حكايات منار

حكاية " اربع حروف "

راندا :انتى عارفة انا ايه اكتر حاجة قهرانى على نفسى على كل الوقت اللى ضيعته وانا بحبه وبهتم بيهم وبحلم بحياتي معاه
مريم :ايه يا حبيبتى
راندا :انى اكتشفت انه طلع عنده قلب عادى بس قلبه ده ممكن يحب اى حد غيرى
وان عيونه بتشوف الحلو ومش عامية بس عيونه بتشوف الحلو اللى فى اى حد غيرى انما الحلو اللى فيا هو اعمى عنه
وانه بيعرف يقول كلام حلو ومش زى ما قالى ملوش فيه
لا ليه فيه وبيعرف يقوله
بس لاى واحدة غيرى
استكتر عليا انه يحبني ويشوف الحلو اللى فيا استكتر فيا كام كلمة حلوين يهونو عليا طبعه الصعب ويخلونى اتحمل قسوة قلبه
هو كان كتير عليا يعملى كده
مريم :اهدى بس يا راندا
راندا وهى بتعيط :لا مش ههدى ردى عليا كان كتير عليا يحبني ويشوف الحلو اللى فيا ويقولى كلام حلو مكنتش استاهل
انا كنت مفكراه مبيعرفش يعمل ده اتحملت سنة خطوبة وقولت مادام مبيعرفش مش مشكلة اصبري عليه حاولى علشانه
اتحملت سنة وكنت مستعدة  اتحمل عمري كله والله يا مريم كنت مستعدة اتحمل عمرى كله وافضل بحاول معاه عمرى كله
مريم وهى بتحضنها :علشان خاطرى تهدى دموعك وكلامك مخليني عايزة اروح اديله مية قلم على وشه علشان نعمة ربنا اللى كانت فى ايده ومقدرهاش وضيعها من ايده
راندا وهى بتحضنها وبتعيط اكتر :هو طلع بيعرف يحب وحب بنات كتير اوى وهو خاطبنى طيب اشمعنا انا محبنيش
كان حتى حبنى معاهم حبنى زى ما حبهم
مريم :يا راندا هو محبهمش هو خانك معاهم ده واحد رمرام متعود على الحاجة الرخيصة طبيعى جدا لما تجيله حاجة غالية ميعرفش قيمتها وميعرفش يحافظ عليها
بس انتى عملتى الصح لما فسختى الخطوبة لما عرفتى انه بيخونك
راندا وهى بتمسح دموعها :انا مفسختش الخطوبة علشان هو بيخونى
انا فسختها لانى اكتشفت انه بيعذبنى انا بقسوته وقلة كلامه وتجاهله ليا فى اوقات كتير
فى حين انه مغرق بنات تانية باهتمامه وحبه وكلامه الحلو
لو كنت شوفت فى عينيه حب ليا مكنتش سيبته
مريم :وتكملى مع واحد بيخونك
راندا :لو بيحبنى وطلب السماح هسامحه
مريم:لو بيحبك مش هيخونك يا راندا اللى بيحب مبيخونش واللى بيخون مبيحبش
