منذر :وانا قولت هنركب القطر
جزرة وكالها جحش
سلسبيل :كالها ازاى يعنى اسمها جزرة وقطمها جحش
منذر :وهو بعد ما يقطمها هيعمل فيها ايه ما هو هياكلها
سلسبيل :وانتى بتحكى قصة حياة الجزرة ونهايتها المحزنة
ده مثل وبيتقال زى ما هو كده
جزرة وقطمها جحش
يعنى مفيش نقاش وخلص الكلام
منذر :بالظبط هو مفيش نقاش وخلص الكلام وهنركب القطر
سلسبيل :قصدك هتركب القطر
اركبه براحتك وعيش حياتك بقى انت والجزرة والجحش
انما انا هروح عربيات
منذر :انتى بتهزرى ولا بتستعبطى
هو عمى محمد مش موصينى عليكى
وطلب منى ارجعك علشان متمشيش لوحدك بشنطك دى كلها فى المواصلات
تيجى تقوليلى هروح عربيات لوحدى
انتى ماشية مع راجل على فكرة ده لو مش واخدة بالك يعنى
سلسبيل :انا اسفة
انا بس مش عايزة اركب القطر
منذر :القطر افضل حاجة لينا علشان منتنططش فى عربيات بالشنط دى كلها
توفير للوقت وللطاقة وللمجهود
سلسبيل :معاك حق فى كلامك...
منذر قاطعها :مادام معايا حق يبقى نركب القطر
سلسبيل :مش هينفع
منذر :مش كفاية عند بقى
سلسبيل :مش عند
منذر :اومال ايه انتى استرونج اندبندنت ومش هتسيبينى امشى كلامك عليكى يعنى
سلسبيل :انا بخاف...من القطر بخاف اركبه
منذر :خلاص هنركب عربيات
سلسبيل :شكرا
بعد ساعة
سلسبيل :لانشون ولا جبنة رومى
منذر :نعم
سلسبيل :تاكل جبنة رومى ولا لانشون انا معايا مربى فراولة كمان
منذر وهو بيضحك :انتى عاملة سندويتشات انتى طالعة رحلة
سلسبيل :كنت عارفة انى هجوع وانا مبحبش اكل الشارع
مقولتش هتاخد ايه
منذر :هو انا مش جعان بس شكل السندويتشات فتح نفسى
هاتى لانشون
سلسبيل :اتفضل
منذر :طعمه حلو مش ناقص غير كوباية شاى
انا متعود اشرب الشاى على الأكل
سلسبيل :مش بعد ما تاكل
منذر :لا وانا باكل
سلسبيل :انا معايا عصير
تشرب برتقان ولا مانجة
منذر وهو بيضحك :كده بقيتى ماشية بسوبر ماركت متنقل
سلسبيل :دى حاجات بسيطة لزوم السفر
اكل وعصير علشان مهبطش
شيكولاتة علشان لو دوخت والسكر فى دمى قل
وشيبسى علشان اكله مع الساندويتشات
والبيك رولز لا ده ملوش مبرر علشان بحبه مش اكتر
منذر وهو بيضحك :لا حاجات بسيطة فعلا
سلسبيل :تاخد لانشون تانى ولا رومى ولا مربى
منذر :مربى
سلسبيل :اتفضل والعصير برتقان ولا مانجة
منذر :انتى بتحبى مين فيهم
سلسبيل :لا عادى انا بشرب الاتنين اللى بتحبه خده
منذر :خلاص يبقى مانجة
بعد ساعة
منذر وهو باصص فى موبايله :ايه الهبل ده بقى
سلسبيل :فى مشكلة
منذر :لا...او اه مش انتى بنت
سلسبيل وهى بتضحك :والله هى الحكومة كتبالى كده فى شهادة ميلادى
منذر :لا قصدى انك بنت فيمكن تفهمى وتفهمينى لأنى مش فاهم حاجة
سلسبيل :افهم ايه
منذر :سلمى دى بنت بتشتغل معايا فى نفس الشركة
مرتبطين بقالنا كام شهر
