في شريعه العشق

الثامن والثلاثون

#شريعة_العشق

نورا ناصر

#بارت٣٨

عيناكِ وحدهما شريعتي
إن كان لي وطن .. فوجهك موطني
أو إن كان لي دار .. فحبك داري ..

●
●
●

بابا بصدمة وبيده الرصاصة الي طلعها من الظرف
_ سوسن هذا تهديد !!!
امي اديها على وجهه وعيونها مفتوحات على وسعها
_ عزة تحسين!!!! تهديديش الله يخليك منو يهددنا شعدنا ويا العالم احنا ؟

بابا ظل يروح ويجي وحاير : مادري سوسن مادري ..

امي : لاعفية تحسين مورط روحك بشي انته ؟ خاف انظميت لحزب سياسي لو شي بس كولي تحسين عفيه خايفة عليك وعلى بناتي ..

_ للج سوسن رحمة لوالديج على كيفج شجاج صدك جذب شهالحجي هذا لا منظم لحزب ولا من هالحجي ..

_ لعد كولي ليش يهددون بينه ؟
ماما ، ظلت ترجف واجه بابا يمها لزم اديها قوي ..
_ سوسن على كيفج ويه نفسج مو وكتج هسه انت تتخربطين وكافي الله يخليج اريد هدوووء اريد افكر بس ثواني شسوي ..

راح قفل كل بيبان البيت وحضر المسدس مالته ..

كاعدين اني وعبير ونباوع لماما وبابا بخوف ورعب ، جتي امي كعدت بيناتنا ، مدت اديها وطوقت اكتافنا وضمتنه لحضنها وتهدأ بيننا بكلمات تصل اعماقنا ولسانها يلهج بالادعية وآيات من القرأن  دعوات  انسلت من بين جوانح القلب واسنقرت على لسانها
تغمض وتفتح وتزفر نفسها بقلق ..

ميلت نفسها واخذت الورقة تباوعلها وتقرا بيها التهديد
كامت على حيلها : اكولك تحسين باوع للخط عبالك مال واحد توة يتعلم يكتب ..

بابا بصوت متنرفز : اي شتترجين منهم ذولة عبالج متعلمين وبراسهم حظ هم بس يردون يهججون الكفاءات من البلد ويظلون بس الجهلة حتى يسيطرون على البلد ..

_ اي هسه انت شدتسوي بس كولي عن شنو دتدور ..

_ تليفوني تليفوووني ووينه ؟

كامت ماما وكعدت مابيها تكوم كالت كومن دورن تليفون ابوجن ..

كمنه اني وعبير كتله بابا خاف بجيبك ،، مد ايده لجيبه وطلعه وظل يستغفر : استغفر الله العلي العظيم ياربي ماخايف بس عليكم اني ماريد يصيبكم مكروه .
زفر نفس وأتصل خله الفون على اذنه ونزله وظل يتنفس بصعوبة كمت فتحت الحاكية واجانه صوت صفاء يكول الو ها عمي ؟

جاوبه ؛ الو صفاء بلغ عمامك وولد عمك وبيت عمتك وكلكم اريدكم هنا يمي بالبيت ..

صفاء : خير عمي صاير شي ؟
_اي صاير بسرعة صفاء لاتطولون ضروري جيتكم ..

_ قلقتني عمي خير شكو عمتي زينة البنات بيهن شي ؟

_ مابيهم شي صفاء بس دزولنه تهديد ..

_ تهديد!!! تمام عمي هسه راح اخابرهم واجيك ..

بقينه على هالحال الى ان سمعنه صوت الباب
بابا يريد يطلع كامت ماما على حيلها وصاحت بخووف وايدها على قلبها :  تحسين لتفتحه خاف اجوي ..

كال بابا من مكانه يم باب اللصالة شبييج سوسن هذا نسيبج اجه اخلي واكف برا ..

_ لا بس تأكد قبل لتفتح ،، فدوة اروحلك...

