زينب :بفكر اجى الكوافير ده يوم فرحى
حلم :ملقتيش مكان معفن اكتر من كده شوية
ليلى :انتى تعرفى شغلهم علشان تقولى كده
حلم :حاطينه شغلهم اهو على اليافطة بتاعتهم
بصى على الصور دى كده قبل الماكياج ولا بعد
عاجباكى الوان قوس قزح اللى على وش العروسة دى
خلاص قررتى هتطفشى ماجد يوم الفرح بميكب عروسة المولد والبربرق الأوفر ده
هو فلوسه حرام علشان تضيعيها على الفاضى كده
زينب وهى بتضحك :حرام فلوسه تضيع على الفاضى
ليلى وهى بتضحك :هى الصور المحطوطة وحشة فعلا
بس ما يمكن ده مش شغلهم
حلم :كده اسوء
الواحد بيحط صور احلى من اللى عنده فعلا علشان يجذب الناس
فلو ميكب عروسة المولد ده احلى من اللى عندهم
اومال هما بقى عندهم ايه
زينب :خلاص هروح نفس الكوافير اللى انتى روحتيله
حلم :هما كويسين
بس منى بنت عمى فى فرحها راحت لكوافير احسن منه
لو كنت اعرفه وقت فرحى كنت روحتله
هجيبلك منها العنوان
بصى دى صور ليها يوم فرحها
زينب :الميكب بتاعها حلو فعلا ورقيق
ليلى :ولفة الطرحة تحفة
حلم :واسعارهم كمان حلوة
ومنى بتقول البنات اللى بتشتغل هناك قمة فى الزوق
زينب :خلصانة هاتليى منها العنوان
حلم :اعتبريه معاكى خلاص
حلم :احضر العشا
ياسين وهو بينام على بطنها :لا انا مش جعان
كمان شوية نبقى نتعشى
ولا انتى جعانة
حلم :لا مش جعانة لسه
ياسين
ياسين :ايوه
حلم :انت نايم على بطنى
ياسين :اه
حلم :انا مش بسألك انا بقولك
ياسين :ايوه ما انا عارف ما انا اللى نايم
حلم :بساطة ردودك بتحسسنى انى كلامى غبى
نايم على بطنى ليه
ما المخدة موجودة نام عليها زيى
ياسين :انا مرتاح كده
يومك النهاردة كان كويس
حلم :يوم عادى
الحلو اللى فيه انى شوفت زينب وليلى
زينب فرحها قرب فمبتتكلمش غير عنه وعن تجهيزاته
ياسين :ربنا يتمملها على خير
حلم :امين يا رب
انت يومك كان تمام
ياسين :انا برضه يومى كان عادى مفيهوش جديد
زينب :انا هعمل شعرى كرياتين
مضايقة اوى
ليلى :ليه ده طبيعى عروسة جديدة وكده
بعد شوية هيرجع لطبيعته متضايقيش
زينب :ما هو ده اللى مضايقنى
انى شعرى مش ناعم
مش شبه موجات الليل الأسود ولا سحب الشعر الاصفر ولا شلالات البندق
حلم :شلالات بندق ازاى يعنى
زينب :يعنى شعر البطلة بيكون بلون البندق وبيكون طويل وتقيل تفكه ينزل على ضهرها زى الشلال
تفرده على المخدة ينام البطل عليه وكأنه نايم على سحابة
تحركه يحس البطل انه شايف موج بحر
انا ليه شعرى مش عامل كده
انا ليه شكلى مش عامل كده
مش فتنة ساحرة مهلكة
وعيون بلون العسل الذائب وخطوات غزال وعيون مها وسحر فرس عربى وغرور طاووس
حلم :هو ايه الهبل ده هو فى حد عامل كده اصلا
وايه كمية الحيوانات دى
