عذريتي مقابل براءتي

البارت الثاني

يارين - بعد ما رجعنه على بيتنه آني وأمي وأني حالي مو احسن من حالها وهي تبچي على دارين وآني دمعه ما نزلت مني وقررت بعد ما ابچي ولا تنزل دموعي بدل البچي اخذ حقي بيدي وحق اختي وحلفت الله أشتكي على فرقد وابهذله شلون بهذل دارين من وصلت اتصلت على ابو كرار سألته ام كرار رجعت گال لا والله بعدها وطلبت منه كرار يجبلي أطفالي
وبالفعل ما مر وقت هوايه جابهم كرار ردت اسوي عشى ألهم بس ألي عرفته ابو كرار مسويلهم عشى وأني وامي ما اكلنه نفسيتنه مسدوده وكل واحد بينه دخل بفراشه بس منو يجي نوم اني الأفكار كلها براسي بس تنفيذها صعب للفجر يلا نمت گعدت حدود التسعه
بعد التغسيل والريوگ بدلت وطلعت رحت للمركز دخلت سألت اذا اريد اقدم شكوى وين جاوبني شرطي
گال - روحي يم ضابط التحقيق قدمي شكوى الضابط عقيل
رحت وين ما گلي طلع حضرته بعده يتريگ واكو ناس قبلي يعني لساعه11 ونص يلا وصلني الدور دخلت گاعدين اثنين ظابط التحقيق برتبة رائد وضابط الي يكتب برتبة ملازم
الرائد اسمه عقيل گال - تفضلي شنو شكوتچ
گتله - سيدي اني اريد أشتكي على زوج أختي حابسها بيته ويعذب بيها واحنه ما عدنه بس الله وانتوا
گال - وليش ما تجي اختچ تشتكي عليه بالعنف الأسري وتاخذ حقها
گتله - سيدي حابسها عنده ما يخليها تطلع
گال - عادي تشتكين عليه تروح الدعوه للمحكمه ويجي امر من القاضي ويتم استدعاءه هو واختچ من قبلنه حتى نتأكد من صحة كلامچ
رجع وجه الكلام للضابط ألي يمه گاله أفتح تحقيق وسجل الشكوى مالتها وظليت احچيله شلون معذبها وشلون خسرت كلياتها وصحتها بسببه
بس الرائد عقيل قاطعني من گال - بلا زحمه هذا وين يشتغل شنو بالأمن الخاص مال النظام السابق
گتله - لاسيدي هو ضابط بالشرطه
گال الرائد - شنو رتبته
گتله - رتبته عقيد واسمه فرقد
ظلوا هو والضابط الثاني واحد يباوع على الثاني متفاجئين بعدين
گال الرائد عقيل - عقيد فرقد مدير مركز..... وجه كلامه لضابط الثاني گال قبل فتره شفته يم مدير الرصافة جندله من شكل واناقه وشخصيه بس ما يتحاجى أبد وهاي خوش فرصه حتى اقدمله خدمه
بالبدايه ما فهمت شنو يقصد لان هذا الرائد أخذ موبايله وطلع
ورجع بعد تقريبآ ربع ساعه شگگ الأوراق
وگال - شكوتچ مو يمي أشتكي عليه بالشوؤن
طلعت من يمه صافنه عفيه دنيا شكبرها وشگدها هيچي صغيره علينه عفيه بلد ماكو واحد بي شريف ينصفنه وين نروح الفقير والما عنده احد ينداس بالرجلين أمشي وافكر بس خطرت على بالي فكره گلت أنفذها أحسن واشوف شيصير وراها من وصلت للبيت ماكو
بس بدلت سمعت الباب يندگ بس شنو من قوة الدگ تحس الباب راح ينشلع بحيث حتى أطفالي خترعوا وراحوا يم امي من الخوف واني طلعت أركض من فتحت الباب صار گدامي فرقد وام كرار وهو خنگني وهو يگول - اني مو نبهتچ تنسين دارين لو انتي ذابين صرتچ بالمركز عابده المراكز
