يالضحكة اللي تضوي سنيني

البارت 30

بعد مرور اسبوع ونص وكان اسبوع هادي للديره كلها و مثل الروتين المعتاد بكل البيوت
_________________________________________
يوم الاثنين بعد صلاة العصر ببيت ام يوسف بالمجلس
جالسة تتسمع الراديو الا يدخل يوسف بيكلم امه عن موضوع
يوسف : يمه انتي هنا
ام يوسف : اي و انا امك تعال
يوسف جلس عند امه : يمه بقولتس شيء ابيه وانتي و ابوي تبونه من زمان
ام يوسف : عسى خير
يوسف : خير ان شاء الله
ام يوسف : طيب تكلم
يوسف : يمه انا نويت اتزوج
ام يوسف بفرحة : والله احسن خبر الحين اخطب لك بنت الحلال
يوسف : لا يمه انا فيه وحده ببالي ابيها
ام يوسف باستغراب: منهي البنت
يوسف : نوره بنت خالي
ام يوسف الي فرحت : تقول الصدق والله ونعم من اخترت و اصلا هذي الي كنت بخطبها لك
يوسف : يعني موافقه
بنص كلامهم دخل عليهم ابو يوسف و جلس عندهم
ابو يوسف : وش صاير
ام يوسف : ابشرك يوم نوى يتزوج و يبي نوره بنت اخوي
ابو يوسف : والله الساعه المباركه و يازين من اخترت
يوسف : الله يخليكم لي
ابو يوسف : اجل بكرا بعد المغرب نروح لهم نخطب
ام يوسف : ان شاء الله اكيد
يوسف : تم على خير 
طلع يوسف من البيت و راح عند عيسى بالمحل و بلغه عن الخبر
عيسى الي حضن يوسف : اخيرا بفرح فيك 
يوسف بضحكة : عقبالك يارب
عيسى : قريب قريب
يوسف : شكلك ناوي
عيسى : طيب علمني انت صامل على نوره
يوسف : اي اكيد انا قلت لك هي تبيني و انا ابيها
عيسى : اجل الله يوفقكم
يوسف : اجل اسمع انا بروح للمحل و بكرا بالليل اقولك كل شيء يصير
عيسى : خلاص تم
طلع يوسف و راح لمحلهم
_________________________________________
بالليل عند ودّ بغرفتها الي كانت بمكالمه مع غزال
غزال : اجل اسمعي يمكن ما تبي تقولتس
ودّ : تقولي عن ايش ترى كل شيء واضح
غزال : والله غريبه من رهام
ودّ : بكيفها تبي تقولي تقول
غزال : المهم انتي اتركيها يمكن تقولتس اليومين هذي
ودّ : يمكن صدق
غزال : علميني كيف عساف معاتس
ودّ : ابد والله مثل العسل وانتي تركي
غزال : تركي حبيبي الله يخليه لي بس
ودّ : اثقلي يا بنت
غزال : حليل مره معاي
ودّ : يعني انا عساف نذل معاي مثلا
غزال : ودّ انتي ثقيله ما تعبرين
ودّ : اقول اسكتي انتي مبالغه
غزال : اسمعي احس تركي جاء بقفل مع السلامه
ودّ : مع السلامه
قفلت غزال من ودّ و شافت تركي الي دخل وكان مصدع مره
غزال : بسم الله عليك وش فيك
تركي : مصدع مرهه
غزال : طيب تروش و نام يمكن يخف
تركي : بتروش و انتي جيبي لي فيفادول تكفين
غزال : طيب ابشر
دخل تركي يتروش و اول ما طلع لقى غزال جايبه مويا و فيفادول اعطته و بسرعه غط بالنوم و هي نامت بعد
اما عند ودّ الي كانت جالسه بالحوش الي عند غرفتها و رجعت للغرفه و لقت عساف نايم ما حبت تزعجه و نامت علطول لكن لف عليها عساف و انصدمت انه قايم مو نايم
ود : انت مو نايم
عساف : شفتس مو موجوده ثلت انتظرتس
ود : يا سمجك
عساف : اقول يالفاهمة ما ودتس تنامين
ود : الا خلاص بنام
عساف : اخمدي يلا اجل
ود : تصبح على خير
عساف : وانتي من اهله يا حبيبتي
لفت ود على الجهة الثانيه و ابتسمت اول ما سمعت عساف قالها كذا ونامت نومه حلوه
________________________________________
من بكرا الي ابو يوسف بلغ ابو وليد انه بيجيه بعد المغرب و ابو وليد قال لأهله بس فجأة طق باب ابو وليد و راح يفتح عساف فتح الباب ولقى ابو سرور و عايلته معاه
عساف : ابو سرور ولا انا غلطان
ابو سرور الي ابتسم وقال : لا والله ما انت غلطان يا عساف
عساف الي سلم عليه : يا هلا و مرحبا
سرور : يا هلا فيك والله
عساف : اقلطوا اقلطوا حياكم الحريم من هنا الطريق
