في شريعه العشق

البارت العشرون

#في_شريعة_العشق
بارت20
نورا ناصر

سديته بوجهه شمرت التليفون على السرير وتنهدت
هاي الثانية مراح اخلص منها شعدهه متصلة بلله
متستحي يعني ، زين اذا سمعها زوجها دتخابر وتوصي على حبيبها السابق شراح يسوي بيها !!

بقى صدى كلماتها يتردد براسي لدقائق
كمت لبست تراك وفتحت التسريحة
و بقيت المكياج

اجيت دااطلع من الغرفه وصلت للباب سمعتها تندك  فتحته صار بوجهي صفاء ..
تبادلنا النظرات لثواني ، ملامحه فاضحته مبين انو مزعوج وطاكة روح روحه ..

بقى ساكت لحظات وبس يباوع بوجهي
بادرت وسألته بنفاذ صبر ..
_ها صفاء رايد شي ؟

هز راسه بانزعاج وحجى بدون نفس ..
_لا سلامتج بس اجيت اعتذر منج علي الصار عصبت عليج وانت مالج ذنب

باوعت عليه وهزيت راسي
_اقبل بشرط
رفع حاجبه بتساؤل : _وهو؟

_بعد متعيدها احنه مو من اول شي نبدي بمشاكل
لسه الحياة طويلة كدامنا انت من اول شي تصيح
عليه لعد بعدين شلون؟

_ان شاءالله اول مرة واخر مرة بس انتي اذا شفتيني معصب لخاطر الله لتلحين لمصلحتج احجي اني
_تمام بس اكو واحد يعصب بيوم خطوبته ؟

خزرني :- زهراء مو كتلج لتلحين خلص عاد انسي مو جيت دا اعتذر شكو هلكد تنكين ..

عضيت شفتي احاول اسكت نفسي
وهو ديرزل بيه وبس اباوعله مخنزرة ومعصبة وبس انفخ   ...
اخر شي ختمها كال يله امشي اهلي كاعدين برة لتظلين حابسة نفسج جوة شيكولون هسه ..

_ لا محابسة على نفسي ولا شي اصلا هسه جيت اطلع وانت دكيت الباب ..

خلى ايديه وره راسه وسحب تنهيدة حارة بضيق
وراح كدامي واني رحت وراه واحجي بداخلي
هسه ليش كلت دا اطلع لو محاجية لو متظاهرة بعدني زعلانة مثل ما هو متوقع  احسن..

طلعت دا اريد اساعد ماما وعبير بتحضير العشاء
صاحتني عمتي ام صفاء ؛- لج بنتي انتِ اليوم عروس تعالي اكعدي لتسوين شي ..

باوعت لماما اشرتلي بوجهه وانطتني نظرة فهمت منها انو كلام عمة صح لازم اروح اكعد .. 

رحت  يمهم بالاستقبال كعدت ع التخم
كالت لا تعالي كعدي يم صفاء
كمت من مكاني وكعدت يمه
ظلت عمه بس تتغزل بيه و أبنها ساكت ومزاجه
متعكر وبس ينفخ ويهز برجله وهي ماخذه الدور عنه ..

وبابا وعمو مندمجين ديسولفون واحنا ساكتين بس عمة تحجي واني اجاوب اي ، لا وكلساع تكول لصفاء لك باعلها جنها فلعة كمر ، اني ادنك واتصنع الابتسامة  وهو بدون اي ردة فعل ..

عبير وماما اجوي خلو العشى وتعشينا ...
ورى العشاء كام صفاء كال يلله تصبحون على خير ...

امه جاوبته وين رايح ابقى يم خطيبتك احنا نروح
صك اسنانه وجاوبها يوم باجر وراي دوام من الصبح ..

جاوبته .. اي لتروح باجر مو اليوم خطبت شكو رايح

جاوبها بنبرة حادة .. خطبت ماعرست ..

دتريد تحجي بابا سبقها :- لتلحين عليه ام حسين يمكن صدك تعب حقه خلي يروح ايام الله هواي ..

بقيت اني واكفه وساكتة ومدنكة واعصر بايديه
صح تعبانة بس جنت رايدته يبقى يمي شويه ننفرد ونسولف اي شي بس مصارت ..

طلعو هما وامي انتبهت عليه ضايجة
اجتي يمي واخذتني للغرفة ..
كالتلي عوفي ماما لتذبين نفسج عليه خليج عزيزة نفس ..

