رجع فراس و افطروا و عينوا من الله خير والكل تفرق العيال راحوا للسوق و البنات و ام وليد بالبيت و ابو وليد راح عند اخته ام يوسف يسلم عليها
رهام : بنات بروح انام والله راسي مصدع مدري وش بلاني اليوم
ساره : انا بعد بلحقك
نوره : ماشاءالله وانا اقعد لحالي
ساره : نامي معنا
ام وليد : انا بروح لام عيسى بوسع صدري الى م يجي وقت تجهيز الغداء واجي
نوره : يمه خوذيني معاك م فيني نوم
ام وليد : خلصي اللي بيدينتس عشان تروحين معاي
نوره : بس شوي واخلص
راحن رهام و ساره ينامن اما ام وليد و نوره طلعن من البيت و هن يمشن متجهات لبيت ام عيسى شافت بالطريق ام سليم
ام سليم : ام وليد ولا انا غلطانه
ام وليد : لا م انتي بغلطانه وانا اختس وش اخبارتس يام سليم
ام سليم : والله اني بخير الحمدالله انتي وينتس مختفيه م تنشافين الايام هذي
ام وليد : والله اشغال البيت و تعرفين بيتنا م يفضى من الضيوف
ام سليم : اجل معذوره بس من هذي اللي معتس رهام ولا وحده من بناتس
نوره : لا انا نوره كيفتس ياخاله
ام سليم : هلا والله ببنيتي نوره كويسين الحمدالله
نوره : جعله دوم يارب
ام وليد : يالله انا بروح لدربي تبين شيء
ام سليم : لا سلامتس ولا تقطعون سيروا علينا
ام وليد : ابشري ابشري
راحت ام وليد و بنتها لام عيسى اما بالسوق كلن لاهي بمحله و بمحل ابو طارق خصوصا كان طارق ينزل العطورات مع العمال و يرتب هو و عاملهم اسعد اللي يعاونه بالمحل وفجاة يجي واحد ويتلفظ على طارق و ابو طارق
طارق : خير يالطيب وش فيك
.. : م فيني شيء غير اني منضغط منك و من ابوك الشايب
طارق : لو سمحت الزم حدودك و حسن الفاظك تراك بمحلي
.. : واذا كنت بمحلك وش بتسوي ! انا هينا اتكلم محد يراددني
طارق : مين انت عشان تتكلم معاي بالطريقه هذي م تستحي استح على عمرك ودامني محترمك من الاول وساكت عنك اذلف عن محلي
تجمعوا اهل السوق على الاصوات وكلهم مستغربين !
YOU ARE READING
يالضحكة اللي تضوي سنيني
General Fictionروايتي تصير فيها احداث كثيره و من ضمنها شاب يقع في حُب بنت جيرانهم لكن تصير بينهم مشاكل يضطر انه يتزوج بنت غيرها .. هل راح يقدر ينسى حُبها او زوجته راح تنظلم معاه
