رامى وهو بيخبط فى كراتين على الأرض :ليييييه ليه...حرام كده...اااااااه...ده ظلم ظلم...ليه ليييييه...والله ده ظلم...حراااااام...ليه لييييييه
اسراء وهى بتكلم نفسها بخوف :هو ماله متعصب ليه كده وناقص يطلع نار من بؤه
انا عايزة انزل بس اعدى من قدامه ازاى بحالته دى
ايه ده...ده بيعيط
يا ربى اعمل ايه دلوقتى
لو شافنى هيتحرج انا هفضل ساكتة فى مكانى لحد ما ينزل ولا كأنى شوفت حاجة
ده وقت موبايلى يرن فيه...رامى اذيك
انا هنزل ارد على موبايلى تحت علشان الشبكة هنا وحشة
سلام
رامى ابن عمى صاحب التعبير الواحد والوش الواحد
رامى اللامبالى
طلع عنده تعبيرات تانية ووشوش تانية
رامى طلع بيبالى
صدمة كبيرة
فى اليوم ده انا حقيقى اتصدمت رامى طلع
طلع زينا بيتعصب وبيعيط كمان
طلع بيحس
مش عايزاكم تشتمونى علشان بتكلم على ابن عمى بالشكل ده
بس انتم لو مكانى هتعذرونى والله
رامى عنده حوالى تمنية وعشرين سنة
قضاهم كلهم بتعبير واحد على وشه
تعبير كده معرفش اسمه ايه
بس هو ولا فرحان ولا مضايق ولا هادى ولا متعصب
عمرى ما شوفت على وشه غير التعبير اللى معرفش اسمه ده
فى ولا موقف
تحصل مواقف حلوة رامى على وشه نفس التعبير
ربنا يبتلينا وتحصل مواقف صعبة وش رامى يا جبل ما يهزك ريح ومحتفظ بنفس تعبيره
انا بقول عليه رامى اللامبالى لأنه دايما وشه زى ما هو مبيتغيرش مهما حصل ايه
هو مش فارقله
بس فى اليوم ده عرفت ان رامى عنده وش غير اللامبالى
عنده وشوش تانية انا معرفهاش
بعد الموقف ده
عرفت وش تالت ولا لا وش رابع لرامى
الوش القرفان
بيبصلى بقرف كل ما يشوفنى بعد اليوم ده
هو انا مقدرة انه ممكن يكون اتحرج علشان شوفته فى لحظة خاصة زى دى
بس هو انا يعنى كان قصدى كنت براقبه مثلا ده هو اللى طلع وانا فوق
يعنى هو اللى جاى عليا
وبعدين الناس تتحرج تلخبط فى الكلام زيى
او تسكت او تعتذر
انما رامى يتحرج منى فيبصلى بقرف
ده ايه الظلم ده
انا مع انى كنت متضايقة من بصته دى ليا
بس معملتش حاجة
اتحرجت اروح اتكلم معاه واقوله انه مجراش حاجة يعنى
موقف بسيط ويعدى
يعديه عادى وميبصليش بقرف اللى يعدى عليه قطر ده
بس علشان انا محترمة مقولتلوش كده
وعملت زيه بقيت ببصله بتعبير الوش اللى معرفلوش اسم ده
بقيت اسراء اللامبالية
ببصله كأنى مش شايفاه ولا فارقلى الوش القرفان بتاعه ده
فضلت شوية مطلعش السطح تانى
وبعدين قولت لنفسى وانا ابطل اطلع ليه
انا طول عمرى بطلع ومكنش بيطلع غيرى
يقوم لما هو يحب يطلع اسيبهوله كده ببساطة
ليه انا اللى ابطل
ليه هو اللى ميبطلش يطلع
او حتى نقسمها شيفتات
هو شوية وانا شوية
السطح ده ملاذى اسيبله ملاذى بسهولة كده
رجعت اطلع تانى
ومشوفتوش قولت كويس شكله من بعد المرة اللى شوفته فيها قرر ميطلعش تانى
وها هو ملاذى يعود لى من جديد
ولكن طبعا الحياة مش بالبساطة والحلاوة دى
او على الاقل حياتى انا مش بالبساطة والحلاوة دى
لقيت فى مرة رامى طالع ومعاه كوباية شاى
ما شاء الله طالع وشكله ناوى يطول فى ملاذى
لميت حاجتى وكنت هنزل وبعدين فكرت ليه انا اللى انزل
