قــضـيــتــيــــــــے 🍂
ʙʏ { ᴘᴇᴛʀᴏᴠᴀ} シ︎
◽صباح نهار الحد ..
حليت عيني على جو زوين بزاف، مكنتش خدامة .. وجدت الفطور و درت موسيقى هادئة تريح ليا عقلي و تعاوني نحيد العيا د السيمانة !
قاطع اجوائي صوت الطيلي :
نسرين : الا ماسولتش فيك ماتسوليش نتي ، حرام !
- والله غير مع الخدمة راك عارفة كولشي انسرين ..
- واماشي مشكل اصديقتي راني عارفة لي كاين .. ولكن توحشتك خاصنا نتلاقاو ضروري!
- انشاء الله ، تانديرو شي وقت و نتلاقاو...
- صافي مشات ..
◽غير قطعت معاها ، جمعت الماعن ، درت غدا خفيف يوجد ومشيت جمعت البيت من للروينة و خليتو يتشمش ..
🔹الحياة؛ هي تكرفس و تعدب باش توصل تستاقر فيها ! ولكن.. غير كتقول لقيتها و هاهي تقادات ، حتى كتجيك شيحاجة من الجنب كاتقلب ليك كلشي وكاتصدق مهاود من لول !
و هادي ، باختصار هي حياتي .. منين عقلت على راسي وانا هكا حتى ولفت و مبقيتش كنتفاجئ! عقبات كتار دوزت و الحمدلله ،اليوم ، وليت هيثم عامر .. صاحب اشهر سلسلة مطاعم فالمغرب و الامارات !
..بدا نهاري بصلاة الفجر و خرجت نتمشا !
ساعة من بعد رجعت للدار دوشت بزربا ، و شعلت گارو مع قهوة فالفطور .. مانقدش ندوز صباح بلا بيه !
ضربات العشرة كنت فالريسطو مع الدراري..
هادا لي معايا على ليمن ، ياسين ، لقانا غير الشغف ديال الطياب تا ولينا صحاب عشران مكنتفارقوش .. كنتيق فيه بزاف وكنتشاركو انا وياه الخدمة كلها !
.. دخلنا للكوزينة و جمعت الدراري كاملين باش نوجدو الmenu لي غايكون بليل ...
قــضـيــتــيــــــــے 🍂
ʙʏ { ᴘᴇᴛʀᴏᴠᴀ} シ︎
[ 11:00 pm ]
◽ كملت شي ضواصا فيدي و صايبت قهوة باش اخيرا نقدر نقرا بيه واحد الرواية..
بديت كنقرا و مع كل سطر كنزيد نتبعو كيجرني لعالم الخيال، وكيفكرني فالخيال ديالي انا نيت !
طولت الشوفة فالسما عامرة ضباب و بلاما نحس ، لقيت راسي كنضحك فاش تفكرت فارس الأحلام ديالي ! الزين و الطولة والفورمة ..ولكن ،زين الوجه و زين القلب ! و عطيتو سمية ، هيثم !! على قلة السميات ..
شداتني الضحكة و انا كانفكر تا كملت روايتي بينما طاب نعاسي و دخلت لبلاصتي ...
[بعد مرور أسبوع ..]
[ 7:30 am ]
◽صونا الطيلي كنت ديجا فايقة كانطريني غير فالدار..
دوشت لبست حوايجي و خرجت فطريقي لخدمتي ! اليوم عندي النهار مشارجي ديال بصح.. خاص التركيز الكامل !
[ 11:30 am ]
..بدا النهار عادي فالبيرو من هادي لهاديك ، دوزت تلاتة دالقضايا فالمحكمة و عاد رجعت كملت الاجراءات فالبيرو عندي !
من بعد مشيت للكوميسارية على ود شي وراق و رجعت للكابيني باش نكمل الخدمة مازال ! ..
داز عليا الوقت هكا حتى أدن المغرب ، وصونا الطيليفون مقاطع روتيني ؛ نسرين .. :
الو زين..
- عيطت غير نفكرك فالعشا ديالنا اليوم ، كانعرفك منين كاتشغلي بالخدمة كاتنساي كلشي!
