يالضحكة اللي تضوي سنيني

البارت 17

✨البارت المُنتظر✨
_________________________________
الظهر ببيت ابو طارق كانوا يستعدون و يلبسون اما ودّ الي كانت زعلانه انها بتفارق اهلها و تروح عنهم
ريم : ود الله يهديتس ليه الزعل ذا كله
ود : بفقدكم من غير شر
ام طارق : كلنا بنفس الديره وانا امتس خلاص خلينا نفرح
ود : ابشري
دخل طارق و ابو طارق عشان يودعون ود
ابو طارق يحضن بنته ود : الله يوفقتس وانا ابوتس وتذكري بيت ابوتس موجود
ود : ابشر ياعيوني
طارق يبوس راس اخته : الله يوفقكم يارب و يسر دربتس وانا اخوتس
ود : امين و عقبالك يارب
طارق : ان شاء الله
طلعوا الاب و الاخ و ام طارق و ريم يستعدن و ود تجهز لبسها ب تلبس
____________________________________
العصر ببيت ام وليد دخلت ام تركي و حنين و غزال يلولشن
من الفرح و الحماس
ام تركي : الف مبروك
ام وليد : الله يبارك فيتس يارب
غزال : يا حلو اشكالكن يا بنات
رهام : انتي الي ياحلو شكلتس
حنين : يلا متى يبدا العرس
نوره : تونا بعد المغرب ان شاء الله
ساره : ياحليلتس من الحين يجونتس حريم الديره
غزال : والله اشكالنا تهبل
نوره : صادقه والله اشكالنا حلوه اشوى
ساره : ودي اشوف شكل ودّ من الحين
رهام : ساعتين بالكثير و تجي
حنين : يوه مطولين
نوره : امشن نشوف الاغراض كل شيء كامل ولا لا
راحن البنات يتفقدن الاغراض وكل شيء كامل و نوره و ساره راحن عند عساف و اخوانه الباقين
نوره وهي داخله الغرفه مع ساره : ماشاءالله وش هالزين عند اخواني
فراس : كيف بس الثوب
نوره : يهبل
ساره : ياحلو المعرس و بشته
وليد : و انا
ساره : كلكم والله
عساف : انتن الي ياحلوكن
ساره : اكيد يا حلونا حنا بنات ابو وليد
نوره : ياعيوني يا عساف صرت معرس
عساف : عيون اخوتس اي خلاص معرس
نوره وهي تصيح : الله يوفقك يارب
عساف وهو يحضن نوره : لا تبكين موجود عندكم بالبيت انا
ساره : احلى شيء
وليد : يلا لا تخلونا نصيح كلنا خلونا نطلع للناس
طلعوا العيال و البنات رجعن عند امهن و الباقين و اول ما رجعن لقن ام يوسف موجوده و سلمن عليها
نوره : السلام يا عمه
ام يوسف : هلا ب النور كله نوره
ساره : اخبارتس يا عمه
ام يوسف : والله اني بخير و عقبالكن يا بنات كلكن و عقبال ولدي يوسف و الباقين
الكل : امين ، ان شاء الله
نوره بينها و بين نفسها: يارب ان شاء الله
_______________________________________
بعد صلاة المغرب عند الحريم جت الطقاقه و الحضور اكتمل ومن ضمن الحضور ام سليم و ام ناصر و بنتها نصره و ام ماجد و بنتها مجد و ام عيسى و صيته و عمتها و من الحضور سلمى و امها ام احمد
بعد عشر دقايق وصلت العروس و امها و اختها و اول ما دخلت قعدن ام وليد و بناتها و ام تركي و بناتها يلولشن
و الطقاقه صارت تقول : الف الصلاة و السلام عليك ياحبيب الله محمد وكل الحضور يلولوشن
دخلت ود و جلست بالكوشه و سلمت ام وليد على ام طارق و البنات مع بعض و بدآ الرقص و الوناسه و اول من رقص خوات المعرس و اخت العروس و عقبهن حنين و غزال و عقبهن الحضور
