عزة :طيب يا جماعة نقوم احنا نتفرج على التلفزيون فى الصالة ونسيب الولاد لوحدهم شوية
فاطمة :معاكى حق يا عزة
احمد :اتفضل معانا يا محمد
محمد :يزيد فضلك
هالة بغضب :انت بتستعبط يا على
على :يعنى سنتين مبترميش عليا حتى سلام ربنا لما بتشوفينى واول حاجة تقوليلهالى انت بتستعبط يا على دى مقابلة تقابلينى بيها دى
هالة :على مش وقت استظراف انت بتهبب ايه هنا انت ناسى انا كنت مين
على :لا مش ناسى يا هالة
هالة :ولما انت مش ناسى بتعمل ايه هنا جيت ليه
على :وانتى قاعدة معايا ليه
هالة :قصدك ايه
على :قصدى ان زى ما انتى مقدرتيش تقولى لاهلك لا انا كمان مقدرتش
هالة بتريقة :ليه ان شاء الله هيحرموك من المصروف ولا هيحبسوك فى اوضة ضلمة فيها فيران
على :لا يا ام لسان عايز قطعه هتتفضحى انتى
عايزانى اقولهم انا مينفعش اتقدم لهالة اصلها كانت حبيبة اعز اصحابى فضلتو خمس سنين سوا ومحدش من اهلكم عرف عايزاهم يعرفو دلوقتى بعد ما هو مات
اكيد ده مش حل
هالة :اومال ايه الحل بقى
على :اجى ونقعد سوا وحد فينا يرفض ده حل مناسب
هالة بحرج :معاك حق..انا اسفة يا على طيب احنا هنعمل ايه
على :عادى بعد يومين قوليلهم صليت استخارة ومرتاحتش
هالة وهى بتضحك :بقيت عارف صلاة الاستخارة الله يرحم ايام لما مكنتش تعرف المغرب تلت ركعات ولا اربعة
على وهو بيضحك :وعمر مكنش عارف يعنى ايه صلاة قصر فاكرة اليوم ده
على :اهو انا عايز اتجوز واحدة زى دى
هالة :منتقبة عايز تتجوز واحدة منتقبة يا على
على :اه وفيها ايه
هالة :يعنى مش شايف انك مش مناسب لواحدة منتقبة مثلا
على :ليه ان شاء الله يهودى ما انا مسلم زيى زيها ايه يا عم عمر ما تقول حاجة
عمر :ايه المشكلة يا هالة على فكرة شباب كتير بتفكر كده انهم عايزين واحدة زيها تصونهم
هالة :وهى مين يصونها يعنى هى تمنع نفسها عن كل حاجة غلط علشان فى الاخر تتجوز واحد عمل كل حاجة غلط
على :وهو انا تاجر مخدرات بخطف عيال صغيرة وابيعهم اعضاء بشرية طيب ايه يا هالة شحورتينى
هالة وهى بتضحك :مش قصدى يا على بس هى اكيد ليها متطلبات فى الانسان اللى هتبقى عايزة تتجوزه
على :عادى هتلاقى المتطلبات دى فيا مالى ما انا زى الفل مهندس وبروح الجيم واشتغلت وبدءت ابنى نفسى
هالة :ومصاحب قبلها عشرة اتناشر مرة ومتعرفش اساسيات دينك اللى هى هتكون عارفاها كلها غالبا
على :يا بنتى هو انا داقق صليب على ايدى انا عارف حاجات كتير فى دينى على فكرة ميغركيش الروشنة اللى شكلى فيها
هالة :عارف حاجات فى دينك قولتلى..طيب عارف ايه هى صلاة القصر
على :صلاة قصر ايه مش هما خمسة بس فجر ضهر عصر مغرب عشا جبتى صلاة القصر دى منين
عمر وهو بيضحك :انهم يدعون الى دين جديد يا عم على..بتسأليه فى ايه ده ممكن ميبقاش عارف المغرب كام راكعة والعشا كام راكعة
على :يا خفيف منك ليها انتو هتحلوو عليا..على فكرة انا عارف
عمر :طيب ما تقول
على :اقول ايه
عمر :قول اللى انت عارفه مش انت عارف
على :اه انت مفكر انك بتحرجنى هجاوب وهخلى شكلك وحش على فكرة
عمر وهو بيضحك :جاوب انا عايز شكلى يبقى وحش
