يالضحكة اللي تضوي سنيني

البارت 11

يوم الجمعه بعد صلاة العصر طق باب بيت ابو وليد راح يفتح فراس لقى عمه و اهله و عمته ام يوسف سلم عليهم و عقب دخلوا كلهم و جلسوا كلهم بالمشب
وكانوا فرحانين و ام وليد و البنات و فراس مستغربين وش السالفه الا تقول ام وليد : وش فيكم فرحانين علمونا
ام تركي : ابشرتس يام وليد بنروح بعد شوي بنخطب لتركي وجينا نبلغكم
ام وليد تلولش : الف الف مبروك يام تركي و يابو تركي و انت ياتركي مبروك وانا عمتك
تركي : الله يبارك فيك
نوره : مبروك الله يوفقكم يارب
فراس : والله يا اني مبسوط
عزام : بيصير عندنا عرس
ابو تركي : ان شاء الله الامور تتيسر
ام يوسف : بتتيسر ان شاء الله و نفرح بتركي و عقبال العيال و البنات
كلهم : امين يارب
ساره : بس من البنت
حنين : غزال بنت ام عيسى
ساره : امانه
رهام : اي والله
ساره : والله اني فرحت لها
ابو تركي : يلا اسمحوا لنا حنا الحين رايحين لهم بس جينا نبشركم و ابو وليد نبيك تروح معنا
ابو وليد : والله تبشر انت و تركي و ام تركي
تركي قام يحب راس عمه : تبشر بالجنه ياعم
عساف : يلا روحوا و حنا ننتظركم هنا
تركي و هو يسحب عساف برا : انت بتروح معي تخيل اروح اخطب و اخوي و صديقي مهو معاي
عساف : الله لا يحرمني من وجهك الطيب و ابشر اروح معك
طلعوا اهل ابو تركي و ابو وليد و عساف معاهم اما وليد و فراس راحوا يفتحون المحل و بالبيت عند ام وليد و ام يوسف و البنات 
نوره : ما توقعت والله لكن الله يوفقهم
ام وليد : تركي يستاهل كل خير
ام يوسف : الله يوفقهم
ساره : اي والله تركي حليل و غزال بعد والله انها طيبه
ام وليد : غزال و ام عيسى الله يفرحهم ب اخوهم مثل ماراح يفرحون ب غزال
نوره و ساره : امين يارب
ام يوسف : عقبالكن انتن و عساف و فراس و عزام و يوسف
نوره و ساره : امين
ام وليد : نفرح فيهم كلهم قريب
نوره : والله يمه حاليا نخطب لعساف
ساره : اي يمه عساف
ام وليد : عساف قريب نزوجه
ام يوسف : شكله فيه وحده ببالتس
ام وليد : لا والله بس ابي افرح فيه
ام يوسف : يوسف عجزت فيه كل ما فتحت طاري الزواج معاه يغير السالفه
نوره تضايقت يوم سمعت عمتها تقول كذا و ساره لاحظت عليها
ام وليد : العيال الحين الله يصلحهم ما يقتنعون بسرعه
ام يوسف : بس يوسف بعطيه كم شهر و ازوجه وحيدي بفرح فيه
لما البنات شافوا عمتهم و امهم منسجمين بالسوالف انسحبن و راحن للصاله الثانيه الي عند غرفهم
ساره : وش بلاتس تغير وجهتس كنتس تضايقتي
نوره بربكة : انا !
