علياء :هو ايه اللى ما يمكن تستاهل
لا بجد مش فاهمة هو ايه اللى ما يمكن تستاهل
نيفين وهى بتضحك :اهدى يا منار
سارة وهى بتضحك :بلاش روح الفيمنيست اللى جواكى تطلع دلوقتى
حمزة وهو بيضحك :هو انتى طلعتى منهم بتوع حقوق المرأة دول
طيب مش تعرفينى
ولا تزعلى نفسك يا ستى انتى صح
علياء :متهزروش فى حاجات مينفعش فيها الهزار علشان دى سخافة وتقل دم وانعدام شعور
دى روح اتقتلت واحدة اتدبحت وسال دمها على الأرض قدام كل الناس
انتم شايفين دى حاجة تضحك ده انتم لو واحد فيكم رجله اتخبط فى الباب بيقعد يومين رجله بتوجعه ومقريف ومش طايق نفسه
ودى اتدبحت فاهمين يعنى ايه اتدبحت
محدش يستاهل الدبح مهما عمل
ومش من حق حد يدبح حد مهما اتعمل فيه منه
تسعتاشر طعنة وبعدين يدبحها ده ايه ده
ده احنا مبنعملش كده فى الأسرى يعنى اعدائنا اللى بيحاربونا لو وقعو تحت ايدينا مبنعذبهمش
ده احنا ربنا امرنا لو بندبح حيوان ميشوفش السكينة علشان منرعبوش
والسكينة تكون حامية علشان ميتعذبش واحنا بندبحه
ربنا امرنا نرحم الحيوان واحنا بندبحه وطريقة معينة يتدبح بيها وليه حقوق
ما بالك الإنسان لا حرام بجد حرام
هو قاتل وهى ضحية ومفيش اى حاجة ممكن تبررله اللى عمله ده وتخليه حقه وتخليها تستاهل اللى حصلها
اللى بتكلم فيه ده حقوق انسان مش حقوق مرأة
من حق الإنسان انه ميتقتلش فى عز النهار والناس كلها واقفة تتفرج وتصور فيديوهات
ده بيدبحها فى الشارع مش بيتقدملها علشان يقفو يصورو
لا وايه فى ناس كمان شايفة ان اللى اتقتلت هى اللى غلطانة وظالمة
واللى قتل هو اللى مظلوم
ده ايه انعدام الدين والعبث وانعدام الإنسانية ده
يعنى مش كفاية الطريقة البشعة اللى اتقتلت بيها بدل ما نجيب حقها بنخوض فى عرضها
حمزة :انا مخوضتش فى عرض حد انا بقول يمكن تستاهل
يعنى لبسها كان وحش ويشجع اى حد انه يأذيها اسلوب حياتها ميدلش انها كانت محترمة
وهو قال انهم كانو على علاقة وانها كانت بتستغله ماديا وانها لعبت بمشاعره
علياء :عقبال ما نشوف رقبته وهى بتلعب على حبل المشنقة
واللى انت بتقوله ده مش خوض فى عرضها
وبعدين لبسها ممكن ميدلش على انها متدينة
ولو ان دى حاجة ربنا العالم بيها واكيد ربنا هيحاسبها على لبسها
بس انا اقصد الله اعلم هى كانت قريبة من ربنا بإيه بتعمله فى العبادات
بس هو الأكيد ان لبسها مش معناه انها مش محترمة
اللبس مش مقياس للأخلاق وانت متعرفهاش علشان تحكم عليها وعلى اخلاقها
كمان انت عايزه يقول ايه انا دبحتها علشان انا مريض نفسى
متحملتش ان واحدة ترفضنى
ويعنى ايه لبسها يشجع اى حد انه يأذيها
هو دايما لبسنا هو المشكلة نتعاكس يبقى بسبب لبسنا نتعرض للتحرش او الإغتصاب يبقى بسبب لبسنا
ودلوقتى بقى ممكن ندبح وهيبقى السبب برضه لبسنا
مش اننا عايشين وسط حيوانات بشرية ومرضى نفسيين اهلهم معرفوش يربوهم وميعرفوش حاجة عن دينهم
حمزة :لا اللى بتحترم نفسها وبتحترم البيت اللى خارجة منه محدش بيتعرضلها
علياء وهى بتضحك باستهزاء :مين بقى اللى فهمك كده
طيب انا اهو محجبة ولبسى محترم ومش مستفز ولا حاجة