بالله عليكى اوعى يجيلك بعد ما يندم عليكى لانه ملقاش زيك ما هو مش هيلاقى زيك وهيرجع اوعى وقتها تقبلى بيه تانى او تصدقيه انتى تستاهلى واحد احسن منه بكتير والحمد لله ان ربنا نجاكى منه وبكره يجيلك اللى يستاهلك
راندا :انتى شايفة كده
مريم :انا متاكدة من كده
راندا :عارفة بسبب طريقته فى التعامل معايا بقيت حاسة انى مش حلوة ومستاهلش اى حاجة حلوة تحصلى
مريم بغيظ :اللهى يجيله ويحط عليه البعيد مطرح ما هو قاعد ربنا يديله اللى يستاهله على قد نيته السودا
صحيح صاحب العيب يبليك ويجيب اللى فيه فيك
بقى هو مخليكى انتى حاسة بكل ده حسبى الله ونعم الوكيل فيه اللهم ارنا فيه عجائب قدرتك انت الجبار المنتقم انتقملنا منه يا رب
راندا :خلاص كفاياكى دعا عليه
مريم :نعم ايه خايفة عليه
راندا :لا طبعا بس خسارة فيه حتى انك تدعى عليه
اهو راح لحاله بقى ربنا يسهله
مريم :ولو انى حاسة انى عايزة ادعى عليه لا يكسب ولا يربح ولا يشوف سهل فى حياته وحتى طلوع روحه يبقى بصعوبة
بس ماشى مش هدعى عليه علشان انا طيبة
راندا وهى بتضحك :طيبة جدا مش طيبة بس باين يا حبيبتى من غير ما تقولى
مريم :طيب والله انا طيبة بس مبحبش حد يجى على اللى منى
راندا بابتسامة :وانتى شايفة انى من اللى منك
مريم :ايوه طبعا بصى هو انا مش زيك حنينة كده وماشية ادلدق حب مكان ما اكون بس والله انتى مهمة عندى وزى اختى انا بحبك
راندا :بقالنا خمس سنين صحاب ودى اول مرة تقوليلى انك بتحبينى
مريم بحرج :ما هو علشان مبعرفش بس والله انما انتى تستاهلى اقولهالك كل يوم
عارفة انا بحبك النهاردة وبحبك فى كل يوم من الخمس سنين اللى فاتو ومتأكدة انى بكرة برضه هبقى بحبك
راندا :مريم بتقولى كلام حلو سجل يا تاريخ اشهد يا زمان
مريم وهى بتضحك :متتعوديش على كده بس
راندا :تصدقى بحبك بتاعتك فرحتنى اوى يمكن لو كان قالهالى مكنتش هفرح بيها كده
مريم :انتى بتقارنى بحبك بتاعتى اللى جاية بعد خمس سنين
ببحبك من عدو نفسه وعدو البشرية ده
لا معلش انا لا اقبل المقارنة دى
راندا وهى بتضحك :انا كمان لا اقبل انتى متتقارنيش بحد يا مريومتى ربنا ما يحرمنيش منك
مريم بابتسامة :ولا يحرمنى منك يا رب

