يالضحكة اللي تضوي سنيني

البارت 36

اول ما وصلوا الضيوف و كان ابو مقرن و مقرن و نادر بيت ابو احمد دخلوا المجلس وكانوا رجال بس تقهووا و عقبها الغداء و انتهت العزيمه على خير و بالمطبخ عند سلمى و احمد
سلمى : اف اخيرا
احمد : اي والله مابغينا
سلمى : ما اتحمل اول ما اخلص تنظيف بدخل انام
احمد : و انا بعد بروح انام الحين
سلمى بزهق : يا حظك
احمد : قولي ماشاءالله
سلمى : اقول انقلع
دخلت ام احمد عليهم : وش فيكم
سلمى : ابد انتظر ولدتس يطلع عشان انجز شغلي
ام احمد : احمد اطلع الله يهديك و خل اختك تخلص شغلها
احمد : بطلع عشان امي ترى
سلمى : اهم شيء تطلع
احمد : اقول انت اطلع وانتي كملي شغلتس
انهت النقاش بين عيالها ام احمد و طلعت للصاله تجلس فيها مع ابو احمد الي كان متكي و مروق عكس عياله
__________________________________________
قبل المحكمة بيوم و تحديداً الساعه ٨:٤٠ بالليل كان عساف بالقهوه جالس و ينتظر تركي يجي مر الوقت و جاء تركي و اول ما دخل شاف عساف جالس و راح عند يجلس معاه
عساف : تركي انت للحين زعلان
تركي : انت الي للحين زعلان
عساف : لا والله ازعل من الكل الا انت
تركي : اعذرني انا استعجلت اسف
عساف : اسكت لا تقول كذا انت اخوي مو صديقي
تركي : الله يخلينا لبعض
عساف : امين لكن خل نغير الموضوع
تركي : بكرا الموعد حق نوره و سرور
عساف : ان شاء الله
تركي : بأذن الله الموضوع لصالحنا
فجأة وهم يسولفون اتصلت ود على عساف وهي متوتره
ود : عساف الحق
عساف قام من مكانه : وش فيتس وش صاير
تركي منصدم : بسم الله وش فيه
عساف : اصبر
ود : وليد و عمي و عمتي و نوره و فراس راحوا للمستشفى
عساف بخوف : ليه وش صاير
ود : رهام رهام بتولد و ابو تركي و ام تركي و عزام لحقوهم
عساف : قفلي قفلي انا رايح لهم و تركي معاي
ود : طيب لا تنسى تبشرني
عساف : ابشري ابشري
قفل عساف من ود و قال لتركي السالفه و بسرعه ركبوا سياره عساف و انطلقوا للمستشفى و اول ما وصلوا دخلوا و راحوا للاستقبال و هم بيسألون شافوا فراس نازل و بسرعه راحوا له
تركي : اختي وين طمنا
عساف : تكلم
فراس : الحمدالله الامور بخير و رهام دخلوها و الباقين فوق جالسين بالانتظار
عساف : وانت وين رايح
فراس : بجيب مويا لهم
تركي : انا بروح وين هم بالضبط
فراس : الدور الثالث اول ما تدخل على اليسار
تركي : زين
عساف : انتظر بروح معك
راحوا عساف و تركي و اول ما وصلوا لقوا اهلهم و كانت ام تركي تصيح و ام وليد تدعي و وليد متوتر و ابو وليد و ابو تركي جالسين ينتظرون و عزام واقف عند السيب
عساف : ها بشرونا
عزام : لسى
نوره : الحين لها نص ساعه داخله
تركي : بتتيسر الامور تطمنوا
وليد : يارب الله يسمع منك
جلسوا شوي و جاء فراس و معاه الماء اعطاهم و عقبها جلسوا ساعه كامله ونص و اول ما صارت الساعه ١٠:٢٧ طلعت الدكتوره و اول ما طلعت كلهم اتجهوا لها
وليد : بشري
ام تركي : طمنيني على بنتي تكفين
الدكتور : الف مبروك جابت صبي تتهنوا
الكل انبسط وليد ضم اخوانه عساف و فراس و ام تركي و ام وليد ضمن بعض و تركي و عزام كانوا يصفقون و ابو وليد و ابو تركي كانوا مبسوطين و نوره كانت تصيح من الفرحه و الكل مبسوط بينما بالطرف الثاني ود و ساره و حنين و غزال ينتظرون الخبر يوصلهم و بسرعه راح عساف يتصل على ود يبشرها ان رهام جابت ولد و فرحت ود وبسرعه راحت لساره
ود : ساره ساره وينتس
ساره : بالصاله تعالي بشريني
ود : رهام جابت ولد
ساره : الف مبروك والله اني انبسطت
ود : كلنا كلنا
و بالطرف الثاني راح عزام يتصل على حنين و بلغها و كانت مره فرحانه هي و غزال مبسوطات بالخبر و عقبها اتصل وليد على عمته ام يوسف يبشرها و كانت فرحانه مره و قالت ان بكرا تزورها اما بالمستشفى الي كانوا مرهقين و تأخر الوقت صارت الساعه قريب لـ ١ ف قال ابو وليد : دام تطمنا الحين و الوقت تأخر خلونا نرجع و بكرا الصبح من الساعه ٨ كلنا نرجع لهم
ابو تركي : اي والله صادق
وليد : اخاف يحتاجون شيء
نوره : لا يا وليد كل شيء عندها ما عليك
عساف : تجل يلا نتوكل على الله
تركي : يلا اجل
طلعوا كلهم و رجعوا لبيوتهم و اول ما رجعوا كلن ببيته فرحان و مبسوط و الكل نام كانت ليله حلوه على الكل
________________________________________
من بكرا الساعه ٧ الصباح كلن يجهز من جهة ام تركي كان عليها الفطور و تسويه هي و البنات عشان ياخذونه للمستشفى معاهم اما ببيت ابو وليد الي مجهزين الهدايا و بيحركون للمستشفى اما ام يوسف الي اخذت الحلاو و اتجهت للمستشفى هي و يوسف و ابو يوسف و عقبها وصلوا ابو وليد و عياله للمستشفى و اول ما نزلوا كانت السياره الي جنبهم ابو يوسف و عايلته و تقابلوا عند باب المستشفى سلموا على بعض و كان هذا اول لقاء بين نوره و يوسف من فتره و اول ما التقت عيونهم ببعض حسوا ان الحياة رجعت لهم من جديد ..
