ليل :خلاص يا بابا الموضوع ده انتهى
على :ليه بس يا ليل متعمليله اللي هو عايزه
ليل :اعمله ايه يا بابا اعمله ايه اخليه يقابل واحد ميعرفش عنى حاجة ورمانى انا وامى علشان يطلبنى منه هو واهله لازم يطلبونى من ابويا ويتفقو معاه علي كل حاجة وانا مليش اب غيرك يا بابا هو محروج يفهم اهله الوضع علشان مش هيفهمو مش قادر يتعب ويفهمهم علشانى مش عايز يحاول يا بابا وانا اللي ميقبلش بيا ميلزمنيش واللى ميقدركش يبقي ميلزمنيش
علي :يا بنتى بس هو انسان كويس فكرى بس...
ليل قاطعته :كويس لنفسه يا بابا ولواحدة غيرى
انا مليش اب غيرك ولو هو واهله مش هيفهمو ده ومش هيتقبلوه فخلاص مفيش نصيب
على :هتضحى بيه علشانى
ليل :انا اضحى بالدنيا كلها علشانك يا بابا
بس متكبرش الموضوع مش لدرجة تضحية ده مجرد عريس يعنى يروح يجى الف غيره انت مستقل ببنتك ولا ايه
على بابتسامة :ما عاش ولا كان اللي يستقل بيكى يا قلب ابوكى ده انتى ست البنات كلهم
ليل بسعادة :بفرح اوى لما بتقولي ست البنات دى
على :لانك ستهم وتاج راسهم كمان يا حبيبتى
انا هروح احضر العشا
ليل :هحضره انا يا بابا
علي :لا هحضره انا واكتبي انتى حاجة بقالك كتير مكتبتيش ووحشنى كلامك
ليل بابتسامة :بس كده انت تؤمر يا بابا
مسكت موبايلي فتحت فيس وفضلت افكر شوية وبعدين كتبت
حنيتك عليا بتشيل عنى همومى وبتنسينى مآسايا
بتفرح قلبى وبتطمن روحى وبتحلى الدنيا فى عينيا
مصدر قوتى ونجاحى وسر حبى ليك هو حنيتك عليا
#ليل_بلا_قمر
ليل :ها ايه رايك
على : ودى محتاجة سؤال حلوة اوى طبعا تسلم ايدك
ليل :كنت بفكر فيك يا بابا وعلشان كده كتبتها
على :بجد يا ليل
ليل :بجد يا قلب وعمر ليل انا مليش غيرك يا بابا ربنا ميحرمنى منك ابدا
على :ولا يحرمنى منك يبنتى
بعد سنتين
علي بتردد:ليل انا كنت عايز اكلمك في موضوع
ليل :موضوع ايه يا بابا متقولش عريس تانى كفاية انا مش فاهمة ليه مبيتقدمليش غير اغبيا حتى بعد ما مات برضه عندهم مشكلة في انك انت اللي ابويا ومش بيتعاملو علي الاساس ده وانا خلاص يا بابا شبعت من غبائهم وتعبت
على :وهتفضلي ترفضى لحد امتى
ليل :لحد ما يجى اللي يستاهلنى ويستاهل يحط ايده في ايدك اللي يستاهل تبقي حماه يا بابا
على :وده هتلاقيه فين
ليل :موجود يا بابا والدنيا واسعة ومسيرى الاقيه
علي :يبنتى المهم انتى انا مش مهم
ليل :انت مفيش اهم منك يا بابا ومش بعد كل اللي عملته معايا وعلشانى انا اتخلي عنك كمان انت جزء منى واللي ميقبلش بيك يبقي مقبلش بيا
علي :يعنى كلهم غلط يا ليل
ليل :اه يا بابا كلهم غلط واغبيا انا لو بعتك علشان واحد فيهم دلوقتى بكرة ابيعه هو نفسه وهما مش فاهمين ده خلاص مع نفسهم بقي ربنا يشفيهم
واضح كده ان الدنيا مفاضلش فيها رجالة غيرك يا بابا اخر الرجال المحترمين والله
على :بتاكلي بعقلي حلاوة
ليل :بعقلك وبقلبك كمان انا ليا مين غيرك يعنى ولا عندى مين اغلي منك
علي :تسلميلي يا حبيبتى انا مش عارف انتى كده سهلتى عليا اللي كنت عايز اكلمك فيه ولا صعبتيه
ليل :ايه ده هو مكنش عريس هو الموضوع امال ايه بقي
على بتردد :هو..انا..عايز ارجع اعيش مع اخواتى في البلد انا طلعت معاش خلاص وعيشتى هنا بقت تقيلة علي قلبي
ليل وفى دموع بتتجمع في عينيها :عايز تروح هناك من غيرى يا بابا
علي بسرعة :لا يا قلب ابوكى انا عايزك تيجى معايا انا مش ممكن اروح من غيرك ولو انتى رفضتى خلاص هفضل معاكى هنا
ليل :وارفض ليه مدام ده هيريحك يبقي خلاص نروح نعيش هناك
على :وهتسيبي حياتك هنا
ليل :انا لسه ملقتش شغل هنا ومليش صحاب ولو علي خالتى واخوالى هفضل بزورهم انا مليش غيرك يا بابا سواء هنا او في اي حتة في الدنيا
على :ربنا يريح قلبك يبنتى زى ما انتى مريحانى
ليل :المهم هنروح امتى
على :وقت ما تحبي
ليل :وقت ما انت تحب يا بابا بس يعنى...انت عرفتهم انى هكون معاك...يعنى هما هيتقبلونى وسطهم بشكل دايم
على :انتى بنتى يا ليل واللي ميقبلكيش يبقي كأنه مقبلنيش واللي يدوسلك علي طرف ادوس علي رقبته متخافيش علي نفسك يا حبيبتى
ليل :انا مش خايفة علي نفسي يا بابا انا خايفة عليك مش عايزة اسببلك مشاكل دول اهلك
على :هما اهلي وانتى بنتى متقلقيش مش هيحصل مشاكل ولا حاجة
انا ليل عندى تلاتة وعشرين سنة
وعلي ده يبقي ابويا بالنسبالكم وبالنسبة لاى حد هو جوز امى بس بالنسبالي هو ابويا انا مكنش عندى اب قبل ما امى تتجوزه معرفليش اب غيره
ابويا اللي بجد بالنسبالي هو اللي جوز امى او كان جوز امى لانه طلقها ورماها ورمانى لانه حب واحدة زميلته في الشغل وطلب يتجوزها وهى وافقت بس بشرط انه يطلق امى ويبدء معاها حياته من جديد كأنه متجوزش قبل كده وكأن دى اول مرة ليه زى ما كانت اول مرة ليها هى مكنتش اتجوزت قبل كده وكان سنها كبر شوية المهم ابويا وافق وطلق امى فورا ومسالش لا فيا ولا فيها وامى رجعت تعيش بيا مع ابوها وامها بس بعد كام سنة هما ماتو وامى كان لازم تتجوز هى كانت لوحدها واخوالي اصرو وهى وافقت هى فعلا كانت تعبت وهى بتربينى لوحدها واتجوزت بابا علي احلي حاجة حصلتلنا في حياتنا انا وهى
بابا علي وقتها مراته كانت ماتت بقالها تلت سنين وهو كان تعب وهو لوحده خصوصا انه كان في القاهرة لوحده واهله فى الشرقية تعب جامد وهو بيربي منى بنته لوحده وبيهتم بيها وبالبيت بيحاول يكونلها اب وام والموضوع كان فعلا متعب وبعد تلت سنين قرر يتجوز ماما كانت تبقى اخت صاحبه طلب يتجوزها وماما وافقت بس منى عمرها ما وافقت عمرها ما قبلت بأمى او بيا وعمرها ما سامحت بابا علي انه اتجوز لدرجة انها لما اتقدملها عريس بعد اول سنة ليها في الكلية وافقت واتجوزته وسافرت معاه ودخلت كلية تانية هناك وبدات فيها من الاول ومبتسالش علي بابا علي كتير
منى قلبها اسود اوى مش فاهمة ازاى مسامحتوش مع انه كتير حاول يراضيها وامى كتير كانت بتحاول تقربلها لانها كانت عزراها وكمان كانت عايزة تحافظ علي حياتها مع بابا على لانها كانت مرتاحة معاه جدا هو كان بيعاملها وبيعاملنى كويس جدا
