مروان:انتصار
موده:من جدك ولا تبصر
مروان :وحق الله هي ، وامي حلفت عليا مانخش نهزبها ، قالت هذينا غريبات علينا توا مش كيف قبل
موده:لا بس أنا مش غريبه عليا حول
مروان:نا طالع بكل ، لاني لو قعدت مش بعيد انولع فيها
موده:شن جيبها الحقيره هذ
مروان:وين نندري ع جد أمها انا ، حولي بنطلع
موده:انت الي مصبي قدامي ع فكره
مروان:الباب وين
موده:ماتحقش فيه ولاشنو
مروان:قصدي يعني الباب وراك وانا بنطلع من الباب يبقى من مصبي قدام من
موده:اطططلع ياحيوان را نرتكب فيك جريمه عليك براده ياربي ، وقول لمصطفى موده معش بتزوج ، خلاص بتعنس في حوش هلها وقوله خلي قفلك للتليفون وتسكيرك للنت ينفعك ، وقوله ، ماتقوللش حاجه خلاص اصلا كلكم تافهين طحتو من عيني من توا تهربو من اعراسكم امالا بعدين شن بتديرو ، اتفو وخلاص
مروان كان بيطلع وميت عليها من الضحك ع عصبيتها لين خشت وهبدت الباب
خشت للمربوعه لقت انتصار اتبكبك ونجيه قارنه الحواجب
موده:عليش تبكي جايه ،، ع قتلتك لمؤيد ولا ع نيتك في قتلتك باقي خوتي ، ولا ع السحر الي درتيه ودمرتينا بيه ، ولا ع العار الي داراته بنتك ، ولا ع الي داراته فيا نا ومروان فرقت بين الأصحاب وفرقت بين العيله وانضربت وادمرت بسباها ، ولا ع حبسة خالد ولد خوك من ورا تسويسك عليه ، ولا بلكي ع ذنب سلوى الي حيبثى في رقبتك ، ولا ع الحرام الي درتيه انتي وباتي بكذبكم علينا 17سنه ، عليش جايه تبكي ، بلكي تحسابينا بنفتحولك حوشنا ونقولولك الحوش حوشك بعد مالزوك هلك وقعدتي طباخه ف الاعراس ، سبحان الله ع الدنيا كيف تلف ع اابنآدم ، شفتي من توا يهزب فيك ومخليك مطبسه راسك من الخجل ، انا ياانتصار الفرخه الي ماتسوش ظفرك كيف ماقلتي عليا ، اهي اافرخه توا جايه حوشهم وتبكيلهم بعد ماقرصاتك الدنيا ، حسبي الله ونعم الوكيل فيك ياانتصار ربي يزيدك ويكيدك ربي يرد الي درتيه كله عليك
انتصار:يابنيتي
موده:هه توا تميت بنيتك ، فكيني من جو المسلسلات هضا شكلك متأثره بيهن واجد
انتصار:اقسم بالله ربي رد اعمالي كله عليا ، توفت امي غاضبه عليا ، وريهام أول ٱمس وهي مروحه من المزين الي تشتغل فيه تعرضلها واحد ، بنتي توا مانندريش عليها وين يانجيه بنتي انخطفت وماحد با يصبي معايا جايتكم تساعدوني نلقاها بالله عليكم ، حتى كان طلبو فديه من وين ندفعلها من وين انجيبلها ، مشيت للمركز مادارولي شي ، مشيت لفتحي لما حقني من البلكوني مابش يفتحلي ماعندي حد الا الله وانتم ، بنيتي يانجيه انتي عندك بنات وتحسي بيا ، بنيتي بيقتلوها خطفوها عيال الحرام ، يانجيه حتى ايجار ماعندي ندفعه وين بنعدي وشن بندير
نجيه:ومن قالك خطفوها ، دون الناس يخطفو بنتك شن معنى ، بنتك ربي يستر علينا معروفه شنو وانتي معروفه ، شنو الي مادرتيشي انتي رداته هي ، وبلكي ماقدرتش اتحمل فقرك اهربت مع شي واحد من الي تعرفهم، حلوه ياانتصار لما حرمتيني من ولدي وكنتي بتحرميني من الاخر وشينه توا عليك ، الله يزيدك انشالله اتحقيها جثه قدامك كي ماحقيت ولدي بسباك ، انشالله تنقهري ع بنتك الثانيه
