يالضحكة اللي تضوي سنيني

البارت 22

دخلت ودّ عند البنات و سلمت عليهن و شافت اختها ريم و سلمت عليها
حنين : وراتس تأخرتي
ود : ما تأخرت انا جايه مع البنات بس عساف كان يقولي اذا خلصتن دقي علي
حنين : اها
غزال : المهم دامكن تجمعتن امشن للصاله
جلسن البنات و قعدن يسولفون و يضحكن سوا و من ضمن السوالف كانن يحشن ببنات الديره و من ضمنهم سلمى
ريم : عاد نصره حلوه والله
رهام : ماعليها عاديه
غزال : سلمى بعد عاديه مو مره حلوه
نوره : سلمى حلوه مو شينه
ساره : ما دانيها يخي
رهام : الا على طاري سلمى وراتس قبل شوي ما رديتي يا ود عليها
ود الي جحدت بعد عند البنات : سلمى مكلمتني !
رهام : اي قالت لتس شلونتس يا ود
ودّ : تو ادري منتس
نوره : واضح عليتس انتس كنتي مو مركزه معاها
ساره : بس احسن لا ترد
غزال الي حست ان ودّ كذابه مو صادقه
ريم : المهم بنات عندي قماش حق زواجي أختي ود على اساس اني بفصل بس اني شريت جاهز مين تبيه
حنين : انا عن نفسي لا والله مابيه
رهام : وانا بعد
غزال : والله عندي فساتين كثيره
ساره : لو مو ممداي شاريه فستان جديد كان اخذته منتس
ودّ : فصلي فيه يا ريم
نوره : اي خيطي الفستان الي كنتي تبينه و خليه عندتس
ريم : مافيه عروس
رهام : من قال ياكثر بنات و عيال الديره الي لسى ما تزوجوا
غزال : اسمع ان ام يوسف بتخطب ليوسف
نوره الي تضايقت يوم سمعت الخبر و حست انها ما ودها تكمل الجلسه و ودّ لاحظت عليها و سكتت
حنين : اي عمتي ياروحي تبي تفرح فيه
ريم : الله يوفقه
_______________________________________
عند عساف الي وصل عند تركي و اول ما وصل قال له وش صار بين ودّ و سلمى و انه شاف سلمى
تركي : طيب و اذا شفتها عادي
عساف : عارف انه عادي بس يخي استغربت من شيء
تركي : وشو
عساف : سلمى قالت ل ود شلونتس بس ود ماردت عليها و يوم سألت ود ليه مارديتي قالت انها ماسمعتها ولا درت عنها
تركي : طيب ود صادقه يمكن ما درت عنها انت لا تتحسس قدامهم ولا تبين انك مهتم لسلمى
عساف : تركي ترى ب اعطيك كف
تركي : وراك ياخي
عساف : قلت لك مو مهتم لسلمى خلاص
تركي : خلاص مو مهتم
عساف : المهم برجع للبيت فاضي بس انا و خواني و ابوي و امي تجي
تركي : لا مانب جاي بروح اشتري اغراض
عساف : اجل سلام
راح عساف لبيتهم و تركي بقى جالس عند الحلال و اول ما دخل عساف لقى اهله توهم متقهوين
ام وليد : تعال يا عساف تقهوا
عساف : جاي يمه
ابو وليد : وينك تأخرت
عساف : كنت عند تركي و جيت
ابو وليد : وانت لازم تروح مية مشاور قبل لا ترجع
عساف : يبه ترى كلها عشر دقايق
ابو وليد : لا ترادد ابوك
عساف : ابشر ابشر
ام وليد : خذ يا فراس الملاعق وفك الكيك
فراس : طيب
فك الكيك فراس و اعطى الملاعق لأهله واول ما ذاقوه اعجبهم و قعدوا يمدحونه
وليد : اكيد نوره مسويته
فراس : من غيرها
عساف : والله ياهو طعمه حلو
ام وليد : تسلم يدينها اللي سوته
ابو وليد الي اول مره ياكل حلا و يمدحه : طعمه موزون مهب حالي
وليد: صادق يبه
عساف : ضروري اسويه مره ثانيه
ام وليد : عاد انتوا قولوا لها
فراس : انا عن نفسي اول ما يجن بسألهن
عساف : وانا معك
وليد : ياحبكم للأكل
قعدوا يسولفون سوا و يضحكون
