𝐌𝐲 𝐂𝐚𝐬𝐞 // قــضـيــتــيــــــــے

𝐂𝐡𝐚𝐩𝐭𝐞𝐫 𝟏𝟔

         ◽حليت عيني مع الفجر .. ماشابعاش نعاس ولكن قتلني الجوع ، بالاخص منين رخفني الوجع شوية !
       .. كنت باقة بحوايجي باش خرجت ، قاديت غير شعري فالمراية و نزلت للكوزينة ناخد شيحاجة نقضي بيها ..
      مشيت للثلاجة ، خديت طرف دالحلوى فطبسيل ، و عمرت الما باش ندوز ..
        گلست مقابلة مع المنظر لي كيبان فالشرجم.. يا سلام! استحليت الگلسة حتى قفزني صوتو من جهة الباب .. :
- صباح الخير ..

[ شهقات ] : خلعتيني!!

- نتي لي گالسة فالضلام ..
                ◽دخل عمر كاس د الما و جر كرسي گالس حدايا .. :
- كي بقيتي شوية ؟
- شوية وصافي ..

[ حرك راسو بإيماء ] راه خليت حقك من العشا الا بغيتيه !

- لا مافياش ، تشهيت غير شيحاجة حلوة ..

- وايلي على مافيكش ! ماكليتي والو من الفطور ..
                  ◽وقف و بدا كيقرب لي الطباسل عندي مكمل هدرتو .. :
- راه تانا خليت عشايا معاك ، مابغاتش دوز ليا بلا بيك !

- الله يجعلني نتيق ..

[ ضحك بخفة ] كولي راه غاتموتي ليا هنا!
                 
         ◽.. بديت كناكل و هو غير كينقب معايا مونسني ،  خلا الضو طافي و دخل معايا فأجوائي كيما هوما .. :
- نتا لي طيبتي ؟

- اه.. عجبوك ؟

- حسن من راس الحوالا لي حط لينا صاحبك !!

                 ◽بقا كيموت بالضحك ، حسيت بيه تفكر اللقطة كفاش نضت كانجري هربانة بحالا غايتبعوني .. :
- ههههه ماكنتش عارف داير دكشي للغدا ، راه صدمنا كاملين ..

- بزاف! ونتوما كليتو دكشي ماخليتوش فيه العظم

[ رجع كيضحك ] وانا احبي تا للجوع مادويش معايا !

- اممم.. [ مكملة ماكلتها ]فراسك! داك الولد ، عاشور.. تاهو ماكياكلش اللحم ، فمرة وسبابو غير بلان بحال هاكة...
                    ◽تلاشات ضحكتو باش تعوضها ابتسامة باردة و ملامحو تقلبو للهدوء .. مكانش عليا نجبدو فالهضرة !.. :
- هيثم ..

- كملي عشاك ..
                ◽بغا يهضر ،ولكن تسمع صوت الآذان بعيد شوية .. :

- الفجر هدا .. غير تسالي ، طلعي نعسي رتاحي! راه باقي الحال ..

- اجي غير كمل ماكلتك ..

[ حرك راسو بالنفي ] بصحتك!
              ◽مشا يصلي و انا كملت لي بقا ، كان فيا الجوع و دكشي بنين .. مابغيتش نخلي الروينة ، رديت الباب شوية على الصداع و شعلت الضو باش نغسل الماعن ...

               🔹غير صليت الله يقبل ، بان ليا شعلات الضو عرفتها مغاتنعس تا تحيد الماعن .. مابغيتش نمشي عندها ، حيت غاتجبد لهضرة غانصدقو مشادين تاني على والو .. خديت القرآن و گلست كنقرا شوية ، باش نصفي أفكاري ..
               غيرة اه ! ولكن ماشي بقدر خوف .. ليلى عندها الحق ، غير كنشوفها تفاهمات مع اي واحد ، كنخاف تميل ليه و تخوي بيا انا .. وخا راه عطاتني الوعد! ولكن.. كنخاف ، قلبها يتعلق بشي حد اخر و هي معايا! كانخاف نتغدر مرة خرى ، و نعاود القصة من لول ، حيت هاد المرة غاتكون الضربة صعيبة ...