طبعا كان بيعامل منى احسن مني لانها بنته بس كمان كان بيعمل كده علشان ميضايقهاش في العيد كان بياخدها هى بس معاه البلد ساعات امى كانت بتروح معاهم ووقتها كنت انا بفضل عند خالتى واوقات امى مكنتش بتروح معاهم وتغضل معايا بابا علي كان بيعمل كده علشان منى متضايقش لو روحت معاهم وهى عمرها ما قدرت اي حاجة هو بيعملها علشان يشترى خاطرها بابا علي بعد ما يرجعو كان بياخدنا ونخرج نتفسح علشان يعوضنى عن انى مروحتش معاهم هو كان حنين عليا اوى حتى لو اوقات كان بيجى عليا علشان منى بس انا دايما كنت حاسة بحنيته وكنت بحسد منى علي انها عندها اب بيخاف علي احساسها اوى كده وانا ابويا رمانى يمكن علشان كده مكنتش بزعل من اللي بابا علي بيعمله معايا علشان يرضيها
منى اكبر منى بسنتين انا كتير حاولت نكون صحاب انا وهيا بس هى مكنتش بترضي وانا مع الوقت بطلت احاول
بعد ما منى اتجوزت بسنة امى ماتت
انا كنت حزينة جدا عليها انا بحب امى حب ملوش وصف وكنت كمان خايفة انا كده هيجرالي ايه هعمل ايه في حياتى هعيش فين هبقي يتيمة اب وام كمان بس بابا علي طمن خوفى لانه رفض اروح اعيش مع خالتى او حد في اخوالي الاتنين
وقالهم انى بنته وانه مفضلوش غيرى كمان هعيش معاهم ازاى وهما عندهم ولاد رجالة هتتقيد حريتى طول الوقت هو اتمسك بيا جدا وانا لما سألونى وخيرونى من غير تفكير اخترت اعيش مع بابا علي انا عارفة انى مكنتش هرتاح مع حد فيهم مش بس علشان حريتى اللي هتتقيد زى ما بابا علي قال لا كمان علشان محدش فيهم كان هيبقي حنين عليا زى بابا علي لا اخوالي ولا جوز خالتى بابا علي ملوش زى في حنيته وانا عمرى ما حسيت ان عندى اب غير لما امى اتجوزته
وبقالنا خمس سنين عايشين انا وهو بس وجود بابا علي غانينى عن عدم وجود ابويا ومعوضنى شوية ومهون عليا فراق امى وانا وجودى معاه معوضه عن غياب منى انا وهو ملناش غير بعض
من تانى سنة في الكلية وانا بدء يجيلي عرسان وكلهم رافضين فكرة ان اي اتفاق هيكون مع بابا علي لانى مليش اب غيره ولو حد فيهم رضى اهله مبيرضوش
وعايزين الكلام يكون مع اللي المفروض انه ابويا اللي ميعرفش اساسا انا في سنة كام دلوقتى ميعرفش ولا فارق معاه يعرف عنى اي حاجة
هو مات من سنة وكتب كل حاجة باسم مراته وابنه وبنته منها يا ترى هيقول ايه لربنا لما يساله عنى لما يحاسبه علي اللي عمله فيا انا وامى
وحتى بعد موته برضه اللي بيتقدمولي عندهم مشكلة مع بابا على واحد فيهم كنا خلاص هنحدد ميعاد للخطوبة واكتشفت انه عايز بعد ما نتجوز علاقتى بيه تتقطع وانه مش فاهم بتاع ايه يفضل في حياتى ده حيالله جوز امى طبعا هزقته وقولتله انه ميلزمنيش وان ميشرفنيش لا انا ولا بابا علي
انا نفسي افهم في شرع مين كلامهم ده يرضى مين ان بابا علي يكبرنى ويعمل علشانى كتير ويكون زى ابويا واحسن ويكون جزاؤه انى اتجوز وانساه واطلعه من حياتى
هو ابويا مش لازم يكون اسمه جنب اسمى في البطاقة علشان يكون ابويا انا خدت منه اللي اي اب بيديه لبنته واكتر واللي اسمه بجد جنب اسمى في البطاقة لحد ما مات مخدتش منه حاجة غير اسمه وبس
وعلشان كده انا متخطبتش لحد دلوقتى ومش متضايقة انا عارفة انى بعمل الصح انا مينفعش اتخلي عن بابا علي ولا اسمح لحد انه بس يقلل منه
وادينا هنروح نعيش مع اهله انا مشوفتهمش غير مرات قليلة واللي اعرفهم اخواته هو عنده اخين واخت انما ولادهم انا معرفهمش كلهم المرات اللي روحت فيها البلد معاه كانت قليلة ومكنتش بتعامل معاهم اوى كنت محروجة شوية ودلوقتى هيبقي لازم نتعامل لانى هعيش معاهم وكمان علشان بابا علي يكون مرتاح ومبسوط وميقلقش عليا
انا مش عارفة حياتى هناك هتبقي عاملة ازاى ربنا يستر انا خايفة بس انا كمان عارفة انى مليش غير بابا علي ومكان ميكون هو هكون انا كمان وانى مينفعش ارفض اننا نعيش مع اهله هو عمل علشانى كتير ويستاهل انى اوافق علشانه
انا خايفة وكالعادة لما بخاف او بحس انى مضايقة بفكر فى نصي التانى نصي الحلو القمر اللي هينور ليلى
اللى هيكون حل لكل مشاكلى اللي هيكون تانى اهم راجل في حياتى بعد بابا علي واللي هيكون اول حد يسكن قلبي
انا بكتب الهاشتاج بتاع ليل بلا قمر ده علشانه علشان ده حالى من غيره وحالي وانا مستنياه
فكرت شوية بعدين مسكت موبايلي فتحت فيس وكتبت
ولو روحت اخر بلاد الله
برضه انت معايا
عمرى ما هحتاج حد غيرك
لقلبى انت كفاية
وجعك وجعى وفرحك فرحى
ولوحدتى انت النهاية
#ليل_بلا_قمر
بعد اسبوع كنا خلاص سيبنا القاهرة وانتقلنا عند اهل بابا على فى البلد هناك كان كل اخواته مستنينا كنت متوترة شوية بس هما كانو فرحانين ان بابا علي اخير زهق من عيشة القاهرة وهيرجع يعيش معاهم اخواته كانو فرحانين بيا او يمكن بيعاملونى كويس علشان بابا علي المهم ان تعاملهم معايا كان حلو كمان شفت اتنين رجالة وتلت بنات
الاتنين الرجالة كرم ومحمد ولاد اخوات بابا علي والتلت بنات فاطمة ودى متجوزة كرم هى تبقي بنت عمته ونيرة ودى مخطوبة لمحمد و انا حسيتها مش طايقانى مش فاهمة ليه ومريم ودى اصغر منى بس حسيتها طيبة اوى وشكلنا هنبقي اصحاب
اتغدينا وعدى اليوم وطلعت مع بابا علي شقته لان بابا علي ليه شقة هنا في بيت العيلة رتبت هدومى وهدومه علي قد ما كنت خايفة من عيشتى هنا علي قد ما كنت مبسوطة ان بابا علي فرحان ومرتاح واخواته كمان شكلهم مبسوط حاولت انام معرفتش لحد الفجر صليت الفجر وانا بدعى ربنا انى ارتاح هنا وانى احس انى وسط اهلي وانا بينهم دعيت ربنا يآلف بين قلوبهم وقلبي وبعد ما صليت حاولت انام معرفتش فتحت الشباك بتاع اوضتى اتفرج علي الشروق منه لقيت المنظر حلو اوى قررت انزل اتمشي في الجنينة تحت نزلت ولقيت في شجرة جوافة ورا البيت وبما ان مفيش حد صاحى قررت اطلعها اقعد علي فرعها وافتكرت جملة قريتها حلوة اوى بتقول "وإن كان في الشروق انشراح فأنت الفجر وانت الصباح "انا بحب الجملة دى جدا مع انى بصراحة مش فاهمة معناها اوى فضلت امرجح رجلي وانا بصا للسما والزرع اللي قدامى وعمالة اقولها وفجاة سمعت صوت
بدر :انتى مين وقاعدة كده ليه
ليل وهى بتبصله :انا...