ليلى :دى اوصاف البطلات فى كتير من الروايات
حلم :ودى المفروض اوصاف بنات زينا ولا اوصاف ملكات جمال
لا دول كده احلى من ملكات الجمال كمان
الحاجات دى كلها مبالغة ليه كده
زينب :بيجيبو ده على انه العادى
ليلى :انا فى فترة كنت بقرء النوعية دى من الروايات كتير لدرجة انى كنت قربت اكره نفسى بسببهم
حلم بصدمة :نعم ازاى يعنى
ده انتى احلى واحدة فينا
انتى احلى واحدة انا اعرفها فى الدنيا
ليلى :زى ما انتى قولتى هما بيتكلمو عن بطلات احلى من ملكات الجمال كمان
فى كل وقت بيكونو حلوين
وهما صاحين من النوم وهما تعبانين
يا شيخة ده وهما لسه والدين بيكونو برضه فتنة مهلكة ساحرة
حاجة كده تخليكى تبصى لنفسك وتضايقى وتحسى انك متستاهليش الحب
زينب :انتى بتقولى كده اومال انا اعمل ايه بقى اولع فى روحى
حلم :لا تبطلو تقرو الروايات الساذجة دى
مفيش حد فى الدنيا شكله عامل كده
حتى ملكات الجمال والممثلين
مش كده
كل الحكاية انهم ناس معاهم فلوس
قادرين يعملو حاجات كتير
انما ده كله مش طبيعى
انتم ليه تقرو حاجة تكرهكم فى نفسكم
ليلى :بطلت اكره نفسى بسببهم
لما لقيت ان مش انا بس اللى مش شبه البطلات
لا كمان مفيش شباب شبه الابطال
اقتنعت ان ده كله خيال
ومش طبيعى اخلى الخيال يكرهنى فى الواقع
انتى حلوة يا زينب حلوة بطبيعتك
واللى بنقراه انا وانتى ده اوفر ومش طبيعى
حتى البنات اللى بتكتب الروايات هما نفسهم مش شبه بطلات رواياتهم
لا هما عاديين شبهنا
حلم :متقوليش شبهنا وتجمعى نفسك معانا
وانتى ناقصك فولت واحد وتنورى اصلا
زينب :بالنسبة للى بنقراه ليلى عادية
حلم وهى بتضحك :ده على كده انا بالنسبالهم كلى على بعضى كده مجرد عبدة حبشية
زينب وهى بتضحك :+١
طيب هو انا كده مش بخدع ماجد
يعنى هو لما هيشوف شعرى هيلاقيه مفرود وناعم
مش شبه الشلالات والامواج اللى بقراها بس برضه هيبقى حلو احلى من الطبيعى بتاعه
انما فى الحقيقة انا شعرى خشن لو هنشبهه بحاجة يبقى سلك مواعين
ليلى :وانا لو هنشبه شعرى بحاجة فهو شبه الكنافة الشعر
مموج اوى وهايش
حلم :وانا شعرى شبه المكرونة الاسباكيتى
ملولو كده
وميتهيأليش فى حد شعره طبيعى مفرود وناعم زى ما بنشوف فى الأفلام الا لو فارده
انما الشعر طبيعى يكون فى كسرة كده
سيبك من كل الهبل ده انتى عروسة وزى القمر وماجد محظوظ ان القمر ده بقى بتاعه
زينب :يعنى انا مش بخدعه كده
حلم :لا طبعا انتى عروسة طبيعى تكونى مهتيمة بشكلك ومكياجك يوم فرحك
ويا ستى لو عايزة تقوليله ان شعرك خشن قوليله
هو مسألكيش عن الحكاية دى
زينب :لا
ليلى :يبقى واضح ان الموضوع مش فارقله
متكبريش الموضوع
واحتياطى متقريش روايات لحد الفرح
