رواية (#عائلتي_ولكن)
"35"
عدو الشباب يجارو يدورو في كريمة ، ونجيه في حاله والبنات يهدن فيها كلهم ع باب الحوش يرجو في حد يجيب كريمة ويجي يطمنهم
نجيه:يناعلي وين عدت البنت
منى:منك لله يامؤيد طرطشت عيالك ودهبتلنا شيرتنا
كلثوم:وسعن بالكن البواب ع الباب لو طلعت راه حقها
مرام:يستر الله ياربي استر
موده:جو هما جو ومعاهم كريمه
نجيه:وين ،
مروان:دهشتني الفرخه
نجيه:تعالي هنا شن طلعك انتي اها شن حركك من هنا
كريمه:عديت نلعب مع امجد ودانا
نجيه:تعرفي اتعاوديها مره اخرى انوريك ، خشي جوا
مرام:وين لقيتوها
منعم:عند تهاني تلعب في الجنان
موده:يناعلي طلعت روحنا
منعم :الحمدلله عدت ع خير ، بس عينكم عليهم معش تخلوهم يطلعو ، وبعدين حوش انتصار عمال افطنولهم
سليمان :عطينا اميه يارنده
رنده:باهي شويه
حاتم:خشو خلاص ، بنعدو نحنا
كلثوم:وين ماشيين
حاتم:بنجيب شوية حاجات ناقصتني
كلثوم:باهي مربوحه
خشن للحوش ونجيه من كثر حرق اعصابها قعدت مضبطه كريمه وتبكي
منى:ياامي اهدي ،اهي البنت كويسه مافيها شي
نجيه:قاهريني مادوروش عيالهم بكل ، من امس وانا نحرق وهو عايش الحب وهي ضاربه الزعل ع حساب عيالهم واعصابي انا ، يحسابو ارواحهم مراهقين
موده:خلاص ياماما والله ماتزعلي روحك ع سباهم ، والله انوريه
نجيه:من هو
موده:ماعليك بس ، غير وسعي بالك وصبي تمرضي علينا والله ماحد بينفعك وعيال مؤيد خليهم شوري توا انا انرد بالي منهم
نجيه:الجارات مزالن قاعدات
مرام:اها معاهن اننصار وتوا قعمزت معاهن كلثوم ، عدي حتى انتي معاهم وماتزعليش روحك
نجيه:موده خوديها كريمه غيريلها دبشها وشوفيلي نجيه ومحمود ومحمد وين
موده:نجيه هي مصبيه ع الباب ، ومحمود عدا مع مروان ، ومحمد راقد
نجيه:باهي غيريلهن دبشهن نجيه وكريمه
موده:حاضر
خشت موده خدت بنات مؤيد دارتلهن حمامات وغيرتلهن دبشهن ، كانت حامقه من مؤيد لين معش حقت قدامها خدت التليفون ورنت عليه
مؤيد:ايوا دوده
موده:توا بالله انت مش متحشم ع وجك ، راجل طويل عريض قريب تسكر الثلاثين وعايشلي جو الحب عازق عيالك ع امي الي بيركبها السكر من ورا هبالك وقاعد عايشلي الحب ومسيب مرتك زعلانه والعيال كيف اليتامى ، معقوله يامؤيد انا اختك الصغيره انبهك ع الحاجات هذينا ، كنك قعدت هكي انت ، شن غيرك كنت قايم حوشك وماصدقناك تريحت ليش اتدمر حياتك بيدك
مؤيد:تي كنك انتي احترمي نفسك ماناقص الا انتي اتفهميني الغلط من الصح
موده:اين صح هضا وانت حياتك كلها غلط في غلط ، ماقتلكش ماتزوجش انت حر ، بس قيم حوشك وراضي مرتك ولم اعيالك بعدها ازوج
مؤيد:اسمعي ماتكثريش دوه العيال كان مضايقينكم انجي ناخذهم
موده:صار هضا الي فهمته من كلامي ، وحق الله مافي فايده منك ، العيال انا عمتهم يضايقوك انت وانا الي ناخذهم ، مش ايضايقوني انا ، لكن ربي يهديك ياخويا الكبير ، اقسم بالله كان امي امرضت ماني مسامحتك يامؤيد
سكرت موده في وجه مؤيد وانقهرت ع البنات الي يبحتن فيها بابتسامه قرت منها خوفهن من كلامها
