MAYA (မာယာ)

Part 19 (Uni)

အပိုင်း ၁၉

"အာ မျက်နှာကြီးတွေကလဲ ဘာဖြစ်သွားကြတာလဲ မာယာကရယ်ရအောင်စတာပါ ငါ့မှာဦးဟန်လင်းဆိုတဲ့ ဖေဖေတစ်ယောက်ပဲရှိတာ သိသားနဲ့"

မာယာပြောနေပုံက မချိုမချဉ်။ မယုံလိုက်ရအောင်ကလည်း ရှေ့ကစကားတွေကအတည်ပုံစံတွေ။ မျက်နှာကိုကြည့်မိပြန်တော့ ယုံချင်စရာကရှိမနေပြန်။ ငါးနှစ်ကျော်အတွင်း ဟန်ဆောင်ခြင်းအတတ်ပညာဟာ ပိုလို့ပီပြင်လာသည်။

မာယာက တကယ်ဆိုမင်းသမီးလုပ်စားရမှာ။
သိပ်ကိုသရုပ်ဆောင်တတ်တာပဲ။

"နားတော့မလားလှိုင်း ဘွားကခေါ်ထားသေးတယ်ဆို"

"အင်းနားမယ် ရာသန့်နောက်နေ့မှ စကားပြောကြမယ်လေ "

"အင်း‌‌နောက်နေ့မှပေါ့"

လှိုင်းကအရင်ဦးဆောင်၍ ထွက်လာသောအခါ နောက်တွင် ရာဦးသန့်နှင့်မာယာတို့က ဖြေးဖြေးချင်းလိုက်လာကြသည်။ နောက်ကျောဘက်ဆီမှ မာယာ့ရယ်သံများကို တစ်ချက်တစ်ချက်ကြားရသည်။ လှိုင်းဘွဲ့မနေနိုင်စွာ နောက်သို့လှည့်ကြည့်မိလျှင် မာယာမျက်ဝန်းများကလှိုင်းထံ၌ရှိနေပြီး ရီနေသောမာယာ့ကိုတော့ ရာဦးသန့်ကငေးလို့နေသည်ကိုတွေ့ရသည်။လှိုင်းဘွဲ့ချက်ချင်းပင်ရှေ့သို့ပြန်လှည့်လိုက်သည်။ မြင်ကွင်းကနှစ်ခါပြန်ကြည့်ချင်စရာရှိမနေ။

လှိုင်းအခန်းထဲရောက်ချိန်ထိ တံခါးဝနားတွင်မာယာနှင့် ရာသန့်က စကားစမပြတ်သေး။

ရာဦးသန့်က အရပ်လည်းရှည်လာကာ အသားနည်းနည်းညိုသွားတာကြောင့်လားမသိ။ နဂိုမျက်နှာချိုချိုမှာ အကြည့်ခံသောညိုစိမ့်အဖြစ်သို့ပြောင်းသွားပြီး ယောကျာ်းပီသလာသည်။ ဝတ်ပုံစားပုံမှာ သပ်ရပ်ကာ ခေါင်းတညိမ့်ညိမ့်ဖြင့် မာယာပြောသမျှလိုက်လျောပေးချင်နေသည့် ပုတ်သင်ညိုတစ်ကောင်နှင့်တူသည်။

"ဒါဆိုကိုကိုသွားတော့မယ် Goodnight မာယာ"

"ဂွတ်နိုက် ကိုကို "

ကိုကိုဆိုသော စကားလုံးသည် လှိုင်းနားထဲသို့ ကန့်လန့်ဝင်လာသည်။ လှိုင်းတို့နှင့် ရာသန့်ကအသက်သိပ်မကွာကြ။ တစ်ခါတစ်ရံ ရာသန့်က သူကိုယ်သူကိုကိုဟုသုံးတတ်သော်လည်း ရံဖန်ရံခါ။ တကယ်ကို ရံဖန်ရံခါမှသုံးနှုန်းခြင်းသာ။