رواية (#عائلتي_ولكن)
"42"
لو يطول الوقت عن عيني وتغيب ،، خاطري يسلى وطرفي ماسهر،
كان حظي جابك لقلبي قريب ،،وسالفتنا عوضت ظيم وقهر
طالبك يارب كانه لي حبيب ،،قربه يارب يارب البشر
وكان مالي فيه حظ ولا نصيب ،،عوض عيوني بشوفه بالقدر
قرب احساسي لاحساسك يطيب،،كل معنى حب يبقى لو عبر
كل الخواطر كلمه في نبرة غريب،،كان في بعدك صادق شعوري صبر
كل ليله في غيابك لو تجيب ،،الأماني شي ووجودك عمر
حتى حلمي فيك من هجرك عطيب ،،لحظة الأشواق يملاها الكدر
كانن مقعمزات وهايمات كلهن ع الأغنيه هذي في المنظومه ،بعد كملت ريما حنتها وهن قعمزن من التدهكيل والي هذي سارحه في موالها
رنده:يناعلي عليك اغنيه تهبل
وجدان:بكل
موده:هيا خلاص روحو كلهم خلينا انصبو انغيرو دبشنا وانوضو ع الحوسه هذي
ريهام :انتن تعبانات اكيده توا انصبي انا واميره وملاك مادرنش حاجه واجد
وجدان استغربت من طيابة ريهام بحتت في موده وضحكت
موده:لا كلنا تعبنا توا انصبو مع بعضنا انكملو بسرعه هي مافيش حوسه واجد اصلا
صبت موده لدار خواتها ولحقنها رنده ووجدان
رنده:من امتى هالطيابه الي عند ريهام
وجدان:انشالله عقابها خير
رنده:قلبها رقيق ياخيا
موده:قلبها رقيق قدام الناس لكن من جوا افعى خزي
وجدان:هيا نطلعو بسرعه عيب اميره برا
رنده:هيا انبدلو بسرعه ونطلعو
غيرن البنات دبشهن وطلعن بدن يبرمن ع الحوش والصبايا مقعمزات يهدرزن حدا ريما الي متمدده بحنتها
عدا يوم الحنه ع خير بس بحرق دم لرنده الي حامد زعلان منها ، الي هذي كلمت حبيبها ورقدت الا هي رنت عليه مايردش
رقدن كلهن من التعب الا موده خلتهن يرقدن وقريب ع الساعه 5 الفجر رنت عليه اخرى
حامد:ايوا
رنده:بنفهم كنك ماترد
حامد:تي خوتك احدايا شن اندير توا راقدين احدايا طلعت بالقيله للجنان بيش رديت عليك
رنده:شن داير توا
حامد:هضا وين خطرلك تسألي
رنده:ياحامد فهمني شن اندير ،انا مافضتش بكل ولا حصلت فرصه انرن عليك ، وبعد رنيت عليك ماتردش
حامد:انا مانبيكش اتكلميني ياستي دزي حتى مسج طمنيني عليك حسسيني انك في حياتي
رنده:مانقصدش وحق ربي مافضيت
حامد:ماهو هنا الكارثه انك ماتدورينيش الا وقت تفضي ، تي انتي من يوم مادرت الحاظث ماسمعتش صوتك بكل مشيناه كله ع النت
رنده:توا انت تبي اتدير مشكله وخلاص
حامد:انا مش ناقص اصلا الي فيا سادني
رنده:ولا انا ناقصه ع فكره
حامد:باهي تمام ، تصبحي ع خير
رنده:وانت من هله
سكتو هما الاثنين يراجو في بعضهم يسكرو بس ماقدروش
حامد:عليش ماسكرتي
رنده'وعليش انت ماتسكر
حامد:حيوانه
رنده:مش احون منك
حامد:هههههههخهه في كدا ؟
رنده:في اها 😡
حامد:اسف
رنده:انا اسفه ، ومعش تعاودها
حامد:انتي اتأسفي ولا تعاتبي
رنده:انت من اصلا بيش تخليني نتنكد مجرد اني حسيت انك زعلت منك ، انت من عشان نبكي وقلبي يوجعني لما نسمعك اتألم ، انت من عشان انموت من خوفي ويغمى عليا ، انت من عشان نفكر فيك ديمه ،انت من عشان تخلي سعادتي مرتبطه بيك فهمني بس ،كيف تي عمره ماحد خلاني هكي عمري مااهتميت بحد للدرجه هذي
حامد:من جدك تسألي انا من
رنده:اها ، عارفه انت حامد ولد عمي بس كيف تخليني هبله هكي
حامد:لأنك تحبيني تميتي هبله
رنده:مصدق روحك من قالك انحبك
حامد:احلفي انك ماتحبينيش
رنده:تي نحبك خزي عليك وع وجك
حامد:يابقره وع وجك
رنده:هههههههههه
حامد:عليش تضحكي هعهههههه
رنده:ع عباطتنا
حامد:ربي مايحرمني من هالضحكه
رنده:ولا يحرمني منك
حامد:شن موعيك لتوا انتي
رنده:عشان هكي سألتك انت من !!!
حامد:قصدك عشان تكلميني
رنده:حييي كيف عرفت
حامد:تي نفهمها ع الطاير كيف عاد نعجبوك را
رنده:ياي بكل
حامد:انحبك
رنده:انموت فيك ،قصدك انت هضا كله مصبي ع كرعيك
حامد:لالا ع الكرسي ف الجنان
رنده:تي صقع خش جوا
حامد:تي انا مضغوط بكل ، جوا شفشيف
رنده:الجو لاعاد عرفناه شتا لا صيف
حامد:المفروض الربيع ولا الصيف واحد فيهم يتنازل ويخش
رنده:هههه استغفر الله
حامد:رصيدك واجد انتي
رنده:شحتت جنيه من امي
حامد:باهي خليلك رنه ، توا انعاودلك انا
رنده:لا انت توا اتخش جوا ترقد سادك
حامد:ماتبيش تكلميني ولا شنو
رنده :اسمع
حامد:نعم
رنده:اطلع قدام باب الحوش
حامد:عليش
رنده:اطلع بس شويه وتوا انعاودلك
حامد:تي كنك 😳 الو تي الو