كريمه:اعميمه انا والله عديت نلعب انتم زعلتو مني ، توا يعني ماما زعلانه منا معش بتجينا
موده:لا حبيبتي ماما بتمشي تشوف جدو وتجيكم
كريمه:باهي انا نبي حليب
موده:حاضر توا انديرلك
نجيه:حتى انا نبي
موده:باهي خليكن هنا انديرلكن حليب وانجيكن
طلعت موده عدت للمطبخ وهي تمسح في دموعها
وجدان:كنك
موده:كان انحقه قدامي مش عارفه شن اندير فيه
وجدان:من هضا باسم الله
موده:خونا الكبير العاقل
وجدان:توا يرد للطريق غير وسعي بالك
موده:علي مافطن لروحه نكونو نحنا راكبنا جميع الامراض من ورا القهاير ، ماتحقيش في امي كيف متنكده وباتي ماعندش نيه حتى يبات في الحوش من التخميم
وجدان:وسعي بالك بس
موده:وحق الله قاهرني ، خليني انعدي نعطيهن حليبهن وانرقدهن
وجدان:عدي باهي
عدت موده رقدت البنات وقعمزت مع خواتها ، شويه وروحن الجارات
نجيه :بنعدي للحوش انا تجن معايا
منى:اها بنحط ادبشي غادي ، توا جاي رافع جايب البنات جاه شغل بيمشي للمرج مروح يوم الفاتحه
موده:ماشالله انتن الاثنين مآنساتنا ، وعيال مؤيد
مرام:كنك مش عاجبك
موده:لا حشى وكلا
نجيه:هيا باهي صبن كان بتمشن
موده:انا بنقعد ماعندش نيه نروح
نجيه:نوضي بنات مؤيد خليني ناخدهن معايا
منى:هاتي محمد توا انشيله
كلثوم:توا بنفهم انا ميسون مدامها عند هلها كنها ماتاخد عيالها ، ولا ترد لحوشها وتمشي لهلها كل عشيه
نجيه:مانبيش انتصار تسمع شن بيخلصني من لسانها
كلثوم:شن في
نجيه:مؤيد تزوج وميسون حرجانه
كلثوم:يناعلي كنه مؤيد
نجيه:ولد باته ياحنه
موده:اسكتن ريماس جت
ريماس:اعميمه انشيل معاك الدبش
نجيه:تعالي ياريت ،هضاكا هو ياحنه خليني توا انروح انحس ف العيال مطرطشين ومش متريحين
كلثوم:ياحول الله ، ربي يي سرهم ياحنه والله ماتستاهل ميسون كيف العسل
منى:خويا مايعبي عينه التراب ، ربي يهديه
كلثوم:خلاص توا بكره تكمليلي باقي الموضوع
مؤيد:امي
نجيه:كنه هضا يعيط اسمالله ، نعم
طلعن كلهن للصاله
مؤيد:عطيني العيال انروح بيهم
نجيه:وين بتشيلهم
مؤيد:نقعد بيهم انا مدامهم مضايقينكم
نجيه:ادوي بالشويه من قالك مضايقينا
مؤيد:اسألي بنتك الصغيره الي متصله مدايره روحها تهزب
نجيه:من موده ؟؟
موده:انا ماهزبتش ولا هكي ربتنا امي بيش انهزبك وانت خويا الكبير ، انا دويتلك لأنك قاهرني
مؤيد:تي مالكم ومالي نزوج ولا ننتلف في ستين داهيه ، ميسون هي الي تبي تعدي لهلها ، ناماكذبتش عليها وصارحتها اني بنزوج وهي قلبت الدنيا ، خليها توا ينفعها
انتصار وشوشت رنده:انشالله ازوج طيح سعده
رنده:جنازه وتشبعي فيها لطم عاد 😠
نجيه:نقص حسك وهيا امشي معايا للحوش نتفاهمو مؤيد:لميلي العيال بنروح
منى:مؤيد امك هذي كنك انت
مؤيد:رقتها ليا الحيوانه هذي
موده:انا مش حيوانه
نجيه:تعرفو تطلعو قدامي ع الحوش
موده:انا مانيش مروحه
نجيه:منى مرام لمن العيال وهيا ، وانت امسك شيل الدبش هاك المفتاح عدي وتوا نلحقوك
لمن خاجتهن والعيال وعدن لحوش نجيه ومؤيد حامق بكل ونجيه من القهر لين وجها منصفر ، وقعدت موده تبكي وخلاص
