ميار :مين اللى انتى جايباه معاكى ده
رباب :ده يزيد ابن عمتى
ميار :وجايباه معاكى ليه
رباب :كان عندنا وانا كنت جاية اقابلكم فجبته معايا
ميار :ملقتيش حد تسيبيه معاه يعنى قومتى جبتيه
يزيد :ده على اساس انى طفل عنده خمس سنين مينفعش يتساب لوحده
على فكرة صوتكم مش واطى انا سامعكم
ميار :على فكرة مش مهم ما تسمعنا
يزيد :على فكرة انتى قليلة الذوق
ميار :على فكرة رأيك ميهمنيش
رباب :على فكرة انا دماغى صدعت
بس فى ايه مالكم
معلش يا يزيد ميار مبتاخدش على الناس بسهولة
بس هى طيبة والله
ميار :انتى بتبرريله وناقص تعتذريله ليه ان شاء الله
يزيد :علشان هى ذوق ومتربية
ميار :قصدك انى مش ذوق ومش متربية
يزيد :والله صاحب العقل يميز
ميار :ده على كده انت عمرك ما هتميز فى حياتك
يزيد :انتى ازاى...
رباب قاطعته :ايه يا جماعة مش كده بتقفلو اليوم ليه
دى ميريام لسه مجاتش
فى ايه يا يزيد بالراحة لاحظ ان ميار صاحبتى وانا مقبلش عليها الهوا
ميار :قوليله
رباب :وانتى يا ميار خدى بالك من اسلوبك شوية يزيد ابن عمتى ولو ساكت فهو ساكت علشانى
ميار :هو مين ده اللى ساكت
هو كده ساكت اومال لو اتكلم بقى هيعمل ايه هيفتح عليا مطواة ويشيلنى فى وشى علامة مستديمة
يزيد :ما تحترمى نفسك بقى
ايه وعهد الله انا مقدر انك بنت لولا كده كنت عاملتك باللى تستحقيه
ولو انها مشكوك فيها الحكاية دى
ميار :حكاية ايه بقى اللى مشكوك فيها
اوعى يكون قصدك اللى فهمته
يزيد :ايه ده انتى بتفهمى زينا كده طيب والله كويس
اه قصدى اللى فهمتيه انك مش بنت
ده لا اسلوب ولا كلام بنت
رباب :ابوس ايديكم كفاية خناق
ميريام بعتت تقولى انها خمس دقايق وتوصل
يزيد جاى علشان ميريام يا ميار
من ساعة ما شاف صور عيد ميلادها اللى كنت منزلاها عندى وهو عايز يشوفها ولو لقى بينهم كيمياء هيتقدملها
دى كل الحكاية
ميار :ومقولتيش ليه على الجروب
رباب :علشان ميريام متعرفش
افرضى محصلش بينهم اى انجذاب
خلى الموضوع بسيط وكل واحد على طبيعته احسن
كمان ميريام هتتوتر لو عرفت
ميار :فاهماكى
انا قصدى مقولتيش ليه علشان انا مجيش
انتى عارفة حسام هيعمل فيا ايه لو عرف انى خرجت خروجة ابن عمتك
او اى راجل خلقه ربنا موجود فيها
هيبشرنى زى الطماطم ويعمل منى تتبيلة بانيه يرضيكى ابقى تتبيلة بانيه
ليه تورطينى
رباب :مكنش قصدى اورطك والله
انا مجاش فى دماغى اقولك
ونسيت حسام خالص
وبعدين علشان ميريام كمان متحسش انه فى حاجة غلط
ميار :يعنى علشان هى متحسش ان فى حاجة غلط تعملى معايا انا الغلط
يزيد :ما خلاص يا شبح
لو على اللى بتتكلمى عنه ده هيعرف منين هيشم على ضهر ايده
ميار :هيعرف منى انا هقوله
انا مبعملش حاجة غلط علشان اخبيها
رباب :لا بلاش تقوليله يا ميار كده مش هيخليكى تخرجى معانا بتاع شهرين ولا حاجة
انتى معملتيش حاجة انا اللى عملت حقك عليا انا اسفة انى نسيت اقولك
علشان خاطرى متقوليلوش
ميار :ماشى
ميريام :هاى يا بنات
ميار :هاى يا ميريام
رباب :هاى يا ميريام
اعرفك ده يزيد ابن عمتى
ودى ميريام صاحبتى يا يزيد
تخيلى مجاش الكافية هنا ولا مرة قولت ازاى انا لازم اجيبه هنا المكان هيعجبه اوى
ميريام :المكان حلو فعلا
انا بفكر اعمل خطوبتى فيه
رباب بصدمة :خطوبتك
ميريام بسعادة :مش انا قولتلكم عايزين نتقابل علشان موضوع مهم ما هو ده الموضوع المهم
احمد اتقدملى لتالت مرة وبابا اخيرا وافق عليه وقرو الفاتحة انتو متخيلين
ميار :مبروك يا قلبى
رباب :مبروك يا حبيبتى
ميريام :الله يبارك فيكم عقبالكم
يزيد :مبروك متنسيش تعزمينا على الخطوبة
ميريام بابتسامة :اكيد طبعا لازم تيجى مع رباب
ميار وهى بتضحك :ايوه اكيد
ده انت وشك حلو على احمد اتقدم مرتين قبل كده وباباها كان بيرفضه والمرة دى اهو الحمد لله وافق
ميريام بسعادة :اه اخيرا مش مصدقة نفسى بجد
والمرة دى غير المرتين اللى فاتو
احمد اتقدم من غير ما يقولى وبابا وافق بسرعة وهو اللى قالى
دخلى اوضتى وقالى انا زهقت من زن الواد احمد ده وشكله بيحبك وشاريكى خلاص ياخدك ونخلص من زنه
ميار :باباكى ده حبيبى وربنا عسل بجد
رباب :ربنا يتمملكم على خير يا حبيبتى
انا فرحتلك
اتفاجأت ومكنتش متوقعاها بس حقيقى فرحتلك
انتى تستحقى كل الخير والسعادة اللى فى دنيا
ميريام :يا روحى وانتى كمان
ميار وهى بتضحك :فرحانة من قلبى لروح قلبى
مبروك يا عمرى انتى مش متخيلة انا فرحنالكم ازاى
ميريام وهى بتضحك :باين عليكى
شكلك فرحان اوى
ميار :طبعا وانا عندى اغلى منك افرحله
رباب :انا هدخل الحمام اطلبو على ما اجى
انا هاكل ميكس جريل
ميريام :وانا اطلبولى استيك
استنى هاجى معاكى