رفعت راسي وحجيت بغصة ؛- ماما مدري شبي ضايج اليوم ومعصب روحه بخشمه اكو واحد هيج يسوي بيوم خطبته ؟

مدت ايدها لشعري تبعده عن وجهي
كالت لاتهتمين وعلى كيفج ويا بنتي ولتلحين عليه يمكن شي مضوجه

_ غير يكولي شبي حتى اعذره
_ يمكن ميريد يضوجج ومكدر يتحكم باعصابه لتحكمين عليه بدون متعرفين شنو السالفة ،

هزيت راسي بدون قناعة ، وماما كالت نامي و ارتاحي تعبتي اليوم ، طلعت ماما واني كمت غسلت المكياج ورحت تمددت ع السرير وتليفوني بيدي وكلساع اطل بشاشة التليفون اتوقع منه يدز مسج او يتصل ..

بس ماكو وخابت امالي ، انقهرت ودمعت عيوني ليش هيج متجاهلني ، طلعت رقمه  وصلت لدرجة اجيت اخابره بس اتذكرت كلام ماما لتذبين روحج عليه
خليج عزيزة نفس لفيت راسي ونمت واني مقهورة .

.
.
.

كرار : خلصت  خطوبة صفاء يوم ثاني بالتحديد قررت اروح  افتح الموضوع ويا الوالد ..

تسرسحت من فووك المحجر مال الدرج  ونزلت ادور ع الوالد  ،  شافتني امي ظلت تفر بيدها ..
من وصلت يمها باوعت بوجهه ؛- ها يوم شبيج تباوعيلي مشايفتني ؟

جاوبتني ؛- شوكت تعقل شوكت تكبر ؟

_ هسه ماعلينا العقيد رجلج وين ؟
_ شنو تريد منه ؟

لزمت ياخة قميصي وعدلتها بغرور
وجاوبتها ؛- اريد افتح ويا موضوع الخطوبة ..

رجعت تفر بيدها وحجت باستهزاء ؛- ديالا بللا يريد يتزوج وهو بعد لهسه ينزل من الدرج مثل الزعاطيط ...

_ من اتزوجها اعقل وعد عليه
وضربت على صدري ..

هيه هم هزت راسها كالت نشوف ، ومشت باتجاه المطبخ تمشي وتحجي ؛-  وهسه انت عليش مستعجل متكولي اشو حتى دراسة بعدك ممخلص والبنية هم صغيرة بعدها ....

_ اريد اخلصها من ظلم اخوها اجيبها هنا حالها من حالنا شكو بيها ..

باوعتلي بنصف نظرة وحجت باستهزاء غير يكعد راحة سوبر مان ...

_ هسه معلينا رجلج وينه ؟

اسمع صوت ابويه وراية ؛- شتريد من رجلها ؟
كحيت من الصدمة ..
اريد احجي هو سبقني ؛- شوكت تحترم انته ولك ؟

تقربت منه ابوس راسك بوية
صاح بصوت صارم ؛- اتبعني ..

تمتمت ؛- سمعا وطاعة ...
وتبعته ..
كعدت يمه بالصالة ، فاتت امي خلت الجاي
كالت هذا جايك ابو كرار اني راح امر على اختي شوية خطية مريضة ..
اشرلها ابويه وكاللها روحي ..

اخذ ستكان الجاي ظل يخوط بي ويحجي بدون ميباوع عليه ؛- متشوف نفسك هواي دتلح بموضوع الخطوبة ؟

رفعت ايديه باستسلام ؛- انت كتلي ورة خطوبة صفاء وهاي اني جيتك ورة الخطوبة مباشرة

_ دصبر يومين تلاثة البارحة صارت خطوبة صفاء شبيك انته مستعجل ؟ امك جابتك وهيه تركض لك انته شلون صبرت ٩ اشهر ببطن امك ..

_ يابه هسه متكولي شطالب اني ؟ بين ما يوافقون وجيب الليف ودي الليف مخلصة هاي السنة ..

_  اول شي ندز امك تشوف رأيهم يلا
نروح احنه الزلم
_تمام يابه بس فدوة استعجلوا اخوها واحد
مو خوش ادمي

_افتهمت كافي لتخبصنا باجر امك تروح ولو اني
معاجبني هالنسب بس مااريد اكسر خاطرك بالاخير القلب ومايهوى

_اي عفيه شلون انت هويت امي وهي جنها صاحبي عباس
_خوش لعد شوف باجر اجرلك ام تروح تخطبلك

_لايمعود هاي ست الحسن والجمال حتى احلى منك ومني زوج اليكول عليها مو حلوة عنده قلة
ذوق ...
ظل يضحك عليه همزين امي راحت  يم بيت خالتي لو سامعتني والله فلا تروح ولا توصل ...

