ياسين بسعادة :سارة واخيرا شوفتك
اسيل :سارة مين حضرتك واضح انك متلغبط انا مش سارة
ياسين :لأ سارة
اسيل :وانت هتعرفنى اكتر منى
ياسين :انتى بعتيلي صورة الفستان ده وقولتيلي انك هتلبسيه فى اول مرة نتقابل فيها
اسيل بتريقة :وهى بعتتلك صورة للفستان ومبعتتش صورة لنفسها ليه خجلها منعها
ياسين :انتى بتنكرى نفسك منى ليه هو انا مش عاجبك شكلي مش حلو طولي وعرضي مش جايين علي هواكى
اسيل :هو انت بتقدم علي مستر ايجيبت مالي انا بكل اللي انت بتقوله ده انا مش سارة والله انا ما سارة والفستان الزفت اللي انا لبساه ده موضة ونص بنات مصر بيلبسوه مش علامة مميزة يعنى يثبتلك انى سارة
ياسين :لأ انتى سارة قلبي بيقولى انك سارة
اسيل :بص دى بطاقتى شايف الاسم اسيل مش سارة انا اسفة بس صدقنى مش انا الانسانة اللي انت تقصدها
ياسين :اسمك اسيل وبقالك اربع شهور بنتكلم ماسينجر ومفهمانى ان اسمك سارة
اسيل وهى بتحط ايدها على جبهتها بنفاذ صبر :الله يخربيت كده انا مش سارة ودى اول مرة في حياتى اتكلم معاك وهو انا لو سارة وجاية اقابلك هنكر ليه
ياسين :مش عارف مانا بسألك اهو بتنكرى ليه
اسيل وهى بتقوم :لا كده كتير انا همشي وانت استنى سارة بتاعتك دى
ياسين وهو بيقوم :انتى رايحة فين
اسيل :لو خرجت ورايا هصوت والم عليك الناس فى الشارع ياكلوك علقة موت انا بحذرك خليك مكانك احسنلك
بعد اسبوعين
ياسين :ممكن اقعد
اسيل :مش معقول انت لسه مفكرنى سارة
ياسين :لأ انا عارف انك مش سارة اصلا مفيش سارة
اسيل :اصلا مفيش سارة يعنى اللي حصل ده كله كان حوار وانت بتشتغلنى طيب بص بقي مش هتستفاد حاجة لأن اولا الاسلوب الرخيص ده مش بيبهرنى خالص بالعكس ثانيا انا اصلا مخطوبة وخطيبي زمانه جاى فاحسنلك تقوم
ياسين :مش هيجى اكمل خطيبك مش هيجى
اسيل باستغراب :انت عرفت اسمه منين
ياسين :مش ده المهم المهم انه مش هيجى والاهم انه مش هيكمل معاكى وهيسيبك
اسيل :هيسبنى
ياسين :اه هيسيبك لانه مش بيحبك هو بيحب امل
اسيل :اكمل بيعرف واحدة عليا
ياسين :لو خدناها بالاقدم يبقي هو بيعرفك انتى عليها
اسيل :وانا ايه يثبتلي ان كلامك صحيح
ياسين :اكمل لما بيجبلك هدية قبلها بيكون جايب لامل نفس الهدية سلسلة انفينتى اللي جبهالك في الفالنتين جابلها اختها وادهالها قبلك حتى الساعة اللي جبهالك فى عيد ميلادك برضه جبلها زيها حتى نفس اللون اليوم اللي بيقابلك فيه هنا لازم يقابلها هى كمان فيه وفي ايام بيقابلها ومش بيقابلك يعنى بيقابلها هى اكتر منك لسه مش مصدقانى
اسيل :اه لسه مش مصدقاك
ياسين :اكمل كل مرة بتيجو فيها هنا بيسيبك ويدخل الحمام عارفة ليه لأن امل بتيجى وتبص عليكم من بره وهو بيدخل يكلمها في الموبايل ويهديها لانه بيحبها وهى بتحبه بيحبها هى وهيسيبك انا عايز مصلحتك سيبيه انتى قبل ما هو يسيبك
اسيل :وعرفت منين بقي انه هيسبنى
ياسين :هو جه قبلك كان هنا من شوية وكان مستنيكى بس جاله تليفون ان امل حاولت تنتحر وهو جرى قام مشي هى خلاص جابت اخرها وهو بقي لازم يختار وهيختارها هى لانه بيحبها
اسيل :وخطبنى ليه وهو بيحبها ومش بيحبنى
ياسين :مش عارف بس ما انتى كمان اتخطبتيله وانتى مش بتحبيه
اسيل بصدمة :انت مين وتعرف كل ده منين انت..انت تعرف اكمل صاحبه يعنى
ياسين :لا انا اعرفه ولا هو يعرفنى
اسيل :امال ازاى عارف كل ده ازاى
ياسين :مش مهم المهم انتى مصدقانى
اسيل :مش عارفة ..انت رايح فين
ياسين :همشي معنديش حاجة تانية اقولها وانتى القرار قرارك
تانى يوم
اكمل :اسف انى مجتش امبارح
اسيل :ايه ده هو انت مجتش مش جيت ومشيت قبل ما انا اجى
اكمل :انتى عرفتى منين ..مش مهم المهم انا عايز اتكلم معاكى
اسيل :اتكلم
اكمل :احنا مش هينفع نكمل مع بعض
اسيل :معاك حق انا كنت جاية اقولك نفس الكلام
اكمل :انتى انسانة كويسة بس احنا مننفعش لبعض
اسيل :مش محتاج تقول الكلمتين دول كده كده انا جاية وانا ناوية اسيبك بس عندى سؤال وعايزاك تجوابه بصراحة
انت خطبتنى ليه
اكمل :علشان بابا اصر انى اخطبك علشان الشراكة اللي بينه وبين والدك
اسيل :وانت سمعت كلامه ومدافعتش عن حبك
اكمل بصدمة :مدافعتش عن حبى انتى..انتى قصدك ايه
اسيل وهى بتحط صندوق حطت فيها هداياه ليها والشبكة كمان :دى الشبكة وهداياك اديها لامل وقولها معلش بقى هيبقي عندها من كل حاجة اتنين لان الحاجات دى متلزمنيش لا هى ولا صاحبها
اكمل :اسيل انا..
