شريعة العشق
بارت ٢٩
نورا ناصر
... اي اسمعك انتَ شنو ؟؟ ماكو اجابة واجاني صوت النغمة الي تعلن عن انهاء المكالمة ، كعدت ع السرير مزعوجة ، افر بيدي وبالنقال بامتعاض وكعدت افكر .
افكر بهوية الشخص الي خابرني ، جان يحجي بصوت اقرب للهمس ويحاول يغير من نبرة صوته ، لذلك جان من الصعب عليه اميزها او اعرف صاحبها .
كمت من مكاني ، رتبت سريري ونسيت المكالمة ونسيت كل شي راح من بالي ، ونزلت جوا .
****
زهراء: وصلنا لدبي ، واستقبلنا صديق صفاء بالمطار سلم على صفاء وعليه ورحب بينه .. وبارك النا زواجنا .
واخذنا بسيارته ، كال لصفاء اخذك يمي بشقتنا تبقون عدنا ..
جاوبه صفاء : لا حبيبي ياسر مشكور ماتقصر مانريد نثكل عليك ودينه لفندق احسن .
_ لك صفاء شنو تثكل عليه عيب هالحجي احنه مثل الاخوان واكثر .
_ ميخالف والله ادري بيك ماتقصر بس هم ودينه للفندق وان شاءالله نلتقي مرة ثانيه .
_ اي هذا هو مثل متريد على راحتك ارتاحوا واي شي تحتاجه بس دكلي تليفون .
...
اخذنا للفندق اجرنا سويت ، صعدنا دخلنه للسويت صفاء فات للحمام غسل واني بديت اطلع الملابس من الجنط واخليهن بالكنتور اول مابديت بملابسي اسفطهن .
طلع من الحمام هو باوعلي داسفط ملابسي ، كام فتح جنطته وظل يطلع ملابسه ويخليهن بالخانه مالته ، ظليت اباوع عليه .
كتله : عوفهن من ايدك اني اسفطهن الك بالكنتور .
باوعلي ورافع تك حاجب كال لا اخاف عليج لتعبين ، حجه هيج بنبرة استهزاء ، ويشدد ع احرف الكلمات .
قوست شفايفي وحركت اكتافي حجيت "براحتك " وظليت اطلع مكياجي وعطوراتي واسفطهن .
هو خلص بسرعة لان اغراضه اقل من اغراضي ..
كال اذا خلصتي حتى ننزل نتغده همي ايدج ع السريع .
اوكي بس اغسل وابدل .
كال يلله ترا جوعان .
اصبر شويه حخلص ، باوعلي بعدم رضى وراح تمدد ع السرير وظل يخابر عمه يكوللها وصلنه ويطمأنها علينا .
خلصت ورحت سبحت بالحمام وطلعت بدلت .. لبست قميص سمائي قصير وبنطرون جينز ، وشال ابيض خليت مكياج خفيف خلصت كل شي وباوعت على صفاء ..
متمدد ع السرير وبيده موبايله ، باوعت لانعكاس صورتي بالمرايه تأكدت من كل شي والتفتت عليه .
يله صفاء خلصت ..
رفع راسه باوعلي قلص عيونه ونزل حواجبه وكام على حيله ، حسيت بنظراته الغريبة تخترقني ، وكفت اراقبه بافتتان هادئ .
حاولت اصمد امام نظراته المتفحصة
بلحظتها انتابني شعور هش من الامان والهدوء وبس اريد اعرف سر نظراته ، باوعتله جزء من الثانيه جانت نظراته مزيج بين الرغبة والرفض .
كام من السرير وتقرب مني كم خطوة ، دنكت راسي اباوع ع الكاع ، واغرس اصابعي بداخل شالي اتأكد بعدم ظهور خصلات من شعري ، عبثاً اسوي هيج بس اريد اتخلص من توتري .
كال راح تنزلين هيج ؟
باوعتله ورجعت باوعت لملابسي وجاوبته : اي هيج ليش تسأل ؟
_ غيريهن معاجباتني .