اهي ريماس باعاتك وشرتنا وحطيناها في عيوننا ، وتوا ريهام باعاتك بس شن شرت ، شرت العار والحرام ، ربي نتقم منكم ، لو سمحتي صبي اطلعي
انتصار:اسمعيني بس
نجيه:ديل الكلب عمره ماينعدل ، ياما مثلتي علبنا الطيبه وكرهتس محمود فينا ودمرتينا وضريتينا في أغلى حاجات، في شرفنا وفي صحتنا وفي عيالنا شن مزال بنسمعو ، حوشي بغنا عنك وعن اشكالك ، هي بره بلا مطرود ومعش نبوك في حياتنا ، تشحتي اتموتي تنقبري تنقهري مالنش دخل بيك ، انشالله ماتلقيها بنتك وتنقهري عليها
وانتصار بتطلع وهي تبكي وحالتها حاله ، دق الباب
موده:من ،
فتحت موده والصدمه انهن رنده وريماس تمت موده اتبحت في ريماس وتبحت في انتصار الي خلاص بتطلع من المربوعه معش عرفت شن اتدير
ريماس:من عندكم
رنده:من الي صوتها تبكي جوا
شويه وانتصار طلعت ، اول ماحقتها ريماس عيونها تعبن ادموع معش عرفت تصرف بكل جت انتصار بتضبطها وخرت ريماس
انتصار:بالله عليك ماترديني
ريماس:حولي انسيني خلاص
انتصار:نا امك كيف ننساك
ريماس سنه ياامي ، سنه مارفعتيش سماعة التليفون وقلتيلي كيف حالك ، سنه ماتندريش عليا حيه ميته ناكل نشرب صبايا باتي كويسات معايا ولالا ، لهيتي بكيف اتضريهم ونسيتي انك قاعده اتضري فيا ، عارفه من الي يستحقو يكونو امي ، ويستحقن نقوللهن ياامي ، اكثر اثنين تكرهيهن ، هن الي عطني كل شي وعاملني كيف بناتهن ، عارفه من الي خواتي صح ، هذينا الاثنين ووجدان ومنى ومرام مش ريهام ، مغير شن نبي ويدورو في الشي الي يضحكني ويديرننه ، بعد شهر عرسي ، شريت حاجتي وانتي مش معايا ، شريت فيلويا ومالقيتكش تقوليلي رأيك فيه ، حجزت في حاجة عرسي كلها وانتي مشغوله كيف تنتقمي من الناس ع شي هما ماليهمش يد فيه ، وجاايا توا بعد سنه من اخر يوم طلعتي فيه من حياتي وتقوليلي انا امك ، الي قدامك هذي هي امي ، وغير هكي مافيش ، طلعيني من حياتك كيف ماطلعتك ، واطلعي من حياتنا كلنا سادك قهر فينا ، مانعرفش ليش جايه اليوم ، بس قريت في عيونك انك نادمه ، ووواااو ياامي بعد الي درتيه نادمه اي ندم يعوض مؤيد ويعوض تهاني وقهرها من سحرك الي قريب عدا عقلها منه ويعوض سند ميسون الي راح ومسؤوليتها قدام عيالها بعد باتهم، ويعوض صحة باتي ويعوض قهر موده ومروان ومصطفى ، ويعوضني حبيبي خطيبي سعيد الي كره البنات بسبا ريهام ومش قادر يحبني لتوا ، اي ندم يعوض اعميمه نجيه عن هضا كله ، اي ندم يعوض خالي فتحي وحني ،الي ماتت من قهرها من افعالك ، وخالي الي خسر ولده بسبا تسويسك عليه وسلوى الي قعدت منبوذه من الناس بسباك، اي ندم يعوضني انا حياتي وقرايتي و ودنيتي اي ندم قوليلي ترا ، بالله عليك انسيني ماصدقت نسيتك طلعيني ومن حياتك طحتى من عيني ومن قلبي ومن حياتي ومعش في اي شي يرفعك اخرى لأنك اصغر من انك تكوني ام ، شن تبي بعد ان بنتك الصغيره اتقولك هكي وانا بدال اعميمه نجيه نقولك معش نبي انحقو وجك