#👇🏻👇🏻👇🏻..

         ◽طلعت بدلت عليا و تخشيت بلاصتي نعس .. بقيت ساعة و انا متكية بلاصتي كنفكر فهدشي لي وقع..
         زعمة هو كيشوفني ديما مع الرجال و الدراري ، فالخدمة و فحياتي عادي ! علاش تال دبا عاد جاتو الغيرة ؟ واش حيت تفاهمت معاه زعمة .. و لا حيت بقيت مدوزة معاه الوقت كتر منو ؟ ..
       ماعرفتش ، بغيت نسولو ولكن بان ليا كيتهرب من الموضوع ...

               [ 8:00 am ]
           🔹غير كنشوف فالسقف مادانيش نعاس .. نضت نطل عليها واش مزيان ، بانت ليا ناعسة  و مرتاحة! سديت الباب ورجعت لبيتي ، ماعاقلش امتا غيبت ...
               [ 10:00 am ]
            ◽فقت ، درت روتين الصباح ونزلت لتحت .. :
- صباح الخير !

- - صباح النوور ..
             ◽ليلى و ياسين ديجا فاقو و كيوجدو الفطور فأجوائهوم الرومانسية ! دبا صافي منين غايتجمعو ، هدشي لي غنبقاو نشوفو ليل و نهار .. خليتهوم على خاطرهوم ، و مشيت گلست فالصالون .. شعلت التلفازة كانضور تا طحت فقناة فيها فيلم و جدبني بقيت متبعاه  ..
            
     .. مدة من الزمن حطو كلشي فوق الطبلة و گلسنا انا وليلى .. :

ياسين : انا نفيق هيثم و نجي ..
              ◽بقيت شادة طيليفوني فهدوء ، مرة مرة ليلى كتهضر معايا ، كنجاوب باختصار و نرجع نتلها فطيليفوني .. تا نزلو بجوج ، هو كان باين عليه شوية العيا و ماشابعش نعاس ! .. :
- صباح الخير ..

ليلى : مالك موالف نتا لول كتفيق !

- غير داني النعاس مور الفجر ..

- ااه عليها ..
                ◽بدينا فطورنا عادي ، جوج طايرين فالسما بالحب و الغرام .. و جوج تقول يلاه راجعين من شي حرب ...

                🔹كنشوف فيها بلاما تنتابه ، جاتني مبدلا شوية .. ماريا لي كانت بزز تنقب من الفطور ، دبا شهيتها محلولة على الصباح ! العجب  .. اما انا كملت ماكلتي بزز و نضت .. :
- تبغيو نرجعو دبا و لا تال العشية؟

ليلى : انا بان ليا دبا حسن ..

- صافي ، شوية و نتحركو ..
                ◽انساحب بخطوات تقال لبيتو ، انا غير كملت فطوري ، رجعت خشيت وجهي فالطيلي ، حتى سالاو ماكلتهوم و عاونت باش جمعو الطبلة ..
        قسمنا الشغل بيناتنا ، حتى خلينا كلشي نقي كيشعل !
       طلعت للبيت جمعت حوايجي دغيا ، اصلا كان دكشي قليل ، حطيتهوم نيشان فالطوموبيل و گلست كنسمع أغاني شوية بينما تاهوما سالاو  ...
               [  12:30 pm ]
              🔹كلشي كان واجد ، سديت الشراجم و البيبان عاد خرجت عندهوم .. :

ياسين : قبل مانرجعو بغيت ندوز نشوف العائلة ماحد معايا ليلى ..

- اه مزيان سيرو.. حنا غانرجعو فحالنا !

- صافي .. يلاه تهلا !

- بسلامة ..
                🔹غير فتنا الفيلاج ، تفرقنا فجوج طرقان مختالفين .. درت الموسيقى باش تلطف الجو ، وباش ماتفكرش بلي مقلق عليها و لا شيحاجة ...

