حكايات منار

حكاية " دكتورة نفسية "

انا اميرة عندى اتنين واربعين سنة دكتورة نفسية بحب شغلي جدا ومؤمنة بانى بعمل حاجة مهمة جدا جدا انا بحاول اساعد الناس اللي محتاجة مساعدة بحاول اهون عليهم واخفف عنهم وجع كبير حاسين بيه زيي زى دكتور العظام او دكتور العيون او اي دكتور بيعالج الم جسدى بالعكس الالم النفسي فعلا بيكون اشد من الالم الجسدى وكمان ممكن يوصل لالم جسدى
كسر الخواطر وجرح القلوب بيوجع اكتر من جراح العمليات والمرض انا مقتنعة بكده وعلشان كده اخترت اكون دكتورة نفسية اول مريضة جاتلي اعالجها لوحدى في حياتى كانت واحدة طلع عليها هى وجوزها بلطجية اغتصبوها وقتلوه كانو بقالهم بس تلت شهور متجوزين انا كنت بعيط معاها وهي بتحكى كل جلسة كنت بعيط معاها خدت وقت طويل فعلا علي معرفت افصل بين مشاعرى الانسانية وعملي كدكتورة علشان اقدر اساعدها خليتها تشتغل وتخرج للدنيا وتبدء من جديد هى لسه عايشة لسه عندها فرصة ان ربنا يعوضها عن اللي حصلها واتجوزت تانى وخلفت وسمت بنتها علي اسمى
انا بتعلق بالمرضي بتوعى فعلا وعلي قد ما بفرح انهم خلاص اتعالجو وبقو احسن علي قد ما بحزن انى مش هشوفهم ومش هكون في حياتهم تانى بس ده جزء من علاجهم انهم ميبقوش محتاجينلي ولا معتمدين عليا خلاص
بعد كل السنين دى في شغلي اتعلمت اتحكم في ردود افعالي ومشاعرى واتعامل مع المرضي بتوعى بشكل عملي وبعقل علشان اقدر اساعدهم من سنة في مريض عندى جالي العيادة وهو معاه موس وعايز يقطع شرايينه وانا بكل هدوء قلتله انه مش عايز ينهى حياته لو عاوز يعمل كده كان نط من فوق كبرى ولا وقف قدام قطر انما هو جايلي علشان عارف انى همنعه لانه مش عايز ينهي حياته هو لسه معشهاش علشان ينهيها وقلتله يقعد علشان نتكلم قعد وعيط وفي نص عياطه قالي انه جعان وطلبت ليا انا وهو اكل انا كمان كنت جعانة المريض ده كان اتعرض للاغتصاب وهو صغير علي ايد خاله المصيبه انه لما قال لامه سكتت وخلته يسكت خافت علي اخوها لجوزها يعمل فيه حاجة وخافت علي ابنها نفسه يتفضح وهو كبر وعنده اضطرابات نفسية فضلت سنتين بعالجه لحد ما الحمد لله اتحسن كتير  وحب واتجوز وعاش حياته بشكل طبيعي
بيتحرق دمى من الحالات اللي زى دى جالي حالات كتير كده اتعرضو للاغتصاب في سن صغير وعلي ايد ناس المفروض انهم اهاليهم اوقات بيكون اللى عمل فيهم كده خالهم او عمتهم او اجدادهم انتو متخيلين القرف وكم البشاعة في الموضوع والاهالي ياما نايمين علي ودانهم وميعرفوش حاجة عن عيالهم ياما لما بيعرفو بيسكتو ومبيعملوش حاجة وكأنهم جايبنهم الدنيا يعذبوهم وكأن ربنا مش هيحاسبهم عليهم وكأنهم مش امانة في رقبتهم
امانة بدل ميحافظو عليها بيضيعوها وبيدمروها بإيدهم
وصلت عيادتى وبعد ما شربت قهوتى طلبت من منيرة تدخلي اول مريضة دخلت فضلت دقيقة ساكتة وبعدين اتفتحت في العياط لمدة عشر دقايق بتعيط وبتشحتف وانا متكلمتش ومستنياها تخلص وتهدى لحد ما لاحظت ان عياطها قل فتكلمت

اميرة :مش كفاية عياط بقي وتحكيلي
ملك :احكيلك ايه
اميرة :تحكيلي اللي تاعبك وواجعك وجاية هنا علشانه
ملك :مش عارفة ابدءلك منين
اميرة :ابدئيلي من الاول من الاول خالص
ملك :انا ومازن ابن عمى طول عمرنا مع بعض من صغرنا واحنا مع بعض هو اكبر منى باربع سنين بس من صغرى وهو كل حاجة بالنسبالي وانا كل حاجة بالنسباله
هو اللي علمنى سواقة العجل لما قلتله انى هخلي بابا يعلمهالي رفض وقالي ان هو اللي هيعلمنى وهو برضه اللي خلانى ابطل اسوقها لما كبرت شوية وقالي انه عيب انا بقيت بنت ومينفعش اسوق عجل كان بيدينى عدية مجرد ما كان بياخد عديته من عمى كان بيدينى نصها انا كنت بفرح بالعيدية اللي باخدها منه اكتر من العيدية اللي باخودها من ابويا لما كان بيديهالي وقتها بس كنت بحس بالعيد
هو اللي خلى تعاملي معاه كوم وتعاملي مع بقية ولاد العيلة كوم تانى حتى اخواته هو نفسه
في مرة كنت راجعة من درس وواحد زميلي كان عايز يوقفنى علشان يقولي انه معجب بيا لسه هيبدء كلامه ملحقش معرفش مازن طلع منين وكله علقة موت كسرله دراعه وفتحله دماغه لما بابا سألنى قلت ان زميلي ده كان بيضايقنى كتير وعلشان كده مازن رباه لان بابا لو عرف انها اول مرة كان هيزعق لمازن وزميلي نفسه مقالش حاجة خاف من مازن
حتى غير المجموعات اللي مشتركة بينى وبينه فى الدروس ولو شافنى ماشية من شارع يمشي هو من شارع تانى من كتر خوفه من مازن اصل مازن ايده ايده تقيلة اوى