وعادى جدا بلاقى واحد مترباش ممكن يعاكس
انتى يا سارة مش مختمرة يعنى اظن مفيش احترام واحتشام فى اللبس اكتر من كده
سارة :اه الحمد لله
علياء :محدش بيتعرضلك مبتلاقيش واحد بيبصلك بصة تضايقك مش ممكن تسمعى معاكسة ملهاش لازمة من واحد ملوش لازمة
مش بتقعدى فى المواصلات عينك فى وسط راسك
علشان محدش يأذيكى بأى طريقة سواء بكلامه او بإيديه
سارة :هو الحمد لله مبتوصلش لدرجة ايديه
بس ممكن اه حد يركز معايا يقول كلمة ملهاش لازمة
او يبصلى بصة متعجبنيش
نيفين :والمنتقبات بيعاكسوهم ليه شايفين منهم ايه يعاكسوه لبسها ولا شكلها استفزهم فى ايه
علياء :بالظبط
حمزة :ممكن يكون اللى بتقولوه ده بيحصل بس دى حالات فردية ومش قاعدة
علياء :لا للأسف دى القاعدة والرجالة المحترمة هى اللى بقت استثناء
ودايما فى مبررات للرجالة ودايما الغلط على البنات
تصدق يا حمزة ده حتى لو هى كانت على علاقة بيه وسابته هو برضه مش من حقه يدبحها زى الفرخة كده
هو خلاص مبقاش من حقنا نسيب حد لو مش مناسب لينا
مش من حقنا نقول لا مش عايزين
واساسا هو كداب
والمصيبة ان فى ناس مصدقة كدبته الهبلة دى
ومصدقة انه من حقه يقتلها
مش فاهمة الناس بتفكر ازاى ولا بتحس ازاى
دول عاملين جروبات على الفيسبوك بيطالبو فيها ببرائته
براءة ايه ده قتلها قدام كل الناس وفى فيديوهات
وهو نفسه معترف بجريمته
والناس تقولك لا برئ حرام مستقبله يضيع
وهو نهى حياة واحدة وسرق بقية عمرها
دمها على ايده والناس تقولك برئ
حمزة :مش برئ اكيد بس يعنى يتعدم مرة واحدة
علياء :اه يتعدم من قتل فليقتل ده العدل وده الحق
ولا انتم ايه رأيكم
سارة :لا مش لدرجة يتعدم يعنى الإعدام حاجة كبيرة
يعنى مثلا يتسجن عشرة او خمستاشر سنة
جيهان :لا ياخد مؤبد
علياء :لا طبعا يتعدم وفى ساعتها يتعدم فى ميدان عام ويعرضو فيديو اعدامه لايف والناس كلها تشوفه
علشان محدش يعمل زيه
علشان متلاقوش بكرة مية نيرة مدبوحين علشان قالو لا
وعلشان متلاقوش مليون نيرة مكملين مع مرضى نفسيين علشان خايفين يتدبحو
وعلشان لو فى شباب مريضة زيه تروح تتعالج مش تتطلع امراضها على بنات الناس
ده كان لازم يتعدم قبل ما دمها ينشف من على الأرض
سارة وهى بتضحك :انتى عنيفة اوى مش كده يا علياء فين رقة البنات
علياء :تصدقو بالله انتم حارقين دمى انتم والمرضى النفسيين اللى بيدافعو عن القاتل المريض النفسى ده
نيفين :طيب والمريض النفسى مش نعالجه
علياء :لا يتعدم يتقتل وحياته تنتهى والا بكرة هتلاقى مليون واحد يقتل ويقول معلش اصلى مريض نفسى
من قتل فليقتل نقطة نهاية
يتعالج دى كانت قبل ما يدبحها مش بعد
حمزة :احنا منعرفش كل حاجة
يمكن فى تفاصيل تخليكى تغيرى رأيك
علياء :لا مفيش مش من حقه عمره ما كان ولا هيكون حقه او حق اى حد
ده لو فى واحدة بتبيع جسمها بالفلوس وجالها زبون وقالتله لا علشان شكلك مش عاجبنى هى حرة ومش من حقه يدبحها برضه
حمزة :انتى فيمنيست جامد على فكرة
علياء :انتم اللى متعرفوش حقوق الإنسان
