يالضحكة اللي تضوي سنيني

البارت 20

بعد ساعه غرفوا العشاء و تعشوا الرجال و الحريم و بعد نص ساعه كلن رجع بيته اما عند ام وليد و البنات الي اول ماراحوا الكل قالت ام وليد لبناتها
ام وليد : قومن يا بنات نظفن البيت و المطبخ
ساره : ياربي تعبت يخي
ودّ: تطمني بشتغل معاكن
ام وليد : لا يا ودّ ماراح تشتغلين
ود : معليش يا عمه بس بشتغل والله انا من نفسي احب اتحرك
نوره : اجل المطبخ عليتس
ودّ: لعبتي المواعين اخلصهن بسرعه
رهام : ياحظتس ماشاءالله انا بطيئه
نوره : انتي ولدي و ان شاء الله يصير خير وقتها
ود : الله يهون عليتس
رهام : امين و عقبالتس
ام وليد : اي ان شاء الله عقبال ود
ودّ انحرجت والي تذكرت علاقتها ب عساف : امين
ساره : اجل انا و نوره بننظف البيت وانتي المطبخ
ود : طيب
بدن البنات يشتغلن و خلصت ساره شغلها و كانت جالسه بالصاله هي و رهام و ام وليد و بقى ود و نوره ما خلصن
جاء عساف و استغرب ود مو موجوده
عساف : وين ودّ
ود الي سمعت صوته و سمعته وهو يسأل عنها
رهام : بالمطبخ تلقاها
عساف : تمام زين
راح عساف للمطبخ و لقى ودّ توها مخلصه و بتطلع بس وقف عند الباب و قعد يكلمها
ودّ : تبي شيء
عساف : لا سلامتس بس بقولتس اني بروح مع تركي شوي و ارجع
ودّ : طيب خلاص
عساف : يلا مع السلامه و صح ترى يمكن اتاخر شوي
ودّ : مو مشكلة عادي
طلع عساف من البيت و يكلم نفسه يقول ذي ليه ثقيله كذا
اما عند البنات الي اجتمعن اخيرا و كان البيت فاضي من العيال مافيه احد غير البنات و ام وليد و ابو وليد ناموا
ساره : دام ما فيه الا حنا امشن للحوش
نوره : روحن انا بجيب الشاي
ودّ و رهام و ساره راحن للحوش و عقب دقايق جت نوره ومعاها الشاي و الفصفص
ودّ : متى القومه بكرا الصبح
ساره : دايم نقوم ٨ الصبح
ودّ : اشوى نفس وقت اهلي
رهام : الحين انتي مو لحالتس عساف معاتس
ود : اي عارفه عشان كذا سألت
نوره : يوه عساف يرفع الضغط الصبح
ساره : و يقعد يقول وش مسوين فطور
نوره : و لازم الشاي حالي حقه
ود تضحك من كلام نوره و ساره على عساف
رهام تطقطق: تضحكين على عساف
ود : اي شسوي البنات ضحكني
نوره : نشوف بكرا تضحكين ولا لا
ساره : اشوفتس الصبح
ود : بسم الله شفيكن امزح معاكن
رهام : اقول غيرن الموضوع وخل نتفق وش نسوي دام بكرا فاضيات
قعدن البنات يسولفون مع بعض بالحوش اما عند عساف الي راح القهوه و كان جالس هو و تركي يسولفون
تركي : كيف ودّ معاك
عساف : ثقيله بس ياولد مزيونه
تركي : عاد غزال ذاك اليوم قالت لي ان ودّ مزيونه
عساف : وليه تسأل عنها
تركي بضحكة: عادي قلت أسال
عساف : الزبده ان افكر اغير اسلوبي معاها
تركي : وش بتهبب انت
عساف : ياحمار منب مسوي شيء بتقرب منها و ب اكسر الحواجز الي بيننا
تركي : قل كذا يخي بس ليه وش الطاري
عساف : خلاص بعيش حياتي الى متى ببتل كذا معاها
تركي : احسن شيء و ذيك خلاص لا تفكر فيها ولا تجيب طاريها
عساف : ناسيها ما عليك
______________________________________
عند البنات الي اول ما شافن الساعه ١١ قريب بتصير ١٢ بسرعه شالن الاغراض بيروحون ينامن
رهام : تصبحن على خير
ود : وانتي من اهله
راحت ود لغرفتها و البنات راحت لغرفتهن و رهام كذالك
