𝐌𝐲 𝐂𝐚𝐬𝐞 // قــضـيــتــيــــــــے

𝐂𝐡𝐚𝐩𝐭𝐞𝐫 𝟐𝟗

               🔹داز الوقت و حنا متبعين الفيلم تا بدات كاتحرك بملل : - بدا كيجيني النعاس !

[ طبع قبلة على راسها ] نوضي لبلاصتك.. انا غانبقا شوية مزال!

                       🔹حركات راسها و وقفات غادة فاتجاه الدوش .. بقيت مراقب جسدها كيف كيتمايل تحت الما  ، وشعرها كيتحرك معاها ، زاد طوال ، تا ولا واصل لنص ضهرها !
              ميلت راسي حاضي كل حركة كاديرها تا سالات ، جرات فوطة ملوياها عليها و وقفات قدام المراية كاتنشف شعرها بوحدة صغيرة .. : بالصحة !

[ ابتاسمات ] الله يعطيك الصحة ..

                     ◽حطيت الفوطة من يدي وقربت عندو گالسة على الحافة : فين وصل الفيلم ؟

- ماعرفتش..
- امم وفين كنتي كاتشوف ؟
                  ◽ضحك فاهم قصدي و تحنيت شوية لجهتو كانرش عليه الما تا بدا كيحيد ليا يدي :
- وا صافي ريحي !
               ◽بقيت كانضحك عليه تا عييت و هو مخليني ندير فيه لي بغيت :
[ ابتاسم ] سيري لبسي من البرد..
                 🔹حركات راسها خارجة من الحمام.. بقيت وراها مرتاح شوية ، عاد نضت جمعت الحمام و الروينة لي تم و دوشت خارج للبيت نلبس عليا .. ضرت الفوطات فالشمش ، و طليت على ماريا ، كانت ناعسة بعياء ! تخشيت حداها تانا فهدوء ....

      
                    [ نهار جديد .. ]
                  ◽ساليت نهاري فالخدمة و رجعت فحالي للدار ، يلاه وقفت بطموبيلتي كيبان ليا هيثم خارج طاير لطموبيلتو لدرجة ماردش ليا البال گاع .. تحرك غادي فالاتجاه لاخر : ياربي السلامة .. شنو غايكون واقع! 
                  ◽دخلت بالي مشغول حطيت الملفات على جنب و بدلت عليا مخليا ليه ميساج .. دقائق جاوبني :
💬 : غير نسالي نعيط ليك
                    ◽حطيتو على جنب و مشيت نصايب ماناكل و كانخدم فنفس الوقت .. ساعة من بعد جمع ااماعن و دوزت لابيل : هيثم ! ياك لباس ؟

[ تنهد ] الواليدة صحتها عيات تاني ، داوها للكلينيك غير هد الصباح !

- و دبا كيف بقات ؟؟
- ماعرفتش مزال مغيبة و الطبيب معاها ..ماقالو لينا والو !
                 ◽من صوتو باين الوضع ماشي تا لهيه : يكون خير، ماديرش فبالك! 
- ان شاء الله !

- قول ليا واش خاصها شيحاجة ؟ نجيبها معايا!
                  ◽طول فسكاتو شوية عاد نطق : هاد الساعة كلشي كاين !
- اوا صافي شوية نكون عندك..
                  ◽قطعت معاه و لبست عليا غادة فاتجاه دارها هي لولة ، بغيت نتخد ليها غير حوايج معايا .. لقيت خالتي زهرة موجدة كلشي ! خديتها معايا و مشينا للكلينيك لي فالسونطر هو فين متبعة ديما ..
                     ◽غير دخلنا لقيت كلشي مجموع تما من غير هيثم .. :
سارة : مزال مافاقتش ولكن سمحو ليها بالزيارة..
- هيثم معاها دبا ؟
                  ◽حركات راسها بإيماء .. مشيت دخلت عندو كانت ناعسة فوق الفراش و كلها سلوكة ، باين عليها التعب والمرض .. اما هيثم كان گالس فكرسي و متكي بيديه على الفراش  عينيه مغمضين !
           قربت حاطة يدي على كتفو تا فاق : كيبقات ؟
                   ◽حرك راسو بتعب .. تفقد حرارتها و دوز يدو على وجهها برقة :
[ نطق بهمس ] فيقي براكة.. ماتخلعينيش عليك !
             ◽دوزت يدي على كتفو بمواساة : ان شاء الله خير ، ماتخافش !
            
                        ◽غير ثواني دخل عمي عمر ، ماقادش يشوف فيها و فحالتها ! قرب گالس حداها بهدوء و بادي عليه الحزن و الخوف.. بقا غير كيشوف فيها تا تنهد عينيه تجمعو فيهم الدموع !
                 شاف فيا هيثم حركت راسي و خرجنا مخليينو معاها .. لويت يدي على دراعو تا خرجنا للكولوار جات سارة معنقاه و كاتواسيه !