اصالة :كرم يا بابا عايزنى اتجوز كرم لا مش معقول
على :وماله كرم
اصالة :ماله كرم لا ولا اى حاجة معقد وكلاكيع الدنيا كلها فيه انت عمرك شوفته بيضحك فرحان عادى زى بقية خلق الله كلاكيعو يا بابا عايزنى اتجوز كلاكيعو
على :متقوليش كده على ابن عمك
اصالة :بابا حضرتك عارف انا بحب عمى قد ايه وبحب ولاد عمى كلهم بس كرم ده معنديش اى شعور تجاهه كأنه مش موجود فى الدنيا اتجوز واحد مبكنلوش اى شعور ليه
على :ما اتخطبتى للى جواكى ليه مشاعر حصل ايه اتجوزتو ولا اكتشفتى ان الحب لوحده مش كفاية
اصالة :ماشى مش هنكر ان حب من غير تفاهم اخرته فراق وفشل بس ما هو مع كرم هيبقى لا حب ولا تفاهم انا معرفوش يا بابا ابن عمى ومعرفوش ومحدش فى الدنيا يعرفه
على :اعرفيه انا واثق فيكى وفى قلبك الابيض وروحك الحلوة اللى هيجبرو كرم ويجبرو اى راجل فى الدنيا انه يحبك ويصونك
اصالة :متقولش كلام حلو عنى يخلينى موافقة اكتب كتابى عليه دلوقتى كده مش فير انت مبتلعبش بنزاهة يا حاج
على وهو بيضحك :كل شئ مباح فى الحب والحرب يا قلب ابوكى
اصالة :اديك قولتها بنفسك حرب ليه بقى ترمينى فى حرب زى دى
على :لانك قدها يا اصالة انا لو عندى شك فى انك قد الحرب دى مكنتش دخلتك فيها
انتى بنتى الوحيدة على تلت رجالة وانتى اجدع واحن واحدة فى ولادى تفتكرى انا هوافق اديكى غير لواحد مفيش منه يستاهل جوهرتى الغالية
اصالة :وانت شايف ان كرم مفيش منه ويستاهل جوهرتك الغالية
على :يستاهل يا بنتى وعارف كويس قيمة الجوهرة اللى بديهاله ومستعد يدفع عمره كله تمنها
اصالة :مين ده كرم انت فاهمه غلط على فكرة ده ممكن يضايق لو سمعك بتقول عنه كده
على :انتى متعرفيهوش لو عرفتيه مكنتيش قولتى عنه كده
اصالة :صح يا بابا انا معرفوش ومش عايزة اعرفه
على :المرة اللى فاتت انتى اللى اختارتى ومع انى قولتلك بلاش يا بنتى مش مرتاحله اتمسكتى بيه
اختيارك طلع غلط سبينى اختارلك المرة دى
اصالة :ودونا عن رجالة الدنيا كلها انت اختارتلى كرم...كرم يا بابا
على :وماله كرم راجل ويعتمد عليه لا ناقصه ايد ولا رجل
اصالة :ناقصه قلب يا بابا ناقصه صوت ده واحد دايما ساكت
على :خليكى انتى صوته طلعيله صوت
اصالة :وان عرفت اطلعله صوت هطلعله قلب ازاى
على :مفيش حد معندوش قلب بس فى ناس قلبها بيبقى مدفون جواها لحد ما تيجى اللى تفحر جواهم وتخلى قلبهم يبان
اصالة :يا بابا..
