يالضحكة اللي تضوي سنيني

البارت 32

بعد مرور شهر كامل كانت علاقة ودّ و نوره هاديه عكس قبل الي الكل يحب علاقتهن و الحين الكل ملاحظ انهن ما صارن يسولفن مثل قبل لحالهن الحين يسولفن مع الكل ومع بعض لا ف الكل مستغرب و مر بعد على حمل رهام سبع شهور و بقى على زواج نوره اسبوعين بس و تصير زوجة سرور و تنسى شخص اسمه يوسف كانت نوره تعيش اسوء ايام حياتها اما يوسف الي الكل لاحظ انه ما صار يجي للجمعات ولا صاروا يشوفونه كثير مثل قبل كان دايم يطلع للبر و يشب ناره و يجلس مقابلها و يتنهد ويقول الابيات هذي وهو ضايق و حاس ان قلبه بينشلع و كره شيء اسمه الحب و طاريه
انكسر لي قلب و خاب فيني شعور
طحت بين عثرات الايام الرديه
عشت في حزن ماصابني سرور
ومازلت بين اوجاعه قويه
كانت هالابيات الي دايم يكررها يوسف توصف شعوره تجاهه فقده لنوره و انها راحت لواحد غيره ما كان يدري ان اذا ربي كاتب ان نوره بتصير من نصيبه قادر ان يجعل نوره زوجة له مثل ما راحت من يدينه و راحت لواحد غيره ولا تعرفه
_________________________________________
يوم هادي ببيت ابو وليد و كان عساف طالع بيروح عند تركي و هو طالع و متجه لبيت عمه كان فيه مكان بين بيتهم و بيت جارهم ابو احمد زي الكهف كانت واقفه قدامه سلمى و كأنها تنتظر عساف و اول ما طلع عساف صارت تناديه اما عساف اللي كان يسمع صوت واطي ينادينه و كأنه يعرف الصوت
سلمى : عساف عساف
عساف لف على الصوت بس ما كان عارف من اي اتجاه
عساف : من وين الصوت
سلمى : هنا يا غبي عند الجدار
لف عساف بصدمة و قال : سلمى !!
سلمى : عرفتني ! يعني ما نسيتني
عساف : لانتس بلوه على راسي
سلمى : افا انا تقولي كذا
عساف : اسمعي يا سلمى فكيني من شرتس وعلمن يوصلتس و يتعداتس ودّ ابعدي عنها و لا تقربين منها ودّ زوجتي افهمي و هي الوحيده بقلبي
كانت سلمى تسمع الكلام وكأنه رصاص داخل قلبها بس ردت على عساف وقالت : سبحان من غير الاحوال انا تقولي كذا عقب ما كنت تسمعني الكلام الي تقوله ل ودّ الحين
عساف : مهب شغلتس تفهمين ولا لا
سلمى : اقول لا تنافخ علي
عساف باستفزاز : تعرفين ترجعين للمكان الي جيتي منه ارجعي له لانه هذا مكانتس بيت اهلتس مو عندي
قال عساف كذا لسلمى و تركها بمكانها اما سلمى بتلت واقفه بمكانها من كلام عساف و صدمتها منه ان شلون يوم من الايام الولد الي يحبها وكان يوعدها انه بيتزوجها صار يقولها كذا !! انهارت سلمى و رجعت لبيتهم و هي دموعها مو قادره توقفها و حلفت انها معد تنزل نفسها لعساف و تلتفت لنفسها و تتركه مو عشانه لا عشان تبي تشوف حياتها مثل ماهو شاف حياته و سحب عليها تبي ترد له الصاع صاعين بس ما كانت تدري ان عساف نساها ولا يدري عنها عكسها هي الي شغلتها الشاغله عساف و ودّ كأنهم بس هم بحياتها
__________________________________________
اما بمكان ثاني بديره ابو سرور وكانوا يجهزون للعرس و يجهزون غرفة سرور و نوره و كل البيت يجهزن و منشغل
اما سرور الي كان طالع من ديرته و كان بسيارته ينتظر اصحاب السياره الثانيه يجون و اول ما جوا نزل سرور من سيارته و نزلوا الثانيين من سيارتهم وكانت حالة سرور شوي مشكوك فيها و اول ما شافهم عطاهم الفلوس و رموا عليه الكيسه وكانت مخدرات !! سرور مدمن مخدرات و اهله يدرون و كانوا بيزوجونه عشان يعقل لكن ما فاد زواجه باقي له اسبوعين وهو للان يتعاطى !! نوره بتاخذ سرور المُتعاطي
التاجر : اسمع لا تشغلنا كل شوي داق جيبوا لي و جيبوا لي
سرور : وش اسوي طيب انا ما اتحمل لازم اتعاطئ
التاجر : شف ناس غيرنا انت بتفضحنا
سرور الي نزل عند رجولهم  : تكفون لا تكفون انا في وجيهكم
التاجر : ياشيخ انقلع ابثرتنا و ترى اذا اتصلت ماحنا رادين عليك تفهم ولا لا