هى فى الاول كانت كويسة بس بقالها فترة كده متغيرة
بتاخد كل كلامى بمعنى وحش
يعنى مثلا اقولها انتى النهاردة تقولى للقمر قوم وانا اقعد مطرحك تقولى قصدك انى قليلة الزوق وبعدين قديمة اوى الجملة دى
اجدد واقولها انا كنت فاكر انى مفيش بنت ممكن تلفت نظرى لحد ما قابلتك وقعتينى فيكى
تقولى قصدك يعنى انى حفرة ايه وقعتينى دى
مقولش حاجة خالص تقولى انى مش واخد بالى منها ومقصر معاها
اكلمها تقولى انا حاسة انك خانقنى باهتمامك سيبلى مساحة اتنفس
مبقتش ابعتلها ولا اكلمها
لقيتها دلوقتى بعتالى رسالة تشتكى فيها انها حاسة انها مش مرتبطة ولا ان فى واحد فى حياتها وانى راميها ولا أكن ليها لازمة وانها تعبت وزهقت
انا جالى صداع منها هى عايزة ايه
انا مش فاهم حاجة وندمت انى ارتبطت بيها
سلسبيل :هى ممكن تكون دى طبيعتها متناقضة بتقول الحاجة وعكسها
عايزة الحاجة وعكسها
منذر :وانا واحد بتاع تخطيط
بحب كل حاجة تبقى واضحة
انما التناقض ده هيفرهدنى
سلسبيل :طيب اتكلم معاها وافهم فى ايه
لأن حاجة من اتنين يا هى متناقضة
يا هى بتطفشك
منذر باستغراب :وهى هتطفشنى ليه
سلسبيل :يمكن زهقت يمكن عايزة ارتباط رسمى مش مجرد ارتباط عاطفى وخلاص يمكن شافت حد تانى يمكن حاجات كتير يعنى
انت اتكلم معاها وافهم منها وحط النقط على الحروف
منذر :تمام هتكلم معاها
بس انتم مش ده العادى بتاعكم صح
سلسبيل :احنا دى اللى هو مين
وايه العادى بتاعنا ده
منذر :انتم البنات يعنى
مش كلكم كده متناقضين وعايزين الحاجة وعكسها وبتحبو ترازو فى اللى معاكم وتفرهدوه
سلسبيل :لا اكيد مش كلنا كده
البنات مش كلها زى بعض
زى ما الشباب مش كلهم زى بعض
احنا مش نسخ بالكربون من بعض
دول بيبقو تؤام وبتلاقيهم مختلفين فى الطباع
مفكر ان البنات كلهم ممكن يبقو كلهم شبه بعض فى طبع معين ايا كام الطبع ده ايه
منذر :تمام بس انتم مش كلكم واضحين وصرحا
سلسبيل :ولا كلنا متناقضين
ولا كلنا اى حاجة احنا بنختلف فى طباعنا وصفاتنا
كلمة كلكم دى غلط
التعميم فى اى حاجة غلط
ما انا ممكن اقولك ان كلكم خاينين وكلكم عينيكم زايغة وكلكم مصطفى ابو حجر
منذر :بس احنا مش كلنا مصطفى ابو حجر
سلسبيل وهى بتضحك :اه طبعا شوية فيكم زى مصطفى ابو حجر وشوية اسوء منه
بهزر متقلبش وشك
بس شوفت التعميم وحش ازاى
ولا ينفع تعمم فى حاجة حلوة ولا حاجة وحشة
كل واحد ليه طباعه بصفاته
انت عارف ان نصك اليمين فى اختلافات بسيطة عن نصك الشمال
فى اختلاف بين نصينك
فاكيد يعنى مش هيكون كل البنات ولا كل الرجالة شبه بعض
منذر وهو بيضحك :خلاص فهمت انتى محاورة صعبة اوى
سلسبيل :ده علشان اوضح وجهة نظرى بس
اختلافنا حياة
الدنيا كانت هتبقى صعبة اوى ومملة اوى لو كلنا شبه بعض
منذر :معاكى حق
بعد سنة
سلسبيل :تاكل كفتة ولا بانيه