ثاني يوم صار العصر نزلت من فوك واني متحمس شفت امي بالمطبخ جاي تشرب جاي ودايرة وجهها صحت عليها بصوت عالي ؛- هااااي بعدج مرحتي ؟

اندارت عليه وغصت بالجاي ظلت تكح رحت اضرب على ظهرها ، شالت الخاشوكة شمرتها عليه
وصيحت وصوتها مبحوح من الغصة ؛- ولك شبييييك شدعواك هيج تخرعني ..

_ يوم دخيل الله باعي بيش الساعة وبعدج مارحتب ؟

_ وعليش مستعجل هذول هما بالفرع الورانه ..
_ اي يوم مو راح يصير المغرب ..

كامت وشالت وياهه الجاي وتوجهت للحوض مال المواعين اخذت تجلف بيهن ببرود وتباوعلي عبالك نظراتها تكولي اغسل المواعين ..

_ ها خو ماترديني اغسلهن ؟
_ وشكو بيها ساعدني
_ هيه ذله خو ما ذلة يا امي ..

_ لا مو ذلة بس داشوفك تغسلهن عمود اروح اخطبلك ست الحسن لو لا ؟

_ اووو بدت سوالف العمة والجنة من هسه

_ ولك حمار خلي تصير هسه وبعدين تبدي
رحت لبست صدرية المطبخ وشكلت رداناتي وبديت اغسل بالمواعين وحجيت بهدوء وفتور ؛- روحي يوم روحي اني اغسلهن بس روحي خطبيها ..

هزت راسها ولمعت بعيونها نظرات الفرح
_ وفد نوب اغسل الطرمة وياك
_ اغسلج البيت من السطح للشارع بس روحي ..

_ اي بعد روحي شسوي الله مارزقني بنية تعاوني املي بيك انت
اسمعها واهز براسي ..

راحت امي طليت عليها شفتها دتطلع من الباب
شمرت جلافة المواعين وشردت

بقيت انتظرها بالحديقة ، ساعة ونص و  اجت اباوع بوجهه مضروب جينكو كمت من مكاني ورحت الها سألتها: ها يوم بشري ؟

ظلت تتنفس بصعوبة وفاتت جوة تمشي وامشي وراهه
اتوسل بيها تحجي يوم بشري فدوووة اروحلج
تريد تفوت للمطبخ تريد تطل ع المطبخ غسلت المواعين عزلت المطبخ غسلت الطرمة ؟

تمتمت ؛- اي مو الميري مالتكم اني ..
كالت هااا؟ شكلت
جريتها من اكتافها ومخليتها تطل ع المطبخ لتشوف المواعين ممغسولة ووجهتها للصالة
كتلها ها داكولج بشري ؟

التفتت عليه وكعدت ع التخم ؛-شبشر يمه ذوله ناس همج طلعتنا زوجة اخوها تطك بالعلج وتشمر والامايه ولا تحجي كلمة كله بيد مرة الاخو المحروسة هيه الامر الناهي ..

وبعدين طلعت البنية اباوعلها شو هاي مزوركه؟
اكولك يمه انت منين جبتهم ذوله بس لا عصابه؟

_ عصابتيش يمه ناس فقرا على باب الله ..

_ ولم  وانوب اجه اخوها من الباب يصيح ولج حلووووومه والله بكت طن هوى عبالي راح شوف شيسويلي ؟

اتركهم يمه ميفيدون هاي البنية متعودة ع الكتل بس تجي هنا بعد متخاف من شي وتتفرعن علينا ..

_شترك لخاطر ربج احبها تعرفين شنو احبها وبعدين قابل اني حتزوج اهلها لو اتزوجها ولتخافين مها حبابة وترباية ايدي .. ودكيت على صدري

_ غير تستقر الدادة دودي غير يكعد راحة روميو
ولو تبطل هاي الحركة من تسويها ما ارتاحلك .. تحجي وتأشر عليه باصابعها .. 

