حكايات منار

حكاية " على طول دراعكم "

بعد خمس ايام
زياد :مال صوتك
لميس :ماله صوتى
زياد :مخنوق انتى فى حاجة مضايقاكى
لميس :لا انا عادى
زياد :لا انتى مش عادى تقدرى تحكيلى على فكرة
لميس :واحدة المغروض انها صاحبتى عملت فيا حركة وحشة اوى
زياد :عملت ايه
لميس :اتخطبت امبارح ومقالتليش عرفت انها اتخطبت من حالاتها فى الفيس والواتس ولما كلمتها اسألها ليه مقالتليش تخيل جاوبتنى بايه
زياد :قالتلك نسيت
لميس :لا اسوء قالتلى انها خافت تقولى لحسن من غير ما اقصد احسدها علشان هى بتتخطب وانا لا وكمان قالت انى فاسخة خطوبتى وده ممكن يكون فال وحش
زياد :هى مش عارفة انى اتقدمتلك
لميس :لا هى متعرفش بقالها يجى اسبوعين واخدة جمب كده كلامها معايا قليل اوى فمحكتلهاش كمان حتى لو متعرفش وحتى لو انت مش متقدم اللى قالته ده هبل واهانة ليا ولصداقتنا
زياد :انتى عملتى معاها ايه
لميس :قولتلها انى مضمنش يمكن برضه من غير قصد احسدها يوم كتب كتابها ولا يوم فرحها ولا بعد ما تخلف فالاضمن انى مكنش فى حياتها احسن
وبعدين قولتلها انها هبلة وان كلامها اهبل زيها يعنى انا هحسدها لو جيت الخطوبة انما لو عرفت من الفيس والواتس مش هحسد الحسد مش هيشتغل غير لو حضرت يعنى مينفعش احسد من بعيد لبعيد كمان هو ايه اللى انا فاسخة وده فال وحش ايه التخلف ده وقولتلها انى مش عايزة اشوفها
ولا اسمع صوتها تانى وقفلت السكة فى وشها وعملتلها بلوك من كل حاجة
زياد :طيب يعنى علمتى عليها اهوه اومال ايه اللى مضايقك
لميس :اللى قالته مضايقنى يا زياد متوقعتش تعمل فيا كده انا عينى مش وحشة والله وكنت هفرحلها من قلبى ليه يبقى انا تفكيرى فيها انها صاحبتى وزى اختى ويبقى هى تفكيرها فيا وحش كده حسستنى انى قليلة ومغفلة وكل ده ليه علشان بتتخطب مش فاهمة فين الانجاز الفظيع اللى هى خايفة عليه منى اوى كده دى اتخطبت مخدتش جايزة نوبل على كل ده
زياد :عارفة انا حصل معايا موقف شبه ده
لميس :واحد صاحبك معرفكش انه هيخطب علشان متحسدوش
زياد :لا معرفنيش علشان خاف اروح اخطبها بداله لدرجة انه مقاليش غير يوم الخطوبة علشان يدوب احضر وملحقش اعمل حاجة اخدها منه بيها
لميس :وانت عملت ايه
زياد :قولتله انت عارف مبحبش الخطوبات والافراح والكلام ده ومبحضرش غير مناسبات قرايبى وصحابى بالعافية قالى طيب ما انا صاحبك قولتله لا لو كنت صاحبى مكنتش عرفتنى يوم الخطوبة زى ما اكون غريب عنك قولتله انت لما فضيت وافتكرتنى قولتلى وانا بقى مش فاضى ومش جاى
لميس :اومال انت عرفت منين انه كان خايف تاخدها منه
زياد :واحد صاحبنا حاول يصلح بنا بعدها فوقع بلسانه فى وسط كلامنا
لميس :واتصالحتو
زياد :لا طبعا من وقتها مبقيناش صحاب اصاحب ازاى واحد شايفنى واطى وندل ممكن احاول اخطف منه واحدة هو عايز يخطبها والله ده لو بس حاطط عينه عليها مجرد حاطط عينها عليها وبيفكر فيها فخلاص كده بالنسبالى هى محرمة عليا ابصلها حتى ويجى هو يفكر فيا كده
لميس :وحش جدا الاحساس ده يلا مش مشكلة احمد ربنا ان ربنا كشفهولك على حقيقته