_____________________________________
اما عند عرس الرجال الي كانوا عيال ابو وليد يطلقون رصاص بالجو و تركي يرقص هو و يوسف و عزام و طارق و ابو وليد جنب ولده و ابو طارق جنب عساف و ابو تركي واقف معاهم و كانت العرضه موجوده ويقول :
عريسنا يا عساف بادي
و عريسنا يا عساف بادي دامت لياليك السرور
و عريسنا يا عطر زاهي غلب على كل العطور
جينا بمنقاش الأيادي نخرق بها عين الحسود
يمينها جات بيمينه بأسمى المعاني والشعور
و اخذتها و انت الموفق حوريه من بلاد النور
و تعيشوا فيها بالسويه عقبال من عندي حضور
يالله سألتك العطية تجعل حياتهم سرور
و الختم صلينا على أحمد نبينا مدى الدهور
وعقب العرضه بدوا بالطبل و الكل مبسوط و يرقص و كان عساف يرقص بين اخوانه و عيال عمه
و الشباب مبسوطين بالاجواء و الحضور كلهم فرحانين يرقصون و يغنون
_____________________________________
عند الحريم كانت ود جالسه و مبسوطه و تشوف البنات يرقصن فجأة شافت بنت متجهة لها و عرفتها وكانت سلمى جايه عند ود تسلم عليها بس نيتها كانت شينه
سلمى وهي مقربة عند اذن ود : الف مبروك الزواج يا ود من الولد الي يحبني احب اقولتس ان عساف يبيني انا و كانت بيننا علاقه حب و للان يبيني ترى انتي بديله عني خذاتس عشان يسكت اهله و ارجع اقولتس مبروك تتهنين بالزواج من الي يحبني يا ود يا بديله عشان اهله و الاثبات بيجيتس
ودّ انصدمت من كلامها وحده بيوم زواجها فرحانه و تسمع كلام كذا جمدت ملامح ودّ و تغيرت و ساره لاحظت هالشيء بس ودّ مسكت يد سلمى وقربت عند اذنها الثانيه وقالت لها : الله يبارك فيتس بس بالنهاية اختارني انا و احب اقولتس ترى كلامتس ماهز فيني شيء و تذكري انه من بين كلامتس الي قلتيه لي كلمة كانت بيننا يعني الحين ما يدري عنتس و ارجع اقولتس انا الله يبارك فيتس
انقهرت سلمى من رد ودّ عليها ولا توقعتها بهذي القوه و وخرت يدها عن ودّ ورجعت لمكانها اما عند ودّ الي كانت تتصنع الابتسامه اما من داخلها منهاره مشاعرها ما تدري وش تسوي او وش تقول عن الي سمعته
راحت ساره عند ودّ وقالت لها : ودّ فيتس شيء تبين اكل
ودّ ب ابتسامه : لا والله ما بي شيء غير مويا
ساره : ابشري الحين اجيب لتس
راحت ساره تجيب ل ودّ مويا و عطتها اياها و عقب راحت عند سلمى و مسكتها من عند يدها و قالت لها : اسمعي يا بنت الناس تحشمين عمرتس ولا تنقلعين برا العرس
سلمى : خير ان شاء الله وش سويت عشان تقولين لي كذا
ساره : تسمعين الكلام الي قلته ولا لا احشمي عمرتس ولا انقلعي
سلمى : بعدي عني اروح احسن لي انا و امي ليتنا ما جينا
ساره : ابركها من سعه
نوره : انتي وش سويتي فضحتينا احمدي ربتس محد شاف
ساره : اكرها ما احبها يخي
نوره : اذبحتس انا وش اسوي فيتس امشي عند امي بسكت عن هالشيء مانب قايلته
ساره : بروح ارقص مع البنات مانب جايه معاتس