على :واحد فيهم تلت ركعات والتانى اربعة
عمر :ايوه ايه بقى اللى تلاتة وايه اللى اربعة
على :ااا..المغرب اللى تلاتة لا..العشا اللى تلاتة
هالة وهى بتضحك :اوقفلك اى عيل صغير فى الشارع يقولك ان المغرب تلت ركعات والعشا اربع ركعات
عمر وهو بيضحك :بتحط نفسك فى مواقف بايخة
على :يا سلام ده على اساس انك امام جامع يعنى ما الحال من بعضه
عمر :لا يا حلو انا بصلى ساعات انما انت مبتركعهاش
هالة :لا ثانية واحدة معلش يعنى ايه بتصلى ساعات
على وهو بيضحك :البس يا معلم اهى فاقتلك فرحان من قلبى لروح قلبى
هالة :اركن على جمب يا على الله يباركلك
على :اتفضلى يا ريسة
عمر :هو انا يعنى مبصليش دايما لما بنكون بنتكلم وتقولى هقوم اصلى وارجعلك وقتها انا كمان بصلى
هالة :بس كده مبتصليش غير لما انا بقولك انى هصلى ولو مقولتش انت مبتصليش
عمر :يا ستى وافقى اتقدملك ونتجوز وتبقى معايا دايما واصلى كل الفروض
هالة :انت عارف انا ندمت انى مسيبتوش يتقدم وقتها وخليته يستنى لو كان اتقدم كان على الاقل بقى خطيبى ولا جوزى وكان زمانى من حقى احزن عليه مش اتوجع على موته وقلبى يتفشفش مليون حتى واتألم فى صمت من ورا اهلى لانى مش هعرف ابررلهم انا موجوعة على فراق مين لان محدش فيهم يعرف عن عمر
على :انا كنت عارف انتى اللى اختارتى تبعدى عنى
هالة :مكنتش عارفة اتعامل معاك ازاى انا تعاملى معاك كله كان من خلال عمر وقدامه مكنتش هعرف اتعامل معاك وهو مش معانا دى كانت هتبقى حاجة من ضم حاجات كانت بتكوى قلبى وبتعرفنى انه مات ومبقاش موجود خلاص
ولما عدى وقت وتقبلت فكرة موته معرفتش ارجع اتعامل معاك لانى عارفة ان الصداقة بين الراجل والست حرام
على :طول عمرى وثقافتك الدينية بتعجبنى وكنت بحسد عمر عليكى بسببها وبتمنى ربنا يرزقنى بواحدة زيك عارفة دينها وفى نفس الوقت عارفة ازاى تعيش حياتها ومش مقفلاها
هالة :انا كنت فاتحاها على البحرى يا على انا منفعش مثال للبنت اللى عارفة دينها كويس
انا اللى عرفته فى دينى ممنعنيش ارتبط بعمر خمس سنين من ورا اهلى واخرج معاه ومعاك هو كان حبيبى وانت كنت صاحبنا وادينى اتعاقبت واتحرمت منه يمكن لو كنت بعدت عنه وسيبته لربنا كان زمانه عايش وكان زمانا مخطوبين انما انا غلطت فخسرته
على :هو مماتش بسببك يا هالة لو انتى علاقتك بيه حرام فانا كنت صاحبه وعلاقتى بيه حلال وفى اهله اللى روحهم فيه ذنبنا كلنا ايه نتعذب بغلطك او غلطه ربنا مبياخدش حد بذنب حد ربنا مش هيحرمنا كلنا من عمر بسبب ان انتى وهو ارتبطو خمس سنين من ورا اهلكم وهو كان عايز يخطبك وانتى اللى قولتى لسه بدرى يعنى هو حتى مكنش بيلعب بيكى
هالة :كلامك صح بس انا غلطت يا على غلطت فى حق اهلى وحق نفسى انت عارف انا بدعيله بالرحمة كل يوم وبدعى ربنا يغفرله ويغفرلى اللى عملناه بدعى الدعوتين ورا بعض واسال نفسى ليه عملت كده فى نفسى وقبلت ان قصة حبى الاولى تكون فى الضلمة واخاف حتى احكى عنها لصحابى لحسن نتخانق ويمسكوها عليا ذلة ولا يقولو لاهلى
ليه بعد موته بشهور قعدت مع عرسان لانى مينفعش اقول لبابا لا مش هعمل كده اصلى كنت بحب واحد من وراك وهو مات فانا محتاجة شوية وقت قبل ما اقبل اتخطب