- لا غير تهناي فبالي ..
◽نسيتها گاع ! كنت كانفكر نمشي لدارري ونرتاح ساعة ، غير قطعت معاها ، كملت شغالي و خرجت بجاكيط فيدي نيشان للطوموبيل فطريق الريسطو لي نعتات ليا ...
دقائق كنت تما ! قاديت ماكياجي بالخف قبل مانزل ..
مع الدخلة دلباب تبهرت الصراحة ، ديزاين واعر بزاف ! كلاس .. و حتى الألوان متناسقين و يشهيوك تگلس بين حيوطهوم...
بانت ليا نسرين جاية عندي :
- على سلامتك ياختي !
- الله يسلمك ..
- زيدي طلعي راه كولشي مجموع الفوق ..
◽ طلعنا فالدروج نيشان لواحد البلاصة خاصة ! فيها طبلة دالزاج ضايرن بيها فوطويات صغار دجلد، و بالكون كيطل على المدينة بمنضر زوين...
عاد الوسط الطبلة دالماكلة بالكراسى لي كان كلشي مجموع عليها ..قربنا حداهوم :
- السلام عليكم .
ردو السلام و قدماتني ليهوم نسرين واحد واحد .. وخا مكانوش غراب عليا بزاف حيت اغلبهوم اصدقاء دراسة !
شديت بلاصتي فراس الطبلة و بقيت غير كنسمع لحواراتهوم فهدوء ..
حدايا على ليمن نسرين و راجلها حسام، حداها يحيى و صاحبتو ! و على ليسر كانت مروى و راجلها و حداها هدى و راجلها لي تاهو معروف : محمد ! ..
علاقتي بيهوم فالقراية مكانتش قريبة عكس نسرين دكشي علاش قررت نسكت و ماندخلش فالهضرة بزاف ...
..بقينا هكاك شحال و حاطين غير كيسان د العصير قدامنا بينما وصل وقت العشا !
انا قاتلني الجوع كليت وجبة وحدة فالنهار و ماعقلتش عليها گاع ! على الله غير ورا هاد الزواق و الديكور تكون ماكلة بنينة و كتشبع ..
على افكاري دخل واحد من السرباية من باب غير لي دخلنا منو!
لاحظت بلي الريسطو كامل هكا ..وخا كيبان سامبل ولكن لا حققتي فيه مزيان داير بحال متاهة ، بلاصة وحدة تقدر توصلها بكتر من طريق !
ماعلينا .. تحط العشا باشهى طريقة ، و كان بنين بزااف ! كليت تا شبعت وزدت گاع فوق قياسي ..
حتى كملنا عاد لاحضت الكرسي لي مقابل معايا كان خاوي ، و تاهو محطوط قدامو طبسيل ..
واش باقي غايتزاد شي حد زعمة ؟ ماجيت فين نضورها فراسي حتى كانشوفو داخل من نفس الباب بأناقة... اويلي ..
اويييييلي واش كنحلم!!!!
ʙʏ { ᴘᴇᴛʀᴏᴠᴀ} シ︎
___ #التــتـمـــة ___________
اويلي ..اويييييلي واش كنحلم!!!!
ناااري وا نفس الفورمة نفس الملامح نفس الشعر .. لا ميمكنش !!! راه تقول خرج من عقلي و تحط قدامي !! هو .. والله تا هو.. :
-بصحتكوم !
مروى : الله يعطيك الصحة ..
حاولت نغطي هاد الصدمة بقناع البرود منين وقف كيسلم عليا بنفس الابتسامة الساحرة لي رسمت فعقلي .. :
يحيى : فين غبرتي اليوم ؟ گالينا ياسين مادزتيش لهنا كاع !
- حيدت عليا غير شي خدمة عاد جيت ..
بقاو ثواني كيتبادلو خبارهوم وقلت الحمدلله لي ماتسوقش ليا ! ..
و كون غييير ماقلتهاش ، گالس فالكرسي لي مقابل معايا و هنا ، عاد شافني مزياااان ! بغيت نهرب ، بغست تحل لرض وتصرطني ..