اسيل وهى بتكب كوباية المياه فى وشه :انت انسان جبان وضعيف وانا ميشرفنيش اتجوز واحد زيك ويا ريت مشوفش وشك تانى في حياتى
بعد اسبوع
ياسين :عالي اوى اوى الشغل اللي عملتيه في اكمل ده لأ خدتى حقك تالت ومتلت
اسيل :انت تانى
ياسين :كده برضه بدل ما تشكرينى مضايقة انك شوفتينى
اسيل :اشكرك علي حاجة مش عارفة انت عملتها ليه
ياسين :عملت كده علشانك علشان انتى متستاهليش ان هو اللي يسيبك ولا تستاهلي انه يكون خاطبك بس بيحب واحدة غيرك كان لازم اخليكى تسيبيه قبل ما يسيبك اكمل مش شخص وحش ولا امل كمان بس اوقات الظروف بتجبرنا
نتصرف غلط ونأذى ناس ملهمش ذنب
اسيل :طبعا بتبررله ما انت راجل زيه وكلكم عينيكم زايغة وفارغة
ياسين وهو بيبصلها من فوقها لتحتها :مش فكرة زوغان عين لأن لو كده مكنش اختار امل لأنك احلي منها بكتير لأ الصراحة احلي بكتير اوى
اسيل وهو بتدلق عصير المانجا فى وشه :انت انسان قليل الادب
ياسين وهو بيمسح وشه بالمناديل :يعنى تدلقي عليه هو مياه هتنشف بسرعة في الحر اللي احنا فيه ده وتحمينى انا بعصير المانجا كده مش عدل علي فكرة
اسيل :انت بتهزر مش هتعتذر عن اللي قولته
ياسين :اعتذر ليه وانتى اخدتى حقك منى وكمان انا مغلطتش انا قلت حقيقة
اسيل :انا غلطانة انى قاعدة معاك ومش هاجى الكافيه ده تانى
ياسين :هتيجى
اسيل :وهاجى ليه بقي ان شاء الله
ياسين :هتيجى علشانى هتيجى لأنك محتاجانى
اسيل بسخرية :انا محتاجاك انت
ياسين :اه محتاجانى ماضيكى كان ناقصه وجودى وحاضرك هيبقى احلي بيا ومستقبلك مينفعش من غيرى
تسيل وهى بتقوم :انت انسان مغرور ومجنون وعندك جنون عظمة روح اتعالج
ياسين :هستناكى متتأخريش عليا
اسيل وهى بتمشى ناحية الباب :مجنون والله العظيم مجنون
ياسين :اسيل
اسيل وهى بتبصله :يا نعم
ياسين :انا كمان محتاجلك مش انتى بس اللي محتاجانى
ومشيت وسيبته فضلت شهر عاملة نفسي نسياه وناسيه اللي قاله بس الحقيقة انى مش ناسياه ولا حاجة خصوصا بصته ليا وهو بيقولي انه محتاجنى فضلت شهر بكابر وبعاند خصوصا انه اتحدانى وبيتكلم بثقة انى مش بس هروح الكافية لأ هروح علشانه هو
انا بحب الكافية ده اوى برتاح فيه اول مرة روحته مع اكمل بس بعد كده بقيت بروحه حتى لو مش هقابل اكمل فيه
الديكور بتاعه عبقرى علي كل حيطة راسم فصل من الفصول الاربعة وفي السقف في حاجات كريستال حلوة اوى بالليل بتلمع وبتعكس اضواء الكافية بتحسسنى كأنى شايفة السما
بحس براحة وانا هناك كمان الخدمة فوق الممتازة اللي بيشتغلو هناك كتير علشان ميتأخروش علي الزباين بأسرع وقت بيجيلي اللي بطلبه ودى حاجة حلوة بالنسبالي لأنى بكره الانتظار
فضلت شهر مبروحش علشان مشوفوش مع انى كنت عايزة اروح وبصراحة كمان كنت عايزة اشوفه وده ضايقنى من نفسي وعصبنى لأنه كده هو معاه حق
فضلت شهر بكابر وبعدين لقيت رجلى وخدانى لهناك وقفت قدام الكافية افتكرت شكله وهو بيقولي هستناكى متتأخريش عليا فابتسمت وافتكرت شكله وهو بيقولى بكل ثقة هتيجى علشانى هتيجى لأنك محتاجانى لقتنى بمشي بسرعة ومدخلتش بس بعد يومين رجعت تانى ودخلت بسرعة قبل ما اغير رأيى ودخلت قعدت وبعد اقل من دقيقة لقيته جه وقعد قدامى
ياسين بابتسامة :اتأخرتى عليا اوى بس المهم انك جيتى
اسيل :اتأخرت علي ايه هو احنا كان بنا ميعاد وانا معرفش كمان انا بحب الكافية ده وبجى كتير من قبل ما اشوفك اصلا
ياسين :عارف
اسيل :ومش جاية علشانك اتمنى تفهم ده
ياسين :بجد مش جاية علشانى ولما جيتى من يومين ومشيتى من غير ما تدخلى مكنش برضه علشانى
اسيل :انت عايش هنا ولا ايه مبتروحش فى حتة تانية
ياسين وهو بيضحك :واروح ليه واسيب الكافية بتاعى
اسيل :الكافية بتاعك...انت صاحب المكان ده
ياسين :ده الكافية بتاعى او بمعنى ادق ده العالم بتاعى
اسيل :وعلشان كده سميته my world
ياسين :اه لانه فعلا العالم بتاعى انا اللى اخترت كل حاجة هنا الديكور بتاعى انا اللي مصممه والترابيزات والكراسي انا اللي مختارهم حتى الاطباق والكاسات اللي بيتقدم فيها المشروبات انا اللي مختارها
اسيل :انت مهندس ديكور
ياسين :كنت
اسيل :وبطلت ليه
ياسين :مكنتش مبسوط بشغلى
اسيل :سيبته علشان بس مكنتش مبسوط بيه
ياسين :اه هو ده مش سبب كافى
اسيل :اه..لا..مش عارفة بس بيتهيألى قرار زى ده محتاج شجاعة
ياسين :طب ما انا شجاع
اسيل :لا انت مغرور بكلمك بالامانة يعنى
ياسين وهو بيضحك :شكرا شكرا انا جعان تاكلى معايا
اسيل :اموت واعرف سر الثقة والبساطة اللي بتتكلم بيها معايا دى هو احنا متربين سوا وانا ناسية
ياسين :لأ انا مكنتش موجود فى اللي فات بس هبقي موجود فى اللي جاى
اسيل :انت بتجيب الكلام ده منين ده مش كلام اسطوانات يبقي بتجيب كلامك ده منين
ياسين :انا مبعرفش اقول اسطونات لو مش حاسس الحاجة مبقولهاش
اسيل :يعنى عايز تغهمنى ان كلامك ده طالع من قلبك
ياسين :اه وانتى مصدقانى وعارفة انى مبكدبش
اسيل :انا جعانة طبعا مش محتاجة اقولك هاكل ايه لأنك عارف
ياسين وهو بيضحك :بالظبط كده ابتديتى تفهمينى
اسيل :انت اسمك ايه انا لحد دلوقتى معرفش اسمك
ياسين :انا ياسين
بعد شهر
ياسين بقلق :اخيرا جيتى بقالك اسبوع مبتجيش قلقتينى عليكى
اسيل بحزن :اوحش حاجة انى مبيقلقش عليا غيرك وانا جيت علشان عارفة انك اكيد قلقت
ياسين :حصل ايه
اسيل :محصلش حاجة غير العادى انا بس اللى غبية ومبتعودش علي العادى ده للاسف
ياسين :وطبعا لو سألتك برضه كالعادة مش هتحكيلي مش عارف هتطمنيلي امتى افتحى موبايلك وهاتيه
اسيل وهى بتكتب الباسورد وبتفتح الموبايل وبتديهوله :عايزه ليه
ياسين :انا رنيت على نفسي ده رقمى سجليه
طول الاسبوع اللي فات قلقان عليكى ومش عارف اوصلك وحتى معييش رقم موبايلك
اسيل :واديه بقي معاك كمان هو خلاص بقي اساسي اجى الكافيه يومين فى الاسبوع
ياسين :والله لو عليا انا عايزك تيجى الاسبوع كله تيجى نخرج
اسيل :هنروح فين
ياسين :مش مهم المهم انك موافقة تخرجى معايا
اسيل :موافقة يا ياسين انا مبخفش منك
ياسين :تمام سيبى عربيتك هنخرج بعربيتى وبعدين هرجعك لعربيتك
بعد ساعة
اسيل :البرج اشمعنى جبتنا البرج
ياسين :المنظر حلو من فوق وكل حاجة صغيرة وبعيدة
افردى ايدك الاتنين كده وكأنك هتطيرى