دى روح يا عالم تروح كده ببلاش تروح قدام عينينا نتفرج على موتها فى فيديو وروحها بتفارق جسمها وبتفارق الدنيا كلها وبعدها يجلنا قلب وضمير نطلع مبررات للى قتلها واستحل دمها
حمزة :طيب احضرنا وقول حاجة يا رامى انت ساكت من اول القعدة
رامى :مبحبش اتكلم فى بديهيات
نيفين وهى بتضحك :يا سلام على الروقان
وايه بقى البدبهيات اللى مش عايز تتكلم عنها
رامى :ان اللى عمله ده جريمة مفيش اى حاجة تبررها وانه لازم يتعدم وفورا
وان اللى يدافع عنه يبقى مريض نفسى
حمزة وهو بيضحك :كده عندنا اتنين فيمنيست فى العيلة
رامى :لا وانت الصادق كده عندكم اتنين بيفهموا فى حقوق الإنسان ومش عايمين فى مية البطيخ
الكلام الساذج بتاع شوفو كانت لابسة ايه هو السبب فى ان المنتقبة والمختمرة بيتم التحرش بيهم دلوقتى لفظى وللأسف ممكن جسدى كمان
اللوم على البنت وبس هو اللى بيخلى شوية خنازير ترن على أرقام عشوائية ومجرد ما يسمع صوت ست يعاكس على طول وميفرقلوش سن يعنى ناس قد امى وامك بيتعاكسو على الموبايل عادى
الرعب اللى مربينه للى تتكلم وتقول انا فى حد بيضايقنى بكلامه ولا بيهددنى بصور ولو كانت متفبركة بس طبيعى تخاف من الفضيحة حتى لو كانت بالكدب
هو اللى بيخلى بنات تنتحر
انا مبقولش ان البنت اللى لبسها مفيهوش الضوابط الشرعية مش هتتحاسب
بس اللى بقوله ان تبرجها مش هيحلل تحرشك بيها
ولا هيحلل قذفك ليها فى اخلاقها وتربيتها
الحرام هيفضل حرام عليك وعليها وكل واحد بيشيل شيلته فى الأخر وبيتحاسب لوحده قدام ربنا يوم القيامة
من الأخر يعنى علشان منرغيش كتير
علياء وهى بتسقف :صح والله العظيم انت بتفهم
اجدع واحد فى العيلة دى واجدع واحد فى الدنيا بحالها
حمزة :عايز تفهمنى يعنى انك لو عدت واحدة حلوة ولبسها مبين قد ايه هى ايه حلوة مش هتبص عليها
لو فاتحة مجال مش هتتكلم معاها والكلام يجيب وصال الخ الخ
ملاك انت مبتغلطش صح
رامى :لا مش ملاك وبشر وبغلط
بس مبقولش عن غيرى انهم شياطين لما يغلطو زيى
مبحرمش عليهم اللى محلله لروحى
مبعملهمش شماعة اعلق عليها ضعف نفسى
مبحملهمش ذنب غلطى وضعف طبيعتى
علياء :ما هذه العظمة انت تدى كورسات توعية ونسميها كيف تكون رجل بحق
حمزة :انتم متحاملين على فكرة وماشيين عكس التيار وخلاص وانا كلامكم ده مش قانعنى هقوم انا وطبلو انتم بقى لبعض براحتكم
سارة :يا حمزة متقفش هما مش قصدهم...استنى طيب هاجى معاك
رامى :شكله اتضايق مع انى بتكلم فى العموم ومش قاصد حد بكلامى يعنى...بعد اذنكم ده اتصال مهم لازم ارد
علياء :اتفضل
نيفين :عمالة اقرصك وابصلك والبعيدة ايه جبلة ايه اللى هببتيه ده
علياء :فى ايه بتهزقينى ليه
نيفين :هو مش حمزة ده الكراش بتاعك
عمالة تهزقى فيه بقالك تلت ساعات ليه يا اخرة صبرى
علياء :انا هزقته امتى لا طبعا محصلش
نيفين :اومال يعنى امى الله يرحمها اللى فضلت تقوله انها عايشة وسط حيوانات بشرية ومرضى نفسيين وانه مغيب
علياء :انا مقولتش انه مغيب
نيفين :وهو لما ميبقاش فاهم اننا كلنا بنتعاكس وان الرجالة المحترمين هما الاستثناء مش القاعدة يبقى ايه واعى ومية فل وعشرة ما يبقى مغيب طبعا