ما ينزل هو
فبكل هدوء رجعت تانى مكانى
توقعت انه هينزل بس هو منزلش ولقيته جه قعد جنبى
رامى :مسيحة جبنة رومى فى عيش برضه المرة دى
اسراء :ها
رامى :لو معاكى منها هاتى سندويتش بيبقى طعمها حلو مع الشاى
اسراء باستغراب وهى بتديله واحد :اتفضل
رامى :مال وشك عامل كده ليه
لو مش عايزة تديهولى خلاص خديه
احسن ازور اموت فيها
اسراء :لا كله بالهنا
رامى :شكرا
اسراء :اسمها الله يهنيكى
رامى :ايه
اسراء :لما حد يقولك بالهنا المفروض ترد تقوله الله يهنيك مش شكرا
رامى :خلاص يبقى الله يهنيكى مش شكرا
طعمها حلو السندويتشات اللى بتعمليها مش الجبنة الرومى السايحة بس
اسراء :شكرا...ثانية واحدة انت عرفت منين انى السندويتشات اللى بعملها طعمها حلو
رامى :كلتها
اسراء :ايه البساطة اللى بترد بيها دى
يعنى ايه كلتها
رامى :يعنى مسكت السندويتش بايدى
وبعدين قربت ايدى من بؤى
وبعدين قطمته بسنانى
وبعدين مضغت وبعدين...
اسراء قاطعته :بلعت اللى مضغته
انت بتشرحلى خطوات اكل السندويتش
انا قصدى كلتهم فين
رامى :هنا
لما كنت...لما نزلتى وانا كنت هنا
انتى كنتى سايبة سندويتشات وكاكاو باللبن وفشار بالكراميل وشيكولاتة
اسراء :فانت كلت وشربت كل ده
عادى كده
رامى :اه لقيت نفسى جعان
وبعدين مش موجودين على سطح بيتى
اسراء :وهما يعنى علشان موجودين فى سطح بيتك اللى هو سطح بيتنا كلنا يبقو بتوعك
السطح طرحهم يعنى
رامى :مكنتش اعرف انك بخيلة
اسراء :مش بخيلة الف هنا على قلبك
بس هو السؤال لما انت اللى كلتهم مش انا سيبتلى الأكياس فاضية ليه
منزلتهمش معاك ورميتهم فى الزبالة ليه
ولا انا الخدامة اللى جبهالك عمى
رامى :الله مش حاجتك دى
اسراء :حاجتى اللى انت كلتها يبقى مين اللى يرمى اكياسها فى الزبالة
رامى :انتى طبعا
اسراء :خلاص يبقى لما انت تجيب حاجات وانا اكلها انت اللى هترمى اكياسها فى الزبالة
رامى :وانا اجيبلك ليه اصلا
اسراء :تصدق انا اللى غلطانة علشان بتكلم معاك اصلا
رامى :خلاص متتقمصيش هبقى اجيبلك
اسراء :ايه متتقمصيش دى هو انت بتكلم جنى بنت فاطمة اختك
وبعدين مين قالك انى عايزة منك حاجة او انى هاخد منك لو جيبت اصلا يعنى
رامى :قماصة قماصة يعنى
اسراء :على فكرة انا مش قماصة
رامى :هاتى سندويتش كمان
اسراء :اتفضل...ده اخر واحد انت طالع تخلصلى سندويتشاتى
رامى وهو بياكل :انتى اللى غلطانة علشان مش عاملة حسابى بعد كده ابقى اعملى حسابى معاكى
اسراء :بعد كده هو هيبقى فى بعد كده
رامى :بإذن الله متقاطعيش انتى بس
بعد شهرين
رامى :وبس بعد الشغل رجعت اتغديت وروحت الجيم ورجعت منه من شوية
ايه ده
اسراء :فى ايه
رامى :احنا كل مرة انا بقعد احكيلك يومى وانتى مبتحكيش حاجة خالص
اسراء :والله انا نفسى بس انت مش سايبلى فرصة
رامى :خلاص اعتبرى فرصتك جات
احكى يا شهرزاد احكى لشهريار
اسراء وهى بتضحك :مع ان قلشك رخم بس بيضحكنى معرفش ليه
رامى وهو بيضحك :علشان انتى تافهة وبتضحكى على اى حاجة
اسراء :هسامحك على تافهة دى
علشان اول مرة اشوفك بتضحك