حلم وهى بتضحك :او متقريهاش تانى يكون أفضل
بدل الخيال العلمى الأوفر اللى بيكتبوه ده
الحمد لله انى مبقراش روايات ولا بحبها
ياسين :بسم الله الرحمن الرحيم
انتى جايبة شعرك قدام وشك ليه كده
حلم :بتفرج عليه
تصدق شكلك حلو من ورا شعرى كده
ياسين وهو بيضحك :رغم ان المنظر يخض فى الاول
بس بعد تأمل شكلك حلو كده
حلم :هو انت ايه رأيك فى شعرى
ياسين :حلو شعرك
حلم :مكنتش عايزه يكون موج من الايه انا نسيت
بلاش موج شلالات طيب ولا سحب
ياسين :مش فاهم حاجة سحب ايه وموج ايه
حلم :مكنتش عايزه يكون ناعم اكتر من كده واتقل من كده يعنى
ياسين :هو كده حلو
حلم :بجد
ياسين وهو بيضحك :بجد
وبعدين انا اقرع يا حلمى هبقى اقرع وبتشرط كمان
حلم وهى بتضحك :وايه يعنى اقرع
اقرع وقمر عادى
ياسين مش هتبطل تقولى يا حلمى دى بحس انى واحد صاحبك لما بتقولها
شوفلى دلع تانى
ياسين :ده مش دلع
دى ياء ملكية انتى كده الحلم بتاعى انتى بتاعتى
حلم :انا اسمى غريب لوحده فانت بياء الملكية بتاعتك دى بتخليه غريب ورجالى فى نفس الوقت
ياسين :اسمك حلو ومميز مش غريب
انا بحبه
انتى اهلك سموكى حلم ليه صحيح
حلم :علشان فضلو اتناشر سنة على ما خلفونى
فبابا كان شايف انى معجزة من ربنا ليهم وانى حلمهم اللى اتحقق
فسمانى حلم
واهو حلم كويس
تخيل كان سمانى معجزة
ياسين وهو بيضحك :كنت هقولك يا معجزتى
حلم وهى بتضحك :واهى كده تبقى كملت المأساة
لا قدر ولطف
ياسين وهو بياخد شعرها يحطه على عيونه :انا جعان
حلم :هقوم احضر الغدا
انت بتعمل ايه بشعرى معلش
ياسين :بجرب اشوفك من وراه
شكلك حلو يا حلمى
حلم بابتسامة :عيونك الحلوة
انا هقوم احضر الغدا
ياسين :قومى
حلم وهى بتضحك :هقوم ازاى وانت بتتفرج عليا من ورا شعرى اللى ماسكه فى ايدك
سيب شعرى طيب
ياسين وهو بيضحك وبيسيب شعرها :لازم يعنى
حلم :وادينى فصصتلك الفراخ
ياسين :حطيلى بقى فى الطبق بسلة ورز وسلطة
كل يوم افكرك كده
حلم :حاضر
حلم :ياسين انت نايم على رجلى ليه
ياسين :عايز اتفرج على التلفزيون وانا نايم على الكنبة
حلم :على الكنبة مش على رجلى
اوعى طيب هقوم اقعد على كرسى ونام انت على الكنبة براحتك
ياسين :لا انا عايز انام على رجلك على الكنبة
حلم وهى بتضحك :وبتنام على بطنى على السرير
هو مخدات السرير ومخدات الركنة قصرو معاك فى ايه
ياسين :مقصروش فى حاجة
بس انا مرتاح كده
اسكتى بقى وسيبينى اركز الماتش هيبدء
ياسين :انا هنزل اجيب هدوم مش عايزة تشترى هدوم
حلم :مش عارفة
ليلى فصلت فستان لفرح زينب
بس انا مبحبش التفصيل
فهشترى جاهز
بس بفكر اطلب اونلاين مكسلة اخرج الف مخصوص على الفستان
ياسين :انتى كده كده هتنزلى معايا وانا بشترى هدوم ليا