احمد :مشكلتك ايه مع ولاء ومحمد مفهمتش انا برضه
مريم :معنديش مشكلة معاهم انا بس بحسهم ملزقين
احمد :ملزقين
مريم:اه شبه حبيبة الانستجرام عارفهم العيال دى اللى بيعملو لبعض أعياد ميلاد مفاجأة وطوب الارض بيبقى عارف انها مش مفاجأة ولا حاجة
اللى بيبقو صحاب فى الاول وبعد ما تلاتة مليون بنى ادم من متابعينهم يقولولهم انهم لايقين على بعض يكتشفو انهم لايقين على بعض فعلا ويرتبطو
ويفضلو بقى يعملو فى بعض مقالب سخيفة وتقيلة بيض والمفروض احنا نضحك
ويهرو بعض كلام حلو والمفروض احنا نقول اللهم علاقة حب زيهم وبتاع
احمد :عارفهم اه بس كرهتهم خلاص بعد كلامك
ايه يا بنتى مش كلهم كدابين
مريم :انا مقولتش كدابين انا قولت ملزقين
احمد :انتى مش عايزة تتحبى زيهم يعنى
مريم :وهو اللى بيعملو ده اسمه حب
انت مفكر الحب كلامهم الحلو اللى بالكيلو عبيلو واديلو ده
ولا انه رايح جاى يبوس فى ايديها مجرد ما عينيه تلمح ايدها لازم يبوسها متفهمش ليه مفكرها والدته باين ومش بعيد تلاقيه العاق مبيبوسش ايد مامته اصلا
احمد وهو بيضحك :انتى مشكلة طيب لو مش ده الحب بالنسبالك اومال ايه هو الحب
مريم :معرفش
بس الاكيد انى مش هبقى عايزة حاجات حلوة بتحصل قدام الناس ووقت ما ميبقاش فى ناس خلاص مفيش حاجة مفيش جمهور هنعمل شو ليه بقى ولمين
مش لازمنى كلام حلو كتير ولا حركات مجنونة ومفاجات بالهبل
انا عايزة بس حاجات تبقى من القلب يبقى صادق فيها بيعملها علشانى مش علشان الناس تقول انه عمل
حتى ولو كان بس هيبتسم فى وشى لما يشوفنى المهم انه يفضل طول عمره بيبتسم فى وشى لما يشوفنى
احمد :حلو كلامك
مريم وهى بتضحك :بقالى ربع ساعة بتكلم معاك فى مواضيع عاطفية ودى حاجة عكس طبيعتى غير الموضوع بقى علشان زهقت
احمد وهو بيضحك :طيب قبل ما اغير الموضوع عايز اسألك سؤال
مريم:اسألتك كترت انجز طيب
احمد :ليه مش مصدقة كلامهم الحلو عن بعض
مريم :مش عارفة يمكن علشان بحسهم مرتبينله كانهم بيسمعو بعض اغانى حافظينها
مش تلقائيين كده
عارف لما واحد يكون قدام بنت بيحبها وبيتكلمو فى اى حاجة فى الطب ولا الصناعة ولا حتى عن اسباب كساد سوق التجارة العالمى
ويجى هو مرة واحدة من العدم كده يقولها حاجة زى..
احمد قاطعها بابتسامة :عينيكى حلوة اوى
مريم :مثلا
احمد بابتسامة :والاحلى منها ضحكتك بتفرح قلبى
مريم :دى كمان تنفع المهم يعنى يقولها كلام حلو طالع من قلبه ملوش اى علاقة باللى بيتكلمو فيه وتسمع كلامه وتفرح ويكملو كلامهم الاولانى تانى عادى بعدها
ده بالنسبالى كلام حب طالع من القلب انا هصدقه هصدق ان اللى قدامى دول اتنين بيحبو بعض فعلا
انما جو سمعنى اى كلام حلو كتير بلا هدف كده ده انا مبحبوش وبحسه تلزيق
احمد :بصيغة اخرى بتحسيهم مصطنعين
مريم :جدا المهم يا باشا هتيجى فرح سعد
احمد :انتى هتروحى
مريم :اه كنت بفكر مروحش بس انت عارف ليلى اخت سعد تبقى خطيبة زياد اخويا فمينفعش مروحش
احمد :انا مبحبش الأفراح ودوشتها بس خلاص هاجى
استنى مش انا كتبت حاجة جديدة هبعتهالك
مريم :قشطا ابعت
احمد :
واهرب للكل منك والاقى انى مليش غيرك
ما تقوليلى طيب اعمل ايه علشان اجى فى تفكيرك
امتى قلبك يحنلى تبقيلى الحياة وابقالك قدرك ونصيبك
ها ايه رايك
مريم :حلو
احمد :بجد
مريم :اه انا مليش فى جو الشعر والكلام ده بس اللى انت بتكتبه بيعجبنى حقيقى حلو
ومش فاهمة مش بتنشره ليه
احمد :اللى يهمونى انهم يقروه بيقروه
مريم :يقروه مين هو انت بتخلى حد غيرى يقرالك
احمد :ميهمنيش حد غيرك يقراه
مريم :العيال صحابك لو قرو كلامك ده هيهروك سف كويس انك مبتخليهمش يقرو زيى
هقفل طيب علشان انام تصبح على خير
احمد :وانتى من اهله

