موده:نعم
مروان:تعالي نبيك
طلعت موده لمروان لقاته مصبي في الجنان
موده:خش كنك مصبي هنا
مروان:قتلك
موده:شنو
مروان:نبيك تكلمي عزيزه
موده 😒:عليش
مروان:قوليلها ان حتى مصطفى خطيبي مسافر مع مروان ، امس مش مصدقتني
موده:تعال هنا شن قصتها السفره هذي
مروان:اها حجزنا خلاص وبنسافرو
موده:تي شن العباطه هذي ، تي شن مشاكم بنفهم انا شن الحاجه المهمه الي تخليكم تسافرو
مروان:جايتنا شغله بنديروها
موده:شن ناقصكم بيش تشتغلو في المغرب
مروان:ماتكثريش دوه المهم كلمي عزيزه
موده:تعال هنا ندويلك انا
مروان دارلها بيده حركة متاع فوتيني وطلع
زادت موده انقهرت ومعش فهمت شي
قعدت ساكته خشت مع خواتها حطو الغدا تغدو بعدها ناضو ع الحوش ، وع أذان العشاء كملو حوسه وقعمزو
رنده:حي وجدان ترن
كلثوم:ردي ردي
رنده:اهلا ياعروس
وجدان:خير رايفت عليكم
رنده:بطلي كذب ، كيف حال عماد
وجدان:تمام التمام الحمدلله
رنده باهي الحلاه هاكي امي تبيك
خدت كلثوم التليفون
موده:شنجوها
رنده:صوتها تقول ايش
مرام:عبدالسلام بره
نجيه:خليه يخش
مرام:لا مستعجل بنروحو ع عمتي انشوفوها
نجيه:باهي سلمي عليه
ميسون:عادي تحطوني في الحوش
نجيه:خليك بكره يروحك مروان
ميسون:لالا العيال نومهم تغير نبيهمش يتعودو ع السهر
مرام:هيا باهي مش حيقول شي، يييه نسيت شحني في حوش هلي
ميسون:هيا حتى نا بنجيب حاجات من غادي هيا نمشو
مرام:هيا تصبحو ع خير ،امي عطيني المفتاح
نجيه:هاكي وجيبيه
مرام:حاضر
سلمن ميسون ومرام وطلعن
كلثوم:تسلم عليكم
نجيه:شنجوها
كلثوم:لا الحمدلله بكره مسقدين لتركيا
منى:ياخيا وجدان قعدت مرا
موده:امي بنروح انا
تغريد:خليكي
موده:حسني تعبانه
اميره:خليك باهي لين انروحو
ريماس:موده
موده:ها كنك
ريماس:تعالي نبيك اشويه
صبت موده خشت لريماس في دار منعم
موده:نعم
ريماس:خشي و سكري الباب
موده:كنك
ريماس:مصطفى مادوالكش ع حاجه
موده:قصدك ع سفرة المغرب
ريماس:اها انا من امس نحرق ، شن قصتها سفرتهم هذي
موده:مش عارفه الزح متنكده بكل حتى امبدري مروان دويتله مابش يرد عليا وقالي كلمي عزيزه مابيتش انكلمها يمشي يملح
ريماس:سعيد دارلي حظر
موده:لا مش حظر حتى نا انفجعت من مصطفى خشيت ع ايميلي اللخر لقيتهم مسكرين ايميلاتهم هما الثلاثه وحتى مروان ومصطفى قافلين شفراتهم
ريماس:تي كنهم هضوما بيهربو ولا شنو
موده:ما فهمت شي بس والله انربيه عليها مصطفى
ملاك:معلش خشيت بلا ماندق ، نبي عباياتنا
ريماس:مروحات
ملاك :اها باتي جا
اميره:هيا ياملاك
موده:تعالي نطلعو انسقدوهن
طلعن موده وريماس سلمن ع البنات وسقدنهن ، ورست ع منى وريما وتغريد وهل الحوش
في محل مصطفى وسعيد..
مصطفى:من لاخير راني رايفت الزح
سعيد:لا خليك قد الرهان ولا تنسحب وتدفع
مصطفى:الزح أصعب رهان خشيت فيه
مروان:توا انشوفو من الي مكبده صح
سعيد:عارف روحي بنخسر
مصطفى:الفوز يكون بأكثر عدد مسجات ومكالمات فائته
مروان:خلاص تم
مصطفى:بكره بنطلع للسوق من بيطلع
مروان:بنطلع نا انكمل باقي دبشي ونبيكم تمشو معايا عندي حاجات بنديرهن في الحوش
سعيد:خلاص تم ، توا وين بتمشي انت
مروان:ماعندش نيه انروح
مصطفى:تعالو باتو عندي
مروان:هي شكلها هك
سعيد:جعت نا اطلبلنا حاجه
مصطفى:كيف بنطلب وتليفوناتنا مسكرينهن ، هيا نسكرو ونعدو نسمسمو في شي مطعم
مروان:بنرجاكم ف السياره