فتشوفى الفستان اللى محتاجاه بالمرة
حلم :انا هنزل معاك ليه
ياسين :علشان ننقى سوا هدوم ليا
انتى مضايقة ولا ايه
حلم :لا مستغربة بس
انت مكنتش بتطلب منى انزل معاك وانت بتشترى هدومك قبل كده
ياسين :قبل كده مكنتيش مراتى يا حلمى فمكنش ينفع
دلوقتى بقيتى مراتى فبقى ينفع
ياسين :مش هتفصصيلى اللحمة
حلم :ما تفصصها لنفسك يا ياسين
ما تفصصها لنفسك وتحط لنفسك المحشى والسلطة فى طبقك
ياسين :وانتى متعمليليش الحاجات دى ليه
حلم :علشان انا مراتك مش الدادة بتاعتك...انت رايح فين
ياسين وهو بيقوم من على الأكل :مش عايز اكل
كلى انتى
حلم :انت بتعمل ايه
ياسين :بطلع غيار ليا هدخل استحمى
حلم :وبتطلعه لنفسك ليه
هطلعولك انا
ياسين :لا ملوش لزوم انتى مراتى مش الدادة بتاعتى
ليلى :وحدوه
زينب :لا اله الا الله
حلم :لا اله الا الله
استغفر الله العظيم
ليلى :فى ايه انتى وهى دى اول خروجة لينا بعد جواز زينب
وانتم قاعدين ساكتين ولا اللى فى عزا
مالكم
حلم :انا متخانقة مع ياسين
ليلى فى نفس الوقت :انا اتخانقت مع ماجد
ليلى وهى بتضحك :صلاة النبى احسن
متخانقين ليه طيب
حلم :احكى انتى الاول يا زينب
زينب :لا احكى انتى الاول انا خناقتى خناقة تافهة
ليلى :انتم هتتعازمو واحدة فيكم تبدء وتخلصنا
حلم :ياسين من بداية جوازنا
بيطلب منى اعمله حاجات كتير
مش حاجات متعبة بس حاجات كتير
يعنى انا اللى بطلعله غياره لو هيستحمى
انا اللى بفصصله الاكل مش بس السمك لا السمك والفراخ واللحمة
انا اللى بقطعله الفاكهة
لازم انزل معاه وهو بيشترى هدومه
مش عارفة بس الحاجات دى بتضايقنى بتحسسنى انى الدادة بتاعته مش مراته
زينب :قولتيله ان الحاجات دى بتضايقك
حلم :قولتله ويا ريتنى ما قولتله
ليلى :اتخانق معاكى
حلم :يا ريته اتخانق معايا
خد جنب منى مبقاش بيسيبنى اعمله اى حاجة فى كل ده
حاسة انى بنيت بينى وبينه سور
وده مضايقنى
وحاسة انى وحشنى اعمله الحاجات دى
هو مقالش حاجة ولا عاتبنى
بس انا حاسة انه زعلان منى
كان لازم يعنى اقوله اللى قولته
ما كنت اعمله اللى هو عايزه وخلاص
زينب :يا سلام وافرضى اللى هو عايزه ده مش على مزاجك تعمليه بالغصب
هما ليه كل الرجالة انانيين كده
ليلى :انانيين قولتيلى
انتى متخانقة مع جوزك ليه انتى كمان
زينب :طلب منى طلب ورفضته زعل بقى واتقمص
ليلى :طلب ايه ده
زينب :طلب وخلاص
حلم :ما تخلصى وتقولى طلب ايه
هو طلب منك حاجة حرام ولا ايه
زينب :لا طبعا...هو يعنى...طلب منى...انى ار...ارقصله
ليلى :وبعدين
زينب :بعدين ايه
ليلى :فين المشكلة ايه المصيبة اللى طلبها ورفضتيها
زينب :طلب منى ارقصله قولتلك
حلم :بس كده ورفضتى ليه