على قاطعها :انتى عندك شك فى انى عايزلك احسن حد فى الدنيا
اصالة :طبعا لا يا بابا
على :يبقى وافقى وادى كرم فرصة على ضمانتى انا
اصالة :حاضر يا بابا
على :بجد موافقة
اصالة :طبعا انا مقدرش ارفض وحضرتك مصر بالشكل ده
على :تعيشى يا قلب ابوكى وصدقينى مش هتندمى
اصالة :يا رب يا بابا
بعد اسبوع
كرم :مفيش داعى نعمل خطوبة
رباب :ليه بس يا كرم يا ابنى
اصالة :بابا ماما لو سمحتو ممكن اتكلم مع كرم لوحدنا
على :ماشى يلا يا رباب
اصالة :ممكن افهم انت ليه مش عايز خطوبة
كرم :مش حاسس انها حاجة ضرورية
اصالة :انت مخطبتش قبل كده دى اول مرة تخطب فيها مش عايز تفرح بنفسك مش عايز اهلك يفرحو بيك
انا محتاجة خطوبة يا كرم عارفة انك ممكن تقولى ما انتى عملتى خطوبة قبل كده بس انا فعلا محتاجاها محتاجة استوعب فكرة انك مبقتش مجرد ابن عمى اللى مفيش بينى وبينه غير سلام ربنا محتاجة استوعب انك هتبقى خطيبى هتبقى شخص بخطط لحياتى الجاية كلها معاه
كرم :بجد عايزة تحسى انى خطيبك
اصالة :اه بجد انا وافقت نتخطب يعنى وافقت ادينا فرصة سوا يبقى لازم اعمل اللى عليا علشان لو فشلنا ابقى عارفة انى مقصرتش وانت كمان لازم تعمل زيى
كرم :انتى عايزانا نفشل
اصالة :لا لانى مبحبش الفشل
كمان الخطوبة بتبقى ذكرى حلوة نفتكرها نحكى عنها لولادنا نتفرج معاهم على فيديوهاتها وصورها
كرم بابتسامة :ماشى موافق
اصالة :موافق عن اقتناع ولا لان انا عايزة كده
كرم :الاتنين يا اصالة الاتنين
اصالة :طيب حيث كده انا محتاجة رقمك لانه مش معايا مش معقول نتخطب واحنا معناش ارقام بعض
تحب نختار القاعة سوا ولا انت تعرف مكان كويس
كرم :لا نختار سوا
اصالة :تمام يبقى من بكرة نبدء نلف على قاعة تحب نختار سوا فستان الخطوبة ولا ملكش خلق على اللف وتتفاجئ بيه يوم الخطوبة احسن
كرم :لا نختاره سوا وحتى تلفى معايا على البدلة
اصالة :تمام جدا
يوم الخطوبة
كرم :انتى مضايقة علشان انا مش عايز نعمل سيشن
اصالة :احنا خلاص حجزناها يا كرم ليه فى اخر لحظة تغير رايك
كرم :يعنى ملهاش لازمة افرضى مطلعتش الصور حلوة
اصالة :ليه متطلعش حلوة المصور شاطر والمكان اللى هنصور فيه تحفة والفستان اللى جبناه للخطوبة يهوس وبمبلغ وقدره فليه ميبقاش السيشن يجنن وشكلى فيه قمر
كرم :انا مش خايف شكلك ميطلعش حلو انتى حلوة طول الوقت يا اصالة انا خايف شكلى انا اللى ميبقاش كويس
اصالة :ليه ان شاء الله وانت شاب حليوة طول بعرض والبدلة مظبوطة عليك مخلياك ولا الامير تشارلى فى نفسك كده
كرم :بجد شكلى كويس
اصالة : والله حلو جدا وهتتعاكس من نص البنات فى الخطوبة طيب عارف انت لو مكنتش النهاردة خطوبتنا وشوفتك لابس البدلة وشكلك يدوخ كده كنت اتقدمتلك انا
كرم وهو بيضحك :مش للدرجة دى
اصالة :لا للدرجة دى واكتر كمان
كرم :خلاص بعد ما اعدى عليكى اخدك من الكوافير هنروح نتصور وبعدين نطلع على القاعة تمام كده
اصالة :تمام جدا
بعد اربع شهور
اصالة :هتيجى يعنى هتيجى يا كرم مليش فيه فضى نفسك
كرم :انتى بجد فارقلك احضر حفلة تخرجك
اصالة :فارقلى طبعا
كرم :كل صحابك هيبقو هناك عايزاهم كلهم يشوفونى مش محرجة مش خايفة واحدة فيهم تقول كلمة كده ولا كده