مازن كان عامل زي السور حواليا ومحدش كان بيقدر يعدى السور ده ويقرب منى حتى
اول يوم ليا في الجامعة مازن جه معايا طبعا مخرجش معايا من البيت كان بابا كسر دماغه ودماغي علشان مينفعش
بس استنانى علي اول الشارع وروحنا سوا ولما وصلنا عند الجامعة قبل ما ادخل لقيته بيقولي
مازن :دى مرحلة جديدة في حياتك ومرحلة مهمة كمان عايزك تخرجى من المكان ده احسن مدخلتيه ومتسمحيش لاى حد مهما كان يغيرك للاسوء مش اي بنت تصاحبيها ولا اي بنت تتكلمى معاها
ملك وهى بتهز راسها ومبتسمة :حاضر
مازن :اه كمان هتلاقي جوا عيال هتلاقي عيال كتير اوى عايزك متعبريهمش انا بقولك عنهم عيال علشان هما مش رجالة اوعي تركزى مع واحد فيهم حياتك والدنيا كلها مفيهاش غير راجل واحد بس اللي هو انا غير كده كلهم عيال ميستاهلوش تبصلهم حتى
ملك وهى بتهز راسها ومبتسمة :حاضر..بس ليه
مازن بابتسامة :لانى بحبك ولو فكرتى بس مجرد تفكير انك تبصي لعيل من اللي جوا دول هقتلك هاتى ايدك
ملك :
مازن وهو بيمسك ايدها  وبيلبسها ساعة :الساعة دى هدية نجاحك في الثانوية عايزك تلبسيها دايما علشان تفكرك ان وقتك وتفكيرك كله بتاعى انا وحقي انا وبس فاهمة يا ملاكى
ملك بابتسامة :فاهمة بس دى اول مرة تقولي ملاكى
مازن :ما هى كمان اول مرة اقولك بحبك بس مش هتكون اخر مرة بعد كده مش هقولك غيرهم ومش هتسمعيهم من حد غيرى اصلا يلا ادخلي علشان متتاخريش
اميرة :وقت الجلسة خلص نكمل الجلسة الجاية
ملك :نكمل الجلسة الجاية

ومشيت ملك ودخل المريض اللي بعدها
اكمل :يا دكتورة انا حاولت اسمع كلامك صدقينى حاولت ومش قادر كل ما ابصلها مبشوفش فيها غير الست اللي قتلت ابنى وحرمتنى منه
اميرة :يبقي طلقها يا اكمل طلقها علشان هى اصلا بتتعذب اكتر منك وانت فوق كل ده محملها هى الذنب
اكمل بغضب : لانه ذنبها هي السبب هى اللي نامت وهى بترضع الولد لحد ما اتخنق ومات هى اللي ام مهملة هى اللي محافظتش علي ابننا اللي بقالنا خمس سنين مستنينه
اميرة :خمس سنين مستنينه زى ما انت قلت يعنى هى كانت مستنية زيها زيك ويمكن اكتر لان زى ما انت قلتلى العيب كان منها وكانت بتتعالج متخيل احساسها بالحزن علي ابنها اللي فضلت مستياه خمس سنين وبعدين فجأة راح منها متخيل احساسها بالذنب وهى شايفة انها السبب متخيل وجعها عليه وعليك وانت مش قادر تتعامل معاها من ساعتها ومبتكلمش معاها ولا بتاكل في البيت وبتنام لوحدك في اوضة الاطفال ومشيلها ذنب اللي حصل وسايبها لوحدها تواجه كل الاحاسيس دى متخيل ده صعب عليها قد ايه
اكمل وهو بيعيط :هى ...هى اوقات بتصعب عليا خصوصا لما بسمعها وهى بتصلي وبتعيط وبتدعى ربنا يسامحها على اللى عملته وبتدعى ربنا يهون عليها لانها تعبانة..بس مببقاش قادر اروح اقولها ان ده مش حقيقي وانه مش ذنبها لسانى مبيطاوعنيش ورجلي مبتقربش منها خطوة لو...لو مكنتش نامت كان زمانه عايش كان زمانى بشيله و بلعب معاه كان زمانى مستنيه ينطق ويقولي بابا بس هى نامت وقتلته وحرمتنى منه
اميرة :زى مقلتلك قبل كده مية مرة ده قضاء ربنا ابنكم لو مكتوبلة يعيش ساعة واحدة كمان كان عاشها بس ده عمره وخلص كان ممكن يعيي لحد ما يموت او تعملو حادثة بعربيتك وبرضه هو يموت دى مشيئة ربنا ومراتك مجرد سبب ربنا استخدمه اللي حصل كان غصب عنها  ابنكم اكيد في الجنة ومن غير ميتحاسب ملحقش يعمل حاجة يتحاسب عليها وبأذن الله يشفعلك انت وامه وتدخلوها بسببه ارحم نفسك وارحم مراتك يا اكمل وارضي بقضاء ربنا ولو مش قادر تسامحها علي غلط هى مغلطتوش  ولا كان ليها ذنب فيه يبقي طلقها وارحمها وكفاية توجعها اكتر من كده
فكر في كلامى وقت الجلسة خلص نكمل الجلسة الجاية
اكمل :ممكن اغير وقت الجلسة ليوم تانى
اميرة :ممكن طبعا عرف منيرة بره بالوقت اللي يناسبك وهى هتشوف هتعمل ايه وهتتصرف
اكمل بحزن : تمام بعد اذنك

بعد اسبوع
اميرة :كملي يا ملك انا سمعاكى
ملك :من بعد اليوم ده مبقاش بيقولي غير يا ملاكى لما نكون لوحدنا ومبطلش يقولي بحبك انا كمان قلتله انى بحبه مسكت نفسي شهر بعد ما هو قالها علشان يجى عيد ميلاده واقولهاله فيه وانا بديلة هدية عيد ميلاده عالسطح مكانا انا وهو اللي بنتقابل فيه من ورا كل اللي في البيت لاننا عايشين سوا احنا وعمى ابو مازن وهو لما قلتها كان طاير من الفرحة نظرة السعادة اللي كانت في عيونه يومها عمرى منستها
بعد ما عدى سنة ونص الاوضاع بنا كانت تمام كنا بنتخانق قليل ومبنتخاصمش لانى مقدرش علي زعله ومبعرفش اعمل حاجة من غيره وهو كمان
