غيرت موده دبشها وتمددت ع السرير ودموعها ماوقفتش كأنها في كابوس تبي تنوض منه ، ومش حتعرف تنوض منه الا لو رقدت،، قعدت تقرا ع روحها وتدعي ربي ينسيها مصطفى لأنه خلاص معش في أمل في الرده له ، وبالأكثر لأنه مافيش مبرر يشفعله ، حتى لوكان صادق في كلامه فهو كذب في انه كاين مرتبط مع غيرها، قفلت فونها وتمت دموع وتفكير وتعب لين رقدت
في نفس الوقت كان مروان مكسد ع النت ، ونجيه ارقدت ، اما خواتها فكانن مقعمزات يتفرجن ع التليفزيون وع النت
رنده:موده غريبه مافتحتش نت
وجدان:بلكي مدهكله ورقدت
رنده:لنقنه تعب اليوم بكل ،ريماس ياعوينها رقدت من بدري
ريهام:حتى نا بنخش نرقد
خشت ريهام رقدت وقعدن رنده ووجدان ع النت
رنده:ييييه ع التليفون استك
وجدان:بلكي حد دازلك مسج ، انا تصيرلي لما حد يدزلي ع الماسنجر
رنده:اها في حد دزلي ، حي هضا مصطفى
وجدان:كنه ، را تكون موده فيها حاجه
رنده:كنك غبيه لو فيها حاجه را سمع هو قبلنا يعني
وجدان:شن دازلك باهي
رنده:السلام عليكم
وجدان:ردي باهي
رنده:وعليكم السلام
مصطفى:كيف حالك رنده ، مبروك ع خيتك
رنده:الله يبارك فيك ، عقبالك انت ودوده 😍
مصطفى:يستر الله 😞
رنده:كنك شن في
مصطفى:شاحنه بيني انا وياها شحنه قويه ونبيكن تشوفنلي حل يارنده
رنده:امتى اسمالله ، امبدري كانت تمام
مصطفى:توا صارت القصه ، ويعني صار جو شين بكل وانفصلنا ع بعضنا وحلفت معش نرن عليها
رنده:ياحول الله 😱عليش باهي
مصطفى:خليها هي تحكيلك وبعدها توا نحكيلك
رنده:هي مسكره توا ، خليني انرن عليها انشوفها
مصطفى:باهي انراجي فيك شوفيلي حل بالله عليك
رنده:انشالله خير
رنت رنده ع موده لقتها مقفل
وجدان:شن في
رنده:تاكينها تكه قويه ويستر الله
وجدان:حرااام ، كنهم اسمالله
رنده:ارجي توا يحكيلي ونقولك
ردت دزت لمصطفى
رنده:مصطفى والله لقيتها مقفل
مصطفى:وحق الله راسها مسكر
رنده:احكيلي باهي شن في بيش انساعدك
مصطفى:انا نستاهل ، مش قايللها اني كنت مرتبط بوحده من قبل مغربيه ، لو موده بعدت عني انا الي خسرتها وحق الله متنقدر انعيش بلاها ادمنتها يارنده ، اختك هذي خلتني نلقى روحي ، وحق اللهوكنت بلاها شي ، انا والله صح خنتهاوقهرتها وكذبت عليها توا وحلفتلها اني ماخنتهش وانشالله اتسامحني بس وحق الله انحبها
رنده:اهااا القصه فيها خيانه هي ، يستر الله وخلاص
وجدان:ها شن صار
رنده:خيانه
وجدان:هيييء نهاره الاسود
رنده:قهرني معش عندي نيه نحكي معاه
وجدان:شوفيه بس
مصطفى:بالله عليك ساعديني انردها ووعد بيني وبينك ماعاد نخونها ، ولا عاد نزعلها
رنده:يستر الله يامصطفى توا انحاول معاها
مصطفى:بالله عليك قوليلها وحق الله انحبها وانا عارف روحي غلطان ومستعد اندير اي شي هي تبيه
رنده:توا ندويلها وانشالله خير ، نستأذنك توا
مصطفى:منوره خيتي ، انراجي فيط اترديلي حبيبتي
رنده:انشالله
وجدان:ها شن قال التيس هضا
رنده:يبيني ندويلها
وجدان:بعد شنو قوليله
رنده:تي كذب عليها وقالها ماخنتكش
وجدان:عليك برادة وجه ، ومن هي السنيوره هذي
رنده:ماقاليش
وجدان:ياناري حبيبتي موده اكيده جوها شين وتعبانه توا
رنده:مقفل لقيتها
وجدان:بكرا اول ماننوضو نمشولها
رنده:باهي تمام
وجدان:خلاص عماد سكر النت ورقد بنرقد حتى نا
رنده:شن بيرقدني والله عقلي مع موده
وجدان:الله غالب ،هيا صبي
صبن البنات رقدن ، في الوقت الي كانت فيه موده راقده بيش تهرب من الواقع ومصطفى واعي ويفكر فيها وفي الي داره وخايف يكون خسرها خلاص ....
