رواية (#عائلتي_ولكن)
"36"
ثاني يوم ناضن ع حوسة الحوش وكانت مزال ع فاتحة حاتم يوم بس
كلثوم:ايوا يامنعم ، اسمع طلعت من العمل ولالا
منعم:اها وتوا عندي محاضره بنمشي للجامعه
كلثوم:محاضرة شنو توا هضا وقتها ، المهم وانا مروح تكي ع خالتك جيبها امس تبحوسنا ماجبتهش خايفتها تزعل
منعم:اوكي باه توا انكلمها قبل نمشيلها بيش توتي روحها
كلثوم:باهي الله يربحك
منعم:اوكي توا ماتبي شي
كلثوم:سلامتك
رنده:في من تكلمي
كلثوم:منعم نبيه يجيب خالتك
انتصار:ياكلثوم البزار وبن حطيتيته
كلثوم:في المخزن الرف الثاني مع شكاير التوابل
موده:بنعدي انشوف ماما وخواتي انا شن صاير فيهم توا انجي
وجدان:هاكي معاك الدبش هضا انشريه في حوشكم الحبال هنا معش سدن
موده:الصبر ياربي هاتي
ريهام:صباح الخير
وجدان:صباح الظهر
ريهام:امي وين
وجدان:اتدير ف الغدا
ريهام:في المطبخ؟؟
وجدان:لا ملت من المطبخ خشت اطيب ف الحمام
ريهام: 😒ماتضحكيش را
موده:ييه عطيني فوني يارنده
رنده:هاكي
كلثوم:قوليلهن يجن امك وخواتك
موده:حاضر مع المهرجان الي عندهن مانظني يجن توا
رنده:افتحي معاك الباب
موده:من
تهاني:حلي
موده:خيرات
تهاني:خير وين ماشيه
موده:للحوش
تهاني:كيف امك مش هنا ؟؟
موده:لالا، وين البنات وامجد
تهاني:ف المدرسه
موده:باهي بنعدي انا
طلعت موده وخشت تهاني ، عدت موده لحوشهم
نجيه:كنك جيتي
موده:شن ماتبونيش ولا شنو
مرام:من غادي
موده:ماحد توا جت تهاني
منى:شن هضا الي في يدك
موده:دبش بننشره
منيا:خير
موده:اهلا وين خواتك
منيا:يتفرجن ع التليفزيون
موده:وين عيال مؤيد
نجيه:خذاهم بوهم امبدري
موده:وين حطهم
نجيه:امهم تبيهم قالت رايفت عليهم كلمتني وقلت لمؤيد يشيلهم لها
موده:وكنها ماكلماته هو
منى:كبرياءها مايسمحلهش
موده:هبال وحق ربي تقول مراهقين
نجيه:باهي عدي انشري الدبش راه يدير بنه
موده:اها خطرها قالتلك اعميمه كلثوم تعالن وينكن
نجيه:انشري الدبش وتوا نمشو م بعضنا
مروان: السلام
موده:ميرو رايفت عليك
مروان:شايفتيني لابس دندونه اتقوليلي ميرو 😠، كم مره قتلك معش تقولي ميرو
موده:اه يدي ياحيوان القدر يفجعك
مروان:عشان تشعفي مره اخرى
موده:حول مثقل دمك خزي خليني نعدي انشر هضا
مرام:تقول فار وقطوس
مروان:اسكتي حتى انتي
مرام:تعال اضرب وخلاص ، حول يابارد ، تحشم ع وجك بولدي را
مروان:حاجه اي والله كبيره حتى نا كان مزوج را عندي 5مش واحد
منى:مطول لسانك
موده:لسانه مزفر خزي
مروان:اسكتي انتي را انجيك
نجيه:كنك انت جاي مشطر ع خواتك
مروان:مكسد اصلا
نجيه:امشي لباتك ف المحل
مروان:توا كيف جيت منه
منى:عدي شوف اي حاجه اتديرها