دخل عساف و الضيوف معاه و دخلن الحريم عند الحريم بالصاله و استقبلهن ام وليد و ودّ و رهام
ام وليد : يا هلا والله حياكن الله
ام سرور : الله يحيتس يالغاليه
ام وليد : شلونتس شخبارتس
ام سرور : بخير الحمدالله انتي شلونتس وشلون البنات
ام وليد : ابد الحمدالله بس هذولي بناتس صح
ام سرور : اي هذي عزيزه الكبيره و الصغيره تسنيم
ام وليد : ماشاءالله الله يحفظهن
ام سرور باستغراب : هذي رهام اعرفها لكن هذي المزيونه مين
ام وليد : هذي ودّ زوجة ولدي عساف
ام سرور : ماشاءالله مزيونه وشلونتس يا ودّ
ودّ : الحمدالله بخير يا خاله
ام سرور : جعله دوم
رهام : كيف الطريق ؟ مهو متعب عليكم ان شاء الله
ام سرور : لا والله خفيف ما ابطينا
رهام : اشوى
ام سرور : لكن يام وليد بناتس وين
ام وليد : الحين يجن
بالمطبخ عند نوره و ساره الي يجهزن القهوه و الشاي حقت الحريم و الرجال و عندهن فراس
فراس : كثرن الفناجيل الرجال واجد
ساره : اصنع لك فناجيل يعني خلاص حطيت على عددكم و زود
نوره : وهي صادقه خلاص عاد ما بقى الا تاخذون فناجيل الديره كلها
فراس : عطني الاغراض وانتن ساكتات
دخلت عليهم ودّ الي معصبه : وينكن انتن
ساره : يا بنت الحلال ذا ازعجنا خلص الفناجيل علينا
ود : طيب يلا امشن حتى عمتكن ام يوسف جت
نوره : امانه
فراس : اخرتني على الرجال لدرجة تجمعوا كلهم
راح فراس يسلم على ابو يوسف و يوسف و كان بالمجلس هم و ابو سرور و سرور
اما عند الحريم الي دخلن نوره و ساره يسلمن على الموجودات و جلسن معاهن
ام يوسف : شلونتس يام سرور
ام سرور : ابد بخير لكن انتي وينتس غاطه
ام يوسف : اشغال الدنيا
ام سرور : الله يعين
ام يوسف : اي والله
كانت ام يوسف فرحانه طول الوقت وهي تضحك و تسولف و واضح كأنها تنتظر شيء يصير لان فرحتها مو طبيعيه هالمره و مو زي كل مره هالمره غير عكس ام سرور الي كانت هاديه
اما عند الرجال الي كان بيتكلم ابو يوسف و يطلب نوره ليوسف لكن سبقه بالكلام ابو سرور و تكلم وهو ما يدري اصلا ان ابو يوسف و يوسف جايين عشان الموضوع مثلهم
ابو سرور : دام الكل هنا انا عندي لك طلب يابو وليد
ابو وليد : سم يابو سرور
ابو سرور : والله انا يشرفني اني اطلب يد بنتك الكريمه نوره لولدي سرور على سنة الله و رسوله
ابو وليد : والله الساعه المباركة و الشرف لنا والله
كان الخبر و الكلام الي سمعوه ابو يوسف و يوسف زي الصاعقه عليهم و كانوا منصدمين و الكل لاحظ ان ابو يوسف و يوسف متضايقين و سكت ابو يوسف و يوسف ولا كأنه صاير شيء اما عند ابو وليد الي طلع هو و عياله ينادون ام وليد و البنات و كانت ام يوسف فرحانه ما كانت تدري وش قاعد يصير اما عند ابو وليد الي قال كل شيء لأم وليد و البنات اللي سمعن وش قال ابوهن لأمهن و كانت نوره بحالة صدمه ولا تقدر تسوي شيء لان اذا رفضت ابوها ماراح يوافق و بيزعل عليها ولا تدري وش تسوي
ابو وليد : نادوا نوره لي
عساف : انا بروح اناديها
راح عساف ينادي نوره و لقاها مع ساره واقفه منصدمه
عساف : نوره ياعيني امشي ابوي يناديتس
نوره الي كانت مو معاهم ولا تسمع عساف وش يقول
عساف وهو يهز نوره : هيه انتي اكلمتس
نوره : هاه وش تبي وش تقول
عساف: اقول ان ابوي يناديتس امشي معاي
نوره : طيب طيب
راحت نوره مع عساف و كانت خايفه ترفض و ابوها يوافق بدالها لان عارفه ابوها ماراح يوافق على رأيها اذا رفضت
ابو وليد : اسمعي يا نوره فيه خطاب جايين يخطبونتس وهو ابو سرور لولده سرور و النعم فيهم و أعرفهم شخصيًا و انا ابوتس وش تقولين و ان شاء الله رايتس الموافقه
تضايقوا العيال من كلام ابوهم ان ما اعطى حق نوره انها توافق او لا 
ابو وليد : هاه وش قلتي