خشت ريماس للصاله وهي تبكي ومنهاره قعمزت وخشن وراها رنده وموده يهدن فيها ، اما انتصار فطلعت وطبقت الباب
نجيه:حسبي الله ونعم الوكيل ، تمهل ولاتهمل ياربي
ريماس:مصره اتكرهني في حياتي ماصدقت تريحت ونسيت مصره اتدمرني
نجيه:ماتحطي في بالك بكل يابنيتي ربك ماينسى حد
رنده:شن جيبها هي
نجيه:الفقر وقلة العزوه ، هن الي جابنها ، ريماس ياامي كيف ماعشتي بلاها تقدري تكملي بلاها ، بنصبي انحط الغدا نا
رندخ:خلاص ياموسه بطلي بكا عاد
قعدن يهدن فيها في الوقت الي انتصار لعلنت الدنيا انتقامها منها وانقلبت عليها افعالها
ريهام هربت وهي قعدت بروحها ضغط وسكر ومافيش فلوس وحتى ايجار الحوش مش لاقيه تدفعه تشحت من هنا وتسلف من هنا وحياة العز انقلبت فقر ووتعب وقهر ، واعره الدنيا بس سمحه لما تدور وتاخدلك حقك من الي ضرك ، ومهما قست عليك ومتت قبل ماتاخدلك حقك ، اعرف ان ربي حياخده لك يوم الحساب ، ناس واجد سيبت امرها لله وقاعده توا تتفرج ع الي اتدير فيه الدنيا لاكثر ناس ضروهم
الي بلا الناس بسحر يفرق العيله قاعده عيلته تتفرق ، والي بلا الناس بالي يفرق اثنين يحبو بعضهم قاعد يرد عليه ، والي والي... والقائمه تطول ، مهما كان ومهما صار كل شي محسوب ومكتوب ومردود ع صاحبه بس كل شي بوقته ، وكل شي ع صبر الانسان واحتسابه عند الله ..
عدا اليوم عليهم وكانت جية انتصار لنجية حديث الموسم بين عيلة محمود
طبعا حامد عدا يغسل بس الفجعه الي ماكانش متوقعها ان كليته معش تنفع بكل ولازم يزرع كليه اخرى لان الفشل انبدي حتى في الكليه السليمه
ولما عرف بهكي ، روح للحوش مدمر بكل قفل فونه ورقد مابش حتى يكلم حد ، وقتها كانت ريما عندهم جايه تشوف الدبش والحاجات الي أمها شراته للبيبي وتوتي مع اها لأن خلاص خشت شهرها وممكن اي وقت تچيب
ريما :كنه حامد رايح مش عاجبني
ناجيه:مريض والله شاغلني معاه وعلي مانقوله امشي للمستشفى مايبش ، كل يوم ع هالحال يروح يرقد لا ياكل لا شي وزايد في التعب وخلاص
ريما:تول انصبي انشوفه
خشت ريما عليه لقاته راقد ، مابتش تنوصه وهي طالعه لفت انتباهها ملف طبي ع مكتب حامد
طبعا ريما كانت تفهم شويه ف الانجليزي ، مسكت الملف وتما تقرا فيه ، صح بعض المصطلحات مافهمتهنش بس عرفت ان حامد عنده فشل في الكلى وضروري عمليه زرع كلى
تمت اتفنص معش عرفت تبكي ولا تطلع تقولها لأمها ولا تنوض حامد ، قعدت متنحه تقرا وتتأكد و...
في الليل كانت موده مكسده التليفزيون وعقلها كله في مصطفى شويه فطنت ع تليفونها ايرن فرحت تسحابه مصطفى بس لقتها عزيزه
موده :ايوا اهلين
عزيزه :اسمعي انا رانه بنقولك شي واحد ، قولي لخوك عزيزه معش تبيك ، خليه يمشي يشوف وحده تتحمل حركات الفروخ الي يدير فيهن انا معش نقدر نتحمله ، بجوه مره بنكلمك ومره لا وتوا يقولي بنأجل الفرح ويقفل تليفونه من اول امس ، لا معلش نا بنت ناس والف واحد احسن منه يتمنوني ، وكان يبي حاجته وهداياه يجي لطبرق يتفاهم مع خوتي وياخدهن ، مع اني عرفته مش حيجي ومش حياخذهن وخواف و تصبحي ع خير .....