ميار :هاجى معاكم
ميريام وهى بتوشوشها :خليكى علشان ميفضلش لوحده
ميار :ليه هيتخطف
ميريام :عيب يا ميار خليكى احنا مش هنتأخر
ميار :ماشى امرى لله
يزيد :فرحانة من قلبك لروح قلبك مش كده
ميار :اه جدا
يزيد :فرحانة ليها ولا فرحانة فيا
ميار :الاتنين
يزيد :تصدقى انك لا تطاقى
ده ربنا يكون فى عون وسام انه متحملك
ميار :اولا اسمه حسام
ثانيا على قلبه زى العسل
ثالثا بقى وده الأهم ميخصكش ملكش فيه خليك فى حالك
يزيد :حسام اكيد نظره ضعيف او سمعه بعافية حبتين مش معقول يكون سمع الزفت اللى بينقط من لسانك ده واختار يبقى معاكى
ميار :والله سمع وشاف وعجبه
وانا مسمحلكش تتكلم عنه بالشكل ده
متخلنيش اقل منك
يزيد وهو بيضحك :ده على اساس انك بتمدحى فيا من ساعة ما شوفتينى صح
ميار وهى بتضحك :عندى ليفيلات اعلى
بس تصدق صعبت عليا hard luck المرة دى and good luck المرة الجاية فى صورة تانية
يزيد وهو بيضحك :مش حاسس منك بتعاطف لا
ميار وهى بتضحك :ما انا مش متعاطفة معاك
فرحانة فيك قولتلك
يزيد :ليه مستحقش تتعاطفى معايا
ميار :لا
اتعاطف ازاى مع واحد وهو بيختار لغى عقله ولغى قلبه ولغى ارتياح روحه
وقرر يختار بعينه بس
يزيد :انا مختارتش بعينى بس
ميار :ايه عقلك اقتنع بيها من الصور ولا روحك ارتاحتلها
لا اكيد دخلت قلبك وحبيتها من اول صورة
ودلوقتى بقيت heart broken يا عينى وهتروح خطوبتها تعيط
يزيد :طيب هو غيابا عن انك موتى جبهتى مش بس طيرتيها
بس انا حقيقى مبهور بردودك السريعة وقدرتك على الارتجال
ملكيش حل بجد
ميار :شكرا بس هو يعنى ايه ارتجال دى
يزيد :ارتجال يا ستى يعنى انك تقولى كلام مش مرتباله ولا مفكرة فيه من قبل كده
تقولى بسرعة كده فى وسط الكلام
ميار :ده على كده انا مبعملش حاجة غير انى ارتجل
انا مبفكرش فى كلامى ابدا قبل ما اقوله
برميه كده وزى ما تيجى تيجى
ميريام :ايه النظام
رباب :نظام ايه
ميريام :يزيد
رباب بتوتر :ماله يزيد
ميريام :فى حوار بينكم
رباب وهى بتتنفس براحة :لا
ميريام :ليه لا
رباب :متربين سوا ومبنشوفش بعض غير اخوات
ميريام :خسارة...طيب ما نظبطه مع ميار حرام يطلع برانا خسارة بجد
رباب وهى بتضحك :ميار ممرمطة بكرامته الارض من ساعة ما شافته
وهو كمان
مش طايقين بعض وبيتخانقو من اول ما شافو بعض
لولايا كان زمانهم قتلو بعض
ميريام وهى بتضحك :طيب ما البداية مبشرة اهيه
رباب وهى بتضحك :بقولك بيتخانقو من اول لحظة تقوليلى بداية مبشرة
دى بداية قاتلة
ميريام :ما محبة الا بعد عداوة
بصى بيضحكو اهم
صدقينى فى امل
استنى تعالى منرجعش ونسيبهم شوية لوحدهم
رباب :لا بلاش ميار هتزعق علشان طولنا
واحتمال كبير تكسر كوباية المياه على دماغه لو ضايقها
وانا كمان جعانة اوى والأكل بينزل اهو وانا مبحبوش يبرد
ميريام :وانا كمان جعانة
خلاص نبقى نشوف الموضوع ده بعدين
رباب :طلعى الموضوع من دماغك مش هينفع
ميريام :دخليه انتى دماغك لأنه هينفع جدا
بصى بيضحكو تانى
فى بينهم روح حلوة صدقينى
رباب وهى بتضحك :قصدك روح شريرة
تلاقيهم بيضحكو على بعض مش مع بعض
الاكل جه كويس انا جعانة اوى
ميار :لسه نازل حالا
سخن نار زى ما بتحبى
ميريام :ايه ده انتو الاتنين طلبتو سمك
حاجة مشتركة بينكم
يزيد :انا بحب السمك اوى
ميريام :وميار كمان بتعشقه
ميار :كنت شكلى كده هبطل اكله
رباب وهى بتضحك :قولتلك روح شريرة مسمعتيليش
قال روح حلوة قال
والله انتى اللى حلوة يا ميريام
ميار :روح ايه اللى شريرة وحلوة
رباب :مفيش ميريام شايفة المكان فيه روح حلوة
وانا شايفة انها روح شريرة
ميار :لا ميريام معاها حق المكان هنا حلو ومريح انا حقيقى بحب هنا
يزيد :المكان فعلا جميل
ميار :سبحان الله كرهته فجأة
يزيد وهو بيضحك :السمك ولا المكان
ميار :الاتنين
ميريام وهى بتضحك :طب والله المكان فيه روح حلوة
رباب :يزيد انا اسفة للموقف اللى اتعرضتله النهاردة
والله ما كنت اعرف ان احمد اتقدم تالت اصلا
انا قولت بعد ما بابا ميريام رفضه مرتين هيزهق
يزيد :اللى بيحب مبيزهقش يا رباب وهو شكله بيحبها
وهى كمان شكلها بتحبه باين من فرحتها بيه
رباب :هو صاحب اخوها يعرفو بعض من زمان
هى ميريام رقيقة وطيبة وهادية تتحب بصراحة
يزيد :طيب وميار
رباب :تتحب برضه ميغركش لسانها
ميار اكتر واحدة حنينة فينا ولسانها حلو مع اللى بتحبهم
يزيد :واضح ان حسام ده موصيها تعامل اى راجل غيره ناشف كده
رباب :اه شوية
ميار اصلا بيتهم محافظ جدا
وهى كمان طبيعتها كده
يزيد :وهى وحسام ده مرتبطين من امتى
هما مش مخطوبين هى مش لابسة دبلة
يبقو مرتبطين صح
رباب :لا هما مش مرتبطين اصلا حسام...