بعد اربع ايام
فى قاعة افراح
احمد :انا سلمت على العرسان سلمتى عليهم
مريم :سلمت اه
احمد :فستانك حلو اوى
مريم :بجد
احمد :اه بس عارفة ايه عيبه الوحيد
مريم :لونه صح
احمد :لا لونه حلو عليكى حلو اوى مشكلته الوحيدة ان كل الناس دى شايفينك زى ما انا شايفك وانى مش لوحدى اللى شايفك
مريم وهى بتضحك :وهى الناس اتعمت علشان ميشوفنيش غيرك يا احمد تعالى طيب نروح نشوف البوفيه العظمة ده بيقول ايه

راندا :انتى عارفة ان احمد بيحبك صح
مريم :ان شاء الله لا
راندا :هو ايه اللى ان شاء الله لا وانا بقولك احتمال يبقى عندنا امتحان شفوى بكرة علشان تقوليلى ان شاء الله لا
بقولك احمد بيحبك بيحببببببببك
مريم :خلاص سمعتك بتسترسى على حرف الباء ليه انتى
راندا :مريم احمد بيحبك
مريم :خلاص وعهد الله سمعتك مش لازم تكررى الجملة
راندا :حبه واضح وضوح الشمس يراه اى كفيف
مش معقول مش واخدة بالك
مريم :لا واخدة بالى بس مش عايزة ده يكون حقيقى
راندا :ليه انتى واحمد صحاب من زمان وعلاقتكم حلوة جدا
مريم :علاقتنا حلوة كاصحاب لانى قادرة اديله اللى محتاجه منى كصاحبة ايش ضمنى انى هعرف اديله اللى محتاجة منى كحبيبة وزوجة
انا اصلا حاسة انى مش هعرف اكون حبيبة لاى حد
الاوبشن ده مش عندى
انا مبعرفش احب
راندا :ايه الهبل اللى بتقوليه ده
مريم :دى الحقيقة انا مش زيك يا راندا مبعرفش اعبر عن مشاعري بكلام
انا مش زى احمد احمد بيعرف يقول كلام حلو كتير
ده بيكتب شعر انتى متخيلة هو لاى درجة حساس ورومانسى ياخدنى يعمل بيا ايه مننفعش سوا
راندا :وليه بقى ان شاء الله مش هتنفعو سوا
مريم :علشان انا مش شبهه ومش شبهك
خايفة معرفش اقابل حبه بحب زيه فيكرهنى
خايفة معرفش ارد على كلامه الحلو بكلام حلو زيه فيزهق منى
خايفة كلامى وافعالى يحسسو انى مش مقدرة حبه خايفة اكسر قلبه يا راندا
خايفة طبيعتى المختلفة عن طبيعته تخليه يحس زى ما انتى حسيتى بسبب تامر
راندا :وهو علشان مش شبهك ميحبكيش
طيب ما انتى مش شبهى وانا بموت فيكى وبالنسبالى انتى اعز اصحابى
انتى مش زى تامر يا مريم ومستحيل تحسسى احمد باللى تامر حسسنى بيه
تامر انانى مبيفكرش غير فى نفسه ومبيعرفش يحب غير نفسه
بس انتى مش كده بدليل اهو انك خايفة عليه
مريم :خايفة عليه منى يا راندا
راندا :انتى محسسانى انك دراكولا ليه على فكرة انتى مفيش اطيب من قلبك ولا احلى من روحك
مريم :اهو انا معرفش اقول الكلمتين اللى قولتيهم دول
راندا :مش مهم المهم انك لما بتسمعيهم بتقدريهم وبتقدرى اللى بيقولهوملك
وعلى فكرة انتى على فترات كده بيطلع منك كلام حلو
مريم :على فترات اه قولى كل كام سنة مرة
راندا :مش مهم المهم انه بيطلع ونقص كلامك الحلو بتعوضه افعالك انتى جدعة جدا على فكرة انتى اجدع حد انا اعرفه فى حياتى
انا لو يجيلى واحد زيك كده اتجوزه فورا
مريم :بالظبط راجل بس انا بنت يا راندا
راندا :بنت وست البنات كمان
واحمد شايفك كده
مريم:احمد مش شايف يا راندا احمد بيحبنى واللى بيحب مبيشوفش بيفرح زى الأهبل بس
راندا :على فكرة القلب ليه عيون والبصيرة بتكون احسن من البصر فى اوقات كتير
مريم :يعنى هو شايفنى بقلبه
راندا :اه وقلبه شايف صح انا من موقعى هذا احب احيى احمد وقلب احمد على اختياره الاكتر من رائع
مريم وهى بتضحك :ايوه يا اختى طبليلى
راندا وهى بتضحك :والله ما تطبيل
طيب بكرة الايام تثبتلك الواد بيحبك ومش هيفرط فيكى اللى يلاقي انسانة زيك ميفرطش فيها يا مريم
مريم :ولا حتى علشان مبتعرفش تقول كلام حلو وعندها تخلف فى مشاعرها
راندا وهى بتضحك :ولا حتى علشان مبتعرفش تقول كلام حلو وعندها تخلف فى مشاعرها
هيلاقى حاجات تانية كتير اوى فيها تعوضه وتخليه ميقدرش يستغنى عنها
مريم :ماشى بس هو ان شاء الله مبيحبنيش لا
راندا :عندك حق هو مش بيحبك هو بيعشقك انا متأكدة