مش جوزك ولا هو حد غريب
ما ترقصيله زى ما هو عايز
هيجرالك ايه يعنى مش هينقص منك حتة
ليلى :وانتى اللى كان هينقص منك حتة لما تفصصى لجوزك الاكل ولا تطلعيله هدومه
مادام دى حاجة هتريحه متعمليهاش ليه انتى وهى
ما ترقصيله يا فوزية قصدى ما ترقصيله يا زينب
وانتى يا حلم ما تعمليله اللى هو عايزه
انتى قولتى ان الحاجات اللى بيطلبها مش متعبة
فمادام مش متعبة وبتريحه متعمليهاش ليه
حلم :اتغابيت بقى وهو دلوقتى مش سايبنى اعمله حاجة
ليلى :يبقى راضيه وصلحى الغباء اللى عملتيه
حلم :حاضر
وانتى يا زينب ارقصيله يا حبيبتى مش حرام ولا عيب
هو جوزك
زينب :انا اتحرجت
وبعدين افرضو رقصى معجبوش
انا مبعرفش ارقص اوى يعنى
ليلى :تتعلمى
كل واحدة فيكم تشوف ايه اللى بيسعد جوزها وتتعلمه وتعمله علشانه
مش مصدقاكم بجد مخلينى بنصحكم وانا السينجل اللى فيكم
حلم :بس والله نصايحك فى الجون
ليلى :انا بعمل كده معاكم بعمل الحاجات الصغيرة اللى عارفة انها هتفرحكم
بجيبلك يا زينب نفس الاكسسوارات اللى بجيبها لنفسى علشان دى حاجة بتفرحك
بعملك منشن فى بوستات كتير يا حلم علشان دى حاجة انتى بتحبيها
بعمل لسارة اختى معايا دايما نسكافية علشان هى بتحبه من ايدى
ببوس راس ماما دايما علشان هى بتحب الحركة دى
بحضن نادين بنت عمى كتير علشان هى بتحب الاحضان
اللى بيحب حد بيعمل اللى يفرحه
زينب :معاكى حق
حلم :الله ينور عليكى صح كلامك
ليلى :مادام معايا حق وكلامى صح يبقى كل واحدة فيكم تشوف هتراضى جوزها ازاى
انتم مش متجوزين ولاد الناس علشان تنكدو عليهم
حلم وهى بتضحك :حاشا لله
زينب وهى بتضحك :استغفر الله مش اخلاقنا يا بنتى
فى بيت اهل حلم
ياسين :تسلم ايدك يا طنط الاكل جميل
سنية :انت لسه كلت حاجة يا ياسين
ياسين :من قبل ما ادوق باين من الريحة
وبعدين هى اول مرة اكل من ايدك يا طنط
سنية بابتسامة :تسلم يا حبيبى ويسلم لسانك الحلو ده
ماهر :منورنا يا ياسين
ياسين :البيت منور بيكم يا عمى
انتى بتعملى ايه
حلم :بغرفلك فى طبقك
ياسين :انا هغرف لنفسى وبعدين اهلك يقولو عليا ايه وانتى بتففصيلى الفراخ قدامهم كده
حلم :جوزى وبهتم بيه
ياسين :جوزك ده كنتى حاسة انك الدادة بتاعته علشان بتفصصيله فى بيتكم ومحدش شايفك
دلوقتى عايزة تفصصيله قدام اهلك
حلم :كنت غبية وغلطانة وبصلح غلطى اهو
خلاص بقى قلبك ابيض
فى شقة حلم وياسين
حلم :انت نايم على المخدة ليه
ياسين :عادى هنام فين يعنى
حلم :وهى بطنى ولا رجلى قصرو معاك فى حاجة
ياسين :انا مرتاح كده
حلم وهى بتشيل راسه تحطها على رجلها :وانا مش مرتاحة كده...اهو كده احسن كتير
ياسين :انتى بتعملى ايه
بتلعبى فى ايه معنديش شعر انا
