بعد اسبوع
كريمة :على ايه اللى انت لابسه وقاعدلى بيه ده
على :ايه مالى
كريمة :لابس فانلة على مش عارفة ده ايه بالظبط شورت ولا بوكسر ولا ايه
على :انا حر اقعد فى بيتى براحتى
كريمة :ايوه بس الدنيا برد على اللى انت لابسه ده كده تعيا
على :خايفة عليا
كريمة :ايوه طبعا وانا عندى اغلى منك اخاف عليه يا علوة
على :تفتكرى انا كفاية
كريمة :كفاية من ناحية ايه
على :كفاية ليكى
كريمة :اكيد طبعا انت كفاية واكتر من كفاية كمان
على :يعنى انتى مش محتاجة ولاد
كريمة :محتاجة طبعا وان شاء الله ربنا يرزقنا بيهم
على :بقالنا اربع سنين متجوزين وبقالى تلت سنين بتعالج ومخلفناش
كريمة :بس الدكتور قال ان فيه تحسن
على :التحسن ده مش فارق مخلاكيش حامل
كريمة :مش العلاج ولا التحسن ولا كلام الدكتور هو اللى هيخلينى حامل ربنا سبحانه وتعالى هو اللى هيمن علينا بحمل
على :امتى بس
كريمة :وقت ما يريد فى الوقت المناسب يمكن كل اللى فات ده مكنش وقت مناسب
على :مكنش وقت مناسب لايه بالظبط
كريمة :لانى ابقى ام وانت تبقى اب لاننا نكون مسئولين عن روح فى الدنيا انسان هيتأثر بينا وبكل حاجة هنعملها معاه مسئولية كبيرة يمكن انا وانت لسه مش قدها
على :ليه يعنى ما نخلف ونربى عيالنا زى ما كل الناس بتربى عيالها
كريمة :الموضوع مش بالسهولة دى وعلشان فى ناس استهونت بيه وخلفو اورطة عيال وخلاص لا اهتمو لا بتربية ولا باخلاق النتيجة ان احنا مش بقينا فى القاع لا بقينا تحت القاع خلاص
على :يا كريمة عادى هنخلف عيال ونصرف عليهم وندخلهم مدارس
كريمة :ونجبلهم هدوم ونأكلهم ونشربهم وبس كده تفتكر مش هيحتاجو مننا اكتر من كده
على :هيحتاجو ايه اكتر من كده
كريمة :هيحتاجو حبنا واهتمامنا يا على هيحتاجو وقتنا وطاقتنا ومش معنى كده انهم هيحتاجوك تشتغل وتجيب فلوس وهيحتاجونى اغسل واطبخ وانضف بس لا هيحتاجونا نسمعهم نصاحبهم ونساعدهم يتعايشو فى عالم فوضوى لا فيه اخلاق ولا دين والحرام والغلط فيه مفيش اسهل منه
هيحتاجو مننا حاجات كتير اوى يا رب وقت ما ربنا يرزقنا بيهم نعرف نقدمهالهم
على :حاسك مكبرة الموضوع
كريمة :لا خالص هو الموضوع اصلا كبير
عارف من كام يوم قريت بوست على الفيس بيقول الكلام اللى انت مسمعتوش من ابنك هيكبر ويدفع خمسمية جنية فى جلسة لدكتور علشان يسمعه
اغلب الامراض النفسية بتكون بسبب الاهل مشاكل كتير اوى فى المجتمع لما بفكر بلاقى ان لو كل اب وام كانو تعبو نفسهم شوية وربو عيالهم مكناش وصلنا للى احنا فيه ده
على :من كلامك حاسك خايفة انتى مش عايزة تبقى ام
كريمة :خايفة علشان الخلفة مسئولية كبيرة يا رب اكون قدها
بس انا عايزة ابقى ام
على :ليه
كريمة :علشان الاقى حد يترحم عليا بعد ما اموت
على :عايزة تخلفى علشان ولادك يترحمو عليكى بعد ما تموتى
كريمة :وهى دى حاجة بسيطة انت عارف فى قد ايه ناس بيتمنو موت ابوهم الانانى او امهم القاسية
ان ولادى يدعولى بالرحمة بعد ما اموت واوحشهم ويدعو ربنا يجمعنى بيهم فى الجنة دى حاجة كبيرة اوى
حلم يا رب اقدر احققه
على :معاكى حق بس...بس مبينهاش انك هتقدرى تحققى حلمك ده معايا فانا ممكن...يعنى
كريمة :سكت ليه ممكن ايه تطلقنى يا على عايز تسيبنى
على :لا مش عايزك تندمى وتحسى انك ضيعتى سنين عمرك جمبى
كريمة :يا سيدى انا حرة هى سنين عمرك ولا سنين عمرى ده انت غريب جدا
على :من غير هزار يا كريمة انا بتكلم جد
كريمة :ومين قالك انى بهزر انا كمان بتكلم جد