تعبير جديد اول مرة اشوفه على وشك
رامى :انتى دى اول مرة تشوفينى بضحك فيها
اسراء :اينعم واحتمال تكون دى اول مرة تضحك فيها فى حياتك اصلا
رامى :لا طبعا انا اكيد ضحكت قبل كده
مش معقول دى اول مرة تشوفينى بضحك فيها
اسراء :بلى يا سيدى انت لم تفعلها قبلا
ليس امامى على الاقل
رامى :ده اللى هو ازاى
اسراء وهى بتضحك :زى السكر فى الشاى
رامى :وبتقولى ان قلشى انا اللى رخم
بس بجد انتى مشوفتينيش بضحك قبل كده خالص
اسراء :اه والله
بص انا لحد من شهرين تلاتة مكنتش اعرفلك غير تعبير واحد بشوفه على وشك دايما
رامى :وده اتغير من شهرين تلاتة
اسراء :اه الى حد كبير
رامى :انتى قصدك من يوم ما شوفتينى وانا متضايق هنا بالصدفة
اسراء :اه
من اليوم ده اكتشفت ان وشك يعرف تعابير تانية غير التعبير الثابت اللى مبيتغيرش اللى كنت بشوفه على وشك دايما
رامى :انتى مسألتينيش ولا مرة
انا ليه كنت عامل كده ساعتها
اسراء :قولت بلاش اتعدى على خصوصيتك يعنى
انا اصلا مكنش قصدى اكون موجودة فى لحظة زى دى
بس يلا اللى حصل بقى
رامى وهو بيضحك :كان باين عليكى
انتى مشوفتيش وشك كان عامل ازاى وانتى بتقوليلى هنزل ارد على الموبايل تحت الشبكة هنا وحشة
شبكة ايه اللى وحشة على السطح يا اذكى اخواتك
اسراء :انا قولت اول حاجة جات فى بالى
وبعدين الحق عليا مكنتش عايزة احرجك انا الغلطانة
رامى :لا بالعكس دى احلى حاجة فيكى
اسراء :هى ايه دى
رامى :انك بتقدرى احساس اللى قدامك
اسراء :فاقد الشئ اكتر واحد بيعرف يديه بقى
رامى :قصدك ايه
اسراء :حاجة ممكن ابقى اكلمك عنها بعدين
كمل طيب
رامى :اكمل ايه
اسراء :لو مش هيضايقك قولى طيب انت كان مالك يومها
رامى :انتى توقعتى يكون ايه اللى حصلى ساعتها
اسراء :الصراحة قولت يمكن مشكلة فى حياتك العاطفية
مشكلة مع بنت بتحبها وهى متعرفش او مشكلة مع بنت مرتبط بيها مثلا
رامى :تصدقى بإيه
اسراء :لا اله إلا الله
رامى وهو بيضحك :انا معرفش يعنى ايه حياة عاطفية اللى قولتيها دى
مجربتهاش
اسراء :بقلشك ده مش هتعرف طبعا
طيب جربت متقلش وتحاول تشيل التعبير اللامبالى اللى موجود على وشك اربعة وعشرين ساعة ده وانت بتكلمها
رامى :هى مين دى
اسراء :اى بنت تكون معجب بيها
رامى :عمرى ما عملتها
عمرى ما حاولت اكلم بنت اصلا
اسراء :عايز تقولى انك عمرك ما حبيت ولا حتى اعجبت ببنت
رامى :حبيت لا
بس اعجبت اه بس مش لدرجة انى اروح اكلمها
اسراء :اومال كنت بتكتبلها جوابات ولا ايه
رامى :لا
اسراء :اومال كنت بتعمل ايه
رامى :مكنتش بعمل حاجة
كان مجرد اعجاب بياخد وقته ويروح
اسراء وهى بتضحك :حاسة اكنك بتقول دور برد هياخد وقته ويروح لحاله
لا مبالاة حتى فى اعجابك
مقولتش كان ايه اللى مضايقك اوى كده ساعتها
رامى :فى الشغل عندى
كان المفروض ان فى ترقية
انا تعبت اوى علشان اخدها
وفى الاخر ادوها لواحد غيرى ميستاهلهاش لو كان يستاهلها والله ما كنت هزعل وهقول حقه
انما هو ميستاهلهاش
اسراء :خدها بالكوسة علشان هو يعرف حد كبير عندكم فى الشغل
رامى :لا خدها علشان هو عصفورة