_ هو شغير منهن شبيك صفاء ترا هو هذا ستايلي اني وباقي ملابسي متختلف عنهم .
ظل مكتف اديه على صدره في اشارة للغضب ويباوعلي بتفحص لاجزاء من ثانيه وحدة ، بعدها سبل اديه وكال يله .
راح يم المرايه عدل نفسه كال طلعتي عطوراتي ؟
لا عبالي انت طلعتهن .
جر نفس بعصبية وظل يباوعلي .
شبيك مو طلبت منك ارتب ملابسك ورفضت عبالي حتى عطوراتك انت راح تطلعهن .
تجاهل كلامي وراح للجنطة فتحها طلع عطوراته وخلاهن ع الميز ..
دنكت وكتمت ابتسامة احراج ، اجاني صوته كال زهراء .
رفعت راسي باوعت عليه واني اضحك .
كال على شنو الضحك ؟
هيج ماكو شي .
ظل يفر بيده وكال يله .
طلعت قبله وهو ورايه . وبقيت انتظره يطلع ويسد الباب واكفة ولازمه جنطتي ، طلع وجر الباب بيده وسداه ، وبس يتحسر ، باوعتله والتقت نظراتنا
ملامحه معبسه وضايج .
درت وجهي مصعدة اكتافي وكاتمة ضحكي غصب عني ، وحاضنه جنطتي بيها عبالك احمي نفسي من شي اجهله ، مدري ليش احبه من يعصب ، لا ااا احبه بكل حالاته .
ونزلنا طلب الغداء وكعدنا ناكل ، بقى مزعوج وضايج ..
واني احس مسترخية شويه .
باوعتله لازم بيده الشوكه ومياكل بس صافن عليه .
بلعت الاكل وسألته شبيك صفاء اشو مدا تاكل وهم صافن عليه اكو شي ؟
لا يعني تسوين نفسج ماتدرين .
اني ادري بس تصنعت البلاهة ومبتسمة وكلت لا ما ادري والله .. سكت ثواني وينقل نظره بكل ارجاء المطعم ويرجع يباوعلي ، واني حاولت اغير الموضوع
سألته مو ع الاساس جوعان اشو مدتاكل .
ظل ينكت ايديه ويباوع ع الطاولة كال شبعت ومنتظرج تخلصين .
اكلت لكمة وسألته ليش وين حنروح ؟
_كملي اكلج حتى نروح نشتري ملابس لبسج ضيك اصلاً انتي كل ملابسج ضيقه من يمي اختنك من تلبسيهم شلون متحمله انتي ؟
باوعت على ملابسي وحجيت : لا والله انته دتشوفهم هيج اصلا مابيهم شي واني هذا ستايلي .
_ ديلله يلله خلصتي ؟
_ لا بعد ماشبعت .
_ ترا اني الي جنت جوعان مو انتي !
_ شنو مايصير اكل ؟
_ اكلي لازم ايدج! لازم حلكج ؟ كايم اغسل اني وادخن جكارة برا بين متفضيها .
كام هو واني دنكت راسي اكتم ضحكي احسه مدخن من كد العصبية ، انتبهت عليه حد ما راح يغسل واني اكلت كم لكمة وهم كمت غسلت ورجعت للطاولة انتظره .
لمن اجه ، شفته فات من باب المطعم الجام ، بقيت كاعدة مكاني متجاهلته اسوي نفسي ماشفته ونظراتي ع الناس ، اجه يمي كال يله باقتضاب .
بقيت اعدل بجنطتي وملابسي وهو واكف ينتظرني ثواني يله كمت ، هز راسه وهو يتنهد وطلعنا من المطعم .
اخذنه تكسي ورحنا للمول ودخلنا لمحلات الملابس ظليت اباوع ع الموديلات ، اجه اخذني من ايدي .
تعالي هذا حلو دناخذه الج .