فى مرة كنا بنتخانق مازن طبعه عصبي فكان بيتنرفز عليا بس مش بيقول الفاظ في المرة دى شتمنى شتيمة وحشة اوى انا اتصدمت وحسيت ان قلبي هيقف لما سمعتها منه قفلت السكة والكلمة بتتردد في ودنى ومش مصدقة انى سمعتها من مازن هنت عليه يقولي كلمة زى دى ويهينى اهانة زى دى رن عليا كتير ومرديتش وبعت رسايل كتير يتأسف وبرضه مرديتش عدى اسبوع عالحال ده لحد ما في يوم رن كتير اوى مقدرتش مردش خصوصا انه كان فعلا وحشنى رديت طلب منى اطلع السطح طلعت ولقيته نزل علي ركبه الحركة اللي بيعملوها الاجانب دى لما يجو يتقدمو لواحدة بيحبوها
مازن وهو بيمسك ايدها وبيلبسها خاتم :تقبلى تتجوزينى
ملك :
مازن وهو بيبوس ايديها :انا اسف علي اللي قلته وعد مش هتتكرر تانى مش هتحمل تبعدى عنى تانى انتى مش عارفة الاسبوع ده عدى عليا ازاى من غيرك يا ملاكى انا بحبك وعايز اكمل معاكى بقية حياتى موافقة
ملك وهى بتهز راسها وبتعيط :موافقة
مازن وهو بيقوم يقف :خلاص بقي متعيطيش انا قلت لبابا يطلب ايدك من عمى وهنبقي ننزل نجيب سوا الشبكة ونحط الخاتم ده معاها انا جيبته علشان اتقدملك بطريقة رومانسية ومميزة لانك مش زى اي حد يا ملاكى ها فرحانة
ملك بسعادة :فرحانة اوووووى يا مازن بس متسوقش فيها وسيب ايدى متستعبطش
مازن :ماشي دلوقتى بس بعد كده هتبقي بتاعتى ومش هسيبها ابدا
اميرة :وحصل ايه بعد كده
ملك :بابا قالى ان مازن طالب ايدى بس بابا كان عايزنى ارفض لانه مكنش موافق بابا مكنش بيحب مازن وعلاقتهم ببعض عمرها ما كانت حلوة لانه شايفه مستهتر وملوش كبير وعمى مش قادر عليه بس انا اتمسكت بيه جدا وبابا في الاخر وافق واتخطبنا بعد خطوبتنا بشهرين مازن بقي بيشتمنى وواحدة واحدة شتايمه كترت واعتزاره عليها وندمه قل بس انا كمان كنت اتعودت لانى فعلا مكنتش بقدر استغنى عنه وهو برضه وسط كل ده كان بيعمل حاجات تفرحنى وبيقولي كلام حلو بعد سنة من خطوبتنا كنا بنتخانق لانه كان المفروض انه بيجهز شقتنا لانه طلب نتجوز قبل ما اخلص الكلية واقضى اخر سنة فيها واحنا متجوزين بابا كان رافض بس انا كنت موافقة وفي الاخر بابا قالي اولعى هو انتى اللى هتعيشي معاه وتتحملي قرفه ولا انا المهم مازن كان المفروض يشطب حاجات في الشقة اللي هنتجوز فيها بس هو خد الفلوس وباع عربيته وحط فلوس بيعها علي فلوس تشطيب الشقة واشترا عربية احدث وكان جاي يوريهالي وهو فرحان اوى انا اتعصبت وزعقت فيه وقولتله ازاي هيخلص الشقة كده في الميعاد اللي اتفق عليه مع بابا وقولتله انه ملوش كلمة وميعتمدش عليه راح ضربنى بالقلم عارفة يا دكتورة حسيت ساعتها الالم ده نزل علي قلبي قبل ما يكون نزل علي وشي او جرح كرامتى
هو فضل يتاسف بس انا مكنتش سامعه هو بيقول ايه فضلت ربع ساعة متسمرة مكانى وبعدين سيبته وطلعت جرى علي شقتنا عدى تلت ايام مكنتش بخرج فيهم من اوضتى حتى لا برد عليه ولا بقرء رسايله من اصله بس هو في اليوم التالت رن عليا كتير اوى فوق السبعين مرة رديت لقيته بيقولي اطلع فوق علشان نتكلم كنت هرفض بس صوته كان مكسور وحزين فمقدرتش وطلعت لما شفته افتكرت اللي حصل وحسيت بنفس الوجع التانى فاديرت وكنت هنزل
مازن وهو بيحضنها من ضهرها :انا اسف يا ملاكى والله العظيم انا ما عارف انا عملت كده ازاي اخر حاجة كنت اتخيلها في حياتى انى امد ايدى عليكى كانت تتقطع ايدى قبل ما اعمل كده سامحينى انا بقالي تلت ايام لا عارف اكل ولا انام ولا روحت شغلي مكنش قصدى والله مكنش قصدى غصب عنى عملت كده
ملك بغضب :غصب عنك عملت ايه بالظبط روحت جددت عربيتك بفلوس تشطيب شقتنا علشان تصغر نفسك وتثبت لابويا انه كان عنده حق ميوافقش عليك من الاول ابويا اللي وقفت قدامه علشانك مفكرتش هيبقي شكلي ايه قدامه وانت بتثبتله ان كلامه صح وان انا اللي غلط
مازن :انا اسف والله اسف
ملك وهى بتعيط :ولا اسف انك مديت ايدك عليا اول مرة في حياتى اضرب تبقي منك انت من اكتر شخص المفروض يحمينى ويحسسنى بالامان مش الخوف
مازن بندم :اسف وحياة ربنا اسف وهقضي بقية عمرى بنسيكى اللي عملته ده وهعوضك بس متبعديش عنى كده اليوم من غيرك طويل يا ملاكى والحياة صعبة اوى
ملك :خلاص شيل ايدك وسينى امشي انت استحليتها ولا ايه
مازن :بصراحة اه
ملك :وشكلي يبقي ايه لو حد طلع وشافنا مازن نزل ايدك وسيبنى بدل مهعضها خلينى انزل
