يالضحكة اللي تضوي سنيني

البارت 13

يوم الاثنين بعد صلاة المغرب توجه ابو وليد وعياله و تركي و ابو تركي و ام وليد و بناتها لبيت ابو طارق عشان ودّ
فتح الباب طارق الا الضيوف قدامه رحب فيهم و قلطهم اما عند الحريم الي جلسن بالمجلس و قعدن يسولفن و ياخذن بالسوالف و عند الرجال فتح الموضوع على طول ابو وليد وقال : والله يا بو طارق اليوم جيتي لك غير
ابو طارق : عسى ماشر يا بو وليد
ابو وليد : جيتنا اليوم والله نطلب القرب منكم و اخطب بنتك ودّ لولدي عساف
ابو تركي : والله ان مافي مثل تربيتك يابو طارق
ابو طارق : والله انها ابرك الساعات وحنا الي بنفرح بقربكم والله
طارق : عساف مهو مكروه و نعم النسيب و الي نأمن اختي عليه
عساف : تسلم يا طارق
ابو وليد : وش قلت يا بو طارق
ابو طارق : انا موافق و قربكم والله مهو مكروه بس باخذ رأي البنت و ما بتطلعون الا والامور كلها زينه
ابو وليد : سو الي تبيه
عند الحريم كانن يهرجن و يضحكن بس تكلمت ام وليد وقالت : والله اليوم غير يام طارق
ام طارق : ليه عسى خير
ام وليد : يجيتس الخبر بعد شوي
جاء ابو طارق و طارق ينادون ام طارق و البنات و قامن يشوفون وش يبون
ود : هلا يبه وش تبون
طارق تعالن للصاله
ام طارق : وش صاير
ابو طارق : اسمعن ابو طارق و اهله اليوم جايين يخطبون ودّ لعساف طبعا ودّ انصدمت اول ما سمعت ابوها يقول كذا
ريم : الله وش الخبر الحلو
ام طارق : ياروحي بنتي كبرت
ابو طارق : و انا جاي الحين اخذ شورتس يا ودّ
طارق : اتركوني مع ود شوي
ام طارق : طيب
طلعوا للحوش و اتركوا الاخوان مع بعض
طارق : اسمعي يا ود و انا اخوتس وش بقولتس عساف اعرفه و اعرف طبعه صدقيني بيصونتس و بيحطتس بعيونه و عساف مهو عصبي ولا هو متحجر بيفرحتس و انا ما اقول هالكلام و الا وانا ابيتس تاخذينه لاني اعرفه و ابي لتس الخير و الحين بنادي ابوي و عطيه كلمتس
راح طارق ينادي اهله و رجع ابو ودّ يسأل ود نفس السؤال
ابو طارق : ود انتي موافقه ولا لا تأخرت على الناس
ام طارق : يا بنتي ذا نصيبتس وجاتس وافقي
ود : يبه انا موافقه
اول ما قالت ود كذا ريم لا شعوريا لولشت و ابو وليد و كلهم عرفوا ان ودّ وافقت و ابو طارق ضحك على ريم يوم لولشت
طارق : ريم خربتي علينا نبي نوترهم
ريم : والله اني فرحانه شسوي
ابو طارق : يلا بروح للرجال امش يا طارق
ام طارق و ريم و ود راحن عند الحريم و اول ما دخلن تكلمت نوره : شكله ودّ وافقت يا خاله ام طارق
ام طارق : اي ود وافقت والله نتشرف فيكم يام وليد
ام وليد : والله حنا اكثر و ما اخترنا الا الزين و الادب
ساره : يا حظ عساف فيتس والله
نوره : الف مبروك
ود : الله يبارك فيتس
ريم : والله اني فرحانه يعني اليوم الخطبه ؟
ام وليد : اي ان شاء الله
ام طارق : الله يتمم لهم على خير
اما عند الرجال اول ما قال ابو طارق ان ودّ موافقه و تمت الخطوبه و عقد القران التباريك بينهم ما وقفت و عساف كان عادي فرحان عشان اهله و عشان ان ابوه اختار له بنت ابو طارق مو بنت غيرها
تركي بفرح : اجل بعد عرسي يصير عرس عساف
عساف : ان شاء الله على خير
ابو طارق : والله و نعم النسيب و صار ولدي الثاني
عساف : ينعم بحالك يا عم و انت ما عدك الا مثل ابوي والله
طارق : عاد لا تصدق نفسك
عساف بضحكة : والله عاد عمي قال كذا مو انا
