على :يلا يا ريهام علشان نشترى ساعة بدل اللى اتكسرت دى
ريهام :حاضر يا حبيبى رشا مش هنتأخر عليكم
رشوانة :ماشى يا حبيبتى
زياد :طيب احنا لسه مطلبناش تشربى ايه
رشوانة :عصير فراولة
زياد :لو سمحت واحد قهوة سكر زيادة وواحد عصير فراولة
اعرفك انا بنفسى الاول ولا تبدئى انتى الاول
رشوانة :ابدء انت الاول
زياد :انا زياد طلبة مهندس كهربا عندى تلاتين سنة سبقلى خطوبة مرة واحدة
رشوانة :وانا رشوانة مصطفى
زياد باستغراب :انتى اسمك رشوانة
رشوانة :اه ايه مش حلو الاسم
زياد :لا حلو بس اصل ريهام بتقولك يا رشا
رشوانة :اسمى الحقيقى رشوانة بس القريبين منى بيقولولى يا رشا
زياد :وانا كده اقولك يا رشا ولا يا رشوانة
رشوانة :عادى اى حاجة
زياد :انتى تحبى اقولك ايه
رشوانة :قولى يا رشوانة
زياد :ماشى يا رشوانة
رشوانة :انا عندى خمسة وعشرين سنة خريجة كلية اعلام وبشتغل فى العلاقات العامة فى شركة للدعاية والاعلان
مسبقليش خطوبة كان فى مشروع خطوبة بس خلص قبل ما حتى نقرء الفاتحة
زياد :ينفع اسالك ليه
رشوانة :مش عارفة هو اصله قالى مقولش لحد من اهلى
زياد :هو مين ده
رشوانة :اللى كان هتتقرى فاتحتى عليه بس هو قالى مقولش لحد من اهلى علشان اهله ميعرفوش
وانت مش من اهلى ومتعرفوش اصلا يعنى ممكن اقولك صح
زياد :ممكن طبعا واللى هتقوليه انا مش هقوله لحد
رشوانة :تمام هو قبل قراية فاتحتنا بيومين طلب يتكلم معايا وقالى انه قبل ما الموضوع يدخل فى الجد لازم يقولى حاجة مهمة جدا وليا حق الاختيار اوافق بيها واتقبلها ولا لا
زياد :حاجة ايه دى
رشوانة :انه ملحد
زياد بصدمة :ايه
رشوانة :انه ملحد مبيؤمنش بوجود ربنا يعنى
زياد :وانتى عملتى ايه
رشوانة :قولت لاهلى انى مش مرتاحة ونهيت الموضوع من قبل ما يبدء اصلا
زياد :ومقولتيلهومش انه ملحد
رشوانة :لا لانه قبل ما يقولى طلب منى انى سواء هوافق اكمل معاه او لا فبراحتى والقرار قرارى هو كل اللى عايزه انى مقولش لاهلى لانه لسه معرفش اهله هو عرفنى بس علشان ميبقاش خدعنى
فانا مقولتش لاهلى كل اللى قولته انى مش مرتاحة وان مفيش بنا توافق
زياد :وانتى مقبلتيش ليه
رشوانة :اقبل بايه بواحد ملحد مفكر ان الكون عمل نفسه بنفسه وكل حاجة فى الدنيا بتحصل كده لوحدها من غير ترتيب الهى ولا تدبير ربانى
ده الغسالة الاوتوماتيك اللى بتغسل الهدوم وتجففها بتحتاج حد يشغلها ويظبطها علشان لما تخلص توقف
وده مفكر ان هو وكل الخلق وكل العالم ماشى كده لوحده من غير خالق من غير اله
زياد :قصدى موافقتيش وحاولتى ليه تقنعيه ان فيه ربنا وترجعيه عن اللى فى دماغه
رشوانة :اولا لانى مش اهل لده دى حاجة يتكلم معاه فيها شيخ دارس وفاهم يقدر يناقشه بحجج وبراهين وايات واحاديث
ثانيا لانه اصلا مينفعش المؤمنة مينفعش تتجوز كافر ده حرام ده اللى جوزها بيلحد بتطلق منه لانه جوازها منه بقى حرام لانه بقى كافر
