انا فاطمة عندى تلاتة وعشرين سنة ودول اهل جوزى وسالم يبقي جوزى انا المفروض انى عايشة في بيت عيلة بس لا انا عايشة في جهنم دول مش بنى ادمين
طول الوقت ذل واهانة وشتيمة فيا وفي اهلي
امه الست امينة هى والعقربة منى اخته معتبرنى خدامة وهو وعلي اخوه كمان انا في البيت ده خدامة مش اكتر من خدامة
معقول هو ده الزوج الصالح اللي عشت عمرى كله بدعى ربنا بيه مش معقول يكون هو لا
عملت ايه في حياتى وحش استاهل يحصلي كل ده بسببه ده انا طول عمرى طيبة عمرى مقدرت اءذى حد ولا قدرت اقول لحد لا علي حاجة طول عمرى مش واثقة فى نفسي وشايفة ان كل البنات احلي واحسن منى طول عمرى ضعيفة وعمرى ما عرفت اجيب حقى وكل اللي اتمنيته زوج صالح يعوضنى عن كل الظلم اللي اتعرضتله فى حياتى لما سالم اتقدملي وقعدت معاه اول مرة كان باصص في الارض ومحروج يبصلي ولما اهلي سالو عن اهله لقو انهم جم القرية بتاعتنا من عشر سنين انما هما اصلا من قرية تانية بعيدة عننا جيرانهم قالو انهم ميعرفوش عنهم حاجة لانهم مبيخطلتوش بحد بس سالم بيمشي باصص فى الارض هو وعلى اخوه ومنى اختهم بتمشي في الشارع زى العساكر
ساعتها انا قلت بس هو ده الزوج الصالح اللي انا طول عمرى بتمناه ومهمنيش انه خطب قبل كده اربع مرات هو قال ان هو اللي سابهم وانا صدقته واتخطبنا كان بيكلمنى قليل ولو كلمنى نتخانق لانه مكنش بيجلنا كتير وان جالنا يكون مستعجل وعايز يمشي بسرعة ولا طايق ياكل من اكلنا ولا يشرب من شربنا قال ايه بيقرف كان منكد علي امى اللي كانت بتقف طول اليوم في المطبخ علشانه ومنكد علي ابويا اللي كان نفسه يحس ان خطيب بنته زى ابنه سالم عمره ما جالنا وهو شايل في ايده حاجة كمان المواسم كان بيتهرب منها ويقول ده مش سلو بلدنا احنا واحنا ملناش دعوة ببلدكم حتى الحاجات اللي اتفقنا عليها مجبهاش كلها وابويا اللي جابها
فستان الفرح استرخصو فيه جزمة الفرح قالو قال ايه نسيوها وساعتها انا استلفت من صاحبتى جزمة فرحها
بابا كان عايز يفسخ الخطوبة وانا اللي منعته قلت كفاية دينه واخلاقه واحنا وقتها كنا جبنا الجهاز والاجهزة الكهربائية هفسخ خطوبتى منه ازاى دلوقتى
وبابا لما لقانى مصرة سمع كلامى ويا ريته مسمع كلامى بس لا الغلط غلطى انا
انا اللي رضيت بيه وانا كلية وهو دبلوم وقلت المهم اخلاقه انا اللي قبلت ببخله وان عمره ما جابلي هدية وانه لما كان بيجبلي حاجة كان بيسترخص وقلت المهم اخلاقه انا اللي قبلت بتجاهله ليا واهماله ليا في الخطوبة وقلت اهم حاجة اخلاقه انا اللي اتنازلت واتجوزته
واتنازلت بعد ما اتجوزته واستحملت معاملته ليا هو واهله واتحملت انى اتهان منهم انا واهلي هما عرفو يستغلو ضعفى وقلة حيلتى وضعف شخصيتى كويس اوى
انا اللي بعمل كل حاجة في البيت اخته مبتشلش ورقة من مكانها وامه خلاص بقت برنسيسة من يوم ما انا جيت وفي الاخر بينقدو كل حاجة بعملها ومش عاجباهم عمايلي في اي حاجة ابويا جاب اكتر من المفروض وسالم جاب اقل من اللي اتفقنا عليه وبرضه شايف انه اتدبس فيا وان حظه وحش
حتى علي اخوه بيعاملنى علي اساس انى خدامة
انا في البيت ده مليش حقوق شقتى بطلعها عالنوم ومفيهاش حاجة غير الميا اكلنا وشربنا كله تحت معاهم
ذهبى مع حماتى سالم خدو منى ونزلهولها بعد جوازنا باسبوع
طلعت هى ومنى ونقو هداياهم منى بنفسهم اغلي فوط واحسن اطقم سرير امى جايبهالي خدوها واطقم كبايات وحتى حلة الضغط بتاعتى خدوها وسكت ومفتحتش بؤقي بتشتم انا واهلي وبيسمو بدنى في الراحة والجاية واتحملت ومعملتش حاجة مشيلنى البيت كله لوحدى ومعترضتش ولا قلت حرام وفوق كل ده سالم بيضربنى سكت اول خمس مرات وبعدين غضبت عند اهلي بس هناك اكتشفت انى حامل فرجعتلهم تانى زى الكلبة من غير حتى ما يجى هو ياخدنى علشان ابنى ولا بنتى اللي جايين انا حامل في الشهر الرابع والدكتور موصينى بالغذا الكويس والراحة
ودول لحد دلوقتى مشيلنى البيت كله لوحدى والاكل بيعدوه عليا وبيسمو بدنى طول الوقت
حكاية "زوج صالح "
Start from the beginning