𝐌𝐲 𝐂𝐚𝐬𝐞 // قــضـيــتــيــــــــے

𝐂𝐡𝐚𝐩𝐭𝐞𝐫 𝟐𝟒

🔹ماحسيتش بالصباح امتا طلع ، غير شديتها بين يدي ماعقلت على تاحاجة خرى مزال ، بحالا كنت مقطوع ...
حسيت بيها تهدات ديال بصح.. ولات غير مرخية بين يدي و جهدها تسالا و لكن صوتها كان كيعبر على العكس و باغي كتر !
🔹الفجر طاحت سخفانة ، جريت عليها الغطا مخليها ترتاح.. خرجت للبالكون حاس بواحد الراحة و الفرحة عمرني دوزتهوم ! بقيت تما دقائق مستمتع بالجو مدة ..رجع ليا العيا و تخشيت حداها شوية بينما قرب الوقت تاجرني النعاس ...

◽فقت على صوت الرشاش فالحمام .. تقلبت بلاصتي عضامي كلهوم ضاريني من لبارح ! شفت الساعة و جمعت عليا ليزار غادة جهة لمراية ، عنقي و جهة صدري كلو طبايع ، مايقدرش مايخليش البصمة ديالو فيا ....
◽جبدت الفوطة حتى سمعت الباب تحلات و جا ورايا ، ابتاسمت ماقاداش نطلع راسي فيه .. مزال ما ولفت هكا و الحشمة كاتقهرني، ضرت نيشان دافنة وجهي فصدرو محجر و فازگ تا سمعت بحة صوتو .. : ديالاش هادا ؟
◽طلعت وجهي كانشوف فيديه الطيسط ، بالزربة لبارح ماعقلت تا نخبيه فالزبل .. : غير كنت شاكة و بغيت نتاكد!
◽ميل راسو متبت الشوفة فيا :
- و كون خرج ايجابي شنو كنتي غاديري ؟
[ ضورات عينيها ] دكشي لي كيديرو الناس اهيثم...

◽نزل راسو متنهد بخفة بحالا كيحاول يرصي افكارو .. :
- خاص نمشيو للطبيب باش تاكدي ! الطيسط ماكيعطيش ديما نتيجة مضبوطة...

- مكاين لاش .. و اصلا الأعراض لي شككوني راه عاديين ، غير بغيت نتيقن !
◽اكتافى بالصمت و لاحو فوق الكوافوز غادي للدريسينغ يلبس عليه .. خليتو على راحتو و دخلت للدوش !
نص ساعة من بعد دوش سخون حسيت بعضلاتي ترخفو .. خرجت دايرة كريم لداتي و عاد لبست كانوجد راسي ! هزيت صاكي و وراقيا ، عاد نزلت .. لقيتو گالس فالكوزينة ، على الطبلة دالفطور و ساهي تا دخلت ! مشيت نيشان عصرت قهوة نبدا بيها ، مابغيت تاحاجة تخسر ليا النهار.. خصوصا مع الخدمة الكثيرة لي تابعاني !

◽داز الفطور فداك الصمت هو على عاطيني بضهرو ، و انا واقفة كانشوف من الشرجم و الطيلي فيدي .. غير كملت ، حطيت الكاس على جنب و دزت حاطة ليه الطيسط الثاني ديال هاد الصباح حداه بلا تاكلمة ....

🔹جبدت الوراق كنراجعهوم .. يوماين و غادي نطلع تاني للإمارات نشوف الخدمة تما ، لي غاتبدل و لي غاتزاد ! وعاد كاين مناسبات مهمة غايخص نكون حاضر فيهوم ...
جمعت الضوصي لول و خرجت ورقة خرى كانقيد فيها المصاريف باش مايتلفونيش .. مشات عيني لداك الطيسط شوية كانفكر ! و رجعت مكمل الخدمة ...

[ 6:00 pm ]
◽مشا كلشي و بقيت انا وسهام غارقين تا لراسنا فدوك الضواصا .. لا هي بغات تمشي و لا انا قدرت نحبس ! غير سديت الملف وصيتها دير ليا فوطوكوبيات على لوراق .. و گلست نرتاح :
💬 : مزيان ؟