دخلت ود غرفتها و نزلت طرحتها و بدلت لبسها و اول ما طلعت حست ب طفش و قالت بطلع للحوش شوي الي قدام غرفتها لان م فيه احد غيرها محد بيشوفها و حطت فرشه و جلست تشوف النجوم و تغير جو و بعد نص ساعه فجأة خافت حست احد جاء و كان عساف الي دخل و شافها جالسها
عساف : ودّ ! وش عندتس جالسه هنا
ودّ : طفشت و جلست هنا
عساف : اجل فحزي بجلس جنبتس
فحزت له ودّ و جلس عساف و قال لها
عساف : شكلتس تحبين جلسة الحوش
ود : الصراحة اي
عساف : ليه
ود : مدري بس يخي انبسط
عساف : انا احب اجلس عند الحلال بالليل
ود بصدمة: عندكم حلال
عساف : اي عندنا
ود : بس غنم ؟
عساف : غنم و أبل
ود : الله توي ادري والله
عساف : ويمكن اجيب قرود
ودّ لا شعوري ضربت كتف عساف اما عساف انصدم و ضحك من ردة فعلها و ودّ مثل كل مره تقول انا وش سويت
عساف : وش فيتس خفتي
ود : انت تعرف اني اخاف منهن ليه تجيبهن
عساف : عشان اشوف ردت فعلتس هذي
ود : اخاف يخي
عساف : طيب ما ودتس تنامين الساعه ١
ود : الا بقوم يلا
قام عساف و مد يده ل ود و اول ما شافت يده ما حبت انها تحرجه و مدت يدها له و راحوا دخلوا ناموا
____________________________________
بعد اسبوعين ببيت ام يوسف تسولف هي و يوسف
ام يوسف : يامك ما تفكر تتزوج اخطب لك بنت الحلال
يوسف : يمه والله ما فكر الحين اتزوج اذا قررت قلت لتس
ام يوسف : الى متى يعني بنتظرك يا يوسف
يوسف : يمه تكفين لا تجبريني
ام يوسف : اذا انتهت هالسنه وانت ما تزوجت ترا بزعل عليك
يوسف بتسليك : ابشري يمه ان شاء الله
طلع يوسف و كان يتحلطم من الموضوع و دق على عيسى يكلمه
عيسى : هلا يوسف
يوسف : وينك انت
عيسى : موجود بالمحل وراك معصب
يوسف : يخي امي تبي تزوجني
عيسى : طيب وراك متضايق امك وتبي تفرح فيك
يوسف : طيب انا ما ابي اتزوج الحين
عيسى : وش تنتظر
يوسف : انت وش تنتظر بعد
عيسى : انا بقول لأمي الايام ذي تخطب لي
يوسف : كملت امي اذا عرفت بتزوجني غصب
عيسى : اسمع كلام امك و تزوج و لا تكثر كلام
يوسف : و انا متصل عليك افضفض قلبت ضدي
عيسى : ابي مصلحتك و يلا مع السلامه اشوفك شوي تعال عندي بالبيت
يوسف : طيب
قفل يوسف الجوال و راح لمحلهم
___________________________________
عند ام تركي و البنات بعد العصر
غزال : عمه عادي نروح اليوم للسوق نغير جو
حنين : اي يمه تكفين
ام تركي : وشوله الطلعه اجلسن اليوم بالبيت
حنين : تكفين يمه
ام تركي : لا تبن تروحن عند بنات عمكن ساعه و ترجعين اي
غزال : اجل بنروح لهن
حنين : ساعه يمه و نرجع
ام تركي : لا تطولن يلا روحن
راحن البنات لبيت عمهن و عند ود و ساره و نوره و رهام
ودّ كانت بغرفتها و ساره و نوره جالسات بالصاله و رهام نايمه طق الباب راحت تفتح ساره لقت حنين و غزال
ساره : حنين و غزال ! شجابكن
حنين و هي داخله : طفشانات
غزال : وخري بندخل
دخلت البنات و شافتهن نوره و جلسن عندها البنات
نوره : هلا بنات
حنين : هلا فيتس
نوره : وش عندكن
غزال : طفشانات قلنا نجيكن نقعد ساعه و نروح
حنين : لا تسون شيء بس نبي نسولف و نغير جو
ساره : والله ما اسوي لكن شيء توي منظفه البيت
نوره : طيب وش عندكن من سوالف
غزال : انتن علمنا الحين وين ودّ و رهام
حنين : اي والله وينهن
ساره : رهام اضن نايمه و ودّ بغرفتها
نوره : بتجي بعد شوي هي قالت بتتروش