اسراء :يعنى ايه هو عصفورة
ده اسمه ولا هو بيطير
رامى :لا مبيطيرش
بس بيطير ناس من شغلهم بالكلام اللى بينقله
لما تتخرجى وتشتغلى هتعرفى ان فى واحد بتبقى كل وظيفته انه ينقل كل كلامكم للمدير وطبعا وهو بينقله بيحط بهارات من عنده
ولو ملقاش حاجة ينقلها ممكن يألف حوارات من عنده عادى
اسراء :بيفتن عليكم يعنى
رامى :بالظبط
وعلشان كده المدير اداله الترقية
علشان شايف ان ده اكتر واحد فينا مخلص ليه
ومش مهم انى اشطر منه وانى استاهل الترقية اكتر منه
بشغلى ومجهودى مش بالاخبار اللى بنقلها
اسراء :اسمحلى اقولك ان مديركم ده مدير فاشل
رامى :اسمحلك عادى هو فاشل فعلا
اسراء :وانت عملت ايه ساعتها
قدمت فيه شكوى
رامى :اقدم شكوى فى مين فى مديرى واقدمها لمين لمديرى
اشتكيه لنفسه
ولا اشتكيه للى اكبر منه
للأسف اللى اكبر منه هيحابيله على حسابى
انتى مفكرة ان هو نفسه مش عارف ان انا اللى استاهل الترقية دى
هو وكل اللى شغالين معانا واولهم العصفورة اللى اترقى ده عارفين
الشكوى مكنتش هتعمل حاجة غير انها هتخليهم يتكلمو عليا وخلاص
اسراء :طيب ما تسيب الشغل ده
رامى :اسيب الشغل
اسراء :اه مادام مش مقدرين شغلك
وبيرقو الناس علشان عصافير مش علشان شغلهم
المدير الفاشل ده مش هيسيب الناس الشاطرة تطلع قدام علشان مياخدوش مكانه وعلشان فشله ميبانش
هيطلع الفاشلين بس علشان يحافظ على مكانه
رامى وهو بيضحك :حلوة بيرقو الناس علشان عصافير دى
ومعاكى حق فى ان مديرى هيخاف حد شاطر يترقى لياخد مكانه
هو فعلا بيحاربنا انا والشاطرين فى زمايلى
وهارينا اسافين
اسراء :يبقى تسيب الشغل معاه
وتفوتهاله مخضرة ليه هو والعصفورة بتاعته
بعد يومين
رامى :انا بدأت اشوف شغل فى اماكن تانية غير الشركة اللى انا فيها
وبعت السى فى بتاعى لكذا مكان
اسراء :كويس جدا
بس ليه مسيبتش الشركة اللى انت فيها
رامى :هسيبها اول ما الاقى مكان تانى
انما مش هسيب شغلى واقعد فى البيت يعنى
بعد شهر
رامى بابتسامة :اتفضلى دى حلاوة شغلى الجديد
اسراء :هو مش المفروض انا اللى اجيبلك هدية
رامى :لا انا اللى اجيبلك علشان انتى اللى شجعتينى على الخطوة دى
لولاكى انا مكنتش خدتها
كنت هكمل فى مكان بكرهه ومضغوط فيه
مكنتش هحاول اغير ده وكنت هفضل متحمل وخلاص
اسراء بدموع فى عينيها :اوقات مبيكنش فى قدامك غير انك تفضل متحمل الضغط وبتدعى ربنا ميجيش يوم وتنفجر وخلاص
رامى :قصدك ايه
اسراء :متاخدش فى بالك مش عايزة انكد عليك وانت فرحان بالشغل الجديد
رامى :انتى برضه مش عايزة تحكيلى مع انى بحكيلك كل حاجة
اسراء :لا والله مش كده انا مستعدة احكيلك انا بس فعلا مش عايزة اقلبها غم
رامى :يا ستى اقلبيها غم انا اللى بقولك
ايه اللى مضايقك اوى كده
اسراء :انا بحس...بحس ان ماما بتحب اية واحمد اكتر منى
احمد علشان هو الولد الوحيد اللى فينا واخر العنقود
رامى :واية
ليه هتحبها اكتر منك مع انك احلى منها واشطر كمان فى الدراسة
مش المفروض العكس مش المفروض تحبك انتى اكتر
اسراء :لا ماما طول عمرنا وهى بتعامل اية بشكل احسن منى
