكايات منار

حكاية " وهم كبير "

بعد اسبوع
ايلين :سارة يا سارة
سارة :ايوه يا نسرين صح لا..لا نيفين
ايلين :ايلين
سارة :انا اسفة بس مبحفظش الاسماء بسرعة اذيك يا ايلين
ايلين :i'm fine and you
سارة :كله زى الفل بس كلمينى عربى
ايلين :انا اسفة انتى مبتعرفيش..
سارة قاطعتها :اكيد بعرف انا فى الجامعة الامريكية بس ملوش لزوم نعوج لسانا على بعض
ايلين :يعنى ايه نعوج لسانا
سارة وهى بتضحك :لا احنا نتكلم انجليزى اسهل بدل ما بتسألينى عن معنى كلامى كأنى بكلمك بالصينى كده
ايلين :مش قصدى اضايقك والله انا بس فعلا مش فاهمة
سارة :ايه العسل ده انتى كيوت جدا يا ست الكل مضايقتش ولا حاجة ونعوج لسانا معناها نلكلوك مع بعض بالانجليزى ..انتى مش فاهمة يعنى ايه نلكلوك صح
ايلين :الصراحة اه
سارة :نتكلم مع بعض يعنى المهم انتى ايه اللى جايبك عندنا انتى ليكى صحاب هنا
ايلين :لا بصراحة جاية علشانك بقالى كام يوم باجى هنا علشان اشوفك
سارة باستغراب :تشوفينى ليه
ايلين :هو يعنى بصراحة عايزة نبقى صحاب
سارة :عايزة انا وانتى نبقى صحاب
ايلين :اه
سارة :ليه
ايلين :هو ايه اللى ليه هو الناس بيبقو صحاب لسبب
سارة :اه لما يكونو مختلفين عن بعض زى انا وانتى
انتى عارفة انى هنا بمنحة تفوق وانى مختلفة تماما عنك وان المجتمع اللى انا عايشة فيه مختلف تماما عن المجتمع اللى انتى عايشة فيه
ايلين :احنا زى بعض عايشين على نفس الارض وفوقنا نفس السما
سارة :حلو كلام الصحافة ده لا احنا مش زى بعض الارض اللى انتى عايشة عليها مختلفة عن الارض اللى انا عايشة عليها صدقينى انا ادرى احنا مختلفين
ايلين :وهو علشان مختلفين مينفعش نبقى صحاب
سارة :اه علشان الناس هيقولو مصاحباها على ايه
ايلين :so what people always talk قصدى يعنى الناس دايما بتتكلم ومش بيبطلو كلام
سارة :انتى مفكرانى تجربة جديدة صح البنت الراقية اللى من الطبقة الكلاسى بتصاحب بنت عادية من الطبقة الفقيرة الكادحة مغامرة انا تضيعى بيها الملل اللى حاسة بيه
ايلين :انا مبعرضش على حد صداقتى وانا معتبراه تجربة انا مش تافهة للدرجة دى واضح انى غلطت لما فكرت اننا ممكن نكون صحاب بعد اذنك
سارة وهى بتمسك ايدها :استنى انتى بجد عايزانا نكون صحاب
ايلين :ايوه بس شكلك مش عايزة فخلاص
سارة :لا انا بس مش مصدقة او يعنى مستغربة
ايلين :ليه يعنى
سارة :اصلكم عندكم حساسية من وجودنا وسطكم هنا
ايلين :مين اصلكم
سارة :كل اللى هنا او على الاقل اغلبهم وعلى حظى انا اتعاملت مع اغلبهم دول اللى بيعتبرو وجودى انا واللى زيى هنا كارثة كونية منتهى العنصرية والطبقية وحاجة اخر قرف
ايلين :مش هقولك انك غلطانة فى ناس فعلا بتفكر كده بس انا مش منهم صدقينى وجودك هنا حقك ومش كارثة كونية ولا حاجة
سارة :حقى
ايلين :اه مش انتى هنا بمجهودك
سارة :ايوه طبعا
ايلين :يبقى خلاص وجودك هنا حقك واللى مش عجبه يمشى هو او يخبط دماغه فى الحيط
سارة :كلها كام شهر واتخرج واغور من وشهم
ايلين :ان شاء الله بعد اذنك
سارة :استنى بس انتى بجد عايزة نبقى صحاب
ايلين :ايوه قولتلك بجد عايزة نبقى صحاب
سارة :خلاص ماشى انا موافقة بس بشروطى او يعنى خليها بقواعدى ولو انتى ليكى قواعد برضه قوليها
ايلين :مكنتش اعرف ان الصداقة ليها شروط او قواعد بس تمام قولى
سارة :بصى هى حاجة واحدة مش هنعمل حاجة تحسسنى بالفرق المادى والاجتماعى اللى بنا يعنى لما تكونى معايا هنتصرف حسب امكانياتى انا بس لما مكنش معاكى انتى حرة طبعا
ايلين :تمام بس لو مثلا حبيت اعمل شوبينج ممكن اخدك معايا
سارة :انتى هتبقى عايزة تاخدينى معاكى
ايلين :اه انتى زوقك فى لبسك حلو
سارة :غريبة بيبصولى هنا كأنى جاية بجلابية فلاحى عليها ورد علشان مش بلبس براندات
ايلين :الشياكة مش بالبراندات بس وانتى لبسك شيك وحلو والوانه متناسقة
سارة :اوعى تكونى بتجرى ناعم فى الاول علشان بس نبقى صحاب
ايلين :لا هو انا مش فاهمة يعنى ايه بتجرى ناعم بس شكلها حاجة وحشة فلا انا مش بعمل كده انا بتكلم بجد
سارة :بتجرى ناعم يعنى بتقولى كلام حلو علشان تأثرى عليا وبس هاتى رقمك طيب
ايلين :ليه
سارة :هنبقى اصحاب ازاى واحنا معناش ارقام بعض
ايلين :خدى اكتبى رقمك..تمام انا اللى برن عليكى ده رقمى سيفيه
سارة :تمام..سيد بيرن انا اتاخرت اشوفك بعدين مع السلامة
ايلين بابتسامة :مع السلامة