اصالة :اللى تفكر تقول كلمة كده ولا كده هى اللى لازم تخاف على نفسها لانى هقطعلها لسانها
كمان انت خطيبى يا كرم وحقك عليا وحقى عليك انك تشاركنى نجاحى خصوصا لما تكون سبب فيه
كرم :انا سبب فى نجاحك
اصالة :التقدير اللى جبته فى اخر تيرم ليا فى الكلية هو اعلى تقدير جبته فيها من يوم ما دخلتها وانت السبب بهت عليا باجتهادك والتزامك وصحيت ضميرى بكتر سؤالك ليا عاملة ايه فى المذاكرة خلصتى المنهج راجعتى كام مرة قبل كده انا عمرى ما روحت امتحن مادة وانا مخلصة منهجها اصلا معرفتش احساس انى ابقى مخلصاها ومرجعاها وبصيت فى امتحانات السنين السابقة كمان غير بسبب كلامك واهتمامك
علشان كده انت شريك ليا فى نجاحى ده وانا مش هقبل باى شكل من الاشكال انك متجيش
كرم :خلاص هاجى هنروح سوا
بعد تلت ايام
كرم :انا مش عارف اعمل زى اللى صحابك مرتبطين بيهم ما عملو والحركات المجنونة دى
اصالة :مش مهم كفاية انك موجود معايا
كرم بابتسامة :بس انا جبتلك هدية
اصالة بابتسامة :بجد طيب وريهالى بسرعة انا بحب الهدايا اوى
كرم بصوت واطى :وانا بحبك اوى
اصالة :بتقول ايه
كرم :بقولك انا معرفش انتى بتحبى الذهب اكتر ولا الفضة فعملتلك اسمك على سلسلة فضة وعملتلك اسمك برضه على انسيال ذهب
اصالة بانبهار :شكلهم حلو اوى
كرم :مبسوطة بيهم
اصالة :جدا حسا انى مبسوطة وانى محتاجة اعتذرلك كمان
كرم باستغراب :تعتذريلى انا على ايه
اصالة :مش مهم المهم تعرف انى اسفة
كرم :لا بجد على ايه ومش هزعل
اصالة :مش احنا هنخرج بعد ما نخلص هنا
كرم :اه
اصالة :خلاص وقتها هقولك
بعد ساعتين
كرم :ها قولى بقى اسفة على ايه
اصالة :كان عندى امل تنسى بس شكلك مبتنساش
بص انا اسفة علشان يعنى قبل ما اتخطبلك كنت شايفاك بصورة تانية غير اللى شايفاك عليها دلوقتى
كرم :وانتى كنتى شايفانى ايه وبقيتى شايفانى ايه
اصالة :بصراحة كنت شايفاك كلاكيعو
كرم :يعنى ايه كلاكيعو
اصالة :يعنى شخص معقد بيخاف يضحك لوشه يشقق انا اسفة والله بس انت اصلك كنت دايما ساكت مبتتكلمش مبتضحكش فانا كونت عنك فكرة بس بعد ما اتخطبنا اتضح انها غلط خالص عارف انا كنت خايفة انك تفضل عايز تبقى كده بعد ما نتجوز تفضل ساكت وهادى بس لقيتك غير كده بالعكس انت حتى لو كنت رافض الحاجة فى الاول لما بتكلم معاك بتعملها انا كنت خايفة تحاول تخلينى زيك بس انت بتحاول تبقى زيى وبتعمل حاجات تفرحنى وبتفكر فيا
انا اسفة على الصورة القديمة اللى كنت شايفاك بيها واكيد كنت هندم لو مكنتش وافقت اننا نتخطب
كرم :عارفة الصورة اللى انتى كنتى شايفانى بيها دى مش غلط كلها انا مش كلاكيعو انا عندى كلكيعة واحدة بس الخوف بخاف اعمل اى حاجة بخاف اتكلم بخاف اتصرف كنت بخاف مذاكرش بخاف اغلط بخاف اتألم تقدرى تقولى كده كنت خايف اعيش بعكسك انتى مبتخافيش من اى حاجة داخلة فى الدنيا بدراع مفتوح
حياتى الخوف كان مخليها باهتة من غير الوان كانت محتاجاكى تلونيها بالنسبالى انتى علبة الوان هتملا حياتى بالوان كتير
انا اختارتك لانى كنت محتاج حد يشجعنى ابطل خوف انا مكنتش بضحك قبل كده لانك مكنتيش معايا بس لما بقيتى معايا بقيت مببطلش ضحك خوفى قل كتير يمكن مختفاش بس قل وانا متأكد ان طول ما انتى موجودة هيفضل يقل يقل لحد ما يختفى انا لسه بخاف وبحس انى هتصرف غلط بس مبقتش بخاف اتصرف غلط قدامك