لا وعلشان تموتينى من الشلل قاعدة تسقفى لرامى وتقوليله انت اجدع راجل فى الدنيا بحالها قدام حمزة
علياء بتوتر :تفتكرى زعل
نيفين :افتكر زعل ده انا افتكر انه مش طايق يبص فى وشك
اومال لو مكنش الكراش كنتى عملتى ايه
علياء :الله يعنى معبرش عن رأيى
نيفين :لا يا حبيبتى عبرى براحتك لحد ما حمزة يطير من ايدك خالص وتقعدى جنبى تعيطيلى
علياء :لا خلاص تعالى نروح نشوفهم فين هو وسارة وهحاول الطف الدنيا شوية علشان اصلح اللى عملته
نيفين :انتى محتاجة تخليه يفقد الذاكرة علشان ينسى وتصلحى اللى عملتيه
علياء :يووووه بقى ما كفاية تقطيم فيا...هتساعدينى اصلح الدنيا معاه
نيفين :هتهبب على عينى وانا من امتى سيبتك لوحدك
علياء وهى بتبوسها من خدها :تستاهلى اوسكار اجدع بنت عم فى الدنيا
بعد سنة واربع شهور
علياء :الفيديوهات حلوة بشكل حاجة كده تشرح القلب الحزين ايه ده ايه الجمال والحلاوة دى
خلصانة انا مهرى هيبقى اسير ومش هقبل بأقل من زفة بالمدرعة
سارة وهى بتضحك :وانا كمان عايزة اسير يا ابراهيم
نيفين :انا كل شوية اشغل الفيديوهات واتفرج عليها حلوين بغباء وطول اليوم بشير ميمز على الصهاينة والتغفيلة اللى اتغفلوها اتفضحو قدام الدنيا كلها
علياء :ساكت ليه يا حمزة انت مش فرحان باللى بيحصل فى فلسطين
حمزة :انا مش شايف ان دى حاجة تفرح
علياء :نعم
حمزة :اللى عملوه ده مش هيعدى بالساهل واسرائيل هترد وردها مش هيكون بسيط
تمن فضيحتهم قدام العالم كله زى ما انتم بتقولو هيدفع تمنه فلسطين كلها
علياء :هما كده كده كانو بيقتلو فيهم ومعيشينهم فى قصف ودمار
فاللى حصل ده انتصار اخد الحق او حتى جزء منه انتصار وحاجة تبرد القلب وتفرحه
حمزة :تمن الفرحة اللى بتتكلمى عنها دى هيكون غالى اوى
علياء :الفلسطينين بيدفعو التمن بقالهم خمسة وسبعين سنة ده مش جديد عليهم
المهم النهاردة يفرحو ويفرحونا معاهم وعلشانهم
انا خلاص من النهاردة اكتوبر بقى شهرى المفضل فى السنة مع انى مولودة فى مايو بس لا اكتوبر احلى
نيفين :وانا من النهاردة رقم سبعة هو رقمى المفضل
سارة :وانا بدأت اتفائل بسنة ٢٠٢٣
اهى بتحلو اهيه فى اخرها...حمدلله على السلامة اخيرا جيت
رامى :معلش على ما خلصت شغل
علياء :مش فاهمة بيشغلوكم ازاى يوم السبت
رامى :لو عليهم هيشغلونا يوم الجمعة كمان
هيخلونا نبات فى الشغل لو ينفع
فككم الخروجة النهاردة على حسابى انا عازمكم
سارة :اوعا على الرشة الجريئة
نيفين وهى بتضحك :شكلك قبضت النهاردة وهتروق علينا
رامى :لا قبضت من يومين
بس فرحان باللى عملوه حماس فى شوية الخنازير اللى هناك وهروق عليكم علشان مزاجى رايق اوى اوى اوى
شوفتو الفيديوهات وجمدانها بتغسلنى من جوه كده كل ما بشوفها
بعد اسبوعين
حمزة :نجيب وخلاص يا علياء مش هتيجى من ازازة حاجة ساقعة يعنى مش كفاية انك مخليتيناش نروح ناكل فى كنتاكى مع انك عارفة انى بحب الأكل هناك
علياء :تحب ايه ونيلة ايه
كنتاكى دول بيدعمو الصهاينة عايز تروح تدفعلهم تمن الرصاص اللى بيقتلو بيه اهلنا فى فلسطين
