حكايات منار

حكاية " فكرة "

بعد شهر
كريمة :استنى يا غالية هصحى حسام يوصلك
غالية :يا خالتى ملوش لزوم انا هاخد تاكسى سيبيه نايم حرام تصحيه
كريمة :وده ينفع برضه تبقى عندنا وتروحى فى تاكسى استنى هصحيه والله ما انتى مروحة غير مع حسام حلفت كسرى حلفانى بقى
غالية :مقدرش يا خالتى خلاص حاضر هستنى

بعد تلت ساعة
غالية :اسفة ان خالتى صحتك من النوم علشان توصلنى انا والله قولتلها هروح فى تاكسى بس هى حلفت عليا انك توصلنى
حسام :مش مشكلة مجراش حاجة

بعد عشر دقايق
حسام :غالية عايز اسألك سؤال
غالية باستغراب :عايز تسألنى انا
حسام :اه مالك مستغربة كده ليه
غالية :اصلك مبتتكلمش معايا كل مرة لما بتوصلنى بتوصلنى وانت ساكت خالص فمستغربة انك بتتكلم معايا لا وعايز تسألنى كمان
حسام :اسأل يعنى ولا مسألش
غالية :لا اسأل عندى فضول اعرف عايز تسألنى عن ايه
حسام :هو..هو انتى ايه مواصفات شريك حياتك
غالية :ايه
حسام :لو مش عايزة تجاوبى متجاوبيش
غالية :لا هجاوبك بس قبل ما اجاوبك عايزة اعرف ايه اللى خلاك تسألنى السؤال ده
حسام :سارة قالتلى عن رايك فى اللى عملته فى محل الدهب مع اللى المفروض انى كنت هخطبها وماما كانت بتتكلم مع خالتى فى انك رفضتى عريس لقطة الاسبوع اللى فات
فانا لقتنى عندى فضول اعرف انتى ايه مواصفات شريك حياتك ايه اللى بتدورى عليه وملقتيهوش فى كل اللى اتقدمولك ورفضتيهم
غالية :هو انا مش بدور على حاجة معينة بس انا نفسى فى حالة معينة
حسام :لا مش فاهم
غالية :يعنى انا مش عايزاه يكون فى صفة معينة غنى مثلا او وسيم او رومانسى مش محددة صفات انا كل اللى عايزاه ان الوضع بنا يكون مريح لينا احنا الاتنين هو يكون عايزنى ومش عايز غيرى وانا اكون عايزاه ومش عايزة غيره وعلشان ده يحصل وتبقى دى الحالة اللى احنا عايشينها سوا لازم يكون فى توافق بنا فى حاجات كتير واللى رفضتهم محستش بنا توافق وفى ناس كنت بفكر اقبل بس هما اللى رفضو اكيد شافونى مش مناسبة
حسام :اول مرة اشوف بنت بتتكلم عن كون حد رفضها عادى
غالية :هو حقه يرفض لو شافنى مش مناسبة حق القبول والرفض مش للبنات بس وبعدين هى الدنيا كده ترفض انت ناس وتترفض من ناس ومش المفروض تاخد الموضوع على كرامتك ده فى الاول وفى الاخر نصيب
حسام :معاكى حق
غالية :بما انى جاوبت سؤالك بكل صراحة اسألك انا بقى سؤال وتجاوبنى انت كمان بصراحة
حسام :اسألى
غالية :هو انت بتكرهنى ليه انا فكرت كتير ملقتش انى عملت معاك اى حاجة وحشة تخليك تكرهنى انت من صغرنا وانت بتكرهنى وانا فعلا مش عارفة ليه
حسام :جدى مهدى كان بيحبك اكتر واحدة فينا انا كنت بحبه اوى وكان نفسى يحبنى انا اكتر واحد بس هو مهما عملت كان بيحبك انتى اكتر منى ومننا كلنا ده خلانى احس انى مش طايق وجودك
غالية :جدى مهدى كان بيحبنى بالشكل ده لانى على اسم تيتا غالية ومن عند ربنا واخدة كتير من شكلها وطبعها لو جدى ميزنى عنكم فده غصب عنه وهو اكيد ميعرفش ان ده كان مضايقك اوى كده هو كان اطيب واحن من انه يضايق اى حد
كمان هو مات من عشر سنين ومع ذلك انت فضلت كارهنى ومش طايق تشوفنى حتى بعد ما السبب اللى كرهتنى علشانه اختفى
عموما شكرا انك جاوبتنى انا فعلا طول عمرى نفسى اسألك انت بتكرهنى ليه بس مكنتش عندى الشجاعة اسألك..وصلنا مش هتطلع تسلم على ماما وبابا واخواتى
حسام :ها..اه لا هطلع معاكى