ليه ضيعت كل حقوقى كده ضيعت حقى فى انى اقول انى حبيت ضيعت حقى فى انى اتوجع على موته قدام كل الناس ضيعت حقى فى انى اقعد فترة بتقبل فكرة موته وبتجاوزها
انا ضيعت كل حقوقى يا على كلها
معلش اتكلمت كتير بس الكلام ده محبوس جوايا بقاله كتير وما صدقت الاقى حد ينفع اقولهوله
على :ولا يهمك اوقات كتير كنت بفكر فيكى فى يا ترى عاملة ايه بعد عمر لما اتخطبتى كنت بفكر يا ترى اهلك غصبوكى ولا انتى نسيتيه كنت ببقى عايز اطمن عليكى عايز اتكلم معاكى عن عمر واقولك قد ايه هو وحشنى وموته فرق معايا بس انتى اختارتى تبعدى وتتجاهلى وجودى وانا احترمت اختيارك خصوصا وانا عارف انه كان هيبقى صعب اوى نبقى صحاب وعمر اللى كان مجمعنا وتعاملنا مع بعض من خلاله وقدامه خلاص مات وسابنا احنا الاتنين
هالة :انت عامل ايه فى حياتك
على :عادى عايشها الحياة مبتقفش على حد بس حياتى ناقصها حاجة مهمة من غير عمر مش لاقى صاحب زيه ولا هلاقى مهما دورت
عارفة لما اهلى كلمونى عنك بحكم اننا جيران وكده كنت عايز اقولهم انتو اتجننتو اتقدم لمين لهالة حبيبة عمر صاحبى اللى كان حلم حياته انها تبقى مراته
بس طبعا منفعش اقولهم كده
ها مين فينا اللى هيقول استخار ومرتاحش انا ولا انتى نخليها انتى
هالة :لا خليها انت احسن
على :اشمعنا
هالة :اصلى انا اللى فسخت خطوبتى واهلى مش مقتنعين باللى عملته فلو قولت انى مش موافقة عليك هيضايقو منى فتيجى منك انت احسن
على :ماشى بس هو انتى فسختى الخطوبة اصلا ليه لو مش عايزة تجاوبى مفيش مشكلة
هالة :اكتشفت ان اللى كان خطيبى خلا واحد صاحبه يبعتلى فيس وواتس ويكلمنى فى الموبايل كتير ومن ارقام مختلفة علشان يشوف هستجيب واكلمه ولا لا علشان يتأكد من اخلاقى
فسخت الخطوبة واهلى شايفين انى كبرت الموضوع وكان كفاية اربيه وازعل شوية وخلاص
على :لا انتى عملتى الصح انا راجل وافهم الراجل اللى زيى ده واحد شكاك حياتك معاه كانت هتبقى جحيم هو فى الغالب بتاع بنات وعلشان كده مش واثق فيكى ولا فى اى بنت من البلاوى اللى عملها
هالة وهى بتضحك :مبيفكركش بحد
على وهو بيضحك :لا خلاص توبنا لله وبقينا عارفين المغرب كام راكعة والعشا كام راكعة وبقينا عارفين كمان يعنى ايه صلاة قصر
هالة :اتغيرت يا على
على :موت عمر غيرنى قربنى من ربنا فهمت انى ممكن اقابله فى اى لحظة ولازم استعد للحظة دى
هالة بابتسامة :انا فرحانة علشانك...لسه عايز تتجوز واحدة منتقبة
على :بقيت عايز واحدة تتقى ربنا فيا ايا كان لبسها ايه وبتعب وبغير من نفسى علشان ابقى كويس واستاهل واحدة كويسة
هالة :ان شاء الله تلاقيها انت تستاهل كل خير
على :وانتى كمان انا هقوم بقى طولنا اوى فى الكلام وده لا يتناسب مع كونى هستخير ربنا فيكى ومش هستريح
هالة :كنت عايزة اقولك حاجة
على :حاجة ايه قولى
هالة :انا يعنى..هفضل بتجاهلك لما بشوفك ومبرميش عليك حتى سلام ربنا مش لحاجة وحشة والله لو عليا معملش كده بس هو حرام وكفاية اللى حصل لما كملت قبل كده فى حاجة انا عارفة ومتأكدة انها حرام