كلهم كانوا مبسوطين و فرحانين حتى الحريم كلهم مبسوطات و يسولفن و حلف ابو طارق ان ما يروحون الا وهم متعشين لكن كلهم رفضوا بحكم انهم جو ولا بلغوه بس ابو طارق رفض و قال العشاء اليوم مانتم طالعين الا وانتم متعشين و عند الحريم الي كانت ام طارق ودها تسوي ملكة ل ود بس بحكم انه اهل ابو وليد منشغلين ب عرس تركي قدرت ظروفهم و سكتت
نوره : اي صح ترا عساف يقول بكرا بيجيب الدبل حقت ودّ و حقته لان لسى ما طلعوا
ريم : مو يشترونهم من سوق الذهب ليه ينتظرها تطلع
ساره : اي لان عساف اختار شكل غير عن الموجودات عشان ودّ
ام طارق : يوه الله يسعده ما يحتاج
ود : ما يقصر
ام وليد : تستاهل بنتنا
جاء العشاء و انتهى اليوم السعيد عندهم كلهم و اول ما طلعوا ابو طارق و طارق باركوا ل ود و طارق بلغ ود ان عساف بكرا بيجيب دبلتها اما عند ود الي اول ما راحت للغرفه جلست على كرسي التسريحة و تفكر بالموضوع انه خلاص صارت مرتبطه ب عساف وهي ما تعرف عنه الا اسمه بس مرتاحه من كلام اخوها عنه و معرفتها ب اهله تنهدت وقالت الله ييسر الامور
_________________________________
اول ما دخلوا بيتهم كلهم يباركون لعساف و رهام تبارك له بعد بحكم ان رهام جلست بالبيت ماراحت معهم لانها تعبانه
رهام : الف مبروك يا عساف والله عرفت من تختار
عساف : الله يبارك فيتس يارب
وليد : الفرحة اليوم غير والله
فراس : واخيرا بيعرس الاوسط
ام وليد : الله يهينهم يارب
ابو وليد : من الحين اقولكم الحوش الخلفي ببني فيه غرفة لعساف و ودّ
عساف : يا يبه ما يحتاج
ابو وليد : اسكت ما سألتك انا بحطه لك و للبنت
كلهم اتفقوا مع كلام ابو وليد و راحوا الرجال للمشب و تركي و عساف راحوا يتمشون اما عند البنات يسولفن لرهام وش صار و ام وليد راحت مع عيالها للمشب
ساره: فاتس يا رهام فرحتهم
نوره : اي والله فرحانين و ود منصدمه
رهام : وراها منصدمه ليكون ماتبيه
نوره : الا موافقه بس تقول ماتوقعت
ساره بضحكة : والله مت ضحك على عساف يوم طلعنا
رهام : منصدم حتى هو
نوره : بس الصراحه ودّ جميله ماشاءالله اليوم ماحطت مكياج بس طالعه قمر ياحظ عساف
رهام : من زمان اقولكن ود تهبل حتى ريم مثلها
ساره : من بكرا ينتشر الخبر بالديره كلها قولن ساره ما قالت
نوره : الله يعيننا العمال بيصيرون ببيتنا يبنون
رهام : ماراح يطولون ترا كلها شهر و يقضون
ساره : امشن للحوش نجلس بالجلسة نكمل سوالف
_________________________________
بالديره يتمشون عساف و تركي و كان تركي فرحان لعساف
تركي : طارق فرحان مره
عساف : مين يلومه انا زوج اخته
تركي بطقطقه : كأنك تجامل اليوم
عساف : شسوي
تركي : تذكر كلامي ودّ بتصير احلى شيء بحياتك
عساف : ما اقول الا الله ييسر بس
تركي : ماعلينا الحين ما بقى شيء لعرسي و الصدق والله متحمس لان عقبي انت عرسك
عساف : انا عرسي مطول شوي يمكن بعد عرسك بشهر و شوي
تركي : وليه
عساف : ابوي بيبني لي بالحوش الخلفي
تركي : احسن شيء ترتاح حتى
عساف : هو احسن اكيد
تركي : طيب شرايك نرجع الحين عشان بكرا ناوي اكمل اشتري اغراض لأهلي
عساف : يلا امش يالمعرس
رجعوا العيال لبيوتهم و الصباح انتشر الخبر بكل الديره و الكل يبارك لاهل ابو طارق و ابو وليد و اول ماسمعت الخبر سلمى انهارت و حقدت اكثر على عساف و كرهت ودّ و صارت تتحلف تخرب بينهم ولا تبيهم يتهنون