اسيل :ايه ناوى تعمل معايا تايتانيك انا هفرم رجلك لو فكرت مجرد تفكير انك تعملها
ياسين :هو انتى مينفعش تسمعى الكلام من غير مقاوحة كمان لا يا ستى مش هعمل تايتانيك ولا حاجة انا مش مستغنى عن رجلى
اسيل وهى بتفرد ايديها :وادينى عملت زى ما طلبت منى عايز ايه بقي
ياسين :خدى نفس جامد وطلعيه وفكرى في ان اي حاجة مضايقاكى دلوقتى بكرة تصغر لما يعدى عليها وقت هتصغر هتبقي زى الحاجات اللي احنا شايفنها دى صغيرة وبعيدة
اسيل :انت متأكد انك كنت مهندس ديكور مش دكتور نفسي
ياسين وهو بيضحك :اه متأكد بقيتى احسن
اسيل :اه شوية
بعد اسبوع
اسيل :لا خلاص انا لبست اهو وهطلب اوبر علشان اروح الفرح
ياسين :هتطلبى اوبر ليه
اسيل :مبحبش اسوق بالليل
ياسين :خلاص انا هاجى اوديكى ابعتيلي عنوانك
اسيل :مش مستاهلة يا ياسين
ياسين :لا طبعا مستاهلة سيادتك لابسة فستان سواريه عايزانى اسيبك تروحى مع حد متعرفيهوش لأ وكمان اكيد هترجعى في اوبر زى ما روحتى اسيل انجزى وابعتيلي اللوكيشن يلا
اسيل :حاضر
بعد ساعة
اسيل :مش هتدخل معايا
ياسين :معرفش حد جوا كمان مش لابس حاجة تليق والاهم بقي لو سألوكى عنى هتقولي مين
اسيل :مش لازم تكون تعرف حد كفاية انك تعرفنى كمان مش مهم ماله لبسك حلو حتى لو مش فورمال يعنى ولو سألونى هقول اننا اصحاب
ياسين :بس احنا مش اصحاب يا اسيل
اسيل :امال احنا ايه
ياسين :متسأليش سؤال انتى خايفة تعرفى اجابته ويلا علشان كده هتتاخرى علي فرح صاحبتك لما تخلصى رنى عليا علشان اجى اخدك
اسيل وهى بتفتح باب العربية :خلاص ماشي
ياسين :خلى بالك من نفسك وانتى زى القمر كده
اسيل وهى بتقفل الباب تانى :بص انا هدخل اباركلها واسلم عليها بس ماشي ربع ساعة وهخرجلك خليك مستنينى متمشيش
ياسين بابتسامة :خلاص هستناكى متتأخريش عليا
بعد ربع ساعة
اسيل :ها هتودينى فين
ياسين :تحبي تروحى فين
اسيل :اى مكان بس مش هنمشي كتير انا لابسة كعب ومش حاسة برجلى
ياسين :عارف انك بتكرهيه
اسيل :عرفت منين
ياسين :لأنك متلبسيهوش كتير لما كنتى بتبقي مع اكمل كنتى بتلبسيه وبتلبسي لبس فورمال شيك ومقيدك انما لما بتيجى لوحدك بتبقى لابسة جذمة فلات ولبسك كاجوال وبسيط ودايما فيه ورد
اسيل :فيه ورد
ياسين :اه ياما الفستان فيه ورد ياما البلوزة فيها ورد ياما الجيبة فيها ورد ولو كان الطقم مفيهوش ورد بيبقي حجابك فيه ورد ياهو يا الشنطة اللي انتى لبساها المهم ان لازم يكون في لبسك حاجة فيها ورد
اسيل :انا بحب الورد وبتبقي صدفة ان لما باجى اشترى هدوم دايما بتعجبنى الحاجات اللي فيها ورد بتاخد عينى مجرد ما بشوفها بتعجبنى فبشتريها
ياسين :وهى بتليق عليكى
اسيل :انت بتركز في حاجات غريبة تفاصيل بسيطة اوى ممكن تعدى علي اي حد وميهتمش بيها بس انت لأ بتهتم بيها وبتربطها ببعض فتكون حاجة كبيرة دى موهبة وحاجة تميزك عن غيرك علي فكرة
ياسين :حاجات كتير اوى تقدرى تعرفيها عن الناس ومش لازم من كلامهم ممكن من حركات ايديهم ضحكهم ودموعهم هزة رجليهم ابتسامتهم كمان واكيد عيونهم العيون مراية القلب ممكن اللسان يكدب بس العيون لأ
اسيل :وانت بتركز في كل ده
ياسين :اه تقدرى تقولي انا فتحت الكافية علشان اتفرج فيه علي الناس واعرفهم بس من بعيد لبعيد مبحاولش اقتحم حد ولا اتدخل في حاجة متخصنيش
اسيل :وبالنسبة لحياتى ايه ده مكنش اقتحام حضرتك وتدخل في امورى الشخصية
ياسين وهو بيضحك :انتى مش زى اي حد يا اسيل بالنسبالى كمان انا مكنتش بتدخل انا كنت بنقذك من موقف متستاهليش انك تتحطى فيه
اسيل :واول مرة اتكلمت فيها معايا ساعة ما كنت مفكرنى سارة اللي هو اتضح انه مقلب ومفيش حد اسمه سارة اصلا
ياسين :كنت عايز اتكلم معاكى المشكلة انك من يوم ما جيتى وانتى مخطوبة لأكمل حاجة كده متخليش فيه امل ان اي حاجة تحصل بنا بس انا لما لقيت ان الحكاية فيها طرف تالت اللي هو امل طرف اكمل بيحبه ومتمسك بيه وان انتى نفسك مبتحبيهوش حسيت ان في فرصة لو مش دلوقتى فبعدين اول مرة اتكلمت معاكى كنت ناوى احذرك من ان اكمل بيعرف واحدة غيرك بس الصراحة مكنتش حاسس ان ده حقي لانى كده بفضحه وهو لسه مختارش واحدة فيكم وانا معرفش ايه ظروفه ايه اللي حطه فى الوضع ده يمكن عنده مبرراته فمنعت نفسي اتكلم واقولك بس مقدرتش امنع نفسي انى اتكلم معاكى كان نفسي حوار يجمعنا ايا كان الكلام بنا هيكون ايه فجه في دماغى حوار سارة ده ومن غير تردد نفذته
اسيل :انا بحب الكافية بتاعك اوى بحس فيه براحة وعلشان كده كنت بجيه حتى وانا لوحدى مش لازم مع اكمل وعلشان كده برضه دلقت علي اكمل المياه انا مكنتش مضايقة منه فعملت كده علشان انتقم لأ انا كنت عايزاه هو ميجيش تانى لأنى مكنتش عايزة اجى واشوفه هو وامل ولا كنت عايزة ابطل اجى الكافية فجتلي فكرة دلق المياه دى علشان يتحرج يجى المكان تانى فكرة مجنونة وانا من غير تردد نفذتها
ياسين وهو بيضحك :يعنى مش انا لوحدى اللي بيجيلي افكار مجنونة
اسيل :لأ مش لوحدك
بعد اسبوعين
ياسين :وانتى ناوية علي ايه هترفضيه
اسيل :مش عارفة انا لسه بفكر مش يمكن يكون الانسان المناسب
ياسين :اسيل انتى بتستعبطى صح ولا بتجيبي اخرى
انا مش عايز اضغط عليكى ولا اجبرك تاخدى قرار تحت تهديد انك لو مخدتيهوش انا مش هفضل في حياتك عايزك تاخديه بكامل ارادتك وان مهما احتاجتى وقت علشان تاخديه انا هفضل جنبك انا مبضغطش عليكى وحقي عليكى ان انتى كمان متحرقيش دمى وتضغطى عليا بالشكل ده انا انسان وليا طاقة تحمل ممكن تخلص يا ريت تفتكرى ده كويس
اسيل :انا اسفة والله اسفة انا اصلا قلت لبابا انى مش موافقة
ياسين :وقولتى اللي قولتيه ده علشان اغير صح
اسيل :هو لا..هو اه..بصراحة مش عارفة
ياسين :مينفعش تقولي حاجات علشان يطلع منى ردود افعال انتى مش هتسبينى اتصرف علي اساسها يا اسيل ولا انتى نفسك هتتصرفي علي اساسها حب غيرة اشتياق دى حاجات مينفعش اعبر عنها وخلاص لازم يكون ده الاساس اللي هنتعامل مع بعض عليه ولازم كمان تكونى مستعدة تبادلينى التعبير عن المشاعر دى
انما عايزانى اعبر عنها علشان ترضى غرورك دى كده انانية كبيرة منك
اسيل :انت صح معاك حق انا اسفة
انت عمرك حبيت قبل كده يا ياسين
ياسين :اه حبيت واعجبت كمان
انا كنت خاطب قبل كده