رنده:خلاص وسعي بالك انتي
انتصار:يابتي ياما يطلع منه هالمؤيد
موده:وانتي شامته عاد
انتصار:كان بنشمت را شمتت في روحي يوم باتك جاب عليا تهاني ، لكن رجاله الله غالب علينا وخلاص
موده:انظر شن دايرتله هذي الي واخدها ، الحقيره ربي ينتقم منها
فجأه وهن يدون انتصار خشت وسكرت عليها الدار ، لحقتها ريماس تبي تخش للدار بس سمعتها تدوي
انتصار:تي الدنيا عندنا مقلوبه بكل ، ومؤيد قيسه طايح فيك طيحه مانحكيلك عليها ،، اها ياحنه معاند العيله كلها ع سباك ، زودي الي عطيته لكي بيش يزيد غلاك واتربعي ياحنه وتلزي الاولى ، وعقبال مانلز انا الثلاثه الي عندي ربي ياخذهن
تمت ريماس منجمطه في مكانها ولأنها صغيره ، ولأنها ماتقدرش اتفضح بأمها زمطتها وسكتت عدت تجري قعمزت مع خواتها وجها منحمر وحالتها حاله بس ماقدرتش اتحمل تمت اتفكر ، من هي الي امها وازتها ع مؤيد بيش تخرب حوشها ، وشن الي عطاته لها بيش تزود غلاها وتلز ميسون ، وكيف تفكر انها تلز صبايا باتها ، تمت مصدومه وتفكر ، تحق في موده تبكي وخواتها يهدن فيها ومش قادره تدوي ، عارفه ان نجيه ومؤيد قالبينها عركه توا في الحوش ومش قادره تدوي لأن في النهايه انتصار امها ..
طلعت انتصار من الدار ..
انتصار:ياخيا ربي يهديه مؤيد وخلاص عليك عمله سوده دارها
كلثوم:خلاص هدن الموضوع البنت تبكي
موده:حسبي الله ونعم الوكيل فيها هالي خست وفتنت بيننا
وجدان:خلاص حبيبتي وسعي بالك
رنده:فكيني من المزاط بطلي دراما
ريهام:وحق الله وجعتني ميسون
كلثوم:خلاص صبن ديرن عشا وغيرن هالسيره
وجدان:هيا صبن رنده وموده معايا
كلثوم:ريماس كنك
ريماس:لا شي
كلثوم:وجك منصفر مريضه ولا حاجه
ريماس:راسي صداع بس
رنده:هاتي يدك صبيني
وجدان:شن بيصبيك انتي
رنده:بطلي حيونه
صبن البنات يديرن في العشا ، كانت الساعه قريب 8
في حوش نجيه ..
نجيه:يستر الله منها هالي دهبتلك شيرتك من توا
مؤيد:بنفهم ليش كارهينها من قبل ماتعرفوها اصلا
نجيه:عطبك علينا يوم
مرام:كانهي فيها خير را ماصار هضا كله ، وصاحبك هضا من وين جا
مؤيد:تبو من الاخير هي مش اخت صاحبي ، هي كانت تجيني في المحل عجبتني ، وبالصدفه بعد تعرفنا طلعت تقرب لانتصار
نجيه:شنوووو انتصار ، ايوا قوللي الحكايه فيها انتصار
مؤيد:عطبك علبنا يوم ، من توا بنقولك انا زيزتك هذي مش راضيه عليها
مؤيد:انا ازوجت وخلاص قريت فاتحتها يعني مافيش ردة في كلامي
نجيه:ياربي صبرني ياربي ، هضا ولدي الكبير الي عابيه عليه هضا ولدي الكبير الي نقول سندي ، اطلع يامؤيد اطلع من قدامي الله يقهرك كيف ماقهرتني
منى:ياامي كنك ماتدعيش عليه
مؤيد:طالع ياامي طالع
كريمه :بابا بنعدي معاك
مرام:ارجى يامؤيد بس
مؤيد:خليني نطلع انشالله انموت وتفتكو مني
مرام :حلفتلك تقعد خش للمربوعه تعال ، امي اعصابها تعبانه ، حتى انت مالقيت الا قريبة انتصار
مؤيد:تي ياهو نصيب هضا كنكم انتم
مرام:اقعد هنا اشويه مع بناتك انخش انهدي امي وبعدها خش صالحها والله هي خايفه ع مصلحتك
مؤيد:لا حول ولا قوة الا بالله ، باهي يامرام عدي ادويلها
