عائلتي ولكن

30

(#عائلتي_ولكن)

"30"

تمت تبكي وخلاص عاجزه،كيف مايقولو قليلة حيله،قعمزت ع السرير،يدها ع خدها،سارحه في الساس،عيونها معبيه دموع وكل ماترمش يطيحن دموعها ع يدها،كان كل تفكيرها ندم،ياريتها ماحبت وياريتها مافتحت طريق مع مصطفى راهي ماعرفتش طريق للعذاب بس خلاص توا كل شي انفرض عليها ولازم تتحمل عقبات افعالها
صبت غيرت دبشها وصلت العشاء وردت ع سريرها ، لين سمعت أمها جت
نجيه:موده
موده:هنا ياامي
خشت نجيه:كنك باكيه انتي ولا شنو
موده:بطني وجعتني فجأه مش عارفه كني
نجيه:صبي خودي بنادول توا تقعدي كويسه وارقدي أكيده مدهكله من الحوسه
موده:انا نعسانه اصلا
نجيه:باهي حتى نا بنصلي وانخش نرقد
موده:الشباب روحو
نجيه:اها توا اطلعو ،ومروان في داره
موده:باهي تمام
نجيه:تصبحي ع خير
طلعت نجيه وسكرت الباب ، وردت موده لدموعها معش عرفت شن اتدير،حست إن أكثر شخص محتاجته وحيفهمها هو مصطفى ، راجت شويه بعدها رنت عليه ماردش ، زادت انقهرت وقررت ترقد
في الوقت هضا كان مصطفى مزال مع سعيد في السياره
سعيد:تكي بيا انجيب خبزه
مصطفى:هيا بسرعه
نزل سعيد يجيب خبزه
مصطفى يدوي لروحه ويبحت في رقم موده:وأخيرا شفت رقمها يرن الزح وحق ربي مرااايف عليك ياموده
سعيد:كنك تدوي لروحك انت
مصطفى:وين الخبزه
سعيد:تي مصقعه شكلها وبايته فوتها
مصطفى:خلاص معش تبي شي
سعيد:ع الحوش دغري
مصطفى:شنج كبيدتك
سعيد:اهو بدينا ناخذو ع بعضنا وجوها يهبل الحق
مصطفى:ربي يدوم ياسي
سعيد:وانت معش حكيتلي ع البنت هذي الي داهبتلك شيرتك
مصطفى:ماهوانت لهيت في عرس ولد خالك معش حكينا،تي من يوم ماتعاركنا توا كيف حنت عليا ورنت،تواشكلها فتحت فونها بس
سعيد:باهي تمام
مصطفى:سلم ع خوتك
سعيد:يوصل منور ياطيري
نزل سعيد وروح مصطفى ع طول خش داره ورن ع موده
موده كانت وقتها كيف خاشه في النوم ناضت ع هزة التليفون تحت مخدتها
موده:الو
مصطفى:وحق ربي ححرام عليك هي
موده اول ماسمعت صوته تمت تهر وتبكي،انت حيوان باهي وحمار وماتفهمش
مصطفى:تي كنك الزح عليش البكا والكلام هضا
موده:تي انحبك وحق ربي وانت تعبتني
مصطفى:اقسم بالله انحبك غلطه وحق ربي وماعاد تتعاود،نستاهل عقابك ليا،بس خلاص والله ماعاد نقدر نتحمل تعاقبيني
موده:انا معش نتحمل تبعد عليا،تي في كل يوم عاقبتك فيه زدت انحبك،مصطفى انا معش نقدر انعيش بدونك
مصطفى:والله حتى نا مانقدر،خلاص خلينا انردو كيف قبل،سادنا
موده:مصطفى انا تعبانه وطايحه في مشكله كبيره
مصطفى:ادوي شن في
موده:افهمني كويس وماتحمقش عليا،انا حكيتلك لأنك روحي وانت اكثر واحد حتفهمني
مصطفى:تي ادوي شن في
موده:انا الاسبوع الي فات بعد تعاركنا بكم يوم،كانت رنده اختي طايحه في مشكله رقم ايرن عليها ويدزلها في مسجات ويقوللها ع خطواتها بالحركه،تمت خايفه وحالتها حاله،قلت انساعدها
مصطفى:باهي شن درتي
موده:خذيت الشفره الي جبتها ليا ورنيت ع الرقم الفت عليه قصه وعرفت من هو وطلع حامد ولد عمي
مصطفى:تدوي من جدك انتي