اسيل :كنت خاطب وايه اللي حصل
ياسين :هى فسخت الخطوبة
اسيل :ليه
ياسين :قالت انها مش مرتاحة ومش مبسوطة ومبقتش متحملة
اسيل :وانت سيبتها
ياسين :مدام هى عايزة تمشي يبقي تمشي يا اسيل مش هجبرها تفضل معايا لو هى مش عايزة حتى لو روحى فيها
اسيل :ولسه بتحبها
ياسين :لأ بطلت فكرة انها سابتنى دى كفيلة تمسح حبها من جوايا بأستيكة كأنه مكنش
اسيل :انتو سيبتو بعض من قد ايه
ياسين :سنتين
اسيل :وحبيت بعدها
ياسين :اسيل مش اتفقنا انك مش هتستعبطى ولا غرورك لازم يدخل
اسيل :يييييي انا اسفة خلاص بقي متقفش عالواحدة مانا في الاول وفى الاخر بنت يعنى ولازم استعبط دى حاجة في جيناتنا يا ابنى
ياسين وهو بيضحك :ماشي مدام حاجة في جيناتكم طيب انتى حبيتى قبل كده
اسيل :اه مرة
ياسين :وايه اللي حصل
اسيل :طلع اسوء ما فيا خلانى بقيت انانية اوى وكنت كل ما ابعد يقرب ولما اقرب يبعد هو كان وهم مش حب
ياسين :وحصل ايه في الاخر
اسيل :بعدت عنه واتخطبت لأكمل
ياسين :ليه قبلتى تتخطبيله لما انتى مش بتحبيه
اسيل :مش هقولك بابا أجبرنى علشان هو ابن شريكه انا كنت اقدر ارفض بس انا وافقت
في حاجة غبية جدا كده مش الرجالة بس اللي بيعملوها للأسف احنا كمان بنعملها
ياسين :حاجة ايه دى
اسيل :فكرة ان وداونى بالتى كانت هى الداء وان لا يفل الحديد إلا الحديد انا قبلت اتخطب لاكمل علشان انسى عمر علشان مبقاش لوحدى فافضل افكر فيه
ياسين :حاجة غبية فعلا وفيها ظلم للطرف التانى
اسيل :عارفة وعارفة انى غلطت بس اكمل مكنش ملاك يعنى وغلط في حقى هو كمان يعنى احنا كده خالصين
ياسين :معاكى حق..ثانية واحدة انتى بتعملي معايا زى ما عملتى مع اكمل بتستغلينى علشان تنسيه
اسيل :انساه ايه بس يا ياسين ده انا زعلت على اللاب توب بتاعى لما اتكسر اكتر ما زعلت علي اكمل
امال لو مكنتش شاهد علي الموضوع ومتابعه من الاول
كمان انت مش زى اكمل اكمل كان اختيار آمن ليا انما انت خطر وخطر كبير كمان
ياسين :انا خطر
اسيل :اه كمان سعادتك ناسي ان انت اللي اقتحمت حياتى زى المدفع ناسي افكرك يعنى
ياسين :لا مش ناسي
بعد تلت اسابيع
اسيل :ياسين قلقتنى عليك بقالك اسبوعين قافل موبايلك وروحت الكافية خمس مرات ملقتكش
ياسين :بصي من بلكونة اوضتك
اسيل :بلكونة اوضتى انت تحت بلكونة اوضتى
ياسين :اه وبصي بقى
اسيل :حاضر ثانية واحدة
ياسين :وحشتينى اوى حاسس انى مشوفتكيش بقالي سنين
اسيل :ياسين انت كويس انا مش هينفع انزلك الوقت اتأخر
ياسين :عارف انا كنت جاى اشوفك وماشي على طول
تانى يوم
ياسين :اسيل ايه اللى جابك انتى مبتجيش الكافية النهاردة
اسيل :جاية علشانك يلا علشان هنخرج
ياسين :بس انا مش عايز اخرج
اسيل :وانا عايزة اخرج عمرى ما روحت شارع المعز في حياتى وحبا اروحه معاك علشان خاطرى يا ياسين يلا بقي
ياسين :خلاص ماشي
فى شارع المعز
اسيل :هات مفاتيحك
ياسين :خدى بس ليه
اسيل وهى بتحط فيها ميدالية فضة مكتوب عليا اسمه :دى هدية منى ليك علشان تفتكرنى دايما اوعى تشيلها من مفاتيحك واوعى تضيعها اتفقنا
ياسين :اتفقنا
اسيل :شكلك مضايق ومحبط
ياسين :شوية
اسيل :اقولك نكتة
ياسين :نكتة
اسيل :اه نكتة
ياسين :قولي
اسيل :بص يا سيدى مرة اتنين مساطيل
راكبين عربية وكان قدامهم شجرة واحد فيهم فضل يصرخ فى التانى حاسب الشجرة حاسب الشجرة حاسب الشجرة المهم لبسو في الشجرة فاللي كان بيصرخ فيه قاله بقالي نص ساعة بقولك حاسب الشجرة حاسب الشجرة وانت ولا هنا راح التانى رد عليه وقاله بقالى نص ساعة بقولك انت اللي سايق انت اللي سايق
مضحكتكش مع انها ضحكتنى لما سمعتها طب استنى اقولك واحدة تانية مرة واحد غبى كان ماشي في الشارع شاف قشرة موز في الارض قال ييييي هقع تانى
مضحكتكش برضه طيب بلاش نكت اقولك فزورة
ياسين :قولى
اسيل :حمار ونملة نسيو المفتاح جوا الاوضة والباب مقفول مين يدخل من تحت الباب يجيبه
ياسين :النملة طبعا
اسيل وهى بتضحك :ما هو ده كان رأى الحمار برضه
ياسين :حمار يا اسيل انا حمار
اسيل :عادى يا ياسين دى فزورة اضحك بقى شكلك مش حلو وانت مضايق كده طيب اضحك وانا هكرمش خمسين جنية واديهالك يلا مش خسارة فيك
ياسين وهو بيضحك :خمسين جنية بحالها ايه التضحيات الجامدة دى
بعد اسبوع
ياسين :اتفضلى
اسيل :ايه دى
ياسين :هدية مش هتفتحيها
اسيل وهى بتفتحها :الله حلوة اوى بس ليه مكتوب ضوء القمر
ياسين :ما هو ده معنى اسمك اسيل يعنى ضوء القمر فكرت اجبلك هدية بس كنت عايزها تكون مميزة فكرت وفى الاخر قررت اجبلك اسمك محفور بالخشب ومحفور جنبه وردة بما انك بتحبي الورد علقيها في اوضتك علشان تشوفيها دايما
اسيل بابتسامة :حاضر دى احلي هدية جاتلى في حياتى
بعد اسبوع
اسيل :احب اعرفك بأهم شخص في حياتى اياد
اياد :بومبا اقوله يا اونكل
ياسين وهو بيمدله ايده :لا يا حبيبي قولي يا ياسين بس
اياد :ماشى يا ياسين انا اياد
ياسين :ده اخوكى شبهك اوى
اسيل :اه اخويا الوحيد
ياسين :اياد باشا ايه رايك نخرج بدل قعدة الكافية الخنيقة دى
اياد بسعادة :موافق
ياسين :تحب نروح فين
اياد :الملاهى ماشي يا بومبا
اسيل :ماشي يا حبيبى نروح الملاهى
فى الملاهى
اياد :ياسين تعالي ندخل بيت الرعب بومبا بتخاف تدخله معايا ومش بتسبنى ادخله لوحدى
ياسين :خلاص يا وحش انا هدخله معاك
اسيل :وانا هستناكم هنا
بعد نص ساعة
اسيل :اياد شكله مبسوط اوى وهو بيلعب شكرا يا ياسين
ياسين :هو ليه بيقولك يا بومبا
اسيل :اتفرج علي الاسد الملك من سنة وحبه جدا وقرر ان انا وهو نبقي تيمون وبومبا وبما انه بيحب تيمون جدا وبيضحكه جدا بقي هو تيمون وانا بومبا ومبيندهليش غير بيه لما حاولت امنعه يقولي كده قدام الناس اتضايق فبقيت اسيبه يقولها براحته
ياسين :شكله بيحبك ومتعلق بيكى اوى
اسيل :وانا كمان انا وهو ملناش غير بعض اياد احلي حاجة في دنيتى تقدر تقول كده انه السبب اللي انا عايشة علشانه
ياسين :بما انك عرفتينى علي اهم شخص في حياتك انا كمان عايز اعرفك علي اهم شخص فى حياتى امى ايه رايك
اسيل :موافقة وانا كمان عايزة اتعرف عليها
تانى يوم
ياسين :امى مصرة تعزمك علي الغدا عندنا ومرضيتش تقابلك في الكافية هى مبتحبش الاكل غير في البيت
اسيل :امممم عندكم في البيت مش عارفة اصل..