مازن وهو بيسيبها :اه يا مفترية تعضينى لا وعلي ايه ادينى سيبتك بس متنزليش خليكى معايا انتى وحشتينى اوووى يا ملاكى هو انا موحشتكيش
ملك :
مازن :ملاكى انا موحشتكيش
ملك :لا وحشتنى يا مازن بس انت كمان وجعتنى اوى انت مش متخيل انت عملت فيا ايه
مازن وهو بيمسك ايدها يبوسها : خلاص بقي مش هتتكرر تانى اول واخرة مرة

اميرة :وكانت اخر مرة فعلا
ملك :لا مفيش حاجة بينى انا ومازن حصلت ومتكررتش تانى شتيمته ليا بالفاظ قذرة موقفتش مع انه وعدنى انه مش هيعمل كده تانى وضربه ليا ومسكه لايدى رغم انى في الاول كنت بعترض وللاسف كمان...احضانه اتكررت تانى كتير
مفيش حاجة عديتها وسكت عليها غير واتكررت سواء حاجة حرام وانا عارفة انها حرام وتغضب ربنا او حاجة غلط في حقى واهانة ليا بس تخيلي انا كنت ساكتة علي كل ده ومكنتش بغكر حتى مجرد تفكير انى اسيبه رغم كل اللي كان بيعمله ده بس هو مخلصوش عمل اللي مقدرتش اتحمله ومكنش ينفع اكمل معاه حتى لو روحى فيه وقلبي معاه بعد ما عمله
اميرة :وقت الجلسة خلص نكمل الجلسة الجاية
ملك :ان شاء الله

ومشيت ملك وجه المريض اللي بعدها
يوسف بابتسامة : اخبارك ايه يا دكتورة
اميرة :انا بخير انت ايه اخبارك
يوسف : انا تمام الحمد لله
اميرة :يا رب دايما
يوسف :امبارح خدت بابا وروحنا اتفرجنا علي ماتش كورة سوا فى الاستاد في الاول كنت متوتر وخايف ومبتكلمش بس بعد شوية بدات اتكلم معاه تخيلي طلع زملكاوى مش فاهم ازاى طاوعه قلبه ميشجعش الاهلي فريق الشياطين الحمر يلا ربنا يكون في عونه المهم هو كانه مصدق اتكلم معاه وفضل يكلم معايا وخرجنا اتعشينا بره واصر هو اللي يدفع المرة دى وقالى المرة الجاية تدفع انت انا فرحت هو كده عايزنا نكرر الخروجة
اميرة :ده ابوك يا يوسف ومعندوش ولاد غيرك يعنى محتاجك ومهيصدق انك تحاول تقرب منه خطوة علشان هو يقرب منك عشرة انت ابنه وهو بيحبك
يوسف بحزن :حتى لو مكنش موجود علشان يعبرلى عن الحب ده حتى لو مكنش موجود علشان يربينى حتى لو سابنى ليها تعمل فيا اللي هى عايزاه حتى لو مرجعش غير بعد ما هى ماتت يعنى مش علشان مش قادر علي بعد ابنه الوحيد
اميرة :ما هو رجع علشانك برضه علشان متبقاش لوحدك
يوسف  بغضب :لا رجع علشان تعب من شغله هناك موتها خلاه ياخد القرار اللي كان مأجله انما هو كان بقاله سنتين بيقول هيرجع ويستقر هنا موتها خلاه نفذ قراره مش اكتر
اميرة :المهم انه رجع يا يوسف ومحتاجك وانت كمان محتاجه كفاية عليه سنتين بتعاقبه ومتجاهل وجوده ده والدك مهما عمل هيفضل والدك وربنا هيحاسبك عنه
يوسف :ومش هيحاسبه عنى وعن اللي عمله فيا
اميرة :هيحاسبه يا يوسف بس انا بتكلم عنك انت ده والدك وانت مأمور ببره علشان ربنا يرضي عنك علشان ولادك يكونو بارين بيك
يوسف بحزن شديد :تفتكرى هيجى يوم وانسا واتجوز واخلف انا بحس ان كل الستات زيها يا دكتورة ما عدا انتى ما عدا انتى وبس
اميرة : هيجى متقلقش وكمان شكرا انك شايفنى كده بس صدقنى في ستات كتير مش زيها والاهم ان في بنات مش زيها وان شاء الله تقابل بنت فيهم وتحبها وتتجوزها
يوسف بتردد :هو...ااا...يعنى
اميرة :من غير لجلجة عايز تقول ايه
يوسف :اصلي يعنى وانا طالع شفت بنت واقفة مكانها متسمرة ومبتتحركش علشان كان فيه قطة وولادها الصغيرين علي السلم وهى بتخاف ده اللي عرفته لما سالتها هى واقفة كده ليه علشان يعنى لو محتاجة مساعدة اساعدها انتى عارفة انا مبحبش اتكلم مع ستات غيرك بس شكلها وهى واقفة خايفة صعب عليا المهم كنت هبعد القطة وولادها هى منعتنى وقالتلي انها ممكن تخربشنى علشان تدافع عن ولادها ولما سالتها ليه يعنى قالتلي علشان هى امهم ومفيش ام بتسيب حد يأذى ولادها وطلبت منى انزلها لحد باب العمارة علشان هى خايفة وشكلها كان محروج اوى وهى بتتكلم يا دكتورة وحلو هى كانت لابسة فستان ابيض وحجاب رمادى كانت شبه الملايكة شكلها يعنى اللي كده انما انتى عارفة اللي جوا مش بيكون زى اللي برا نزلتها وطلعت وانا بفكر انها يعنى طيبة لانها مسابتيش امشي القطة وخافت عليها وعلي ولادها مع انها كان شكلها مرعوب منها وخافت كمان عليا لتخربشنى
فانا فكرت انها ممكن تكون مش زيها ممكن مش اكيد ده مجرد احتمال جه في دماغي يعنى
اميرة بابتسامة :وممكن يكون تفكيرك صح برضه
يوسف :خلاص اهى راحت لحالها وانا هشوفها تانى فين كده احسن
اميرة :انت مش عايز تشوفها تانى
يوسف :ل..لا... لا طبعا واعوز اشوفها بتاع ايه انا مالي بيها اصلا