بدر :سكتى ليه بقولك انتى مين
ليل :اصلي شفت
بدر :شفتى ايه وانتى مين
ليل :انا ليل
بدر :ليل مين
ليل :انت اللي مين
بدر :نعم ياختى انتى اللي في بيتى وانتى اللي بتسألي انا مين
ليل :يعنى انت من اهل البيت تمام يبقي هتفهم لما احاول اشرحلك انا مين انا ليل جيت هنا مع بابا على امبارح
بدر :اه انتى بنت مرات عمى الله يرحمها انتو جيتو امبارح نورتو انا اسف انا كنت مسافر ومعرفش ان عمى علي جه امبارح
ليل :ولا يهمك
بدر :انا بدر
ليل بصدمة :كمان ..كده كملت
بدر :نعم هى ايه دى اللي كملت
ليل :ها..لا مفيش حاجة معلش انا بس مخضوضة علشان كنت سرحانة لما انت جيت
بدر :اه صحيح انتى بتعملي ايه عندك
ليل :بتفرج علي الشروق
بدر :من فوق الشجرة
ليل :اه
بدر :طب انزلى
ليل :طيب ادينى ضهرك ...ااا...ويكون افضل لو طلعت
بدر :ليه ان شاء الله
ليل :علشان انزل
بدر :متنزلي زى مطلعتى
ليل :ما انا لما طلعت مكنش حد واقفلي زى عملي الرضى كده مكنش حد صاحى اصلا
بدر :يا سلام
ليل :بجد مش هعرف انزل وانت واقف كده
بدر :خلاص همشي بس انتى تنزلي وتدخلي البيت علي طول
ليل :حاضر
ومشى هو ونزلت انا وطلعت البيت وانا بفكر مين ده ازاي كده ده عينه زرقا بلون السما عينيه اوسع من السما اللي انا كنت قاعدة بتفرج عليها انا حسيت انى مش قادرة انطق لما بصتله وشفت عينيه لما سألنى شفت ايه كنت عايزة اقوله شفت السما في عينيك بس منعت نفسي بالعافية انى اقولها ده انا اللي بنت عينيا مش زرقا وهو يبقي راجل وعينيه زرقا يرضي مين ده بس يا رب لا وكمان اسمه بدر لما قال اسمه افتكرت كل اللي كتبته قبل كده عن القمر اللي هينور حياتى حسيت انى شايفاه قدامى خلاص ومش محتاجة استنى تانى بعد كده فضلت اشتم في نفسي انا بفكر في ايه ده انا لسه شايفاه ومعرفش حتى اذا كان خاطب ولا متجوز ومبصتش علي ايده اشوف اذا كان فيها دبلة ولا لا فلقتنى بشتم نفسي اكتر ازاي مبصتش علي ايده وفكرت يمكن يكون بيحب طيب ممكن تكون مين وبيحبها ليه وهى احلي ولا انا طيب هى احسن منى فى ايه وبقيت بشد في شعرى وانا هتجنن ايه اللي انا بفكر فيه ده انا حالتى بقت خطر وكده مينفعش
بصعوبة نمت وانا بدعى ربنا ان ده كله يطلع حلم صحيت طبعا علي ميعاد الغدا بابا علي قالي اننا هنتغدى تحت كلنا لبست ونزلنا وشفت السما تانى قصدى شفت بدر تانى يالهوى ده مطلعش حلم هو جه وسلم علي بابا علي وعليا وكأنه اول مرة يشوفنى حمدت ربنا انه متكلمش عن اللي حصل الصبح وانا هموت من الاحراج لوحدى اصلا قعدنا ناكل وانا بتجنب ابصله نيرة كانت بتتجنبي مش فاهمة ليه بس مريم كانت بتتكلم معايا عادى بعد شوية انا استأذنتهم اطلع مريم طلعت معايا ونيرة شكلها عايزة تولع فيا اصلا فطبعا مطلعتش معانا
طلعنا انا ومريم قعدنا في اوضتى وانا مقدرتش امنع نفسي انى اسالها عن العيلة بحيث تكلمنى واعرف اذا كان بدر خاطب او متجوز او بيحب
ليل :بس انتو ما شاء الله كتير وشبه بعض الواحد صعب يميز بينكم
مريم :لا خالص احنا محدش فينا شبه التانى كمان احنا اكتر من كده كمان بس في ناس متجوزة وعلشان كده انتى مشوفتيهمش
ليل :طيب عديهملي
مريم :بصي يا ستى عمى عبدالرحمن ده اكبر واحد مخلف كرم وده متجوز فاطمة ومخلف سامح بس ده عمل زى عمى علي ومتجوز وعايش في مصر ومخلف محمد اللي خاطب نيرة ومخلف نورا ودى متجوزة سالم ابن عمتى صفية
وبعده عمتى صفية ودى مخلفة سالم واحمد وده اخر سنة كلية طب والمفروض انهم هيخلونى اتجوزه بس انا مستحيل اوافق وفاطمة مرات كرم ورباب ودى لسه في اولي ثانوى
وبعد كده بابا عبدالله معندوش غيرى انا ونيرة وبدر بس كده
ليل وهى بتضحك :لا بسيطة فعلا ربنا يبارك انتو عزوة ما شاء الله بس هو بدر متجوز بره هو كمان انا في الكام مرة اللي جيتهم قبل كده مشوفتوش خالص اول مرة اشوفه النهاردة
مريم :لا هو بدر شغال مهندس بترول وبيقضي في شغله تلت اسابيع وبيجى يقضي معانا اسبوع فى الكام مرة اللي انتى جيتيهم هو كان بيبقي في شغله كمان اساسا انتى مكنتيش بتتكلمى مع حد فينا
ليل بحرج :انا اسفة انا بس والله كنت ببقي محرجة خصوصا انى بحس ان نيرة مش طايقانى
مريم :نيرة اختى طيبة والله لو قربتى منها هتكتشفى ان قلبها ابيض
ليل بابتسامة :اكيد يا حبيبتى كفاية انها اختك بس انا ممكن اسال سؤال لو مش عايزة تجاوبي خلاص
مريم :اسالي
ليل :انتى ليه مش عايزة تتجوزى احمد
مريم :بصراحة بحب واحد ومرتبطين ببعض ولما اتخرج كمان سنتين هيجى يتقدملى
احمد ابن عمتى انسان كويس بس انا مبحبوش اتجوزه ليه وانا مبحبوش وبحب حد تانى
ليل :هو معاكى حق فيها دى مش هناقشك
بس انتى غلطانة في حكاية انك مرتبطة دى مفيش حاجة اسمها كده ده حرام انتى بتاخدى ذنوب وبتغضبي ربنا في علاقتك بيه
مريم :بس احنا هنتجوز
ليل :الله اعلم اذا كان ده هيحصل ولا لأ كمان انتى لو موتى دلوقتى هتبقي ميتة علي معصية علي ذنب كبير واكيد مش هينفع تقولي لربنا انكو كنتو ناوين تتجوزو وتبقو حلال بعض
كمان انتى بتعملى حاجة غلط
مريم :ليه غلط
ليل :عمى عبدالله والدك يعرف انك مرتبطة بيه او بدر يعرف
مريم :بصراحة لا انا وبدر صحاب وبقوله كل حاجة بس برضه مش هقدر اقوله حاجة زى دى