منذر :كفتة
سلسبيل :اتفضل...وعملتلك شاى فى المج الحرارى بتاعى لأنك قولتلى انك بتحب تشرب الشاى وانت بتاكل
منذر بابتسامة :انتى لسه فاكرة انا قولتلك الحكاية دى من سنة
سلسبيل :ذاكرتى فولاذية مبنساش حاجة ابدا
منذر :طيب دى حاجة كويسة جدا
سلسبيل :مش دايما لأنى مبنساش حتى الحاجات اللى ببقى نفسى انساها
مش كل اللى بفتكره حلو
فى وحش فكراه هرتاح لو نسيته بس انا مبنساش هعمل ايه
انا معايا اكياس سكر من اللى بتبقى موجودة فى الكافيهات دى
لو محتاج سكر للشاى
منذر :لو ممكن كيسين تلاتة لأنه مظبوط وانا بحبه مسكر
سلسبيل :اتفضل
منذر :اهو كده بقى يعدل المزاج
سلسبيل :من باب الفضول عايزة اسألك على حاجة بس لو مش عايز تجاوب تمام مفيش مشكلة
منذر :اتفضلى
سلسبيل :هو انت عملت ايه مع البنت اللى حكتلى عنها سلوى صح
منذر :سلمى
اتكلمت معاها واتضح ان ده طبعها وانها عايزة تحس انى بتعب علشانها علشان اعرف هى عايزة ايه واعمله دايما
وتدلع عليا واتحمل دلعها وادلعها اكتر واكتر
فسيبتها
سلسبيل بصدمة :سيبتها
منذر :اه انا ميمشيش معايا الكلام ده
سلسبيل :سيبتها علشان بتدلع عليك
منذر :ده دلع ماسخ
هو ايه اللى هتفضل تعمل كده علشان تشوف هتحمل دلعها الأهبل ده وهتعب علشان اعملها اللى هى عايزاه ولا لا
وأفضل انا ابقى الف حوالين نفسى علشان ارضيها
سلسبيل :هو مش المفروض ان دى احلى حاجة فى الارتباط
وان الناس بترتبط علشان تلاقى اللى يهتم بيها
منذر :لو كده يبقى كار الارتباط ده مش كارى
ده مش اهتمام بالنسبالى ده دلع ماسخ
سلسبيل :حساك مكبر الموضوع
منذر :انتى مش فى مكانى علشان تحكمى
النار مبتحرقش الا اللى ماسكها
سلسبيل :كابشها
النار مبتحرقش الا اللى كابشها
منذر :كابشها ماسكها المهم انها فى ايده وبتحرقه
انا مليش فى التناقض اللى هى مفكراه دلع ده
انا واحد بتاع تخطيط فدلعها ده بالنسبالى عذاب بالمعنى الحرفى لكلمة عذاب
سلسبيل :انت بتشتغل ايه صحيح
منذر :انا مهندس تخطيط
وانتى
سلسبيل :انا فى كلية اعلام فرقة تالتة
داخلة فرقة رابعة خلاص بما انى خلصت امتحانات تالتة
منذر :وقاعدة فى المدينة الجامعية
سلسبيل :اه لو عليا هروح واجى بس كنت برجع متأخرة وبابا بيقلق عليا فخلانى اقعد فى المدينة
منذر :انتى قولتى انك خلصتى فرقة تالتة صح
سلسبيل :اه
منذر :بس انا رجعتك السنة دى والسنة اللى فاتت بس
سلسبيل :اول سنة كان معايا بنت من بلدنا وقتها اجرنا عربية رجعتنا احنا الاتنين بحاجاتنا
انما هى حولت بعد اول سنة
وبابا مرضيش أاجر عربية لوحدى علشان خاف عليا
ولا لقيت حد يكون نفس طريقى يأجر معايا
وبابا مش هيقدر يجى ياخدنى علشان شغله وعلشان الشيلة تقيلة كمان
فى اول السنة بلاقى بنات نروح سوا فى عربية مأجرينها سوا