انت قولتها بنفسك سنين عمرى واظن ابسط حقوقى انى اختار اقضيها جمب مين وانا عايزة اقضيها معاك
انا مقدرش ابعد عنك
على :ده كلامك دلوقتى لكن كمان كام سنة لما تلاقى ان كل اخواتك وقرايبك وصحابك خلفو وانتى لا وقتها هتندمى وهتحسى انك ظلمتى نفسك معايا
كريمة :خلاص حكمت انت ان كل اللى اعرفهم هيخلفو ما عدا انا وحكمت عليا انى هندم وحكمت كمان اننا عمرنا ما هنخلف
كل دى حاجات فى علم الغيب اللى ميعرفوش غير ربنا
وان شاء الله اخلف انا وكل اخواتى واصحابى وقرايبى ولما اندم اندم انى اتجوزت من اساسه زى كل الستات المصرية الاصيلة
على :برضه مصرة تهزرى وتاخدى الموضوع ببساطة
كريمة :لان الموضوع بسيط يا على انا وانت عايزين نخلف وعلشان كده بناخد بالاسباب ومتابعين مع دكتور
نخلف او لا دى حاجة بتاعت ربنا
يعنى هو مش ممكن اتجوز واحد تانى ويطلع مبيخلفش او حتى يكون بيخلف عادى بس ربنا ميريدش ان انا وهو نخلف كمان انا بقنعك بايه
انت هتقدر تطلقنى هتتحمل اتجوز واحد غيرك
على :
كريمة :هتقدر تعيش من غيرى يا على هتتحمل متشوفنيش كل يوم ده انت مبتستحملش ابعد عنك وابات عند اهلى ليلة واحدة هتتحمل ابعد عنك العمر كله
على :لا...لا مش هقدر اتحمل
بس ما هو انا برضه مش هتحمل تحسى انك ضيعتى سنين عمرك على الفاضى جمبى
مش هتحمل احس انى انانى واستغليت انك بتحبينى وخليتك جمبى وحرمتك تكونى ام
كريمة :هو انت ليه بتتكلم كأنك انت اللى هتعمل كل حاجة كده
وانا ايه شوال بطاطس عايش معاك فى الشقة ملوش رأى ولا صوت
انا لو كملت معاك فهكمل لان انا عايزة اكمل
مش لانك اجبرتنى ولا لانك استغليت حبى ليك
انت اختيارى يا على انا مختارة اكون معاك
علشان اكون ام لازم اكون زوجة الاول وانا مش هعرف اكون زوجة لحد غيرك مش هقدر
لا هعرف اعيش مع حد غيرك ولا هعرف ابطل احبك ولا هعرف احب حد تانى غيرك
لو اتجوزت حد غيرك فانا هظلمه وهظلم نفسى
الكلام ده مش كلام قلبى بس انت عارفنى دى مش اخلاقى ده كلام عقلى كمان وكلام متفق عليه قلبى وعقلى يبقى اكيد هو الصح
على :كريمة فكرى تانى انا بقالى فترة بفكر وخدت قرار انى اخيرك ده بصعوبة انا مبقتش طايقنى ولا طايق هدومى حتى من كتر ما اللى بفكر فيه مضايقنى
كريمة :وعلشان كده قاعدلى بالاندر وير كده فى عز البرد
على :من غير هزار فكرى واختارى وايا كان اللى هتختاريه فهو حقك
كريمة :عارفة ان الاختيار حقى وعلشان كده انا اختارتك لانك حقى يا على انا عايزة اخلف بس منك عايزة ولاد تبقى انت ابوهم
انت انسان كويس اوى يا على حقيقى مفيش منك وانا مضمنش انى لو سيبتك الاقى الاحسن منك احسن ايه ده انا مضمنش الاقى زيك اصلا فانا مش هخاطر مش هسيبك انا مقدرش اسيبك
يا ربى يعنى انا تبقى لبنى احمد بيقولها انا عندى قلب انتى كل حياته وانا جوزى يقولى فكرى واختارى ومش عايزك تضيعى سنين عمرك على الفاضى معايا
وناقص يروح يطلقنى غيابى
كل ده وانا مرضيتش اجيب الغسول ابو خمسمية جنيه اومال لو كنت رضيت اجيبه كنت عملت فيا ايه بقى كنت اتجوزت عليا
على وهو بيضحك :الحق عليا اللى مرضيتش اكون انانى فى حبك
كريمة :يا عم انا بحب اللى يحبونى يكونو انانيين فى حبهم ليا لان انا انانية فى حبى يعنى انا مثلا مستحيل اقبل ان واحدة تانية تشاركنى فيك
على :ايه وقتها هتسيبينى
كريمة :اسيبك لا طبعا
على بابتسامة :عارف انك بتحبينى