ليل :علشان بتعملي حاجة غلط بتعمليها من ورا اهلك بتعمليها في الضلمة انما لو بتعملي حاجة صح كنتى عملتيها في النور قدام الكل ومخبتيش علي حد
مريم :بس انا محتاجاه يا ليل محتاجة حبه محتاجة اهتمامه انا معنديش صحاب غير بدر اخويا وللاسف شغله بيخليه مش دايما موجود وانا ونيرة اختى مش صحاب وفي الكلية مليش صحاب كلهم مجرد زمايل انا فعلا محتاجاه
ليل :حبيبة قلبي ده حرام حتى لو عندك اسباب قوية انك تعمليه برضه هيفضل حرام ومينفعش
كمان يا ستى انا وانتى هنبقي صحاب ومش هتبقي لوحدك تانى
مريم :بجد هنبقي صحاب
ليل :صحاب واخوات كمان انا معنديش اخوات وطول عمرى لوحدى ومن النهاردة انتى هتبقي اختى
بس انا عايزاكى تعرفى حاجة هو مش هيتجوزك لانه مش بيحبك ولا بيحترمك لو بيحبك كان حافظ عليكى كان اتقدم ودخل من الباب مش سرقك من الشباك زى الحرامية مكنش خلاكى تعملي حاجة هو ميقبلهاش علي اخته للاسف هو مش بيحترمك ووقت ميجى يتجوز مش هيتجوزك هيشوف واحدة من وجهة نظره محترمه ومكلمتش حد
مريم :لا عادل بيحبنى ومستحيل يعمل كده
ليل :طيب انا هثبتلك كلامى
مريم :ازاى
ليل :اطلبي منه يجى يتقدم وانتى هتقنعى اهلك انك تتخطبو بس وانتى بتدرسي ولو قالك ظروفه مش هتسمح قوليله ان دى مجرد خطوبة ويجهز نفسه وانتو مخطوبين وانكم ممكن تتخطبم سنتين تلاتة وانك هتستنيه اهم حاجة يبقى بينكم حاجة رسمى لانك تعبتى ومش هتقدرى تفضلي بتعرفيه من ورا اهلك اكتر من كده وخيريه ياما يتقدملك ياما ينساكى
مريم :ولو اتقدم
ليل :يبقي شاريكى بجد وتتخطبو وتتجوزو المهم متفضلوش بتعملو الذنب ده وبتعصو ربنا
مريم بقلق :ولو متقدمش
ليل :يبقي كان بيتسلي بيكى يا مريم وعمره ما كان هيتقدملك ويتجوزك وكان هيسيبك لما يزهق منك وساعتها تسيبيه انتى قبل ما هو اللي يسيبك تبعدى انتى عنه علشان عرفتى انه حرام وميرضيش ربنا وعلشان هو ميستاهلش لانه انسان مش كويس
مريم :انا خايفة هو ممكن يعمل فيا كده ممكن يطلع ندل زى ما انتى بتقولي
ليل :متخافيش يا حبيبتى انا معاكى وادينا هنعرف اذا كان يستاهل حبك ولا لأ
بس قوليلي هو انتو مبتتجوزوش غير من بعض يعنى كده بدر اخوكى المفروض يتجوز رباب
مريم :لا مش لازم سامح متجوز واحدة من بره العيلة عادى لما اصر عليها عمى عبدالرحمن وافق بس احنا فعلا بنحب نتجوز من بعض بابا واعمامى شايفين ان كده احسن مبيحبوش بناتهم يطلعو بره
بس معتقدش بدر ممكن يقبل يتجوز رباب هو اكبر منها بكتير دى بتقوله يا ابيه
ليل :امال هيتجوز مين
مريم :مش عارفة بدر اخويا ده اصله دماغ لوحده
استنى دى نيرة اختى بترن عليا...ايوه يا نيرة..لا هننزل حاضر...دقيقة واحدة ..نيرة بتقول اننا سيبنها لوحدها تعالى ننزل
ليل :حاضر يلا بينا
قلبي كان مش مطمن نيرة شكلها مش طايقنى تطلب انزل ليه طيب مريم عادى دى اختها انما ليه تطلب انزل انا كمان معاها نزلت واحساسي كان صح نيرة كانت عملالي كمين منزلانى علشان ترخم عليا لما نزلت كانو الكبار قاعدين سوا والشباب قاعدين سوا في الفراندا نزلت انا ومريم وقعدنا معاهم
كرم :منورانا يا ليل
ليل :تسلم يا رب ده نوركم
نيرة :اه صحيح انتى ليه اسمك ليل اسم غريب كده وتحسيه اسم ولد مش اسم بنت خالص
ليل :امى كانت عايزة تسمينى ليليان كانت عرفته من التلفزيون لما قالو الاسم للموظف متفهميش ازاى سمعه ليل وكتبه ليل بس انا بحب اسمى اوى وبحمد ربنا انى مبقاش اسمى ليليان بقي واتصرف كليليان واعيش عيشة ليليان لا الاسم مش لايق عليا
نيرة :معاكى حق مش لايق عليكى خالص
بدر :نيرة في ايه
ليل وهى بتضحك :لا عادى سيبها براحتها انا برضه شايفة انه مش لايق عليا انتو فرحكم هيبقي امتى انتى ومحمد
محمد بابتسامة :كمان اربع شهور باذن الله
ليل :ربنا يتمملكم علي خير
محمد :اللهم امين عقبالك
طبعا كلام نيرة ضايقنى وحرجنى خصوصا انى مش فاهمة هى ليه مش طايقانى كده بس عديت كلامها علشان معملش مشكلة وقررت انى هتكلم معاها وهحاول انا اقربلها علشان بابا علي انا عايزة امورى هنا تكون مستقرة وعلاقتى حلوة بالكل كمان نيرة تبقي اخت بدرى ومين عارف يمكن تبقي عمة عيالى في يوم يا دى النيلة انا مالي بقي بدرى امتى ايه اللي انا بفكر فيه ده بعد شوية طلبت من نيرة نقوم نتمشي انا وهي رفضت في الاول بس انا اصريت فقامت معايا
ليل :بصراحة كده ومن غير لف ودوران انتى مش طيقانى ليه
نيرة :
ليل :جاوبي وصدقينى اللي هتقوليه هيفضل بنا انا مش هقول لبابا علي حاجة
نيرة :بصراحة لانك انسانة انانية وعينك علي اللي في ايد غيرك بسببك منى كانت طول الوقت مضايقة ودايما بتحكيلي عنك وعن قد ايه انتى انسانة وحشة ومبيهمكيش غير نفسك وبسببك برضه اتجوزت وسافرت وسابتنى بسببك هى خسرت بابا علي وبسببك انا خسرتها بعدت عنى غصب عنها بسببك
ليل :مفيش حد بيبعد عن حد غصب عنه دايما بيكون في اختيار وهما اللي بيختارو يبعدو انا كان عندى واحدة صاحبتى بعدت عنى وكانت بتقول انه غصب عنها برضه بس صدقينى دى حجج فارغة لو مكنتش عايزة تبعد مكنتش بعدت
نيرة :ازاي يعنى
ليل :قبل ما اقولك ازاى خلينى اسالك سؤال تفتكرى بابا على مهما كان حنين عليا وبيحبنى هيحبنى اكتر من بنته الوحيدة اللي مبقاش ليها غيره من بعد موت امها تفتكرى ممكن يظلمها او يجى عليها علشانى