بس وانا راجعة فى اخر السنة لا لأنهم كليات تانية غيرى مبنخلصش مع بعض للاسف
منذر :طيب وفى نص السنة انا مش بوصلك ليه
سلسبيل :برجع حاجات بسيطة وقتها فبقدر اشيلها لوحدى
معلش تعباك معايا
منذر :انا كده كده شغلى قريب منك
وبعدين تعبك وتعب عمى محمد راحة ربنا يعلم انا بحبه من حب بابا فيه
سلسبيل :بابا كمان بيحب عمى دياب اوى
اتمنى لما اشتغل يبقالى صاحبة قريبة منى كده زى بابا وعمى دياب
منذر :مش سهل تلاقى صداقة زى دى فى وقتنا ده
الدنيا والناس اختلفو اوى عن وقت بابا وعمى محمد
سلسبيل :عارفة ان الوحش بقى اكتر
بس ده ميمنعش ان لسه فى حلو ربنا يكتر منه ويعترنا فيه
منذر :اللهم امين
بعد سنة
منذر :ايه ده مفيش سوبر ماركت المرة دى ولا سندويتشات ولا عصير ولا حتى باكو بسكويت
سلسبيل :مليش نفس اكل
منذر :ليه كده
سلسبيل :الامتحانات كانت صعبة اوى
منذر :مش انتى عملتى اللى عليكى ومقصرتيش
سلسبيل :اه
منذر :خلاص ده المهم
والنتيجة بقى من عند ربنا
سلسبيل :ونعم بالله
بس انا خايفة
منذر :مادام تعبتى ربنا مش هيضيع تعبك
خير متقلقيش
ربنا هيفرحك بنتيجتك
سلسبيل :يا رب
بعد نص ساعة
منذر :تعالى بقى نروح ناكل
سلسبيل :مش جعانة
منذر :انا جعان عودتينى على الأكل معاكى بشوفك اجوع
هتسيبينى جعان كده وتاخدى ذنبى
سلسبيل :ما انت هترجع تاكل فى البيت
منذر :انتى قلبك حجر ليه كده
افضل جعان لحد ما اروح
وافرضى رجعت لقيت عندنا ضيوف اقعد معاهم وافضل جعان
ولا اضطريت اروح مشوار بعد ما ارجع على طول اروحه وانا جعان
سلسبيل :كل ده ممكن يحصل
لا وعلى ايه
خلاص نروح ناكل
منذر :مفيش غير محل كشرى هنا ولا ايه
لا شايف مطعم ولا كافية ولا محل سمك ولا كبابجى ولا اى حاجة
سلسبيل :مش مشكلة انا بحب الكشرى
منذر :يعنى يوم ما اعزمك اعزمك على كشرى
سلسبيل :مش مشكلة انا بحبه
منذر :بجد
سلسبيل :بجد والله
بعد عشر دقايق
منذر :هروح اجيب شاى على ما الكشرى ينزل وارجعلك
سلسبيل :ماشى
بعد تلت ساعة
منذر :تاكلى رز بلبن
سلسبيل :لا مش عايزة قولتلك مكتئبة بسبب النتيجة
منذر :وهى المكتئبة مينفعش تاكل رز بلبن
يجوز عادى على فكرة
سلسبيل وهى بتضحك :ماشى هاكل رز بلبن
بعد خمس دقايق
منذر :طعمه حلو بس اعرف مكان فى وسط البلد بيعمله احلى من كده بكتير
سلسبيل :اول مرة اكل رز بلبن بره البيت طعمه حلو
مخلينى بضحك وبضرب كشرى ورز بلبن والمفروض انى مكتئبة
ده ايه الاكتئاب العرة ده
منذر وهو بيضحك :بعد الشر عليكى من الاكتئاب
بعد ربع ساعة
منذر :نقى بقى الحاجات اللى بتحبيها
سلسبيل :ملوش لزوم
انا مش عايزة حاجة
منذر :لا افرضى هبطتى فى الطريق ولا دوختى
سلسبيل :مش ههبط ولا هدوخ انت اكلتنى كشرى ورز بلبن وشربتنى عصير
مش هيجيلى عين اهبط ولا ادوخ اصلا
منذر :انا مصر نقى الحاجات اللى بتحبيها