ساره : ايه انتي فيه غيرتس
نوره : لالا مافيني شيء بس مصدعه بقوم اسوي قهوه و شاهي و نروح عند امي وعمتي
ساره : طيب بكيفتس
____________________________________
طق باب بيت ام عيسى و فجاة ام عيسى تنادي عيسى يفتح الباب راح عيسى يفتح الا يلقى ابو وليد و عساف و تركي و اهله
عيسى : هلا والله اقلطوا حياكم الله
ابو تركي : الله يحيك ياولدي
عيسى : الحريم اطلعن مع جهة اليسار
راحن الحريم داخل و كانت غزال توها مخلصة القهوه و الشاهي بتتقهوى مع امها الا يشوفون الحريم داخلين ام تركي و بناتها
ام عيسى : يا هلا والله ام تركي حياتس
ام تركي وهي تسلم على ام عيسى : اعذريني ما بلغتس من قبل
ام عيسى : يابنت الحلال ماهي بيننا عادي
سلموا البنات على غزال و قالت غزال : حياكن بالمجلس
دخلن المجلس ام تركي و البنات و ام عيسى
وراحت غزال تجدد الاغراض و تقدمهم
ام تركي : لا تعبين نفستس يابنيتي
غزال : لا يا خاله ما فيه تعب
ام تركي : ياحلوتس والله
ام عيسى استغربت من اسلوب ام تركي و ابتسامات البنات ف سألت ام تركي وش السالفه
ام عيسى : عسى خير يا ام تركي مهي عادتس تجيني هالوقت
ام تركي : خير ان شاء الله والله جايين نخطب المزيونه غزال لولدي تركي
غزال كانت تشرب قهوه و شرقت فيها من الصدمه
رهام : بسم الله عليتس فيتس شيء
حنين بضحكة : ياروحي من الصدمه
غزال بربكة : لالا ما فيني شيء بس
ام عيسى : والله ابرك الساعات يام تركي نتشرف فيكم والله
غزال استحت و قامت
اما عند الرجال كان ابو تركي و ابو وليد يسولفون مع عيسى و بعدين دخلوا بالموضوع
ابو وليد : والله يا عيسى ابو تركي عنده موضوع يبي يكلمك فيه و مانبيك تردنا
عيسى : والله تبشرون طلبكم بأذن الله البيه لكم
ابو تركي : والله الصراحه حنا جايين لكم اليوم انا و الاهل و اخوي ابو وليد نخطب اختك لولدي تركي
عيسى بفرح : والله هذا الخبر الزين و ان شاء الله طلبكم ماهو مرفوض و تركي رجال ما ينرفض والله لا هو ولا قرايبه
ابو تركي و ابو وليد : تسلم ما عليك زود
عيسى : لكن عطوني دقايق بشاور اختي و اجيكم
ابو تركي : خذ وقتك
راح عيسى للحوش و نادى امه و قالها كل شيء و امه قالت له بعد و صار و قال عيسى لأمه
عيسى : يمه تركي والله رجال ولا راح اتركه يروح عبث عن اختي
ام عيسى : انا عارفه و انا امك بس ما نبي نجبر اختك
عيسى : انا بروح اسال غزال و بكلمها و بحاول اقنعها
ام عيسى : سو الي تبيه لكن اذا جبرتها تذكر اني ما برضى عليك
عيسى : ابشري يمه
راح عيسى لغرفة اخته يكلمها
عيسى دخل الغرفه وهو يقول : والله وكبرت اختي و صاروا يجون ناس يخطبونها
غزال كانت مستحيه و منزله راسها
عيسى : لا تستحين و انا اخوتس هذي سنة الحياه و ابي اقولتس ان تركي رجال كفو و ينشرى و يكفي سمعته الزينه هو و اهله و اذا كان ودتس فيه ف انا اقول خوذيه و وافقي عليه انا بنفسي اقولتس كذا تركي بيحطتس بعيونه و تذكري كلامي
غزال : بس انتم اهلي ما ابي اتركم
عيسى : و احد قال ان حنا مو اهلتس و انتي عندنا بالديره مانتي طالعه تجين متى ماتبين و تذكري اني انا معاتس و موجود متى ماتبيني
غزال : طيب و الحين وش مطلوب مني
عيسى : عطيني كلمتس موافقه عليه ولا لا و تذكري هذا قرارتس انا ماراح اجبرتس على شيء
غزال : تدري دامك تقول عنه كذا و انا اعرف اهله و انا موافقه
عيسى : هذي اختي الي ربيتها الف مبروك و الله يخليتس لنا
غزال : و يخليك لي يارب
