بعد مرور ست ايام من سفرت يوسف و نوره للخبر و الصبح الساعه ٨ بالطريق راجعين للديره و بالسياره و هم راجعين يسولفون و يضحكون
يوسف : عاد تصدقين انصدمت يوم قلتي لي انتس تحبيني
نوره : و ليه انصدمت
يوسف : الحب ما كان ببالي ابد بي كأنه ربي كاتب نعيش سوا
نوره : اي والله الحمدلله
يوسف : ليتي ادري عنتس من زمان
نوره : انت كنت قاسي مو معبرني
يوسف : عاد امي كانت دايم تمدحتس و انا شدني مدحها لتس
نوره : وبعدين
يوسف : و طحت بالحب و محدّ سمى علي
نوره بضحك: انتبه انتبه للطريق بس
يوسف : اشوف اشوف
-
-
-
بالديره الي تممت خطبة حنين و طارق و ابو طارق قرر بكرا يسوي غداء بالبر وكانوا كلهم موجودين عائلة ابو وليد و ابو تركي و ابو طارق و ابو يوسف .. و اليوم وقت الطلعه و كلهم بيطلعون و نوره و يوسف متجهين لهم بالطريق .
-
-
-
ببيت ابو وليد الظهر يستعدون للطلعه و يباركون ل ود عشان خطبة اخوها و بنص جلستهم دخل عليهم ابو وليد و قال لهم الخبر المفرح للكل
ابو وليد : كثرن الاغراض و خوذن مفارش النوم بنكشت يومين
ساره : ونااااسسسهههه
فراس : يلا يلا قوموا
عساف : ب اخذ نص الحطب دام كذا
ام وليد : قومن يا بنات طلعن المفارش
وليد : يبه ب اطلع الجمس
ابو وليد : اي طلعه و الساعه ١ كلكم جاهزين
قال كلامه ابو وليد و طلع و لحقته ام وليد
ساره : يا سلام ابوي يحسب الساعه ٩ الصبح ترى الساعه ١١
مجد : يمدي يمدي بس تكفون يلا قبل لا يهونون
ود : اي والله يلا
رهام : اجل قومن نطلع المفارش و الفروات و العيال يكملون الباقي
كملن شغلهن البنات و العيال يطلعوو السيارات و يركبون الاغراض .
-
-
-
اما ببيت ابو تركي الي الفوضى صدق عندهم يطلعون الاغراض و نصهم ضايعين و ابو تركي معصب 😡
ام تركي : تقلين الاغراض يا حنين بالمطبخ طلعيهن
ابو تركي : وين العزبه الكبيره
ام تركي : اصبر يابو تركي الحين يطلعونها العيال
تركي : يمه هي بالمطبخ على الزاويه
ام تركي : ايه هي روحي يا ريم جيبي الفروه حقت عمك بالمجلس
ريم : ابشري
غزال : يا عزام خذ الكيس هذا و الكرتون الكبير حطهم بالسياره
عزام : طيب يلا بس انتم خلصوا
تركي : يمه ذي تقصدين
ام تركي : لالا الثانيه
تركي : ما فيه الثانيه
ابو تركي : ياحول وين راحت العزبه
ام تركي : يعني لازم اقوم ادور معاكم
تركي : يمه والله ما لقيتها
ام تركي : وخر وخر
ريم : عم سم هذي فروتك
ابو تركي : شكرا و انا عمتس
ريم : شدعوه ياعمي
عزام : ريم خوذي فروتي هذي و طلعي الثانيه
ريم : تقصد السوداء
عزام : اي
ريم : طيب
حنين : يبه خذ سبحتك
ابو تركي : يوه نسيته بالمجلس عطيني اياه
حنين : سم
-
-
-
اما ببيت ابو طارق الي جاهزين و طلعوا من بيتهم مارين ياخذون ذبيحتهم و اتجهوا لبيت ابو تركي .. و ببيت ابو وليد الي جهزوا و انجزوا كل شيء و يركبون السياره متجهين لبيت ابو تركي و ابو يوسف كذلك متجه لبيت ابو تركي و كلهم اجتمعوا هناك و اول ما اجتمعوا لقوا ابو تركي يسكر باب بيته و يركب السياره و توكلوا على الله و راح للبر .
-
-
-
عند نوره و يوسف الي وصلوا للديره و نزلوا اغراضهم بالبيت و اخذوا الاغراض الي يحتاجونها من فروات و لبس و لحقوهم للطريق .
-
-
-
بسيارة عساف الي كان معاه البنات كلهم ود و ساره و مجد و رهام و بنته علياء و هيفاء اما منصور مع جدته بالسياره الثانيه و كانن البنات فالينها مع عساف كان معطيهن على جوهن .. و بنص الطريق كلهم شافوا سيارة يوسف و كلهم جلسوا يطنبون ب البوري و يضحكون و يأشرون لبعض .
-
-
-
اول ما وصلوا للبر و جلسوا يدورون لهم مكان حلو و مناسب و بعد دقايق وقفوا و نزلوا للمكان الي يبونه ... و ينزلون كلهم و بدوا العيال ينزلون الاغراض و البنات يرتبن و الامهات و الاباء يسلمون على نوره و يوسف .. و بعدها بدقايق العيال بدوا ينصبون الخيام وحده للحريم و وحده للرجال و حطوا ذرا عشان الحريم اذا سون الاكل .
-
-
-
و بعد نص ساعه بدن البنات شغلهن الي تسوي القهوه و الي تسوي الشاهي و اللي تحط التمر و الي تقسم الشابوره بينهم و الي ترتب الاغراض و الي ماسكه الاطفال .
ود : بنات انا خلصت القهوه حقت الحريم و الرجال
غزال : و انا بعد خلصت الشاي
ساره : الشابوره و التمر قسمناهم
ريم : بنادي عزام و واحد من العيال ياخذون الاغراض
راحت ريم تنادي عزام و جاء معاه فراس و اخذوا الاغراض و راحوا اما عند البنات الي راحن لخيمتهن و جلسن يسولفن مع نوره و مشتاقات لهن .
رهام : الحمدلله على سلامتكم
نوره : الله يسلمتس
حنين : حظتس جيتي مع الطلعه
نوره : تعالي انتي مبروك الخطوبه
حنين الله يبارك فيتس
غزال : استحت استحت
ام طارق : خلاص هذي بنتنا
ود : يمه و حنا انا و ريم
ريم : اي والله وين رحنا
ساره : غيورات
ام طارق بضحكة : كلكن بناتي
جلسن يسولفن و يضحكن و عند الرجال الي يسولفون مع يوسف و يسولفون عن الاجواء و مستمتعين كلهم .
-
-
-
انتهى لاتنسون تعطوني رايكم بأحداث البآرت❤️🔥❤️🔥🫣!
أنت تقرأ
يالضحكة اللي تضوي سنيني
General Fictionروايتي تصير فيها احداث كثيره و من ضمنها شاب يقع في حُب بنت جيرانهم لكن تصير بينهم مشاكل يضطر انه يتزوج بنت غيرها .. هل راح يقدر ينسى حُبها او زوجته راح تنظلم معاه