كريمة :ده حقيقى انا بحبك وعلشان كده وقتها مش هسيبك لا انا هخليك تسيب الدنيا وتقابل وجه كريم هقتلك ودى مش مبالغة ولا رومانسية وكده لا انا حرفيا هقتلك ده فى حالة انك اتجوزت من ورايا او خونتنى انما لو جيت قولتلى انك عايز تتجوز تانى
على :وقتها هتقتلينى برضه
كريمة :لا هطلق منك واسيبك تتجوز براحتك بس هدعى عليك ربنا ياخدك
على :يعنى مفيش امل اعيش يا هتقتلينى يا هتدعى عليا اموت
كريمة :لا امل ولا عمر انا وانت ملناش الا بعض خلاص قضى الامر
على بابتسامة :وانا موافق بس ايه حكاية الغسيل اللى بخمسمية جنيه ده
كريمة :مش غسيل غسول حاجة كده بغسل بيها وشى بدل الصابون علشان يخلى وشى منور
على :انتى وشك منور من غير حاجة بس عادى جيبيه مادام عايزاه
كريمة :لا خمسمية جنيه كتير اوى
على :مش كتار عليكى مفيش حاجة فى الدنيا كتيرة عليكى يا كريمة
كريمة بابتسامة :ده ايه الجوز القمر ده يا ناس خلاص يا حبيبى مادام الخمسمية جنيه طالعين من زمتك احنا نخرج نتغدا بره بكره
على وهو بيضحك :طيب ووشك اللى كنتى عايزاه ينور
كريمة وهى بتضحك :ما هو هينور لما نخرج نتفسح وناكل شاورما وكريب
على :خلاص ماشى طيب ايه عملالنا ايه على الغدا النهاردة
كريمة :مش قولتلك من شوية ناكل وقولتلى لا مش عايز
على :كنت بفكر ومكتئب ونفسى مسدودة
كريمة :ونفسك اتفتحت واكتئابك راح دلوقتى
على بابتسامة :اه كالعادة بسببك مقولتيش عاملة ايه على الغدا
كريمة :مكرونة بالبشاميل وبانية وملوخية
على :عاملة كل الحاجات اللى بحبها مع بعض
كريمة :ايوه خدت بالى انك مبتاكلش كويس بقالك كام يوم فقولت اعملك الاكل اللى بتحبه علشان يفتح نفسك على الاكل
على :تصدقى بالله
كريمة :لا اله الا الله
على :انا ما بيفتح نفسى على الاكل ولا على الدنيا كلها غيرك انتى
ربنا ما يحرمنيش منك يا كراملتى
كريمة بابتسامة :ولا يحرمنى منك يا علوة
خلاص انا هروح احط الغدا انت مش هتلبس بيجامة ولا حاجة هتفضل قاعدلى كده
على وهو بيضحك :اه اصلى حبيت الموضوع اوى
كريمة وهى بتضحك :مش ناوى تستر نفسك يعنى
على وهو بيضحك :لا ادعيلى انتى بالستر يا كراملتى
العلاقات كلها تعب فى اى علاقة هتدخلها مع حد سواء كان شبهك او مختلف تماما عنك انت هتتعب ده طبيعى
الفكرة فى انك تكون مع شخص يستاهل تعبك
ياسر مكنش يستاهل راندا ولا كان يستاهل تتعب علشانه
واهو الحمد لله ربنا نجاها منه
انما علوة على حبيبى يستاهل اتعب علشانه لانه مقدر تعبى ولان هو كمان بيتعب علشانى
الحمد لله بعد ست سنين جواز خمس سنين منهم على كان بيتعالج فيهم ربنا رزقنا بكريم على اللى اختار اسمه على اسمى وبعده بخمس سنين خلفنا عاليا انا اللى اختارت اسمها على اسمه على اساس بردهاله وكده
بنحاول نربيهم صح على قد ما نقدر بنحاول نطلعهم احسن مننا وبنحاول نربيهم احسن ما احنا اتربينا كمان
الدنيا مش مكان نرتاح فيه هى مكان نتعب فيه ونمر بلحظات صعبة وابتلاءات واختبارات من ربنا علشان نرتاح عنده نرتاح فى الجنة
احنا هنتعب فى الدنيا وهنتعب فى اى علاقة هندخلها مع اى حد ايا كان هو مين
ادعو ربنا يرزقكم بناس تستاهل التعب اللى هتتعبوه علشانهم
واوعو تختارو تكملو مع ناس متستاهلش التعب لانكم وقتها هتبقو بتضيعو عمركم على الفاضى💖
#حكايات_منار
فضلا تدعو لابويا بالرحمة والمغفرة وان يسكنه الله فردوسه الاعلى بدون حساب ولا سابقة عذاب هو وموتى المسلمين جميعا خصوصا من زال اثره فلم يزره زائر ولم يذكره ذاكر
حكاية " تعب "
Start from the beginning
