طبعا محمود شال الصبايا هو وحاتم ع سيارتين لعيت عبدالرحيم عمهم بيش يحددو عرس حاتم وريما ، وبعد حطوهم ف الحوش :
محمود:اسمع نا بنمشي نسأل ع عماد اخرى
حاتم:نمشي معاك
محمود:هيا باهي
حاتم :من بتسأل عليه
محمود:امبدري واحد جارهم وصفلي حوش شيخ قبيلتهم بنمشيله
حاتم :هكي بلا ماتكلمه
محمود:وشن فيها جمعه اليوم اكيد قاعد
حاتم:خلاص انخلي سيارتي هنا ونمشي معاك
محمود:هيا باهي اركب
مشو للحوش الي وصفوه لهم دقو وفتحلهم الراجل وخشو
بعد السلام ، وبعد ماعرف محمود بروحه دواله ع الموضوع
منصور (شيخ قبيلة عماد) :والله ياحاج انتم شكلكم عرب اجواد ومانبيش اندس عليكم شي ، كلا عماد ماشاء الله عليه ماعندي فيه عيب ، وخوته وهله كلهم ماشاءالله عليهم ، بس زمان امه ، ربي يستر علينا
محمود :كيف يعني ادوي دغري
منصور :امه هاربه مع واحد بعدها باته طلقها وهلها تبرو منها وتوا الله اعلم وينهي
حاتم :كيف كيف ومن الي جت مع هله مش قالو امه؟
منصور:القصه هذي قديمه بكل ومايدووش عليها ، وماحد يعلمها الا نحنا الكبار ف السن ، حتى عياله مايعلموش شن سبب طلاق امهم وبوهم قايلهم انها ماتت وقتها كان عنده عماد بس وعمره تقريبا سنتين بعدها ازوج بنت خاله جاب منها الباقي
محمود :لا حول ولا قوة الا بالله
منصور :راهو هما مايقولو لحد ان هذي مش امه وكلهم مكثمين ع الموضوع ، بس انا حكيتلك لأن هضا مستقبل بنته
حاتم :المهم عماد كويس؟
محمود:وانا شن بندير بيه كويس ولالا بعد الي سمعته ، صبي صبي
منصور:بدري ياحاج خليك للعشاء
محمود:لا الله يبارك فيك ،هي السلام عليكم
طلع محمود وهو حامق بكل من الي سمعه ركبو السياره هو وحاتم وعدو للمحل .
عند عيت عبدالرحيم (عم موده)
كلثوم :وهذينا ياحنه الفلوس ، العرس ان شاء الله مشترك ، علينا الصاله بتكاليفها ، وعليكم العشاء
ناجيه (مرات عم موده وخالتها ) :ان شاء الله ربي يهنينا ياربي
نجيه:نبدو انوتو من توا وقت ياحناتي
كلثوم :ايوالله الوقت يجري بكل
نجيه :نا هديه مني البكلاوه والخالوط
ناجيه:بلكي واجد عليك
نجيه:ولدي وبنت اختي وسلفي مايغلى عليهم شي
كلثوم:عقبال مانجيبو لموده ومروان ان شاءالله
نجيه:ان شاءالله ياربي
ناجيه:تعالي ياريما شيلي الطواسي
ريما (خطيبة حاتم وبنت عمه عبدالرحيم) :هيا حاضر
جت ريما شالت الطواسي وردت مع البنات ف المطبخ
موده:افطنن للتكشيخ ع اصوله توا
رنده:ياستير من من ؟
موده:من العقربه وبناتها
وجدان:قصدك ع انتصار؟
موده:في غيرها اللفعه هذي
ريما :خايفه من مشاكلها ف العرس
رنده :حتى نا ، بس عليش تكشخ يعني
موده:جتنا ريهام ف الصبح قالتلي بتمشو تحددو العرس قلتلها لا
وجدان :ماهو انتي صح ماكنتيش تعلمي
موده:خليها تصدق عاد
حامد (خو ريما وولد عبدالرحيم عم موده ) خش للمطبخ مايحسابش فيه حد وكانن البنات بلا وشاحات :ريما وين الشحن
كلهن :هيييييي
حامد انفجع و رد طلع :اسف اسف وحق الله مانندري عليكن جوا
ريما :خش خلاص لبسن
حامد :لا خلاص غير تعالي عطيني الشحن
ريما :شويه توا انجي
طلعت ريما
موده :طيح سعظه ولد عمي هض كل مانحقه يزيد يسمح
وجدان :عيب اس
رنده :وحق الله يدوخ من السماحه ، اه ياكبدي وخلاص
موده :حي ع امه البنت عيونها كيف سمايل القلوب
ريما :سادكن قرمه
وجدان :طايحات قرمه في خوك
ريما :سمح العطيب صح
موده ورنده :بكككككككل 😍
ريما :ههههههههه تي ع فكره حالف مايطلع من العيله
وجدان :اووووو كيف صار
ريما :هو مكبد ع وحده من العيله بس من ماعرفتهش
رنده :وحق ربي كان نطلع انا انموت من الفرحه
ريما :ههههههههه وانتي يادوده شنجوك
موده :انا بختي عتيب بكل
ريما :عليش اسمالله عليك
موده :قصه ماعندش نيه نحكيها توا خليني نضحك نبيش نتنكد
حامد :ريمااا
ريما :ها سكنت راك خش تعال
حامد :سلام
كلهن :وعليكم السلام
حامد :شنجكن
موده :تمام الحمدلله شنجك انت
حامد :ميه ميه ، ريما وين الابره متاعي
ريما :حطيتها في ثلاجة دارك
حامد :باهي
طلع حامد
وجدان : ابرة شنو هذي
ريما :كيف ماسمعتنش
رنده :شنو
ريما :حامد جاه السكر
رنده :هيييء يانااااري
موده :ياحول الله ، ان شاء الله ربي يشفيه
ريما :ان شاءالله
وجدان :باهي ياحنه بديتي تشري حاجتك
ريما :اها قريب انكمل مزالي الصالون ومشتقاته بس
رنده :حي حي ان شاء الله ربي يتمم عليكم بالخير
وجدان :نراجي في باتي امتى ايرد ع عماد
موده :هو امبدري قال بنمشي لكلثوم بيش اترد عليهم بالموافقه بس مادوش بكل بعدها
رنده :ان شاء الله خير وخلاص
نجيه :هيا يابنات
ريما :بدري اسمالله
موده :بنروح انوتي روحي للمدرسه ماعندش نيه بكل
كلثوم :هيا انتن باتكن وحاتم برا
رنده :هيا هو نلبسو
وجدان :عطيننا كبابيطنا ياريما
ريما :هاكن