زياد :الحمد لله ايه بقى لسه مخدتيش قرار بقالنا خمس ايام بنتكلم انتى كده بتحضرى فيا ماجستير
لميس وهى بتضحك :ماجستير ايه ده اللى هحضره فى خمس ايام ده لو كده كان زمان مصر كلها محضرة ماجستير
زياد :خفى العسل يا لميس واتكلمى جد اهلى بيسألونى عن رايى ومحروج اقولهم انى موافق وان سيادتك اللى لسه بتفكرى يا بنتى هو احنا هنتجوز ده احنا هنتخطب بس
لميس :انت مضايق ليه هتفرق ايه كده عن لو اتخطبنا فرقالك الدبلة اللى هلبسها فى ايدى يعنى
زياد :فرقالى طبعا الدبلة دى معناها ان ليا مكانة فى حياتك وهى انى خطيبك انما دلوقتى انا ايه واحد بتكلميه علشان تتعرفى عليه لا انا الوضع ده مش مريحنى
لميس :غريبة مع ان الشباب المفروض بيحبو الاوضاع دى اللى مفيهاش قيود وارتباطات رسمية
زياد :يا ستى دول الشباب النايتى الخيخة اللى بيبقو واخدين الموضوع لعب انما انا راجل اوى والوضع ده مش عاجبنى
لميس :مش انت اللى طلبت نتكلم فى الموبايل
زياد :طلبت كده علشان اتحرجت اطلب اجيلكم البيت تانى كمان كنت عامل حسابى على مكالمة ولا مكالمتين اقرر على اساسهم انما دى سادس مكالمة بنا وانتى لسه مقررتيش
جاوبينى بصراحة انتى عايزة ترفضى بس محروجة او مش عارفة تقوليها ازاى قوليلى طيب وانا هتصرف
لميس :وهو انا لو مقررة اقول لا كنت هكمل كلام معاك ليه شفقة يعنى انا اصلا قولت لبابا انى موافقة وهو قالى هيقولكم بكرة باذن الله
زياد :طيب ما فى اخبار حلوة اهوه مبتقوليهاش ليه من نفسك لازم تمرمطينى معاكى يعنى
لميس وهى بتضحك :لا والله مش كده بس بعدها حصل اللى حصل ده مع صاحبتى كمان قولتلك انت المفروض تعرف من بابا اقوله الاول قبل ما اقولك ومكنتش ناوية اقولك النهاردة بس كلامك ده خلانى قولت وخلاص بقى
زياد وهو بيضحك :انا صعبت عليكى يعنى فعطفتى عليا
لميس :لا والله مش كده انا بس حسيت انك مضايق يعنى وفهمتنى غلط وانى رافضة كمان انت عرفت لوحدك من صوتى انى مضايقة وسمعتنى وحكتلى عنك وانا لو ليا نقطة ضعف فهى الاهتمام وانت بتعرف تهتم ودى حاجة مش موجودة فى رجالة كتير انت مميز على فكرة
زياد :انتى كمان مميزة بصراحتك وبساطتك دى البنات فى الغالب مش بيكونو بالبساطة اللى انتى فيها دى
احنا مناسبين لبعض انا حاسس كده
لميس وهى بتضحك :احنا نحط تميزى على تميزك ونتخطب والله الموفق والمستعان
زياد وهو بيضحك :احنا كده هنحارب مش هنتخطب

بعد اربع شهور
زياد :بتعملى ايه
لميس :قاعدة لوحدى فى البيت بسببك اتمنى تكون مرتاح وانا مزروعة فى البيت زرع بصل علشانك
زياد :الله متحسسنيش بالذنب كمان انتى ليه مضايقة كنتى عايزة تروحى الفرح وتشوفى سى زفت ده هناك
لميس :كان ممكن مشوفوش
زياد :لميس ده فرح اخته اكيد هتشوفيه والبيه اكيد ما هيصدق يشوفك وهيلزقلك
لميس :وانت تفتكر انا هسيبه يلزقلى ولا هيكون فى بنا اكتر من سلام ربنا
زياد :عارف انك مش هتسمحيله يتخطى حدوده بس فكرة انك تكونى معاه فى مكان واحد من غيرى دى ضايقتنى ومعرفتش اقول انى اروح معاكم اتحرجت ده مش فرح حد فى اخواتك يعنى