نوره : روحي ارقصي غيري جو لا تفضحينا اكثر من كذا
راحت ساره مع البنات و قعدت ترقص و تنبسط وكان الكل مثل ساره مبسوط و فرحان الا ودّ ما كانت تدري وش تسوي تصدق الكلام ولا تكذبه ولا ترجع مع اهلها ما تعرف وش تسوي
__________________________________
اما عند سلمى الي طلعت هي و امها وكانت داخله البيت و راحت لغرفتها و قعدت تقول بينها و بين نفسها : الحين ارتحت و لسى باقي ما شفتي شيء يا ودّ اوريتس هين يا خبيثه
__________________________________
بعد الساعه ١٠ انتهى العرس و كلن رجع بيته الا ام تركي و البنات و ام طارق و بنتها ريم باقي ما راحن
ام تركي : الله يوفقهم يارب
ام وليد : امين يارب
ام طارق : ان شاء الله يارب
اما عند البنات الي كانن يحشن عن العرس
غزال : نصره ماشاءالله حلوه
رهام : اي وحده هي
ريم : الي كان شعرها احمر
رهام : اي حلوه ما عليه
نوره : ترى ودينا ودّ لغرفتها بعد شوي تروح مع عساف عشان بكرا يسافرون
ساره : لسى ما جاء عساف
ريم : بفقدها من غير شر
حنين : ما عليتس انا مجربه شعورتس مع رهام
غزال : ريم عقبالتس انتي و البنات
ريم : ان شاء الله
ام تركي كانت تنادي البنات عشان بترجع لبيتهم
ام تركي : حنين غزال يلا امشن بنروح
غزال : مع السلامه
حنين : اشوفكن هالايام
البنات : مع السلامه
بالجانب الثاني عند الرجال كان ابو طارق و طارق ينتظرون ام طارق و ريم يطلعون عشان بيرجعون لبيتهم و عساف كان بيدخل ياخذ ود و بيروحون مع بعض
ام طارق كانت عند ود بنتها تودعها هي و ريم و تعلمها كيف تتصرف و تدق عليها تطمنها اذا وصلت و جت نوره تقولها ان زوجها ينتظرها برا و عساف جاء ياخذ ود
ام طارق : يلا جايه ود وانا امتس مثل ما علمتس خلاص لا تنسين و انتبهي لنفستس
ود : ابشري يمه والله ما نسيت شيء
ريم بزعل : يلا مع السلامه
ود : الله يستر عليكم سلموني على ابوي و طارق
ريم : طيب ان شاء الله
طلعت ام طارق و ريم و كان عساف بيدخل و قبل لا يدخل بيتهم جاء طارق و قاله
طارق : عساف عطيتك اختي و انتبه لها تراها امانه عندك
عساف : هذي زوجتي لا توصيني و ابشر
طارق : يلا مع السلامه
عساف : مع السلامه
راح ابو طارق و اهله لبيته اما ببيت ابو وليد الي اول ما دخلوا
سلموا على عساف و باركوا له بالزواج و عقب راح عساف لغرفته و كانت ود جالسه و مشابكه يدينها وكان عساف يناظرها من عند الدريشه كانت ود معطيته ظهرها و كان يقول اذا هي الحين معطيتني ظهرها و حلوه كيف اذا شفتها و دخل و اول ما دخل قال عساف : السلام عليكم
ود بصوت واطي : وعليكم السلام
عساف جاء قدام ودّ وكان متوتر ولا يدري وش يسوي بس قال لها : مبروك ودّ
ود : الله يبارك فيك
عساف : ود حنا الحين بنطلع تبين تاخذين شنطه لك
ود : اي باخذ هذي البيج
عساف : الوسط ؟
ود : اي هذي
عساف : طيب بروح احطها بالسياره و انا احتريتس تجين لا تبطين
ود : طيب بلبس عباتي
عساف : زين يلا