سحبته مني ام كرار آلي آن شاء الله ايده الكسر چان راح يموتني
گتله - اذا متريد تنفضح مثل عمار أجى يدور حل ويايه انت روح طلگ دارين وانطيها أطفالها أحسن آلك
ضحك وگال - وانتي تريدين تقنعيني أنه انتي خايفة على دارين لو رايحه للمركز تريدين واحد يريحچ بدل عمار الي تفل بخلقتچ وعافچ
شوفي لچ اذا أخلي عقلي وياچ والله وبالله الا أخلي ليلچ نهار ونهارچ لليل ابعدي عن طريقي احسن الچ والا شوفين إلي ما يعجبچ انصحيها حوراء أحسن إلها
وعافنه وراح ظلت ام كرار تباوع عليه بنظرات غريبه ظليت متفاجئه منها الى ان
گالت - وين تريدين توصلين يارين انطيني من الأخير لأن بصراحه شلون ما اريد أسدد وراچ وابرر تصرفاتچ ترجعين على الغلط
گتلها - ام كرار مستحيل اعوف دارين بيد فرقد كافي خسرت صحتها شنو إلا يموتها يلا تريدين احچي
گالت - شوفي يارين أني بالنسبة عني ما عفت دارين وچنت وياها الله يشهد حتى فرقد من يضربها ما أخلي حتى أمي هم ويايه بس انتي شتردين من فرقد يسوي وهي نهزمت والناس تعاير بي وهو هم البارحه كلهن حلفهن على القرآن وكلهن نكرن اي كلمه گالتها دارين بس امي ما حلفت
گتلها - اعتيادي غير كذابه شلون تحلف
چان تعيط بيه ام كرار گالت - ما اسمحلچ شنو كذابه احترمي نفسچ شنو طفله وتگولين عليها كذابه مره بگد امچ
گتلها - اسفه والله مو قصدي بي من حرگت گلبي على دارين
گالت - وألا قصدچ شوفي حبابه أني لو بمكانچ افكر الف مرة قبل ما تجيبين دارين يمچ حبابه دارين مريضه وعلاجها بس الله يعلم شگد يكلف وأنتي امچ واطفالچ وحملچ كافيات عليچ  اجيبين دارين يمچ منو يصرف عليها شنو زيدين الحمل عليچ  راح انصحچ لوجه الله عوفي دارين يم فرقد عد هو يصرف عليها بس اذا تريدين توگفين بوجهه فرقد ساعتها تحملي الي راح يجيچ منه وفرقد مو شويه ولا يلعب ويا وبعد أنتي بكيفچ عقلچ براسچ تعرفين خلاصچ
وعافتني وراحت بس أني ما أقتنعت بكلامها وقررت اتصل بماهر واطلب مساعدته واذا وافق اكون حققت غايتي ساعتها اذا ارفع قضيه على فرقد وماهر ويايه ما معقوله يأذي نسيب عمار وبهيچي اكون ضربت عمار بفرقد
وبالفعل دخلت للبيت واخذت موبايلي واتصلت بماهر دگ بس ما جاوب عفته بعد ساعه أتصل بيه من جاوبته
گال - والله اعذريني موبايلي بالسياره واني بالمستشفى ويا ساره
گتله - ليش خيرها بيها شي
گال _ اي بداية حمل عدها وكل ساعه تتخربط
گتله - اي بالخير عليكم عد هو عمار شسوه للبطني حتى يسوي للبطن ساره بس يلا الله موجود والله يضرب بعود مو بعامود طالما موجوده الناس العوجه الي دافعله
گال -تقصدين اني يارين اني گتلچ اي شي أني مستعد أسوي  الچ بعد هذا الحچي ماله لزوم
گلت لنفسي هسه إذا أطلب منه أي طلب راح يگول تريد تستغلني گلت فتره واگله إلي يخطر بالي