𝐌𝐲 𝐂𝐚𝐬𝐞 // قــضـيــتــيــــــــے

تــقـــديــــــم

🌿مدكرتي العزيزة ..
         هادي هي البداية النمطية لگاع المذكرات فالعالم ! مهما كان مستواك و لا درجة علمك ، فنهار كاتحط بينك و بين راسك فورقة وستيلو .. كاتلقا صباعك نيشان بادية بهاد الجملة !
وتانا بغيت نجرب ..مذكرتي العزيزة

سميتي ماريا ،عندي 16 عام ! المستوى المادي متوسط .. وقتي كامل كندوزو فواحد البيت عندنا فالسطح ، مكنديرش شيحااااجة ، غير كا نگلس و نبقاساكتة  كنشوف فالحيوط و كنرسم الحياة لي ماقادراش نعيش !
مرات كايكون السكات حتى كيطغى عليه صوت افكار مرونة فعقلي ... هاد الافكار، نهار على نهار ، ضروني فراسي  و دارو ليا الشقيقة ، دكشي علاش قررت اليوم نكتبهوم !

       غنكتب دكشي كولو لي فعقلي و غنحط هاد الكتاب فشي بلاصة بعيدة على الدار !
بغيت يجي واحد النهار،بعيد و لا قريب ، يلقاها شي واحد و يقرا هدشي لي كتبت ! وخا مغايستافد والو ، ولكن المهم نحس ، ولو مرة ، بلي كاين شيحد غايشاركني قصتي و افكاري للحظة من الزمن....

                    .. قبل امذكرتي مانعرفك على راسي بطريقة نمطية عاوتاني ، غادي نختار طريقة خرى ! وغانعاود ليك على قصة ديال جوج دالناس من العالم الخارجي لي بعيد عليا .. من خلال تجربتهوم غادي تعرفي تجربتي تانا و تحسيها ! ...
              نتا/ نتي لي غاتقرا هاد المذكرات ، غانعيط ليك بسمية مذكرتي .. حيت خيالي كبير ولكن استنتاجي محدود باش نخمن سميتك و لا كيانك !
شكون عرف .. تقد تكون فضائي من عالم خر .....

نبداو ..
        هيثم .. 36 عام ، حروف عربية عاطياه زين رجولي ! فورمة مخدومة ديال اي واحد كيطريني.. و الحالة المادية مزياانة بزاف !
قبل مايتلاقا البطلة كانت راسمة ليه حياة خرى فعقلها تحت عنوان " فارس الأحلام "   ..:
كان مستقر فالامارات هو و عائلتو بحكم الخدمة دباه !
منين كمل قرايتو ، خدم مع باه فالشركة و تزوج بنت جيرانهوم لي كانو تاهوما عائلة مغربية !   
      ولكن ماكملش الزواج حيت من مور سنوات قلال طلقو .. هنا هيثم لقا الوقت كتر لراسو ، زاد خدم على شخصيتو كتر و بدا تيفكر فمشروع احلامو !
بدا بخطوات صغار حتى وصل للهدف لي حقق بيه نجاح كبير ...
    قرر باش يرجع للمغرب ،و يدير فرع اخر و بيه يستقر فبلدو الام بفلوسو فجيبو و بالو مرتاح !
    

       ماريا فالجهة لخرى ..
بنت 33 عام ، محامية ، مستقلة ماديا
زين هادئ و طول متوسط !
ساكنة بوحدها و عائلتها قراب ليها شوية دكشي ديما معاهوم !
بنت كلها حيوية ، كاتعشق السفر و الخروج و الجماعة مع البنات ... 
    
هادي نبذة خفيفة على الشخصيات الرئيسية فالقصة .. دبا غادي نخليكوم تعيشو معاهوم نهار بنهار من خلال مذكراتهوم ....