كامت عبير تريد تتبع بابا ، جرتها ماما من ملابسها وكعدتها  اجه صفاء ووياه زهراء
وجهه مخطوف وميته خوف لازمه بابا وحاضنته..
حضنها وظل يمسح على راسها لتخافين بنتي هسه ماكو شي ان شاءالله ..

اجتي تركص وكرفصت كدام ماما ، لزمت اديها تباوعلها بتفحص : اسم الله ماما خو مابيج شي ، والتفتت لعبير كومي عبير شوفي ضغطها خاف صعد هسه ..

عاطت ماما كعدوا لحد يكوم من مكانه وانت صفاء زهراء امانتك يووم .

صفاء واكف يباوع ع التهديد الي انطاه اله بابا .
ووجه كلامه لأمي : على كيفج عمه لايصير عليج شي

ودار وجهه كال لبابا : عمي اطلعوا من بغداد فترة وارجعوا لمن تهدأ الامور لان بقائك هنا خطر ع
حياتك انت والبنات

بس كال كلامه عاطت عبير: لااااا شنو نطلع من
بغداد بكيفك احنه واذا متنا هي موته وحده وخلص

باوعت ع بابا وحجت : شنو بابا بس لا صدوك نطلع من بغداد؟

بابا: بنتي ماعندي غير حل لعد اخسركم وانتوا بنات ...

وراها اجه كرار وظلوا يحجون كال كرار خاف متوهمين ممعقولة تصير عمي ممأذي احد ..

صفاء : انته شنو متمدد بعقلك مطي ..
وشمر عليه التهديد دشوفه التهديد باسم عمي وماكو واحد بعد بالمنطقة غير عمي دكتور تحسين..

كرار ظل يحك راسه ووجهه متجهم ..

.......

عبير ... ظليت الوب الوب يربي ماريد اطلع من بغداد
وكعدت ادعي ربي يحلها ..
... اجوي عمامي كلهم واولادهم وبيت عمتي ام قسور
سمعتهم ينصحون بابا يطلع منانه ،  اجيت ادخل للاستقبال واغرد حتى لو وتصير
كتلتي عمل شعبي دا افوت  صار قسور بوجهي عكد حاجبه بدون ميسلم كال : هاا وين شنو راح تدخلين للاستقبال وكلها ولد خو ماكوشي شي شبيج؟

كال ماكو شي لتخافين تمام ؟ مراح تطلعون من بغداد شغلة بسيطة وهسه تطمأنون .

ودار وجههه بس مبين معصب كلش ، لزمته من عكسه
انته وين رايح ؟ 

دار وجهه عليه حواجبه معكودات مخنزر وعيونه حمر
جر نفس بعمق كال رايح لبيتنا شويه واجي ..

_ صدك جذب قسور الدنيا مكلوبة عدنا وانت رايح لبيتكم بس كولي انت وضعك معاجبني شكو طمني ؟

اخذني على صفحة وظل يباوع ورايه وعيونه مليانه حجي رجع باوع عليه بعد ما تأكد ماكو احد يسمع الي راح يكوله ..

همس : عبير اني اعرف منو الي دز التهديد ورايح اتأكد وارجع ..

عطت : عزااا منووو قسور احج..

سكتني بأشارة من ايده وتكلم بتوسل عبير اهدي هذا واحد زعطوط وميكدر يسويلكم شي بس حاقد ويرد يزعزع امنكم وبس ويخوفكم لا اكثر بس صدكي كولشي ميكدر يسوي ؟

بتجهم سألته منوو اخووك محمد موو ؟ وليش حاقد علينا احنه شمسوين يمه ؟

ممسوين شي بس قبل فترة اجتي امي كالت مضايقكم انت ومريم وحاجي كلام اكبر من صماخه واني ادبته بكم راشدي على كم صونده ع كم بوكس ، شسوي مو بيدي افقد والله ماارضى بالغلط وخاصة اذا متعلق بيج انت بالذات .

عضيت شفتي ودرت وجهي توترت شويه واحس هم وانزاح ..

اني رايح عبيري اروح اخلي يعترف يله اجي خاف هم يطلع مو هو ولو متأكد لان نفس الخط الاعوج مالته ونفس عيار الرصاص الي عدنه بالبيت ..