نيرة وهى بتفكر :بصراحة لا عمى علي ميعملهاش بس ما يمكن من غير ما يقصد عمل كده وانشغل بيكى عنها
ليل :ابدا بابا علي كان بيراعى منى في كلامه قبل افعاله
عارفة اوقات كان بياخدنى يخرجنى لوحدى من وراها ولما نيجى نرجع البيت يخلينى اطلع قبله علشان هى متعرفش حتى كان بيأكد عليا انى مقلهاش اننا خرجنا علشان هى متضايقش في العيد مكنش بيجبنى هنا علشان هى متضايقش مكنش بيدينى العيدية قدامها مكنش بيدينى حتى مصروفى قدامها اترجاها كتير متسافرش وتسيبه وبرضه سافرت وسابته وسابتك بابا علي كان بيعامل منى بطريقة كنت اتمنى ان ابويا يعاملنى بربعها حتى منى هى اللي مقدرتش اللي بابا علي عمله علشانها ولا حتى قدرت انه ابوها وهى بنته الوحيدة ومهما عمل ومهما سوى مكنش المفروض تتخلي عنه
ربنا يسامحها في اللي هى قالتهولك عنى واللي كله كدب ببساطة لاننا اصلا مكناش بنتعامل مع بعض علشان اعمل معاها حاجة حلوة او وحشة والله العظيم انا كتير حاولت اقربلها علشان بابا علي علشان هى بنته بس هى رفضت
امى الله يرحمها كتير حاولت تقربلها وتكسب رضاها ومنى عمرها ما رضيت عمرها ما فرحت ولا قدرت اي حاجة امى عملتها علشانها انا مش عارفة هى جايبة قسوة القلب دى منين ده بابا علي مفيش احن منه في الدنيا بتفكرنى بابويا يلا ربنا يسامحها ويسامحه
نيرة فضلت خمس دقايق ساكتة وبتفكر وانا احترمت سكوتها ومتكلمتش وبعدين بصتلي واتكلمت
نيرة :مقولتليش صاحبتك عملت فيكى ايه وبعدت عنك ازاى
ليل :لا مش هينفع احكيلك
نيرة :ليه
ليل :علشان احنا مش صحاب يا نيرة واللي هحكيهولك ده خاص بيا اوى ومينفعش احكيهولك الا لو كنا اصحاب وافضفض معاكى براحتى انما غير كده مينفعش دى اسرارى وانا اسرارى متطلعش لاى حد بس لو قبلتى اننا نكون صحاب انا هحكيلك وهسمع منك اي حاجة تحبي نتكلم فيها
نيرة:
ليل :خدى وقتك في التفكير وانا اتمنى انك توافقى انتى بنت اخو بابا علي يعنى شرف ليا انك تقبلي صداقتى
وسيبتها وطلعت وتانى يوم باب شقتنا خبط فتحت لقيتها هى
دخلنا اوضتى
نيرة وهى بتمد ايديها :انا قبلت صداقتك
ليل وهى بتحط ايديها في ايد نيرة :فرحتينى والله هروح اجيبلنا عصير واجى احكيلك بقي
بعد خمس دقايق
ليل :بصي يا ستى انا كان عندى صاحبة من اولي ثانوى واحنا اصحاب والمفروض اننا كنا اكتر من الاخوات واحنا في تالتة ثانوى هى حبت واحد جارها وارتبطت بيه نصحتها كتير تبعد عنه لانه غير ان حكاية الارتباط دى حرام
هو نفسه مكنش انسان كويس من اللي كانت بتحكيهولي عنه هو كان انسان صايع وبتاع بنات وملوش كلمة بس هى كانت بتحبه ومراية الحب عامية زى ما بيقولو المهم واحنا في اول سنة في الكلية هو اتقدملي طبعا مكنش هيتقدلها بعد ما من وجهة نظره المقرفة هى مشيت معاه واختارنى انا بقي علشان ينولنى شرف انى ابقي مراته انا طبعا رفضته علشان اولا هى بتحبه ثانيا انا مبحترموش وبقرف منه وبحتقره ومش معقول اتجوز واحد مبحترموش هو بقي بعد ما انا رفضته رجعلها واقنعها ان انا اللي لفيت عليه وفضلت وراه لحد ما يا عينى ضعف وراح اتقدملى ورفضته لأنى مش عايزاه وكنت بس عايزة اخده منها مش اكتر
نيرة :وهى صدقته ده كلام ميصدقهوش عيل صغير كمان انتو صحاب يعنى هى عارفاكى
ليل :هى مصدقتوش بس هى اختارته هو ووهمت نفسها ان اللي هو بيقوله صح وانه معاه حق لانها بتحبه ومكنتش هتقدر تبعد عنه اختارته هو وسابتنى انا وفي الاخر برضه سابها واتجوز واحدة غيرها
نيرة :وهى عملت ايه
ليل :جالها انهيار عصبي وبعدين واحدة واحدة بقت احسن وبعدين جاتلي تعتزرلى وتقولي انه كان غصب عنها وطلبت نرجع صحاب تانى وطبعا انا رفضت
نيرة :ليه
ليل :علشان مش هقدر أامنلها تانى يا نيرة مبقتش بثق فيها ولا هصدقها لما اتقولي اننا اكتر من اخوات وانها بتحبنى
هى اتخلت عنى واختارته هو ومش ذنبي ان اختيارها طلع غلط تتحمل نتيجته لوحدها كمان انا مش استبن وقت ما تحب تبعد عنى ووقت ما تحب تقربلي خلاص هى مبقاش ليها في قلبي ولا في حياتى مكان
نيرة :معاكى حق وحش اوى احساس الخذلان ده
ليل :وحش جدا عارفة اسوء حاجة انى قضيت فترة طويلة حزينة وفقدت ثقتى في نفسي بسبب اللي هى عملته واللي انا مكنتش استاهله بس الحمد لله علي كل حال
قوليلي انتى ليه قررتى تقبلي صداقتى
نيرة :فكرت في كلامك وفكرت في كلام بابا علي عنك وانك بتعملي علشانه اللي بنته اللي من صلبه معملتوش وانك رفضتى عرسان كتير علشانه علشان مقدروهوش وكانو عايزين يبعدوكى عنه وانك سيبتى حياتك في القاهرة علشانه
لقيت ان كلامك صح وكمان فكرت انى واضح ان غلطت لما صدقت كلام منى عنك من غير ما اتعامل معاكى بنفسي وانى كمان غلطت لما حملتك انتى ذنب بعدها عنى هى فعلا اختارت تبعد بدليل انها لما سافرت بقت مبتكلمنيش انشغلت في حياتها ونسيتنى وطلعتنى من حساباتها
ليل :وانتى مبتكلميهاش
نيرة :فى الاول كنت بكلمها بس حسيت ان تعاملها معايا مش زى الاول بطلت اتكلم علشان اشوف هى هتكلمنى ولا لأ ولما انا متكلمتش هى متكلمتش