               ◽طلقت عيني على المنظر تا دزنا المسافة لولة و تسرحات الطريق گلت نكمل انا السوگان ، باش مايزيدش يعيا .. :
- مالك واش مريض ؟

- لا .. غير ماسخيتش نرجعو !

- بصح البلاصة زوينة بزاف!

- ماسخيتش بيك ماشي بالبلاصة ..

                ◽اكتافيت بابتسامة و انا كنشوف عينيه كيبريو منين نطق هاد الكلمات ...

#👇🏻👇🏻👇🏻..

            🔹شحال زوينة يسوگ بيك شيحد و نتا ناعس مرتااح .. للأسف هدشي ماكانعيشوش بزاف !
           ماحسيتش بالوقت حتى فيقاتني ماريا .. :
- قربنا نوصلو .. فيق باش تكمل الطريق لدارك !

- خلينا نتغداو بجوج ، عاد نتفرقو ..

- لا مانقدرش ، خاصني نرجع للدار و من بعد نمشي نشوف نورة بقات بوحدها هد اليوماين !

- على خاطرك ..
                 ◽مسافة طريق ، وصلت حدا داري ، خديت حوايجي و توادعنا ، عاد دخلت فحالي .. و طبعا ، ماتحرك حتى شافني طليت من البالكون ! ..
          
        بدلت عليا ،كليت بالخف ونزلت غادة عند ختي نشوفها تاهي.. دوزت معاها وقيتا متبادلين أخبارنا ، تكيت غير شوية حتى داني النعاس ، ما فيقني غير صوت الطيلي .. :
💬 : كي بقيتي ؟

💬 : بخير .. ونت ؟

💬 : اوا الحمدلله
        انا مزيان متخافيش ..

💬 : اكي ♥️
                  ◽حطيت الطيلي ورجعت كنحاول نرد النعاس لعيني شوية ...

     
                           [ بعد مرور شهر.. ]
            🔹نهار جديد ، دخلت للكوزينة من الصباح ما خرجتش !  .. :
ياسين : الصاط.. انا غانمشي خاصني نصايب شي وراق !

- سير الله يسخر ...

               ◽ تشغلت هاد النهار فالبيرو و مابقيت سولت فتا حاجة خرى !  ...

          🔹ساليت دكشي لي فيدي و طلعت باش نرتاح الفوق .. صونيت عليها نرد فيا الروح :
- هااي

- الزوينة ! لباس عليك ؟

- حمدلله ونت ..

- بيخير .. ياسين طاير بالفرحة وهو كيوجد للعرس!

- الله يكمل عليهوم بالخير .. مابقا والو !

- وايه..[ تنهد ] عرفتي ، مانشدكش كتر ، تسالي خدمتك دوزي نتعشاو بجوج !

- صافي اكي ..
    
                 ◽ساليت خدمتي و بقا بالي مع هيثم ، صوتو كان مهموم .. قلت حسن ندوزو انا وياه وقيتا..

         طلعت نيشان للفوق كانقلب بعيني تا وقفت كانشوفو گالس و ساهي فالفراغ كيفكر ...
      كيف كان هاد ليطاج كيعمر ب"الصحاب " كل ليلة ! فين هوما دبا ؟
و تقول شي حد جا طل عليه ، سول على خبارو و لا غير جا دوز معاه وقت ... :
-أ فين وصلتي ؟

- و اخيرا جيتي !
               ◽وقف باش يسلم عليا ، مديت يدي كالعادة و لكن خلاها و تلاح معنقني بطريقة كيقول بيها جهدي تقادا و محتاج علامن نتوكل .. دوزت يدي على شعرو بخفة مخلياه على راحتو تا برد شوية .. :
- اجي نگلسو .. تشربي شيحاجة ؟

- بغيت غير الما ..

- هو لول !

#👇🏻👇🏻👇🏻..

       ◽گلسنا كنهضرو شوية و كنحاول نضحْكو و نخرجو من الجو الكئيب.. :
- بغيت نسولك ؟

- سول ..

- عمرك فكرتي فين باغا نسكنو منين نتزوجو ؟

- اممم ، ماعرفتش ..المهم نبقاو فهاد المدينة !