___________________________________
عند البنات الي كانن داخلات جو بالسوالف قامت غزال بتروح للمطبخ بتجيب مويا
غزال : بجيب مويا احد يبي
ساره : جيبي لنا كلنا
غزال : اجل ودّ تعالي معاي
راحت ودّ مع غزال للمطبخ و اول ما دخلن
قالت غزال : ود انتي صديقتي و اعرفتس من كنا صغار
ود : طيب وش فيه
غزال : لا تكذبين قولي ليه ما رديتي على سلمى
ود : ما سمعتها
غزال : اعرفتس اذا كذبتي قولي الصدق
ود : غزال يخي ما سمعتها
غزال : بعرف قريب لو مو عندنا البنات كان عرفت غصب
ود : بعدين بعدين بيننا مو هنا
غزال : المهم كيف علاقتس مع عساف
ود : زينه الحمدالله بس انتي الي علميني تركي كيفه معاتس
غزال : ابد تركي الله يخليه لي بس
ود : من كلامتس واضح الحب
غزال : طبعا
ود : اقول امشي للبنات بس تأخرنا عليهن
غزال : والله ودي اجلس لحالنا من زمان ما سولفنا
ود : قريب ان شاء الله نسولف زي قبل
غزال : ان شاء الله
رجعن غزال و ودّ عند البنات و اعطنهن مويا و ريم همست ل ود وقالت لها
ريم : ود اسمعي امي تقول تبيتس بموضوع مهم شوي ضروري تجين
ود : ما قدر والله
ريم : يا ود قلت لها والله بس ترى امي معصبه تقول اذا ما جت قولي لها اني بزعل عليها
ود : لحول من وين طلع الموضوع ذا الحين
ريم : عاد ما تعرفين امي
ود : خلاص بقول لعساف بعد صلاة العشاء يوديني عندكم
ريم : خلاص بقول لامي انتس بتجين بعد صلاة العشاء
ود : زين
راح الوقت و رجعت ريم لبيتهم اما ود دقت على عساف يجي ياخذهم
عساف : هلا ود خلصتوا
ود : اي خلصنا تعال
عساف : خلاص اذا سمعتن البوري اطلعن هذاي جاي
ود : طيب مع السلامه
سكرت ود المكالمة و كانن يودعن البنات و بعد ثلاث دقايق وصل عساف و طلعن البنات له و اول ما ركبن راح عساف لبيتهم
_________________________________________
عند ام طارق و ريم بالبيت و تحديدًا بالمطبخ
ريم : يمه قلت ل ود
ام طارق : وش قالت
ريم : تقول بجي بعد صلاة العشاء
ام طارق بعصبيه : وليه ما تجي الحين
ريم : يمه انتي وراتس على ودّ
ام طارق : مهو شغلتس
ريم : بس يمه انتي مره معصبه على ودّ وهي مو مسويه شيء
ام طارق : اجل تقطعنا عشان عساف الي ما تعرفه الا يوم تزوجها
ريم : طيب يمه ترى مالهم الا شهر الحين و قبل فتره شايفتها و اكيد بتجينا ترانا بنفس الديره
ام طارق : حتى لو
ريم : وغير كذا ترى ودّ تكلمنا كل يوم حتى
ام طارق : اذا ما جت اليوم ترى منب مكلمتها اذا اتصلت
ريم : بتجي والله
طارق الذي داخل عليهن : مين الي بتجي
ريم : ودّ بس مو الحين بعد صلاة العشاء
طارق: بينور البيت والله
ريم : يعني مو منور بوجودي
طارق بضحكة: الا منور يالغيوره
ريم : اي كذا تمام
________________________________________
اول ما رجعن البنات كل وحده راحت لغرفتها
رهام نومت بنتها و طلعت للصاله لقت وليد و وام وليد
وليد : رجعتن
رهام : اي قبل شوي
ام وليد : وين هيفاء
رهام : نايمه يا عمه
ام وليد : يازينها الله يحفظها
رهام : امين
وليد : يلا انا بروح عند ابوي بالمجلس
راح وليد و رهام و ام وليد جالسات يسولفون سوا اما عند ساره و نوره بالمطبخ يرتبن الاغراض و كانت ودّ متكيه على الباب و تسولف مع البنات
ساره : الحين انتي يا ود ليه ما تجين تساعديني
ودّ : والله انا خلصت شغلتي قبلتس
ساره : اهب الحماره