ياسين قاطعها :تقدرى تجيبي اياد معاكى لو عايزة متخافيش يا اسيل
اسيل :قولتلك قبل كده انا مبخفش منك بس فكرة اجى عندكم البيت دى موترانى شوية
ياسين :لا متتوتريش امى طيبة اوى هتحبيها اول ما تشوفيها كمان هى عايزة تشوفك من زمان وطلبت منى اقابلكم ببعض انا اللي كنت بأجل علشان مكنتش حاسس انك هتوافقي
اسيل :هى عزمانى امتى
ياسين :بكرة
اسيل :بكرة بسرعة كده
ياسين :بقولك طلبت منى كتير وانا اللي كنت بأجل فمصدقت قولتها انك موافقة كمان انتى عندك حاجة بكرة مشغولة
اسيل :لا
ياسين :يبقي خلاص بكرة
اسيل :تمام بكرة وربنا يستر
ياسين وهو بيضحك :محسسانى انك هتحاربي
اسيل :متوترة انا متوترة اوى يا ياسين
ياسين :مش مستاهلة كل التوتر ده انا متأكد انى امى هتحبك لما تشوفك وانكم هتاخدو علي بعض بسرعة
اسيل :انت شايف كده
ياسين :انا متأكد من كده متقلقيش
تانى يوم
ياسين :هو انتى محجبة بقالك قد ايه
اسيل :تلت سنين
ياسين :واتحجبتى ليه
اسيل :كنت بضايق من بصات الناس ليا واوقات كتير كنت بتخانق
مع الوقت بدأت اغير في لبسي بحيث يكون محتشم اكتر وفي النهاية اتحجبت وبقيت مرتاحة اكتر حاسة انى غالية ومش اي حد يشوفنى كمان بصات الناس ليا قلت كتير بس اهم حاجة ان انا نفسي حاسة انى مرتاحة
ياسين :صح اهم حاجة تكونى مرتاحة
اسيل :انت داخل بينا فين
ياسين :بيتنا احنا ساكنين هنا
اسيل :بيتنا قول فيلتنا قصرنا انما متتواضعش وتقول بيتنا انت عايش هنا بجد
ياسين وهو بيضحك :اه انتى شكلك مصدوم اوى كده ليه
اسيل :ميبانش عليك
ياسين :اشمعنى يعنى
اسيل :عربيتك الكابورليه دى موديلها قديم نزل بعد كده موديلات تانية كتير احدث والكافية بتاعك كمان ده انت كده تقدر تفتح سلسلة كافيهات ومطاعم
ياسين وهو بيضحك :لأ انا كفاية عليا واحد وعربيتى دى كانت اخر هدية ليا من بابا قبل ما يموت وعلشان كده مبغيرهاش ابدا كمان انتى بتفهمى في العربيات
اسيل :خالى عنده اجنس عربيات وانا بشتغل معاه فيه
ياسين :مقولتليش قبل كده
اسيل :مجتش فرصة كمان ما انت مقولتليش انك ثرى الثراء الفاحش ده
ياسين :محستش انى محتاج اقول كمان احنا مش هننزل بقالنا كتير بنتكلم في العربية وماما مستنيانا
اسيل :ننزل فين انت عايزنى انزل وانا كده رجعنى البيت اغير هدومى والبس حاجة مناسبة
ياسين :وماله لبسك ما هو حلو ومناسب
اسيل :حلو ايه ومناسب ايه بس يا ياسين انت بتهزر انا لابسة كاجوال جدا طيب بلاش ترجعنى البيت لو ده هيأخرنا علي مامتك ودينى اي مول اشترى هدوم من هناك
ياسين :لا هرجعك البيت ولا هوديكى مول انتى لبسك مناسب واكتر من مناسب كمان اسيل يلا علشان اتاخرنا علي امى
اسيل :انت مصر يعنى
ياسين :ايوه مصر
اسيل :خلاص ماشي
ياسمين :ياه واخيرا شوفتك يا اسيل بقالي كتير نفسي اشوفك من كتر كلام ياسين عنك
اسيل :والله يا طنط مقاليش قبل كده ومجرد ما قالي وافقت علي طول انا سعيدة جدا ان جاتلي الفرصة اتعرف علي حضرتك
ياسمين :روح قولهم يجهزو السفرة وانا هاخد اسيل افرجها علي الجنينة
ياسين :عايزة تستفردى بالبت يا ياسمينة من اولها كده
ياسمين وهى بتضحك :اه هنتكلم كلام ستات انت ملكش فيه ويلا اسمع كلامى وروح قولهم يجهزو السفرة
ياسين :اوامرك يا سيدتى
فى الجنينة
ياسمين :اسيل انتى ايه علاقتك بياسين عايزة منه ايه
اسيل :انا...انا مش عايزه منه حاجة..احنا..احنا اصحاب
ياسمين :بس ابنى مش معتبرك كده..مش شايفكم زى ما انتى بتقولي كده لو مش شايفاه زى ما هو شايفك يبقي ابعدى عنه ياسين مريض يا اسيل
اسيل :مريض ..مريض ازاى يعنى
ياسمين :مريض اكتئاب حالته اسمها الطبى اضطراب ثنائى القطب او الاكتئاب الجنونى
اسيل بصدمة :ياسين عنده اكتئاب ازاي يعنى ياسين ده اكتر حد عنده طاقة شوفته في حياتى ده ماشي يوزع طاقته علي كل اللي حواليه في الدنيا ده كل كلامه وافعاله مليانين طاقة كمان اكتئاب جنونى ايه ياسين ده اعقل شخص انا شوفته في حياتى ده ساعات بيفهمنى من قبل ما اتكلم حتى اكتئاب ايه بس ياسين ده اكتر حد بيضحكنى في حياتى انا كنت نسيت يعنى ايه ضحك لحد ما قابلته
ياسمين :اعراض الاكتئاب اللي عند ياسين من ضنمها انه يكون في اوقات كتير مليان طاقة وعايز يعمل خمسمية الف حاجة في نفس الوقت واوقات تانية يكون مش عايز يعمل اي حاجة في حياته وممكن يفضل اسبوع واتنين مبيخرجش من اوضته بيعمل اي حاجة تيجى في دماغه مهما كانت مجنونة
المشكلة انه مش راضى يتعالج الاكتئاب ده جاله من بعد موت ابوه وهو رفض يروح لدكتور ولما انا تعبت من كتر خوفي عليه وافق وراحله بس شهر واحد وبطل يروحله
خطيبته سابته بسبب الاكتئاب ده مكنتش عارفة تتعامل معاه متحملتش تقلباته المزاجية
المصيبة ان الاكتئاب ده ممكن يوصل للانتحار وانا مش عايزة اخسره ده ابنى الوحيد انا مليش غيره في الدنيا
من ساعة ما عرفك وهو مبسوط ونوبات اكتئابه قلت كتير ويوم ما خدتيه وخرجتو وروحتو شارع المعز رجع الفرحة مش سايعاه ومبطلش كلام عن اليوم وعملتو فيه ايه وفرجنى علي صوركم يومها يجى مية مرة
انا ابن صاحبتى دكتور نفسي لما حكتله عنك قالي ان وجودك سلاح ذو حدين لأن زى ما وجودك مفرحه اوى كده غيابك هيضره وهيزود اكتئابه وممكن..ممكن يوصله للانتحار وعلشان كده انا بترجاكى يا بنتى لو مش شايفة ياسين زى ما هو شايفك يبقي ابعدى عنه لأن كل يوم زيادة بتقضيه معاه بيخليه يتعلق بيكى اكتر وبيخلي بعدك عنه اصعب واصعب
اسيل :وانا مش هبعد عنه يا طنط ابدا
ياسمين وهى بتعيط :يبقي ساعدينى ننقذه اقنعيه يتعالج هو رافض وانا خايفة اخسره والله هموت بحسرتى عليه
اسيل وهى بتحضنها :اهدى يا طنط مش هيحصل انا وانتى مش هنخسر ياسين ده وعد منى ليكى
ياسين :اسيبك مع امى ربع ساعة ارجع الاقيكى معيطاها كده
ياسمين وهى بتمسح دموعها :دى اسيل دى حبيبة قلبي
ياسين :اوبا بعتينى يا ماما علشانها ده انا لسه معرفك عليها من نص ساعة بس
ياسمين :حاسة انى اعرفها من زمان من كتر كلامك عنها هو انت بتتكلم معايا عن حاجة غيرها