طلع عساف و اخذ الشنطه معاه و ركب السياره و جلس يفكر ان للحين ما شاف وجها غير ذاك اليوم و يبي يتأكد اذا هي ود ولا لا بس مو عارف و بنص هواجيسه جت ود و ركبت السياره
عساف : يلا نتوكل على الله
ود كانت ساكته طول الطريق و اول ما وصلوا نزل عساف و اخذ شنطته و شنطة ود و مشت معاها ود و اول ما دخلوا
نزلت عباتها ود و حطتها على الكنب و عساف نزل الشنط و اول ما نزل الشنط طاحت عيونه على ود الي كانت جالسه و كانت بيضاء و عندها غمازه بخدها الايمن و عيونها كبار و شعرها الاسود الطويل و كانت حاطه روج احمر و عساف اول ما شافها ذكر ربه بينه و بين نفسه ويقول وش الزين ذا ما توقعت و قال لها
عساف : ترى بيجيبون لنا عشاء بعد شوي اذا ودتس تبدلين بدلي
ود : زين بدخل ابدل
راحت ود للحمام تبدل فستانها ب لبس مريح لها و رفعت شعرها و مسحت الميكب و اول ما طلعت لقت عساف يكلم تركي
عساف : يا ولد والله انتظر العشاء الحين
تركي : وش عشاكم
عساف كان بيتكلم بس قال لتركي : مع السلامه ود طلعت
تركي : يلا مع السلامه
اول ما طلعت ودّ جلست على الكنب و كان عساف بالكنبه الي قدامها و قعد يسألها
عساف : ود كم عمرتس
ود : اهلك ما قالوا لك عن عمري
عساف : لا عشان كذا اسالتس
ود : عمري ٢٤
عساف : العمر كله يارب
ود : امين
عساف : الحين يجي العشاء
ود : مالي نفس الصراحه
عساف : لازم تاكلين عشان ما تدوخين عمتي قالت لي ودّ ترى ما اكلت شيء
ود : الا تغديت
عساف : و بتجلسين على غداتس ما اكلتي شيء
دق باب الغرفه
عساف : هذاهم جو الحين تاكلين
راح عساف ياخذ الاكل و ود تقول بينها و بين نفسها ما توقعته كذا حليل يارب سلمى كذابه يارب
عساف : يلا هذا العشاء كولي
ود : طيب انت كل معاي
عساف : باكل معاتس معليتس
ود اكلت شوي و وقفت اما عساف اول ما شاف ود وقفت اكل ما حب يجبرها تاكل و تركها على راحتها و اول ما خلص سأل ودّ : ماراح تنامين
ود : الا بنام بعد شوي بدق على امي بعدين انام
عساف : تمام اجل انا بنام
ود : طيب
راحت ود تدق على امها تطمنها و قالت لها انها اكلت و الحين بتنام
ام طارق : يلا نوم الهناء و انا امتس
ود : تصبحين على خير
قفلت ود المكالمه و كانت رايحه تنام واول ما شفت عساف نايم اضطرت تنام جنبه بالسرير بس مو قريبه عنده
__________________________________
الصبح عند بيت ابو يوسف كان عازم على الفطور ابو تركي و ابو وليد و العيال و كانوا يفطرون و معاهم ام يوسف بما انها عمة العيال و اخت الاباء
ابو يوسف: والله ماشاءالله البارح عرس عساف حلو
ابو وليد : الحمدالله على التمام
تركي : والله مو ناقصنا الحين الا عساف من غير شر
يوسف : حبيب القلب فقدته
تركي : لا عادي كلكم موجودين
وليد : تسلم يدينتس يا عمة على الفطور و انت كثر الله خيرك يا ابو يوسف و يوسف
ام يوسف : بالعافيه و انا عمتك عليكم كلكم
فراس : يوسف صب لي شاهي
عزام : انا بعد بس ابي حليب
يوسف بضحكة : و اذا قلت لا
وليد يطقطق: استفزهم
تركي : يقلبون عليكم الحين صبو لهم