ثالثا هو بيتكلم عن الموضوع بطريقة عادية جدا ده قالى الحدت انا وتلاتة اصحابى كأنه بيقولى انا روحت الجونة انا وتلاتة اصحابى
زياد :يعنى مكنش فيه منه امل خالص
رشوانة :معرفش انا متعاملتش معاه كتير بس الموضوع منتهى بقولك ملحد هتجوزه على سنة الله ورسوله ازاى وهو لا مقتنع ان فى ربنا ولا مؤمن برسالة الرسول عليه افضل الصلاة والسلام
زياد :هى حاجة صعبة فعلا
رشوانة :هى حاجة تحزن الإلحاد دلوقتى بقى موضة زيه زى البناطيل المقطعة وزى ان الشباب بتسشور شعرها زى البنات
زمان لما كان حد بيلحد كان بيلحد من كتر بحثه فى الدين ومنهم ناس ربنا كرمهم ورجعو للدين تانى
دلوقتى اللى بيلحدو مبيبقوش عارفين حاجة اصلا عن دينهم
زياد :من فترة كنت شوفت فيديو بيقول ان الانسان بيحتاج الايمان فى علم النفس الانسان لازم يكون مؤمن ان فى قوة اكبر منه بتتحكم فيه وفى حياته والا ينهار ونفسيته تدمر
رشوانة :كتير من اللى الحدو فى الاخر انتحرو
مش متخيلة حد يكون عايش حياته من غير ما يبقى عارف ان فى ربنا بيدبرله اموره وبيختارله الخير
من غير ما يكون فى اله يدعوه ينصره ويفرحه ويقويه لما يحس بضعف او حزن او عجز
من غير خالق يطمع فى كرمه ورحمته وغفرانه
من غير الله يدعيه يباركله فى عمر حد بيحبه او يشفيه او يحميه
فكرة ان الكون خلق نفسه بنفسه دى بالنسبالى مجرد عبث وتخاريف
زياد :هى عبث وتخاريف فعلا ربنا يثبتنا على الحق ويكفينا شر الضلال
رشوانة :اللهم امين
ريهام :اتأخرنا عليكم
رشوانة :لا بس انا لازم امشى علشان متأخرش
ريهام :ماشى يا حبيبتى
على :ايه الاخبار يا زياد
زياد :مش عارف محتاج اتكلم معاها تانى
على :ليه بس
زياد :متكلمتش معاها كفاية
ريهام :قولتلك نلف فى المول شوية كمان قولتلى لا كفاية كده زمانهم خلصو واديهم طلعو مخلصوش ولا حاجة
زياد :ريهام رتبيلى معاها مقابلة تانية ويا ريت تكون من غيركم
ريهام :ماشى هحاول
بعد اربع ايام
زياد :اخبارك ايه يا رشوانة
رشوانة :انا بخير الحمد لله وانت
زياد :انا تمام الحمد لله مبسوط انك وافقتى تقابلينى تانى
رشوانة :محستش ان كلامنا خلص وانى عرفت عنك اللى يكون كفاية ليا علشان اخد قرار
زياد :انتى صريحة
رشوانة :اه ما انا عارفة
زياد :دى حاجة حلوة
رشوانة :شكرا
زياد :ريهام قالتلى ان اهلك مكنوش راضيين تقابلينى لوحدك
رشوانة :ماما كانت موافقة عادى اللى مكنش موافق نهائى بابا واختلفو جامد وجه خالى فض النزاع
زياد :عمل ايه خالك
رشوانة :قال لبابا اننا نتقابل فى الكافيه بتاعه وبكده مكنش لوحدى زى ما بابا عايز وبرضه نتكلم انا وانت بحيث اقدر اخد قرار
وبابا اقتنع ووافق وماما كمان
زياد :يعنى ده كافيه خالك
رشوانة :اه
زياد :طيب مشوفتوش مجاش يسلم علينا ليه
رشوانة :علشان الموقف ميبقاش محرج ليك اعتقد سايبلك مساحة شخصية
زياد :واضح ان خالك زوق
رشوانة :اه زوق جدا ومتفاهم ومرن تحسه من جيلنا كده لما تتكلم معاه مش هتحس انه اكبر منك بعشرين سنة