رفعت ايدي للسماء : يارب يطلع هو مو غيره حتى منتهجج منا ..

همس امين وراح .. رجع كال لتحجين لاحد هالكلام الى ان ارجع ماشي ؟

هزيت راسي بموافقة وهو راح .. طلع من باب المطبخ ..

رحت جريت كرسي وكعدت تنفست براحة واديه على وجهي وادعي يطلع محمد العار ولا غيره ..
بس على هاي الدكة الناقصة مالته كون يشوون  اله على اذاناته بصل على السالفة العوجة ..

اجت مريم باوعتلي وصبت مي وراحت .. مرة ربع ساعة تأخر قسور ، اخذت تليفوني اريد اتصل بي
اندكت الباب رحت فتحتها اجه قسور انفاسه يلهث
سديت الباب وراه تخصر ووكف
بتساؤل ؛  ها ؟

ضرب على فخذه وتحسر كال اي هو والله خجلان من خالي تحسين هسه بيا وجه اقابله ؟

لزمته من عكسه حباب قسور رووح كووله الله يخليك وماما خطيه على نار ومخبوصين ..

طلع كرار باوع علينه واجه يمنه كال ها شكوو ..

جاوبته من يمي ماكو شي بس قسور عنده كلام ويه بابا هسه يفهمه ..

طب قسور قبلنا وكرار باوعلي كال بلله شون راح الزم نفسي ومااغلط عليج كدامه ؟

كتله الله حيصير صكاارك ..

ضربني على كتفي وكال بصووت عالي دنجبيييي ..

التفتت قسور النا واحنه واكفين وهو توه ديطب من باب الاستقبال باوع لكرار وخزره ..

كرار رفع اله ايده لا تحط خشمك ترا بنت عمي ومتعودين احنه على هيج شقة وميانة زفرة وانت هم لازم تتعود ..

جاوبه قسور من مكانه : علاقتكم قبل لا اخطبها شي ووره ماخطبتها شي ثاني ..

تقدم اله كرار وربت على ظهره بحقد بعدك ما صرت خطيبها ترا ..

قسور اخذ ايد كرار وبعدها منه بقسوة
وكله قارين فاتحتنا ومحددين الموعد ومبقى شي للخطبة  ..

كرار ببرود :  الله يسعدكم بس علاقتي ببنت عمي حتبقى نفس ماهيه ..

اشرلي قسور عمود افوت وياه اجيت داريد افوت من بيناتهم ، لزمني من عكسي وخلاني بالصفحة الي مابيها كرار .

ظل كرار يفر بيده معاجبه ، ولزم قسور من ياخته ..
كاله ترا اني خاطب وخطيبتي احبها وتسوة راسك همين فلا تظل تسوي هالحركات عبير مثل اختي وعلاقتنا حلوة واحنه هيج من زمان لا تدخل خشمك انته وتخربها .

صرت بيناتهم وقسور يجر بيه حاجيتهم بهدوء وتوسل
على كيفكم احنه بيا حال وانتوا تتعاركون ..

رجع قسور وخرني من يم كرار وكاله متعجبني ميانتك الزفرة وياها ترا خليها ابالك .

قاطعهم بابا طلع من الاستقبال

قسور : خالي بلا زحمه عليك بس اريد منك عشر دقائق انت وعبير بمكتبك

بابا باوعله: ابني مو وقتك واذا على خطيبتك وخايف خاف نسافر وانتوا ممتزوجين روح جيب
سيد وتعال اعقدوا هسه

قسور: لا خالي مو هيج الموضوع من رخصتك ومد ايده لبابا بمعنى تفضل

وباوعلي اشر براسه يعني أمشي

رحت وراه دخلنا للمكتب بابا باوع لقسور: احجي أبني شبيك

قسور: خالي والله خجلان منك وماعرف شنو اكول بس التهديد ميخوف تره وابد لاتخافون ماكو شي ..

بابا متفاجأ : انت شتكول قسور ؟

_ خالي  راح احجي بس أمانة الله ماريد هالشي يخرب بيناتنا والمسؤؤلية اني اتحملها .