عدلت كعدتي وكلت اووو

_ والله يمه اني اكول انتظر بنت عمك عبوره تكبر
واني اخطبها الك شلك بهالنسب هذا باجر عكبه
اطفالك شيطلعون لخاطر الله

_ياعبير يا بطيخ انتي شبيج يوم هذا الحجي متحجي كدام ابويه والعباس لو مها لو مااتزوج
وفكرة عبير شيلها من بالج لتخربين علاقتي ببنت
عمي

_طبك مرض اني شعليه هم كالوا اسبوع ونرجعلكم خبر ننتظر ونشوف خبرهم شنو

_اي انتظر شكو عندي مها تستاهل الانتظار بنية
قلبي هاي

هزت ايدها امي وراحت للمطبخ اني خليت رجل على رجل وطلعت موبايلي العب بي ، سمعت صوت امي تصيح من المطبخ ولللك كرااار ، شمرت الفون من ايدي وكمت ، عرفتها شافت المواعين على حطتهن ، وين صار درب الفلتة ....

زهراء : ثاني يوم يله  خابرني صفاء..
رديت عليه الو
_ الو هلو زهراء شونج ؟
_ زينة اني انته شونك ؟
_ تمام ، سكت شوية وكال شكو ماكو شنو الاخبار ..
_ زينة الحمدلله ..
ظل يحجي ويايه بس ابد ماعنده لهفه كله حجي عادي حتى من يحجي ويايه عبالك مجبور او تأدية واجب مو غير شي ،  زهكت منه ..

ارتفع صوتي بتوتر يعكس مزيج مرير من الاحتجاج والالم ؛- اكولك صفاء  اذا ميعجبك تحجي ويايه ترى ممجبور

جاوبني: لا بس تعبان حضري نفسج فد ساعه اجي
عليج نروح نزور الامام الكاظم صار هواي مزاير
تكدرين تجين لو عندج شي؟

_غير تكول لبابا لو اطلع من شوري ؟

بعصبية جاوبني ؛- ترى دااخذ رأيج حتى اشوف اذا موافقه حتى اترخص من عمي مو انتي تعلميني الاصول زهراء شوية حسني اسلوبج ؟

عليت صوتي ؛- شبيك شكلتلك اني شو متتحمل حجايه مني لو تموت مااطلع وياك خوش ؟

حجيت هيج وسديت الخط بوجه
لعبها لنفسي بس يعيط امداني وكل هذا واحبه
هذا مو حب انتقام انتقام والله ..

خليت ايدي على وجهي بس اريد اخفف من التوتر الي اني بي احس راح اطك من العصبية ، هم زين وحدي بالغرفة ظليت اتنفس بصعوبة واحس الدم كله تجمع براسي يافرحة ماتمت راح نبقى كل كلمة والثانية نتعارك ..

ورة دقايق ارتفع صوت التليفون يعلن عن وصول مكالمة توقعته هو مجاوبته وبقيت بمكاني يم الشباك اشتم هوا ، حسيت زعجني صوت التليفون وهو يتصل بدون ملل ، رحت اخذته وجاوبت ..

بس فتحت خط  اجاني صوته يرعد طرش اذني ..
كام يصيح لان سديت الخط بوجهه ...
_ شنو هذا التصرف زهراء ؟؟ هالمرة سويتيها مرة ثانية ديري بالج تسويها ..

_ اي وشسوي يعني صفاء ؟ ترة مدا اتحملك يعني محملني منية لان قبلت بيه

_ لا تظلين كل حجاية والثانية تعيدين نفس هذي الجملة ؟ سمعتي لو لا ؟

_ اشو كلامك كله تهديد ادري شتريد وشناوي تسوي وشنو تريد تثبت بلله

_ انتبهي لتصرفاتج كلش زين مفهوم ؟ ويله روحي اترخصي من عمتي وعمي دنطلع نزور ..
وسد الخط بدون ميسمع مني ..

للحظة ردت اكنسل الطلعة بس مردت تصير مشاكل اكثر او يكبر الموضوع ..
نزلت جوة شفت ماما تعبانة وبابا مكابلها وكاعد ..
احتاريت شون اكوللهم اريد اطلع ويا صفاء
ظليت اعصر بيديه واباوع على ماما بقهر ..

هيه تعرفلي ظلت تباوعلي لحظات  بسرعة حجت
_ خير ماما زهراء شكو شبيج ؟ صاير شي ؟

هزيت راسي ودنكت ؛- لا ماما مصاير شي بس صفاء يريدني اطلع ويا نزور الامام الكاظم بس هسه مراح اروح انت تعبانة مينطيني كلبي اطلع واتركج ..

لزمت ايدي ؛- لا بنتي روحي ابوج يمي واختج هم متقصر ..

بست ماما وكمت بدلت ،  لبست قميص فوك الركبه لون سمائي وبنطرون ابيض وشال وردي وحذاء وردي
خليت مكياج بسيط لان اول وتالي حمسحه هناك...