لسه جوايا خوف لسه فى حاجات مقولتهاش بس خوفى قل كتير وفرحتى زادت بسببك بقى فى حاجات بتحصل فى حياتى بقى فيها الوان كتير اوى
اصالة :انت بقيت شايفنى حاجة كبيرة اوى بعد ما اتخطبنا
كرم :لا انا شايفك حاجة كبيرة من قبل ما نتخطب وبعد ما اتخطبنا بقيت شايفك حاجة اكبر واحلى
اصالة :قولت ان فى جواك حاجات لسه مقولتهاش حاجات ايه دى
كرم :لا مش هقدر اقولها دلوقتى بس ممكن بعدين
اصالة :لو قولتلك انا كمان حاجة مخبياها تقول
كرم :حاجة ايه دى
اصالة :رد بس تقول ولا متقولش
كرم :اقول
اصالة :وعد
كرم :وعد قولى بقى
اصالة :انا كنت حاسة انى مستاهلش ان حد يتمسك بيا كنت حاسة انى محدش هيتمسك بيا فى حياتى خطوبتى الاولانية سابت جوايا خوف من الارتباط وقلة ثقة فى نفسى وفى انى استاهل يتعب علشانى وانى لما اتعب تعبى هيتقدر
بس انت ضيعتلى كل الخوف ده الكولكيعة اللى كانت جوايا دى انت فكتها مبقتش موجودة خلاص
دورك قول بقى
كرم :انا بحبك بقالى كتير اوى عايز اقولهالك وخايف مكنتش متخيل
انى هقدر اقولهالك فى حياتى بس كلامك شجعنى
عارفة يا اصالة انا بحبك من كتير اوى من سنين بس عمرى ما قدرت اقولك عمرى ما حتى قدرت اقرب منك واخليكى تشوفينى
سنين وانا بستجمع شجاعة علشان بس اقدر اتكلم سكت كتير لدرجة انك اتخطبتى لغيرى خسرتك مرة ومكنتش مستعد اخسرك تانى بس برضه مقدرتش اكلمك فكلمت عمى لما كلمته فى انى عايز اخطبك هو قالى اننا مش هننفع مع بعض لاننا مش شبه بعض فمش هنرتاح مع بعض وقتها انا قولتله كل الكلام اللى قولتهولك ده واكتر خوفى من انى اخسرك غلب خوفى من انى اتكلم ويكون كلامى غلط وقتها عمى طبطب على كتفى وقالى خدها منى كلمة بالف وعد اصالة بنتى ليك ومش لغيرك وصدق فى كلمته وانتى وافقتى
كنت خايف تزهقى منى ومن خوفى بس انتى مزهقتيش زى ما فكرت فيكى واتمنيتك لقيتك علبة الوان الوانها ملهاش عدد لونت حياتى البهتانة
انا بحبك يا اصالة بحبك ومحتاجك وحياتى بقت احلى كتير لانك فيها وكلاكيعى كلها اتفكت على ايدك وخوفى اطمن بوجودك
اصالة بابتسامة :طيب هو انا كده اسفة مرة كمان لانى كنت مفكرة انك معندكش قلب والحقيقة انى الحمد لله طلعت غلطانة لانك عندك قلب مفيش اطيب ولا اغلى منه
انا كمان بحبك يا كرم
كرم بسعادة :بجد
اصالة بابتسامة :بجد بحبك وبحب اصالة اللى انت شايفها دى بحبك وحبيت نفسى اكتر بسببك ربنا يديمك ليا
كرم بابتسامة :ويديمك ليا
كلنا جوانا كلاكيع كلنا عندنا عقد ومخاوف وبلاوى ما يعلم بيها الا ربنا لازم ندور على الناس اللى هتفك كلاكيعنا دى مش نقبل بناس هتذود كلاكيعنا وتكبر خوفنا لازم ندور على ناس تسهل حياتنا مش تصعبها اكتر واحنا كمان نسهل حياتهم مش نصعبها اكتر وتتفك كلاكيعهم على ايدينا
ادعو ربنا يرزقكم باللى يطمنو خوفكم وتتفك على ايديهم الكلاكيع اللى جواكم💖
#حكايات_منار
فضلا تدعو لابويا بالرحمة والمغفرة وان يسكنه الله فردوسه الاعلى هو وموتى المسلمين جميعا خصوصا من زال اثره فلم يزره زائر ولم يذكره ذاكر