بعد شهرين
احمد :مش معقول كده كل فرح فستان أروع من اللى قبله
مريم وهى بتضحك :بجد حلو ماما اصرت اجيب فستان منفوش علشان قال ايه اخت العريس مش فاهمة ليه انا مش العروسة يعنى
احمد :والله العظيم احلى من العروسة اصلا
مريم :حبيبى تسلم والله يا باشا
احمد :عقبالنا
مريم :عقبالك انت كمان مع بنت الحلال اللى تستاهلك انت طيب وابن حلال يا احمد
احمد :انا مقولتش عقبالك انا قولت عقبالنا انا وانتى سوا مع بعض together
مريم :ايه
احمد :بصى انا عارف ان فى بنات بتتقل وان التقل صنعة
بس انتى مزودة العيار يا مريم ده كده مش تقل يا حبيبتى ده غباء
مريم :بص احنا نتكلم بصراحة انت عايز ايه من الاخر يعنى
احمد :عايز اتجوزك
مريم :طيب احنا نلف وندور احسن انت عايز ايه من الاخر يعنى
احمد وهو بيضحك :يا بنتى بقى عايز اتجوزك اظن مفيش صراحة ووضوح اكتر من كده
مريم :ليه
احمد :ليه ايه
مريم :ليه عايز تتجوزنى
علشان متربيين سوا وجيران واصحاب طول عمرنا
احمد :لا علشان بحبك ومتقوليش بتحبنى ليه علشان ده سؤال غبى
مريم :لا مش سؤال غبى وهسألهولك ليه يا احمد ليه انا
انا مش شبهك ولا انا احلى ولا أذكى ولا احسن بنت فى الدنيا يبقى ليه اشمعنا انا
احمد :علشان انتى مريم انا بحبك علشان انتى مريم
وفى عينيا انتى احلى واذكى واحسن بنت فى العالم ولا جه ولا هيجى زيك يمكن مش كل الناس شايفينك كده الحمد لله يعنى كانت هتبقى مصيبة والله لو كل الناس شايفينك زى ما انا شايفك
بس انا شايفك كده وبحبك وعايز اتجوزك
مريم :احمد انت عارفنى انا مش محتاجة احكيلك عن شخصيتى واقولك على عيوبى
احمد :انا عارفك يا مريم عارف عيوبك ومتقبلهم وعارف مميزاتك اللى اكتر بكتير من عيوبك وبحبهم وبحبك يا مريم
مريم بكسوف بتحاول تداريه :خلاص خلصنا انت علقت ولا ايه عرفت انك متنيل
احمد :متنيل ايه بقى لا ردى متنيل ايه
مريم :متنيل بتحبنى يا احمد
احمد :لا معلش كملى الجملة للاخر متنيل بحبك وعايز ونفسى وكل منايا واملى انى اتجوزك يا مريم
مريم :طيب
احمد :طيب ايه
مريم :كلم بابا يا احمد
احمد :ماشى هروح اكلمه
مريم :مش دلوقتى لاحظ ان النهاردة فرح اخويا الكبير
احمد :استنى اكلمه بعد الفرح يعنى
مريم :والله كلك نظر يعنى الراجل بيجوز ابنه
احمد :واعمل ايه يعنى ما انا عايز اتجوز بنته
مريم :يومين كده وكلمه
احمد :ماشى هستنا وامرى لله بس هما يومين مش اكتر

بعد اسبوعين
احمد :اخيرا اتخطبنا وبقيتى على اسمى رسمى
مريم :لا انت فاهم غلط على اسمى دى بتتقال بعد كتب الكتاب مش بعد الخطوبة
احمد :يا ستى انا فرحان وشايف انك بقيتي على اسمى بقيتى خطيبة احمد اخيرا مريم بقت خطيبة احمد انا فرحان اوى
مريم :يا رب دايما فرحان
بس انت من كتر الفرحة قررت تنزل من الشعر بتاعك كلام الناس تقراه
احمد :قصدك علشان اللى كتبته فى بوست خطوبتنا
مريم :اه فكرتك مبتحبش حد غيرى يقرء شعرك
احمد :ده حقيقى بس النهاردة انا فرحان وكنت عايز الناس كلها تعرف انى فرحان وانك بقيتى خطيبتي وانى بحبك انى بحبك اوى
مريم :
احمد :هتفضلى ساكتة كده
مريم :انا اسفة بس مش عارفة اقول حاجة
احمد :من غير اسف انا بحب سكوتك اصلا
اقولك اقرى اللى انا نزلته عايز اسمعه بصوتك
مريم :بس انا صوتى مش حلو
احمد :انا بحب صوتك
مريم :استنى طيب اجيب البوست...اهو جبته