سلمى : انا يصير فيني كذا طيب يا ودّ والله ما اخليتس تفرحين و انت بعد يا عساف
________________________________
الظهر راح عساف اخذ الخواتم و راح لبيت ابو طارق
طق الباب و فتحت له ام طارق
ام طارق : مين
عساف : انا عساف
ام طارق : هلا والله عساف ادخل و انا عمتك
عساف : لا يا عمه والله اني متأخر على الصلاة بس علميني شلونتس انتي
ام طارق : بخير الحمدالله سم وش بغيت
عساف : هذي الكيسه فيها دبلة ود عطيها اياها
ام طارق : ابشر غيره شيء
عساف : لا سلامتس
ام طارق : لاتنسى تسلم لي على امك
عساف : ابشري يلا مع السلامه
راح عساف و ام طارق تنادي ودّ عشان تعطيها دبلتها
ام طارق : ود يابنت تعالي
ريم : ود تعالي امي تناديتس
ود : هلا وش فيكن كنت بالمطبخ
ام طارق : امسكي هذي دبلتس قبل شوي جاء عساف عطاني اياها
ريم : افتحيها وريني شكلها
فتحت ود العلبه و شافت الدبله و كانت حلوه
ام طارق : والله حلوه الدبله تستاهلها بنتي
ريم : حلوه على يدتس تتهنين
ود بضحكة : عقبالتس
ريم : توي انا
ام طارق : قولي ان شاء الله و امشي ساعديني ب انزل الصندوق
ريم بزهق: طيب طيب ابشري
اما ود الي فرحت مره بالبدبله و لبستها بحكم انها خلاص مخطوبه لازم تلبسها
_______________________________
عساف و هو رايح للمسجد كان لابس الدبله من اول ما طلع من محل الذهب و كان يقول ياليتس انتي يا سلمى بس الشكوى لله
_________________________________
قبل عرس تركي بيوم و الكل متحمس و العيال يفرشون الفرشات و يحطون الانوار بالديره عشان عرس تركي
وببيت ام تركي بالحوش الكبير يجهزن اغراض العرس و كلن لاهي بشغله عشان عرس الحريم ببيتهم ومن بكرا ام وليد و بناتها و رهام و ام يوسف راحن لبيت ام تركي و غزال و امها وصلن بعد العصر للبيت
حنين : اشكالنا تجنن يا بنات
رهام : اي والله كل وحده لون ماشاءالله
ساره : ياحلوي بس
نوره : اقول اسكتي والله كلنا حلوات
ام وليد وهي تنادي البنات : تعالن يا بنات العروس وصلت
راحت البنات يدخلن غزال و يساعدنها لانها لابسه فستان عروسه
رهام : طالعه قمر يا غزال
ام عيسى بضيق : الله يوفقتس يارب
ام تركي : لا تتضايقين يام عيسى بنتس عند اهلها الثانيين
غزال : تكفون اسكتوا والله بصيح
ساره : خلاص بنسكت بس لا يخرب مكياجتس
حنين : يلا يلا خلنا نجلس الضيوف بدوا يجون
و تجمعن حريم الديره و جت ام احمد و سلمى و صيته و ام ماجد و بنتها مجد و ام سليم و ام يوسف و ام طارق و بناتها
رهام : بنات شوفن صيته هذيك الي جالسه جنب ام عيسى
ساره : ياقدمي صيته متغيره صايره سمنانه
نوره : شوفن شكل مجد حلو عليها الفستان
حنين : هذي قليل اشوفها بس حلوه
ساره : هذيك سلمى الي ورا ام سليم
رهام : اي هي
نوره : وراها مكشره
حنين وهي منبره من جمال ود وهي توها داخله مع امها و اختها
حنين : يا بنات ياحظ عساف شوفن ودّ
ساره : ياحلوها موتن حمر
نوره : على ان فستانها لونه اسود الا انها تهبل
رهام : ماشاءالله شعرها حلو
ام وليد : بنات هذي ام طارق صح
حنين : اي يا عمه
راحت ام وليد تسلم على ام طارق و بناتها و راحن معاها ساره و نوره
ام وليد وهي تسلم عليهن : ماشاءالله ياحلوكن
ام طارق : ماعليتس زود انتي وبناتس والله
ساره وهي تهز كتف ود : ما اقول الا ياحظ عساف