موده:ارجى ماتعصبش خليني انكمل،امبدري دزلها ممسج وقاللها انه عرف ان الرقم الي رن عليه هو رقمك انت ويبي يعرف شن علاقة رنده بيك
مصطفى:تي حي ع امك الغباء ياموده الزح،تي شن درتي فينا،فتحتي علينا هم مايلتم،وانتي بأي حق وليش أصلا اترني ع امه،كيف اي رقم يرن عليك تشوفيه من انتي ولا شنو، عاجبك الي صار توا،ياحول الله ياربي وحق الله منصدم ماني عارف شن انقول ، سكري ياموده توا سكري لأني لو قعدت اننلم فيك حنسمعك كلام يزعلك
سكرت موده وزاد نكدها ،ف اليوم الي ردت لحبيبها تعاركو أخرى،ولازم تلقى حل في المشكله الي حطت روحها وحطت أختها فيها
مرت نص ساعه ورن مصطفى أخرى
موده:ايوا
مصطفى:توا انتي الي تبكي اخرى بعد الي درتيه
موده:خلاص يامصطفى وحق ربي سادني الي فيا
مصطفى:تي كارثه الي درتيها وحق الله ماني عارفه شن اندير ولا شن ندوي،حطيتيني وحطيتي روحك وخواتك في مشاكل ماليهنش اول من اخر،وبعدين الراجل ولد عمك هضا عليش يرن عليها شن يبي منها
موده:قال يحبها
مصطفى:هضا لو واحد غريب مايدير هكي يجي دغري مش من تحت لتحت يابالك هضا ولد عمها،سبحان الله وخلاص
موده:باهي شن اندير توا اهدى بالله عليك وفهمني
مصطفى:مافيش حل الا انك تقولي لرنده اتكلمه واتقوله ان الشفره الي رنت عليه شفرتي بس عاطيها لبنت عمي وهي صاحبة رنده في الجامعه
موده:زعمك تمشي عليه
مصطفى:وهو اكيده حيجي ويديرلي قصه ويسألني وانا حنقوله نفس الي قلته لكي
موده:خلاص توا نقول لرنده اتقوله هكي
مصطفى:اسمعيني انا عشان صارت قصه ومانبيش انكبر الموضوع اكثر ماهو كبير سكتت، لكن اقسم بالله ياموده كان تتعاود حاجه كيف هذي يصير تصرف عمرك ماتوقعيه مني،والشفره الي عطيتها لكي معش تفتحيها سكري امها لين تمر هالقصه
موده:حاضر
مصطفى:اففففففف عليك قصه الزح
موده:اسفه والله غصب عني ماكنتش نعلم ان هضا كله حيصير
مصطفى:صار خير ،مانبيش نتنكدو في اليوم الي نردو فيه لبعضنا،سادنا زعل ونكد
موده:باهي
مصطفى:ماتعلميش قديش مرايف عليك وحق ربي
موده:انت بارد بس رايفت عليك
مصطفى:اقسم بالله وعهد عليا ماتسمى عليا مرا غيرك
موده:ان شاء الله
مصطفى:انحس فيك مش واثقه في كلامي
موده:تبيلي بيش انرد موده الي عرفتها
مصطفى:واااو مقسى قلبك
موده:بيش تشعف
مصطفى:وحق الله شعفت
موده:امممم توا انشوفو
مصطفى:باهي انحبك
موده:حتى نا
مصطفى:خلاص الزح
موده:مبدري كنك انصدمت لما شفتني
مصطفى:اولا تخزرطت من منعم،تانيا حسيت قلبي وجعني لأني مرااايف عليك،وثالثا خفت عليك لأني شفتك مضايقه ودموع ع خدك،ماكنتش نعلم انك طايحه في الكارثه هذي
موده:وحق ربي أكثر واحد احتجته انت
مصطفى:ربي يخليك ليا يااارب،حبيبي الرصيد بيفصل
موده:سلام نحكو بكرا
سكرت موده وفرحت انها لقت حل للقصه الي طاحت فيها ودعت ربي تمشي ع حامد وتنحل،حست ان الروح ردت فيها بعد ماردت حكت مع مصطفى،ع الأقل لقت من يصبي معاها في الوقت الي خواتها حطو اللوم عليها وحملوها المسؤوليه رغم أنهم شجعوها في البدايه .....

تقييمكم :)