جوا ف الحوش
حاتم:امي
كلثوم:خش مافي حد
حاتم:السلام عليكم
منيره:مرحب بالعريس
حاتم:مرحبتين خالتي كيف حالك
منيره:الحمدلله انت كيف حالك
حاتم:الحمدلله تمام، ريماس شن دايره توا
انتصار:قاعده راقده جوا
حاتم:قالي منعم بتبدا في علاج
انتصار:اها بكره ان شاءالله
حاتم:بالشفاء ان شاء الله ، بسيطه هذي ولا غيرها
انتصار:الحمدلله
كلثوم:ها صارلهم من التفريش بكره عيت عمك
حاتم :اها بكره جايين للحوش غادي ، من بيعدي منكم
منيره:مش كاين الجمعه المفروض
كلثوم:بعدها ماصارش قالو علياء مرات سليم (ولد عمتهم (بتحضره وكانت مسافره
موده:بنمشي انا
نجيه:يمشن تهاني ومنى بلا بناتها وموده ووجدان ومنيره كان بتعدي وريهام
انتصار:ونا كني مانمشي
نجيه:نا قلت مستحيل تقول بنمشي ،والمسكينه الي راقده جوا هذي لمن بتخليها
مرام:نا مش ماشيه عمران مانقدرش انسيبه
منى:انخليلك البنات
كلثوم:بكره تنوضن بدري تعدن للحوش تبرمن عليه برمه اخيره وخوذن معاكن حاجات تقدموهن غادي الحلويات والحاجات هذن
حاتم:المهم قولولنا امتى بيش انقول لخوتي يجو بالسيارات يعني يفضو ارواحهم
كلثوم:انشاالله
حاتم :نا بنمشي بايت غادي توا
كلثوم:من برا
حاتم:باتي راقد ومنعم يلعب في سوني
كلثوم:باهي سوق بابشويه فكني من للجري عقاب الليل
نجيه:اييي هما حشيشتهم الجري انخمم ع المنجوه مروان في هالليل طلع ويستر الله
كلثوم:مؤيد روح
نجيه:اها من بدري
حاتم:ماتبو مني شي
كلثوم:سلامتك
طلع حاتم وقعدن الباقيات يهدرزن
عند مروان واصحابه في السياره
مروان:اسمع حط الدسكه هذي
سعيد:تي كنه هضا يضيق علينا الطريق واسعه
مصطفى:تي غادي غادي الزح
مروان:فوته يارا مكسد هضا
مصطفى:تي شكله مش واعي هضا
مروان:راجل يحساب روحه
مصطفى:تي بندرس ننزله انا
سعيد:يارا فوته
مصطفى:تي وحق الله البلاد هذي تبي تنظيف بتايد
مروان:قالك ينعن بوهم بكل ، فاهمين الحريه بالحول
مصطفى:نباتو عندك ولا عندي
مروان:عند سعيد
مصطفى:وكنه عندي ماينقعدش ولا شنو
مروان:تي يارا امك بروحها تعبناها كل شويه بايتين عندكم
سعيد:تي هيا يارا عندي البيته اليوم
مصطفى:باهب خلاص كنكم اتدفو انتم
سعيد:تكي ع المحل بناخد حاجان
مصطفى:بسرعه ماتعشش جوا
سعيد:باهي درس بس
نزل سعيد شرا حاجته بعدها عدو لحوشه يباتو عنده ، في الوقت هضا كانن الصبايا عند كلثوم بايتات كلهن الا تهاني وعيالها طبعا ماتحبش تبات برا حوشها
سهرو كلهم هدرزه والبنات يهدرزن مع الحب ع النت ومع الصبايا وقصص ومغامرات منيره وكلثوم ايام الطفوله وضحك وشاهي وحلويات عقاب الليل ، لين انعسن بالوحده خشت فراشها ، الا ريماس الي كتبت ع روحها التعب بسبا افعال امها ، بس قررت انها تعرف امها ع شن ناويه بالضبط ، وانها تصبي وماتنكدش ع خواتها وخوها العريس ، رغم انها مش كبيره واجد بس الصدمه خلتها توعى وتعرف ان الصدمه مش في امها بس وان الصدمه الاكبر في ريهام الي مع الايام حتعرفو الكارثه الي حتديرها في انسانه مفروض تكونلها اقرب من روحها ، بس حقدها عليها وع خوها خلاها تبي تنتقم بطريقه مستحيل تخطر ع بال حد
تاني يوم
ناضن كلهن لمن حوسة الحوش وخشت نجيه دارت الغدا ،بعد كملن حوستهن وبعد تغدن ، لبسن وقعدن يرجن في السيارات يجو بيش يمشو لحوش حاتم
مروان:ها واتيات
منى نرجو فيكم من بدري
مروان:منى وموده ووجدان اركبن معايا وفكنني، وتهاني ودنيا وريهام مع منعم ، من اخرى بيمشي
موده:خلاص بس
وجدان:خالتي ماصارلهش ؟
منى:قالت خالتك اسماء بتتكي تاخذها
مروان:خلاص هيا اطلعن
موده:باهي كلم حد يشيل معاك الحاجات هذينا بناخذوهن معانا
مروان :مصطفى ،، سليمان
مصطفى:انعم
مروان:تعال شيل هذينا
مصطفى:مدهن
سليمان:هات
منى:افطن الحفاضات هذينا حلويات را يتكسرن
مروان:في سيارة سعيد اها
مصطفى:ها في حاجه اخرى
مروان:اها هاك
كان مصطفى يشيل ويكسر في عينه ع موده الي لابسه ووترجى بيش تطلع ، اما موده فكانت عيونها قلوب وتتبسم وخلاص
مروان:فكيني من مضغ المستكه انتي
ريهام:وووو عليك عقده
مروان:سكري فمك ماتنكدش ع روحك را توا نحلف عليك ماك ماشيتيها
ريهام😒
مروان:ها منعم يطلعن
منعم:تي اها هيا فيش ترجى
مروان:هيا اطلعن عيونكن لوطه رجاله برا
طلعن ركبن السيارات ، وسيارة سعيد كاين راكب فيها مصطفى و سعيد يسوق وسليمان ولد عم موده
وعدو شوره حوش حاتم
منى:غيرلنا الدسكه هذي مغرقي في عرس ياطياح السعد
مروان:افتحي الدرج دسكة السوكني مديها ليا
منى:هذي
مروان:اها هاتي
موده :عليهمروان:انحبك موووت يشهد عليا ربي ، عليك انموت ياكبيدتي ياحبي
موده:قتلك علي السوكني مش انت
وجدان:صفقن ، لولولوليي
منى:بيب تي كنك انت
موده:انحبك موووت يشهد عليا ربي وعليك انموت ياكبيدتي ياحبي ، حي حي حي لولولولوليييي
وجدان:غيرها هذي
موده:حطلنا ياحبها
مروان:ياحبهاااا ياحبها ، ياحبها فيك حاجه انحبها
موده :حي حي لولولوليييي
تبييب وحرق عجل ومسجل يلعلع وهن مهيجات ويغنن وزغاريت ،وحتى سيارة منعم نفس الجو بس ع دسكة علي العريبي ،وع الحال هضا لين وصلو للحوش وبدن يواسن فيه ويوتن للعزومه متاع الصبايا الي بيجن يفرشن ، وبكرا انكمللكم احداث عرس حاتم😂😍