طلع عيسى و لقى امه قدامه و راح بلغها ان غزال موافقه على تركي و راح عند الرجال اما ام عيسى قعدت تلولش و راحت بشرت ام تركي ام غزال موافقه
ام عيسى : ابشركن غزال وافقت
ام تركي و البنات كلهن لولشن
رهام : الحمدالله و الف مبروك لنا و لكم
حنين : بروح عند غزال
راحت حنين عند غزال و كانت مستحيه
حنين : اخيرا بتجين عندي غزال
غزال : حماره هذا الي هامك
حنين : بالعكس فرحانه مره مبروك ياروحي
غزال : الله يبارك فيتس
حنين : امشي نطلع برا
غزال : لا مستحيه
حنين : اقول امشي بس
طلعوا البنات و راحوا عند الحريم و باركوا لغزال اما عند الرجال اول ما قال كلامه عيسى و على طول يباركون لبعض و كانوا كلهم مبسوطين و فرحانين و انتشر الخبر بالقريه كلها و عساف بلغ وليد ان الامور تمام و تمت الخطبه و كل واحد رجع لبيته الا ام يوسف ابو وليد حلف عليها تتعشى عنده هي و يوسف و ابو يوسف ف جاء وقت الاكل و قلطوا الرجال و الحريم لحال وكان من ضمن سوالفهن عن عرس تركي
نوره : متى بيصير عرس تركي
رهام : للان ما سمعت اهلي قالوا متى بيصير
ام يوسف : لا يبطون ماهو زين التاخير
ساره : اي والله صح
ام وليد : نبي نفرح فيهم قريب ان شاء الله
رهام : يارب
_______________________________
ببيت ابو احمد و كانو يتعشون و يسولفون
ابو احمد : يقولون ابو تركي خطب لولده بنت ابو عيسى
سلمى : اي يبه سمعنا الخبر
ام احمد : ماشاءالله الله يهنيهم
احمد : بعد اسمع يقولون بيخطبون لعساف
ابو احمد : مين بياخذون له
سلمى بصدمة : قالوا ان بيخطب صدق
احمد : سمعنا الخبر بس عساف ما يفكر الحين
ام احمد : الله يستر عليهم فكونا من طاريهم بكيفهم يخطبون يعرسون بسلامتهم
ابو احمد : مادانيه ابو وليد ولا عياله
سلمى تضايقة من اسلوب اهلها و حاولت قدر المستطاع تكمل عشاها عشان م يشكون
___________________________________
بالليل بغرفة ام وليد و ابو وليد كانوا يسولفون عن عساف و انهم ناويين يخطبون له
ابو وليد : الصراحه يام وليد افكر اخطب لعساف
ام وليد : والله حتى انا ودي اشوفه معرس حتى خواته يبونه يخطب
ابو وليد : مين نخطب له
ام وليد : البنات كثار نخطب له وحدتن منهن مع ان فيه وحده ببالي
ابو وليد : الصراحه انا ودي اخطب له من بنات ابو طارق
ام وليد : والله كأنك يا بو وليد قلت البنت الي ببالي
ابو وليد : انتي بعد تبين تخطبين له من بنات ابو طارق مين اي وحده
ام وليد : بنته الكبيره اسمها ودّ ماشاءالله اول ماشفتها دخلت قلبي و احسها بتسعد ولدي
ابو وليد : والله دامتس شايفه كذا الوضع خل نكلمه بكرا
ام وليد : خلاص ان شاء الله
_________________________________
الصبح بالحوش عند ود و طارق و ريم جالسين ينتظرون امهم و ابوهم على الفطور
ريم : يمه يبه يلا حنا ننتظركم
ابو طارق : افطروا امكم تدور عقالي ما لقته
ود : يبه قل لامي يمكن انه بالدولاب
ابو طارق : طيب طيب
طارق : صح تركي خطب اخت عيسى
ريم : اي امس الكل يتكلمون عن خطبتهم
ود : الله يوفقهم فرحت لغزال تستاهل
طارق : حتى تركي يستاهل و حتى عساف اتمنى يلقى له بنت الحلال
ريم : عساف الي فتح لنا الباب يوم جيناهم
طارق : اي ذا عساف
ريم : و انا احسبه وليد
ود بضحكة : يا غبيه وليد متزوج اكيد بتكون بيده دبلة
ريم : ما نتبهت يخي
طارق : يمه يبه ماراح نفطر الا انتم معانا
ام طارق : جينا افطروا يلا
ود : لقيتي عقال ابوي
ام طارق : لا والله عطيته الثاني
ابو طارق : الله يصلحتس يام طارق وين حطيتيه