يزيد قاطعها :ومتحكم فيها كل التحكم ده وهما حتى مش مرتبطين
رباب :انت فاهم غلط
حسام اخو ميار الكبير والوحيد
هو مش متحكم فيها
هو بيحبها وبيخاف عليها وزى ما قولتلك هما بيتهم وطبيعتهم محافظة
يزيد :اخوها من كلامها فكرته واحد هى بتحبه
رباب وهى بتضحك :انا برضه ساعات بحس من كتر ما ميار بتحبه انه مش اخوها
علاقتهم حلوة اوى وقوية ودافية وفيها امان
هما الاتنين اهم حاجة فى حياة بعض
يزيد :للدرجة دى
هو تؤامها ولا ايه
رباب :لا ده أكبر منها بعشر سنين
علشان كده لما ميار اتولدت
حسام اتعلق بيها اوى لأنه فضل سنين كتير لوحده ومستنى يجيله اخ او اخت
فلما ميار جات اعتبرها الأخ والأخت بقت كل حاجة ليه فى الدنيا
حتى هى متأثرة بيه فى شخصيتها
يزيد :اه هو شكله كارف عليها جامد طبيعتها فيها من طبيعته كتير
وعلاقتهم دى متغيرتش لما كبرو
رباب :لا
بص هى علاقة ميار وحسام علاقة اخوة وصداقة وابوه
ميار انا بحس ساعات انها بتعتبر حسام ابوها وانها عندها أبين مش اب واحد
وانها بتحب حسام اكتر مننا
هى بتحبه اكتر من اى حد فى الدنيا
بالنسبالها هو أول صاحب ليها يعنى قبلنا وقبل الدنيا كلها
حتى بعد ما حب وخطب واتجوز
علاقتهم مضعفتش
يزيد :هو عايش معاهم فى البيت ولا ايه
رباب :لا بس ساكن قريب منهم
وبعدين بيتكلمو فى الموبايل وفيديو كول
ميار وحسام مبيغلبوش
يزيد :ومراته مش بتغير
رباب :لا هى اصلا بنت خالتهم وعارفة علاقتهم عاملة ازاى
وكمان ميار بتراعى فكرة وجود علا دى مرات حسام
ميار بتراعى شعورها
ميار حقيقى حنينة اوى
مش عايزاك تزعل من اسلوبها معاك
هى مبتاخدش على الناس بسهولة
وكمان مبتحبش المفاجأت وانت وجودك كان مفاجأة ليها
وبص...مش عارفة اقولك ايه بس متزعلش منها هى والله طيبة اوى
وبعدين انت كمان رخمت عليها جامد
يزيد :مش زعلان منها
واسلوبها مضايقنيش بالعكس
هى مختلفة
هو انا مشوفتهاش فى الصور اللى كنتى منزلاها من عيد ميلاد ميريام ليه
رباب :مبتحبش صورها تنزل على السوشيال ميديا
يزيد :وده بأمر من حسام برضه
رباب :لا هى مقتنعة بأن لا هى ولا حياتها ينفع يبقو على السوشيال ميديا
بتحب الخصوصية
بتقول ان السوشيال ميديا دى ايه...استنى هفتكر...ايه...اه مشاع وهى متحبش حياتها تبقى مشاع لكل من هب ودب
انما حسام مش بيتحكم فيها
هقولك على موقف خلانى اغير رأيى بعد ما حصل فى حسام
مرة ميار كانت مضايقة اوى
وقالت لحسام انها عايزانى
ولأن الوقت كان متأخر ومكنش ينفع اروحلها انا
حسام جابها لحد عندى
وفضل مستنيها لحد ما نزلتله
مرنش عليها مرة واحدة حتى يستعجلها او يقولها ان الوقت اتأخر
مقالهاش استنى لبكرة وابقى روحيلها او خليها تجيلك
من بعد الموقف ده وانا بقيت شايفة ان كل اللى حسام بيعمله معاها خوف وحب واهتمام
مش خنقة وتقفيل وتحكم
دى طريقته وطريقة بيتهم فى الحب والاهتمام
يزيد :بتتكلمى عنه بشكل حلو
كأنك نفسك فى واحد زيه
رباب :واحد زيه لا مينفعش
مش هنرتاح سوا
احنا طرق تربيتنا وصفاتنا مختلفة
بس نفسى فى واحد يشبهله شوية فى حتة الرجولة والاهتمام والجدعنة
ويشبهلى انا فى الاسلوب اللى اتربى بيه وفى شكل حياته
تقدر تقول كده عايزة واحد يشبهلى ويشبه لحسام وميار
يزيد :هى ميار مرتبطة
رباب :لا مش قولت انها مش لابسة دبلة
يزيد :لا ما انا مش قصدى مخطوبة ولا لا
انا قصدى مرتبطة بحد بتحب حد مصاحبة حد
رباب :لا ارتباط عند ميار يعنى خطوبة وجواز
اى حاجة غير كده يبقى كلام فاضى بالنسبالها
بس ايه اسئلتك كتيرة عنها
يزيد :صاحبتك مثيرة للفضول بطريقة رهيبة
مختلفة بجد
هى اه احيانا بتبقى متخلفة
بس لا الأغلب مختلفة
بعد تلت اسابيع
فى خطوبة ميريام واحمد
يزيد :طيب ما احنا طلعنا بنات اهو وبنعرف نلبس فساتين ونبقى زى القمر
اين الشبح اللى شوفته المرة اللى فاتت انا لا اراه
ميار وهى بتضحك :على فكرة انت سطحى اوى
بقيت بنت علشان لبست فستان
خلاص كده خدت ختم النسر وبقيت بنت يعنى
يزيد بابتسامة :بنت وست البنات كمان
بفستان او من غير فستان
ميار :انت بتتعدى حدودك على فكرة
يزيد وهو بيضحك :انا بعاكسك على فكرة
ميار :الجراءة حلوة مفيش كلام
بس حسام بيركن العربية وبيخلص مكالمة مهمة وجاى
فخاف على عمرك
يزيد :واضح انه بيخاف عليكى مسابكيش تيجى لوحدك
ميار :علشان اعرف اتأخر براحتى وميبقاش لازم ارجع بدرى او ارجع لوحدى
وكمان علشان يبارك لميريام
يزيد :هو يعرف ميريام
ميار :اه طبعا حسام عارف كل اصحابى
يزيد :حلوة الاخوات اللى بتعرف عن بعض كل حاجة دى
ميار :مش كل الاخوات حلوين لان مش كلهم زى حسام
يزيد :مش متفاجئة انى عرفت انه اخوكى
ميار :لا عادى اكيد عرفت من رباب
هو مش سر
يزيد :ولما هو مش سر مقولتيش من الاول ليه
ميار :لأنك مسألتش
يزيد :لو سألت كنتى هتقولى ميخصكش
ميار وهى بتضحك :ده حقيقى
بس بعدها كنت هجاوبك
يزيد وهو بيضحك :الصراحة حلوة برضه
بس بجد مقولتيش ليه
ميار :واقول ليه
يزيد :علشان مفهمكيش غلط
ميار :ولو قولت هتفهمنى صح ما انت ممكن تقول بكدب
انا بطلت ابرر نفسى او تصرفاتى
اللى عايز يشوفنى صح يشوفنى واللى عايز يشوفنى غلط برضه يشوفنى
المهم انا شايفانى ازاى
انت جاى ليه صحيح جاى تعيط يوم خطوبتها وكده
يزيد :لا جاى اشوفك
ميار :متشوفش وحش
اظبط فى كلامك
يزيد :والله انا مظبوط جدا فى كلامى وبقولك الحقيقة انا جاى علشان اشوفك
ميار :ليه...ولا متقولش مش عايزة اعرف
انا واقفة معاك ليه اصلا ومروحتش باركت لميريام
و...يا ليلة بيضا حسام زمانه خلص تليفونه وركن وجاى
انا نسيته ونسيت ميريام
انت رهيب على فكرة
متتكلمش معايا تانى
يزيد :ايه ده ادينى فرصة اقول حاجة طيب
ولا ارد على كلامك حتى
ميار وهى بتمشى من قدامه :لا
يزيد وهو بيضحك :اه يا مجنونة
بعد اسبوع
حسام :طيب انا هقوم...