على :فاهمك..وانا موافق انا بقيت عارف انه حرام واتكلمت معاكى كتير المرة دى علشان ده حقى مش دى رؤية شرعية
هالة وهى بتضحك :رؤية شرعية ايه واحنا عارفين ان محدش فينا هيوافق احنا بنستعبط يا على
على وهو بيضحك :بنستعبط انا عارف بس دى اخر مرة نستعبط فيها اتفقنا
هالة :اتفقنا
على :خلى بالك من نفسك
هالة :وانت كمان خلى بالك من نفسك
بعد اسبوع
هالة :اخرج اقعد مع عريس ليه انا هو انا مش لسه واحد رافضنى من اسبوع مش تسيبونى سنة كده انسى جرح كرامتى
سارة وهى بتضحك :هو خانك ايه الاوفر ده واحد جارنا وجه اتقدملك واستخار ومرتاحش تتجرح كرامتك ليه ما عادى حقه زى ما هو حقك
هالة :ماشى حقه بس تقعدونى مع عريس بعدها باسبوع بس ليه ومطلق كمان ابوكى مش طايقنى ليه كده
سارة وهى بتضحك :ابوكى بيحبك اكتر واحدة فينا وانتى عارفة وقال ان العريس ده ميترفضش ادب واخلاق ومكانة اجتماعية وشكله كويس وجوازه مكملش سنة ومخلفش يعنى كأنه متجوزش ويا ستى هو المأذون قاعد بره دى مجرد قاعدة تتعرفو فيها على بعض ما يمكن هو اللى ينفد بجلده ويقول مش عايز زى ما على قال
هالة :هو اسمه ايه العريس اللى قاعد بره ده
سارة :اسمه طه
هالة :تمام استاذ طه ده هيوافق عليا وهيتمنى انى اوافق عليه تدرى ليش لانى لا اقاوم ومفيش منى اتنين
سارة وهى بتضحك :يا سلام على الثقة
هالة :عدى كده خلينى انقى فستان مناسب
سارة :ليه يا بنتى ما اللى عليكى كويس
هالة :لا مش قولنا لا اقاوم بقى يبقى اتأنقله خليه يشوف كويس هو جاى يتقدم لمين
سارة وهى بتصقف :يا هالة يا جامد طيب بسرعة قبل ما بابا ينده عليكى
هالة وهى بتقلب فى فساتينها :عادى ما يستنانى
سارة :لا انتى عارفة ابوكى ملوش فى دلع البنات ده
هالة :خلاص هلبس الفستان الروز ده اطلعى بره علشان اغير
بعد نص ساعة
طه :كلمينى عنك
هالة :مش تتكلم انت الاول احسن
طه :لا ladies first
هالة :تمام انا هالة عندى اربعة وعشرين سنة خريجة كلية صيدلة كنت مخطوبة قبل كده
طه :وفسختى الخطوبة ليه
هالة :ليه بتسأل فسختها انا ليه ما يمكن هو اللى فسخها
طه :مش عارف حاسس ان انتى اللى فسختيها اصل صعب يكون هو اللى فسخها
هالة :ليه صعب يعنى
طه :احساسى بيقولى كده المهم مجاوبتيش فسختيها ليه
هالة :تقدر تقول مكناش متفاهمين
طه :لا وضحى اكتر
هالة :هو كان بتاع بنات وبالتالى كان بيشك فيا ومش قادر يثق فيا ودى حاجة انا مقدرتش اتحملها وفسخت الخطوبة
تمام كده ولا تحب اوضحلك اكتر
طه :لا تمام مال خلقك ضيق ليه كده يا هالة
اسمك قديم اوى على فكرة تحسيه تاريخى كده
هالة :والله اسمى قديم ده على اساس ان اسمك هيثم يعنى ما الحال من بعضه يا حضرة
طه وهو بيضحك :معاكى حق انا بهزر بحاول افك الجو بنا بس
هالة :بابا قالى حاجات كتير عنك وقالى انك مطلق انا عايزة اعرف اتطلقتو ليه
طه :مسألتيش عمى احمد انا طلقت ليه
هالة :لا قولت اعرف منك احسن
طه :بصى انا كنت شغال شغل حر وفاتح مكتب لوحدى والمكتب ده خسر كتير فضطريت اقفله فاللى كانت مراتى طلبت الطلاق علشان مستوايا المادى اللى قل
هالة :ايه ده دى..