حمزة :وهو يعنى الميتين جنيه اللى هدفعها هى اللى هيشترو بيها دباباتهم ام سبعة مليون جنيه
رامى :لو كل واحد فينا قال كده يبقى مش هيحصل حاجة
انما هيحصل حاجة لو فهمنا انه اه ميتين منى على تلتمية منك قادرين يشترو دباباتهم
وقادرين يحسسوهم ان القضية ماتت واننا متقبلين وجودهم فى فلسطين ومتقبلين اللى بيعملوه فى اخواتنا هناك عادى
نيفين :انا قلبى بيوجعنى من الفيديوهات اللى بشوفها وخلاص بقين احس انى لو شربت بيبسى ولا شويبس كأنى بشرب دم
سارة :انا بصراحة مش شايفة ان المقاطعة هتفرق فى حاجة كمان العمال المصريين هما اللى بينضرو
حمزة :بالظبط كده يعنى احنا ندعم فلسطين على حساب اهلنا فى مصر
علياء :والله المصريين يقدرو يشتغلو فى اماكن تانية
وكمان احنا لما ندعم المنتج المصرى وقتها هيتوسع وهيحتاج عمالة فيشتغلو وقتها فى مصانعنا اللى بتنتج منتجاتنا
مش كفاية سايبينهم يموتو بالميات وساعات بالألاف كل يوم كمان مستكترين عليهم ندعمهم بالمقاطعة اللى هى اضعف الإيمان
عموما براحتكم بس انا مش هطفح بيبسى
رامى :انا هجيب عصير
علياء :هاتلى معاك يا رامى بس بلاش المراعى وبيتى علشان مقاطعة
نيفين :وانا كمان بص هات جهينة امان معانا
حمزة :وانا مش شايف للى بتعملوه ده اى قيمة وهشرب بيبسى عادى
سارة :وانا كمان
نيفين :ماشى احنا نصحناكم وعملنا اللى علينا
بعد اسبوعين
على الواتساب
حمزة :جماعة كفاية فيديوهات موت وعياط وحزن
الجروب ده احنا عاملينه علشان نطمن على بعض
علشان نظبط خروجة علشان نهزر سوا
انما انتم بقالكم شهر قالبينه منصة اخبارية
نيفين :عايزنا نعمل ايه يعنى فى وسط اللى بيحصل فى غزة ده نشيرلك مهرجانات وميمز يعنى ولا ايه
سارة :الصراحة انا كمان تعبت من الفيديوهات والصور اللى بتبعتوها قلبى بيوجعنى
وتعبت خلاص مش قادرة لا اشوف ولا اقرء حاجة
علياء :اللى واجعلك قلبك ومش قادرة تشوفيه ده
هما بيعيشوه هناك ده لو فضلو عايشين يعنى
مينفعش تقولى مش عايزة اشوف ولا اقرء
حمزة :ولما تشوف وتقرء هيحصل ايه هتفرق فى ايه
رامى :هتلاقى حاجة تقولها لربنا يوم الحساب
احنا كل اللى بنعمله ده سواء بوستات او فيديوهات وتشيير اخبار ومقاطع ودعا ليل نهار ليهم وتبرعات على قد ما نقدر
علشان بس نلاقى حاجة نقولها لربنا يوم الحساب
علشان ده اضعف الإيمان
مستكترين تعملو اضعف الإيمان
حمزة :والله انا حر فى اللى اعمله والجروب ده بقى بيضغط على اعصابى خليكم انتم فى فيديوهاتكم واخباركم اقولكم روحو عيشو معاهم احسن
وادى احلى مغادرة للجروب
سارة :ليه يا جماعة كده بس
ينفع يعنى تخلو حمزة يسيب الجروب
هو عايز يكون محايد هو حر احترمو رأيه
علياء :لا هحترم رأيه ولا هحترمه هو نفسه ولا هحترمك لو دافعتى عنه يا سارة
خيبة ووكسة عليه وعلى افكاره قال محايد قال
ده المحايد ده العن من اللى بيدعمهم بالنسبالى
الحياد جريمة دى قضية ايمان وعقيدة وانسانية كمان
سارة :ماشى بس برضه انتم كبرتو الموضوع اوى كان ممكن تحتوو غضبه
نيفين :هو البعيدة مبتفهمش بنقولك قضية ايمان
ومسألة عقيدة ومشكلة انسانية وتقولى احتوو غضبه