ميار قاطعته :رايح فين
حسام بابتسامة :مش رايح فى حتة يا حبيبتى
انا بس هقعد على الترابيزة اللى جنبكم دى
ميار :ما بلاش
حسام :وهو هياكلك
ايه يا ميار انشفى كده
وبعدين انا هكون قريب مش بعيد
ميار :خلاص ماشى
يزيد :افهم بقى انا اترفضت ليه
ميار :ايه ده ايه البداية دى
طيب قولى اخبارك عاملة ايه
تشربى ايه تاكلى ايه
انت شكلك بخيل
يزيد :ميار انا بتكلم جد
ميار :ومين قالك انى بهزر طيب
الرجالة بتبان من المواقف
الرجال تعرف عند المواقف
يزيد :هتفضلى تهزرى كده كتير
اه خلاص انا فهمت
ميار :فهمت ايه
يزيد :انتى بتهزرى لما بتتوترى علشان تدارى توترك
بتهاجمى بالهزار او بالكلام الرخم بدل ما تبقى فى موقف دفاع بالكلام العادى
ميار وهى بتضحك :ده كده ماتش كورة
يزيد :ميار
ميار :نعم
يزيد :اتعدلى
ميار :حاضر
يزيد :انتى متوترة دلوقتى ومعنى كده انك متوترة بسببى من اول ما شوفتينى
ميار :ليه المبالغة دى منتاش حسين فهمى يعنى
يزيد :طيب والله بتكلم صح
يعنى انتى وجودى موترك من اول مرة شوفتينى فيها
وبتتكلمى معايا وبتنسى نفسك
اول مرة مخدتيش بالك ان رباب وميريام طولو فى الحمام
ميار :مطولوش ولا حاجة
عادى البنات بتاخد وقت
يزيد :فى الاول انتى كنتى مستنياهم يجو بسرعة واصلا كنتى عايزة تروحى معاهم
بس لما اندمجتى فى الكلام معايا نستيهم
زى ما نسيتى تباركى لميريام فى خطوبتها بسبب انك شوفتينى وكنتى بتتكلمى معايا
زى ما نسيتى حسام
وجودى بيأثر فيكى
ميار :طيب يا توم كروز انت حر فكر زى ما تحب
يزيد :دى الحقيقة انا بأثر فيكى
بس لو كده ليه ترفضينى
انتى حتى مكنتيش عايزة تيجى النهاردة لولا انا اصريت
هو انتى شايفانى وحش اوى كده
ميار :لا
بس هو مينفعش
يزيد :ليه
ميار :علشان انت فى الاول كنت معجب بميريام
منين بقى العطا رسى عليا ولا علشان هى اتخطبت
يزيد :انا نسيت ميريام من قبل ما تيجى اصلا
اندمجت فى كلامى معاكى ونسيت انى جاى علشانها
والله لما قالت إن فاتحتها اتقرت انا ما اتضايقت نهائى
بصراحة ومش هكدب عليكى ولا هزوق كلامى
ميريام خدت عينى لما شوفت صورها
ميار :طيب انا اقوم امشى بكرامتى بقى
علشان انت شكلك مجنون دلوقتى
انت بتستعبط جايبنى علشان تقولى ان صاحبتى خدت عينك
يزيد بابتسامة :وانتى مضايقة ليه
ميار :شيل الابتسامة السمجة دى من على وشك
انا مش مضايقة...او يعنى مضايقة بس مش علشانك...علشانى انا
فين برستيجى وانت بتقولى كده
ولما هو كده متقدملى ليه اى حاجة من ريحتها وخلاص
ولا عايز تكرهنى فى صاحبتى
يزيد :وانتى هتكرهيها علشانى
ميار :لا طبعا هكرهك انت
اكرهها ليه هى حلوة دى نعمة من عند ربنا ليها
والحمد لله هى حلوة من جوا ومن برا
انما انا اكرهك انت
علشان سطحى ومش عارف انت عايز ايه وماشى فى الدنيا تضبش
فكرت فى احساسى هيبقى ايه بعد ما تتقدملى وانا عارفة ان عينك كانت على صاحبتى
فكرت فى رباب طيب وانت بتبدل فى اصحابها ولا اللى بيبدل فى جواكيت
اكيد مفكرتش
انت مبتفكرش انت بتضبش بس
يزيد :انتى شايفانى وحش اوى
ميار :انا بشوفك زى ما انت بتخلينى اشوفك بتصرفاتك وكلامك
يزيد :انتى مسيبتنيش اكمل كلامى
وقتها كنتى هتشوفينى بشكل مختلف
ميار :كمل طيب
يزيد :ليه عندك فضول تعرفى بقيته
ولا هيفرقلك اللى هقوله من اصله
ميار :مش عايزة اشوفك وحش
اللى هتقوله ممكن جدا ميقنعنيش
وممكن حتى ارفضه
جايز حاجات كتير
بس الاكيد انه هيبرر افعالك ومش هيخلينى اشوفك وحش
يزيد :وانتى مش عايزة تشوفينى وحش
ميار :لا مش عايزة ازود على الناس الوحشة اللى عرفتهم فى حياتى واحد
كمل كنت هتقول ايه
يزيد :كنت هقولك ان ميريام خدت عينى فعلا لما شوفت صورها
بس مخدتش غير عينى بس
انما لما شوفتك
خدتى عقلى
انا كنت قاعد معاكى بحاول استوعبك
مبهور بيكى وبكلامك وبشخصيتك
وده ميمنعش ان شكلك حلو
بس الفكرة مش فكرة شكل والله
ميريام بالشكل لفتت انتباهى مجرد لفتته
انما انتى بشخصيتك خدتى عقلى
وحاسس ان قريب مش هيبقى عقلى بس
من كلامك الوضع مش لطيف علشان انا كنت جاى علشان ميريام
بس هى متعرفش
ميار :انا اعرف
يزيد :وانا مش هنكر اللى انتى عارفاه
بس هو اتغير
محصلتلكيش قبل كده تبقى رايحة تجيبى حاجة معينة فتلاقى حاجة احلى وأهم
ميار :حصلتلى كتير
بس انا ببقى رايحة اجيب فستان ولا شنطة
جماد مش عارف انى كنت عايزة جماد غيره قبله
جماد معندوش كرامة ولا مشاعر تنجرح يا يزيد
يزيد :انا عمرى ما هقصد اجرح مشاعرك ولا كرامتك يا ميار
يا ريت كنا بدءنا بداية مختلفة
بس ربنا كاتبلنا البداية دى
ده قدر هو حد بيختار قدره
ده كله حصل علشان اشوفك
ميريام مجرد بداية بسيطة اوى انما انتى الحكاية كلها
لو فى ايدى كنت اختارت انى ابقى جاى علشانك بس هو مش فى ايدى
ليه متديش فرصة لحكايتنا تبدء