ودّ وهي تضحك : اكيد ياحظه
نوره : وش فيكن تضحكن
ريم : يا بنات الطقاقه جت ادخلن يلا
دخلن البنات و سلمى على طول حطت عيونها على ود تبي تستغزل الفرص و تكلمها بس ماقدرت لان ودّ جالسه عند امها
اما عند الرجال الي بدوا بالعرضه و يقولون
عريسنا يا بدر بادي
و عريسنا يا بدر بادي دامت لياليك السرور
و عريسنا يا عطر زاهي غلب على كل العطور
جينا بمنقاش الأيادي نخرق بها عين الحسود
يمينها جات بيمينه بأسمى المعاني والشعور
و اخذتها و انت الموفق حوريه من بلاد النور
و تعيشوا فيها بالسويه عقبال من عندي حضور
يالله سألتك العطية تجعل حياتهم سرور
و الختم صلينا على أحمد نبينا مدى الدهور
وكان تركي واقف و جنبه ابوه و على اليمين عيسى و عقب الشباب و عمه ابو وليد
وكان عساف يرقص بالسيف هو و يوسف ويغني مع العرضه و فرحان و الكل مبسوط وعقب ما انتهت العرضه بدوا بالطبل
و فجاة ابو تركي ارسل عساف لبيتهم عشان يجيب مفتاح السياره حقت تركي و اول ما راح عساف لبيت عمه و دخل من عند الباب راح لجهة الصاله عشان بياخذ المفتاح من غرفه تركي
و كانت ود جالسه تشوف البنات وهن يرقصن و قامت تبي تروح تعدل شكلها و رايحه للصاله فجأة عساف طلع بوجها و كلهم انصدموا و عساف عرف انها ودّ بسبب الخاتم الي بيدها و هي ود عرفته استحت ود و بسرعه رجعت اما عساف بقى واقف بمكانه منصدم بعدها طلع و اول ما طلع يحاول يستوعب الي شافها ودّ لان انصدم من جمالها ! كان عساف يقول بينه و بين نفسه وش الزين الي شفته انا معقول كل هالجمال ب ودّ اما ودّ الي كانت منصدمه و استحت مره من عساف ان شافها و زعلت ان كيف هي ما انتبهت ان ممكن يكون فيه احد بالبيت و بنفس الوقت استغربت عساف وش يسوي هنا
_______________________________
رجع عساف للعرس و اعطى المفتاح لتركي و بلغ عمه و كمل رقص مع الشباب و عند الحريم كانت الطقاقه لافته انتباهها ودّ و صارت تقول اللي لابسن الثوب الاسود ليه يتغلى علينا ما يقوم يرقص و فهمت ودّ انها المقصوده و اول ما قالت الطقاقه العيون وساع و البشره حرير قامت ود ترقص و رقصوا معاها كم بنت بس كانت ود احلاهن و الكل يقول ياحظ عساف فيها و سلمى كانت منقهره و زاد كرهها زياده يوم شافت ام وليد و بناتها يعاملون ود كأنها بنتهم و توعدت فيها
__________________________________
انتهى العرس و كلن راح بيته الا ام عيسى ماراحت من عند ام تركي تبي تودع بنتها و تروح و رهام نامت عند اهلها اليوم
جاء المعرس تركي و شاف عروسته غزال و سلم على اهله و ام عيسى و غزال كذالك و ودعوهم وراحوا للفندق عشان من عقبها يسافرون و بالطريق كانت غزال مستحيه تتكلم و تركي سكت عشان م يحرجها وبعد مدة وصلوا للفندق نزلوا و اول ما دخلوا قال تركي : ادخلي شفيتس مستحيه
دخلت غزال و جلست على اما تركي الي قال ان بيطلب عشاء عشان يتعشون
تركي : بطلب عشاء لنا اذا ودك تبدلين بدلي
غزال : تمام
تركي : و تراتس حلوه ماشاءالله
غزال : شكرا
راحت غزال تبدل و كانت ما تدري تقول اتكلم ولا اسكت ولا وش اسوي و اول ما طلعت و جلست وصل العشاء
تركي : على جيتس جاء العشاء لا تقولين ما تبين كلنا بنتعشى
غزال : طيب ابشر
كانوا يتعشون و ساكتين فجاءة قال تركي : شرايتس بالشرقيه نروح لها
غزال : حلوه والله عادي