زياد :واضح كمان ان والدك بيحب خالك وعلشان كده وافق بكلامه
رشوانة :بابا وخالى صحاب من اكتر من خمسة تلاتين سنة صحاب عمر زى ما بيقولو
زياد :من قبل ما والدك يتجوز والدتك
رشوانة :اه
زياد :هو مين اللى سماكى رشوانة والدك ولا والدتك
رشوانة :بابا
زياد :سماكى على اسم جدتك
رشوانة :لا على اسم الدكتورة اللى ولدت ماما
اصل ولادتى كانت صعبة اوى كانو متوقعين هموت فى الولادة فلما الحمد لله اتولدت وعيشت بابا سمانى على اسم الدكتورة
ثانية واحدة من ساعة ما قعدنا وانت بتسال وانا اللى بتكلم والمرة اللى فاتت برضه كنت انا اللى بتكلم
المفروض انا كمان اسال وانت اللى تتكلم
زياد :وانا منعتك اتفضلى اسالى
رشوانة :انت فسخت خطوبتك ليه
زياد :علشان اكتشفت انها كدبت عليا
رشوانة :كدبت عليك فى ايه
زياد :انها عرفتنى وهى مخطوبة
رشوانة :مقالتلكش انها كانت مخطوبة قبل كده يعنى
زياد :لا لما عرفتها كانت مفهمانى انها سينجل عادى وعلشان كده انا بعد فترة اتقدمتلها واتخطبنا
بعد ما اتخطبنا بقى اكتشفت انها كانت مخطوبة لما عرفتنى ومقالتش ولما طلبت منها اقابل اهلها فسخت خطوبتها من ابن عمها
رشوانة :عملت كده فى ابن عمها
زياد :اه
رشوانة :ليه عملت كده
زياد :لما واجهتها قالتلى انه مكنش مالى عينها وانها كانت مستنية تلاقى الاحسن منه ولقتنى وسابته علشانى
رشوانة :انت سيبتها علشان مقالتلكش
زياد :ايوه وعلشان ملهاش امان دى عملت كده فى ابن عمها اومال ممكن تعمل فيا انا ايه لو لقت الاحسن منى
رشوانة :صعب تقدر تأمنلها فعلا
زياد :ولا كنت هأمنلها عمرى ولا هصدقها فى اى حاجة بتقولها
رشوانة :بابا بيرن انا لازم امشى
زياد :طيب هوصلك
رشوانة :مش هينفع
زياد :ليه بس انا معايا عربيتى
رشوانة :بابا قالى مهما حصل ميوصلكيش ترجعى فى تاكسى فى اوبر تيجى مشى حتى بس مترجعيش معاه
زياد :طيب على الاقل ممكن اوقفلك تاكسى
رشوانة :ماشى
زياد :هطلب الحساب ونمشى
رشوانة :لا متحاسبش خالى مبيخليناش نحاسب
زياد :انا هنا دلوقتى زيى زى اى زبون ومينفعش محاسبش
رشوانة :خلاص زى ما تحب
بعد اسبوعين
زياد :بس والدك مطلعش بالصورة اللى خدتها عنه من كلامك
رشوانة :وانت ايه الصورة اللى خدتها عنه من كلامى
زياد :انه صارم جدا ومعاملته ميرى بس طلع عادى متفاهم
رشوانة :هو معاملته مش ميرى ولا حاجة هو بس بيخاف عليا انا واخواتى
وكمان بابا بيحب الاصول اوى ممكن يبان دقة قديمة بس لا خالص هو مش دقة قديمة ولا حاجة هو بس فعلا بيحب الاصول وربانا عليها
زياد :بس مامتك زى ما تخيلتها بالظبط رقيقة وحنينة
وخالك زى ما حكيتى عنه محستش انه اكبر منى كنت حاسس انه قدى اصلا وانى اعرفه من زمان حقيقى مبسوط انى اتعرفت عليه
رشوانة :هو كمان مبسوط انه اتعرف عليك
زياد :خلاص كده قرينا الفاتحة والخطوبة الاسبوع الجاى
رشوانة :قولى صحيح لما ريهام كلمتك عنى افتكرتنى من فرحها هى وعلى
زياد :الصراحة لا وقتها شغلنا فيديو الفرح علشان اشوفك