انتى بتعايرينى ولا ايه
حلم وهى بتضحك :لا والله
انا بس كنت عايزة اعمل حركة فيها حنية كده
ياسين :يا سلام ومن امتى بقى الحنية والاهتمام دول
مش كانو خانقينك
دلوقتى بقيتى بتعمليهم وبتجودى فيهم كمان
حلم :انا اسفة
متزعلش منى
والله انا مضايقة انى زعلتك
ياسين :انا مش زعلان
حلم :لا زعلان
اومال مبقتش بتخلينى اعملك حاجة ليه
ياسين :مش علشان زعلان
انما علشان مش عايزك تعملى حاجة غصب عنك
حلم :مش غصب عنى
طيب عارف انا كنت مفتقدة نومتك على رجلى دى
ومفتقدة انك تلبس هدوم انا اللى مختارهالك
مفتقدة كل التفاصيل اللى بينا دى
ياسين :انا عارف انى يمكن مزودها شوية وبتدلع عليكى يعنى
بس مش علشان شايفك دادة
كل الحكاية انى يعنى
حلم :سكت ليه كمل انك ايه
ياسين :خلاص مش مهم
حلم وهى بتبوس راسه :لا طبعا مهم
قول انك ايه
ياسين :انتى عارفة ان ماما ماتت وهى بتولدنى
فانا يعنى مجربتش انى يكون عندى ام
تهتم باكلى ولبسى وتنيمنى على رجلها وتشترى معايا هدومى
دايما كنت بسمع من صحابى ان امهاتهم بتعملهم كل ده
وانا مكنتش فاهم هما بيتكلمو عن ايه لأنى عمرى ما جربت الحاجات دى
فلما اتجوزنا كنت عايز اجرب كل اللى مجربتوش ده
عارف انى كبرت على كل ده بس دى اول فرصة تجيلى اعوض فيها كل اللى فاتنى ده
بس لقيت ان ده مضايقك وضاغطك فقولت خلاص ملوش لزوم تعمليه لو مش عايزة
حلم وهى بتعيط :انا اسفة
والله ما كان قصدى
حقك عليا
ياسين :انتى بتعيطى ليه
انا مش زعلان منك
حلم :حتى لو انت مش زعلان منى انا زعلانة من نفسى
ومن هنا ورايح كل الحاجات دى واكتر انا اللى هعملهالك
ياسين :يا حبيبتى بجد مش مشكلة متعمليش حاجة مش عايزاها علشان ترضينى
حلم :انا عايزة اعمل كده
ومن يومها وانا بعمل كل الحاجات دى واكتر لياسين
بعد ما خلفنا انشغلت عنه شوية بالولاد
بس مبطلتش اعمله الحاجات اللى بتريحه وبتفرحه دى مبطلتش احاول اعوضه عن احساس انه يكون عنده ام تهتم بيه
كنت بهتم بيه وبولادنا
فى حاجات بسيطة لما بتعملها بتفرح بيها اللى قدامك
زى مكالمة من غير سبب
او رسالة فى نص اليوم
او منشن فى بوست
او هدية من غير مناسبة
زى كلام حلو فى نص كلام عادى
زى طبطبة على الكتف ومسكة ايد وحضن
زى حاجات كتير اوى
لما تلاقى ان فى حاجة اللى قدامك بيحبها او محتاجها
او بيرتاح لما بتعملهاله
اعملهاله
الفرحة مش لازم تكون علشان حاجات كبيرة
والحب مش لازم يتعبر عنه بحاجات كبيرة
ممكن تفرح حد وتبين حبك ليه بحاجات بسيطة💖
#حكايات_منار
فضلا تدعو لابويا بالرحمة والمغفرة وان يسكنه يسكنه فردوسه الأعلى بدون حساب ولا سابقة عذاب هو وموتى المسلمين جميعا خصوصا من من اثره فلم يذره زائر ولم يذكره ذاكر