كلثوم:يناعلي البنات
منى:هيييء كنهن
نجيه:ياستير يارب ي ياستير
كلثوم:يناعلي محرمتي وين
ريما:هي ياعمتي
موده:شن في
ريما:مش عارفين
مرام:انتي ماتجريش
طلعن كلهن
وجدان:منننعم رد عليا منعم
كلثوم:ووو عليا ولدي منعم منعم ، من دار فيك هكي منعم
مرام:بسرعه انشيلوه للمستشفى
نجيه:ياربيي من بيشيله مافي حد قاعد
منى جت شافاته
منى:نا بنولع السياره انجيبها هنا وانتن جيبنه بسرعه
رنده:بالله عليك يامنى قوليلنا كنه
منى:مش وقت دوه بكل بسرعه شيلنه علي ماجبت السياره
طلعت منى تجيب سيارتها قدام حوش كلثوم والاخرات يتعايطن ، شمرن رنده ووجدان منهم وطلعن يجارن بيه بمحارم الصلاه ركبته السياره وعدن بيه مع منى وكلثوم تعيط ومقعمزه ع الماده تخبط ونجيه تهدي فيها ومرام تبكي وماسكه عمران الي مفجوع من العياط ، وموده مصدومه زدمزعها ع خدها تهدي في كلثوم وريما ردت لحوش نجيه جابت فونها ورنت ع حاتم
ريما:ايوت وينك انت
حاتم:كنك تبكي تحسي في حاجه
ريما:منعم عدو بيه البنات للمستشفى الحقهن بسرعه حاتم:تي كنه شن في
ريما:مانندروش ع شي جينا لقيناه طايح قدام الجوش وكله دم
حاتم:باهي سكري سكري
ماكانوش فاهمين شي ولا عارفين شن صاير كلهن يتباكن وحتى البنات نسن تليفوناتهن وماعرفنش كيف يتطمنن
عند البنات
وجدان:ياخيي الحقنا خويا خويا في السياره مضروب
جو الرجاله يجارو نزلو منعم وخششوه للمستشفى والبنات وراهم بمحارم الصلاه الي ملبزه كلها دم من منعم
خشت منى تجري وراهم بحكم انها دكتوره طلعت بطاقتها من السياره ورتها لهم وخششوها معاهم قعدن رنده ووجدان يتباكن وحالتهن حاله يرجن شن بيصير في منعم الي جابننه شبه ميت وحتى ملامحه مش باينه من الدم ، مش عارفات يصرفن لا معاهن تليفونات ولا يعرفن حد لين شويه وجو مروان وحاتم
مروان:منعم وين ، شن صار فيه ادون
رنده تشهق بالعبره:مزالو جوه معاهم منى
حاتم:شن صارله هو كيف
وجدان:امي قالتلي منعم ف الحوش حقيته خش بالسياره ، مشيت انا ورنده للحوش دوبنا نفتحو باب الجنان نلقوه طايح وكله دم ، حبيبي فاقد مايندري ع شي ، يااارب ماتفجعنا فيه يارب
مروان:تي كيف من شنو الدم مضروب ولا شنو
رنده:شن عرفنا نحنا ، اااه يااارب يااارب احفظه يااارب يامنعم ياحنوني
حاتم:اسكتن خلاص
مروان:تي كيف الزح كيييف
حاتم:وحد الله يارا ف المستشفى رانا
مروان:تي مش ساد مؤيد ياحاتم مش ساد مؤيد ، اااخ يااارب واجد يارب
حاتم:يارا استغفر ربك كنك انت
قعدو في حاله ولين نص ساعه وطلعت منى
وجدان:بالله عليك شن صاره
منى وهي تمسح ف دموعها:الحمدلله قريب فقدناه بس ربي نجاه
حاتم:شن حالته توا
منى:توا عاطيينه مهدئ خيطوله الجرح الحمدلله مش خطير الجرح الي ضاربه مش متمكن من الضربه خايف شكله
مروان:قصدك ضربة موس
منى:اها ضربه في جنبه وضربه في فخذه
مروان:تي كيف خش الي اضربه كيف خش والبوابه مسكره
منى:مش وقت الكلام هضا توا ، انا والبنات حنروحو وانتم خليكم هنا
حاتم:هو ف العنايه توا
منى:اها ممكن الصبح يفوق وان شاء الله يقعد احسن
مروان:تي وحق الاه كان صارله شي را خشيت عقل مش عقلي
رنده:مانقدروش انشوفوه 😭
حاتم:كلم باتي قولله
مروان:توا انكلمه ، منى خودي وجدان ورنده وروحن انتن
رنده:خلوني معاه
حاتم:شن تقعدي معاه ، روحي ع الاقل طمنن امي
مروان:بحتن مناظركن قدام الناس روحن
منى:حي باتي هو
محمود:وينه وينه منعم
مروان:ماتخافش ياباتي كويس هو
محمود:وينه باهي
منى:قاعد ف العنايه بإذن الله شويه ويفوق يبقى كويس
محمود:شن صارله
منى:ضربة موس بس جت خفيفه مش عميقه
محمود:لطف الله الحمدلله