نوره : المهم ان حلاتس جاز لي
ود : بالعافيه
ساره الي كانت بتتكلم بس دخلوا عساف و فراس و كانوا يضحكون و عساف الي حط يده على كتف ود
فراس : جيتن
ساره : لا والله لسى ببيت عمي
ود بضحكة : حلوه حلوه
فراس : يالسامجه وانتي ود لا تعززين لها
ودّ : والله عاد هي صادقه
ساره : كفو ودّ
عساف : اقول انتن الحلا خطير
نوره : يجنن
فراس : اي والله تسلم يدينتس نوره
نوره بضحكة : ياغبي قل الكلام ذا ل ودّ هي اللي مسويته مو انا
عساف الي اعطى نظره ل ود الي ما عرفتس اما فراس الي قال ل ودّ
فراس : والله ابداع تسلم يدينتس
ود : بالعافيه
عساف : وانا اقول ليه الحلا حلو طلع السر باللي مسويته
ودّ استحت مره من كلام عساف خصوصا انه قال كذا قدام اخوانه
ساره بطقطقه : استحت استحت
ود بضحكة : لا عادي
فراس : المهم ان ابوي يقول جهزن العشاء بعد صلاة العشاء يبيه قاضي
نوره : ابوي الله يحفظه يحسب اننا آلات نجهزه بسرعه
عساف بضحكة : يلا بس سويه
نوره : اقول انقلع انت وياه و اطلعوا
فراس : بنطلع ماراح نجلس عند ريحة البصل
ساره : خف علينا يالمسك و العنبر
ود ما تحملت و ضحكت على كلام ساره لفراس اما عساف الي كان بيقول لساره
عساف : ساره اشتغلي وانتي ماتشوفين الدرب
نوره : تطلعون ولا ناديت امي
عساف : خلاص اشغلتنا بنطلع
طلعوا العيال و راحو عند ابوهم اما عند البنات الي كملن شغلهن و ودّ كانت تغسل المواعين و نوره تسوي العشاء و ساره اسوي قهوه و شاي لهن و اول ما خلصت ودّ راحت لغرفتها و تروشت و بدلت ملابسها و اول ما خلصت اتصلت على عساف
عساف : هلا تبين شيء
ود : اي تعال شوي
عساف : وين انتي فيه
ود : بالغرفه
عساف : طيب جاي
راح عساف عند ودّ و اول ما دخل استغرب شفيها هذي
عساف : وشفيتس تبين شيء
ود : اي عساف تكفى عادي توديني لأهلي
عساف : الحين !
ود : اي امي تبيني بموضوع مهم دقت علي
عساف : عساه خير
ود الي كذبت ولا تدري امها وش تبغى : اي الحمدالله بس تبي تأخذ رأيي
عساف : بتتعشين
ود : والله ما ادري بس اضن اي دامني رحت ودي اتعشى
عساف : خلاص طيب البسي انتظرتس برى
ود : طيب
طلع عساف و قال لأمه انه بيطلع مشوار و بنفس الوقت بيودي ودّ عند اهلها تزورهم
ام وليد : روحوا الله يستر عليكم
عساف : مع السلامه
طلع عساف و اخذ دقيقتين و طلعت له ودّ و ركبت وبسرعه حرك و راح لبيت عمه و اول ما وصل قبل لا تنزل ودّ قالها
عساف : بتتأخرين
ود : لا
عساف : تمام
نزلت ود و دخلت بيت اهلها بحكم ان لقت الباب مفتوح واول ما دخلت قعدت تنادي مالقت احد ! بتلت تنادي امها ابوها اخوانها ما لقت اي صوت كانت تبي تدخل داخل البيت بس خافت لان مظلم ! اتصلت على عساف بسرعه وقالت له ارجع و اول ما رجع نزل عساف و دخل عند ودّ والي استغرب وش فيه و شاف وجه ودّ الي خااايفه مره
عساف : وش فيه اهلتس وينهم
ود : مدري اول ما نزلتني لقيت الباب مفتوح ودخلت قلت يمكن اهلي ناسينه مفتوح بس اول ما دخلت لقيت البيت كذا و اناديهم محد يرد و اتصلت عليك
عساف باستغراب: اجل وينهم بسم الله
ود : مدري
عساف الي مسك يد ودّ وقال لها : لا تخافين انا معاتس موجود
ود بتوتر : طيب
عساف : خل نرجع البيت و نشوف وش يصير
.
.
انتهى ✅ عطوني رايكم بأحداث البارت❤️‍🔥❤️‍🔥