باوعتله قميص تركوازي كصه وحدة لحد الركبه ورداناته طبقات معجبني ، هزيت راسي كتله لا محلو ورحت يم الملابس الي عجبتني اباوع واكدر على جسمي وهو راح يباوع على غيرهم .
اجه مرة للخ كلي عوفي هذا وتعالي شوفي هاي هم رحت شفت ومعجبني وكررها مرة مرتين انزعجت
وحجيت وياه بانزعاج : ترى هو اني الي حلبسهم مو انت شكو تختار البس ع ذوقك قابل؟
تفاجأ وظل يخزر : زهراء ميعجبني اختيارج للملابس
اللبس الضيك تركتي ببيت أبوج
_اي اوك اني اختار مااقبل احد يختارلي .
صك اسنانه وكال ؛ اختاري بس مو نفس هذا الي لابسته .
_ هسه شوكت اختاريت نفسه ؟
_ لعد ذاك الي جنتي لازمته وتقيسيه عليج شنو ؟ اكدر اعرف؟ .
ارتبكت : اي اخذ قياس اكبر واللبسه ع تنورة هم يرهم .
ظل يتنهد واديه على راسه معصب ويدردم : منين ماادورلها تدورلي شون سالفة هاي هسه اني منو صخم وجهي وكالي تزوج !!
كتله بنبرة عصبيه مصطنعة : يعني اني صخام وجه هيج تقصد ! اكو واحد جايب مرته بشهر عسل يكول كدام عروسته هيج بعدين جابرتك تتزوجني اني .
همس بعصبيه وعيونه تتنقل بأرجاء المكان بتفحص : هو منو جاب سيرتج انتي ؟ متكوليلي ، دا احجي عن نفسي ادردم ويه روحي المن حطيتي روحج ؟
_ لا انت تقصد اني قسمتك السودة ومراضي فوكاهه كله هذا عمود الملابس!!! رجعني لبغداد يلله ماابقى دقيقة هنا اختنكت .
صارت عيونه جمر غمضهن و جر نفس بعصبية وصاك ع اسنانه ويحجي زهراااء مو وكت خبالج هسه .
نزلت دموع من عيوني تعلن عن انهزامي .
واستمريت ابجي .
كال اووو اخذني على جهة يمسح دموعي .
كال بصوت هادئ يغزوه القلق : هسه شسويتلج متكوليلي .؟
واني مدنكة وامسح بدموعي : انت ع كل شي تسويه قصة وتعصب وتخزر ماطالعت هاي دتخوفني ترا!!
كال بصوت مطمأن : خلص اختاري الي يعجبج بس كون مو ضيك لج العيون عليج شبيج انت مدتحسين .
واستمر يهدأ بيه .. كلماته تغرس السكينه بقلبي وتخلي يشفع اله .
كال خلي نطلع من هالمحل الظاهر فكر خلي نروح غيره .
لزمني من ايدي ، وظل يمشي بيه ، ايده دافيه ع اثرها حسيت بقوة كهربائية قويه تسري بشراييني واوردتي .
طبينه لغير محل وهالمرة خلاني على راحتي أني الي اختاريت ، هو ظل ساكت محجه ولاشي بس جان يدفع ، كملنا ورجعنا للفندق .
وظليت اسفط بالملابس وهو تصرف وياي عادي وكأنما شي ماصار ، بس بداخلي فرحانه لان بكل مرة اضوجه و يراضيني ، حسيت وفيت وعدي لنفسي .
اجه يمي كال اذا خلصتي حتى نطلع بس غيري لبسج وباوعلي بنظرة غريبة .
اي تمام هسه اغير ، رحت بدلت ملابسي وطلعنا رحنا لنوافير دبي فد شي بمنتهى الروعه وقريب منها برج خليفه .. عبارة عن نافورة راقصة طلعت تليفوني وتصورت يمها .
انتبهت عليه مازعجني وكال سوي الي يريحج .
واني هم اخذت راحتي ، وصورت ويا صور بس تمنيت اكون وياه اقرب من هيج تحسرت بألم .