انا عملت اللى يريحك
انتى مبتؤمنيش بالارتباط العاطفى
وانا اتقدمتلك رسمى
يعنى عملت اللى يريحك ويرضيكى
يجرى ايه لو وافقتى وعملتى اللى يريحنى ويرضينى
انا كل اللى طالبه منك فرصة
ميار :فرصة بعمرى كله
يزيد :لو طلعنا مناسبين لبعض هيبقى اه فرصة بعمرى وعمرك
بس لو مطلعناش مناسبين هتبقى الفرصة اللى بعمرك كله لواحد تانى غيرى
ميار :وافسخ تانى خطوبة تانية
يزيد :انتى كنتى مخطوبة قبل كده
ميار :اه مرة
يزيد :ينفع اسأل ايه حصل
ميار :انت خطبت قبل كده
يزيد :لا
ميار :حبيت
يزيد :اه مرة
ميار :ارتبطت باللى حبيتها
يزيد :اه
ميار :وايه حصل ليه مكملتوش
متقولش ماتت فى حادثة من سنتين
يزيد :بعد الشر عليها
لا اللى حصل ان الحب اللى بينا خلص
ميار :هو الحب بيخلص
يزيد :كل حاجة فى الدنيا بتخلص
مش الفلوس والحاجات الملموسة بس اللى بتخلص
المشاعر بتخلص العمر بيخلص
انا وهى كل واحد فينا كان ليه رصيد حب فى قلب التانى
الرصيد ده فضل يقل
واحنا مكناش بنشحنه علشان نعوض اللى خلص منه
لحد ما لقينا ان مبقاش فى حب فى قلوبنا لبعض
خلصنا الحب وبنينا بينا وبين بعض سور عالى مبقيناش شايفين بعض من وراه
ميار :طيب والذكريات الحلوة اللى بينكم
يزيد :كان فيه حلو طبعا بس الوحش كان اكتر خصوصا فى الاخر
الوحش بيمحى الحلو
زى ما الحلو بيمحى الوحش
واحنا معملناش حلو يمحى الوحش
لحد ما الوحش جاب اخر علاقتنا وانتهت
ميار :بتيجى على بالك
يزيد :نادرا جدا
ميار :مش بتوحشك
يزيد :لا انا علشان كده سيبتها
علشان مبقتش بتوحشنى مبقتش عايز اشوفها
لقانا بقى ضغط وخناق وعصبية
بقينا بنصعب حياة بعض بدل ما نسهلها
وهى الحياة صعبة لوحدها مش ناقصة شريك حياة يصعبها بزيادة
ميار :طيب وهى سابتك ليه
يزيد :علشان نفسها مش طويل
مبتحاولش كتير فى نفس الحاجة
ميار :مطلبتش منها تحاول علشانك اكتر ليه
يزيد :واطلب منها تحاول ليه اذا كنت انا نفسى مبقتش عايزها
مينفعش تحاولى علشان حد مش عايزك
ولا ينفع تحاولى علشان حد انتى مش عايزاه
ينفع بقى دلوقتى تجاوبينى ليه خطوبتك اتفسخت
ميار :علشان هو مكنش عايزنى من الاول
اهله خصوصا مامته هى اللى كانت عايزانى
ورتله صورتى وكلمته عنى كتير اوى واتحايلت عليه وهو عجبته الصورة فوافق
طبعا انا مكنتش اعرف ان ده اللى حصل والا كنت رفضته
انا فكرته خد باله منى فى مناسبة جمعتنا او حاجة
كونى مش اختياره وانه خطبنى علشان اهله
دى حاجة عرفتها منه هو
قالهالى كتير بلسانه وأفعاله
ما هو اصل الانسان هيفرح ازاى باختيار مش اختياره وانجبر عليه
وقتها انا مكنتش عارفة اعمل ايه
الحاجات اللى وافقت عليه بسببها كانت لسه موجودة
تدينه مستواه الاجتماعى والمادى فرق السن المناسب اهله المحترمين طريقة التربية اللى تشبه كتير لطريقة تربيتى
كل ده كان لسه موجود
وانا مكنتش حاطة فى حساباتى مشاعر يعنى
بس انى مكنش اختياره اصلا
ويقولى ده
لا ده كان كتير
بس برضه مكنتش عارفة اعمل ايه
لحد ما اتكلمت مع حسام
قالى كلمة واحدة غيرت كل حاجة
يزيد :قالك ايه
ميار :يغور وتغور كل الحاجات اللى وافقتى عليه بسببها مادام مش مقدرك وعارف قيمة النعمة اللى ربنا اداهاله
لو مش عارف قيمتك انتى عارفاها واحنا عارفينها تفضلى معانا اميرة فى بيتها لحد ما يجيلك اللى يفرح قلبك ويقدرك
مش نن عين ماما اللى سايبها تختارله وجاى يعمل فيها راجل ويقولك انتى انه انجبر عليكى
انجبر ايه المعفن هو يطول اصلا
يومها بالليل الخطوبة اتفسخت
اهله كانو رافضين خصوصا مامته
وقالت هعقله
حسام قالها تعقليه متعقليهوش ميخصناش
بس يا ريت يعنى تربيه من تانى وتطلعيه راجل المرة دى
راجل يحترم بيوت الناس ويحترم بنات الناس
يبقى راجل قادر يفتح بيت
لحسن لو فضل كده هندورله على عريس يستته
يزيد وهو بيضحك :قال كده بجد
ميار :اه واكتر
فى اليوم ده الخطوبة اتفسخت
وصداقة مامته وماما انتهت
لأن هو الكلام ضايقه فاتخانق وحاول يمد ايده على حسام فحسام كسرله ايده
حرفيا كسرله ايده
يزيد :يستاهل
اللى ميقدرش بيوت الناس لما يدخلها
يبقى يستاهل يخرج منها بإيده مكسورة ورجله كمان
حسام اخوكى ده راجل بجد
ميار بابتسامة :ده حقيقى
يزيد :انتى علشان كده مكنتيش طايقانى فى الاول
علشان شوفت ميريام فى صورة وكده
ميار :شوية وعلشان حسيت انى زى ما قولتلك انك لغيت قلبك وعقلك وروحك وقررت تختار بعينك بس
وده مش اساس قوى للاختيار
لا هو الحقيقة ده مش اساس اصلا
انت بتختار شريكة لحياتك
مش وجه اعلانى لحملة دعاية
يزيد :مش لدرجة انى اختارت
دى كانت مجرد فكرة بداية وبس
غير ان رباب شكرت فى ميريام كتير وفيكى
هى حقيقى بتحبكم اوى
ميار :واحنا بنحبها اوى
رباب دى هى رمانة الميزان بتاعتنا
ميريام رقيقة بزيادة
وانا هربانة منى
رباب هى الوسط اللى بنا