ياسين :طيب انا بقول نروح ناكل بدل التسييح اللي انتى بتسيحهولي ده
بعد يومين
ياسين :انتى جايبانا المقابر ليه
اسيل :مش انت عرفتنى علي مامتك انا كمان عايزة اعرفك علي مامتى
ياسين :هى..هى ماتت
اسيل :انتحرت
ياسين :ليه
اسيل :ياه اجابته طويلة اوى السؤال ده بس انا هجاوبك عليه
امى كانت بتحب ابويا اوى بس هو محبهاش اتجوزها وكان بيخونها كتير هى كانت عارفة انه بتاع ستات بس قالت هغيره بحبي لما نتجوز ومقدرتش كان بيخونها وفضلت سنين متحملة وبعدين لما انا بقى عندى ستاشر سنة هى راحت عند خالي وكانت هتطلب الطلاق بابا رفض يطلقها وهى فضلت هناك اربع شهور وبعدين رجعت معاه البيت وبقت حامل في اياد بابا في الفترة دى مكنش بيخونها او يمكن كان بيخونها بس هى متعرفش المهم بعد ما خلفت اياد عرفت انه رجع يخونها فضلت متحملة سنة واتنين وتلاتة لحد ما اياد بقي عنده يجى تلت سنين وبعدين في مرة راحت لبابا الشركة
دخلت عليه المكتب شافته مع السكرتيرة طبعا دى مكنتش اول سكرتيرة ولا اول مرة هو يخونها بس كانت اول مرة هى تشوفه بعنيها جريت بسرعة ركبت عربيتها وساقتها باقصى سرعة ونطت بيها من فوق المقطم بابا مشي الموضوع انها معرفتش تتحكم في سرعة العربية بس لأ هى انتحرت مكنتش قادرة تعيش معاه ولا قادرة تعيش من غيره فموتت نفسها واتخلت عنى وعن اياد
انا عرفت اللي حصل ده من بابا بعد موتها جاله حمى وكان بيخترف بالكلام ده
وعادى بعد موتها بسنة رجع لحياته القديمة يعرف ستات كتير في اللي بيتجوزهم شهر ولا اتنين ويطلقو وفيه اللي بيعرفهم من غير جواز فاكر لما فضلت اسبوع مجيش ولما جيت كنت مضايقة ومخنوقة
ياسين :فاكر وحتى لما سألتك ايه اللي حصل قولتى انه محصلش حاجة غير العادى بس انتى مبتتعوديش علي العادى ده للأسف
اسيل :بابا كان اتجوز كالعادة بس المرة دى اتجوز واحدة اصغر منى
امى نهت حياتها واتخلت عنى وعن اياد علشان واحد بيغير الستات في حياته اكتر ما بيغير البدل بتاعته
ياسين :انتى مش مسامحاها
اسيل :انا مبكرهاش هى استحملت كتير وشافت كتير من ابويا بس هو كان اختيارها هى اللى اختارت تتجوزه وتخلف منه ليه تدفعنى انا واياد تمن اختيارها الغلط لوحدنا حتى مفضلتش معانا لأ سابتنا لوحدنا مع بابا نتحمل نتيجة حبها واختيارها للشخص الغلط مش قادرة اسامحها يا ياسين يمكن يجى يوم واقدر بس دلوقتى مش قادرة صدقنى حاولت ومقدرتش انا فكرت اسافر اكمل تعليم بره بس مقدرتش حسيت انى بكده هكون بتخلي عن اياد انا كمان زى ما هى اتخلت عنى وعنه بالنسبة لاياد انا كل حاجة في الدنيا ده تقريبا معندوش ذكريات مع ماما انتحرت وهو مكملش التلت سنين ملحقتش حتى تبنى ذكريات حلوة معاه يفتكرها بيها
ياسين :اكيد ده مكنش سهل عليها
اسيل وهى بتعيط :ولا سهل عليا دى سابتنى من غير ام يا ياسين اتخلت عن مسؤلياتها تجاهنا خلتنى بقيت لاياد الام والاخت والاب كمان لان وجود بابا زى عدمه سابتنى انا واياد ندفع تمن غلطها كانت سابته كانت عاشت علشانا انما لأ هى اختارت تموت نفسها وتسبنا احنا علشانه
ياسين :اهدى طيب انتى معاكى حق في كل كلمة بتقوليها بس خلاص هى ماتت ادعيلها بالرحمة يا اسيل
اسيل وهى بتعيط اكتر :بدعيلها يا ياسين والله بدعيلها هى كانت حنينة اوى وحرمتنا من حنيتها دى وسابتنا لبابا وقسوته
ياسين :هو انا ممكن احضنك
اسيل وهى بتسمح دموعها :لأ طبعا لانى وقتها هضربك بالقلم
ياسين :ليه
اسيل :علشان مينفعش بس لو اتجوزنا هيبقي ينفع
ياسين :معاكى حق..ثانية واحدة انتى قولتى لو ايه
اسيل :اتجوزنا
ياسين :انتى عايزانا نتجوز
اسيل :انت مش عايز
ياسين :مش عايز ايه بس انتى اتجننتى ده انا مش عايز حاجة تانية من الدنيا اصلا
اسيل :بس انا محتاجاك توعدنى بحاجة
ياسين :حاجة ايه
اسيل :انك هتعيش معايا وعلشانى انك مش هتعمل فيا اللي امى عملته
ياسين :اوعدك
اسيل :يعنى هتروح لدكتور نفسي
ياسين :انا مش مريض يا اسيل ولا مجنون
اسيل :انت اعقل واحد في الدنيا يا ياسين بس علشان خاطرى وافق
ياسين :اوافق علي ايه بس اروح لدكتور ليه علشان مزاجى بيتغير ما فصول السنة بتتغير وايام الاسبوع بتتغير والليل بيتغير ويجى بعده النهار كل حاجة في الدنيا بتتغير اشمعنا انا اللي مزاجى هيفضل ثابت
يعنى انتى مثلا حالتك النفسية ثابتة دايما مبتتغيرش
اسيل :لا بس
ياسين قاطعها :مبسش يا اسيل مبسش انا مبسوط من يوم ما دخلتى حياتى وانا مبسوط انا مش محتاج لدكتور نفسي انا مش محتاج غيرك مش محتاج ادوية وجودك ووجود امى كفاية انا مش هنتحر يا اسيل لو كنت هنتحر كنت عملتها لما ابويا مات ومدام اتحملت فراقه يبقي صدقينى هقدر اتحمل اي حاجة تانية تحصلى في الدنيا كمان انا عارف ان امى ملهاش غيرى والكافية والناس اللي شغالين فيه اللي بيصرف علي مراته وولاده واللي بتصرف علي اهلها واللي بيجيب فلوس جامعته واللي بيشتغل علشان يتجوز اللي بيحبها كل دول مسئولين منى وانا مقدرش اتخلي عنهم انا قد مسؤلياتى ومستحيل اضعف واتخلي عنها
اسيل :وانا كمان
ياسين :انتى كمان ايه
اسيل :مسئولة منك ومليش غيرك
ياسين بابتسامة شديدة :اهو الكلمتين اللي انتى قولتيهم دول خلو معنوياتى في السما شوفتى بقي انى مش محتاج لدكتور وان وجودك كفاية ها هقابل والدك امتى علشان اطلبك منه
اسيل :النهاردة هقوله واخدلك منه ميعاد
ياسين :تمام جدا انا بحبك بقالي كتير اوى نفسي اقولهالك واول مرة اقولهالك يبقى في المقابر
اسيل :انت كل حاجة فيك مختلفة يا ياسين وكل حاجة بتعملها بتكون مختلفة وليها طعم تانى اشمعنى دى يعنى اللي هتقولها بطريقة تقليدية
انا كمان بحبك يلا علشان متبقاش لوحدك اللي قولتها في المقابر
بعد شهرين
كمال :لا طبعا مش موافق اياد ايه اللي عايزاه يروح يعيش معاكى بعد ما تتجوزى
اسيل :انا مش فاهمة انت مش موافق ليه رفضك مفاجأنى الصراحة
كمال :ده ابنى يروح يعيش معاكى ليه