غزال : عساف موجود ؟
ساره : مدري والله
حنين : اجل بنزل النقاب بس
غزال : ها كيف ودّ معاكن
نوره : عسل والله
ساره : اي والله ود طيبه مره
حنين : عاد انتي يا غزال اقرب وحده ل ودّ
غزال : اي عشان كذا سألتكن عنها لان اعرف طبع ودّ
نوره : ذربه والله ماشاءالله
حنين : رهام وش عندها نايمه الحين
ساره : شكلها تعبانه
حنين : ياروحي هي
بعد نص ساعه كانت ود بغرفتها لحالها تمشط شعرها و بكل هدوء خلصت كل شيء و اخذت طرحتها و راحت عند البنات و انصدمت يوم شافت حنين و غزال سلمت عليهن
ود : هلا والله بنات شعندكن
غزال : هلا فيتس
حنين : ابد طفشانات و قلنا نجي عندكن نص ساعه و نروح
ودّ: حياكن الله تبن اسوي شاي ؟
غزال : لا ياعيني شوي وبنروح اصلا
ودّ: سلامات تروحن يوم جيت
حنين : انتي طولتي بس بنات بعد بكرا تعالو عندنا العصر
ساره : خلاص بقول لابوي شوي و اذا وافق اتصلت بالتلفون على تلفونكن
حنين : وانتي ودّ
ودّ : بكلم عساف اكيد و ان شاء الله بجي
غزال : خلاص نشوفكن بعد بكرا الحين مع السلامه تأخرنا شوي
حنين : يلا بنات مع السلامه
راحن حنين و غزال اما عند ساره و ودّ و نوره جالسات يسولفن
ود : وجع ليه ما ناديتني
ساره : قلنا والله انتس تتروشين و يمكن لسى ما خلصتي
ود : الا مخلصه بس كنت امشط شعري
نوره : راحت عليتس هالمره
ود وهي تضرب كتف ساره و نوره : اوريكن هين
دخل عساف و وهو يقول : وش فيكن وش سويتن ل ودّ
نوره : اي تدافع معاها على خواتك
عساف : والله عاد ودّ زوجتي
ساره وهي تضرب كتف ود : اي هذي زوجتك
عساف وهو يسحب ودّ عنده : وخري لا تضربينها
ود لساره و نوره : تستاهلن
عساف الي اخيرا ود تفاعلت معاه بالموقف و حط يده على كتفها و قال : اي وش رايكن تطلعن معاي الحين اوديكم على السياره للبقاله
ود الي لفت عليه : صدق
عساف : اي والله يلا قومن البسن عباياتكن و نقاباتكن و الحقني بالسياره
نوره : سيارتك جيب ماراح تكفينا
عساف : الا تكفي انا اسوق و جنبي انتن عادي تكفي
ساره : من الحين انا عند الباب
ود : لالا انا
نوره : ما يهمني اهم شيء اطلع
ساره : انا عند الباب بروح البس
راحن البنات يلبسن و ودّ راحت تلبس و اول ما لبسن طلعن عند عساف و تهاوشن ودّ و ساره على الباب
ود : انا عند الباب
ساره : اقول دزي انا
نوره : الحمدالله و الشكر بس عساف تعال حلها بينهن
عساف الي نزل و قال : وش فيكن
ود : ابي عند الباب و ساره بعد تبي الباب
ساره : انا بجلس عند الباب
ود : ليه انتي
ساره : انتي دايم مع عساف و تركبين عند الباب انا من زمان ما جلست
عساف الي استغل كلام ساره و يبي ود تجلس جنبه :اجل خلاص ودّ جنبي و ساره عند الباب يلا اركبن
ود الي تتحلطم : ياربي ابي عند الباب
ركبن البنات و ساره فرحانه انها عند الباب و قالت ل ود : انا عند الباب
ود : اوريتس خلينا نرجع للبيت
نوره: خلاص اسكتن
عساف : ود ارفعي رجلتس عن البنزين عشان بدوس
ود : طيب
عساف الي همس ل ود : وش فيتس زعلانه
ودّ: مو زعلانه
عساف : تبين عند الباب
ود : اي بس خلاص ساره بتجلس
عساف : انتظري بعطي حل مُنصف للكل
عساف قال بصوت عالي : الحين ساره عند الباب و اذا رجعنا من البقاله ود تصير عند الباب و كذا حل يرضي الكل
نوره : اي كذا عدل بينهن