انتى زعلتى
رشوانة :لا اصل الحال من بعضه انا برضه لما كلمتنى عنك مفتكرتكش فهى بعتتلى صور انت فيها من صور الفرح
زياد :مين كان يقول اننا نتخطب بعد فرحهم بسبع شهور
رشوانة وهى بتضحك :نصيب بقى ريهام صاحبتى وعلى اخوك بيوفقو راسين فى الحلال
بعد شهر
زياد :بابا الله يرحمه مات قبل امتحانات تالتة ثانوى بتاعتى باسبوع واحد
وقتها بدل ما اغرق فى حزنى عليه قررت انى هركز فى امتحاناتى واحقق حلمه وامله فيا وادخل كلية هندسة
وجبت مجموعها ودخلتها بس مفرحتش باللى عملته غياب بابا مش بس خلا فرحتى ناقصة لا ده خلانى مش عارف افرح من اصله
مكنتش فرحان بس كنت مرتاح اكيد هو وقتها كان فرحان بيا
كنت مرتاح لانى مخيبتش امله فيا بس معرفتش افرح لانه مش موجود
من ساعتها وانا كل ما تحصلى حاجة صعبة اقول هتحملها هتعدى اذا كنت قدرت اتحمل موت ابويا قبل امتحاناتى مش هقدر اتحمل اللى بيحصلى ده
رشوانة :عندك حق تشجع نفسك بانك تفتكر انك كنت قوى ومستسلمتش وانتصرت ودخلت هندسة زى ما باباك الله يرحمه كان عايز
زياد :عمرى ما اعتبرت ان ده انتصار
رشوانة :بس ده انتصار وانتصار كبير كمان ومحتاج قوة مش اى حد مكانك كان هيقدر يعمل اللى انت عملته
زياد :حتى لو ده انتصار فهو انتصار حزين
انا خسرت ابويا يعنى اى حاجة تانية هكسبها مهما كانت غالية هتبقى رخيصة وملهاش قيمة عندى
خسارتى ليه ميعوضهاش اى مكسب فى الدنيا فهمانى
رشوانة :فهماك معاك حق ربنا يرحمه ويغفرله
زياد :اللهم امين
بعد شهرين
رشوانة :واحدة صاحبتى فى الشغل النهاردة قالتلى ان احلى حاجة فيا ان عينى باردة
لما بشوف حاجة حلوة عند حد بقول ما شاء الله ربنا يبارك
قولتلها مش ده الطبيعى
قالتلتى لا للاسف اللى عينيهم مليانة وشبعانين بس هما اللى بيقولو كده انما فى ناس تكره تشوف غيرها فى نعمة قلوبهم بتولع نار كده لو شافو حد غيرهم فرحان ولا ناجح
زياد :وانتى رديتى عليها بايه
رشوانة :قولتلها ان اهلى ربونى على كده لما اشوف حاجة حلوة عند حد اقول ما شاء الله اللهم بارك
علشان محسدوش غصب عنى
وعلشان ربنا يباركله فى الخير اللى عنده ويرزقنى بالخير انا كمان
قالتلى ربنا يبارك فى اهلك اللى ربوكى التربية الجميلة دى
فرحت وهى بتدعى لاهلى
بس حسيت انى قديمة ومكانى فى المتحف من كتر ما هى محسسانى ان اللى زيى انقرضو خلاص
زياد :هى قصدها انك نادرة ومميزة ومختلفة اختلاف حلو
لو اهالى كتير ربو ولادهم زى ما اهلك ربوكى كان زمانا فى حال غير الحال
رشوانة :انا فاهمة ان كلامك وكلامها مديح
بس محسسنى انى قديمة انا واهلى
زياد :مش قديمة ولا حاجة
الاخلاق مبتقدمش
فى حاجات كده مهما عدى عليها الزمن مبتقدمش يا رشوانة زى الاخلاق
رشوانة :وايه تانى مبيقدمش
زياد :المشاعر برضه مبتقدمش مبيعافيش عليها الزمن
مبينزلهاش تحديثات ولا بيكونلها بدايل اصل هنستبدلها بايه جملة زى جملة انا جنبك اللى بنقولها علشان نطمن حد خايف دى نستبدلها بايه احدث