صب يوسف لهم شاهي عقب طلعة الروح و افطروا و عينوا خير و عقبها كلهم راحوا للسوق يشوفون اشغالهم
__________________________________
عند بيت ابو طارق عقب ما افطروا و خلصوا و كان ابو طارق و طارق بيروحون لمحلهم
ابو طارق : ام طارق ود ما دقت عليتس
ام طارق : الا امس دقت علي و قالت انهم وصلوا و تعشوا بعد
ابو طارق : زين الله يوفقهم
ريم : يبه اذا جيتوا للغداء جيبوا جح ترى ما فيه
طارق : خلاص انا اجيب لكم قبل الغداء
ريم : تسوي خير اجل
طلعوا ابو طارق و طارق و ام طارق و ريم رجعن يكملن شغل البيت
__________________________________
اما عند ود و عساف الصبح اول ما قام عساف وكآن متأخر على الصلاة قام صل و هو كان يصلي صحت ود و دخلت الحمام تبدل و خلصت و لقت عساف جالس يلبس ثوبه
عساف : صباح الخير
ود : صباح النور
عساف : عادي تكوين شماغي ؟
ود : اي هاته بس تذكرت ما جبت كوايه
عساف : يوه اجل بنزل تحت بشوف اذا فيه كواي او لا و منها بجيب فطور وش تبين
ود : جب الي تبي
عساف : تمام بروح الحين لا تفتحين لأحد
ود : طيب
نزل عساف و ودّ كانت لحالها و اول ما طلع ارتاحت تحس لسى ما تعودت عليه بس قالت بينها وبين نفسها ان عساف حليل معاها بس ليه اذا كان يبي سلمى يتزوجني ليه يعيش مع وحده مايبيها ليه ياربي يصير لي كذا ليه ليه
كانت ود منقهره من كلام سلمى صح ردت عليها بس ما يعني انها ما انقهرت مهما كان عندها مشاعر و بتحس بالنقص لما عرفت ان عساف يحب وحده واخذها هي مو الي يحبها
قعدت تهوجس بعدين تعوذت من ابليس و قالت اقوم اسوي شعري و اتعطر احسن لي من اني اتضايق و قامت ود مشطت شعرها و خلته مفكوك و حطت عطر و جلست ترتب اغراضها و عقب نص ساعه رجع عساف و اول ما رجع و دخل وشاف ود فاكه شعرها و جالسه ترتب خق عليها و قال جمالها مهو طبيعي يا ولد ماشاءالله دخل و حط الاكل على الطاوله و علق شماغه على الدولاب
عساف : تعالي جبت فطور حلو اتمنى يعجبتس
ود : لقيت كواي
عساف : اي لقيت
ود : وش الفطور
عساف : جبت لنا ساندويتش كبده تاكلينها
ود : اي اكلها نعمه
عساف : حلو تعالي اجل
جت ود و جلست قدامه و قعدوا ياكلون و هم ياكلون عساف سأل ود وين تبي تروح
عساف : وين ودتس تروحين
ود : ها وش وين اروح
عساف يضحك : اقصد تبين تسافرين
ود : عادي ما تفرق معاي
عساف : الصدق حر الحين شرايتس نروح الجنوب ابها
ود : خلاص ابها ابها
عساف : موافقه عادي
ود : اي قلت لك عادي يا عساف
عساف كان اول مره يسمع منها اسمه اول مره تناديه
عساف : اول مره تناديني
ودّ بإحراج: اي
عساف يغير الموضوع: خلاص انا بدق على اهلي اطمنهم و اقولهم انتي بعد بلغيهم
ود : طيب ابشر بس كم بنجلس هناك
عساف : انتي كم تبين نجلس
ود : اربع ايام و نرجع
عساف : ليه
ود : احس اني بفقد الديره و اهلي
عساف : والله انا بعد بس خلاص ابشري اربع ايام و نرجع
ود : مشكور
عساف : ما سويت شيء
.
.
انتهى ✅ عطوني رايكم بالبارت❤️‍🔥❤️‍🔥