طه قاطعها :قليلة الاصل وقتها عرفت انى اختارت غلط
المهم انا اتعرض عليا شغل فى شركة كبيرة علشان خبرتى الحمد لله ربنا عوضنى عن خسارتى مستوايا المادى تقريبا رجع زى الاول
وطليقتى حاولت ولسه بتحاول ترجعلى ما انا رجعت زى زمان بقى
وطبعا انا مفكرتش للحظة واحدة ارجعلها
هالة :ليه
طه :انتى شايفة انى المفروض ارجعلها
هالة :لا عارفة انه مينفعش بس عايزة اعرف اسبابك انت
طه :بصى يا هالة احنا لما بنتجوز بنبقى عايزين ناس يكونو معانا على الحلوة والمرة انما ناس هيبقو معانا فى الحلوة بس وفى المرة هيسيبونا ويمشو يبقو ميلزموناش
هالة بابتسامة :معاك حق
طه :مش حابة تسألينى عن حاجة تانية
هالة :انا بشتغل ومش عايزة اسيب شغلى
طه :وانا جايلك وانا عارف انك بتشتغلى ومش هطلب منك تسيبى شغلك
هالة :تمام انا كده خلصت انت مش عايز تسألنى عن حاجة
طه :فى احتمال قوى انى قريب اترقى وانتقل لفرع الشركة اللى فى اسكندرية وقتها اكيد مش هفضل بروح واجى من هناك لهنا كل يوم وهنقل حياتى هناك
انتى الحكاية دى هتسببلك مشكلة ولا عادى
هالة :هو بصراحة انا مكنتش عايزة ابعد عن اهلى كده
بس بابا دايما بيقول الست بتكون مكان ما يكون جوزها لو حصل نصيب واتجوزنا يبقى لو روحت الصين حتى انا هكون معاك
طه بابتسامة :تمام جدا طيب ايه نندهلهم ونقرء الفاتحة
هالة :فاتحة ايه لا طبعا مش بسرعة كده
طه :ليه بس مش احنا متفقين على كل حاجة
هالة :ايوه بس برضه محتاجة وقت افكر واستخير ربنا ده جواز يعنى قرار مصيرى بتتحدد على اساسه حياتى الجاية كلها
طه :ماشى خدى وقتك وفكرى واستخيرى وانا مستنيكى..قصدى يعنى مستنى اعرف ردك
بعد ساعة
سارة وهى بتضحك :يا هالة يا جامد اللى قولتيه حصل بالحرف
هالة :قصدك ايه
سارة :بابا لسه كان بيقولنا بره ان طه وهو ماشى قاله انه موافق وهيستنى ردنا ويا رب يسمع خبر حلو
مفكرش يعمل فيها تقيل ويتصل كمان يومين تلاتة كده يقول انه موافق ويسأل عن ردنا
هالة وهى بتضحك :مش قولتلك انى لا اقاوم ومفيش منى اتنين
سارة :مزاجك عالى بعد ما قعدتى معاه دى حاجة كويسة
هالة :ودلوقتى بعد ما صليت العشا صليت ركعتين استخارة وحاسة انى مرتاحة شوية
سارة :حلو يعنى اخرج اقول لبابا انك موافقة
هالة :تقولى لبابا ايه اهدى يا حاجة انا لسه هفكر وهستخير تانى وتالت
سارة :مش قولتى حاسة انك مرتاحة
هالة :وعلشان حاسة انى مرتاحة مفكرش كويس مستخرش كتير متأكدش من احساسى انى مرتاحة
سارة :لا يا ستى براحتك اتأكدى وخدى وقتك بس مطوليش اوى معتقدش انه هيستنى كتير على ما يتصل ببابا يعرف ردك
هالة :مش هطول يومين تلاتة كده يعدو واقول لبابا انى موافقة
سارة وهى بتضحك :ما انتى موافقة اهو ووقعتى بلسانك
هالة وهى بتضحك :مرتاحة اوى بصراحة من وانا قاعدة معاه بس برضه نتقل شوية ويستنانا وهو يعنى هيستنى الاحسن منى
سارة بابتسامة :لا يا حبيبتى يا رب لو خير لبعض ربنا يقربكم ويصلحكم لبعض
هالة وهى بتضحك :اللهم امين مش هوصيكى بقى انا مقولتلكيش حاجة ها انا لسه هفكر وهستخير
سارة وهى بتضحك :طبعا اومال
كلنا بنغلط مفيش حد مبيغلطش
اوقات بنعمل حاجات غلط واوقات بنختار ناس غلط
بس دايما فى فرصة نصلح غلطنا ونبدء من جديد نبدء صح
مادام لسه عايشين يبقى فى فرصة نعمل الصح ونصلح الغلط ونتوب ونستغفر
ومادام لسه عايشين يبقى نستاهل بداية جديدة مع ربنا ومع نفسنا ومع الحياة كلها 💖
#حكايات_منار
فضلا تدعو لابويا بالرحمة والمغفرة وان يسكنه الله فردوسه الاعلى هو وموتى المسلمين جميعا خصوصا من زال اثره فلم يزره زائر ولم يذكره ذاكر