ثاني يوم ..
ناضن البنات فطرن ولمن الحوش
رنده:امي بنعدي لاعميمه نجيه انردلها امعينها
وجدان:انشيل معاك ،
رنده:باهي هيا قبل ينوضن هذينا يشبطن
كلثوم:ماتطولنش
وجدان:باه
طلعن وجدان ورنده عدن لموده بسبلة الماعين
نجيه:من
رنده:حلي يااعميمه
نجيه:مرحبتين
وجدان:كيف حالكم اليوم
نجيه:الحمدلله ، كلا موده نايضه واكلتها
رنده:كنها
نجيه:مش عارفه انوضها اتقولي تعبانه وتبكي
وجدان:اعوينه اعوينه ، وينهي هي
نجيه:في دارها
رنده:تعالي انحطو الماعين في المطبخ وانخشولها
خشن البنات لموده لقنها مغطيه وجها بالبطانيه وتنفض من العبره
وجدان:دوده كنك حبيبتي
رنده:هيييء حقي وجهها
موده:خانني يابنات خانني
وجدان:يناعلي حنبكي انا خلاص حبيبتي وسعي بالك
رنده:حكى معايا هو
موده:وشن قالك
رنده:يييني انساعده بيش لترديله
موده:يحلم شكله
وجدان:صدقيني لو تحبيه حترديله
موده:تي خيانه عارفه شن معناها
وجدان:حتى لو شفتيه بعينك يخون فيك ، لو اتحبيه حترديله
موده:مشكلتي اني نعشقه مش انحبه بس
رنده:عليك قهر
وجدان:اسمعيني دودي حنقولك كلتم وافهميه كويس من خيتك الكبيرخ ، انا اول ماحبيت عماد كاين ضايف عرم بنات وهدرزه ومش عارفه شمي ومع انه يحبني بس كمت انحسه انه في حاجه من وراه لين قررت اندير شي وهدي اول مره نحكي عليها ، درت ايميل وجربته بيه مشى معايا شهر كامل ةصلن بيه انه قالي نبي رقمك وبنشوفك ، ومايعلمش اني وجدان الهبله الي قاعد يحبها مداير روحه ، لين جا في يوم واعترفتله وصدمته ودرت نفس ماانتي درتي بكا وقهر وقفلت شفرتي وهو يدز ع الفيس ويحايل ، والله شهر وهو يحايل ماعبرتش لين جا جياب مرام تفاجأت وانا قتعده في لمتها بأخته ترن عليا وتحايل عليا وتقولي دونك عماد قريب ينجن سادك عاقبتيه واجد، واهو توا عماد جا خطبني ، لني عرفت كيف انربيه ، يادوده الراجل يتربى مرتين مره من امه ، ومره ع يد الي يحبها وانتي وشطارتك ، اسمعي مس من اول مره تمسكي عليه حاجه اتسيبيه وتبعدي عطيه فرصه ، يس عاقبيه فوتيه توا لعند بعد عرس حاتم لو مزال مصر عليك معناها يحبك وشعف ولو حاول اسبوع اسبوعين وفاتك فوتيه .. هذي نصيحتي
رنده:وحق ربي كلامها صح
موده:اوكي معاك حق بس جرحني يابنات
وجدان:يييييه كان بتقعدي هكي انتي الي حتتعبي ، مش ع كل شي ايديره الراجل تقولي جرحني
موده: ماعندش نيه حتى نحكي معاه خليه توا ، بيش يعرف غلطته
وجدان:ايوا ، بس نبيك قويه مش من اولها راقده ف الفراش وتبكي
موده:والله تعبانه هي
ردت موده تبكي اضبطنها خواتها وتمن ايهدن فيها
رنده:صبي امشي معانا لحوشنا
موده:ماعندش نيه توا في العشيه انجي ، هاكن التليفون خليه معاكن خايفه نضعف
رنده:هاتيه باهي ، بنعدو نحنا را امي تنفصل
وجدان:اضحكي قبل
موده :خاطيني
وجدان :اضحكي را انضغضغك
موده:لا خلاص
وجدتن:هيا عليها
موده:حولن ههههه لا ياحيوانه بطلي وووه عليا بطلن
ضحكت موده بفضل خواتها رغم كل حزنها ، وتأكدت وقتها انه مهما صارلها مافيش حد يصبي معاها وينصحها ويفهمها غير خواتها.....
تقييمكم 😍