يزيد :طيب ايه احنا شربنا اتنين عصير وواحد كابتشينو وواحد شاى بلبن
اطلب غدا ولا اعمل ايه
هتقتنعى امتى طيب
حسام اكيد زهق من قعدته لوحده دى
ميار :لا حسام صبور جدا
هو اينعم لما بيتعصب مبيشوفش قدامه
بس فى العادى هو صبور وباله طويل خصوصا فى اى حاجة تخصنى
يزيد :يا ستى انا مش صبور وبالى مش طويل
اعمل ايه طيب علشان اثبتلك انى متمسك بيكى ومصر على فرصة اعرفك فيها
مش محتاجة تقلقى من حكاية ميريام دى
لأن ميريام طلعت من دماغى من قبل ما اشوفها
من لما اتخانقت معاكى
وانا والله ما فى دماغى غيرك
ايه ده وشنا بيحمر اهو وبنتكسف
ميار :لا ده انا حرانة الجو حر اوى
يزيد :حر ايه التكييفات مالية المكان
ميار :ابقى بردانة
انا وشى بيحمر لما بسقع ولما بتحر
يزيد وهو بيضحك :ميمشيش معاكى انك مكسوفة يعنى
ميار وهى بتضحك :لا ميمشيش
يزيد :بس الضحك علامة القبول والرضا
وانتى ضحكتى يبقى موافقة
ميار :لا انا...
يزيد قاطعها :خلصانة انتى موافقة
ها نعمل الخطوبة فى قاعة اللؤلؤة ولا حورس ولا عروس الشام
بعد شهر
ميار :اقعد مكانك احسنلك يا يزيد انا بنصحك لمصلحتك
عايز ترقص مع مين سلو
يزيد وهو بيمدلها ايده :معاكى قومى معايا
ميار وهى بتضحك :ايدك لتوحشك
لا هو الحقيقة كل حاجة فيك هتوحشك
حسام مش هيسيب فيك حتة سليمة وعلى بعضها
يزيد وهو بيقعد جمبها بإحباط :يعنى ايه مش هنرقص سلو فى خطوبتنا
ميار :ولما نرقص سلو فى خطوبتنا نعمل ايه فى الفرح
سيب حاجة للفرح
متزعلش بقى شكلك مش حلو وانت زعلان
وبعدين ايه البدل الجامدة دى
يزيد :اول مرة البس بدلة
حلوة بجد عليا
ميار بابتسامة :جمدان عظمة حقيقى فخامة ما بعدها فخامة يعنى
يزيد بابتسامة :تسلميلى...انتى بتثبتينى علشان مزعلش صح
ميار وهى بتضحك :متفهمنيش صح
بعد شهرين
ميار :انا كان فيا طبع متعب اوى كنت دايما ببرر نفسى للى حواليا ببرر كلامى وتصرفاتى
وحتى افكارى تخيل افكارى اللى لسه فى عقلى ومتنفذتش كنت ببررها
وادور على اعذار ليها
جه عليا وقت كنت هيجرالى حاجة من كتر الضغط بسبب طبعى ده
والمشكلة ان الناس لما يلاقوك كده بيسوقو فيها
مش يقولولك انك تمام وعادى وتصرفاتك مفيهاش حاجة وكلامك كويس زيك زيهم
لا بيقولولك فعلا تصرفاتك اوفر وكلامك غريب
بيخلوك تبرر نفسك ليهم اكتر واكتر
دى حاجة بتزود احساسهم بنفسهم بتعلى احساسهم بأهميتهم
وبتضعفك انت وبتجيب ثقتك فى نفسك الارض
فى يوم زيه زى ايام كتير نمت فيها معيطة بسبب عدم احساسى بالرضا عن نفسى وعن تصرفاتى
وكنت كمان خاسة جدا الفترة دى من كتر ما نفسيتى تعبانة
قررت انى مش هعمل كده تانى فى نفسى مش هبرر نفسى لحد
اللى عايز يفهمنى غلط تبريرى مش هيفرقله
واللى عايز يفهمنى صح هيسأل باحترام ولحد ما يعرف منى الاجابة مش هيفترض فيا الظن الوحش
ومن ساعتها وانا مببررش نفسى لحد
فى حياة كل واحد فينا لحظة فارقة بتيجى بعد مواقف صعبة ولحظات كتير وحشة بيقرر بعدها انه مش هيفضل زى ما هو وان اللحظات الصعبة الوحشة دى مش هتعدى عليه تانى
يزيد :انا فخور بيكى
حقيقى
ميار :انا كمان بقيت فخورة بيا
زمان كنت حاسة انى مبعملش اى حاجة صح مكنتش فخورة بنفسى خالص فى اى حاجة
لما حد كان بيقولى اتصرفى بطبيعتك
كنت بخاف
الجملة دى كانت بتخوفنى
كنت بقول لو اتصرفت بطبيعتى اكيد مش هيحبونى
بس دلوقتى لا
دلوقتى بتصرف بطبيعتى واللى يحبنى يحبنى واللى ميحبنيش هو حر
يزيد :اللى ميحبكيش خسران
انا اكتر حاجة شدتنى ليكى هى دى
انك بتتصرفى على طبيعتك من غير تكلف ولا تصنع
ميار وهى بتضحك بإحراج :انا لما بفتكر اول مرة اتقابلنا فيها
مبفهمش عجبك فيا ايه
انا كنت اوفر اوى حقيقى
انا مقولتلكش انى اسفة صح
انا اسفة اسلوبى كان وحش ورخم وسخيف
يزيد :انا كنت رخم برضه
اسف لو ضايقتك
ومتعتذريش اليوم ده انا بحبه
ميار :وانا كمان
يزيد :ايه ده ايه الاعترافات الجامدة دى
طيب انا بحبه علشان شوفتك وبدأت حكايتى معاكى
انتى بتحبيه ليه
ميار وهى بتضحك :كلت يومها سمك طعمه حلو
يزيد :يا بنتى هو انتى لو قولتيلى كلام حلو هتتحرقى او هتتسرقى هتحصلك اى كارثة كونية طيب
ما تقوليلى انت احلى حاجة حصلتلى فى حياتى
ربنا يخليك لقلبى
يدوم نبضك يا عمرى
او بحبك يا يزيد جربتى تقوليلى بحبك يا يزيد الجملة دى حلوة جربتيها على لسانك هتعجبك على فكرة
ميار وهى بتضحك :انت مسيبتش حاجة اقولها على فكرة
انت قولت كل الكلام
استنى حسام بيرن
الو يا حبيبى
حسام :ايوه يا حبيبتى انتى فين
ميار :مع يزيد ما انت عارف
حسام :كل ده طيب ايه مطولين انا فى البيت عندنا
ميار :بجد طيب انا هرجع اهو
حسام :قشطا بسرعة انا جيبتلك كنافة نابلسية
ميار :مسافة السكة ايدك متطولش عليها لحد ما اجى
سلام يا حبيبى
حسام :سلام يا حبيبتى
ميار :حسام...