قالوا له كذا و تركوه و راحوا اما سرور الي صار يترجاهم و يحاول يلحقهم لكن ماش ماكان بوعيه و اخذ الكيس و ركب سيارته و جلس يتعاطى من الكمية الي معاه و يحاول ما يخلصها و كان كل الي صار ذا كله قدام عيون مطلق الي كلن واقف بسيارته عند الاشجار و كان منصدم ان سرور يتعاطى و متزوج بنت ابو وليد و ولا قايلين لهم !! اما عند اهل سرور الي كانوا فاقدينه مو موجود و متوترين من غيابه
تسنيم : يبه سرور وينه
ابو سرور : مدري مدري اتصل عليه ما يرد
عزيزه : يبه ليكون
ابو سرور : اسكتي يا بنت اخوتس اكيد تاب
عزيزه : والله ما ضنتي يا يبه
ام سرور : الله يستر الله يستر
تسنيم : ما بقى الا اسبوعين لعرسه خل يجملنا قدام الناس لا يفضحنا
عزيزه : ذا ما يفهم لين يضيع البنت بين يدينه
ابر سرور : انتن وراكن ما تسكتن هاه
ام سرور : اتصل على الولد شف وينه
ابو سرور الي كان بيتصل بس شافوا سرور داخل عليهم و واضح الي كان توه متعاطي لان حالته جداً سيئه و اول ما شافه ابوه صفقه كفين و تفل عليه و قال : انت سافل ما ادري بنت الناس كيف بتتحملك
عزيزه : الله لا يوفقك يا سرور ان كانك بتفضحنا
تسنيم : قم ارجع لوعيك جملنا قدام الماس و خذ نوره و عقبها تعاطى لا تقطع رزقي و رزق اختك من الزواج
ام سرور : الله يهديك و انا امك
كانوا اهل سرور يدرون بحالة ولدهم و يبونه يتزوج نوره عشان يعقل !! بيظلمون بنت الناس عشان ولدهم و عشان بناتهم يتزوجن !!
__________________________________________
رجع مطلق لبيتهم و كان منصدم من الي شافه و اول ما طلع من غرفته اتجه عند ابوه و ناداه للمجلس و اول ما جاء ابو مطلق و جلس وكان مستغرب من مطلق الي عنده سالفه
ابو مطلق : مطلق و انا ابوك وش فيك
مطلق : يبه بقولك شيء و حنا لازم نسوي شيء والا اذا سكتنا ترى ما فينا هير
ابو مطلق وهو مستغرب من كلام مطلق : قل قل و انا ابوك
قال مطلق كل شيء لابوه وشرح له كل شيء شافه
ابو مطلق بصدمة : انت تقول الصدق يا ولد
مطلق : يا يبه والله العظيم والله اني ما كذب و انا زوجتي حامل و بيجيني عيال حرام اكذب و اتبلئ على سرور
ابو مطلق : الله لا يوفقهم اذا كانوا يدرون ولا قالوا لابو وليد و عياله
مطلق : يبه حنا لازم نعلمهم نبري ذمتنا من الي شفناه
ابو مطلق : بكرا جهز السياره بعد الظهر عشان العصر نصلي معاهم و نروح عندهم
مطلق : ابشر يبه تامر امر
__________________________________________
اما ببيت ابو وليد بعد صلاة العشاء ودّ الي كانت بالمطبخ تقطع سلطة و ام وليد و ساره و نوره بالصاله جالسات و رهام عند اهلها و العيال كلهم بالمجلس و ابو وليد نايم تعبان ضغطه نازل ولا يبي عشاء و كان يبي يرتاح و ينام
و بالمطبخ عند ودّ الي انتهت من السلطه و بتغسل يدينها و بتنادي البنات عشان يساعدونها بالعشاء دخلت عندها نوره و مسكت كتف ود و قالت لها : ودّ انتي للحين زعلانه مني
ودّ الي كانت تدخل الاغراض و بعدت عن نوره : لا
نوره : طيب اوقفي بكلمتس
ودّ : وش بتقولين عشان اوقف لتس
نوره : يوه شكله صدق زعلتي علي
ودّ : وبعد تقولين شكله ! انتي ما تذكرين اسلوبتس كيف كان ولا تتكلمين ولا تحيطين باللي تقولينه
نوره : ودّ تكفين سامحيني والله ماكان قصدي
ودّ : شكلتس تو تستوعبين انتس غلطانه
نوره : ودّ قولي اللي تبين والله يحق لتس انا غلطت عليتس و والله مو من قلبي انتي تعرفين محبتس عندي و تدرين عن قدرتس بقلبي اسفه والله مو هاين اطلع من بيتنا و احد زعلان مني
ودّ الي رحمت نوره : خلاص بسامحتس لاني اعتبرتس مثل ريم و اعز والله
نوره حضنت ودّ وقالت لها : الله لا يحرمني منتس
ودّ بإبتسامه : ولا منتس بس نادي ساره عشان ننزل العشاء
راحت نوره تنادي ساره و صارن يوزعن العشاء بينهن و بين الرجال و تعشوا و خلصوا والكل لاحظ ان نوره و ودّ اليوم غير عن الايام الي فاتت و انتهت هالليله على خير
_________________________________________
.
.
انتهى ✅ لاتنسون تعطوني رأيكم بأحداث البارت❤️‍🔥❤️‍🔥