طيلي لي كان كيضرني فراسي وليت كنطلب هالعار غير يصوني باش نهرب من عينيه لي تاهو حلف مايحيدهوم عليا !
اما صاحبتي نسرين عاوناتني بزاف .. :
نسرين : ماعرفتكش مزيان بالضيفة ديالنا .. ماريا صاحبتي! محامية .. ماريا ، هادا هيثم هو مول الريسطو !
واش سمعت مزيان ؟ كفااااش ..هيثم !!!! وهو مول الريسطو !! و قرا فالامارات و تزوج و طلق ياك ؟ لا غير زيدي تاهادي .. البرود اماريا البروود :
- متشرفين !
هو : الشرف ليا ..
نسرين : ماريا صاحبتي من لافاك، بحالك نتا و حسام !
شهاد الصدفة الزوينة !!
لي ماعارفاش هو حسام ، راجلها المحترم ، كان كيقرى فالامارات .. اوا صدفة هادي نيت و شمن صدفة !!
..هو باينة فيه شخص اجتماعي ، و لكن وخا هكاك مزعمش عليا و مطولش معايا الهدرة .. تانا بقيت كنحمد الله و نشكرو فلداخل ديالي و كنزيد نطلب مايحاشيهش ليا الليلة كاملة لا نصدق زابلاها !!
دبا نتي غير فهميني .. واحد كنت كنحلم بيه ليل و نهار ، ختارعتو فعقلي ، من سميتو من اوصافو وا حتى من صوتو اعباد الله كان نسج الخيال دياالي ! ودبا وقف قدامي فالواقع بلحمو و بدمو.. راه هرب ليا صافي !
دبا الديسير كنهبطو مع حلقي بحال الشوك .. انا راه گالسة متبتا مرزنة و ملامح جدية بزاف ولكن عقلي راه تسطى ، تفروح .. مرة مرة كتجي عيني فعينيه و كنحاول نخبي ، كانبان عادي بحال لي كنشوف اي واحد آخر !
◽بقيت گالسة شوية و غير كندير راسي كناكل حيت بصح تسدات ليا الشهية ، مابغيتش يحسو بلي ماحاملاهومش و لا شيحاجة ..
بقيت دايرة الصواب تا بان ليا الاغلبية كمل ماكلتو عاد جمعت النوضة :
- سمحوليا ، انا خاصني نمشي دبا !
نسرين : بلاتي بقاي معانا شويا تا نمشيو مجموعين !
- مرة خرى ، خليت غرق دالخدمة مورايا ، غير مابغيتش نضيع هاد الوقيتا الزوينة معاكوم وصافي ..
مروى : مرحبا بيك فاي وقت .. وهاد الگلسة مامحسوباش غاتعوضيها لينا !
- ان شاء الله ..
◽ هزيت سوارتي و هربت نيشان طالعة للطوموبيل و ديماريت ، بعدت شويا ، عاد رخفت فيا النفس و عاد قدرت نشوف مورايا .. راه مايمكنش ، موقف لا يحسد عليه و الله !
رجعت للبيرو لقيت كلشي مشا .. گلست متلفا راسي بالخدمة فداك الليل ، مابغيتش نفكر كتر !
قــضـيــتــيــــــــے 🍂
ʙʏ { ᴘᴇᴛʀᴏᴠᴀ} シ︎
نهار جديد ..
كيف العادة مشيت لخدمتي دوزت الصباح تما عاد رجعت فحالي للدار .. كنوجد الغدا و عقلي بلا ما نحس بدا كيفكر فيه ، هيثم !
من الخيال للواقع ، تجي معاها شي رواية هكا واعرة ...
من هضرتو لبارح ، بان ليا شخصيتو طالعة على أساس صحيح! و انا تقريبا هكا كنت نتخيلو ، زين الجسد، زين العقل ، و زين الروح .. يكون واخد حقو فزين ولكن عقلو عامر و عندو مايقول ماشي غير التخربيق ..
و بصح نيت البارح كان تيناقشهوم غير فالمعقول و كيهضر بوجهة نظر صريحة ، غير كيشوف التخربيق كيكتافي بالصمت مع ابتسامة خفيفة !
