مروان (شقيق موده) : تي تكذب ياباتي
نجيه :هييييء طيح سعدك يامروان
محمود (أمها) : الكلام هضا صح يامروان
مروان :تي تكذب يابلتي بيش اتدرق ع وجدان
محمود:انتي يافرخه عليش اتبلي ع خوك
موده:صدقته انت اقسم بالله ايدخن ومن امس عارفته لقيت الدخان في جيب كبوطه وبيش نسكت عطلني باسوورد النت
محمود فنص في مروان تفنيصه قويه : مروان انت اتدخن ولالا ادوي
مروان:اها اندخن ومن زمان ، ومانيش صغير بيش تحاسبوني ؛امتى تقتنعو اني كبرت ومانيش مروان الي تعرفوه الصغير ، اقتنغو اني كبرت وحق ربي تعبت وملبت من معاملتكم ليا ع اني افرخ اصغير ، انقوللكم حاجه اقعدو فيها مسيبلكم الحوش بكل
نجيه : مرواان تعال هنا يامروان
محمود :نجيه
نجيه :ياحاج العيل بيطلع
محمود :خليه مرده للحوش دار علينا راجل ينعن بوه وبو الي جابه ، انتي اسمعيني هنا خواتك نسمع عليك ماشيتيلهن نهارك اسود ، تطلعي من الحوش نقتلك
موده :حاضر ياباتي حاضر
محمود :بنطلع توا بنعدي للمحل
طلعت نجيه ورا محمود وماقدرش حد حتى يتنفس ويرد عليه ،بس موده كانت تنظر لباتها ع انه متسلط ومتجبر ومش عاطيهن راحتهن في اي شي ، تمت تبكي من جسمها الي يسطر عليها من ضرب مروان ، وخطرت عليها وجدان حتى هي قاه تتألم زيها ومحبوسه في دارها ، زادت في بكاها
نجيه :كم مره انقولك معش اتردي ع خوك ، معش اتخليه يتعارك معاك ماتسمعيش الكلتم ، شفتي توا شن صار من ورا جلتطتك ، خوك سيب الحوش وباتك ناويله ع نيه سوده ، عاجبك توا
موده :يعني هضا الي واجعك مروان وبس طبعا الكبيده ونحنا ننحرقو ، حرام عليكم كرهتوني في معيشتي ، المشكله يدي محروقه وضربني عليها وولا همكم ، عادي المهم مروان مايسيبش الحوش ، توقعت باتي بعد يحقه يضرب فيا يضربه ، لا قاله مش رجوله ، هضا الي قدره عليه ربي ، لا وبعد عرف انه يدخن فنص فيه تما مروان يعلي في صوته توقعته يكفخه كف لا ماعدلش ، ونحنا عاد لنا ربي ، حق ربي شي يوم انهجلكم من الحوش المتخلف هضا
نجيه :تي تسكري فمك وتوطي حسك ولا نلحقك بطريحه اخرى ، ناقصتك انا وناقصه لسانك صبي يابهيمه ضمي الحوش ، حتى عصيدة الميلود ماهنيتونا عليها
موده : واجعتك العصيده ومش واجعتك بنتك ، الصبر ياربي الصبر حاضر ياامي
خشت نجيه تدير الغدا ، وموده صبت تجري سكرت عليها الدار وخدت فونها ورنت ع رنده (اختها من باتها) لقتها مقفل رنت ع امها
موده :ايوا اعميمه
كلثوم (مرات باتها) : خير موده كيف حالك
موده :الحمدلله
كلثوم :كيف حال يدك اليوم
موده :لا الحمدلله ، رنده احداك
كلثوم :هيا توا انضبحلها ، رنده تعالي اختك تبيك
رنده :تيوا دوده
موده :رنده شن صار في وجدان
رنده :يناعلي يادوده عليك ليله سوده
موده :شن صار باهي
رنده :كنت راقده انا ، نضت ع باتي ايهزب
حدا راسي
موده :ايهزب في من
رنده :ايهزب في عماد ، ووجدان تبكي وترعش بعدها مسكها من شعرها وضربها طريحه ، تميت ندافع عليها ضربني معاها
موده :تي باتي هضا كنه هكي ، حتى نا حصلت طريحه من مروان وسيب الحوش وطلع لما بصيت عليه انه ايدخن ، وباتي ولا دواله
رنده :المشكله توا حبس وجدان ف الدار وطلع مش عارفه شن اندير ، فك النت وخدا تليفوناتنا وطلع
موده :وعماد توا شن وضعه
رنده :وراس امك اتكلميه ياموده تدويله باتي شن دار في وجدان
موده :تي رقمه من وين بنجيبه
رنده :خشي ع صفحته ف النت كاتب رقمه
موده :باهي توا انحاول انكلمه
رنده :خلاص توا سلام حاتم ومنعم جو ، حيصير فيها هزايب اخرى
موده :حبيبتي وجدان انشالله بس ماتمرضش
رنده :انشالله وجك توا