اسيل :ابنك اه قولتلي انت تعرف هو فى سنة كام ..عمل عملية المرارة امتى ده انت حتى متعرفش عمل عملية اللوز ولا لأ تعرف ايه عنه هيفرق معاك وجوده في ايه هتخلي بالك منه هتهتم بيه ولا هتخلي اللي بتتجوزهم كل تلت اربع شهور ياخدو بالهم منه مش هيعرفو دول ملهمش في التربية دول اخرهم انهم يتجوزو واحد قد ابوهم علشان فلوسه
كمال بغضب :انتى ازاى تكلمينى بالطريقة دى
اسيل :بابا انا اسفة متزعلش منى انا مش بتخانق مع حضرتك بس صدقنى انا عايزة اخد اياد معايا علشان مصلحته هو معايا هيكون مرتاح ده طفل عنده سبع سنين يا بابا ومحتاج حد يهتم بيه ويراعيه وانا هقدر اعمل كده طول عمره وانا بعمل كده وكل اللي عايزاه من حضرتك انك تسبنى افضل بعمل كده ارجوك يا بابا توافق ومهما حصل هو ابنك وانا بنتك وحضرتك تقدر تيجى تزورنا وقت ما تحب البيت بيتك ابقي تعالي زورنا يا بابا علشان جوزى وامه يعرفو ان ليا ضهر وانى مش لوحدى في الدنيا
كمال :ماشي يا اسيل ربنا يتتملك علي خير يا بنتى وانا مش هقطع لا بيكى ولا باخوكى انتو ولادى وانا معنديش في الدنيا اغلي منكم
واتجوزنا انا وياسين لما قولت لياسين ان لما نتجوز عايزة اياد يعيش معانا لانى مش هقدر اسيبه هو قالي ان لو مكنتش انا قولت كده كان هو اللي هيطلب منى ان اياد يجى يعيش معانا لأنه عارف احنا متعلقين ببعض ازاى
بعد جوازنا انا بحثت بنفسى علي النت وعلي المواقع الطبية عن الاكتئاب طلع انواعه كتير اوى واسبابه كمان
واندهشت لما عرفت انه ممكن يكون وراثي او انه ممكن يحصل بعد التعرض لصدمة شديدة زى ياسين لما فقد والده الله يرحمه
عرفت كمان حاجات كتير اوى عن حالة ياسين عرفت ان الدكتور النفسي كان هيديله محسنات للمزاج مش مضادات للاكتئاب بحثت كتير عن الحاجات الطبيعية اللي بتحسن المزاج
لقيت ان الاوميجا3 ليها دور كبير في تحسين المزاج ودى موجودة في حاجات كتير زى السمك فكنت بخلينا ناكل سمك كتير مرتين في الاسبوع وممكن تلاتة كمان
والقرفة وعلشان كده كنت بخلي ياسين يشربها كل يوم الصبح وكنت بشربها معاه علشان ميزهقش
والكاكاو السخن وده كنت مثبتاه لازم قبل ما ننام نشربه انا وهو وكنت بعمل كتير كيكة بالشيكولاتة علشانه
وعرفت ان الورد والروايح الحلوة ليها دور كبير في تحسين الحالة المزاجية وعلشان كده حطيت اصارى زرع ورد وريحان ومسك الليل ونعناع كمان في بلكونة اوضتنا وخليت ياسين يحطهم في الكافية واقنعته انها حاجة هتخلي الكافية ريحته حلوة ومنظره مريح للناس اللي بتجيه
النعناع ريحته ليها اثر عظيم في تحسين الحالة المزاجية
وعرفت كمان ان لازم ياكل اكل متوازن فيه جميع العناصر الغذائية لان اي نقص فيها من جسمه ممكن يزود احساسه بالاكتئاب
وبقيت انا وهو بنجرى كل يوم الصبح نص ساعة مع بعض لأن الرياضة ليها دور في تحسين الحالة المزاجية ومقاومة الاكتئاب
كمان قربت انا وهو من ربنا لأن دى كمان حاجة مهمة جدا التزمنا في الصلاة سوا لأن لا انا ولا هو كنا بنصلي وكمان بقي في ورد ثابت من القرءان بنقراه كل يوم مع بعض وبقينا بنروح ملاجئ للايتام سوا كتير وكفلنا اطفال كتير يتيمة
وكتير اوى كنت بكلمه عن قد ايه انا بحبه وحياتى احلي لانه فيها وان كان معاه حق لما قالي ان الماضى بتاعى كان ناقصه وجوده والحاضر احلي بيه وان المستقبل مينفعش من غيره الكلام الحلو بيحسن الحالة المزاجية جدا والافعال كمان كتير كنت بجيبله هدايا وكتير بنخرج سوا
كان بيجى عليه وقت ميبقاش عايز ياكل فيه كنت بطبخله بنفسي واقوله انى تعبت وانا بتعلم الاكلة دى لانى عارفة انه بيحبها وطبعا الابتزاز العاطفى ده كان بيجيب نتيجة وكان بياكل معانا
ولما كان بيضايق كنت بفضل معاه مبسيبهوش لوحده ابدا وباخده ونخرج او حتى نسافر
وكتير كنت بروحله الكافية
انا مكنتش معرفاه انى بعمل كل ده قاصدة علشان ميحسش انى معتبراه مريض هو رافض يروح لدكتور وانا قررت اساعده بنفسي مدام زى ما هو قال مش محتاج غيرى وانا كمان مش محتاجة غيره الحاجات اللي كنا بنعملها دى كانت بتحسن من حالتى انا كمان المزاجية وحالة ماما ياسمين بقيت بقولها يا ماما من كتر حنيتها عليا وعلي اياد وحتى اياد حالته النفسية بقت احسن مش بس بسبب اللي انا بعمله وجوده مع ياسين وماما ياسمين فرق معاه كتير هما كمان كانو بيهتمو معايا باياد
بعد تلت سنين كان ياسين خلاص تقريبا اتخلص من الاكتئاب اللي عنده مبقاش بتجيله نوبات اكتئاب خالص وحتى تقلباته المزاجية بقت عادية زيه زى اي حد
ماما ياسمين طلبت نروح نكشف لأنها قلقت بقالنا تلت سنين سوا ومحصلش حمل ولا مرة واحدة حتى
ياسين قالها انه عادى ومش لازم نقلق بس انا قولتله انه عادى لو كشفنا وروحنا وكشفنا ولما ظهرت نتيجة التحاليل طلع ياسين عنده مشاكل وهيبقي صعب اوى انه يخلف واحنا مروحين كنا ساكتين لا انا عارفة اقول ايه ولا هو كمان
بس قبل ما ننزل من العربية انا اتكلمت
اسيل وهى بتمسك ايده :احنا هنقول ان العيب منى
ياسين :لأ طبعا مش هنعمل كده مش هنكدب
اسيل :يبقي نقول ان العيب مننا احنا الاتنين
ياسين :بس انتى معندكيش عيب يا اسيل وتقدرى تخلفي انا اللى مقدرش
اسيل :مدام انت متقدرش يبقي انا كمان مقدرش
وسيبته ونزلت ودخلت قبله وقولت لماما ياسمين ان العيب مننا احنا الاتنين هو سكت وطلع اوضتنا ومتكلمش مع حد وانا احترمت سكوته
بابا بعد يومين اتصل يسألنى عن نتيجة التحاليل هو عرف اننا عملناها لانه جالنا يوم ما روحنا نعملها لما رجعنا لقيناه قاعد مع اياد وماما ياسمين
كمال :نتيجة التحاليل ايه
اسيل :العيب مننا احنا الاتنين
كمال :ازاى يعنى
اسيل :عادى يا بابا انا عندى مشاكل وهو كمان
كمال :حاسك بتكدبي انتى بتحبي جوزك وممكن تكدبي علشانه
اسيل :انا بحبه وهو يستاهل اعمل اي حاجة علشانه بس لأ يا بابا صدقنى انا مقدرش اخلف ادعيلنا انه يحصل ربنا قادر علي كل شئ
كمال :متزعليش نفسك يا حبيبتى ربنا اكيد هيعوضكم
اسيل :ونعم بالله يا بابا
كمال :انا مضطر اقفل عندى شغل
اسيل :خلى بالك من نفسك
كمال :وانتى كمان
خلصت المكالمة مع بابا لقيت ماما ياسمين واقفة ورايا
ياسمين :كدبتى عليه ليه
اسيل :انا مكدبتش
ياسمين :لأ كدبتى زى ما كدبتى عليا
اسيل :انا..