نوره بخوف : م م موافقه خلاص
ام وليد : مبروك ياحبيبتي
ابو وليد : كفو يا بنيتي
راح ابو وليد اما وليد و عساف و فراس جلسوا مع اختهم و حسوا انها مو موافقه ولا تبيه
وليد : ودتس تقولين شيء
عساف : نوره اذا مو موافقه قولي لنا
ام وليد : وين مو موافقه كذا يضربها ابوها
عساف: يمه الله يهديتس ترى نوره الي بتتزوج مو ابوي
فراس : وهو صادق يمه المفروض ياخذ رايها
ام وليد : روحوا الحقوا ابوكم و اسمعوا الكلام
العيال راحوا عند ابوهم و اول ما دخلوا سمعوا ابوهم يقولهم ان نوره موافقه و بالجانب الثاني بنفس المكان انصدم يوسف حس بالخيانه و بالاهانه بنفس الوقت زعل ان ليه نوره توافق المفروض ترفض مو هي تبيني مو تحبني كان كثير اسئله بعقل يوسف و ابو يوسف كان يمسك كتف يوسف وهمس له ان يعدي الليله على خير اما عند الحريم الي اول ما سمعت الكلام ام يوسف انصدمت ولا تدري وش تقول و ودّ كذالك حست ان نوره مو موافقه و زعلانه مرههه
ام سرور : الف الف مبروك 
ام وليد : الله يبارك فيتس
رهام : مبروك نوره مبروك يام سرور
ام سرور : الله يبارك فيتس
نوره كانت ساكته و هاديه عكس كل بنت بيوم خطوبتها تكون فرحانه و مبسوطه و الكل يبارك لها و ترد عليه كانت اسوء ليلة عليها و شافت عمتها و درت انها زعلانه عليها ولا تدري وش تسوي نوره تحس اذا شافت ام سرور كأنها شايفه النار
عزيزه : ياحظ سرور فيتس
تسنيم : اي والله قمر ماشاءالله
ساره : تسلمن يا حلوات
كانت ساره و ام وليد حاسات بنوره انها ما تبي سرور لكن ما بيدهن شيء اما ودّ الي كانت تفكر ب اكثر من طريقه انها تفسخ الخطوبه بس ما قدرت تسوي شيء غير انها تصبر
و عند الرجال الي وليد سمع عمته ام يوسف تنادي يوسف
وليد : هلا عمه تبين شيء
ام يوسف : اي يا وليدي ناد لي يوسف
وليد : ابشري
دخل وليد المجلس و ناد يوسف و قال له ان امه تناديك
طلع يوسف و راح لأمه الي كانت شوي و تصيح على حظه
يوسف : هلا يمه
ام يوسف : انا ما تحمل بكلم اخوي بقوله ان انا كنت جايه اخطب نوره
يوسف : يمه اسكتي لا تسوين شيء تكفين اذا هي موافقه من نفسها خلاص اسكتي كأننا جايين عندهم زي اي يوم
ام يوسف : كيف بقدر اسكت ياوليدي
يوسف : تقدرين يمه
ام يوسف : الله يرزقك بغيرها و انا امك
يوسف : يمه انا برجع عند الرجال
رجع يوسف و رجعت ام يوسف عند الحريم وكان نقاش آم يوسف و يوسف سامعته كله ودّ لانه عند حوشها و هي كانت بغرفتها و درت ان يوسف كان ناوي يخطب نوره اليوم و سكتت و بعد مرور ساعتين جاء وقت العشاء و راحت ام يوسف و زوجها و ولدها اما ابو سرور و عايلته مشوا لديرتهم عقب ما تمت الخطبه
بالليل بغرفة نوره و ساره كانت نوره ساااكته وهاديه بعكس ساره الي كانت تحاول تغير من جو اختها بس شافت انها متضايقه مره فضلت انها تنام و تتركها لحالها ما تبي تزعجها بعد دقيقتين دخلت ودّ الغرفه و نادت نوره و طلعت نوره لها و راحن للمطبخ
ودّ : اسمعي بقولتس شيء
نوره : وشو
جاء عساف و فراس و وليد دخلوا عندهن و استغربوا انهن سكتن
فراس : شعندكن هنا
نوره : ابد خلصنا تنظيف و الحين بنروح
وليد : الصراحه انا مكسر ابوي اليوم كارفنا
فراس : اجل بروح انام
وليد : و انا بعد
عساف: انا بعد بروح انام ود اذا جيتي بالله لا تزعجين
ود : طيب
راحوا العيال و جلست نوره تسأل ود وش تبي : ود شفيتس
ود : مقدر اقولتس الحين خليها بكرا
نوره : لا الحين
ودّ الي وطت صوتها : يابنت مقدر خليه بكرا اخاف واحد من اخوانتس يدخل علينا فجأة نفس قبل شوي
نوره : طيب تصبحين على خير
ود : وانتي من اهله
راحت كل وحده لغرفتها عشان تنام
.
.
انتهى ✅ لاتنسون تعطوني رأيكم بأحداث البارت❤️‍🔥❤️‍🔥