ام طارق : والله ضاع ولا انا تعرفني ما اضيع شيء لك
ابو طارق : اي والله صحيح
افطروا وعينوا من الله خير و راح ابو طارق و طارق يفتحون محلهم اما عند ام طارق و البنات كانوا ناويين يروحون عند ام عيسى يباركون لغزال
ود : يمه باخذ التلفون بدق على غزال اعطيها خبر اننا بنجيهن
ام طارق : دقي عليها
راحت ود تدق على غزال و عطتها خبر و قالت لها قبل صلاة الضهر بنجيكن
ريم : وش قالت لتس
ود : تقول تعالن حياكن الله
ام طارق : ياحلوها هالغزال
ود : اي والله
________________________________
بالسوق الساعه ١٠ كلن يبيع بمحله و يشتري الا فجأة تصير هوشه بين مؤمن عامل البقاله و راجي عامل القهوه
مؤمن : راجي انتا ما يفهم هات فلوس حق بقاله عشان يعطي فلوس حق قهوه
راجي : مؤمن هات فلوس قهوه عشان يعطي فلوس بقاله
مؤمن يعطي كف ل راجي و تقب الهوشه بينهم و يجون اللي بالقهوه و السوق يفرقون بينهم
ابو ماجد : استهدوا بالله شفيكم
ابو يوسف : يا يوسف فرق بينهم انت و العيال
يوسف : ابشر ابشر
جو يوسف و عيسى و ناصر و سليم يفرقون بينهم
و فكوا بينهم الشباب و تكلم ابو ماجد يسألهم شفيهم
ابو ماجد : وش فيكم تتهاوشون يا راجي و مؤمن
مؤمن : راجي اخذ اكل من بقاله ما في يدفع فلوس حق انا
راجي : و انتا مافي يدفع فلوس حق بقاله
ضحكوا العيال على الهوشه و تكلم ناصر
ناصر : الهوشه كلها عشان هالسبب
يوسف بطقطقه : و انا احسبه شيء قوي طلع كذا
ابو ماجد : اسكتوا يا عيال خلونا نحل المشكله
ابو يوسف : كم تبغون من بعض
راجي : انا يبغا من مؤمن ٩ ريال حق شاي
مؤمن : انا يبغا ١٥ ريال حق اكل بقاله
ابو يوسف : خلاص الحين انت اعطيك ٩ و انت ١٥ و انتهت المشكله مفهوم
راجي و مؤمن : مفهوم ابو يوسف شكرا
ابو يوسف : العفو و الحين تفرقوا انتهت المشكله على خير
ابو ماجد : كفو والله مو غريبه عليك يابو يوسف
ابو يوسف : كفوك الطيب
_____________________________________
بمحل الاقمشه كان تركي و عزام جالسين و دخلوا وليد و فراس اما عساف بالبيت
فراس : السلام عليكم
تركي : وعليكم السلام
عزام : وين عساف
وليد : يجي بعد شوي ابوي يبيه
تركي : الله يستر وش مهبب
عزام : انا جاي اسألك اذا تعرفين
تركي : لا والله ما اعرف
وليد : ماعليه نعرف اذا جاء
________________________________
بالحوش عند عساف و اهله
ابو وليد : تعال عساف
عساف : سم يبه
ام وليد : اجلس نبي نكلمك
عساف : طيب
جلس عساف و عرف عن وش بيتكلمون معه
عساف : سمو وش بغيتوا
ابو وليد : ما ودك تتزوج تخطب
ام وليد : نبي نفرح فيك
عساف : بتفرحون فيني ان شاء الله بس ما فكر الحين
ابو وليد : انا يوم اكلمك بالموضوع ما بشاورك انت كبرت و شف ولد عمك تركي الله يوفقه عرسه بعد شهر وانت متى بتجلس عزابي
عساف : يبه الله يخليك لي انا اذا لقيت لي الفرصه جيت وقلت لكم اخطبوا لي
ام وليد : الله يهديك ياوليدي مدري وش تنتظر
ابو وليد : شف يا عساف عندك اسبوعين اذا ما عطيتني كلمة ترا بخطب لك
عساف : لا يا يبه هذي حياتي انا انا الي بعيشها
ابو وليد : تعكس كلامي يا عساف
اعتلت اصواتهم و جو البنات يشوفون وش السالفه م عدا رهام كانت عند جهة باب الحوش
عساف : يبه انا ما عكست كلامك بس هذي حياتي
ساره و نوره واقفات منصدمات ما يدرون وش السالفه
ام وليد : استهدوا بالله الموضوع ما يستاهل و عساف بيسمع الكلام يا بو وليد لا تشيل هم
عساف كان بيتكلم بس امه هزت كتفه بمعنى اسكت