- ولكن زعمة ، ماعمرك تخيلتي الديزاين ديال الدار هاكة بالتفاصيل .. فيها انا وياك !

- شوية ، ولكن ماعنديش صورة واضحة ..
- اممم.. صافي

[ ابتاسمات ] نتا بعدا بديتي كتفكر فالدار و دكشي!

- ضروري .. شحال ما طولنا فلخر غانتزوجو !

- و دبا متلا .. غيييير متلا ، الا وصلنا شي خمس سنين فالخطوبة و لا كتر.. تبقا معايا و تسنا مزال؟

- ماعنديش مشكل ..

[ ضحكات ] اوا غير وجد راسك ، حيت نقدو نوصلو ليها !

- اودييي الدنيا هانية اماريا .. المهم راكي معايا
                  
          ◽بديت كانخاف عليه شوية من هاد الحب كامل لي هاز من جهتي ، هو زوين ولكن عندو سلبياتو .. بحالا بدل البلية دالگارو بيا انا ... :
هو : فين مشيتي تانتي ؟

- انا معاك .. [ شافت فيه ] اجي نخرجو للبالكون شوية !

- يلاه ..
                ◽السما كانت صافية ، و تمنيت كون مكانوش الضواو فالمدينة بزاف باش نقدر نشوف النجوم ...

                  🔹النجوم كلهوم لي فالسما كيبانلي  نزلو تحطو فعينيها ! .. بقيت غير كانشوف فيهوم مرفوع ، جروني لعالم آخر و سكتو گاع الأصوات لي كانو فعقلي .. :

- هيثم ؟
               🔹هد السمية كفاش كتنطقها ، كادوبني ! أغلب الناس لي ضايرين بيا.. كنحس سميتي بحالا كتجيهوم ثقيلة و كيبغيو ينطقوها مزروبة .. ولكن هي لا! كتعطي لكل حرف فيها حقو ! ماعرفتش ، مع الطريقة ديالها و نبرتها كتجيني مميزة بزاف ! .. :
- هيثم كاتسمعني..

- معاك معاك .. شنو قلتي ؟

- لا باينة معايا! .. المهم ، كنت قريت فواحد الدراسة على النجوم.....
   
                🔹ماكرهتش نصورها دبا ، ماكرهتش نوقف العالم كولو فهاد اللقطة و نخليها غير هي لي  كاتحرك قدامي .. مايمكنش كفاش عينيها كانو كيعبرو كتر من كلامها ! .. :
- فهمتيني ياك ؟

-  فهمتك..

- عارفاك ماسمعتيش النص فهضرتي فين ساهي الله و اعلم ! ..

- ماتقلقيش مني اكبيدة..

[ تنهدات ] شنو شاغل بالك ؟

​- غير شي حوايج دازو وصافي..

[ حطات يدها على كتفو ] صافي دكشي داز ! و الحمدلله لي بانو على حقيقتهوم و بان الشر لي مخبي ..

[ تقابل معاها ] سمحي ليا اماريا ! .. تجمعت مع لي آذاوك على طبلة وحدة !
                  ◽مايمكنش ! مايمكنش يكون بصح حاس بالذنب من هدشي .. : الغلط ماشي ديالك ونتا عارف هدشي ! [ شدات وجهو بين يديها ] عفاك.. نسا هدشي !

[ بعينين دابلين ] ماقدرتش ..

- المهم الحقيقة تعرفات و حقو تخاد ! وفرحتي غاتكون ديما ناقصة بلا بيك ..
                 
         🔹عينيك ، شعرك ، ملامحك ، يديك ، شفايفك... هادو هوما الحوايج لي كيخليوني فرحان !
               
        ◽خدا خصلة من شعري كيلعب بيها .. قلبي بدا كيضرب و تجمدت بلا تا حركة !
     بقا شحال هكاك ، و نظراتو وتروني .. :
- يلاه ندخلو ، جاني البرد...
             
#👇🏻👇🏻👇🏻..

الى هنا ❤️..
نتلاقو غدا ان شاء الله مع تتمة الأحداث ..