_ احجي قسور فتيت كلبي احجي ..

_ اي هو جايك بالكلام ، التهديد محمد اخويه هو الي شمره هنانه واحسبها عليه واذا تريد تعاقبه اني حاضر وهسه جيت من بيتنه والله كتلته كتله غسل ولبس شسويله جاهل مراهق عقله مو براسه .

بابا تخصر وضحك باستهزاء ؛ وهاي احنه صارلنا ساعة محتارين شنسوي طلع التهديد من هالزعطوط ؟

قسور بتوتر : والله خالي ...

قاطعه بابا بحزم ؛ اسكت قسور لا تكمل وروح جيبلي اخوك الزعطوط هسه اني رايح للصالة يله ..

طلع بابا معصب وقسور جر نفس بصعوبة وصايرة كتلة من نار وطلع من المكتب واني هم طلعت ورحت لماما لكيت بابا يمها ديهدأها وكاللها علي سواه محمد بنبرة سريعة ؛ لاتخافين سوسن طلع التهديد من هذا الحيوان محمد ابن اختي اميرة وهسه راح قسور يجيبه اتصرف وياه اني .

طب بابا للصالة بدون حتى ميسمع كلام ماما ...
ظلت ماما تحمد الله وتشكره التهديد طلع ملفق ..
بقينا كاعدين الى اجه قسور وابوه جايبين محمد سحل وطببوا للاستقبال ..

كامت ماما على حيلها كالت اروح لايكتلوا عيب جاهل مهما يكون ومراهق واكيد عليه ضغط وهيج سوا .

لزمناهه وكعدناها لا ماما خلي ياخذ جزاءه احسن الي سواه بينا مو شويه يممه اتعس لحظات مرة علينا ..

زهراء: .... محمد اخذ جزاءه مقصروا ويا الكل خلوه يعتذر ويصرخ بعد مايعيدها ويكول غلطت بحقكم سامحوني ، بابا معصب كلش مو شويه الي خلانه بي ضربه وبعدها قسور وابوه اعتذروا منه وراحوا ..

بقيت يم ماما شويه ، اجه صفاء صاح عليه يحجي منعس ، رحت اشوفه شنو يريد ..

كال يله للبيت ..

_ لا صفاء اريد ابقى يم ماما شويه بعدها الصدمة مسيطرة عليها .

_يلا ابقي و أني اروح عندي دوام باجر وتعبان منايم والله

_الله وياك دير بالك ع نفسك ..

تصبحين على خير ..

طلع وبقيت اني يم اهلي وظلينه شكد بس نحجي بالموضوع شون سالفة هاي زعطوط هيج يفرنه فر
شكد طايح حظه لعد ..

وراها بيومين جنت راجعة من الدوام توا داافوت وسمعت صوت مو غريب عليه ، حركت حواجبي باستغراب هذا صوت اسراء ..

هزيت راسي بلا مبالاة وفتت جوه شفتها كاعدة بالاستقبال هيه ورشا وعمه
كلت سلام عليكم ..

بس شافتني دارت وجهه وبس عمه جاوبت وردت السلام ..

مشيت دااصعد لغرفتي باوعتلها بنظرة جانبية
وهي تهز برجلها  وتباوعلي بتحدي ..
رفعتلها تك حاجب .. ورشا مراقبة كل حركاتي ..
همت روحها وكامت تحجي : خير اشو تباوعين معاجبج ؟

سكتت عنها لحظة باوعتلها احسسها انو هي ولا شي عندي كتلها تقصديني ؟

لعد اقصد امي اي طبعا انت لعد منووو ؟ شبيج تباوعين معاجبج لايكون عبالج هذا البيت الج وحدج .

اي بيتي اني انت عندج مانع ؟

عمه كالت رشا كااافي عوفي البنية توها جايه من دوامها وتعبانه .

اشرت لعمه : لا عمه خليها تحجي بالله داشوف شنو مشكلتها ويايه ؟

_ ماعندي مشكلة بس ليش هيج تباوعين لاسراء ترا بنت خالتي وحماتي وجايه دتشوف جهال اخوها ومرة اخوها وانت مو من حقج تعترضين ومتحترمين .