انا كمان عملت زى صاحبتك وهمت نفسي انه غصب عنها وان انتى السبب شيلتك انتى الذنب ووجهت غضبي كله ناحيتك انتى مع انى عارفة انك ملكيش ذنب وانك حتى لو زى ما منى كانت بتقول عنك ده ايه علاقته بانها اتخلت عنى ونسيتنى بس انا كان اسهل عندى انى اوهم نفسي ان انتى السبب وعلشان كده كنت بعاملك وحش لما كنتى بتيجى مع بابا علي
ليل :خلاص يا ستى اللي فات مات نبدء مع بعض صفحة جديدة
انا كنت عايزة اسألك سؤال ده لو تسمحى طبعا
نيرة :اتفضلي
ليل :هو يعنى..من الاخر كده هو انتى مبتحبيش محمد خطيبك انا لاحظت ان هو فرحان بيكى وشكله بيحبك بس انتى لأ حاسة انك مش فرحانة بيه ولا بتحبيه
نيرة :بصراحة انا كان نفسي لما اتجوز اتجوز بعد قصة حب اسطورية نكون في الاول مش طايقين بعض ومطلعين عين بعض وبعدين تقلب معانا حب بقي ويكون هو ميقدرش يستغنى عنى وبيغير عليا من كل الناس حتى بدر اخويا ويكون دايما بيسمعنى كلام حلو يوقف قلبي من كتر السعادة ويبقي اختارنى انا دونا عن بنات الدنيا كلها
ليل :الله يخربيت الروايات اللي لحست دماغكم مش عايزاه بيطير وبينور في الضلمة وبيطلع نار من بؤه بالمرة
نيرة انتى كل كلامك ان هو هيعمل وهيسوى علشانك وانتى ايه دورك بقي هتقبلي اللي هو هيعمله علشانك بس مفكرتيش انتى هتعمليله ايه هتتعبي علشانه في ايه مفكرتيش في الحياة اللي بجد وضغوطاتها عليكى وعليه
كمان ايه مشكلة محمد مش فاهمة انا برضه
نيرة :احنا طول عمرنا قصاد بعض كمان محمد مبيتخانقش معايا خالص عمره لا زمان ولا دلوقتى وكمان خاطبنى علشان انا بنت عمه وخلاص ومبيسمعنيش كلام حلو خالص
ليل :مش علشان طول عمركم قصاد بعض يبقي هو مختاركيش العيلة فيها بنات تانية غيرك وهو نفسه اكيد شاف بنات تانية في كليته وفي شغله بس هو اختارك يا نيرة وحبه باين في كلامه باين فى شكله وهو بيبصلك باين في فرحته علشان فرحكم اللي قرب انتى اللي مش شايفة كل ده علشان واهمة نفسك ببطل الروايات اللي انتى كان نفسك فيه وعلشان كده مش واخدة بالك من البطل الحقيقي اللي في حياتك
فوقي من وهمك ده يا نيرة قبل ما تظلمى محمد معاكى قبل ما تخسريه علشان وهم مجرد وهم فوقي لانك لو خسرتيه يبقي مستحيل تعوضيه فوقي وركزى معاه وشوفي مميزاته وحسي بحبه ليكى وفرحته بيكى قبل ما يزهق ويبطل يحبك محمد يستاهل انك تحبيه يا نيرة وانتى لو ركزتى معاه وفي تصرفاته معاكى هتلاقى نفسك حبتيه بس انتى اديله فرصة انا خايفة عليكى تندمى في وقت ميفدش فيه الندم
نيرة وهى بتفكر :امممم..معاكى حق
نزلت هى شقتهم ومسكت موبايلي انا وفتحت فيس وكتبت
وتعدي سنين وانا بعشق كل شئ فيك❤
ويتغير اللى يتغير وقلبى دايما شاريك❤❤
انا جنبك وبحبك مهما الدنيا تيجى عليك❤❤❤
#ليل_بلا_قمر
طبعا مش محتاجة اقولكم ان دى رسالة معينة احب اوجهها لشخص معين اللى هو بدرى وان قلبي كان بيتقطع وانا بكتب ليل بلا قمر لانى خلاص حسا ان القمر جه
بعد اسبوع مريم طلعتلي وهى بتعيط وبتقولي ان عادل اتخلي عنها وسابها وانى طلع معايا حق هديتها وقولتلها الحمد لله انها جت علي قد كده وانها عرفته علي حقيقته وانه ميستاهلش تنزل من عيونها دمعة واحدة عليه
مع الوقت هي بقت احسن وواحدة واحدة تفكيرها فيه قل
ونيرة كمان الحمد لله اقتنعت بكلامى وعلاقتها بمحمد بقت احلي كتير وانا بقي بقيت بتجنب بدر بحاول علي قد ما اقدر اقلل كلامى معاه وانى مبصلوش لان في مرة عكيت الدنيا وحرجت نفسي حرجة سودا كنا قاعدين وانا غصب عنى كنت بصاله اوى وبفكر فيه وسرحانة وهو خد باله
بدر :انتى بصالي كده ليه
ليل :انا..انا مش بصالك انا بصا للسما وسرحت انت علشان قاعد قدامى بس فكرتنى بصالك انما انا هبصلك ليه يعنى
انا مكنتش بكدب انا فعلا كنت بصا للسما اللي في عيونه سمايا انا لوحدى بس هو طبعا ميعرفش
كمان غير انه كسفنى هو كمان حرجنى قدام اللي كانو قاعدين برج الحمار اللي بحبه ده من ساعتها وانا بقيت بحاول علي قد ما اقدر انى مبصلوش
فى مرة كنا خارجين انا ونيرة علشان نتفرج علي فساتين الافراح لان فرحها قرب وقابلنا واحدة صاحبتها
مشيرة :نيرة اخبارك ايه
نيرة :الحمد لله بخير فرحى قرب اهو اوعي متجيش هزعل منك
مشيرة :لا طبعا وانا اقدر مجيش معرفتنيش مين القمر دى
نيرة :دى ليل بنت عمى واعز اصحابى
مشيرة :تشرفنا يا ليل
ليل :الشرف ليا
مشيرة :انا همشي بقي عايزة حاجة
نيرة :لا سلامتك
بعد نص ساعة
نيرة :مالك يا ليل ساكتة من ساعة ما قابلنا مشيرة لحد ما وصلنا البيت اهو وانتى متكلمتيش معايا ولا كلمة حصل ايه
ليل وهى بتحضنها وبتعيط :شكرا يا نيرة
نيرة وهى بتطبطب عليها :اهدى بس انتى بتعيطى ليه وبتشكرينى على ايه
ليل :علشان قولتى لصاحبتك انى بنت عمك واعز اصحابك
نيرة :ما انتى فعلا كده انتى اعز اصحابي بحبي ليكى وبنت عمى بمعاملتك لعمى وبحب عمى ليكى انتى خلاص بقيتى واحدة مننا يا ليل ودى برضه حاجة تخليكى تعيطى
ليل :انا بعيط من الفرحة يا نيرة انتى مش متخيلة كلامك ده فرحنى ازاى وطمنى ازاى انا بحبك اوى
نيرة :خلاص بقي بطلي عياط انا كمان بحبك اوى
فى مرة كنا قاعدين كلنا في الفراندا بس محمد خد نيرة وقامو يتمشو ومريم قامت تعملنا كلنا شاى وفاطمة وكرم كانو روحو بيتهم هما ساكنين في بيت جنبنا المهم انى بقيت انا وبدر بس اللي قاعدين كنت لسه بفكر في حجة اقوم بيها لقيت بدر اتكلم
ليل :انا هطلع اجيب...