ابو وليد : عطيتك الكلام الاخير اسبوعين اذا ما قلت شيء بخطب لك
عساف طلع برا البيت و كان معصب من قرار ابوه و تحكمه فيه
اما عند ابو وليد ف دخل ياخذ نعاله و انتم بكرامه بيروح عند ابو ماجد
ساره نوره : يمه وش فيكم
رهام وهي جايه : عمي طلع معصب و عساف بعد
ام وليد : ابوكن بيخطب لعساف بس عساف رافض ما يبي يخطب الحين و عطاه اسبوعين يفكر فيها
رهام : طيب خلوه على راحته يا عمه
ساره : صدق يمه الزواج الاجباري مهو زين
نوره : ياويل قلبي على اخوي
رهام : لا تشيلن هم عساف رجال و يعرف يتصرف
ام وليد : الله يهديه بس قومن قومن ادخلن جوا و جيبي الاغراض
ساره : ابشري
___________________________________
طلع عساف و الدنيا قافله بوجهه لان خايف ما يخطبون له سلمى و راح للمحل كان متضايق واضح عليه دخل و وقف عند الباب
عزام : عساف فيك شيء
عساف : لا
تركي : طيب ادخل اجلس عن الحر
عساف : مانب داخل
وليد : عساف وش فيك تكلم ابوي وش قالك
عساف : قلت لكم مافيني شيء ما تفهمون
فراس : خلاص خلوه شوفوه معصب فكونا من شره لا يعصب علينا
تركي راح عند عساف و اخذه برا المحل و برا السوق و راحوا يتمشون بالسياره عشان يغير من جو عساف و يشوف وش فيه
تركي : عساف الله يهديك وش فيك علمني
عساف : تركي ابوي يقول عندك اسبوعين و اخطب لك
تركي : طيب و انت ليه متضايق الفرصه جت عندك قله ابي بنت جيرانكم
عساف : انا خايف ابوي ما يخطبها لي
تركي : وليه خايف اكيد عمي بيوافق دامه يبيك تتزوج
عساف : الله ياخذ العدو انت ليه تتزوج
تركي بضحكه : تستهبل انت انا وش دخلني
عساف : ابوي يقول تركي باقي شهر على زواجه وانت لازم اخطب و تصير عقبه
تركي وهو يضحك : قلنا اننا اخوان و اصدقاء بس مو يزوجونا ورى بعض
عساف : طيب وش السوات الحين اصبر اسبوعين و اروح اكلمهم
تركي : خذ اسبوع وعقب رح قل لهم انك موافق بس تبي تخطب بنت جيرانكم
عساف : شورك و هداية الله نشوف وش يصير
_______________________________
عند غزال و البنات يسولفون و يباركون لها
ود : والله اني فرحت لتس مره يا غزال
ريم : الله يوفقكم يارب
غزال : عقبالكن يارب ونفرح فيكن
ريم : انا توي صغيره
غزال : اجل ودّ انتظري دورتس
ود بضحكة: الله يقطع بليستس يا غزال قلبتي الموضوع علي
غزال : لا قلبته ولا شيء بس صدق صدق ابي افرح فيتس قريب يارب
ود : ان شاء الله بس ما قلتي لي متى عرستس
غزال : بعد شهر
ريم : قريب مره
غزال : عادي كلنا بالديره هنا
ود : اي اهم شي مانبي نفقدتس من غير شر
بنص سوالفهن كانت ام طارق تنادي البنات عشان بيروحن
ود : يلا يلا يمه جينا
ريم : يلا مع السلامه غزال نشوفتس بالعرس
غزال : ان شاء الله يارب
ود : يلا مع السلامه
طلعن البنات و ام طارق و بالطريق يسولفن الا تمر سيارة تركي و كان معاه عساف و طاحت سبحة عساف و وقف تركي عشان ينزل عساف ياخذها ب الصدفه لقى ود ماسكة السبحة تبي توخرها عن الطريق و استحى عساف ياخذها و رجع ركب السياره و قال لتركي : امش ما لقيتها
تركي : نشتري لك غيرها
عساف : بس يخي هذي سبحتي متعود عليها
تركي : خلاص اهجد نشتري لك غيرها
عساف : هذا الي بيصير
طبعا عساف ما يدري ان هذي ود بس ودّ كانت تدري انه الي نزل و شافته عساف بس ما تدري ليه اخذتها معه وهي اصلا كانت تبي تبعد السبحه عن الطريق بس
________________________________
.
.
انتهى ✅ عطوني رأيكم عن البارت و ايش تتوقعون يصير🔥