بوره ما طلعنا رحنا لبرج خليفة صعدنا للطابق ١٢٢ تعشينه ، صفاء حاول مايزعجني هالمرة ، جان كولش مرتاح ويضحك حسيته ناسيه كولشي وحاب يعيش
اللحظه الي هو بيها ، بس هم حسيته بعيد عني .
مريم : رحت للاول متوسط وعبير رابع وبدأ الدوام عبير انتقلت لغير مدرسه و جانت متقبل أروح وحدي للدوام مع أنو المدرسة قريبة يمنا كولش بس أعبر الحديقه مال الشارع ..
و مع ذلك هي جانت متقبل أبد اذا ماما عدها دروس
بالبداية اروح وياها واذا لا عبير توصلني يلا ترجع
تروح لمدرستها وهيج مرت الايام .
لحد مافد يوم كعدت للدوام بدلت ونزلت لكيت
عبير بالصاله دتنتظرني اني جنت كولش بطيئة
وهي تعصب بسبب هالشي يعني هي تكمل قبلي
بنص ساعه ومع ذلك تبقى تنتظرني من شافتني
كامت.
_يلا أمشي اوصلج حتى أروح لمدرستي
طلعت قبلها داامشي وهي كالعادة تمشي ورايه وترزل بيه لان متأخرة
التفتت عليها : اكولج ترى مكايلتلج تنتظريني تكدرين تروحين والله حلوة هاي
_اشششششش لج تريد تروح وحدها وهاي الحديقه مليانه ولد وكلهم ادبسزية شلون تروحين
وحدج يلا امشي بلا لغوة زايدة
مشيت واني أحجي عليها بداخلي: امي متتدخل بيه هلكد اصلاً اشو امي تاركه كل هالامور لعبير خانم...
وحتى من ترزلني متحجي تكولي أختج وتخاف عليج ضايجة من هالوضع هذا كولش ، باوعتلها بطرف عيني وتنهدت همزين ماانتبهت عليه .
وصلنا للمدرسة دخلتني بيدها للمدرسة وانطتني من يوميتها فوك يوميتي وراحت ، ابتسمت ورحت على صفي .
عبير: مريم كبرت واخاف عليها هي أحلى وحده بينا عيونها رصاصي وجمالها نفس جمال ماما
والمصيبة هي مغرورة بجمالها وضاربه الدنيا عرض الحايط أني واثقه بيها بس خايفه عليها
بهاي الفترة أخو قسور الصغير محمد جان دومه
يلحك بمريم وين متروح ويذبلها كلام محلو هو
هذا واحد مخربط حتى دراسته تركها ، هو اكبر
منها بسنه و هي تضوج منه حيل حتى تسمعه كلام
محلو لدرجة عماتي ظلوا يضوجون منها .
وبيوم صادف عرس أبن عمتي ورحنا هو
شافها وهم ظل يراقبها ويشمر حجي ، أني جنت
بعيدة عنها وهوسه لان عرس وناس حسيت اكو شي مو طبيعي كمت وتوجهت الها ، لكيتها دترزل بي
وهو المطي مبتسم الها .
متخصرة ومخنزرة عيونها وتعيط بوجهه : كافي لك حس ع نفسك والله اكول لماما عليك
واخليها توصل حجي لبابا ويروح ع ابوك لك انت
متستحي أني عرضك شلون هيج تسمعني كلام
خايس ملطلط صاير رجال براسي؟
سمعتها ظليت اضحك هاي تربيتي حسيت التعب مراح بلاش وياها ...
رحت صحتها وأجيت
سألتها: شكو شبيج؟
_ولج عبوره هذا المطي براطمه براطم البعير
يكولي فدوة لهذا الصدر اكيد بي حنان مثل حنانها عبالك بكد صدر امه أني ؟ دايح ابو الشوارع والله لو ماجايه أنتي الا انزع الحذاء واحطها بحلكه..
_اشششش لج كافي بعدين شلون تحجين ع عمه
عيب وهذا خيولي أني احاجي واخلي بعد ميوصل
لبيتنا .