لميس :عارفة وعلشان كده قولت انى تعبانة ومش هقدر اروح ان شاء الله محدش يتجوز فى العيلة لحد ما نكون اتجوزنا انا وانت فتيجى معايا وخلاص
زياد :لميس عايزك تعرفى انى بغير انما انا بثق فيكى اللى عملته ده من غيرتى اوعى تفكرى انها قلة ثقة ولا حتى تحكم وخلاص
لميس :عارفة انها غيرة وعلشان كده قدرتها لو كنت حسيت انها شك ولا قلة ثقة ولا حتى تحكم مكنش هيكون رد فعلى انى اسمع كلامك وانفذلك اللى انت عايزه
زياد :تمام جدا ربنا يباركلى فيكى وفى عقلك ده قوليلى بتعملى ايه
لميس :مفيش عملت فشار وهوت شوكليت وقاعدة اتفرج على فيلم وبستمتع بالهدوء اللى انا فيه فى الشقة لوحدى ده
زياد :بتتفرجى على فيلم ايه
لميس :فيلم اجتماعى رومانسى
زياد :اسمه ايه هجيبه اتفرج عليه
لميس :بجد
زياد :اه بجد مش معقول تفضلى فى البيت علشانى واسيبك لوحدك قولى الفيلم اللى بتشوفيه وهشوفه وبعد ما يخلص انا هقولك فيلم ونتفرج عليه سوا برضه
لميس :الفيلم بتاعك ايه ظروفه اجتماعى ولا رومانسى ولا اكشن ولا رعب
زياد :مش رومانسى ولا اجتماعى نتفرج على فيلم اكشن
لميس :ماشى المهم ميكنش رعب
زياد وهو بيضحك :يا جبانة هتخافى وانتى لوحدك
لميس :مش بخاف من الرعب بس بتقرف منه كمان انا مش لوحدى ما انت معايا اهوه
زياد :ايه ده بتقوليلى كلام حلو
لميس :ده مش كلام حلو دى حقيقة انا ممتنة ليك يا زياد بجد شكرا
زياد :بتشكرينى على ايه
لميس :على انك مقدر اللى بعمله علشانك قبل ما تكلمنى انا كنت مضايقة شوية ومتعصبة اللى هو انا محضرتش الفرح علشانك وقاعدة لوحدى زى البائسة وانت ولا على بالك بس لما كلمتنى الضيق والعصبية اتبخرو من جوايا مفضلش غير احساسى انى عملت الصح وانك تستاهل اى حاجة عملتها او حتى لسه هعملها علشانك
شكرا لانك بتهتم وبتراعى شكرا لانك بجد مميز شكرا لانك زياد
زياد :ايه ده ارد اقول ايه انا كتير اوى اللى قولتيه
لميس :تستاهله وتستاهل الاكتر منه كمان 
زياد وهو بيضحك :يعنى فدايا الفرح
لميس وهى بتضحك :يعنى فداك الفرح وفداك الف فرح كمان ها اقولك اسم الفيلم بقى
زياد :فيلم ايه..اه الفيلم اللى بتتفرجى عليه تمام قولى علشان نشوفه سوا

الدنيا كتير بتكون قاسية ومش كل اللى فيها ملايكة وفيها ناس بجد قادرين يكرهونا فى الدنيا وفى نفسنا كمان
بس برضه فيها ناس كويسين ناس بيحببونا فى الدنيا وفى نفسنا ناس بيحلو حياتنا وبنحلو معاهم وبسببهم
ناس تستاهل اننا نستناهم ولما نلاقيهم منفرطش فيهم ابدا ناس يستاهلونا ونستاهلهم متقبلوش باقل من اللى تستاهلوه اى حد بيقلل منكم ومش بيقدر تعبكم علشانه ارموه على طول دراعكم بره قلوبكم وبره حياتكم دافعو عن حقكم فى ان ميكنش فى حياتكم غير اللى يستاهل يكون فيها وبس انما اللى ميستاهلش على طول دراعكم ارموه بره حياتكم والاهم على طول دراعكم ارموه بره قلوبكم💖
#حكايات_منار
فضلا تدعو لابويا بالرحمة والمغفرة وان يسكنه الله فردوسه الاعلى هو وموتى المسلمين جميعا خصوصا من زال اثره فلم يزره زائر ولم يذكره ذاكر