بدر :انتى مبتبصليش ليه
ليل :نعم
بدر :مبتبصليش ليه بتبصى للكل ما عدا انا ليه
ليل :لا عادى انت بيتهيألك
بدر :يعنى انتى مش بتتجنبينى وبتهربي من الكلام معايا زى ما كنتى دلوقتى بتدورى علي حجة تسيبينى وتقومى بيها
ليل :لا انا فعلا محتاجة اجيب..
بدر وهو بيقاطعها :انتى بتتجنبينى ليه بتهربي من اي كلام معايا ليه انتى بقيتى صاحبة مريم ونيرة اختى اللي ملهاش صحاب بقيتى اعز اصحابها محمد فرحان بوجودك لانه حاسس ان انتى السبب ان نيرة بقت بتعامله احسن بكتير من الاول حتى فاطمة وكرم بتتكلمى معاهم اكتر منى وولاد عمتى صفية كلهم انتى بتتعاملي مع الكل وبتتكلمى مع الكل وبتبصي للكل ما عدا انا ليه
ليل :انت مكبر الموضوع يمكن بس علشان انت بتبقي في شغلك اغلب الوقت وبشوفك اقل منهم مش واخدة علي التعامل معاك فبتعامل معاك اقل منهم شوية
بدر :انتى مبتتعامليش معايا خالص يا ليل وانا حاسس انك قصدا
ليل :انت واهم نفسك الحكاية مش كده
بدر :واهم نفسي
ليل :اه انا هطلع اجيب شال حسا ان الجو برد
وجريت من قدامه وانا بحمد ربنا انى مبوظتش الدنيا وقلتله انى بعمل كده لانى خايفة يبان عليا انى بحبه خايفة يشوف حبي في عيونى وانى لو عليا انا لا عايزة اتكلم ولا ابص ولا اتعامل مع حد غيره جبت الشال ولبسته ونزلت والحمد لله كان نيرة ومحمد رجعو ومريم رجعت بالشاى انا اصلا مكنتش حاسة انى هقدر اشوفه بعد كلامنا ده بس كان لازم انزل واتعامل عادى علشان مأكدلوش ان كلامه صح
بعد ما خلصنا قعدتنا طلعت مسكت موبايلي فتحت فيس وكتبت
احساس كبير على قلبى الصغير
احساس جميل وغالى لكن يحير
انى بحبك فوق ما انا اتصور
#ليل_بلا_قمر
هو انا ازاى بحبه اوى كده وليه انا مختارتش احبه والله
انا كنت مستنية اختيار ربنا ليا كنت هحب جوزى حلالي حب مفيهوش خوف من غضب ربنا حب مفيهوش خوف انه ميحبنيش ويحب غيرى حب مفيهوش رعب من انى يجى يوم احضر فرحه علي واحدة تانية اختارها ومختارنيش
انا كنت بحلم بيه وبتمناه بس متمنتش شخص بعينه انا اتمنيت حد ربنا يختارهولي وانا هشوف فيه كل احلامى وانا هشاركه كل الاحلام دى وهيبقي ليه وعنه كل اللي كتبته قبل كده ربنا اللي حط حبه فى قلبى لحظة مشوفته لحظة ما بقي كل الناس عندهم سما واحدة وارض واحدة وانا عندى سمايين سما فوقي زيى زى كل الناس وسما في عينيه ودى بتاعتى لوحدى ومش من حقي ابصلها ليبان عليا
يا وجع قلبي فى حبي ليك يا بدرى
جه فرح نيرة وفرحها كان جميل وهى كانت احلي عروسة شافتها عينيا والله انا كنت حاسة انى اختى اللي بتتجوز
بعد فرحها باسبوعين اتقدملي واحد من عيلتهم شافنى في الفرح بابا علي قالي وانا رفضت طبعا ولما سألونى قلت انى مش عايزة اتخطب دلوقتى ملقيتش حجة تانية اقولها بصراحة بعدها بيومين كنا متجمعين كلنا في الفراندا كالعادة ونيرة ومحمد قامو يتمشو وكرم وفاطمة مكانوش جم اصلا اليوم ده ومريم قامت تعمل شاى وفضلت انا وبدر لوحدنا بعد كده لازم ابقي انا اللي اعمل الشاى علشان مينفعش كده وحياة ربنا
يا جدعان هقوله بحبك ويبقي ذنبي في رقبتكم
المهم وانا لسه بتهبب افكر في حجة اقوم بيها بدر اتكلم
بدر :رفضتى قاسم ليه
ليل :قاسم مين..اه قصدك قريبكم اللي اتقدملي مانا قلت انى مش عايزة اتخطب دلوقتى
بدر :انتى مش مركزة في اسمه حتى لا واضح ان الليل بقاله قمر
انا كنت بصاله فطبعا جاوبت اجابة غبية زيى
ليل :اه ...ها قصدى مكنتش اعرف انك بتقرالي
بدر :متغيريش الموضوع يا ترى بقي قمرك ده في القاهرة وانتى مستنياه يشرفنا هنا يطلب ايدك ولا ايه
ليل :هو انت مش حاسس انك مزودها بكلامك ده معايا انت بتتكلم كده علي اساس انك مين معلش
بدر :انتى اللي قبلتى تيجى تعيشي معانا يبقي تحترمينا وتحترمى عاداتنا وتقاليدنا يا ليل وجاوبى سؤالى
ليل :انا بحترمكم يا بدر وقبل ما اكون بحترمكم فأنا بحترم بابا على وبحترم نفسي وعارفة حدودى كويس انا تربية بابا علي عمك واللي ميتقالش لواحدة هو مربيها الكلام اللي انت بتقوله ده كمان لا يا سيدى انا معنديش قمر في القاهرة مستنياه يجيلي هنا لو كان فيه مكنتش سيبته وجيت عشت معاكم هنا كان زمانى متجوزاه وعايشة معاه في القاهرة ومكنتش جيت هنا وشوفت وشك من اصله وسمعت منك الكلام الفارغ ده فوق يا بدر مش انا اللي يتقالي الكلام ده
بدر :انا اسف يا ليل انا مكنش قصدى انا..