بتدلعها دايما وبتشكر فيها على طول
مرة سمعت خالتى نجوى بتتكلم معاها فى الحكاية دى وانها بتفرق بنا وان ده مينفعش
ماما قالتلها انى كل العيلة بتدلعنى وبتهتم بيا علشان انا شكلى حلو وذكية
انما اية محدش بيهتم بيها
وماما بتحاول تعوضها
علشان اية متحسش انى واخدة كل الحب والاهتمام
وده نجح اية واثقة فى نفسها معاملة ماما الحلوة ليها خلتها تبقى واثقة فى نفسها
المشكلة ان معاملتها ليا هزت ثقتى انا فى نفسى
انا مش عايشة مع الناس اللى بتشكر فيا وفى جمالى وعقلى
انا عايشة مع امى
امى اللى بنت ثقة اختى فى نفسها على حساب ثقتى انا فى نفسى اللى هدتها
يعنى هى كان لازم تقل منى علشان تحسس اية بقيمتها
كان لازم تهملنى علشان تهتم بأية
يعنى ايه الناس التانية هتحبنى وتشكر فيا وتهتم بيا
كل ده هيغنينى عن حبها واهتمامها
رامى :متعيطيش طيب
اسراء وهى بتعيط اكتر :لا يا رامى هعيط
علشان ماما خلتنى بحسد اختى على اهتمام ماما بيها
خلتنى اكره جمالى وذكائى
ودايما بقول لنفسى لو كان شكلى اوحش من كده كانت حبتنى
لو كنت غبية كانت اهتمت بيا
امى مكنتش عايزة تيجى على اية علشان انا احلى واذكى منها
مكنتش عايزة تعمل زى ما اهالى كتير للأسف بيعملو فى ولادهم
فجات عليا انا
بس هى مكنش المفروض تعمل كده
كان المفروض تقسم حبها واهتمامها بينا بالعدل
مكنش المفروض تقول ان انا هلاقى الحب والاهتمام بره
مكنش من حقها تظلمنى وتحرمنى من حبها واهتمامها
مكنش المفروض تراعى مشاعر اية وتدوس على مشاعرى انا بالجذمة
مكنش المفروض تقول انها فخورة بأية دايما
المفروض تبقى فخورة بينا احنا الاتنين
والمفروض تقدر مشاعرنا احنا الاتنين
مكنش المفروض تيجى على حد فينا علشان التانى
رامى :صح انتى صح هى مكنش المفروض تعمل كده
اسراء :مرة جربت اتكلم معاها واقولها ليه بتعمل معايا كده
قالتلى ان مش لازم علشان انا الاحلى والاذكى يبقى انا اللى ادلع وهى حرة تدلع اللى هى عايزاه
انت عارف ايه اسوء حاجة
رامى :ايه
اسراء :انى عرفت ان جدتى كانت بتفرق فى المعاملة بين ماما وخالتى نجوى علشان هى احلى واحدة فيهم وخالتى ثناء علشان هى اذكى واحدة فيهم والوحيدة اللى دخلت جامعة
ده عمل لماما عقدة
وماما قررت ان اية مش هتعيش اللى هى عاشته
وده كويس جدا الحقيقة
المشكلة الوحيدة ان ماما عيشتنى انا كل اللى هى عاشته
ساعات بحس ان غصب عنها وانها مش قصدها
وساعات بحس انها متعمدة وانها بتنتقم لنفسها فيا
ومش فاهمة انا ذنبى ايه فى كل ده
رامى :ملكيش ذنب
بس هى الحياة كده معقدة
اسراء :انت عارف انا بطلع السطح كتير ليه
علشان اهرب من البيت
فى الاول كنت بطلع هنا علشان اعيط ومع الوقت بقيت بطلع حتى لو مش عايزة اعيط
بقلل من وجودى معاهم
للأسف مش كل وضع ضاغطك تقدر تغيره او تبعد عنه
ساعتها مبيبقاش قدامك غير انك تتحمله وتهرب منه شوية علشان تاخد نفسك وترجعله تانى
وهو ده اللى انا بعمله
وعلشان كده انا بطلع هنا
رامى :لا انتى بتطلعى هنا علشان انا حظى حلو بس
اسراء :انا بتكلم جد