هي صدُك مريم جسمها ابد مو ويا عمرها وذاك
سكط اني اعلمه يتدلل
زهراء: مرت ايام واحنه بعدنه بدبي ، وبيوم رحنا للقرية العالمية وصفاء ركب خيل واني ظليت اتفرج عليه .
نزل كال ها تجربين ؟ خليت ايدي على قلبي لا يمه اخاف . ظل يضحك كال ادري بيج جبانه وام دميعه .
مال تصعدين خيل انتي ؟
باوعتله ورافعه حاجبي : ها تتحداني ترا اسويها واركب والله .
لزمني من عكسي لج تعالي لاتتهورين انوب توكعين تتكسرين وابتبي بيج .
ابتعدت عنه كم خطوة تبتلي بيه ؟ يعني ماخايف عليه ؟
اوووو وين شطح بالج ، وكرصني بخدي ، لج طبعا اخاف عليج غير انت مسؤؤليتي . ودار وجهه .
ظليت اباوعله بقهر واتحسر بداخلي .
بعدها رجعنا للفندق ، دك موبايل صفاء باوعتله وجهه كام ينطي الوان وارتبك ..
سويت نفسي ممهتمة ..
جاوب: هلو خاله شلونج ؟ سكت ديسمع شنو يكولون ورجع حجه وأني شعليه؟
اخير شي عااااط شلوووون ؟؟ سهله سهله بأقرب
وقت أني راجع بس كوليلي خو مابي شي؟
ختم المكالمة ووجهه تخربطت ملامحه بلعت ريك خفت لا اهلنا بيهم شي ..
رحت يمه لازم موبايله وخلاه على اذنه كتله شكو ؟
ويه مكتله هيج حجه ويه صديقه كاله فدوة يسوري اقرب موعد طيارة لبغداد اريدك تحجزلي .
كمل اتصالاته واني بقيت باهته ، اريد اعرف شكو التفتلي ..
_حضري الملابس وخليهم بالجنط
_ليش شكو هو اني شفتهمت
_بهاء اخويه مسوي حادث وحالته خطرة وهسه خالتي
أم ضرغام خابرتني
عوجت حلكي: ومنو يكول كلام خالتك صح بلكي
لعبة منها
_شنو لعبة منها دااتصل بأهلي محد يجاوب معناها
اكو شي وهم ميريدون ينطوني خبر
_هههه نشوف ولو اكص ايدي اذا مطلعت لعبة قذرة من خالتك .
_ لج اني بيا حال روحي كتلج
اووكي ، طلع واني رحت ارتب الملابس شويه ودخل للغرفه
_اكولج عمي تحسين هم ميجاوب شو بالله اتصلي
بي انتي بلكي يرد
_هاي شبيك انت ذاك الموبايل وروح اتصل واني متأكدة اخوك مابي شي وهسه نوصل ونتشوف بعينك بس صدكني اذا طلع مثل متوقعت العب لعب بخالتك خلي يكون بعلمك
باوعلي معاجبه : زهرااااء شبيج ؟
_ مابيه بس اني حدسي مايخطأ ..
باوعلي بنظرة متتفسر ، وراح ديتصل ع بابا ..
صاح زهراء موبايلج طافي شحن ..
بعدني مجاوبته رن موبايله راح يركض جاوبه وظل يحجي ..
ختم المكالمة وحاجيته ها اكو خبر منهم ؟
لا هذا صديقي يكول حجزلنا تذكرة ع باجر ساعه ١٢ الظهر ..
هزيت راسي وكملت ترتيب الملابس ...
كرار: حاجيت ابويه نروح لاهل مها نحدد موعد العرس وثاني يوم رحنا و انصدمنا بأبوها قافل الا
تخلص السادس ظلينه نقنع بي اني وابويه يمعود عدل بدل ماكو قافل ، ابويه تنرفز ...