خشت مرام وسيبت مؤيد مع بناته
كريمه:ليش يابابا معش تبي ماما
مؤيد:من قالك يابابا معش نبيها ، هي الي معش تبيني
كريمه:بس انا عارفه را
مؤيد:شن عارفه
كريمه:انت تبي تجيبلنا ماما وحده اخرى
مؤيد:لا لا ماما حترد بس هي توا زعلانه شويه
كريمه:باهي انا مانبيش نبكي ونقول نبي ماما عشان نجيه ومحمد مايزعلوش ومحمود حتى هو ، بس انا نبي ماما
مؤيد:مش انتي تبي ماما ، اكيد حترد لأن الانسان لما يبي شي بالقوه ويتمسك بيه حيجيه ، بس خليك ادعي ربي وخليك قويه وقولي يارب ماما ترد وتوا ترد
كريمه:يارب يارب ماما ترد
مؤيد:وين احبيبة بابا
اضبط مؤيد كريمه وجعه كلامها بس لا حياة لمن تنادي مجرد تأثر بالموقف لا أكثر
مروان:السلام عليكم
مؤيد:وعليك السلام
مروان:كنك قاعد هنا
مؤيد:امي لزتني
مروان:وحق الله حالتك يرثى لها ع قولتهم ، خليني انعدي اندير حمام
محمود الصغير:باتي شنجك
مؤيد:خير ياشبوب وين مشيت
محمود:عدينا تعشينا وعمو مروان شرب عقيله مع بوفا وسعيد
مؤيد:عقيله شنو عقيله ؟؟
محمود:ياباتي حاجه طويله هكي فيها اميه واتطلع دخان عرفتها كيف ، هدي الي فيها فحم
مؤيد:ههههههه قصدك ارقيله
محمود:عمو قالي عقيله
مؤيد:عمك هضا حيودرك ويستر الله
كريمه:نعسانه يابابا
مؤيد:تعالي ارقدي هنا
في الوقت الي كانن منى ومرام يهدن في امهن ، ومروان كاين في داره ، ومؤيد مع عياله يرجى في خواته يقنعن امه
عند كلثوم ، كانت ريماس مزالت مصدومه ، وانتصار في قمة الفرحه ، ووجدان ورنده وموده يحطن ف العشا ، ومنعم وحاتم في المربوعه ، وريهام ع النت ، وكلثوم اتصلي في العشاء
اما الحاج فرد ايبات عند تهاني ، ومش مدور العيله بكل اتخبط في بعضها
تعشو ولمو حوستهم ، وخشن رنده ووجدان وموده للدار وسكرو عليهم
موده:افففف مضايقه
وجدان:رني ع بوفا
موده:توا يرن هو
رنده:بنات حامد قالي رني عليا بعد تفضي انرن عليه ولا انفوت
موده:تي رني تسألي انتي
رنده:خايفه
موده:امسكي السماعات ، رني
رنده:عليك البراده عطيهن ليا هن الاثنين
موده:مضايقه انا خليني نسمع هداريزكم
رنده:يرن حي ع امه ، ياربي ما يرد ياربي مايرد
حامد:ايوا
رنده:اهلين
حامد:شنجك
رنده:تمام الحمدلله ، شنجوك انت
حامد:تمام الحمدلله ، سكري رصيدك توا انعاود انا
رنده:فكني من الطروح ، كان كمل دزلي
حامد:هههههههه لا سكري جديات
رنده:والله ماني مسكره هي ،الو ،، هيييء سكر الحقير
موده:ههههههه اهو يرن
وجدان:نقصي حسك بنكلم عماد را يسمعك
رنده:ايوا ، عليش سكرت
حامد:ماتسمعش ف الكلام اصلا
رنده:كيف حال هلك ، عروسنا شنجوها
حامد:كويسه قاعده قالبتلنا راسنا طلباتها معش كملت
رنده:امالا شنو عروس حتى هي
حامد:باهي
رنده:شنو
حامد:بندويلك بس نبيك تفهميني
رنده:شن قالولك مانفهمش
حامد:هههههه مطول لسانك ، اسكتي خليني ندوي
رنده:شن قالولك دوتي واجده
حامد:تي اسكتي
رنده:هههههههن سكتت
حامد:اسمعي معش تضحكي خليني ندوي جديات
رنده:ههههههه ادوي
حامد:تي يامغوليه اسكتي الزح
رنده:ها والله خلاص ادوي