رشوانة :او جملة متقلقش كل حاجة هتبقى كويسة او جملة انا واثقة فيك انت تقدر تنجح اللى بنقولهم علشان نشجع حد بيهم
زياد :او انا بحبك ياه على جمال جملة انا بحبك
تقدم ازاى دى بس ولا نلاقيلها ايه بديل
بزمتك مش فرحانة بيها
رشوانة :ها
زياد :مفرحتيش لما قولتلك انا بحبك
رشوانة :هفرح ليه انت بتقولها علشان تضرب بيها مثال
زياد :لا انا بقولها علشان انا بحبك فعلا بحبك
رشوانة :معاك حق مبتقدمش فعلا ولا ليها بديل
زياد :بس كده
رشوانة :وفرحت لما سمعتها منك
زياد :وايه تانى
رشوانة :بس كده عايز ايه انت
زياد :عايز اتنين شاورما فراخ من غير تومية علشان مبحبهاش
احنا هنهزر يا رشوانة ردك ايه عليها
رشوانة :ماشى
زياد :هو ايه اللى ماشى
رشوانة :ماشى حبنى انا اتحب فعلا
زياد :ده ايه العسل ده خاطب برطمان مربى يا ناس
رشوانة :انا مبهزرش انا فعلا اتحب
زياد :يا ست الكل انتى تتعشقى مش بس تتحبى
وانا بحبك ردك ايه
رشوانة :هرد اقولك ايه تعالى قابل اهلى ما انت خطيبى يعنى اعملك ايه اكتر من كده
زياد :موتينى مشلول بردودك بحيث تبقى ارملة من قبل ما تتجوزى اصلا يا رشوانة
هو انتى مخطوبالى غصب عنك يا بنتى
رشوانة :لا
زياد :شفقة طيب صعبت عليكى فتخطبتيلى
رشوانة :هتصعب عليا ليه هو انت من زوى الاحتياجات الخاصة
زياد :ماسك عليكى زلة ولا متبرعلك بكليتى وبترديلى الجميل
رشوانة :لا برضه
زياد :ولما هو لا ياللى يجيلك ويحط عليكى مبترديش عليا عدل ليه يا شيخة حسبى الله ونعم الوكيل فيكى
رشوانة :كده برضه يا زياد بتدعى عليا وتحسبن وانا اللى بحبك
زياد :يا شيخة حرام عليكى طلعتى روحى على ما قولتيها
رشوانة وهى بتضحك :براحتى خطيبى واعمل فيك اللى انا عايزاه
زياد :ماشى براحتك دلوقتى بس علشان احنا فى الخطوبة انما بقى بعد الجواز
رشوانة :هيبقى براحة مين بقى ان شاء الله
زياد وهو بيضحك :براحتك انتى برضه يا عمرى
رشوانة وهى بتضحك :اه بحسب
زياد وهو بيضحك :شكلى حلو وانا بجيب ورا
رشوانة وهى بتضحك :قمر يا حبيبى قمر
للاسف حاليا بقى فى ناس كتير بتعتبر ان الدين والاخلاق والاحترام والمبادئ موضة قديمة
وعلشان تكون على الموضة ومتبقاش دقة قديمة لازم ميكونش عندك دين او معندكش اخلاق ولا مبادئ
الدين والاخلاق والمبادئ والمشاعر الحلوة حاجات مبتقدمش ومفيش ليها بدايل
اوعو تستغنو عنهم ولا تعتبروهم موضة قديمة
وتغور اى موضة حديثة لو تمنها تنازلكم عن دينكم او اخلاقكم او مبادئ حلوة اتربيتو عليها
تغور الموضة الحديثة لو هيكون تمنها انكم تفقدو هويتكم وتتحولو لنسخ مشوهة من ناس تانيين لا تشبهولهم ولا يشبهولكم
خليكم فاكرين الدين والاخلاق والمشاعر مفيش عنهم غنا ولا ينفع يتقال عنهم موضة قديمة 💖
#حكايات_منار
فضلا تدعو لابويا بالرحمة والمغفرة وان يسكنه الله فردوسه الاعلى بدون حساب ولا سابقة عذاب هو وموتى المسلمين جميعا خصوصا من زال اثره فلم يزره زائر ولم يذكره ذاكر