كاله: اذا انت هيج ناوي تخمرها يمك لعد ليش وافقت وهم ترى عاقدين ويكدر يتزوجها ويطلعها
من بيتك أبني كولشي مكمل ع أي اساس يكعد
ينتظر ٣ سنوات وهسه هي رابع يعني الرابع والخامس والسادس شنو مضحكه احنه كدامك
هو من شاف الوالد تعصب انجر بوشه : ابو كرار
أني اعرف بنتي اذا اتزوجت تلتهي وتفشل بدراستها ويمكن يصيرون عدها اطفال هنا حتى
الدراسه تتركها مو بس تفشل
ابويه: بس احنه ماعدنا بنات ميكملون دراسه واذا
ع الاطفال عود يأجلون مشروع الانجاب لان هم
متزوجين ع حب الله والوطن حجاها باستهزاء
وعوج حلكه
باوعت الوضع تأزم بيناتهم ، ظليت احرك برجلي بتوتر واتنهد واباوعلهم بعدم رضا ، ابويه من شافه قافل باوعله : اي هذا هو خليها يمك بس خلي ببالك اريدها تطلع اعفاء مو انت تكول الزواج يلهيها هسه هي
بيت ابوها معناها كولشي ماعدها .
كمل كلامه ووكف كمت وياه سلم وقبل ليطلع طلب منهم يشوف مها ، راحوا صاحوهه و اجت مها يمنه ..
كلتلها بانزعاج هلو شلونج؟
باوعتلي بنظراتها المحبة وهمست الحمدلله ..
تركتهم وهي ظلت تباوعلي مستغربه تصرفي ..
مهتميت ورحت صعدت بالسيارة واباوع عليهم واكفين بالطرمة مالتهم والباب مفتوح .
شفت ابويه نصه لمستواها وظل يحجي وياها وهي بس تهز براسها ، طلع من محفظته و انطاها فلوس واجه صعد ، حسيتها واكفة تباوع ، بقيت داير وجهي ومارديت الها النظرة ضايج وطاكة روحي .
طول الطريق حرف محجيت ، وابويه ظل يسب بيهم ..قطعت كلامه التفتت عليه: اكولك يابه اليوم عندك شي
_لا ليش ؟
_تمام لعد من نوصل بلغ امي حتى نطلع لكربلاء
ونبات هناك صار هواي مرايحيين ..
وصلنا وابويه حجه ويا امي كيفت وفرحت ، كلتلهم هذا هو لعد اني اصعد انام ومن تكملون كعدوني ..
عفتهم وصعدت فوك
هستوة داخل للغرفه رن موبايلي ، طلعته من جيبي شفت مها دتتصل ترددت ثواني اجاوبها بس بعدها جاوبتها واني الدنيا طالعه من خشمي
فتحت خط كلت الو ... محجت بس تبجي ظليت ساكت اني همين بس صوت
بجيها وشهكاتها اذاني ..
همست : كافي ياعيني ع شنو دتبجين مو مردتي
عيونج
ظلت تحجي وتبجي: انت ليش هيج سلمت عليه
من ورا خشمك اني شعليه اذا هو ابويه ميقبل
_لج ضايج بالقران ضايج وانوب ابوج زودها
مو مليييييييييييت وين اووووووولي لو اخوج
لو ابوج من ساعة السووووده الحبيت بيها حتى
بالخطوبه مافرحت مثل الاوادم
هي زادت بالبجي وظلت تناشغ ، انتبهت لنفسي وفكرت هسه هي شعليها واجي اني اصيح عليها
امرها مو بيدها .واحس .دموعها تجوي قلبي بنار تسعر . تنهدت واستغفرت وجاوبتها ..
