رواية (#عائلتي_ولكن)
"22"
تمت موده متنحه في المحادثة ومش مستوعبه ، قلبها وجعها قعدت اترد وتقرا كم مره وتعاود في المحادثه وتقراها وهي مش مصدقه ان هضا مصطفى الي حباته وصدقاته والي خانت هلها وثقتهم ع سباه ، قعدت ماسكه دموعها لين ردت كل شي كيف ماكان عشان مروان مايشكش ، بعدها طلعت من الدار وهي مصدومه لا كلمه ولا نص خشت دارها سكرت عليها ، وانهارت من الصدمه تمت تبكي بشهقه مش فاهمه شي ليش ولا كيف ، تكذب في روحها بس كل شي بالدليل
موده:لالا مستحيل مصطفى ايخوني اكيد في شي غلط ، باهي والي قريته والي قريته هضا شنو !!!!
ااااه ياربي شن اندير بس مش فاهمه شي مش مستوعبه شي يااارب كون معايا وقويني بيش انواجهه ياررب
منهاره تبكي بقهر عجز الدنيا تملك فيها ، تبكي بالقوه وتكتم في فمها بيش امها ماتسمعهش ، وكل الي في عقلها كيف اتبحت في مروان بعد خانت ثقته فيها مع صاحبه الخاين ، شن حتقول لخواتها الي فرحاناتلها وخايفات عليها في نفس الوقت ، شن حتدير لو طلع فعلا خاين ، كيف حتقدر اتعيش بلاه بعد تعودت عليه ، كيف حتقدر تنسى وتتريح
كانت في عز بكاها وقهرتها ، وتفاجأت بيه يرن عليها ، تمالكت أعصابها ، تنهدت بيش اتقوي روحها وتبينله انه مافي شي بيش تقدر تسحب منه الكلام
ردت عليه ...
مصطفى:حبيبي شنجونا
وقتها حست انها تبي اتسبه قرفت منه حست انها هبله غبيه دموعها تبي تنزل بس مسكتهن
موده:اهلين
مصطفى:شنو اهلين كنك ، كنه صوتك
موده:لا مافي شي ، شن جوك انت
مصطفى:الحمدلله تمام ، شنجو البيان والدفع
موده:تمام بكل الحمدلله ربي هنانا
مصطفى:باهي الحمدلله ، مروان روح
موده:توا صوت الباب شكله روح
مصطفى:وحق ربي فيك حاجه انتي مش مريحتيني
موده:مافي شي يامصطفى ، احكي انت
مصطفى:مصطفى 😏؟ اممم باهي المهم بنقولك ع حاجه انا
موده:خير انشالله
مصطفى:الخميس بنسافر للمغرب
اول مامصطفى قال هكي حست كأنه موس غرس في قلبها دموعها تمن ينزلن بلا ماتحس غمضت عيونها وتنهدت بالقوه
مصطفى:كنك ياقلبي
موده سكتت شويه مسحت دموعها : مسافر بيش تشري هدية عيد الحب لملاك الكبيده ؟؟؟ 😖😭😭
مصطفى : 😳 من ملاك فيش تخرفي انتي
موده:عدي اقرى محادثتك مع مروان وتوا تعرف ،، ولا نقولك انت اصلا عارف وتستعبط ، سبحان الله ع الدنيا ، بنفهم شي واحد ليش ليش شن درتلك انا بيش اتدير فيا هكي ، هذي اخرتها تخونني يامصطفى ، ليش ترتبط بيا وتخليني انحبك مدامك مكبد ع وحده في المغرب ، ولا هذي مدايرها للمغرب
مصطفى:غير افهميني بس
موده علت صوتها وتمت تدوي بعبرتها :شن نفهم اها شن نفهم
مصطفى:نقصي حسك لما تدوي معايا ، انا ماخنتكش ولا عمري انديرها
موده:لليش ماهو خنت صاحبك وارتبطت فيا مش حتخونني يعني
مصطفى 😡 : اسمعي سكري باهي واليوم ماتحكيش معايا بكل
موده:عليك ثقه ومن قالك مزال بنكلمك اصلا
مصطفى:اعوذ بالله من الشيطان ، اللهم طولك ياروح
موده:بنفهم ليش ليش بس
مصطفى:تي سكري فمك الزح عطيني فرصه ندوي ، تي تدوي في دوه مش هي بكل را ، افطني لروحك ماتقوليش حاجات تندمي عليهن بعدين ، سكري توا وبعد تهدي توا انرن عليك
موده:لا توا اتفهمني ومع اني عارفه ان ماعندكش ماتدوي
مصطفى:ياموده بطلي دوه زايده ، واسكتي واسمعيني
موده:ادوي
مصطفى:اها انا كنت انحب وحده في المغرب اسمها ملاك ، وهي بنت خالتي ومن زمان نحبها ، اها كنت حتى اندير معاها في حاجات متنرضش عليك حتى تسمعيها ، اها كانت امي تبيني نخطبها ومروان وسعيد عارفات بيها بس وحق الله ليا فتره ماحكيت معاها ، ولها فتره اتدزلي وانا فايتها ، وحق الله مانكذب عليك في شي
موده:تي المحادثه لها اسبوع يامصطفى وتحلف
مصطفى:انا كنت بنمشي للمغرب ، وكنت بنشري هديه ع عيد الحب لكن اقسم بالله ماهي لملاك ، الهديه لكي انتي ياموده ، وقلت لمروان انها لملاك بيش مايشكش
موده:تبيني نصدقك يعني ، تي تستعبط عليا انت ، وعليش يقولك بتهيج مع الكبيده اتقوله ملاك هذي مش غير انهيج معاها
مصطفى:طبيعي لما حنمشي حنحقها ونطلع حتى معاها ، هذي بنت خالتي قبل كل شي
موده:وانا المفروض اني انصدقك وانقولك عدي ياحبيبي ودير الي تبيه ، اها عدي ودير الي تبيه انت حر لأنك معاش تهمني ،، سلام يامصطفى
مصطفى:موده لو سكرتي اقسم بالله ماعاد انكلمك
موده:يكون احسن ، بيش تعرف من خسرت وخلي ملاك تنفعك ...
سكرت موده وهي منفصله ونفسيتها زفت قريب اتموت من القهر وراسها مصدع من البكا ، ماعرفتش هل الي داراته صح ولالا بس ماقدرتش تتحمله وهو يعترف قدامها انه لو مشى للمغرب حيشوف ملاك ، وانه كان مداير معاها علاقات من نوع اخر ، كانت تحسابه بريء وهي اول حب لها بس صدمتها فيه كانت كبيره
اما مصطفى فكان راقيله بكل قريب ينفجر عزق التليفون في الساس وماعرفش شن يدير ، استغرب كيف موده قرت المحادثه ، وكيف قدرت تقسي قلبها عليه وتدويله بالأسلوب هضا ، انقهر من روحه انه حلف مايكلمهش ، واستحقر روحه ان كل الناس تحسابه بريء بس هو ياما تحت السواهي دواهي ، تذكر هو شن كان يقول لاصحابه ويدير روحه مش فاهم شي في الحب وهو عايش حياه اخرى مع ملاك حتى اصحابها ماوصلولها ، كلام موده اثر فيه واجد لدرجة انه لما تذكره تما يبكي وضميره يأنب فيه ، وقتها عرف انه كبد عليها وانه يحبها بجنون ، بس كبرياءه كيف مانقولو ماسمحلش انه يرن عليها بعد الكلام الي قالاته