مروان:تي كنكن تلزن انتن تقول قاعد ع قلوبكن
موده:كملت بتمشن
مرام:مسرع
موده:غير هيا من بتمشي معايا
مروان:وين ماشيات
موده:ندهورو ،وين بنمشو يعني لحوش اعميمه كلثوم مروان: امي مافيش غذا ولا شنو
نجيه:اهو درت طاجين بطاطا انلفه لك خوده وعدي تغدا مع باتك
مروان:عليك قصه باهي هيا
نجيه:اصبر يطيب
موده:ماتبنش تمشن
مرام:انا بنجي معاك هيا
منى:عدن انتن انغير للبنات وانجي مع امي
موده:باهي هيا مرام
نجيه:خودي سلة الدبش معاك
موده:خذيتها
طلعن موده ومرام عدن لحوش كلثوم
وجدان:نشرتيه كويس
موده :مانيش راده عليك عشان انا محترمه 😠
رنده:ايوا ياواعره انتي
موده:من في داركن
رنده:ماحد
موده:في الحمام ؟؟
رنده:ماحد كنك
موده:بوفا يرن
رنده:اجري
خشت موده للدار ردت ع مصطفى
مصطفى:وين مارنيتيش عليا ولا دزيتيلي ع النت اول مانضتي
موده:رصيد والله ماعندي ، والنت نضت لقيت اعميمه كلثوم فاصلته بيش انحوسو
مصطفى:ههههههه حرام والله
موده:خزي تضحك
مصطفى:انحبك
موده:انموووت فيك
مصطفى:تغديتي
موده:لا مزال ، وانت
مصطفى:توا كلمني مروان قالي جايب طاجين امك دازته
موده:هييء الحيوان امي قالتله شيله لباتي
مصطفى:ههههههه بلكي بيشيل منه بعدها بيجيبلنا
موده:بروحك ف المحل
مصطفى:سعيد معايا ، مقعمز مع الشباب قدام المحل
موده:باهي هو مش حاكيلك شي
مصطفى:ع شنو
موده:لا شي
مصطفى:شنو الزح ادوي
وجدان:انتي امك جت راهي اتخش عليك
موده:حبيبي بنسكر توا
مصطفى:باهي قلبي ، لما تفضي رني
موده:حاضر سلام
مصطفى:انحبك
موده:انحبك
مرام:كنكن قاعدات هنا
موده:😳شي انحول في وشاحي
مرام:هيا تعالن تغدن
وجدان:اسمالله لحق ايطيب الغذا
موده:ههههههه قوه سحريه عند انتصار
وجدان:تلقيه الا رز ني
مرام:هيا بطلن دوه
طلعن البنات تغدن ولمن الحوسه وخشن للدار يقيلن
رنده:حامد رن عليا مارديتش انرن عليه انا ؟؟
وجدان:ربي يصبرني ، لا ارجي لين يمل مت غبائك ويسيبك
موده:بشويش عليها مزالت جديده ، توا اتعود وتقعد تسكنله هههه
رنده:اصلا هو يحب غبائي ويبيني نسكنله
وجدان:مالت وخلاص
رنده:اسكتن خلنني انرن عليه
وجدان:تهاني رايحه دابله بكل انظر كنها
موده:بلكي حامل
وجدان:الله اعلم
موده:امبدري بوفا سكرت في وجه بنرن عليه
وجدان:كلكن تكلمن حتى نا نبي
موده:وكلميه
وجدان:في المحاضره
موده:مايردش
وجدان:احسن
رنده:حتى نا ماردش
وجدان:هههههه ياحرام
رنده:اهو يرن ياخيا نجيه
موده:اووووفر ، امس اول مره تكلمه واليوم ياخيا نجيه
وجدان:بتدير زي مايديرن وخلاص هههههه
رنده:اسكتن ، ايوا
حامد:خير
رنده:اهلين
حامد:شنجوك اليوم
رنده:تمام ، انت شنك