فريت بيدي منو يعلمني الاحترام انتي ؟ واشرتلها باصبعي على طولها ..

اجت تريد تهجم وكفت عمه بيناتنا ودفعتني من ايدي روحي عمه زهورة روحي صعدي لغرفتج وبدلي تعبانة انتي هسه توج جاية .

باوعتلهن بحقد و توه دااطلع فوك سمعت اسراء تكول
_ خالة جان خليتي رشا تأدبها متشوفين حجيها وعدم احترامها .

عمه بحزم جاوبتها انت اسكتي اسراء خليج محضر خير خطار عدنه انتي وهذا اخوج شوكت يجي ماطولت سفرته .

_ ليش اشو ضجتي من رشا لو هذيج مقابلة على جيتها يمكم .

_ لا زهراء خوش بنيه وماعدهه هيج متسويها ..

رشا : والله يااسراء طلاك زهراء على ايدي وانت هم تطلكي من رجلج وازوجج لصفاء والله .

عمه كالتلها رشااا وسسم شهالحجي تردين تفشلينا ويه تحسين عيب عليج اسكتي ..

يوووه ماما مو خطية صفاء عايش وياهه ميحبها عبالك اخوان يعتبرها حالها حالي والله .

عمه بعصبية ؛ انجبي شهالحجي هذا اكرمينا بسكوتج احسن وانت اسراء خابري زوجج خل يجي .

اسراء : خالة انت ليش تزعلين من الحق صفاء يحبني اني ولايمكن يحب غيري اصلا اني وويا اكثر شخصين متعذبين المفروض تحسين بابنج خالة مو تخلينه هيج متعذب ميصير ترة ..

بعد ماتحملت شمرت اغراضي الي بيدي كلها وفتت مرة ثانيه ع الاستقبال وتقدمت باتجاه اسراء وصرخت بوجهه انت اسكتي ولا حجايه لاعبالج عبرتها الج ذيج المرة لا هالمرة ماافوتها الج اسمعيني زين صفاء تبتعدين عنه الفففف متر وعبير هماتين لا ترة والله اوصلها لزوجج واخلي يطيح حظج عيب عليج متزوجه وتفكرين بغيره .

كامت على حيلها وتخصرت لا يابه شوووفوو منو يحجي ؟ نسيتي نفسج خطافة الرياجيل ام السحورة اصلا لو ما سحورتكم صفاء ميباوع بوووجهج .

اني اكوول منو مخلي هالفكرة براس رشا مالة السحورة طلعتي انتي الي تحفرين براسها علينا نهار كله والله سوالف رشا مجايه من فراغ اثاريجن طابخاتها سوة
وبعدين خلي يجي صفاء هسه ودنشوف شلون حيباوع بوجهج بس انت وحدة ادبسز وبلا كرامة كافي انسي عيب علييج .

تحركت اسراء من مكانها وطلع عمو من غرفته على الهوسة اجتي يمي كمت مديت ايدي خرمشتها بوجهه عاطت وتريد تهجم عليه مدت ايديها وجرت شال مالتي نزعته اليه والدبوس خرمش وجهي .

عمو يدفع بيها وعمه تدفع ورشا تشجعها عليه وتريد تهجم وياها وعمه تصيح خابري رجلج خلي يجيج هسه ياخذج وروحي منا يلله ..

وخرها عمو مني وكفت وره عمو وظليت اصيح عليها
ناسية نفسي اي خلي يجي رجلج خلي يجي خلي اكوله على مرته وسوالفها الي لهسه تريد ترجع حبها القديم الي متستحي ..

ناسية نفسي واصيح وهنه يباوعن على باب الاستقبال وجاني صوت صفاء يصيييح بعصبية زهرااااء شنوو تردين تكولين ؟ والمن ؟؟

يتبع ..

اسفة قصير البارت ومالحكت فعلا رمضان الوقت مخربط مدري شونه وشغل اضافي الباجر ان شاءالله هم انزللكم 🌷