𝐌𝐲 𝐂𝐚𝐬𝐞 // قــضـيــتــيــــــــے

𝐂𝐡𝐚𝐩𝐭𝐞𝐫 𝟐𝟏

◽صباح جديد..
عيطت لماما علمتها بشنو كاين و حددنا العرس من هنا لشهر .. فرحات بزاف هي وبابا و بداو كيوجدو من دبا !
هيثم تاهو طاير بالفرحة كل شوية كيصيفط مساج يسولني على شيحاجة .. و عائلتو تاهوما ماقصروش ماماه بدات كاتافق مع ماما على كلشي ، باغيين يديرو عرس اسطوري .. : صافي اسهام غير طبعي هادو و كلاسيهوم !
◽غير مشات بديت كانجمع وراقيا باش نرجع للدار .. تابعني بزاف ديال التوجاد و خصوصا الوراق كيدوخو ، قاديت الملف لول و عزلت دكشي لي خاصو فوطوكوبي
خرجت للبالكون نرد فيا الروح و نرتاح غير شوية وسط هاد الروينة.. تا بانت ليا طموبيلتو واقفة قدام لغيزيدونس ! بقيت متبعة ليه العين تا دخل كيهضر فالطيلي .. ثواني حليت الباب و ابتاسم مدوز يدو على شعري باقي مشغول فالطيلي ! گلس فالصالون عاد قطع : زوينة ديالي .. غدا نمشيو نشوفو القاعة لي عجباتك و نختارو الديكور !

[ حرك راسو ] بلاما تشغلي راسك.. شنو درنا فالكساوي ؟
- كسوة وحدة كافية..

-امم.. كانفكر نصايبو شي وحدة على دوقك ولا ؟
- ماشي ضروري.. كاين موديلات واجدين و زوينين !
[ حرك راسو ] مابقا والو غانطلع للإمارات.. وجدتي وراق الفيزا ؟
◽قبل مانجاوبو رجع صونا ليه الطيلي و جاوب مكمل هضرتو ..هكا ولينا كاندوزو الوقت مع بعضياتنا ! گالسين فنفس البلاصة و لكن كل و عقلو فين مشا .. و الا هضرنا كانهضرو غير على التحضيرات .. : بنتي ليا مشغول هاد الايام!

- تجمع عليا الشغل ، كانوجد هنا و لهيه.. ولكن مابقا والو و نتهناو
- نأجلو العرس باش تر-
[ قاطعها بزربة ] لا لا العرس ماداير ليا والو.. الله اودي ، شحال و انا كانتسنا !

[ تنهدات ] وا نتا تعرف.. انا غير خايفة على صحتك !
- ماتخافيش عليا [ ابتاسم ] مزال مطول معاك ..

◽ابتاسمت ليه فالمقابل .. وسرعان مارجع كيهضر على التحضيرات و يوجد هنا ولهيه ، تكا راسو لور بتعب تا بدا كيصوني الطيلي مرة خرى، بغا يجاوب تا حيدتو ليه دايرة سيلونص .. : نساه شوية و رتاح خليني ندير ليك ماساج !
◽ابتاسم عينيه نايمين و باين عليه التعب .. ولكن وسط هاد الروينة كيبان زوين ، بوگوص كتر من اي وقت ! رخا راسو لور ووقفت كانمسد ليه غير بشوية تا شد يدي عندو .. وقف مقابل معايا و طبع عليهوم قبلة مطولا : خاصني نمشي !
◽حركت راسي بايماء واصلة معاه للباب تا خرج ...

🔹دخلت للدار صليت لي فاتني ونزلت كانتسنا ياسين باش نكملو الخدمة.. ضرني راسي بزاف و شدني واحد الحريق حسيت بيه لداخل ديال دماغي ! من قبيلا و انا كانفكر نشعل شي واحد باش يطفي ليا الحريق ولكن لعنت الشيطان و خرجت للجردة گالس فالضلام ...

◽دازو ايام فالتحضيرات وولا روتيني بين الخدمة و العرس .. كلشي كيوجد وماكينش النهار لي يبقا ليا خاوي !
خارجة مع اما وختي كيقلبو فالحوايج من هنا لهيه ، خديت بلاصة معزولة كانقلب فانسطا و كلشي كان كيهضر على الحفل العالمي لي داز فدبي.. التنظيم كان خرافي و تقالو كمونطيرات ايجابية من الاعلام ، للناس لي حضرو و لي تفرجو ...
فرحت بزاف من كمية لي كومونطير الايجابيين لي قريت على هيثم و ياسين ! و بصح دارو خدمة لي توقف العقل وتبهرو .. :
نورة : اجي شوفي اينا لون عجبك فهادو !
◽يلاه غانجاوبها تا شفت سميتو فالطيلي كيعيط .. : ختارو نتوما خاصني ضروري نجاوب..
خرجت برا متحمسة نسمع صوتو .. : هيثم..
- الغزالة ديالي لباس عليك ؟