ليل وهى بتقاطعه :اسفك مش مقبول لانه مش هينسينى اللي انت قلته ويا ريت طول الاسبوع اللي بتكون فيه هنا متتكلمش معايا ولا تتعامل معايا خالص
بدر :استنى بس انتى رايحة فين
مرديتش عليه وكنت قايمة علشان اطلع لقيته مسك ايدى
ليل بغضب :سيب ايدى احسنلك ايه مكفكش انك بتقلل من احترامى بكلامك فقررت تقلله بافعالك كمان
بدر وهو بيسيب ايديها :ما عاش ولا كان اللي يقلل من احترامك يا ليل انا اسف والله مش قصدى انا بس كنت عايز اوقفك انا مكنش قصدى اللي انتى فهمتيه من كلامى ده انا قولته من غيرتى والله
ليل بصدمة :غيرتك..غيرتك علي مين
بدر :يعنى هيكون علي مين عليكى طبعا
اتصدمت وكنت هسيبه واطلع من صدمتى
بدر :اثبتى بقي ومتخلنيش امسك ايدك تانى وتضايقي
ليل :ثبت عايز ايه بقي
بدر :عايزك تسمعينى انا بحبك يا ليل من ساعة ما شوفتك وانتى قاعدة علي غصن شجرة الجوافة تتفرجى علي الشروق وحسيت انى شايف لوحة فنية في معرض لوحة فنية محدش شايفها غيرى وحسيت انى مستعد ادفع عمرى كله تمنها وتبقي بتاعتى لوحدى من ساعة ما سمعت كلام عمى واخواتى والبيت كله عنك من ساعة ما بقيت بضايق انك بتتجنبينى وبتهربي منى دايما من ساعة ما قلبى ولعت فيه نار وانا بقرء الكلام اللي انتى بتكتبيه وفكرت انك ممكن تكونى بتكتبيه لحد معين من ساعة ما دمى اتحرق وانا بتخيل ان ممكن يجى يوم تتجوزى فيه وتسبينا من ساعة ما طلبت منهم يسيبونا لوحدنا علشان اعرف اكلمك قبل كده واتفقت معاهم تانى علشان اعرف اكلمك دلوقتى وعلشان كده محدش فيهم هيهوب ناحية هنا لحد ما انا اخلص كلام معاكى من ساعة ما حسيت انك مينفعش تتجوزى حد غيرى وانى مش هتحمل تبقي ليل حد غيرى
ليل :بس انتو مبتحبوش تتجوزو غير من بعض
بدر وهو بيضحك جامد :ده ردك علي كل اللي قلته يا ستى انتى خلاص بقيتى مننا ها قولتى ايه موافقة تتجوزينى
ليل :دى حاجة تطلبها من بابا على مش منى
بدر :مانا هكلمه انا عايز اعرف انتى موافقة
ليل :دى كمان حاجة تعرفها من بابا على مش منى
وسيبته وطلعت وانا حسا انى طايرة وقلبي هيقف من الفرحة بدرى بيحبنى وعايزنى ابقي ليله لوحده مطلعتش لوحدى اللي بحبه طلع هو كمان بيحبنى
مقدرتش امنع نفسي مسكت موبايلي فتحت فيس وكتبت
وفي ايديك الدفا وفى بيتك الامان
وفى عينيك السما وفى صوتك الحب وفى قلبك الحياة
اقولك ايه كمان بحبك ومن زمان😉😍💗
#بدر_انار_الليل
تانى يوم بابا علي قالي ان بدر طلب ايدى منه وطبعا انا وافقت انا كمان عرفت بابا علي انى بحبه وانه بيحبنى وعرفنى انه هيتقدم وسالنى عن رايي وانا قولتله رايي يعرفه منه
بابا علي بالنسبالى هو الاب وكل حاجة في الدنيا ربنا يباركلى في عمره يا رب
انا وبدر اتجوزنا بعد تلت شهور وبعد جوازنا بسنة خلفنا على طبعا اسم بابا علي ابويا اللي عمرى ما كان ليا اب غيره وبعده بخمس سنين خلفنا بنت سميناها نور
ومريم وهى في اخر سنة احمد ابن عمتها اتقدملها وهى وافقت بعد ما فاقت من وهم حبها لعادل
متعيشوش الوهم
وهم صداقة مش حقيقة زى صداقتى بصاحبتى او صداقة نيرة بمنى
وهم حب مش حقيقي زى حب مريم لعادل وزى حب صاحبتى للندل اللي اتخلي عنها
وهم كره مش حقيقي زى وهم منى ان بابا علي اتخلي عنها واختار امى ومفكرش فيها ووهم ان امى بتكرهها ووهم ان نفسي اخد مكانها وان بابا علي بيحبنى اكتر منها
وهم افكار غلط زى افكار كل اللي اتقدمولي وهما كل اللي يهمهم انهم يحطو ايديهم في ايد واحد مبتربطنيش بيه اي علاقة غير ان اسمه بعد اسمى في البطاقة
زى فكرة ان بابا علي مش ابويا برغم كل حبي ليه وحبه ليا وهو والله العظيم عندى اغلي من ابويا مليون مرة لان ابويا ملوش غلاوة عندى من اصله انا ابويا اللي بجد هو بابا علي انا مليش اب غيره
وزى فكرة نيرة عنى اللي كونتها بسبب كلام منى اللي صدقت كلامها من غير ما تتأكد منه بنفسها
وزى فكرة ان انا السبب فى ان منى اتخلت عنها ومعاملتها الوحشة ليا علشان وهم هى اقنعت نفسها بيه علشان متواجهش حقيقة ان منى هى اللي اتخلت عنها بإرادتها مش بسببى
وزى اوهام كتير اوى بنعيش نفسنا فيها لأننا اضعف من اننا نعترف بالحقيقة او لأن الحقيقة مرة والوهم حلو او لأن الوهم اسهل من الحقيقة الصعبة
الوهم مهما كان احسن او اسهل بالنسبالنا مستحيل يستمر ومسيرنا نفوق منه ونواجه الحقيقة بكل ما فيها من وجع وصعوبة الحقيقة أقوى من الوهم ومهما حاولنا نعيش الوهم مسير الحقيقة تتغلب عليه وتفوقنا منه غصب عننا
الوهم ضعف وعجز وخوف خليكو اقويا وواجهو حقايقكم ومتعيشوش الوهم💖
#حكايات_منار
فضلا تدعو لابويا بالرحمة والمغفرة وان يسكنه الله فردوسه الاعلى هو وموتى المسلمين جميعا خصوصا من زال اثره فلم يزره زائر ولم يذكره ذاكر