اميرة :وعلشان كده اتاخرت علي ميعاد الجلسة عشر دقايق وانت اصلا بتكره التاخير واللي بيتاخرو ودى اول مرة ليك في الميعاد ده بعد ما منيرة بدلت بينك وبين حد تانى في المواعيد انا قلت انك نسيت
يوسف : لا انا منساش ميعاد الجلسة ابد بس انا كنت بعمل خير يا دكتورة اسف مش هتتكرر تانى
اميرة بابتسامة :ولا تكرر مش مشكلة وقت الجلسة خلص نكمل الجلسة الجاية
يوسف بابتسامة :تمام اشوفك الجلسة الجاية خلي بالك من نفسك
اميرة بابتسامة :وانت كمان خلى بالك من نفسك ومن والدك يا يوسف
يوسف بتردد :هحاول يا دكتورة ...هحاول

بعد اسبوع
ملك :من تلت سنين كان يوم عيد ميلادى انا ومازن كنا بنخرج دايما نحتفل بيه سوا بالنهار في ميعاد الجامعة لاننا كنا بنخرج من ورا بابا لانه طبعا مكنش هيرضى الغريب ان مازن مطلبش منى نخرج قلت يمكن هيعملها مفاجاة ويجيلي الجامعة من غير ميقولي بس محصلش برضه فضلت كتير مستنياه بعد ما رجعت البيت لقيت واحدة بعتالي بعد الضهر كده بعتالى صورة مازن وهو نايم وكتبالى معلش نسي عيد ميلادك اصله كان معايا طول الليل ومنمش غير الصبح مكنش فاضي كان مشغول بيا فنسيكى ولقيتها بعتالي فيديو فتحته وانا خايفة بس فتحته...لقيت...لقيت مازن معاها فيه مقدرتش اكمل دقيقة واحدة فرجة رميت الموبايل وجريت علي الحمام وجبت كل اللي في بطنى كنت حاسة انى قرفانة من مازن قرفانة منه اوى خرجت كلمته
مازن :ملاكى اخبارك...
ملك قاطعته :كتك القرف ده انت مقرف بشكل بتخونى يا مازن وامتى يوم عيد ميلادى بتعمل فيا كده ليه طيب بلاش انا بتعمل في نفسك كده ليه بتزنى مش خايف من ربنا مخفتش اعرف وتخسرنى ده احنا كان ناقص على فرحنا اربع شهور يا واطى يا عديم الشرف والاخلاق
مازن :ملك اتكلمى عدل انا عارف انك مضايقة بس متنسيش نفسك
ملك :مانا نسيتها يوم ما حبيت واحد واطى زيك نسيتها يوم ما وقفت قدام ابويا علشان واحد رمرام زيك وميستاهلش يا مقرف يا معفن انت احقر انسان شوفته في حياتى
مازن بصوت عالي :مللللللللك لمى نفسك..
ملك : لا صوتك ده ميعلاش عليا انت خلاص متلزمنيش شبكتك النهاردة يا مقرف تيجى تاخدها
مازن :ملك انتى بتقولي ايه
ملك :لا متجرش ناعم يا مازن خلصت النهاردة تيجى تاخد حاجتك ولا اقولك انا هخلي بابا ينزلها شقتكم انت متستاهلش تدخل البيت ده تانى
كتك القرف كتك القرف يا مازن كتك القرررررررف
وقفلت السكة فى وشه وقلت لبابا اللي حصل وخليته ينزل الشبكة لعمى وكان مازن وقتها رجع بجح في بابا وقاله انه معملش حاجة لكل ده غلط زى ما كل الشباب بتغلط ومش هيكررها تانى خلاص وان الناس هتقول ايه واحنا بنفسخ الخطوبة قبل الفرح باربع شهور هيقولو هو عرف عنى ايه وقتها بابا ضربه بالقلم وقاله قطع لسانك يا عديم الرباية بنتى دى اشرف منك ومن مية زيك وهى اللي رخصت الغالي لما قبلت بيك بس خلاص غلطة واتصلحت واهي فاقت وشافتك علي حقيقتك عيل خسيس وندل انت تنسي ان ليك عم وبيتى ده انت متعتبوش برجلك تانى علشان ميشرفناش تدخل بيتنا يا احقر خلق الله انت
عمى كان واقف ساكت لانه عارف ان بابا معاه حق
مازن بقي بعد اسبوعين خطب واحدة كانت صاحبتى من وقت مخطبها وانا خلاص مبقيتش اعرفها هو خطبها علشان يغيظنى وهي وافقت علشان مكنتش تعرف عنه غير الحلو اللي كان بيعمله معايا بس انا مكنتش بحكى لحد الوحش ولا حتى بابا والا كان زمان خطوبتنا اتفسخت من زمان
وهى واضح ان كان عينها منه
بعد ما خطبها بشهر لما لقانى مش فارق معايا كلمنى كتير اوى لحد ما رديت قالي لو قولتيلي سيبها ووافقتى نرجع هسيبها وحالا انا قفلت السكة في وشه ومرديتش عليه لما سمعت صوته افتكرت الدقيقة اللي شوفتها في الفيديو اللي مقدرتش اكمله حسيت انى قرفانة منه وانى بكرهه ومستحيل ارجعله قبل كتب كتابهم كلمنى تانى وعرض عليا نفس العرض حتى يوم فرحهم كلمنى وانا بسمع ومبردش وبقفل السكة في وشه بعد ما هو اتجوز بست شهور يعنى بعد ما انا سيبته بحداشر شهر اتقدملى عريس كنت رفضت قبله يجى تلاتة اربعة بابا اصر عليا اقعد معاه وقالي ان عدى وقت طويل وانا لازم انسي واكمل حياتى قعدت معاه ووافقت واتخطبنا بعد خطوبتنا بشهر مازن كلمنى رن مية وعشرين مرة لحد ما رديت عليه
مازن :ملك متعمليش فيا كده علشان خاطرى افسخى الخطوبة دى متجوزيهوش يا ملك والله مهتحمل انك تبقي لحد غيرى
افسخى خطوبتك وانا هطلقها ونتجوز
ملك :انت ايه اللي بتقوله ده افسخ خطوبتى علشانك علشانك انت وانا عارفة ومتاكدة انك متستاهلش وتطلق انت واحدة ملهاش اي ذنب غير انها ربطت مصيرها بمصير انسان واطى زيك انت ايه مبتتغيرش مفيش فيك امل