تركي : اجل بكرا الصباح نطلع لها
غزال : خلاص ان شاء الله بس تركي الاغراض كلها موجوده
تركي : اي كلها تطمني
بدت غزال ترتاح مع تركي والتوتر بدأ يخف و كانت مره مبسوطه على اسلوب تركي معاها و تركي اخذ قلبه جمالها و عقب نترك العرسان لحالهم🌚
________________________________
بغرفة عساف و فراس و كان فراس نايم و عساف منسدح و يهوجس بموقفه مع ودّ
عساف بينه وبين نفسه : اللي شفتها اليوم ودّ ولا مين بس نفس الخاتم الي عطيته عمتي تعطيه ودّ اذا مو هي الله يستر عليها و طول الليل عساف يهوجس الى ما نام
________________________________
الصباح عند اهل تركي تعبانين من العرس امس و كلهم جوعانين قامت ام تركي و البنات يجهزن الفطور اما عزام كان يتصل على تركي يكلمونه
عزام : هلا والله بالمعرس
تركي : هلا فيك عزام شلونك
عزام : انا بخير انت علمني اخبارك
تركي : ابد تمام التمام بس عطني ابوي ولا امي
عزام بطقطقه: اي ماتبيني بس هاك ابوي
ابو تركي : تركي شلونك و انا ابوك
تركي : بخير يبه و غزال بعد بخير
ابو تركي : ياجعله دوم ها بتروحون للشرقيه
تركي : اي يبه انا دقيت عليكم ابلغكم اني بمشي ادعو لنا
ابو تركي: الله يستر عليكم كم يوم و تجون
تركي : اسبوع و نجي ان شاء الله بس يبه سلم لي على امي و خواتي وقول لهن بدق شوي اكلمهن
ابو تركي : ابشر و انا ابوك يلا مع السلامه
تركي : مع السلامه
راح ابو تركي يبلغ ام تركي و البنات ام تركي بخير و يسلم عليهن و بيدق شوي يكلمهن
رهام : ياحياتي الله يوفقهم
حنين : يروحون بالسلامه
ام تركي : يازينه وليدي المعرس الله يوفقه
اما عند غزال الي اتصلت على امها و اخوها تطمنهم عنها و بيسافرون وتأكدت انها طمنتهم و قفلت
و عند تركي الي لقى اتصال من عساف و رجع دق عليه و طلع من الغرفه عشان ياخذ راحته معاه
عساف : هلا بالعريس الي ادق عليه ما يرد
تركي بضحكة : يخي كنت اكلم اهلي بس سم وش عندك
عساف : انت اللي علمني وش عندك وش صار ها توفقت ان شاء الله
تركي : لا ابشرك الامور طيبه و الحين بطلع للشرقيه
عساف : توصلون بالسلامه يارب بس متى ترجع
تركي : اسبوع و نرجع
عساف : بتفقدني اسبوع يلا ترجع على خير
تركي : طيب علمني انت شعندك انا علمتك
عساف قال لتركي موقف الي صار له و قاله ان متاكد ان هذي ودّ
تركي : عاد بيني وبينك كنت قاصد ولا لا
عساف : يابن الحلال اقولك فجاة القى بنت قدامي والله حتى ماكنت بعرف انها ودّ الا لو ماشفت الخاتم
تركي : ياحليلها لابسه خاتمها
عساف بضحكة : ياغبي بنت مخطوبه و مملكة اكيد بتلبس خاتمها
تركي : طيب اسمع بسكر الحين تاخرت على غزال اذا رجعت نتكلم بكل شيء يلا مع السلامه
عساف : استودعتكم الله
____________________________________
بالسياره يسولفون غزال و تركي
غزال : تركي كم كيلو و نوصل
تركي : مطولين شوي يمكن ٤٠٠ كيلو
غزال : يوه بصدع كذا
تركي : نامي شوي طيب
غزال : مافيني نوم
تركي : بشغل اغاني نغير جو
_______________________________
بعد مرور ثلاث ايام و كان اليوم الجمعة بدأ ابو وليد يبني جهة عساف و ودّ و قرر ابو يوسف يسوي عزيمه بالبر اذا رجع تركي و بلغ ابو وليد و ابو تركي ان يوم الثلاثاء ان شاء الله يطلعون وافقوا الكل و ينتظرون تركي متى يرجع بالسلامه
.
.
انتهى البارت ✅ عطوني رأيكم عن الاحداث❤️‍🔥