رامى :وانا كمان
طيب تصدقى بإيه
اسراء :لا اله الا الله
رامى :انا اول مرة احس انى حظى حلو
اسراء وهى بتضحك :وهو يعنى لازم يكون حظك حلو على حساب مأساة حياتى يعنى
رامى وهو بيضحك :المهم انى حظى حلو وخلاص متدخلنيش فى تفاصيل فرعية لو سمحتى
اسراء بابتسامة :شكرا يا رامى
رامى :انا استاهل الشكر فعلا بس بتشكرينى على ايه تحديدا
انا استاهل الشكر على حاجات كتير انا عارف
اسراء وهى بتضحك :محتاحين نشوف حل فى دمك التقيل ده
وبالمرة نشوف حل فيا علشان انا فعلا تافهة وبضحك على اى حاجة
انا بشكرك علشان انت فعلا محسسنى ان وجودى حاجة حلوة
رامى :حلوة ومريحة
فى مرة اكيد هحكيلك ليه
بعد شهر
اسراء :وبعد ما رجعت من الكلية اتغديت وقعدت خلصت شيتات وبحث مطلوب منى
خلصتهم ورغيت مع ايمان فى الموبايل شوية وطلعت
رامى :انا زى كل يوم خلصت شغلى رجعت اتغديت وبعدها روحت الجيم
وبعده روحت خطوبة بلال صاحبى وجيت
اسراء :هى الخطوبة خلصت بسرعة كده
رامى :لا انا اللى خلعت بدرى علشان الحق اشوفك واقعد معاكى
انتى هتعملى ايه بعد ما تنزلى
اسراء :مفيش هقعد على موبايلى شوية وبعدين هنام
وانت
رامى :وانا كمان بس انا زيادة عنك حاجة واحدة
انى هطلب من بابا يفاتح عمى حليم فى انى عايز اتقدملك
تفتكرى هيوافق عليا
اسراء :هو مين ده
رامى :عمى حليم
اسراء :انت بتهزر صح
دى قلشة من قلشك الرخم
رامى :لا انا بتكلم جد
اسراء :اتاريك عمرك ما كان عندك حياة عاطفية
هيبقى عندك ازاى باسلوبك ده
ما طبيعى ميبقاش عندك ده اقل واجب يعنى
رامى :ليه الكلام اللى يحرق الدم ده بس
اسراء :علشان انت حارق دمى يا رامى
هو ايه اللى هطلب من بابا يفاتح عمى حليم فى انى عايز اتقدملك
كأنك بتقولى اتغديت ايه النهاردة
رامى :انتى عارفة انى صريح وبجيب من الاخر ومبحبش التلزيق
اسراء :تلزيق
لا هو مش لازم تلزيق
ولا انا عايزة حاجة غير الصراحة
بس يعنى انت بتتكلم على نتيجة ومقولتش ايه الاسباب اللى وصلتك للنتيجة دى
عايز تتقدملى ليه
رامى :علشان عايز اتجوزك
اسراء :ده كده مرادف تانى لعايز اتقدملك
او نتيجة تانية مترتبة عليها
وانا مش عايزة نتايج انا عايزة اعرف الاسباب اللى وصلتك للنتايج
عايز تتقدملى وعايز تتجوزنى ليه
لو قولت نتيجة تالتة
هسيبك وانزل
رامى :خلاص متبقيش حمقية كده
هجاوبك
علشان اكتشفت انك فيكى منى فى حاجات كتير بتجمع بينا
زى ان انا كمان بحب اطلع السطح
بس انا كنت بحب اطلعه الصبح بدرى قبل ما اروح الشغل
وزى انك بتحبى الاكل انا كمان بحبه
بس انتى بتحبى تاكلى حتى وانتى بتعيطى
انما انا لو مضايق مبعرفش اكل
مبحسش انى جعان غير لما اطلع ضيقى من جوايا
وزى انى مأساة حياتى سببها امى
بس مش علشان بتفرق فى المعاملة بينى انا واخواتى
انما علشان كانت مشغولة اوى فى شغل البيت وفاهمة التربية غلط
كانت مفكرة ان الضرب هو اللى هيربينا
واننا لازم نبقى ساكتين وهاديين دايما
ولو هنلعب يبقى فى الشارع
اى ضحك او لعب او كلام او حتى عياط فى البيت كانت نتيجته ضرب
اخواتى ده مقصرش فيهم اوى
بس انا نتيجة كل ده