مازن :اه مبتغيرش مش عارف اتغير وانساكى مش قادر والله ما قادر مش قادر اعيش حياتى مع حد غيرك ولا قادر اتحمل انك تكملي حياتك مع حد غيرى
انتى كدبتى عليا يا ملك لما قلتيلي انك بتحبينى اكتر من نفسك وانك مستحيل تبعدى عنى انتى كدبتى وانا صدقت كدبك
ملك :انا اللي كدبت انا اللي شتمتك بابشع الالفاظ ووعدتك مش هعملها تانى وعملتها انا اللي ضربتك وهنتك ودوست علي كرامتك برجلي واتاسفت وقلت مش هعملها تانى وعملتها تانى وتالت وعاشر انا اللي خنتك يوم عيد ميلادك واتبعتلك فيديو ليا وانا مع حد غيرك انا اللي بجحت في ابوك وقلت عنك كلام وحش انا اللي روحت اتجوزت صاحبك انا اللي لحد دلوقتى مش رحماك وبتصل بيك علشان ادمرلك حياتك
ها رد انا اللي عملت كل ده انا اللي كسرت قلبك مية حتة انا اللي دهست كرامتك تحت رجلى
مازن وهو بيعيط :لا انا اللي عملت كل ده بس مكنتش اعرف انها هتوصل لكده انا تعبان من غيرك يا ملك تعبان اوى قلبي بيوجعنى لما بتخيل انك هتلبسي لحد غيرى الفستان الابيض دمى بيفور لما بتخيل انك هتبقي علي اسم حد غيرى انتى سامحتينى علي حاجات كتير وعدتيلي حاجات كتير اشمعنى المرة دى مسامحتنيش وقلبك قسي عليا اوى كده وانتى اللي كنتى احن عليا من امى ده انتى عمرك مقلتيلي علي حاجة لا ليه اول مرة تقوليها تبقي قاسية ومفيهاش راجعة كده
ملك وهى بتعيط :علشان انت جبت اخرى يا مازن خدت كل حاجة وانا اتحملت وقولت انك بتحبنى بكرة تتغير انما مدام قدرت تخونى يبقي مبتحبنيش يا مازن
مازن وهو بيعيط اكتر :والله بحبك وعمرى محبيت ولا هحب غيرك
ملك :وانا ميلزمنيش حبك ولا انت نفسك تلزمنى يا مازن خلاص انا بقرف منك فاهم يعنى ايه بقرف منك لحد دلوقتى لما بفتكر شكلك في الفيديو المقرف ده بدخل الحمام اجيب اللي في بطنى من كتر ما انا قرفانة منك انسانى بقي واطلع من حياتى وسبنى انساك حرام عليك
مازن :افسخيها يا ملك علشان خاطرى وارجعيلي ملك..
قفلت السكة في وشه وبعد شهرين فسخت خطوبتى
اميرة :علشانه
ملك :لا علشانى
اللي مازن عمله خلانى مش قادرة اثق في اي راجل تانى
لو خطيبي اتعصب شوية افكر انه مسيره يجى يوم قريب ويشتمنى زى مازن ما عمل لو شوح بايده في الهوا اقول بكرة يبقي الضرب علي وشي مش في الهوا زى ما مازن عمل لما ينسي يكلمنى وينشغل افتح الفيس استنى الفيديو اللي هيجينى ليه وهو بيخونى زى مازن وعلشان كده فسخت الخطوبة
اميرة :بس هو مكنش شرط يعمل كده
ملك :بس انا افكارى دى كانت تعبانى وتعباه لانى كنت بعامله علي اساسها دايما شاكة فيه دايما مش مصدقاه دايما خايفة يحصلي من تانى كل حاجة حصلتلي
بس هو فكر زيك كده انى عملت كده علشانه ولقيته باعتلي علبة مليانة شيكولاتة كتير ومحطوط معاهم ورقة مكتوب فيها شكرا يا ملاكى وجنبها راسم قلب وكاتب بحبك
وانا راجعة البيت فضلت ادى منها للعيال الغلابة اللي في الشارع كنت بديهم ليهم ولاخواتهم واصحابهم واخر واحد اديتة العلبة باربع شيكولاتات كانو فاضلين فيها بالورقة اللي هو كاتبها ودعيت ربنا افرح زى فرحتهم بالشيكولاتة
انا زمان كنت بحبها وهو كان بيجبهالي كتير دلوقتى مبقتش اطيق اشوفها حتى وطعمها في بؤى بقي مر زى الايام اللي مرر احساسي بيها وبقت كلها عندى اسوء من بعض
كل ما كان بيجيلي عريس واقعد معاه اشوفنى بضرب وبتشتم منه واشوفه بيخونى فارفضه من غير ما افكر فيه تانى
ومازن كان بيكلمنى
كتير مكنتش برد بس هو عمره ما زهق ولو فتحت مبردش بس بسمعه بيفضل يحكيلي عن انه مش مبسوط من غيرى وان عمره مكان مبسوط الا معايا وكلمة بحبك عمرها مطلعت من قلبه غير ليا وعمره ما اتمنى غيرى تبقي مراته
ويحكيلي عن مراته اللي اتصدمت بمعاملته ليها كانت مفكرة انه هيعاملها زيى ويفضل يقولي انه مش قادر يعمل كده انا مليش زى ويحكي ويحكى ويحكى ومن وقت للتانى يجدد عرضه يطلقها ونتجوز حتى بعد ما خلف منها ولد وهى دلوقتى حامل
فى الاول كنت مفكرة انى برد علشان اسمعه وهو ندمان عليا وارضى كرامتى اللي هو جرحها بصوته وهو حزين وضعيف ومكسور وبيترجانى ارجعله وبعدين فكرت انى برد علشان اشمت فيه وفي ضعفه ده وبس
عارفة اكتشفت في الاخر انى برد ليه يا دكتورة
اميرة :علشان بتحبيه ولسه بيوحشك
ملك :لا انا بطلت احبه من تلت سنين من لحظة لما شوفت الفيديو حسيت انى شفته علي حقيقته وكأن كل اللي عمله فيا قبل كده وكل اللي عملته علشانه وهو مقدرهوش وكل الحرام والغلط اللي عملته بسببه اثره ظهر لحظتها واكتشفت انى مسامحتوش ونسيت ولا حاجة زى ما كنت مفكرة