ساره : اهم شيء عند الباب
عساف بضحكة : مو صاحية
ود الي ابتسمت يوم عساف قال كذا و لفت عليه قالت له : عساف شكرا
عساف : اخيرا شفنا ابتسامتس يلا انزلي البقاله
نزلن البنات للبقاله و اخذن اغراضهن و راحن يحاسبن بس عساف قال حطن اغراضكن و ارجعن اركبن السياره
راحن البنات للسيارة و جلست ود عند الباب
ساره : اهب يالحظ جلستي عند الباب
ود : والله عاد اخوتس قال كذا
ساره : عشانتس زوجته
نوره : ما ودكن تسكتن
ود : خلاص بنسكت بس بعد بكرا اذا رحنا للبنات بسوي حلا يجنن بيعجبكن
ساره : تحمست خلاص ان شاء الله
جاء عساف و اعطى البنات الاغراض
عساف : وش شريتن انتن
نوره : كل شيء
ود : جبت الكيك الي كيسته ازرق
عساف : اي جبته ما عليتس جبت كل شيء اخذتنه
ساره : مشكور عساف
نوره : اي والله عساف غيرت من جونا شكرا
ود : صادقات ما قصرت عساف
عساف : العفو حسستني امير يلا الحين نرجع للبيت و ضبطن القهوه و الجو الحلو
ود : خلاص انا بسوي القهوه
نوره : اوه اول ما قال بسرعه قلتي بتسوينها حركات يا عساف
ود الي انحرجت و احس ب حر اما عساف الي حس و اخيرا علاقتهم بدت تزين و بدت تصير بينهم ميانه
ساره : يلا امش عساف
مشى عساف و وصلوا البيت نزلوا و اخذن البنات اغراضهن و اول ما دخلوا شافوا ام وليد و ابو وليد بالمجلس جالسين
ابو وليد : وين كنتوا فيه
عساف : يبه اخذت البنات للبقالة و جينا
ام وليد : زين يا بنات سون القهوة
نوره : بتسويها ودّ يا يمه تقول بسويها
ام وليد : خلاص زين
راحن البنات ينزلن عبايتهن اما عند ود بغرفتها الي نزلت عبايتها و نقابها و صارت تعدله لان ما تقدر تنزله عشان وليد و فراس موجودين
دخل عساف و قال لها : تأكدي من اغراضتس الي تبينهم لو ناقص شيء جبته لتس
ودّ : كل شيء موجود شفت و صح عساف شكرا صدق غيرت من جوي خصوصا كنت طفشانه مره
عساف الي قرب من ودّ : ما سويت شيء اهم شيء اشوف ابتسامتس
ودّ الي انخرشت من تقرب عساف و كلامه لها و ابتسمت له : زين شكرا
طلعت و راحت للمطبخ اما عند عساف الي قال وش فيها استحت ذي اروح اجلس عند اهلي احسن
راح عساف عند اهله و جت ودّ بالقهوه مع البنات
وجلسوا يتقهوون و يسولفون سوا
ابو وليد : لي صديق كلمني قبل يومين يقول جايب لنا سمك
ام وليد : وش نوعه يا بو وليد
وليد : يارب انه هامور
ابو وليد : اي هامور
فراس : يا سلااام
عساف : عاد من زمان عن السمك والله مشتهيه
ساره : يارب يطلع حلو
نوره : يبه متى بيجيبنه
ابو وليد : والله ما آكد لي لكن اضن السبت
ود : من بيسويه
ام وليد : انا و نوره
رهام : بس هامور بيجيب يا عم
ابو وليد : اي بس هامور عاد كلكن تساعدن عليه و سوونه
ام وليد : ابشر ان شاء الله
____________________________
بالقهوه عند عيسى و يوسف الي يوسف طول الوقت يتحلطم من موضوع الزواج
عيسى : طيب انت ليه ما تبي تتزوج
يوسف : توي لسى
عيسى : بتصك الثلاثين وتقول توك
يوسف : اي توي
عيسى : اقول قل الصدق امك و انا بعد نبي نزوجك غصب
يوسف : عاد الي يسمعك يقول اني بوافق
عيسى : بتوافق وانت راضي بعد
يوسف بضحكة : والله ذي مستحيله
عيسى : طيب نشوف وقتها بس الحين امشى تعش معاي بالبيت
يوسف : بدق على ابوي اقوله
عيسى: يلا احتريك
.
.
انتهى ✅ عطوني رايكم بالبارت❤️‍🔥❤️‍🔥❤️‍🔥