حامد:اولا ، سامحيني ع المعيله الي درتها معاك متاع المسجات والقصه الي صارت
رنده:انت صح كنت عبيط بس عادي معلش
حامد:تي تحشمي الزح ، شنو عبيط ، المهم خليني ندوي
رنده:نسمع فيك
حامد:من زمان وانا حاط عيني عليك ، ومانبيش ندوي ولا نقربلك ، كل مانقول لا ندويلها وعادي نخاف من ردة فعلك
رنده:كيف يعني ردة فعلي
حامد:يعني انك ترفضيني او تطيرلك مني
رنده:وليش نرفضك ، انت مش مبحت في روحك في المرايا
موده وشوشتها:هيييء ياحيوانه عليك جرءه ، قوليله انت طرف وخلاص
رنده تمت تشايرلها بيش تسكت
حامد:ههههههخ لا والله شايف روحي واجد ، بس الجمال مش كل شي ، تمام انا مهتم بمنظهري وهكي ، بس مرات شخصيتي ماتعجبكش ، وبعدين في حاجه اخرى مرات ترفضيني ع سباها
رنده:كيف شنو يعني
حامد:مش عارف عندك علم اتي عندي السكر ولالا ، وانتي عارفه مريض السكر في واجدين يرفضوه
رنده:اسمعني انا من زمان زي ماانت معجب بيا انا معجبه بيك وكنت ديمه نقول فيها بس كلهم يحسابوني انبصر وماياخدوش كلامي جديات بحكم اني ديمه نضحك ودوتي بصاره وفي نظرهم انه كلامي مش موثوق فيه من ناحية الجديه ، بس انا كنت من جوا جديات معجبه بيك بكل ، وديمه حلم بالنسبه ليا اني نحكي معاك كيف توا ، ماتوقعتش في يوم اني تجيني جرءه انقولك الكلام هضا بس ليش ديمه انراجو المبادره من غيرنا يبدأ مش عارفه
حامد:نفهم منك انك مش رافضتيني
رنده:وليش نرفضك ، مش تافهه نرفضك ع شي ربي بلاك بيه ، ماهو انا ربي باليني بالسمن معناها حتى نا انقول نفس كلامك
حامد:تي انتي في عيوني احلى من اي بنت
رنده:باهي بطل الكلام هضا نتحشم منه مانعرفش شن انرد عليه
حامد:فيك لقطة غباء سمح انموت فيه
رنده:هذي سمحه ولا شينه يعني
حامد:انقولك انموت فيها
رنده:باهي موت هي
حامد:ارجي بس
رنده:هههههههه هبل نحنا الاثنين ويستر الله
حامد:وراسك انكونو احلى من اي اثنين
رنده:هههه انشالله ، اسمع انا كل حاجه نضحك عليها مااتعدلش عليا اها
حامد:ضحكتك بالدنيل ومافيها
رنده:باهي خلاص نتحشم
حامد:اسمعي
رنده:نعم نسمع
حامد:انحبك
الهبله اول ماقاللها هكي سكرت في وجها ، وموده قريب ماتت من الضحك
موده:ههههههههههه اه ووووه عليا بطنييي
وجدان:كنكن
موده:قاللها انحبك هههههههههه سكرت في وجه
وجدان:ههههههههه تي غبيه هذي
رنده:بيغمى عليا انا في حد قالي انحبك اخ ياامي
موده:كان تسمعي دوتهم هههههههه
رنده:وحق الله انحولهن السماعات اتشفطي ياكلبه
موده:خلاص والله خلاص ، رني عليه
رنده:خايفه
موده:هاتي هنا
خدت موده التليفون ورنت ع حامد
حامد:ايوا ياهبله كنك سكرتي
رنده:الخط فصل
حامد:امممم احلفي
رنده:تي فجعتني سكرت
حامد:هههههه مش قتلك هبله
رنده:عارفه روحي
حامد :باهي شن تحكي
موده:وطي صوتك مصطفى يرن
موده :ايوا حبيبي
، كانت موده هايمه مع مصطفى ، ورنده مع حامد، ووجدان مع عماد ، وريهام في الدار الاخرى ع النت مع سعيد
بس السؤال في ان هل حيستمر الحب هضا بينهم، ولا بحقد وحده منهن ع الاخرات حتدمر كل شي ؟
تقييمكم 😍