يا شيخة يولع هو وغضبه
الناس بتموت هناك غدر يا سارة بيموتو جعانين لا مياة
ولا اكل ولا كهرباء بيقصفو البيوت والمستشفيات
بيقتلو العيانين واللى ماتو بيقتلوهم مرتين
الجثث هناك بيحطوهم فى ثلاجة الأيس كريم مش فى المشرحة
عائلات كاملة بتستشهد هناك
اطفال بتستشهد واطفال بتعيش بعد قطع ايديهم او رجليهم او الإتنين
اطفال ابوهم وامهم بيستشهدو ويبقو يتما اب وام كمان
وبيخرجوهم من بيوتهم بالغصب يا بيقصفو بيوتهم وهما فيها
واللى بيسيب بيته ويروح لمكان امان زى ما الصهاينة بيقولو بيقصفو هناك علشان هما شوية رمم ملهاش كلمة ولا بيحفظو عهد طول عمرهم
هناك قصف فى كل حتة وشهداء فى كل مكان من كل الأعمار
واحنا هنا بتتفرج وعاجزين وتقوليلى مش عايزة اتفرج قلبى ييوجعنى
طيب متتفرجيش ومتقاطعيش وعيشى حياتك عادى وانسيهم
بس فكرى بقى هتقولى لربنا ايه لما يسألك عليهم
الحياة اختيارات يا سارة فاختارى صح
بعد تلت ايام
حمزة :عدى تلت ايام وانتى معبرتينيش بكلمة تصالحينى بيها
علياء :واصالحك ليه هو انا زعلتك
حمزة :انتى مش شايفة ان كلامك يزعل
علياء :وانت مش شايف ان كلامك يحرق الدم
مش شايف ان حيادك جريمة
وجريمة لا تغتفر كمان
حمزة :انا هخطب سارة
علياء :بجد...مبارك
حمزة :كنت متردد بس طلعت غلطان
سارة طيبة وبتخاف على زعلى ومبتقولش كلام يضايقنى
علياء :لا متترددش علشان مفيش اى داعى للتردد
انت مش هتلاقى زى سارة
حمزة :انتى شايفة كده
علياء :اه
حمزة :انا كمان شايف كده
هخلى بابا النهاردة يكلم جوز خالتى علشان نطلب ايديها ونتخطب فى اسرع وقت هتيجى ولا هتقاطعى الخطوبة كمان
ولا مش هتبقى فاضية مشغولة بقى بتشيير الفيديوهات اللى لا بتقدم ولا بتأخر
علياء :للأسف لو فضلت عشر سنين بشرحلك اهمية المشاركة سواء فيديوهات او صور او اخبار مش هتفهم فمش هتعب نفسى
متقلقش هاجى الخطوبة وهشير فيديوهات عادى وانا فى الخطوبة ما انا اصلى عاملة باقة كبيرة بشير منها فى اى مكان براحتى
بعد يومين
نيفين :يعنى انتى مش متضايقة ان حمزة اتقدم لسارة
علياء :لا بالعكس انا متضايقة انى فى يوم كان نفسى يتقدملى
حمزة مش مناسب ليا خالص
انا حقيقى حاسة انه فقد احترامى ليه مش بس فقد اعجابى بيه
سارة بتحبه وعايزاه وسبحان الله لسه بتحترمه يبقى مبروك عليها
نيفين :يعنى بجد مكنش نفسك يتقدملك
علياء :لو اتقدملى كنت هرفضه
بقولك مبقتش احترمه نزل من نظرى بجد
وقال ايه كان متردد بينى وبين سارة من كتر جمدانه قاعد يقارن بينا ويختار بقى سى هارون الرشيد
نيفين :هو قالك انه كان بيختار بينكم
علياء :مقالهاش صريحة بس فهمتها من كلامه
نيفين :طيب ايه نعرف سارة
علياء :لا ملوش لزوم
علشان اولا مش من حقنا نعمل كده
وثانيا هينكر وهيطلعنا كدابين
وثالثا هى اصلا مش هتصدق عليه كلمة
فعلى ايه ربنا يهنى سعيد بسعيدة
مش هى بتحبه وعايزاه تشرب بقى
وممكن عادى متشربش هى اساسا معندهاش مشكلة مع انانيته وسلبيته وافكاره اللى تستاهل الحرق
فتمام هيعيشو فى سلام سوا
ربنا يسعدهم
نيفين وهى بتضحك :من قلبك الدعوة دى