حامد:مرايف عليك
رنده:هههههه
حامد:ياغبيه عليش تضحكي
رنده:مش متعوده ع الكلام هضا
حامد:ههههههههه وحق الله مغوليه ، وانحبك
رنده:حتى انا
حامد:انتي شنو
رنده:انحبك
وجدان:لولولولوليييي
حامد:ههههههه من الي زغرتت يلاك هذي
رنده:تمت تشاير لوجدان متاع الي والله انوريك
حامد:اوووي
رنده:ايوا معاك
حامد:من حداك
رنده:خواتي
حامد:سلميلي عليهن
رنده:يسلم عليكن 😒
موده:قوليله قالتلك وده ربي يعينك
حامد:قوليلها امين يارب
رنده:خزي حتى انت
حامد:تي انحبك ياهبله ربي يعينني ونعيشك احلى ملكه
رنده:ويبقو مقهوووورييين من الملكه
وجدان :اههههههههههههههه وووووووه عليا
حامد:هههههههههههه صبي من حداهن هذينا حنقعد نضحك معش حنهدرزو
رنده:خلاص عاد يابنات
موده:خلاص والله خلاص ، اصلا بوفتي يرن
وجدان:هييييء طيح سعدك
رنده:😱
موده:حي ع امي نسيت انه ع الخط
وجدان تمت تهزب فيها بصوت واطي:بوفتك عينك انشالله مايكونش سمعك
موده:اسكتي باهي خليني انكلمه ، ايوا حبيبي
مصطفى:خير ياقلبي ،مروان وسعيد كانو معايا ماقدرتش انرد
موده:عادي حبيبي ، صوتك ف السياره
مصطفى:اها ماشي للحوش امي تبيني انشيلها لاختي
موده:باهي تمام ، تغديت
مصطفى:اها طاجين خيال طعمته حاجه صح
موده:صحتين حبيبي
مصطفى:حماتي فتلاكه 😊
موده:بكل 😂😍
مصطفى:عقبال مااتطيبيلي ياعمري
موده:انشالله
مصطفى:باهي قلبي وصلت للحوش نحكو بعدين
موده:اوكي حبيبي سلام
وجدان:وزعك يامهزبه
موده:يؤبرني وخلاص وحق الله انحبه
رنده:حاتم جا لعيت عمي
موده:من قالك
رنده:حامد توا قالي حاتم برا بنطلع انشوفه
وجدان:هو ديمه لصقه عندهم اصلا ايحقو فيه اكثر منا
رنده:اااخ وخلاص 😍😍😍
وجدان:ههههههه شن قالك خلاك تهيمي هكي
رنده:اسكتن مش مصدقه انا انحس في روحي نحلم💓
موده:هههههههه ناعلي وخلاص لحقتي
وجدان:مش عارفه انا قاللها انحبك امس كبدت عليه اليوم
موده:اسمالله قعدت اسبوعين قريب وهو يحايل عليا
رنده:انموت من حبه ، انحبه كيف الكلبه انموت فيه فهمتن
وجدان:رحم الله امرؤ عرف قدر نفسه
موده:هههههههه اسكتي هي اتحبه كيف الكلبه
رنده:احترمي نفسك انتي وياها ، عليش هازيات عليا عشان دبه مش من حقي انحب يعني ، ديمه تضحكن عليا واتهزن حتى نا انحس را عندي مشاعر وانحب ، مدامني لقيت الشخص الي طول عمري عاجبني وبالنسبه ليا حلم اني نكون معاه ، ليش مانحبش وحلمي تحقق ، كنكن هكي انتن ، استوعبن انا انحب حامد من زمان بس مانبيش ندوي عشان ماتضحكنش عليا وتقولن مستحيل يفكر فيك ،وماتعلمنش كيف تنكدت لما ريما قالت انه حالف مايطلع من العيله وشكله مكبد ع وحده مت العيله ، مابيتش ندوي ودسيتها في قلبي عشان لو طلع يبي وحده فيكن ولا يبي ريهام ولا تغريد بنت عمي مانقعدش انا في موقف شين ، وتوا ماصدقت طلعت انا الي يحبني تضحكن عليا قدامه خليتنه يضحك