انا فعلا من يومها بكرهه وبقرف منه
اميرة :امال بتردى ليه
ملك وهى بتعيط :علشان اخاف اكتر يا دكتورة علشان اشوفه اكتر واعرفه علي حقيقته اكتر واكتر واخاف اكتر من كل الرجالة علشان مأمنش بعده لحد
انا لسه واقفة عند يوم عيد ميلادى من تلت سنين يا دكتورة حياتى ممشيتش من يومها وتعبت والله تعبت واهلي تعبو انا حلفتلهم علي المصحف انى مستحيل ارجعله لانهم شاكو انى بعمل كده علشانه بس انا مش قادرة ادخل حياة حد وادخل حد حياتى مرعوبة مش بس خايفة ومش قادرة وعلشان كده جتلك علشان تساعدينى انا محتاجة مساعدتك انا محتاجة ارجع اعيش انا مش عايزة ارجع لمازن انا عايزة ارجعلي عايزة ارجع لملك اللي بتحب الدنيا والناس كلها اللي ضحكتها مبتفارقش وشها
ساعدينى ارجوكى
اميرة :اهدى يا ملك اول خطوة فى العلاج هى انك تعترفي بالمرض وانتى اعترفتى
اه انتى غلطى وغلط كبير بس مش هتقضي بقية عمرك بتدفعى تمنه
مازن مش كل الرجالة اللي في الدنيا يا ملك في رجالة احسن منه مليون مرة
زى ما مش كل البنات اللي فى الدنيا زى البنت اللي كان معاها في الفيديو
الدنيا فيها الحلو وفيها الوحش ولازم نتحمل الاتنين ونتعلم من الاتنين لو كلتى مرة اكل وحش وجالك تسمم هتبطلى تاكلي لا طبعا مينفعش كده تموتى من الجوع كل اللي هتعمليه انك بعد كده تاكلي اكل نضيف مش مغشوش
هو ده بالظبط اللي انتى لازم تعمليه تاخدى بالك تحرصى ولا تخونى مش تترعبي وتهربي من الموضوع كله
كمان خطك ده تغيريه وتجيبي واحد جديد ومازن ده تنسيه يا ملك يطلع برا حساباتك خالص
عايزاكى كمان تستغفرى ربنا عن اللي عملتيه علشان مازن وبسببه وتسامحى نفسك كفاياكى عقاب فيها
وقت الجلسة خلص نكمل الجلسة الجاية
ملك :نكمل الجلسة الجاية

بعد ملك كان دور يوسف
يوسف :النهاردة روحتلها المقابر بس مقدريتش اقرالها الفاتحة عدى قدام عينيا كل اللي عملته فيا ضربها ليا والايام اللي كانت بتنيمنى فيها من غير اكل علشان تعاقبنى وايام البرد اللي كانت بتخلينى اقضيها في البلكونة لو عصتلها امر وخيانتها لابويا
حسيت انى بكرهها بكرهها اوى يا دكتورة
مش امى لا دى مش ممكن تكون ام مفيش ام تعمل كده في ابنها
علاقتى بابويا بقت احسن شوية بس برضه حاسس ان في حاجز ما بنا مش عارف اصفاله واسامحه
اميرة :بس بتحاول وده المهم
ايه مجراش اي حاجة حلوة في اسبوعك تحكيها
يوسف بابتسامة :هو حصل..شفتها تانى
اميرة :البنت بتاعت المرة اللي فاتت بتاعت القطة
يوسف :اه هى وحصل نفس اللي حصل المرة اللي فاتت
اميرة :شكلك مبسوط
يوسف :مش لدرجة مبسوط بس.. ااا..هو الحقيقة انا مبسوط لما شفتها حسيت انى مبسوط شوية وانه يعنى هيبقي كويس لو شفتها تانى
اميرة :مين عارف يمكن تشوفها تانى قصدى تالت المهم نكمل الجلسة الجاية
يوسف :تمام نكمل الجلسة الجاية

بعد اسبوع
ملك :رميت الخط وكل الهدايا اللي كان جبهالي قبل كده حتى الهدوم اللي كان بيحبها عليا رمتها حسا انى بقيت اخف ومرتاحة اكتر بس برضه لسه خايفة يا دكتورة كمان هو ربنا هيسامحنى علي اللى عملته انا استغفرت كتير وتوبت والله ومش ناوية اعمل كده تانى ابدا بس برضه خايفة ربنا ميقبلش توبتى
اميرة   :هيقبلها  مدام من قلبك توبة نصوحة ربنا سبحانه حاشاه يرد تائب
واحدة واحدة هنرجع كل حاجة جواكى زى ما كانت في الاول واحسن هنبنى الي اتهد والغلط هنصلحه النهاردة احلي من امبارح يا ملك وبكرة احلي واحلي من النهاردة كمان
اتفقنا
ملك بابتسامة :اتفقنا
حاسة انى معنديش حاجة اقولها ممكن نكمل الجلسة الجاية
اميرة :نكمل الجلسة الجاية

بعد ملك دور يوسف
يوسف :انا واجهته
اميرة :والدك
يوسف :اه جه وسالنى انا ليه بعامله كده لقتنى انفجرت فيه بكل حاجة هى عملتها فيا وقلتله سبتنى ليها ليه كنت بتجمع فلوس اعمل بيها انا ايه تعوضنى عن غيابك بايه الفلوس تنسينى اللي هى عملته فيا ازاى واللي من خوفي منها مكنتش بحكيهولك وعرفته ان بقالي سنتين بروح لدكتورة نفسية علشان تساعدنى انسى اللي هى عملته فيا لقيته عيط وفضل يبوس راسي ويتاسف انه مختارليش ام كويسة وانه هيعوضنى هيقضي الباقي من عمره بيعوضنى
لحظتها بس حسيت انى قادر اسامحه انا سامحته يا دكتورة من قلبي سامحته
اميرة :ومقلتلوش انها كانت بتخونه
يوسف :لأ مقدرتش حسيت ان دى حاجة هتكسره وهى خلاص راحت للي خلقها ياخد حقى وحقه منها
انا...