ياسمين قاطعتها :ياسين قالي علي الحقيقة اللي انتى خبتيها وكدبتى
اسيل :انا مكدبتش يا ماما ياسمين مدام هو ميقدرش يخلف يبقي انا كمان مقدرش تفتكرى لو كان ياسين مكانى كان هيعمل حاجة غير كده ابدا كان هيعمل زى ما انا عملت لأنه بيحبنى لأنه ياسين وانا كمان بحبه
ياسمين وهى بتحضنها :ربنا يطمن قلبك زى ما طمنتينى انا كنت خايفة اوى مكنتش عارفة هعمل ايه لو قررتى تسيبيه
اسيل :اسيب مين يا ماما انا مقدرش اعيش من غيره مقدرش
وعدى شهرين ياسين كان تقريبا بيتجنب التعامل معايا خالص بيمشي بدرى وبيرجع متأخر بيرفض اي محاولة منى للكلام معاه وأخر حاجة عملها بقاله تلت ايام بينام في اوضة تانية غير اوضتنا انا كنت قلت اسيبه يمكن محتاج وقت يفكر فيه ويكون لوحده بس بعد حركة انه ينام في اوضة تانية دى جبت اخرى ولا كفاية عليه تفكير لوحده كده بقي وروحتله الاوضة
اسيل :ممكن اتكلم معاك
ياسين :دلوقتى
اسيل :اه دلوقتى بقالي كتير سيباك لوحدك تفكر براحتك اظن كفاية كده
ياسين :تمام اتكلمى
اسيل :هنفضل كده لحد امتى
ياسين :ايه مليتى بالسرعة دى
اسيل :قصدك ايه ..انا لو مليت فانا مليت بعدك عنى واحنا عايشين تحت نفس السقف وتعبت انا محتاجاك جنبي يا ياسين ومحتاجة اكون جنبك بتبعد نفسك عنى ليه بتحرمنى منك ليه
ياسين :انا خلاص قررت
اسيل :وقررت ايه بقي ان شاء الله
ياسين :احنا...احنا لازم نطلق
اسيل :نطلق
ياسين :اه انا مش هجبرك تعيشي معايا وحرام تتحرمى من انك تكونى ام
اسيل :مش عايزة اكون ام لو انت مش هتبقي ابو ولادى فانا مش عايزاهم مش هيبقي عندى حاجة اديهالهم مش هعرف اكونلهم ام ولا هعرف اكون مرات حد غيرك انا اعرف كل حاجة عنك بعيش معاك كل تفاصيل يومك من اول ما تفتح عينك الصبح لحد ما تغمضهم بالليل وتنام هنسي كل ده ازاي هعيش كل اللي عشته معاك مع حد غيرك ازاى
ياسين :ده تفكيرك دلوقتى بعدين هتبقي محتاجة تكونى ام ومش هتشوفي فيا غير انى الانسان اللي حرمك من انك تكونى ام
اسيل :انا عايزة اكون ام ومحتاجة يكون عندى ولاد بس محتاجالك انت اكتر كمان فيه علاج هتتعالج وانا معاك هنعدى اي حاجة سوا
ياسين :الدكتور قال ان فرص الانجاب عندى هتكون ضعيفة وان العلاج ممكن ياخد سنين علي ما يجيب نتيجة وممكن في الاخر كمان ميجبش نتيجة
اسيل :كلام الدكتور مش قرءان وممكن جدا يكون غلط لو ربنا رايد نخلف يبقي هنخلف رغم كل كلام الدكتور ده كمان احنا عندنا اياد وادينا بنربيه وبنتعلم فيه انا وانت لحد ما ربنا يريد ونخلف
ياسين :بس..
اسيل قاطعته :مبسش يا ياسين مبسش انا هفضل معاك لأخر عمرى مش هخرج من البيت ده غير علي قبرى ولو حتى انت طلقتنى انا مش همشي ده بيتى وانا مستحيل اسيبه
ياسين :دى فرصتك الوحيدة انا مش هسيبلك الاختيار تانى
اسيل :وانا متلزمنيش الفرصة دى ومعنديش اختيار غيرك انت اختيارى الوحيد هتفضل غضبان هنا كتير ولا هترجع اوضتك اعقل يا ياسين الراجل ملوش غير اوضته يا حبيبي
ياسين وهو بيضحك :معاكى حق احنا اتحسدنا يا بيبي ده شيطان ودخل بنا
ورجعت الاوضاع تستقر من تانى بنا وياسين بدء العلاج الحمد لله
بعد شهر
اسيل :مدام خدت الشاور بتاعك يلا بقي ننزل نتغدى لحسن انا جعانة اوى
ياسين :معلش انا عندى سؤال هموت واسأله من ساعة ما جييت انتى ناكشلنا شعرك ليه كده
اسيل :كسلت اسرحه
ياسين :نعم
اسيل :انعم الله عليك يا ياسين ايه عادى كسلت اسرحه
ياسين :يعنى انتى حضرتى لاياد السندويتشات وفطرتى معانا واديتى امى الدوا وروحتى شغلك وجيتى وحضرتى الغدا
اسيل :لا الشغالين اللي عملوه انا مطبختش النهاردة
ياسين :ايا كان يعنى انت عملتى كل ده وجيتى عند شعرك وكسلتى تسرحيه
اسيل :اه
ياسين وهو بيضحك :احلي حاجة التلقائية اللي بتتكلمى بيها كأنك بتقولي حاجة عادية ومنطقية
اسيل :انت هتعمل ايه
ياسين :هسرحلك شعرك اللي انتى مكسلة تسرحيه ده ..ايه رأيك حلو
اسيل :كان احلي قبل ما تسرحه علي فكرة
ياسين :لا والله
اسيل :لا بهزر شكله حلو اوى تسلم ايدك
طيب بالذمة ده واحد اسيبه او اطلق منه علشان اي حاجة في الدنيا مش هنكر انى كتير كنت بحن للامومة واكيد محتاجة يكون عندى ولاد بس انا عايزاهم من ياسين ومحتاجاله ومحتاجة وجوده في حياتى اكتر من اي حاجة تانية ولو اتخيرت بينه وبين اي حاجة تانية من غير تردد هختاره هو لأنه يستاهل بعد سبع سنين بقيت حامل وجبت بنت وسميناها حبيبة على اسم امى ياسين اللى اصر نسمى علي اسمها وبعدها باربع سنين خلفت يحيى علي اسم والد ياسين الله يرحمه
اياد رجع يعيش مع بابا لانه كان كبر وكان محتاج حد يعيش معاه مبقاش ينفع يفضل لوحده ياسين عرض عليه يجى يعيش معانا بس هو رفض
اياد قال انه هيرجع يعيش معاه وياسين ايد قراره وانا كمان مع انى كان يعز عليا فراقه وهو طول عمره معايا بس انا كنت عارفة ان ده حق بابا علينا وانه ربنا هيحاسبنا عنه وانه مهما عمل في الاول وفي الاخر هو ابونا
وكمان لانى عارفة ان بابا فعلا محتاجه
انا سامحت امى بوجود ياسين في حياتى قدرت اسامحها
وجود ياسين في حياتى غير حاجات كتير اوى للأحلي غيرنى انا نفسي للأحسن انا حاولت كتير اهرب منه بس مقدرتش كنت بهرب منه ليه مهما بعدت عنه بلاقينى بقرب لانى محتاجاه زى ما هو قال لأن الماضي بتاعى كان ناقصه وجوده والحاضر احلي بيه والمستقبل مينفعش من غيره
انا بعتبر الجملة دى اكتر جملة رومانسية في الدنيا احلي كلام حلو سمعته في حياتى واكتر حاجة بتعبر عن ياسين وأهميته بالنسبالي ومكانته في قلبي
ياسين كمان كان محتاجنى محتاجنى احبه واحاول علشانه واتعب علشانه وافضل جنبه ومسيبهوش ابدا
وانا مش بس كنت محتاجاه انا كمان كنت محتاجة ماما ياسمين انا واياد كنا محتاجين ماما ياسمين وماما ياسمين كانت محتاجانا واياد كان محتاج ياسين ياسين حنين اوى عليه وبيعامله زى ابنه احنا كلنا كنا محتاجين بعض ومحدش فينا يقدر يستغنى عن التانى
بس احنا محتاجين بعض لأننا بنحب بعض مش بنحب بعض لأننا محتاجين بعض ده كده استغلال مش حب
مفيش حب من غير إحتياج مدام حبيت حد يبقي هتحتاجه هتحتاج وجوده في حياتك هتحتاجه يفرحك يخفف عنك همك يسامحك لما تغلط يسندك لما تتعب ويقدر لما تعتذر
الإحتياج اللي بيجى بسبب الحب طبيعى يحصل
انما الحب اللي بيجى بعد إحتياج ده مش حب ده استغلال في اسوء الحالات او تعود في احسنها
وفرق كبير اوى بين الحالتين فرق السما عن الارض
الحب اللي يجى بسبب الإحتياج مبيدومش بيختفي لما مبنبقاش محتاجين الشخص تانى او لما بنلاقى حد غيره يلبى الإحتياج بتاعنا
انما الإحتياج اللي بيجى بسبب الحب ده بيدوم لأن اساسه قوى الحب هو اقوى اساس لأي علاقة فى الدنيا
من اول اهم علاقة وهى علاقتنا بربنا وبعدها علاقتنا بأهلنا باصحابنا بدراستنا بشغلنا بازواجنا وبولادنا
الحب هو اقوى اساس واللي بيحب حد بيحتاجه
الإحتياج علامة من علامات الحب بس لو الإحتياج جه بعد الحب مش قبله 💖
#حكايات_منار
فضلا تدعو لابويا بالرحمة والمغفرة وان يسكنه الله فردوسه الأعلى بدون حساب ولا سابقة عذاب هو وموتى المسلمين جميعا خصوصا من زال اثره اثره يذره زائر ولم يذكره ذاكر