_ احممم ديلا مصار شي
شنسوي ننتظر ونخلصها وياج شفهي ولو انتي
حتى من اجي اشوفج الامم المتحده كلها تكعد
يمنا ادري هيج بيتكم صغير حتى يكعدون ع خوانيكي
ساكته متحجي لج بويه احجي اروحلج فدووة
ضحكت واختلطت ضحكاتها ويه شهكات بكاءها المتبقية : همست بصوت مبحوح بسبب البجي وغصه : كرار عفيه لتتركني بسبب اهلي أني احبك
والله
_باع هاي لج مخبله اتركج بس الموت يفرقنا وحق
داحي باب خبير ياابوج يااخوج انتي شهكة الهواء
الاتنفسه مهاوي حبيبي لتضوجين لان صيحت
عليج
_لاعمري انت اعرف بيك مضغوط من الدوام ومنا
بابا رفض نتزوج هسه احبك كرار انت احلى شي
صار بحياتي انت دعوة أمي اليه
جنت مبتسم واسمعها هي سكتت :كملي عمري ليش سكتي
_عبالي نمت مثل كل مرة شو سكتت
_لج لا دااسمع كلامج المعسول حبيبة عمري بعد
شويه نروح لكربلاء شنو تحبين اجيبلج ويايه
_ادعيلي
_بشنو؟
_ابقى وياك طول العمر ونشيب سويه
_خرررررب يومج لج احببببببببببببببببببببببج دكة قلبي انتي وداعة شيبات امي
_ششششش عززززا بعيني هم كمت تعيط ليجي عمو يسمعك عيب
خلي يجي اوكفي لج خبلتيني بنت ابو كرش
احبببببببببببببببببببببج ، صيحت بصوت عالي كلش وممهتم لشي ..
واسمع الحجي يعيط : الحمار شو ديجعر مو كال
راح انطمر
حاجيت مها _لج سمعتي شي
_لا ليش شكو
_احلفي مسمعتي
_وداعتك مسمعت شي
_الحمدلله
_ليش شكو؟
_ها مو هاي ابويه ديتغزل بأمي وكلت عيب تسمعين تروح تفسد اخلاقج واني مااريد احد
يفسد اخلاقج غيري...
_شكد منحرف ديلا روح نام حتى تركز بالسياقه
_دتعالي لج شبعان نوم وين طفرتي اخخخخخخ
الله شكد ضاملج غزل بس تعالي ونوري غرفتي
انعل شرفه الي يزعلج بيوم
_حبيبي ماما دتصيحني حروح وانت انتبه ع نفسك لان انت نفسي احبك
سدته وراحت اجيت داانام دخل الحجي باوعلي
ضام ضحكته: كوم لك صارلك ساعه تتغزل وهسه
جاي تنام
_وانت شنو شرطي واكف تتصنت عليه مو عيب
اهلك ماعلموك هالشي يلا ابني روح انزل
اجه عليه دفرني: كوم ولك قليل الادب هيج تحاجي ابوك ؟
_كايم يابه كايم ..
طلع ابويه واني كمت بدلت ونزلت...
هك طلعوا قبلي واني قفلت البوب وطلعنا لكربلاء.....
****
زهراء: كعدت ثاني بوقت حتى اتحضر دخلت للحمام سبحت وطلعت داانشف شعري التفتت لكيت صفاء يباوعلي بنظرة استياء ..
عضيت شفتي واستغربت نظراته كتله بنبرة مرتجفة _ صباح الخير
جاوبني هلو صباح النور وتنهد وهز راسه مزعوج ..
التفتت ع المرايه وظليت انشف بشعري وافكر شبي ضايج هيج ويباوعلي !
صفاء: جنت نايم حسيت قطرات مي توكع ع وجهي فتحت عيني لكيت زهراء واكفه قريب مني
ودتنشف بشعرها ، ظليت اباوعلها باستياء
هي التفتت شافتني صبحت عليه تركتها
تباوع بنظرات مرتبكة كمت للحمام غسلت وطلعت ..
طلعت لكيتها مطلعتلي ملابس بدلت قبل
لا ننزل شفتها تباوع لموبايلي رحت يمها انتبهت
هي رفعت راسها وجهه بي كل علامات الصدمة والاستغراب والاستياء ..
حجت بنتر : هاي منو دتراسلك وتكولك حبيبي رد طمني عليك من البارحه لليوم مدزيت مسج؟
يتبع ..