علياء :اه من قلبى فى الأخر هو ابن خالتى وهى بنت خالتى وانا اتمنى يكونو مبسوطين هتمنالهم الشر ليه
هو انتى بتتمنيلهم الشر
نيفين :لا طبعا هو انا اينعم مش طايقة حمزة وسارة حارقة دمى علشان ماشية وراه زى العامية
بس برضه متمنالهمش غير الخير
علياء :وانا زيى زيك بالظبط
ولو فى يوم كنت معجبة بحمزة فده ماضى قذر مسحته من دماغى باستيكة خلاص
يوم الخطوبة
رامى :عقبالك يا نيفين
نيفين :لا يا باشا مش قبل ما اتخرج عقبالك انت
رامى وهو بيوشوشها :طيب طرقينا شوية علشان يبقى عقبالى
نيفين :بتوزعنى...ماشى هتوزع بس بمزاجى...علياء انا هروح اكلم هند صاحبتى لحسن رنت عليا اكتر من مرة
علياء :ماشى يا حبيبتى سلميلى عليها
نيفين :حاضر
رامى :عقبالك
علياء :عقبالك انت كمان
رامى :لايقين على بعض اوى وشكلهم فرحان
علياء :اه فعلا ربنا يسعدهم ويتمملهم على خير
رامى :ألا هو انتى ايه رأيك فى جواز القرايب
علياء :كله مشاكل وحوارات
رامى :خسارة كنت عايز اتقدملك
علياء :بس المشاكل بتتحل والحوارات بتنتهى لو فى تفاهم
وبعدين الجواز استقرار كده انت فاهم
رامى :اه وحب وامان وتفاهم
ولما يكونو اتنين متربين سوا وعارفين بعض كويس دى بتكون نقطة قوة لصالحهم
علياء :اه بالظبط كده خصوصا لو الإتنين فى بينهم تفاهم ومبادئ متقاربة ونقط مشتركة كتير زيى انا وانت مثلا
رامى :يعنى اكلم عمى ولا هتخافى من المشاكل والحوارات
علياء وهى بتضحك :هخاف الصراحة
بس كلمه برضه انا موافقة
وافقت على رامى عن اقتناع كامل
علشان المواقف اللى حصلت خلتنى اعرف عن حمزة حاجات مكنتش اعرفها واشوف حاجات مكنتش شايفاها فيه قبل كده
وفقد احترامى واعجابى بيه
ونفس المواقف خلتنى اشوف رامى بنظرة تانية
واشوف قد ايه هو راجل قوى وصاحب مبدأ وعنده عقيدة سليمة وإيمان ثابت مبيتهزش
بقيت مبهورة ومعجبة بيه وعارفة انى قريب اوى هحبه
لأنه يستاهل كل الحب والاحترام اللى فى الدنيا
الرجالة بتتعرف من مواقفها سيبكم من اى كلام بيقولوه عن نفسهم وركزو مع المواقف
المواقف وبس هى اللى هتعرفكم عليهم كويس
اللى حصل فى فلسطين عرف العالم كله بيهم وبقضيتهم
وخلانا احنا كمان نعرف نفسنا ونعرف بعض
ناس اتصدمنا فيهم وفى ارائهم وفقدو احترامنا
او على الأقل هزو صورتهم فى عيونا
وناس زاد احترامنا ليهم ومكانتهم عندنا بقت اعلى
خليكم فاكرين ان الخلاف فى القضية الفلسطينية يفسد الود كله
واعرفو ان الحياد جريمة
وجريمة لا تغتفر كمان
لأن الساكت عن الحق شيطان اخرص
وافهمو ان الحياة اختيارات واحنا لازم نختار اننا نقف مع الحق
والحق مع الفلسطينين وبس فاختارو صح واختاروهم
ومتبطلوش دعا علشانهم
ومتبطلوش مقاطعة
ومتبطلوش مشاركة بوستات وفيديوهات عنهم وعن اللى بيحصل هناك
ومتبطلوش تبرع ليهم على قد ما تقدرو
ده كله اضعف الإيمان نأثم ان لم نفعله
اللهم النصر القريب 💖🇵🇸
#حكايات_منار
فضلا تدعو لابويا وامى بالرحمة والمغفرة وان يسكنهم الله فردوسه الأعلى بدون حساب ولا سابقة عذاب هما وموتى المسلمين جميعا خصوصا من زال اثره فلم يذره زائر ولم يذكره ذاكر