دك الباب راحت فتحته مريم واني تلكيته من الباب
بس استحيت اخلي عيني بعينه ع العركة الصارت
حسيت بالندم يمكن جنت قاسية ويا زيادة ..

كعد ويا بابا واطمأن على ماما ، حاولت اتهرب من نظراته بس بلا ارادة مني عيوني تغدرني وتباوعله ..

استأذن من بابا وطلعنا صعدت يمه بالسيارة

اول مصعد باوعلي ثواني  وكال ببرود : حلو لبسج
جاوبته بنبرة جامدة ؛- شكراً ..
وحجيت بداخلي خررررب حتى ميعرف يسمعني
كلمه حلوة هي كالتها ماما حتعبين وياه هوايه بس شسوي ..

ظل يسوق هو وساكت واني ساكتة ،  الطريق صار كلش طويل ازدحامات بغداد تخنك و لا اني كادرة اخذ بالحجي ويا ولا هو ينطق كلمة جنه جبل وكاعد .. 

حسيت بالممل مديت ايدي للمسجل ودااشغل اغاني  هو باوعلي

كال ؛- هاي ع الموبايل مو سي دي ، هاج موبايلي اختاري اغنية

مجاوبته اول مفتحت المسجل طلعت اغنية اليسا

ساعات جانت كلماتها
مش كل اللي بنحبهم حيكونو لينا
ولا كل اللي بنحبهم لايقين علينا
ممكن نلاقي اللي ياما حلمنا بيهم
ويلاقونا ما نلاقيش الحب فيهم
وساعات بنشوف الحب وهو ما يشوفناش
وساعات يقابلنا الحب ويمشي وماعرفناش
وساعات بيجينا الحب ويمشي كأنو مااجاش
وكتير بيسيبنا الحب وجرحو مبيسبناش

صفاء من جان يسمعها بس يهز براسه وقابض
ع الستيرن قوي  ومن وصلت مقطع

مش كل اللي بيحبنا ساب جرحه فينا
دا جايز يروح مننا والخير يجينا
ممكن نعاند ويفضل بين ايدينا
وبعد جرحه ما نلاقيش اللي يداوينا
وساعات بنشوف الحب وهو ما يشوفناش
وساعات يقابلنا الحب ويمشي وماعرفناش
وساعات بيجينا الحب ويمشي كأنو مااجاش
وكتير بيسيبنا الحب وجرحو مبيسبناش

عاط طفييييييي للزفتتتتتت طفي
فزيت بسرعه مديت ايدي وطفيته وهو ظل يعيط : لج انتيييييي شنوووو حتى اغنية متعرفين تختارين
شنو من بشررررر انتي ساعة السودة الطلعتج بيها

انصدمت من كلامه صيحت عليه : اني شعليه انت جنت تكدر  تطفي اول مطلعت الاغنية

رجع عاط بيه : لتجاوووووبين صوتج مااسمعه افتهمتي ؟؟

_تمام ما اسمعك صوتي ويله هسه رجعني للبيت
باوعلي خزرني ...

_لتخزر هسه ترجعني للبيت والقرأن اذا مرجعتني
افتح الباب وانزل واكولهم هذا خاطفني يلا رجعني

صاح ؛  بس كافي اسكتي

بعده يحجي واريد اجاوبه ،  دك موبايلي طلعته من الجنطة وايدي ترجف رجف مصاير متوترة حيل ومجاي اكدر اسيطر على نفسي ونبضات قلبي تتقافز بشكل مؤلم ..

باوعت ع شاشة الموبايل  هاي عبير تتصل
جاوبتها بسرعة  اجاني صوتها: انتي وين خاتون ؟
_شنو وين؟  طالعه ويا صفاء..
ومن كلت اسمه صكيت على اسناني بقوة وكملت كلامي : وبابا يعرف وماما هم ليش شكو؟

_وين وصلتوا؟
_يم الصرافيه

_اي خوش قريبين هسه بسرعه ترجعون انتي لشوكت تبقين بهالانانيه سعادتج وبس مو شفتي
ماما متخربطه شلون تطلعين واذا بابا قبللللل
ولج شنووووو من بشر انتي؟

نبض قلبي بشكل مؤلم ، مثل سهم برق وصعقه ...
حجيت بخوف وتوتر ؛- خير عبير شبيها ماما احجي ؟

امج تخربطت وهسه دخلوها انعاشششش ولج
تعاليلي رجليه مدااكدر اوكف عليهم فدووة
زهراء امنا دتموووت ......

يتبع ...