موده:😳يناعلي هضا كله شايلتيه في قلبك
وجدان:حي عليها بتبكي ، لا والله بصاره بطلي خلاص
رنده:وحق ربي انكلم فيه بنقص في نفسي بسباكن
موده:لا والله مانقصدو ، خلاص بطلي بكا بحتي فيا هنا ، نحنا شفطنا عادي بس، خلي عندك ثقه في روحك معقوله هكي ، هو يحبك لانه يحبك مايأثرش عليه كلامنا
رنده:بس يأثر فيا انا
وجدان:خلاص عاد بطلي عباطه ، هو يحبك لانك انتي رنده ، مش حيتغير عليك ع سبا كلامنا ولا حيغير تفكيره ، ونوعدك لما تكلميه معش نقعد احداك وكان قعدت والله ماعاد ندوي ، ومعش تقولي نحبه كيف الكلبه انتي اتحبيه لانك رنده الي تهبل البشوشه الي مافيش حد يكرهها ، رنده الي بلاها الحوش نكد ، انتي خشيتي حياته لانك حليتيها مش تقعدي عندك نقص ، خليك قويه فكيني من الدراما مش متعودين عليك هكي
رنده:ماهو انتن حيوانات اصلا
موده:اضحكي فكينا من الصماطه
منعم:ياهووو وينكم
منيره:السلام عليكم مزلتو راقدين
وجدان:خالتي السكانه جت
موده:ههههههه حرام عليك
وجدان:طلباتها ماتوقفش الزح ، ديريلي وحطيلي وبلا بلا بلا
رنده:حرام والله غاليه عليا ، توجع فيا مرات
موده:باهي هيا نطلعولها عيب
طلعن البنات سلمن ع منيره
وجدان:رنده:نوضي امي والباقيات
منعم:موده
موده:نعم
منعم:شن الغذا
موده:رز بالتقليه
منعم:حطيلي باهي
موده:بتاكل هنا ولا تجي في المطبخ
منعم:لا اندير حمام ع السريع وانجي للمطبخ ، بلكي يجي حد هنا
موده:باهي تمام انسخنلك علي مادوشت
رنده:كنه منعم
موده:يبي الغذا
كلثوم:مرحب انستي
منيره:خير ياحنه كيف حالك ، وين هالنوم
كلثوم:ماحسيتش بالوقت
تهاني:السلام عليكم
بدن بالوحده تنوض ، وخشت وجدان اتدير في قهوه ، وموده اتحط ف الغذا لمنعم
مرام:انعومه شنجك
منعم:اسمي منعم الزح
مرام:هههههههه نفس القصه دارها مروان امبدري
منعم:عليش
مرام:موده قالتله ياميرو
منعم:ههههههه تي انعومه ارحم
وجدان:اسمالله هابا وخلاص بكرا اتجيه الي تقوله يانونو ويقوللها نعم ياكبيدتي
موده:هههههههههه ياخسارة تربية اعميمه
منعم:سكري فمك انتي وياها
منى:منعم كيف حالك
منعم:مرحب بالدكتوره
منى:كيف حالك
منعم:تمام ، شنجو رافع
منى:ف المرج بعد بكره مروح
منعم:يروحه ربي طيب ، وين البنات
منى:مزالن مرقدات
منعم:خالتي اسماء مش جايه؟؟
وجدان:ماقالتش ، بس اميره قالت بتجي بكره اتبات لعند ا لصبحيه، خالتي وملاك مانندريش عليهن شن جوهن
منعم:اممم باه تمام