مروان:قعمز ياباتي تريح
منى:بنروحو نحنا
حاتم:باهي عدن
منى:هيا بنات
طلعت منى والبنات عدن للحوش
كلثوم:بالله عليكن قولن شن صار فيه مات شن صار فيه
منى:تفاءلي خير كنك اسمالله ، الحمدلله بسيطه مافيه شي
كلثوم:كنه ماجا معاگن
نجيه:كنك ياكلثوم استهدي بالله
كلثوم:الكبد وااعره انتي اكثر وحده اتحسي بيا يانجيه
نجيه اول ماكلثوم قالتلها هكي تمت تهر وتبكي كانت مدكره يوم مؤيد بس مابتش تدوي عشان مايقولوش هذي تفاول عليه
نجيه:مش غير واااعره لتوا ناره في قلبي في كل كلمه وكل اكله هو يحبها في كل اسم زي اسمه وكل مانحق مرته وعياله ، ااااه يارب عطيني صبرك يااارب يااارب ماتزيدني نار علي ناري وااااعره
كلثوم:يااارب اشفيه يارب ماتفجعنا فيه
وجدان:حبيبي والله كل ماندكر منظره قلبي يوجعني
موده:الحقيره هي مافي حد غيرها
رنده:كيف
موده:انتصار هي الي دازه حد يقتله بسش ينتقملها من الي داره منعم
ريماس:لا امي ماتديرهش لالا
رنده:اتديرها ونص كيف ماقتلو مؤيد يقدرو يديروها
مرام:مش وقتها الدوه هذي
موده:كيف ماقلتو معلش في مؤيد وخليتو دمه يعدي هكي ، كيف ماسامحتوها في قهرها لنا وفي السحر الي داراته ، ميف حاجات واجد نسيتوهن بيش ماتديروش فضايح ، موت مؤيد وتيتيم عياله من السبب فيه ، الدمار الي صار في عيلتنا الفتره الي فاتت من السبب فيه ، تهاني توا ركبتها حاله نفسيه من السبب ، انا خويا ضربني ظلم وكلكم كرهتوني وظلمتوني من السبب ، منعم توا ف المستشفى من السبب ، مروان هرب وخطب وحده مايبيهش من السبب ، ميسون تعاني من السحر من السبب
قولولي ترا من ، كله من انتصار وريهام وسلوى ، ياااارب رده كله عليهن وجيب المشاكل بينهم ياااارب
نجيه:خلاص اعصابي مش متحمله، مرات مش هي ماتدويش هكي وخلاص
موده:خليكم قولو هكي ومزال ياما حيجيكم منها ، ياعالم هذي خشت ف الدم ، اشمعنى يوم خطبتي ومنعم بالذات الي انضرب، لان خلاص نحنا قهرتنا ومزالت تبي تنكد علينا ومنعم ماحد صدق فيه الكلام الي انقال عليه وع اميره قالت تقتله وتفتك منه بيش تطلع غلها وتنتقم منه ، خليكم انتم ساكتين ديمه خليكم لين تكمل علينا واحد واحد
ريما:خلاص ياموده
وجدان:ليش خلاص كلامها كله صح ، انتصار ماعندش شك فيها نتوقعها اتدير اكثى من هكي
ريماس:ياناس قدروني مهما كان الي تدوو عليها هذي امي حرام عليكم اعصابي
ريماس قالت هكي وصبت للدار
كلثوم كانت حاطه يدها ع خدها ودموعها ماوقفنش ونجيه سارحه ومره مره دموعها تنزل ، والباقيات يتهارجن ويدعن ع انتصار
ف نفس الوقت كانو ف المستشفى محمود وعياله ومصطفى وسعيد طبعا ضروري في كل شي معاهم
مروان:وحق الله انموت ونعرف من الي دار هكي
مصطفى:طلعوه طلعوه
محمود:باهي الحمدلله
طلعو منعم من العنايه وشالوه في دار ، شوبه وخشوله
حاتم:الحمدلله ع سلامتك
منعم كاين تعبان بكل :الله يسلمك
محمود:طهور انشالله ربي نجاك
منعم:الحمدلله ، من جابني هنا شن صار بالضبط
مروان:جابنك خواتك ، انت قوللنا شن صار
منعم:فتحت المفتاح وبنخش للحوش مانفطن الا بواحد ضاربني بموس ف جنبي مسكته من التلتيمه الي ع وجه بيش مانعرفش من دفني قعدت نمسك فيه من كراعه نغزني في فخدي معش قدرت وقتها ومعش نندري ع شي
مروان:ينعن ..... وماعرفتش من
منعم:عرفته
حاتم :من باهي
منعم:نفس الشخص الي قتل مؤيد
مروان:ولد فتحي
مصطفى:حي ع امه تدوي جد انت
منعم:وحق الله هو
محمود:منعم متأكد
منعم:ياباتي والله هو
مروان:شباب تعالو معايا
منعم:مروان اهدا بالله عليك
مروان:تي لعند امتى الزح لين تقتلني نا وحاتم ال....