وحبك موجة عالية وانا ماليش فى العوم
انتى فرحة صعب يستوعبها قلب ملياه الهموم
انتى ليه كده مرحة وحلوة اكتر من اللزوم
مقاومتى لحبك ضعيفة مقاومة طفل صغير للنوم
انتى عيد بعد عمر طويل اوى قبلك كان صوم

احمد :حلو اوى
مريم :كلامك
احمد :لا صوتك وانتى بتقوليه صوتك فرحان
مريم :ما هو ...انا...يعنى..فرحانة
احمد :فرحانة بخطوبتنا
مريم :فرحانة بانى بقيت خطيبتك يا احمد
احمد :حلوة الصيغة بتاعتك حبيتها اكتر

بعد خمس شهور
راندا :الف مبروك
احمد :الله يبارك فيكى
راندا :انا عارفة ان اكيد باباها ومامتها وصوك عليها وعارفة انك بتحبها بس مش قادرة امنع نفسى اوصيك عليها انا كمان
خلى بالك منها هى والله ما تستاهل غير كل خير
مريم دى احلى حاجة حصلتلى فى حياتى وان شاء الله هتكون احلى حاجة تحصلك فى حياتك انت كمان
احمد :حصلتلى خلاص الحمد لله مش لسه هتحصلى
ومتخافيش عليها مريم فى امان معايا
راندا :عارفة ربنا يسعدكم مريم انا هروح على ترابيزة اهلى
مريم :خليكى جمبى
راندا :بابا بيشاورلى هروح اشوف عايزنى فى ايه وارجعلك
مريم :ماشى يا قلبى
باسل :قوليلى يا مريم مين القمر اللى كانت بتباركلكم دى
احمد :انت بتعاكس فى فرح اخوك ياض
باسل :يا عم مش بعاكس والله استنى بس شكلى هحصلكم اهو
مريم :بتسأل بجد وهتيجى دوغرى يا باسل
باسل :سكة ودوغرى وعلى مياه بيضا هى مخطوبة او متجوزة
مريم :لا سينجل
باسل :ده مش هيستمر كتير هيتغير على ايد العبد لله قريب جدا
مريم بابتسامة :بعد الفرح هديلك رقم والدها كلمه اتفقنا
باسل بابتسامة :اتفقنا جدا
هروح لصحابي بقى يلا الف مبروك وعقبالى
مريم بسعادة :انا فرحانة لراندا اوى اخوك وقع واقف على فكرة راندا مفيش منها
احمد بابتسامة :والله هو اللى مفيش منها بجد هى صاحبة راندا اللى الحمد لله بقت بتاعتى
مريم :بتاعتك
احمد :ضايقتك الكلمة متضايقيش انا قصدى...
مريم قاطعته بابتسامة :انا بحبك
احمد بصدمة :انتى قولتى اللى سمعته بجد
مريم وهى بتضحك :اه الفستان الأبيض عامل شغل عالى فى مشاعرى
احمد :قوليها تانى
مريم :مسمعتهاش
احمد :لا سمعتها وعلشان كده عايز اسمعها تانى
مريم بسعادة :انا بحبك
احمد بابتسامة :وانا كمان بحبك اوى

بحبك
كلمة من اربع حروف مجرد اربع حروف بس لما بنسمعها من ناس معينة بتبقى بالدنيا عندنا
بتفرح اللى بيسمعها وبتهون عليه وقت حزن وفى مواقف كتير بتخلى اللى بيسمعها ترجعله ثقته فى نفسه بيحس انه انسان كويس انه يتحب
قولو للى بتحبوهم انكم بتحبوهم وقت الفرح قولوها ووقت الحزن والضعف قولوها وفى الاوقات العادية كمان قولوها على غفلة كده
اوعو تستهونو بيها او تقولو ما هما عارفين اننا بنحبهم
انتو متعرفوش الكلمة دى بتعمل ايه فى اللى بيسمعها ومهما تخيلتم مش هتتخيلو اثر الاربع حروف دول على قلوبهم بيكون عامل ازاى
اربع حروف فيهم حياة
قولوهم كتير بس قولوهم للى يستاهلهم وبس للى يستاهل يتقاله اربع حروف بالجمال ده 💖
#حكايات_منار

فضلا تدعو لابويا بالرحمة والمغفرة وان يسكنه الله فردوسه الاعلى بدون حساب ولا سابقة عذاب هو وموتى المسلمين جميعا خصوصا من زال اثره فلم يزره زائر ولم يذكره ذاكر