ايه اقلبي على ديك الابتسامة شحال من ليلة نعست وانا كنحلم بيها .. و شحال من نهار گلست و انا كنرسمها قدامي !
هدشي كامل ضرني فراسي ، و حمسني نعرف قصتو وحياتو ..
كفاش بدا كفاش دار هاد الريسطو ، واش هو مستثمر و لا طباخ بحال لي تخيلت ، عائلتو شكون هما ، واش مزوج واش بصح نيت مطلق .. بغيت نعرف عليه كولشي !
عرفتي ، هدشي كون وقعليا واحد 7 سنين ولا 8 سنين قبل كنت غنمشي نيشان نقلب فانسطا و نبدا نلاقي الخيوطا لي مغاديش ينفعوني بزاف .. ولكن دبا تمجهدت .. معاك محامية، المخير فالناس ضوصيه كيتحط قدامي بالتفاصيل ديال التفاصيل ! وهدا واحد من الاسباب علاش كنبغي خدمتي .. التبرگييييگ !
واحد الساعة و نص ، كانت حياتو كولها قدامي .. اوا بسم الله ..
(هيثم عامر )، 38 عام ، تزاد نهار 6 فشهر 6 ، مزوج ! .. و مرتو سميتها (كوتر باري) ! ماعندهومش الدراري ..
باه (عمر عامر )و مو (زينب نوار ) ! ومرت باه ( نجوى يعقوب )
عندو خوتو غير من مرت باه :( الياس و سارة ) ، مابيناتهمش بزاف دالفرق فالعمر ! ..
داير جوج فروع فدبي ، و واحد فالمغرب! هو لي كنت فيه لبارح...
يعني تبارك الله محقق نجاح .. قاري تخصصات فالمغرب و برا المغرب ،منهوم الطبخ ، الفندقة .. و على حساب مالقيت عليه حتى فغوغل اغلب الاطباق لي كيتقدمو هوما فالاصل اختراعاتو ووصفات اصلية ديالو !
وا الا كان الريسطو ديالو معروف لهد الدرجة فغايكون تاهو عندو حقو من الشهرة !
هنا فين كايجي الدور ديال انسطا .. وفعلا لقيت عندو الناس بزاف متبعينو ، و حتى دكشي لي كيبوسطي زوين .. تصاور مع ناس هكا معروفين ، تصاورو مع صحابو ، ديال السفر ، حتى مع عائلتو ...
كنت عارفة شخصيتو غتكون زوينة ، و باينة حتى الدوق ديالو كلاس غير من الديكور لي داير فالريسطو ..
نسيت الوقت و انا كنقلب فحياتو !!
انا والله تا انسانة كدخل سوق راسها بزاف وكنشري تيقاري .. ولكن هادا حالة خاصة ، عدريني ! ..
🔹صليت المغرب الله يقبل ، و شديت البيسي ..
ماريا ! سمية زوينة و مكنسمعهاش بزاف !
اما هي وسط دوك ملامح الجدية و التبات كااين واحد الزين بوحدو ! .. وتا شخصيتها باينة قاصحة و مكترحمش ، حاجة متوقعة بزاف من محامية !
.. دكشي لي عاودات ليا عليها نسرين الصراحة مكفانيش ، بلعكس غير شعل فيا العافية نزيد نعرفها و نعرف عليها كتر !
اول حاجة ، دخلت لانسطا د نسرين و قلبت تا لقيت الكونط ديالها .. بريڤي !
مابغيتش نزرب دبا و نصيفط ليها ، على الاقل تا ضور بيناتنا الهدرة .. ولكن فلول مارديتش البال.. ديجا دارت ليا فولو ، وا هادا بلان زوين عاوتاني ! ديك الساعة رديتها و غير شوية اكصيبطات ، دخلت كانشوف ليبوسط ديالها لي كولهوم تصاورها ديال السفر من بزاف دلبلايص !
و هادي اول حاجة كنتشاركو فيها ..
التصويرة لي فالبروفيل كانت مصورة مع ولد صغير ، جاية كيوت بزاف !
🔹الخلاصة ، البنت عايشة حياتها و مستافدة من كل نهار كايدوز عليها فاكثر الاجواء المسالمة !