اعتبريها حلاوة الامتحانات اللى خلصتيها
سلسبيل :ماشى...هاخد دول
منذر :دول بس لا نقى حاجات تانية
سلسبيل :دول كفاية
منذر :كفاية ايه بس
بقولك حلاوة الامتحانات والحياة الدراسية اللى خلصتيها
خلاص هختارلك انا
بعد ربع ساعة
سلسبيل :كتير اوى اللى جيبته ده
منذر :مش كتير ولا حاجة بالهنا والشفا
سلسبيل :انت فلوسك كتير باين
ولا مش عارف تعمل بفلوسك ايه
منذر وهو بيضحك :فلوسى وانا حر فيها
وزى ما بيقولو اللى معاه قرش محيره يجيب حمام ويحمره
سلسبيل :يحمره ايه هو جعان
اسمها اللى معاه قرش محيره يجيب حماك ويطيره
منذر :وهو هيستفاد ايه لو طيره
على الاقل لو حمره هياكله
سلسبيل وهى بتضحك :ما هى الفكرة انه يكون بيضيع فلوسه فى الهوا
دى العبرة من المثل
انت بتقول امثال منتاش حافظها صح ليه
منذر :معرفش انى بقولهم غلط اصلا
وانتى الوحيدة اللى بتصلحيلى
جدتى الله يرحمها كانت بتحب الأمثال اوى وبتقولهم كتير
علشان كده فى حاجات منهم لزقت فى دماغى
سلسبيل :لزقو غلط مفيش واحد فيهم بتقوله غير والتاتش بتاعك معلم عليه
كأنك بتعمله اعادة صياغة
منذر وهى بتضحك :حلوة بعمله اعادة صياغة دى
ماشى اعتبرينى بعملهم اعادة صياغة
احساسك ايه بعد ما خلصتى كليتك
جاهزة للجاى مخططة هتعملى ايه
سلسبيل وهى بتضحك :احساسى ايه
جاموسة تايهة فى بحر الحياة
بكلمك بالأمانة يعنى
انا لسه معنديش خطط مش عارفة هعمل ايه
لسه هفكر هشوف الدنيا فيها ايه
منذر :خير بإذن الله ربنا يجعلك فى كل خير نصيب
سلسبيل :انا وانت يا رب
منذر :حلوة انا وانت دى
سلسبيل :قصدى امين ليك وامين ليا يعنى
منذر :الصيغة الاولى احلى
سلسبيل :احنا وصلنا
مكنش ليه لزوم تجيبنى لحد البيت بابا كان ممكن يقابلنى
منذر :لا طبعا مينفعش
حمدلله على سلامتك
سلسبيل :الله يسلمك اتفضل طيب معايا
منذر :مرة تانية
سلسبيل :لا طبعا مينفعش تيجى لحد البيت ومتدخلش بابا هيزعل جدا
منذر :وانا مقدرش ازعله
خلاص حاضر
بعد تلت شهور
منذر :هتفضلى ساكتة كده كتير
مش هتسألينى انا هنا ليه طيب
سلسبيل :علشان تتقدملى
عارفة مش محتاجة اسأل
انت مش عايز تسألنى عن حاجة
منذر :لا عايزك توافقى بس
سلسبيل :انت متعرفنيش كويس
منذر :اللى اعرفه كفاية
سلسبيل :انا مش شبهك مش بخطط لكل حاجة
انا كائن عشوائى
وانت مهندس تخطيط
يعمل ايه مهندس تخطيط بجاموسة تايهة فى بحر الحياة
منذر وهو بيضحك :يتجوزها
سلسبيل :انا بتكلم جد
منذر :وانا كمان
يتجوزها هو يخطط لحياتهم
وهى تصلحله الأمثال اللى بيقولها غلط
سلسبيل :الموضوع مش بالبساطة دى
ده جواز دى حياة كاملة
لازم تتبنى على اساس قوى
منذر :على فكرة جواكى بذرة شخص عاقل بيعرف يخطط
عايزة بس اللى يهتم بيها
وافقى ونهتم بيها سوا
سلسبيل باستغراب :هى ايه دى