محمود:احترم نفسك قدامي ع الاقل قعمز هنا
مروان:ياباتي كنك انت
محمود:قعمز قتلك
وقتها سعيد كاين ساكت بكل مابش يدوي حتى كلمه لين قرر انه يدير لعبه بيش يحصل تليفون مروان وهما لاهيين في قصة منعم بيش ماحد يدقق عليه
سعيد:مروان تليفونك شويه
مروان:امسك ، ياباتي كيف نقعمز ، كيف نسكت لين يهرب يعني
خدا سعيد التليفون دار روحه بيكلم منه بعدها طلع من الدار ،فتح ع قائمة الاسماء خدا الرقم الي يبيه ورد للدار عطا التليفون لمروان
سعيد:نعومه لاباس عليك ، نجيك بكره هلي يبوني
منعم:منور بكل ، خود راحتك
مصطفى:توا ايروحني مروان نا
سعيد:خلاص تم ، تصبحو ع خير
طلع سعيد ركب سيارته وعدا لمصوراتي
سعيد:السلام عليكم
المصور:وعليكم السلام تفضل
سعيد:عندي صور خاصه نبي نطلعهن من ميموري
مصور:قاعدات معاك
سعيد:اها في الميموري هض
مصور:خلاص بكره تلقاهن واتيات بما ان توا بنسكرو مش حنقدر نخدملك فيهن
سعيد:خلاص تم ، بكره ااصبح انجيك ، هي السلام عليكم
طلع سعيد روح وهو يخطط للي بيديره تاني يوم
نردو للمستشفى
مروان:باهي ياباتي روح انت توا نقعد معاه انا ، وحتى انتم روحو
مصطفى:لا قاعد انا ، روح انت ياحاتم
حاتم:خلاص توا انروح انا وباتي انطمنوهم
منعم:قول لامي مافيا شي ماتنشغلش
محمود:اي شي كلمو
مروان:تم
محمود:تصبحو ع خير
طلعو حاتم وباته وقعدو مصطفى ومروان مع منعم
مروان:وحق الله انشرده الواطي
منعم:خليه ياما جاييه
مصطفى:تي شن العرب هضوما كيف يفكرو
منعم:اااه ، حولها هدي
مروان:هكي تمام
منعم:ايوا تمام ،ينعن بوك ياانتصار وبو اليوم الي قعدتي فيه من عيلتنا
مروان:ياما جايهم ربك ماينسى حد
مصطفى:توا انجي
طلع مصطفى رن ع موده
موده:ايوا حبيبي
مصطفى:الحمدلله ع سلامته ياقليي
موده:الله يسلمك ، شفته
مصطفى:اها كويس ماشالله عليه توا كان يهدرز معانا
موده:باتي معاكم
مصطفى:لا توا روح هو وحاتم اكيد قريب يوصلو
موده:منعم ماقالش من ضاربه
مصطفى:نفس الي قاتل مؤيد
موده:حسسسبي الله قلتها لهم قةلولي لا ماتوصلش لهكي ، ياالله ياانتصار نشوف فيك يوم
مصطفى:اهدي ياقلبي خلاص
موده:دمرتنا ياحبيبي دمرتنا كسرت فرحتي الحقيره
مصطفى:ماعاش من يكسرك اهو منعم كويس ونحنا مع بعضنا غصب عنهم
موده:عارف من امتى اعلنت الحرب علينا من يوم ضربة مروان لبناتها في المدرسه المتخلفه الحقيره
مصطفى:اوو حمود شنجو ، قتلك سكري توا بعدين نحكو
حامد:كيف صار وين منعم شن صار فيه
مصطفى:كويس خشله هو ف الدار
حامد:لاباااس لاباس
منعم:خير يالباهي ، ااه ، شنجوك
حامد:تريح تريح ، كيف صار
مروان:الحقير ولد فتحي
حامد:جديات 😳
مروان:وحق الله
حامد:تي حي ع امه ، كنهم هضوما
مروان:وحق الله انجردله كتيبه تشرده ال...... هضا
حامد:وحق الله كثرو بكل
منعم:لا ناويلهم ع نيه غير نطلع طيب بس
مصطفى:وطو صوتكم انتم الساعه 12.كيف خششوك انت
حامد:الي مصبي برا نعرفه بسبسي وتهدريزه خششني
مروان:من قالها لك انت
حامد:ريما كلمت امي ، توا سيبت باتي وامي بيمشو عندكم ف الحوش
مروان:باهي تمام
منعم:اميه ترا
مصطفى:هي امسك
كانو كلهم مشغولين ع منعم بس ريس ستر ان الجؤح كان سطحي ، وناض منها ومايندروش ان ضربة منعم هذي بنهاية انتصار وسلوى وريهام
وان سعيد الهادي الي في حاله ، حيدير شي يخليهم ينوضو في بعضهم
وبكره انقوللكم سعيد شن حيدير 😍