هادي اكتر حاجة كتعجبني فالانسان ! من تجربتي انا ، كنقول غير عيش حياتك بالطول و العرض ، ماتعصاش الله و ماتخاف من تاحاجة خرى ...
◽.. كملت خدمتي و قاديت كولشي مع الموكل ديالي من الطيلي على ود القضية دغدا حيت مهمة بزاف ! ..
مكانبغيش نكتب على تفاصيل القضايا ديالي هنا حيت منين كنربحها بالطريقة لي بغيت ، مكنبغيش نعاود نفكر بزاف .. و منين كنربحها بالطريقة لي مبغيتش ، مكنحملش نشاركها مع تاحد كنخليها فعقلي و كنحللها مزيان باش منعاودش نطيح فالخطا !
اما الا خسرت ، ونادرا ما كيوقع هدشي ، فهاديك حالة بوحدها ...
قــضـيــتــيــــــــے 🍂
ʙʏ { ᴘᴇᴛʀᴏᴠᴀ} シ︎
◽ .. صبح الصباح ، العشرة و نص كنا فبلايصنا كنتسناو القاضي يدخل !
هادي قضية فيها اطراف مهمين و قضية رأي عام .. يعني حساسة بزاف ! ولكن ماتفاكيتش ..حيت العكس كون جا بنادم ، كان غادي يكون انا !
ساعتاين و لا كتر من بعد ..
و المرافعة مازال قايمة ، كلشي عيا و كلشي گلس على أعصابو ، ولكن فلخر تحكمات للصالح ديالها و ربحتها ...نجاح آخر و عبرة خرى زدتها للمسيرة ديالي !
طبعا الفرحة كانبينها هنا ، اما فالمحكة كنت محافظة على تصلب ملامح وجهي .. :
- الاجراءات د الوراق غادوزو عندي للمكتب باش نكملوهوم !
الموكل : شكرا على مجهودك معانا !
- انا درت غير خدمتي ! نخليكوم هاد الساعة ..
غير خرجنا من الروينة لي دايرة الصحافة باش تلقط الخبار باسرع وتيرة.. انساحبت مبعدة عليهوم تا كنسمع صوتو مورايا ..: - ماريا !
◽بلا توتر اماريا.. عاد ربحتي قضية قد الخلا و واجهتي ناس مساهلينش !! مواجهة انسان بسيط بحالو متغلبكش .. :
- هيثم !.. شكادير هنا ؟
◽سؤال غريب سوية حيت المحكمة ماوارتاهاش على با .. :
- كنت فالجلسة لي عاد دوزتي دبا ! تبعت القضية من لول و بقا عندي فضول نعرف النتيجة ..
- اه مزيان ..
◽كون غير سولتيني قبل كون عطيتك التفاصيل المملة مع كان قلبي طاايب و متحمسة للجلسة ! ولكن من الخير نيت مكنتش باغة نتعلق بيه كتر .. :
هو : بغيت غير نگول تبارك الله عليك ، ربحتي عن جدارة و استحقاق !
- شكرا .. شهادة كنعتز بيها !
هو : بنت بحالك فهاد العمر تربح قضية من هاد المستوى ، شيحاجة مهمة و بزاف ! .. [ جمع يديه قدامو ] مانطولش كتر و ندخل فالموضوع!
◽ انسان كيفهم راسو بزاف ! .. :
- مرحبا ..
- الا كان ممكن نمشيو لشي بلاصة كالم باش نهضرو !
- البيرو ديالي هو احسن بلاصة نقدرو نهضرو فيها ..
عطيتو العنوان فلاكارط ڤيزيت ..:
- من هنا لنص ساعة نسالي الاجراءات دالقضية و من بعد الوقت كولو ديالك !
[ حرك راسو ] وخا.. شكرا بزاف اماريا !
- مرحبا ..
مافكرتش تا دقيقة فهدشي لي وقع ، صافي براكة من التوتر و الخلعة ، و من اليوم غانعاملو بحال اي انسان عادي ! اصلا هو مزوج و انا حياتي غادة بنمط مختالف ...