انى مبقتش بعرف اعبر عن مشاعرى قدام حد
ايا كانت مشاعرى دى ايه حتى لو فرحة
يوم ما الترقية ضاعت منى
انا روحت الجيم علشان اطلع غضبى هناك
ولما رجعت وكنت هدخل البيت لقيتنى مش قادر ولسه جوايا غضب مطلعش
علشان كده طلعت السطح
ولما حاولت انفس عن غضبى وبقيت لوحدى لقيت ان مكنش جوايا غضب بس كان فى حزن ودموع مكنتش هعرف انزلها قدام حد ولا حتى امى
او واولهم امى الصراحة
علشان كده طلعت السطح
وبعد ما خلصت كل الغضب والدموع اللى جوايا
وشوفت الحاجات اللى انتى سيبتيها لقيت انى جعان وعلشان كده كلتهم
بعدها انا كنت محروج منك ومقلق تحكى لحد
علشان كده كنت ببصلك بضيق
اسراء :قصدك ببصلك بقرف كأنى شايف فار ميت ومنفوخ
رامى وهو بيضحك :مكنش قصدى ابص بقرف والله
بس قولتلك بقى مبقتش بعرف اعبر عن مشاعرى
المهم انى لقيتك ما بتقوليليش اى حاجة ولا بتفتحى الموضوع
ولا حكيتى لحد
وفضلتى شوية متطلعيش علشانى
فقولت هطلع اتكلم معاكى
اشكرك على انك محكتيش لحد
واتأسفلك على بصاتى ليكى
بس مكنتش عارف اعمل حاجة فى الاتنين ولقيتك هتنزلى وبعدين رجعتى تانى فقولت خلاص هقولك شكرا وانزل على طول
بس مش عارف مجرد ما قعدت جنبك لقتنى بطلب منك سندويتش من بتوعك
وبتكلم عادى كأنى بطلع كل يوم اتعشى معاكى فوق
ولقتنى برخم عليكى كمان
واتكلمت معاكى كتير بس ولا شكرتك ولا حتى اعتذرتلك
ومن يومها وانا بحكى معاكى وبحكيلك كل حاجة وبعبر قدامك عن كل مشاعرى الحلوة والوحشة
كأنى ما صدقت
مش كأنى انا فعلا ما صدقت
انتى قولتيلى انك قبل كده انك كنتى بتقولى عنى صاحب التعبير الواحد
انا معاكى مببقاش بتعبير واحد على وشى
معاكى بيبقى على وشى كل التعابير اللى فى قلبى
معاكى بتكلم براحتى وبقلش قلشى الرخم لأنى عارف انك هتضحكى عليه
معاكى بكون على طبيعتى بكل راحة
وانتى كمان بتكونى معايا على طبيعتك ومبتخبيش عنى حاجة
علشان كده انا عايز اتقدملك
دى الاسباب اللى نتيجتها انى عايز اتجوزك
لا وزودى عليهم كمان انى بحب سندويتشات الجبنة الرومى السايحة بتاعتك والفشار بالكراميل اللى بتعمليه
ومش عايز كمان اسيب خطوبة صاحبى علشان اجى اشوفك
اسراء :اه عايز تتجوزنى فتضمنى فى بيتك بقى وتخرج كتير وتلطعنى انا
رامى :لا عايز اتجوزك ونبقى سوا فى البيت ولما اخرج اخدك معايا
عايز لما اروح خطوبة ولا فرح حد فى اصحابى تبقى معايا
من الاخر عايزك معايا على طول
اسراء :احم احم بتثبتنى وانا بتثبت
عارف اعتقد انه هيوافق عليك
رامى :هو مين ده
اسراء بابتسامة :عمك حليم
شريك حياة
مش شخص بتشاركه البيت ولا بتشاركه فلوسك
ولا بتشاركه ايامك بس
شريك الحياة شخص بتشاركه نفسك
بتشاركه افراحك واحزانك ونقط ضعفك ومخاوفك ونقط قوتك
بتشاركه ضحكك ودموعك كمان
بتشاركه كل حاجة وبيشاركك كل حاجة
علشان كده رامى شريك حياتى وانا شريكة حياته💖
#حكايات_منار
فضلا تدعو لابويا بالرحمة والمغفرة وان يسكنه الله فردوسه الأعلى بدون حساب ولا سابقة عذاب هو وموتى المسلمين جميعا خصوصا من زال اثره فلم يذره زائر ولم يذكره ذاكر