موده:ريماس اليوم مابانتش واجد كنها
وجدان:مش عارفه كنها ريماس من امس مش طبيعيه ساكته وسارحه هكي وماتبيش تقعمز معانا
منعم:شوفنها بالك مريضه ولا حاجه
منى:توا ناضت خشت للحمام وردت فراشها شكلها باكيه
منعم:وين هي
موده:في دارك
منعم:توا انشوفها
وجدان:كمل غذاك قبل
منعم:الحمدلله ، جيبيلي قهوه للمربوعه
موده:الي يحقك امبدري يقول بتاكل جمل
منعم:شبعت والله ،خليني انعدي انشوف ريماس
مرام:ياخيا سلمه الحنون
منعم:احم احم ، وين اعموره
مرام:مع امي
طلع منعم عدا لداره دق الباب
ريهام:خش يلي تدق
منعم:ريماس واعيه
ريهام:خش يامنعم
منعم:خير شجو
ريهام:تمام كنك
منعم:جاي نشوفكن
ريهام: نجك لنا
منعم:ريماس راقده
ريهام:اها تعبانه شكلها
منعم:ريماس، ريماس
ريماس:نعم
منعم:باسم الله كنه وجك
ريماس:يوجع فيا
ريهام:هييييييء حي عليا كنه وجك انجلطتي ولا شنو
منعم:بالشويه ماتخوفيهش ، ريماس حركي فمك
ريماس:مش قادره
منعم:باهي غمضي عينك
ريماس:الجيهه هذي مش حاسه بيها بكل
ريهام:ياامي الحقي ريماس انجلطت ياامي
منعم:تي اسكتي ، ريماس ايديك وكرعيك اتحركي فيهن
ريماس:اها وجي بس مش قادره انحركه
طلعت ريهام تجري
ريهام:امي ريماس ياامي بسرعه تعالي
انتصار:كنها اختك
صبن كلهن يجارن لدار منعم ، انتصار اول ماحقتها ضربتها كف
منعم:تي كنك عليش تضريي فيها
انتصار:وجها مشقوم بالكف يرد
منى:كنكم
منعم:عليك تخلف تعالي يامنى شوفيهأ كنها
منى:بالشويه ماتخافوش ، وريني وجك ترا ،، هذي جايها ارتخاء في العصب السابع
نجيه:كيف يعني
منى:شبه جلطه في الوجه
كلثوم:اسمالله جلطة شنو البنت صغيره
منى:موسي انتي زعلانه من حد
ريماس هزت راسها بالرفض ودموعها عبت عيونها
منى:قوليلي شن مضايقك ، الشي هضا يجي من الزعل او من الصقع الواجد ، وصقع توا مافيش ، معناها زعلانه
ريماس:وجي يوجع فيا
منى:باهي خلاص ، منعم هيا انشيلوها للمستشفى
انتصار:انجي معاكم يناعلي حبيبتي وجك
منى:ماتخافيش مع العلاج الطبيعي والكورتيزون توا يصح
منعم:المهم هيا توا البسن
موده وشوشت وجدان:وجها راح فيها بكل ، فمها ماشي للجيهه الاخرى وعينها بكل
وجدان:انظر من شنو زعلانه ياخيتي مزالت صغيره ع الزعل
موده:يستر الله مسكينه
منيره:ربي يشفيها انشالله ماترعشيش روحك ياانتصار
انتصار:وحده اترن ع الحاج اتقوله بنطلع بيها مش عارفه تليفوني وين
تهاني :غير، عدي بس توا انكلمه
طلعو منعم وانتصار ومنى بريماس الي صارلها هضا كله من صدمتها في امها ، بس ماقدرتش تقول لحد ، وقعدن الباقيات في الحوش يرجن فيهم يروحو ،،،
والحلقه الجايه انكمللكم مغامرات عائلة موده 😁
تقييمكم 😍