◽داز الوقت فالبيرو ، كملت الوراق مع الموكل و سدينا القضية فمرة ، دزت لشغل اخر حتى وصل هيثم :
- وخا ندخل ..
- تفصل
گلس و بقا كيضور عينيه بإعجاب.. :
- البيرو ديالك زوين !
- شكرا .. تشرب شيحاجة ؟
- لا شكرا ..
◽ بقا ساكت شوية كيفكر باش يبدا ، تانا عطيتو وقتو و مازربتوش حتى هضر .. :
- عندي مشكل هكا قضائي و بغيت غير استشارة و لا نصيحة ..
- كنسمعك !
- منين غنبدا ..
- شنو الوضع القضائي ؟
- رفعت دعوة الطلاق و لكن الطرف لاخر ما وافقش ، و الجلسات دبا عام و هوما كيتأجلو على والو!! شنو نقدر ندير فهاد الحالة ؟
◽الطلاق !! هادي معلومة جديدة ... :
- وشنو السبب لي خلاك ترفع هاد الدعوة من لول؟
◽تنهد ساهي شوية فلرض و عقد حواجبو بانزعاج : الخيانة..
◽ماتوقعتهاش !.. حاجة بحال هادي كانسمعها كل نهار فخدمتي و عادي .. و لكن هنا ، سكت شوية .. و لسبب ما حسيت بلي انا السباب فلي طاري ليه :
- هادي قضية ساهلة الا كان عندك دليل ..
◽ضحك مفقوص و كاتم عصبيتو كيحرك راسو بالنفي ، فهمت بلي تصيد فبلان خايب :
- بلا دليل ، صراحة القضية غاتصعاب شوية.. ولكن ماشي مستحيلة!
- وشنو نقدر ندير ؟
- فلول ضروري المحامي ديالك خاص يكون عندو تواصل مع المحامي ديالها باش يعرف شنو باغيين و يلقاو حل وسط !
- المحامي ديالها رافض جميع انواع التواصل..
◽ هدشي ماهواش ! ضوروه ديال بصح، والمحامي ديالو غير مدوز بيه الوقت! قضية بحال هادي مستحيل نخليها توصل لعام .. :
- نهضر معاك بصراحة ؟
حرك راسو بإيماء : هي علاش كانقلب !
- مراتك باغة تستافد من الطلاق ما أمكن ! والا خلات ليك الفرصة تربح القضية غادي تخسر كتر. ما تربح ..
- انا ديجا مقرر نعطيها حقها و كتر !
[ سكتات بتفكير ]
-انا ماعرافاش تفاصيل دالقضية كلها.. وديجا عندك محامي لي بداها ، يعني غايكون فكر فكتر من حل قبل مني! ولكن الا بغيتي.. نقدر نتلاقا معاه و ناقشو حل لي يناسبك!
- انا ماعنديش مشكل .. غير ..( سكت شوية بتفكير ) مانكدبش عليك ، انا كنت كانفكر نبدلو فمرة !
◽وا راه خاصك تبدلو .. :
- القرار كيبقا ديالك طبعا و من حقك تختار شكون يمتلك..
◽سكت مطول فيا الشوفة ونطق : انا غانختارك نتي ..
◽ بلاتي عليا.. اول مرة غانتردد و نخاف نشد شي قضية ، وخا قادة عليها .. خفت تغلبني العاطفة و نميل لقلبي لي باغي ديك الرواية تحقق، زعمة هادا راه هيثم ! هادا لي كان شخصية مرسومة فخيالي و شاركني احلامي .. فنفس الوقت كانشوفو بصح مضرور و القضية واكلة منو معنويا كتر !
ماشي هكا كتبت قصتنا و ماشي هكا كتبت بدايتنا ! بغيت نزعم و تراجعت ..
شفت الأمل كيطفا فعينيه منين طول سكاتي و كان كيتسنا الرفض...
اودي.. الا هو تالف ، انا راه كتر منو ! ..
#يتبع ..
خليو ليا آرائكم فشخصياتنا و شنو كاتوقعو غايكون رد ماريا ، واش غاتشد القضية و تخدم بعقلانية و لا غاتخلي مشاعرها تحكم 👀 ؟