منذر بابتسامة :البذرة
مبهزرش والله
انا شايف اننا مناسبين
فى بينا قبول والتعامل بنا كويس وفى لغة حوار بينا
دى كلها حاجات مش سهل تلاقيها
سلسبيل :بس احنا مختلفين
منذر :مش مختلفين اوى زى ما انتى فاكرة
فى بينا حاجات مشتركة
زى اننا بنحب الرز بلبن مثلا
سلسبيل وهى بتضحك :اساس قوى فعلا يتبنى عليه عمارة مش بس جوازة
اتكلم جد شوية من فضلك
انت متعرفنيش كويس وانا معرفكش كويس
منذر :نتخطب ونتعرف على بعض كويس اوى فى الخطوبة
اومال هى الخطوبة ليه
سلسبيل :مش عارفة بقى
الموضوع ملخبط
منذر :بالعكس الموضوع بسيط جدا
اتنين فى بينهم قبول وتفاهم هيتخطبو
ده بالنسبالك
سلسبيل :وبالنسبالك
منذر :انا عايز اشوفك تانى كتير ومش مرة اخر كل سنة
انتى عارفة انا قولت لبابا يقول لعمى محمد انى اجيبك المرة الأخيرة دى من المدينة
خوفت يطلب من حد تانى او يروح هو او يتحرج يطلب من بابا او اى حاجة
كان مهم عندى ان انا اللى اجيبك
وبعد اخر مرة وصلتك كنت عايز اشوفك ولقيت انك خلصتى ومفيش اخر سنة استناه علشان اوصلك لبيتك فى اخره
فقولت مبدهاش بقى
انا اتقدملك فشوفك كتير
اشوفك بسبب ومن غير سبب
اشوفك واتكلم معاكى كل ما احب
كل مرة شوفتك فيها كانت فرصة جميلة
حظى حلو ان زميلتك حولت وان عمى محمد كان بيتكلم عن الموضوع قدام بابا وان بابا قاله ان شغلى قريب وممكن ارجعك انا
بس انا مش هستنى تجمعنا فرصة تانية
مش هستنى الفرصة تجيلى لحد عندى
انا قررت ان انا اللى هروحلها
انا جاى طالب منك فرصة
فرصة اعرفك اكتر وتعرفينى اكتر
فرصة لينا سوا
فرصة مش هضيعها وان شاء الله تكمل للأخر وتبقى فرصة لحياة كاملة
وافقت عليه
مش علشان كلامه حلو ومقنع وعحبنى
لا علشان زى ما انا فرصة ليه
هو كمان فرصة ليا
هو انسان ناجح طموح محترم وابن اصول
صريح وصادق ولطيف وطيب ودمه خفيف
بعرف اتكلم معاه رغم اختلافنا عن بعض الا انى بفهمه
فى بينا قبول ولغة حوار
وفوق كل ده شايفنى حاجة كبيرة وحلوة ومهمة
دى كلها حاجات متترفضش
كان لازم اوافق واديله فرصة وادى لنفسى فرصة معاه
الفرص فى الحياة انواع
فى فرصة بتجيلك لحد عندك اوعى تضيعها عليك وقدرها وحافظ عليها
وفرصة بتروحلها بنفسك اوعى تكسل ومتتعبش علشان توصلها ولما توصلها برضه قدرها وحافظ عليها
الحياة فى حد ذاتها فرصة كبيرة
فرصة انك تفرح وتنجح تحب وتغلط وتتعلم من غلطك وتفشل وتحاول من تانى لحد ما تنجح
فرصة انك تتوب وتقرب من ربنا
كل يوم جديد هو فرصة جديدة استغلها كويس وعيشها صح
ومتضيعش على نفسك اى فرصة فى فرصتك الكبيرة اللى هى حياتك💖
#حكايات_منار
فضلا تدعو لابويا بالرحمة والمغفرة وان يسكنه الله فردوسه الأعلى بدون حساب ولا سابقة عذاب هو وموتى المسلمين جميعا خصوصا من زال اثره فلم يذره زائر ولم يذكره ذاكر