يزيد قاطعها :حسام عندكم فى البيت
كالعادة منشن على الايام اللى بشوفك فيها
وبعد نص ساعة ولا ساعة من الخروجة يتصل يقولك انه عندكم فى البيت وكالعادة تطيرى على هناك
ميار :على فكرة هنرجع سوا نكمل الخروجة عندنا فى البيت
يزيد :واخدة بالك من كلمة خروجة
خروجة وفى البيت ازاى يعنى
ميار :والله هتتبسط ماما عاملة سمك النهاردة على الغدا
وحسام جايب كنافة نابلسية
وانا هعملك ايس كوفى
يزيد :بتدخليلى من نقط ضعفى
ميار :يعنى هتيجى معايا
صح قول اه قول اه علشان خاطرى علشان خاطرى علشان خاطرى
مش هبقى مبسوطة لو مرجتعش معايا والله
يزيد :خلاص جاى
ميار :قشطا عليك
يزيد :بس تعالى هنا
كل كلامك مع حسام يا حبيبى يا حبيبى بتقوليهاله بمعدل مرة فى الدقيقة
وانا بقالى تلت شهور نفسى اسمعها مرة واحدة ولو بالغلط
ايه مفيش دم مفيش احساس خالص كده
ميار وهى بتضحك :وايه لازمتها لو قولتها وانت اللى طالبها كده
هتفرح بيها يعنى
يزيد :يا ستى هفرح ملكيش دعوة
قوليها بس وانا هفرح
بعد تلت شهور
انغام :انتى خطيبك بقاله فترة مجاش ولا بتخرجو ولا حتى بسمعك بتكلميه ليه
ميار :عادى يا ماما
انغام :لا مش عادى
ده مكنش بيبطل رن عليكى ورغى فى التيفون
ولو جه مبيبقاش عايز يمشى
فى ايه انتو متخانقين
ميار :اه
انغام :ليه كفى الله الشر
ميار :مش عارفة اقولك ايه يا ماما
بيغير من حسام بيقولى انا حاسس انى مليش فى حياتك مكان
وانى باجى عليه كتير علشان حسام
وان حسام نفسه بيغير منه ومتعمد يجى كل مرة نخرج فيها ويبوظ الخروجة
انغام :وانتى قولتيله ايه
ميار :اتخانقت معاه طبعا
ازاى يقول كده
وبيلومنى انى بحكى لحسام كل حاجة
الله مش اخويا الكبير
بيقول مش حاسس بخصوصية خصوصية ايه هو انا بحكى لحد غريب ده اخويا
مش فاهمة ماله بيفكر ازاى ده
وفى الاخر بيقولى انتى بنت اخوكى مش محتاجة حد غيره فى حياتك
لا انا ولا اى راجل فى الدنيا هنحس اننا لينا لازمة فى حياتك اللى اخوكى ماليها
ساكتة ليه يا ماما مصدومة من كلامه صح
انا مسكتلوش متقلقيش
انغام :ليه مسكتيش يعنى غلطانة وكمان بتقاوحى وتبجحى
بس انتى عارفة الغلط مش غلطك لا
ميار :غلطه هو صح انا قولتله...
انغام قاطعتها :الغلط غلطى انا
انا اللى ربيتك انتى واخوكى على انكم ملكوش الا بعض
فبقيتو بتيجو على الناس اللى فى حياتكم
علا مستحملة علشان يارا بنتها وعلشان بتحب حسام
ويزيد اهو فاض بيه وجاب اخره كتر خيره ست شهور مستحمل
ميار :فى ايه يا ماما عملت ايه انا لكل ده
انغام :فاكرة لما حسام فى اول جوازه كان بيتخانق مع علا علشان كانت بتحكى كل حاجة لخالتك
واهى بعدها الحمد لله بطلت
ميار :اه فاكرة
هى كانت غلطانة ليه تطلع اسرار بيتها بره حتى لو لمامتها
انغام :وهو حرام عليها وحلال ليكى
يعنى هى متحكيش لامها اللى هى مش بس حماة اخوكى لا خالته اللى مربياه
وانتى عادى تحكى كل حاجة بينك وبين خطيبك لاخوكى
لو كان هو بيحكى لأمه مش كنتى هتقولى عليه ابن امه ومش بعيد تسيبيه
لكن انتى تحكى لاخوكى عادى مش كده
دينك بيقول كده
ميار :يا ماما...
انغام قاطعتها :ردى عليا اللى بتعمليه ده يرضى ربنا
اسرار خطيبك اللى اخوكى يعرفها دى ترضى ربنا
كل خروجة ليكم لما ترجعو من نصها وتكملوها هنا ده لو رضى يطلع معاكى تنفع
كسر خاطره ده يرضى ربنا
تقبلى يعمل فيكى كده علشان واحدة من اخواته
ميار :يا ماما...