اميرة :انت ايه
يوسف بسعادة :شوفتها تانى النهاردة وشكلها كان مبسوط وكانت زى ما تكون كده مستنيانى عارفة يا دكتورة وانا جاي كنت بدعى اشوفها وخلاص بقيت بعشق القطط لانها سبب انى شوفتها شوفت ملاك زيها
اميرة :هى كانت لابسة ايه
يوسف :فستان اخضر
اميرة :وحجاب بيج
يوسف :انتى تعرفيها
اميرة :دى ملك ميعاد جلستها قبلك علي طول
يوسف بابتسامة :اسمها ملك اسم علي مسمى فعلا
اميرة :يوسف انت فاهم اللي قولته معناه ايه
يوسف :اه معناه انها زيها زيي كانت عندها مشكلة وجاتلك تدورلها معاها علي حل مريضة وجت تطلب العلاج
انا هتقدملها يا دكتورة وهعرفها انى زيي زيها واحد محتاج مساعدتك
اميرة :اتقدملها وانا لو سالتنى عنك هقول احلي كلام
يوسف :تفتكرى هتوافق وتفتكرى ممكن يجى يوم تامنلي وتحكيلي فيه هى كانت بتجيلك ليه
اميرة :تفتكر هيجى يوم تحكلها انت كنت بتجيلي ليه
يوسف :مش عارف..بس حاسس انه اه انا مطمنلها
اميرة :وده المهم انك مطمنلها وهى كمان هى فعلا كانت مستنياك دى مكملتش الجلسة علشان تلحق تشوفك
يوسف بسعادة :بجد يا دكتورة
اميرة :بجد يا يوسف
يوسف :يعنى هتوافق عليا لما اتقدملها
اميرة بابتسامة :مبقيتش محتاجنى يا يوسف
يوسف بسرعة :متقوليش كده انا مستغناش عنك
اميرة :لا خلاص انت مبقتش محتاج مساعدة
بس ممكن تيجى الجلسة الجاية علشان تاخد منها رقم والدها وليك عليا اكلمها عن الفرص الجديدة والامل في الحياة والزوج وقرة العين والسكن والبنت ملهاش الا بيت جوزها لدرجة انها هتاخدك معاها وهى مروحة علشان تتقدم لاهلها
يوسف وهو بيضحك :والله انت اجدع دكتورة في مصر كلها

يوسف وملك كانو محتاجين بعض ده اللي حسيته من كلام يوسف لما شافها اول مرة وعلشان كده خليت منيرة تطلب من مدام لميا جارتنا في العمارة انها تطلع قططها قبل ما ملك تخرج
مدام لميا بتحب قططها جدا بس بيجى عليها وقت تزهق منهم فتخرجهم عالسلم كده وبعدين تشتاقلهم وتفتح تاخدهم وهما عمرهم ما مشيو دايما بيستنوها اوقات علاقات الحب بيجى في وسطها ملل وخنقة بس ده مش معناه نهاية العلاقة بس معناه ان فترة الراحة ولو كام ساعة هتكون حاجة كويسة
اول مرة يوسف شاف فيها ملك كانت صدفة فعلا كانت صدفة بس المرات اللي بعد كده كانت من ترتيبي انا قلت اعمل حاجة تقربهم ولو ليهم نصيب في بعض هيحصل حاجة بينهم ولو ملهمش خلاص
علاقتهم ببعض جزء من علاجهم وانتهاء علاقة يوسف بيا وبعده ان شاء الله ملك برضه جزء من العلاج مينفعش افضل دايما موجودة ودايما محتاجنلي هما لازم يحتاجو لنفسهم ولبعض وبس
يوسف اتقدم لملك وهى بتشجيعي ليها وكلامى معاها وافقت واديتله فرصة واصرو الاتنين انى احضر الخطوبة والفرح كمان قبل فرحهم بشهرين كانت خلاص ملك كمان مش محتاجانى بدأو حياتهم مع بعض وهما مش محتاجين غير بعض
واكمل طلق مراته لانه مقدرش يسامحها مع انه بيحبها جدا وصبر خمس سنين لحد ما اتعالجت وبقت حامل وخلفو وعمره محسسها انه عامل علشانها حاجة بس مقدرش يسامحها علي اللي حصل لابنهم مقدرش كل انسان ليه طاقة ولما طاقته بتخلص مبيكونش فيه حاجة ممكن تحصل 
هو قبل مايطلقها اداها عنوانى وقالها تجيلي وجاتلي وبقت بتتعالج عندى هى كمان بس ميعاد جلستها خلتها في يوم مختلف عنه طبعا
بعد سنة اكمل اتجوز تانى ومبقاش محتاجنى خلاص علاجه خلص وبعد سنة ونص مراته او طليقته كاميليا اتجوزت بس فضلت تجيلي لانها بقت حامل بعد ما اتجوزت علي طول وللاسف كانت بتخاف علي البيبي بشكل مرعب ففعلا كانت محتاجانى بس بعد ما تم سنة كنت الحمد لله قدرت اهدى خوفها ده واخليها تسامح نفسها اللي حصل كان قضاء ربنا وهي ملهاش ذنب وربنا عوضها اهو الحمد لله وعوض اكمل كمان وخلف ولدين وبنت ده اللي عرفته بعد كده
ويوسف وملك خلفو اميرة الاتنين اصرو يسموها علي اسمى وخلفو ماليكة يوسف اللي اختاره علشان قريب من اسم ملك من حبه فيها ربنا يديمهم لبعض
القرب من ربنا هو الحل لكل المشاكل لانه بيخليك انت نفسك من جوا احسن بس ربنا بيحب الاخد بالاسباب يعنى لو كنت فى مشكلة ومحتاج علشان تحلها انك تتغير يبقي اتغير محتاج تتعب يببقي اتعب ولو مريض ومحتاج لدكتور يبقي روحله حتى لو كان دكتور نفسي💖
#حكايات_منار
فضلا تدعو لابويا بالرحمة والمغفرة وان يسكنه الله فردوسه الاعلى هو وموتى المسلمين جميعا خصوصا من زال اثره فلم يزره زائر ولم يذكره ذاكر