دخلوا المستشفى و راحوا عند رهام طبعا يوسف و ابو يوسف و عساف و فراس ما دخلوا بس الي دخلوا من الرجال وليد و ابو وليد و عقب دقايق بسيطه و صلوا اهل ابو تركي و كلهم دخلوا عند رهام و اول ما وليد شاف ولده اذن ب اذنه و
قال وليد : اشوفك بأعلى المناصب يا منصور( اسم ابو وليد )
ابو تركي : والله يستاهل ابو وليد انك تسمي ولدك عليه
او وليد : والله ما يتسمى الا
ماكمل ابو وليد كلامه الا ابو تركي سكر فمه و قال : انت اخوي الكبير و هذا اكبر عيالك و اول ولد لازم بأسمك و بعدين انا تركي اذا جاه ولد اسم ولده بأسمي ان شاء الله
ابو وليد : الله يخليك لي يا اخوي
وليد : الله يطول بأعماركم كلكم يارب
الكل : امين
حرفيا الكل كان مبسوط و فرحان و عايشين بالجو و تقريبا اول ما جت الساعه ٩:٣٠ ابو وليد استأذن هو و عياله بيروحون للمحكمة عشان طلاق نوره
ابو وليد : نستأذنكم الحين تعرفون بنروح للمحكمة عشان طلاق نوره و رهام اذا طلعتي اليوم نجيتس ببيت اهلتس
رهام : عادي ياعم انا بنتك وشوله هالكلام
ابو وليد : الله يحفظتس
وليد الي لف على رهام : حبيبتي انا لازم اروح مع ابوي و اخواني ما اقدر اجلس اذا سووا لك خروج الظهر اتصلي علي اجي اخذك
رهام : هادي طيب اروح مع اهلي
وليد : عادي روحي اذا ودتس
رهام : الله يخليك لي
وليد : امين
طلع وليد يلحق اهله و بسرعه اتجهوا للبيت ينزلون ام وليد و ودّ و ساره بالبيت و الباقين للمحكمة
_________________________________________
اول ما وصلوا المحكمة و كان عبداللطيف سابقهم من زمان
نوره لفراس : فراس اسمع
فراس : هلا
نوره : خايفه
فراس : حنا معاتس لا تخافين
نوره : اي والله كيف اخاف وانتم معاي
ابتسم فراس لنوره و نورت بادلته الابتسامه اما وليد الي لاحظ توتر نوره و مسك يدها و قال لها : لا تتوترين خلاص
نوره : ابشر خلاص منب متوتره
وليد : شاطره
دخلوا عند الشيخ و عبداللطيف موجود و سرور و ابو سرور موجودين
الشيخ : انتي نوره
نوره : اي
الشيخ : و انت سرور
سرور : اي نعم انا سرور
الشيخ : يا سرور نوره رافعه عليك قضيه خلع و جايبه المهر و دبل و انت لو بترفض بنعطيك بالكثير مهله شهر و ترجع تقرر بس القرار واحد انه يتم الخلع ف يا ولدي خل الامور تمشي بسلام دام انكم ب اول جلسه
سرور : طيب انا ابيها
عساف : وهي ما تبيك
الشيخ : لا اخد يتدخل
عساف : اعتذر
الشيخ : مثل ما قال اخو الزوجة البنت ما تبيك و كل الشروط مسوينها و جايبينها لك ف يا ولدي ادحر الشيطان و اترك الامور تمشي بسلام مثل ما قلت لك
لف سرور على ابوه و قال له ابوه : سرور طلقها ولا والله لا اغضب عليك ترى اذا ما طلت بيكشفون امرك نصيحه
اول ما قال ابو سرور كذا لسرور توتر و لف على الشيخ و قال الكلمة الي فرحت نوره : خلاص انا موافق
الشيخ : تطلقها بالثلاث
سرور : اي يا شيخ بس المهر يرجع
شيخ : وانتي يا نوره متاكده بقرارتس
نوره : اي يا شيخ
لف الشيخ عبى ابو وليد : المهر يرجع له كامل
ابو وليد : و المهر معي الحين
الشيخ : عطني اياه
اعطى ابو وليد الشيخ و لف الشيخ للي جنبه و اعطاه الفلرس يتاكد منها و لما تاكد اعطى الفلوس لسرور
الشيخ : بكذا اعلن طلاقكم و الله يعوضكم
الكل : امين
اول ما طلعوا من عند الشيخ اتجهه ابو وليد عند عبداللطيف و حلف عليه يتعشاء بكرا عندهم رفض عبدللطيف لكن مع اصرار ابو وليد و العيال وافق على طلبهم اما ابو سرور و سرور طلعوا و اتجهوا لديرتهم اما نوره الي حست انها تحررت من سرور و تاكدت ان هالمره ربي بيكتب لها الزواج من يوسف بعد ثلاث شهور
.
.
انتهى ✅ عطوني رأيكم بأحداث البارت❤️‍🔥❤️‍🔥!!