انغام قاطعتها :ردى عليا اللى بتعمليه ده يرضى ربنا
اخوكى قبله على نفسه مع مراته
انتى هتقبليه على نفسك طيب
ميار وهى باصة فى الارض :لا يا ماما لا يرضى ربنا
ولا حسام قبله على نفسه
ولا انا هتحمله لو يزيد عمله معايا علشان منة او رانيا اخواته
انغام :هو يستاهل منك كده
يزيد الشاب اللى زى الورد اللى بيحبك وشاريكى وعامل علشانك اللى ميتعملش
يستاهل تزعليه وتكسرى بخاطره كده
ميار :لا
انغام :انا عارفة انك بعد خطوبتك الاولانية واللى جرالك فيها بقيتى شايفة ان مفيش سند ليكى غير حسام
وان مفيش غيره يستاهل تأمنيله
بس يزيد مش زى اسر يا ميار
وحرام تدفعيه هو تمن اللى اسر عمله
هو جاب اخره انتى كده هتخسريه
المرة اللى فاتت كنتى انتى اللى مظلومة علشان كده ربنا عوضك بيه
المرة دى هتبقى انتى اللى ظالمة
ربنا هيعوضه هو بواحدة احسن منك
وهيعاقبك انتى على اللى عملتيه فيه
ميار بسرعة :لا يا ماما انا مش عايزاه يسيبنى
انغام :يبقى تشترى خاطره وتصلحى اللى عملتيه
ميار :حاضر
قوليلى اعمل ايه وانا هعمل كل اللى هتقوليلى عليه
تانى يوم
يزيد :وادينى جيت زى ما طلبتى
عايزة ايه
فى حاجة نسيتى تقوليها وانتى بتتخانقى معايا جيبانى تقوليها
ميار :اه فى حاجات كتير
يزيد :حاجات كتير
طيب كلى أذان مصغية
انتى بتلعبى فى عداد علاقتنا بمفك على فكرة
بس براحتك
ميار :انا اسفة
اسفة على كل حاجة ضايقتك منى
اسفة متزعلش منى
مش هعمل حاجة تزعلك تانى ابدا
مش هحكى لحسام على اللى بيحصل بنا
مش هقوله يا حبيبى قدامك
قولى ايه يرضيك وانا هعمله
انا والله العظيم بحبك وانت احلى حاجة حصلتلى فى حياتى انت عوض ربنا ليا وانا بحبك
بحبك اوى وربنا
واسفة مش هزعلك منى تانى خالص
مش هعمل اى حاجة تضايقك تانى
وهقولك يا حبيبى ويا عمرى على طول
وهقولك بحبك كل يوم بص هقولهالك تلت مرات فى اليوم
او ستة لا عشرة انت قولتلى قبل كده انك بتحب رقم عشرة
هقولهالك عشر مرات فى اليوم كل يوم لحد ما اموت
متزعلش منى علشان خاطرى
والله انا اسفة
انت صح وانا غلطانة وعليا قرف
انما انت صح ومعاك حق وانا بحبك
انا قولتلك انى بحبك صح
انا...
يزيد قاطعها :بس بس بالراحة واحدة واحدة
ميار :حاضر انا هعمل كل اللى انت عايزه
انا اسفة وبحبك ومش هعمل اى حاجة تضايقك و...
يزيد قاطعها :يا حبيبتى اتكلمى بالراحة انا سامعك
ميار :انا حبيبتك صح انت لسه بتحبنى مش كده
مبطلتش تحبنى صح
اوعى تكون بطلت يا يزيد
انا مخلصتش رصيد حبى فى قلبك صح
يزيد :لا مبطلتش احبك يا ميار
ورصيد حبك فى قلبى مخلصش
ميار وهى بتتنفس براحة :الحمد لله طمنتنى الله يطمن قلبك
يزيد :موبايلك بيرن ده اكيد حسام مش هتردى
ميار :لا مش هرد وانا معاك مش هرد على حد
يزيد :مش ده اللى انا عايزه انا مش عايزك تهربى
انا عايزك تواجهى وتتكلمى واشوفك هتقولى ايه
بيرن تانى ردى
ميار :الو يا حسام
حسام :انتى فين يا ميار جيت البيت ملقتكيش
ميار :انا مع يزيد
حسام :مش كنتو متخانقين
ميار :ادينا اتصالحنا اهو الحمد لله
حسام :كويس
بس مقولتيليش انك رايحة تقابليه
ميار :ما انا استأذنت بابا يا حسام وهو وافق
حسام :مش هتيجى طيب انا فى البيت وجيبتلك...
ميار قاطعته :لا مش جاية دلوقتى
لما ارجع لو ملقتكش هكلمك
انا هقفل بقى مع السلامة
يزيد :مش مصدق نفسى
كأنى قدامى واحدة جديدة معرفهاش
ميار :عارفة انى جيت عليك كتير وغلطت حقك عليا متزعلش منى
يزيد :اخر مرة
ميار :والله اخر مرة
مش هعمل كده تانى
وانت لو لقتنى بغلط عرفنى
اتكلم معايا اوعى تاخد جنب منى وتشيل جواك لحد ما رصيد حبى فى قلبك يخلص
انا مش عايزاه يخلص عايزاه يفضل يزيد طول ما احنا عايشين يا يزيد قصدى يا حبيبى
يزيد بابتسامة :اخيرا سمعت منك واحدة حبيبى قبل ما اموت
ميار :بعد الشر عليك يا حبيبى
ربنا ما يحرمنى منك
يزيد :ولا يحرمنى منك
بنت اخوها
انا كنت كده لحسام
وحسام كان كده ليا
الإفراط فى كل حاجة وحش
وانا وحسام افرطنا فى تعلقنا ببعض
افرطنا وظلمنا
هو كان ظالم علا
وانا كنت ظالمة يزيد
بس الحمد لله ده اتغير
واحدة واحدة انتقلنا من الإفراط اللى فيه ظلم لناس حوالينا
الإفراط اللى ميرضيش ربنا
للاعتدال اللى مفيهوش ظلم لا لنفسنا ولا للى بنحبهم
انا مكنتش بقول ليزيد كلام حلو لأنى مكنتش هقدر اقول لحسام انى قولتله كلام حلو
وانا كنت بحكى لحسام كل حاجة
فعلشان كده مكنتش بقوله كلام حلو خالص علشان مش هعرف اقول لحسام انتو متخيلين
حسام فى الاول مكنش موافق على اسلوب تعاملى الجديد معاه وكان بيعترض ويضايق
بس مع الوقت تقبل خصوصا لما لقى علا بتعامله بحب اكتر وبقت سعيدة اكتر ومرتاحة وعندها طاقة حب ليه وليارا بنتهم ولبيتهم
وليا علا بقت بتحبنى اكتر
واضح ان انا وحسام باللى كنا بنعمله كنا مكرهينها فينا وفى عيشتها
مع انى كنت بحاول اراعيها واراعى مشاعرها بس واضح اننا كنا اوفر وضاغطينها جامد
بس خلاص كل ده اتغير
لما قررت ابقى اخت لاخويا اخت بتحبه وروحها فيه
بس اكونله اخت مش بنت
ميار مبقتش بنت اخوها خلاص
ربو ولادكم على حب بعض
بس ربوهم على حب بعض صح
متخلوهمش يظلمو ناس بيحبوهم
متخلوش واحد فيهم ابن اخته ولا واحدة فيهم بنت اخوها💖
#حكايات_منار
فضلا تدعو لابويا بالرحمة والمغفرة وان يسكنه الله فردوسه الأعلى بدون حساب ولا سابقة عذاب هو وموتى المسلمين جميعا خصوصا من زال اثره فلم يذره زائر ولم يذكره ذاكر